1. Ana Ŵamboni ŵatatu ŵatwakolasileŵa alosisye camtuli kulupicika kwa Yehofa?

AGANICISYE mbali sitatu asi syasikwatendecela Ŵamboni sya Yehofa. (1) Kamsikana kali kusukulu. Aticala ŵakwe akwasalila ŵanace wosope mkalasi kuti ajigale nawo mbali pakusangalalila cindimba cakucilambo. Kamsikanaka kakumanyilila kuti cindimbaci cangamsangalasya Mlungu, mwamti mwawucimbicimbi kakukana kujigala nawo mbali pacindimbaci. (2) Mnyamata jwasooni akulalicila nyumba ni nyumba. Jwalakwe amanyilile kuti mjakwe jwa kusukulu jwakusiŵaseka Ŵamboni sya Yehofa akusatama nyumba jakuyicisya. Nambo mwangali woga, mnyamataju akwawula kukupoposya pa nyumbajo. (3) Jwamlume jwine akukamula masengo mwakulimbicila pakusaka kulipatila liŵasa lyakwe yindu yakusosecela, nambo lisiku line abwana ŵakwe akumsalila kuti atende yindu yangakulupicika. Atamose akumanyilila kuti masengo mpaka gammalile, jwalakwe akwasalila abwana ŵakwewo kuti ŵakutumicila ŵa Mlungu akusosekwa kuŵa ŵakulupicika soni kupikanila malamusi.—Alo. 13:1-4; Aheb. 13:18.

2. Ana ni yiwusyo yapi yacitukambilane, soni ligongo cici?

² Ana ni ndamo japi jakujiwona mwa Ŵamboni ŵatatuŵa? Komboleka kuti ayiweni yindu yejinji, mpela kulimba mtima soni kuwona mtima. Nambo wosopeŵa alosisye ndamo jimo jakusosekwa mnope jajili kulupicika. Jwalijose mwa ŵanduŵa alosisye kulupicika kwa Yehofa. Jwalijose mwa jemanjaji akukana kasa malamusi ga Mlungu. Kukulupicika ni kukwatendekasisye kutenda yeleyi. Yehofa jwasangalalaga paŵam’wonaga jwalijose mwa jemanjaji ali mkulosya ndamoji. M’wejisoni tukusasaka kwasangalasya Atati ŵetu ŵakwinani. Sambano kwende tukambilane yiwusyo ayi, Ana kulupicika ni cici? Ligongo cici tukusosekwa kuŵa ŵakulupicika? Nambosoni ana mpaka tujendelecele camtuli kuŵa ŵakulupicika mundaŵi jakusawusya jino?

3. (a) Ana kulupicika kukusagopolela cici? (b) Ana ni yisyasyo yapi yampaka yitukamucisye kupikanicisya ngopolelo ja kulupicika?

³ Ana ŵakutumicila ŵa Mlungu akusalosya camtuli kulupicika? Mwakumnonyela Yehofa ni mtima wosope. Yakuyicisya yakwe, ndaŵi syosope akusatenda yindu yakumsangalasya jwalakwe. Kwende tulole yatite pakakamulicisye masengo liloŵe lyakuti kulupicika m’Baibulo. M’Baibulo liloŵe lya Cihebeli lyaŵaligopolele kuti “kulupicika” likusagopolela cindu camtundu, cangalemala kapena kuti cindu cosope. Mwacisyasyo, Aisalaeli paŵapelekaga mbopesi sya nyama kwa Yehofa, Cilamusi casalaga kuti nyamasyo siŵeje syangalemala. * (Lef. 22:21, 22) Ŵandu ŵa Mlungu nganiŵakundaga kupeleka mbopesi ja nyama jajaliji jangali lukongolo, liwiwi, liso soni jakulwala. Yaliji yakusosekwa mnope kwa Yehofa kuti nyamajo jiŵeje jamtundu soni jangalemala. (Mala. 1:6-9) Kuti tupikanicisye ligongo lyakwe Yehofa jwasakaga nyama jamtundu kapena jangalemala, tuwanicisye m’yi. Tujile kuti tukusaka kusuma cisogosi, buku kapena cindu cine cakwe. Nganituŵa tusumile cejonasice kapena cangakwanila. Tukusasaka kuti ciŵe camtundu kapena cosope. Yehofa akusasakasoni m’yoyo. Akusasaka kuti cinonyelo cetu soni kulupicika kwetu kuŵeje kwa mtundu kapena kwangalemala.

