1. ¿Baʼax tu beetaj óoxtúul sukuʼunoʼob utiaʼal u yeʼeskoʼob chúukaʼan u yóoloʼob tiʼ Jéeoba?

TUUKULNAKOʼON tiʼ baʼax úuch tiʼ óoxtúul sukuʼunoʼob. U maestro juntúul kiikeʼ tu yaʼalaj tiʼ tuláakal u j-xoknáaloʼob ka táakpajkoʼob tiʼ junpʼéel kʼiinbesaj maʼ maʼalob u yilik Dios ka beetaʼakiʼ, le oʼolal tu yaʼalaj tiʼ le maestro yéetel tsiikil maʼ kun táakpajloʼ. Juntúul xiʼipal táan u kʼaʼaytajeʼ ku tsʼáaik cuentaeʼ teʼ naj tuʼux kun tʼaanoʼ tiʼ kajaʼan juntúul u yéet xook suuk u pʼaʼastik u j-jaajkunajoʼob Jéeobaiʼ. Kex chan saajkeʼ tʼaanajiʼ. Juntúul taatatsileʼ ku yaʼalaʼaltiʼ tumen u patrón ka u beet junpʼéel baʼal maʼ maʼalobiʼ. Kex u yojel jeʼel u luʼsaʼal meyajtiʼeʼ tu yaʼalaj maʼ ken u beete, tumen letiʼeʼ maʼatech u beetik baʼax kʼaas yéetel u yojel letiʼe baʼax ku páaʼtik Dios tiʼ le máaxoʼob meyajtikoʼ (Rom. 13:1-4; Heb. 13:18).

2. ¿Baʼax kʼáatchiʼiloʼob ken k-xakʼalt teʼ xookaʼ, yéetel baʼaxten?

² ¿Baʼax modosil tu yeʼesaj le óoxtúul sukuʼunoʼoboʼ? Maʼ xaaneʼ jeʼel k-aʼalikeʼ maʼ saajkoʼobiʼ yéetel maʼatech u beetkoʼob baʼax kʼaas. Baʼaleʼ tu yeʼesoʼob xan chúukaʼan óolal. Letiʼobeʼ tu yiloʼob maʼ u beetkoʼob baʼax kʼaas tu táan Jéeoba yéetel u yuʼubikoʼob u tʼaan. Letiʼeʼ jach kiʼimakchaj u yóol ka tu yilaj baʼax tu beetoʼob. Toʼon xaneʼ k-kʼáat k-beet u kiʼimaktal u yóol Jéeoba. Le oʼolaleʼ yaan k-ilik u núukil le kʼáatchiʼobaʼ: ¿Baʼax u kʼáat u yaʼal u chúukpajal k-óol? ¿Baʼaxten kʼaʼanaʼan u chúukpajal k-óol? ¿Baʼax jeʼel u yáantkoʼon utiaʼal ka chúukpajak k-óol teʼ talam kʼiinoʼobaʼ?

3. 1) ¿Baʼax u kʼáat u yaʼal u chúukpajal u yóol máak? 2) ¿Baʼax jeʼel u yáantkoʼon k-naʼat baʼax u kʼáat u yaʼal u chúukpajal u yóol máakoʼ?

³ U chúukpajal u yóol máakeʼ u kʼáat u yaʼal u yaabiltik  tu jaajil u yóol Jéeoba yéetel u beetik mantatsʼ baʼax uts tu tʼaan. Le tʼaan hebreo ku traducirtaʼal «chúukaʼan óolal» ichil le Bibliaoʼ, ku tsʼáaik xan naʼatbil junpʼéel baʼal chúukaʼan wa tʼaʼaj. Le Ley tsʼaʼab tiʼ le israelitaʼoboʼ ku yaʼalik ka u kʼuboʼob kíimsbil baʼalcheʼob tiʼ Jéeoba, chéen baʼaleʼ kʼaʼabéet tʼaʼaj (Lev. 22:21, 22). * Le máaxoʼob meyajtik Diosoʼ maʼ unaj u kʼubkoʼob juntúul baʼalcheʼ móochiʼ, minaʼan junpʼéel u xikin, u yich mix wa kʼojaʼan. Jéeobaeʼ ku yaʼalik ka kʼuʼubuktiʼ juntúul baʼalcheʼ chúukaʼan u wíinklil yéetel tʼaʼaj (Mal. 1:6-9). ¿Baʼaxten ku yaʼalik Jéeoba ka k-tsʼáa junpʼéel baʼal chúukaʼan tiʼ? Utiaʼal k-naʼatikeʼ tuukulnakoʼon tiʼ lelaʼ. Kéen k-man junpʼéel frutaeʼ k-ilik wa túulis bey xan wa maʼ kʼaschajaʼaniʼ. Lelaʼ bey u yúuchul xan yéetel k-yaabilaj tiʼ Jéeobaoʼ. Letiʼeʼ u kʼáat ka k-chúukaʼan yaabilte.