4. (a) Ligongo cici mundu jwangali umlama mpaka aŵe jwakulupicika? (b) Mwakamulana ni lilemba lya Salimo 103:12-14, ana Yehofa akusajembeceya cici kwetuwe?

⁴ Ana tukusosekwa kuŵa ŵamlama kuti tuŵe ŵakulupicika? Ndaŵi sine mpaka tulipikaneje kuti tuli ŵandu ŵakulemwa. Kwende tulole magongo gaŵili gakulosya kuti ngatukusosekwa kuŵa ŵamlama kuti tuŵe ŵakulupicika. Ligongo lya ndanda lili lyakuti, Yehofa jwangatamila kulola yakulemwa yetu. Maloŵe gakwe gakusatusalila kuti, “Yikaŵe kuti ulemwa uliwose wa ŵandu akuwulemba Ambuje, Ana ŵani ŵakakutisile kulamula kwa Mlungu?” (Sal. 130:3) Jwalakwe akusamanyilila kuti tuli ŵandu ŵangali umlama, mwamti akusatamila kutukululucila ni mtima wosope. (Sal. 86:5) Caŵili, Yehofa akusamanyilila kuti tukwete malile, mwamti jwalakwe jwangajembeceya kuti tutendeje yindu yanganituŵa tuyikombwele. (Aŵalanje Salimo 103:12-14.) Sambano, ana mpaka tuŵe camtuli ŵakulupicika m’meso mwa Yehofa?

5. Ligongo cici ŵakutumicila ŵa Yehofa akusasosekwa cinonyelo kuti aŵe ŵakulupicika?

⁵ Mpela ŵakutumicila ŵa Yehofa cindu campaka citukamucisye kuŵa ŵakulupicika cili cinonyelo. Cinonyelo cetu pa Mlungu soni kulupicika kwa Atati ŵetu ŵakwinani kukusosekwa kuŵa kwamtundu soni kwangalemala. Naga cinonyelo cetu cikuŵa camti m’yiyi atamose patusimene ni yakulingwa ni kuti tuli ŵakulupicika. (1 Mbi. 28:9; Mat. 22:37) Aganicisyesoni ya Ŵamboni ŵatukambilene kundanda ŵala. Ana ligongo cici jemanjaji ŵatesile yeleyi? Ana kamsikana kala nganikasakaga kusangalala kusukulu? Kapena, ana mnyamata jwasooni jula nganasakaga kulalicila pa nyumbajo? Soni ana jwamlume jula asacileje kuti masengo gakwe gam’malile? Iyayi. Jemanjaji akumanyilila kuti Yehofa akwete ndamo syambone mwamti munganisyo mwawo akusaganicisya mnope yakwacimbicisya Atati ŵawo ŵakwinani. Ligongo lyakuti akusamnonyela Mlungu, jemanjaji akusaganicisya kaje ya jwalakwe mkanatende cisagula cilicose. Mwakutenda yeleyi akusalosya kuti ali ŵakulupicika.

6. (a) Ana ligongo cici tukusosekwa kuŵa ŵakulupicika? (b) Ana Adamu ni Hawa ŵalepele camtuli kulosya kulupicika?

⁶ Ligongo cici wosopewe tukusosekwa kuŵa ŵakulupicika? Tukusasosekwa kuŵa ŵakulupicika ligongo lyakuti Satana akusakayicila ulamusi wa Yehofa soni akusatukayicila kuti nganituŵa  tuŵele ŵakulupicika kwa Yehofajo. Lilayika lyakwimucilali lyalitendekasisye kuŵa Satana kapena kuti “Jwakwimucila “ mu mgunda ŵa Edeni. Jwalakwe jwasakesye lina lyambone lya Yehofa mwakusala kuti Mlungu ali jwakusakala, jwakulinonyela soni jwangali cilungamo. Yakutesya canasa ni yakuti Adamu ni Hawa ŵatemi kumbali ja Satana mwakumjimucila Yehofa. (Gen. 3:1-6) Umi wa mumgunda wa Edeni wapele upile wakulimbikasya cinonyelo cawo pa Yehofa. Nambope, pandaŵi jaŵaŵele kumbali ja Satana, cinonyelo cawo pa Yehofa nganiciŵa ca mtundu kapena kuti caliji cangakulupicika. Kaneko, mundaŵi ja Yobu, papali ciwusyo cacasosekwaga kwanjidwa. Ciwusyo cakwe caliji cakuti, Ana mundu jwalijose mpaka ajendelecele kuŵa jwakulupicika kwa Yehofa Mlungu, soni kumnonyela jwalakwe? M’maloŵe gane mpaka tujile kuti ana ŵandu mpaka akombole kuŵa ŵakulupicika?

7. Mpela mwalikuŵecetela lilemba lya Yobu 1:8-11, ana Yehofa jwapikanaga uli mumtima ni kulupicika kwa Yobu, nambi Satana jwapikanaga uli?

⁷ Yobu ŵatamaga mundaŵi jele Aisalaeli ŵaliji ku Iguputo. Mundaŵiji paliji pangali mundu jwakulupicika mpela jwalakwe. Yobu jwaliji jwangali umlama mpela mwatuŵelele m’weji, soni jwalemwesyaga yindu. Nambope, Yehofa jwamnonyelaga Yobu ligongo lya kulupicika kwake. Yikuwoneka kuti pa ndaŵiji Satana jwaliji ali amsalile kala Yehofa kuti ŵandu ngaŵa mkuŵa ŵakulupicika kwa jwalakwe. M’yoyo Yehofa pakusaka kumsisya Satana jwamsagwile Yobu. Yitendo ya Yobu yalosisye kuti Satana ali jwaunami. Satana jwalamwile kuti kulupicika kwa Yobu kulinjidwe. Ligongo lyakuti Yehofa jwamkulupililaga mnope Yobu, jwakundile kuti Satana amlinje.—Aŵalanje Yobu 1:8-11.

8. Ana Satana jwamlinjile camtuli Yobu?

⁸ Satana ali jwangalwe soni jwakuwulaga.  Jwalakwe jwajonasile cilicose cajwakwete Yobu, jwawuleje ŵamasengo ŵakwe soni jwajonasile mbili jakwe. Jwawulejesoni ŵanace 10 ŵa Yobu. Kaneko jwatendekasisye kuti Yobu alwale ulwele wakupweteka mnope wa yilonda yayatandile mumtwe mpaka kusajo. Ŵamkwakwe, mtwe wasokonecele ligongo lya ulwelewu mwamti ŵasalile jwalakwe kuti agambe kumtukana Mlungu kuti awe. Atamose kuti Yobu jwasakaga kuwa nambope jwalakwe jwajendelecele kuŵa jwakulupicika. Satana jwalinjilesoni litala line. Jwalakwe jwakamulicisye masengo acalume ŵatatu ŵaŵaliji acimjakwe ŵa Yobu. Acimjakweŵa ŵayikaga kukumlola Yobu, nambo nganamlimbikasyaga. M’malo mwakwe jemanjaji ŵamjamukaga Yobu. Ŵamjimbaga Mlungu magambo kuti ni juŵatendekasyaga yipwetesi yakwe soni nganamŵalanjilaga. Jemanjaji ŵayice pakuŵeceta kuti Yobu jwaliji mundu jwakusakala mwamti jwaŵajilwaga kusimana ni yindu yamti mpela yeleyi.—Yob. 1:13-22; 2:7-11; 15:4, 5; 22:3-6; 25:4-6.

9. Mwangasamala kandu kuti jwasimene ni yipwetesi, ana Yobu jwakanile kutenda cici?

⁹ Ana Yobu jwatesile uli ni yakusawusyayi? Jwalakwe nganaŵa jwamlama. Jwalakwe jwajamwice acimjakwe ŵala nambo kaneko jwayiweni kuti nganaŵeceta cenene. Jwalakwe jwaliwonaga kuŵa jwakulungama kupunda Mlungu. (Yob. 6:3; 13:4, 5; 32:2; 34:5) Atamose kuti yindu nganiŵa cenene, nambo Yobu jwakanile kumtumbilikasya Yehofa Mlungu. Yobu jwakanile kulupilila yindu yaunami yaŵaŵecetaga acimjakwe ŵala. Jwalakwe jwasasile kuti, “Une ngasimbeceta kuti jemanja mli ŵakulungama. Kwamba une namsyene tinjipitilisya kulupicika mpaka ndaŵi jaciwa cangu.” (Yob. 27:5) Maloŵe gelega gakulosya kuti Yobu jwaliji jwakusacilila kuŵa jwakulupicika, atamose yisawusye uli. Yobu nganawujila panyuma. M’wejisoni mpaka tutende m’yoyo.