4. 1) ¿Baʼaxten kex j-kʼebanoʼoneʼ jeʼel u páajtal u chúukpajal k-óoleʼ? 2) Jeʼex u yeʼesik le Salmo 103:12 tak 14, ¿baʼax maʼatech u kʼáatiktoʼon Jéeoba?

⁴ Tumen k-ojel j-kʼebanoʼon yéetel k-beetik baʼax maʼ maʼalobeʼ, maʼ xaaneʼ jeʼel k-tuklikeʼ: «¿Jeʼel wa túun u páajtal u chúukpajal k-óol kex j-kʼebanoʼoneʼ?». Jeʼeleʼ. Koʼoneʼex ilik kaʼapʼéel baʼax oʼolal. Yáaxeʼ, Jéeobaeʼ maʼatech u chʼíikil u yil chéen le baʼaxoʼob maʼ maʼalobtak k-beetkoʼ. Le Bibliaoʼ ku yaʼalik: «Yuumtsil, wa ka tsʼáa a wich tiʼ le kʼasaʼaniloʼ, ¿máax jeʼel u pʼáatal waʼalakbal ta táaneʼ?» (Sal. 130:3). Letiʼeʼ u yojel j-kʼebanoʼon, le oʼolal ku perdonartikoʼon yaʼab u téenel (Sal. 86:5). U kaʼapʼéeleʼ, Jéeobaeʼ u yojel yaan baʼaxoʼob maʼ tu páajtal k-beetik, tsʼoʼoleʼ maʼatech u kʼáatiktoʼon ka k-tsʼáa junpʼéel baʼax minaʼantoʼon (xok Salmo 103:12-14). Le oʼolaleʼ, ¿baʼax túun unaj k-beetik utiaʼal k-eʼesik chúukaʼan óolal?

5. ¿Baʼaxten jach kʼaʼabéet le yaabilaj utiaʼal k-eʼesik chúukaʼan óolaloʼ?

⁵ Utiaʼal u chúukpajal k-óoleʼ kʼaʼabéet k-eʼesik yaabilaj. Le yaabilaj yéetel le chúukaʼan óolal k-eʼesik tiʼ Jéeoba, k-Taata yaan teʼ kaʼanoʼ, kʼaʼabéet chúukaʼanoʼob. Wa maʼ u xuʼulul k-yaabiltik tak kéen k-aktáant talamiloʼobeʼ, u kʼáat u yaʼaleʼ chúukaʼan k-óol (1 Cró. 28:9; Mat. 22:37). Tuukulnakoʼon tu kaʼatéen tiʼ le óoxtúul sukuʼunoʼob t-aʼalaj teʼ yáax xóotʼoloʼ. U jaajileʼ le kiikoʼ u kʼáat antal yéetel u yéet xookoʼob, le sukuʼunoʼ maʼ u kʼáat ka pʼaʼastaʼak tumen táan u kʼaʼaytajiʼ yéetel le taatatsiloʼ maʼ u kʼáat ka luʼsaʼak meyaj tiʼiʼ. ¿Baʼaxten túun maʼ tu yóotoʼob u beetoʼob le baʼax aʼalaʼabtiʼoboʼ? Tumen u yojloʼobeʼ le baʼax ku yaʼalik Jéeobaoʼ maʼalobtak yéetel utiaʼal u yutsiloʼob, tsʼoʼoleʼ u maas kʼaʼanaʼanileʼ u kʼáat u kiʼimakkúuntoʼob u yóol. U yaabilajoʼob tiʼ Jéeobaeʼ le péeksoʼob utiaʼal u chʼaʼtuklik u beetkoʼob baʼax ku yaʼalik. Beyoʼ ku yeʼeskoʼob chúukaʼan u yóoloʼob.

6. 1) ¿Baʼaxten jach kʼaʼanaʼan u chúukpajal k-óol? 2) ¿Bix úuchik u yeʼesik Adán yéetel Eva maʼ chúukaʼan u yóoloʼobiʼ?