10. Ana ngani jiŵajitandikasisye Satana pakwamba Yobu jikusatukwaya camtuli?

¹⁰ Ana ngani jaŵajitandikasisye Satana pakwamba Yobu jikusatukwaya camtuli? Satana akusatukayicilasoni kuti ngaŵa mkuŵa ŵakulupicika kwa Yehofa. Jwalakwe akusasala kuti ngatukusamnonyela Mlungu yisyesyene, mwamti mpaka tulece kumtumicila jwalakwe pakusaka kulikulupusya soni kuti kulupicika kwetu kuli kwaunami. (Yob. 2:4, 5; Ciw. 12:10) Ana tukusapikana uli ni nganiji? Kusala yisyene, jikusatukwaya mnope. Nambope, aganicisye ayi. Yehofa akundile kuti Satana alinje kulupicika kwetu. Jwalakwe atupele upile wakulosya kulupicikaku, soni kulosya kuti Satana ali jwaunami. Yehofa akwete cikulupi cakuti tucijendelecela kuŵa ŵakulupicika soni catukamucisye kuti tukombole kutenda yeleyi. (Aheb. 13:6) Uli upile wekulungwa kumanyilila kuti Jwakulamulila jwamkulungwa jwa cilambo cosope akusatukulupilila. Ana akulola ligongo lyakwe kulupicika kuli kwakusosekwa mnope? Yikusatukamucisya kuti tulosye kuti Satana ali jwaunami. Tukusakamucisya kuti lina lyambone lya Yehofa liŵe lyeswela soni kukamucisya ulamusi wakwe. Ana mpaka tutende cici kuti tujendelecele kuŵa ŵakulupicika?

11. Ana mpaka tulijiganye cici kutyocela kwa Yobu?

¹¹ Satana akulimbana mnope ni ŵandu ŵa Mlungu “masiku gambesi” gano. (2 Tim. 3:1) M’yoyo, ana mpaka tulimbisye camtuli kulupicika kwetu? Mpaka tulijiganye yejinji kutyocela pangani ja Yobu. Mkanatande kusimana ni yakusawusya, Yobu jwaliji ali kala jwakulupicika kwa Yehofa. Sambano, kwende tukambilane mwampaka tulimbisye kulupicika kwetu mwakulola magongo gatatu kutyocela mungani ja Yobu.

12. (a) Mpela mwaliŵecetele lilemba lya Yobu 26:7, 8, 14, ana Yobu jwajendelecele camtuli kumjogopa Yehofa soni kum’cimbicisya? (b) Ana m’weji mpaka tumjogopeje camtuli Mlungu?

¹² Yobu jwalimbikasisye cinonyelo cakwe kwa Mlungu mwakukusya kumjogopa Yehofa.  Yobu jwamalilaga ndaŵi jakwe pakuganicisya yindu yaŵayipanganyisye Yehofa. (Aŵalanje Yobu 26:7, 8, 14.) Jwalakwe jwajimi mtwe pajwaganicisyaga ya cilambo, kwinani, mawunde, soni njasi. Nambo jwamanyilile kuti nganijumanyililaga yejinji yakwamba masengo ga Yehofa. Jwalakwe jwacimbicisyaga maloŵe ga Yehofa, mwamti jwalembile kuti, “Sunjile mwakusamala maloŵe ga pakamwa pakwe.” (Yob. 23:12, NW) Ligongo lyakuti Yobu jwamjogopaga Yehofa, yamtendekasisye kuti amcimbicisyeje. Yobu jwanonyelaga Atati ŵakwe soni jwaliji jwakusacilila kumsangalasya. Yakuyicisya yakwe yaliji yakuti jwajendelecele kuŵa jwakulupicika. M’wejisoni tukusosekwa kutenda yindu mpela muŵatendele Yobu. Tukusamanyilila yindu yejinji pakwamba yaŵapanganyisye Mlungu kupundana ni ŵandu ŵa mundaŵi ja Yobu. Tukwetesoni Baibulo josope jampaka jitukamucisye kum’manyilila cenene Yehofa. Yindu yosope yatukusalijiganyaga mpaka yitukamucisye kuti tumjogopeje Yehofa ni mtima wetu wosope. Kumjogopa kwetu Yehofa soni kumcimbicisya kwakwe kucitutendekasya kuti tumnonyeleje soni tumpikanileje jwalakwe. Soni tuciŵa ŵakusacilila kwendelecela kuŵa ŵakulupicika.—Yob. 28:28.

13-14. (a) Mpela mwatuyiwonele pa Yobu 31:1, ana Yobu jwalosisye camtuli kuti jwaliji jwakupikanila? (b) Ana m’weji mpaka tujigalile camtuli cisyasyo cakwe?

¹³ Ligongo lyakuti Yobu jwakwete mtima wakupikanila, yamkamucisye kuŵa jwakulupicika. Jwalakwe jwamanyilile kuti kuŵa jwakulupicika kukusasosekwa kuŵa mundu jwakupikanila. Naga tukuŵa ŵakupikanila tucijendelecela kuŵa ŵakulupicika. Yobu lisiku lililyose jwatendaga yiliyose yampaka akombole kuti ampikanileje Mlungu. Mwacisyasyo, jwalakwe jwatendaga yindu mwakusamala mnope ni acakongwe. (Aŵalanje Yobu 31:1.) Mpela jwamlume jwamlombele, jwamanyililaga kuti kwaliji kulemwa kutenda yindu yakulosya kwakopa ŵakongwe ŵane. Masiku aganosoni, tukutama m’cilambo cegumbale ni ndamo ja cikululu. Mpela Yobu, ngatukusosekwa kumlolecesya mnope jwamkongwe jwele nganituŵa najo pa ulombela. Tucikanasoni kulola yiwulili yakuŵagula. (Mat. 5:28) Naga tukutenda  yeleyi lisiku lililyose, tucilimbisya kulupicika kwetu.

¹⁴ Yobu jwampikanilagasoni Yehofa mwakola nganisyo syambone pangani ja yindu yakucilu. Yobu jwamanyililaga kuti naga akuganicisya mnope yindu yakucilu mpaka atende ulemwa wekulungwa soni cacisosekwa kupocela cilango. (Yobu 31:24, 25, 28) Masiku aganosoni, tukutama m’cilambo cakunonyela mnope yindu yakucilu. Naga tukukola nganisyo syakuŵajilwa pangani ja mbiya ni yindu yakucilu, mpela mwajikusaŵecetela Baibulo tuciŵa ŵakusimicisya kwendelecela kuŵa ŵakulupicika.—Mis. 30:8, 9; Mat. 6:19-21.

15. (a) Ana Yobu jwajembeceyaga mbote jamtuli, soni ana cici cacamkamucisye kuti ajendelecele kuŵa jwakulupicika? (b) Ligongo cici mpaka yiŵe yakamucisya kuganicisyaga ya mbote ja cacitupa Yehofa?

¹⁵ Yobu jwajendelecele kuŵa jwakulupicika mwakuganicisya ya mbote jatacipocela kutyocela kwa Mlungu. Jwalakwe jwamanyilile kuti Mlungu jwasamalaga ya kukulupicika kwakwe. (Yob. 31:6) Mwangasamala kandu ni yakusawusya yakwe, Yobu jwaliji jwakusimicisya kuti pambesi pakwe Yehofa tacimpa mbote. Ligongo lyakola cikulupici, jwalakwe jwaliji jwakusimicisya kuŵa jwakulupicika. Atamose kuti jwaliji mundu jwangali umlama, Yehofa jwasangalele ni kulupicika kwa Yobu mwamti jwampele cipanje. (Yob. 42:12-17; Yak. 5:11) Nambosoni jwalakwe tacipocela majali gejinji msogolo. Ana tukwete cikulupi cakulimba mnope cakuti Yehofa cacitupa majali ligongo lya kulupicika kwetu? Mlungu jwetu nganacenga. (Mala. 3:6) Naga tukukumbucila soni kumanyilila kuti Mlungu akusakuwonaga kulupicika kwetu, mpaka tujendelecele kola cembeceyo ca msogolo.—1 Ates. 5:8, 9.

16. Ana tukusosekwa kutenda cici?

¹⁶ Ndaŵi syosope, tujendelecele kuŵa ŵakulupicika. Ndaŵi sine mpaka tulipikaneje kuti mundu jwakulupicika tuli jikape. Nambo tumanyilileje kuti panasoni ŵandu ŵane ŵali ŵakulupicika. Tuli m’likuga lya ŵandu ŵakwendelecela kuŵa ŵakulupicika pacilambo cosope. Tuciŵasoni m’likuga lya acalume ni acakongwe ŵaŵalosisye kulupicika munyumamu, atamose paŵalolegene ni ciwa. (Aheb. 11:36-38; 12:1) Kwende tujendelecele kuŵa ŵakulupicika mpela mujwatendele Yobu, jwajwaŵecete kuti, “Tinjipitilisya kulupicika.” Kwende tulinjelinje kuti kulupicika kwetu kum’cimbicisyeje Yehofa mpaka kalakala.