⁶ ¿Baʼaxten jach kʼaʼanaʼan u chúukpajal k-óol? Tumen Satanaseʼ tsʼoʼok u yaʼalik baʼaloʼob maʼ jaajtak tu contra Jéeobaiʼ bey xan t-contra. Letiʼeʼ tu beetuba Satanasil tu jardinil Edén, lelaʼ u kʼáat u yaʼaleʼ «Máax ku tsʼáaikuba tu contra uláakʼ». Letiʼeʼ tu tsʼáaj naʼatbileʼ Jéeobaeʼ maʼ maʼalob bix u gobernariʼ, tsʼuʼut yéetel kʼasaʼan. Adán yéetel Evaeʼ tu tsʼáajubaʼob tu contra Dios úuchik u tsʼáaikubaʼob tu tséel Satanás (Gén. 3:1-6). Le tiaʼanoʼob kaʼach teʼ jardinoʼ jach yaan u páajtalil u maas yaabiltikoʼob Jéeoba. Baʼaleʼ ka tu tsʼáajuba Satanás tu contra Jéeobaeʼ, letiʼobeʼ maʼ u jach yaabiltmoʼob Jéeobaiʼ, wa  maʼ chúukaʼan u yóoloʼob tiʼiʼ. Tu kʼiiniloʼob Job xaneʼ joʼopʼ u tuklaʼal: ¿Yaan wa máaxoʼob ku chúukpajal u yóoloʼob tiʼ Jéeoba tumen u yaabiltmoʼob? Ichil uláakʼ tʼaanoʼobeʼ, ¿jeʼel wa u páajtal u chúukpajal u yóol máak u meyajt Jéeobaeʼ?

7. Jeʼex u yaʼalik Job 1:8 tak 11, ¿bix u yilaʼal kaʼach Job tumen Jéeoba, yéetel bix u yilaʼal tumen Satanás?

⁷ Jobeʼ kuxlaj teʼ kʼiinoʼob palitsiltaʼan le israelitaʼob tu luʼumil Egiptooʼ. Teʼ kʼiinoʼob jeʼeloʼ minaʼan uláakʼ máak jach chúukaʼan u yóol tiʼ Jéeoba. U jaajileʼ letiʼeʼ j-kʼeban yéetel ku beetik baʼax maʼ maʼalob, jeʼex u yúuchultoʼon bejlaʼeʼ. Baʼaleʼ yaabiltaʼan tumen Dios yoʼolal le chúukaʼan óolal ku yeʼesikoʼ. Maʼ xaaneʼ Satanaseʼ tsʼoʼok u yáax aʼalik tiʼ Jéeoba mix máak jeʼel u páajtal u chúukpajal u yóol tiʼeʼ. Le oʼolal Dioseʼ tu yaʼalajtiʼ ka u yil baʼax ku beetik Job. Le baʼaxoʼob maʼalobtak ku beetkoʼ ku yeʼesikeʼ Satanaseʼ chéen táan u tuus. Satanás túuneʼ tu yaʼalaj ka chaʼabak u túuntik u yóol Job. Jéeobaeʼ jach u yojel maʼ kun pʼatbil kʼaasil tumen Job, u amigo, le oʼolal tu chaʼaj u túuntaʼal u yóol tumen Satanás (xok Job 1:8-11).

8. ¿Baʼax uláakʼ tu beetaj Satanás tu contra Job?

⁸ Satanaseʼ jach kʼasaʼan yéetel j-kíimsaj wíinik. Tu luʼsaj tiʼ Job tuláakal baʼax yaantiʼ: u taakʼin, u palitsiloʼob yéetel tu beetaj u tuklaʼal baʼax kʼaas tu yoʼolal. Tu kíimsaj tu diezil u paalal. Tsʼoʼoleʼ tu beetaj u tsaʼayal junpʼéel kʼaakʼas kʼojaʼanil tiʼ Job, ka chuʼup u wíinklil yéetel nukuch grano, desde tu niʼ u yook tak tu chúumuk u pool. U yataneʼ jach yaachaj u yóol ka tu yilaj bix u sen muʼyaj Job, ka tu yaʼalajtiʼ ka u kʼaakʼastʼant Dios. Jobeʼ taakchaj tak u kíimil, baʼaleʼ chúukpaj u yóol. Satanás túuneʼ tu beetaj uláakʼ baʼal tu contra.  Tu péeksaj óoxtúul u amigoʼob Job utiaʼal ka xiʼikoʼob tu yiknal, baʼaleʼ letiʼobeʼ maʼ tu líiʼsoʼob u yóoliʼ. Baʼaxeʼ tu sen aʼaloʼob baʼal tiʼ Job. Tu yaʼaloʼobeʼ Dios beetik u muʼyaj yéetel maʼatech u beetik u cuentail wa chúukaʼan u yóol wa maʼ. Tu tsʼáajoʼob tak u naʼat Jobeʼ, letiʼeʼ juntúul kʼasaʼan máak, le oʼolal ku náajmatik u sen muʼyaj (Job 1:13-22; 2:7-11; 15:4, 5; 22:3-6; 25:4-6).

9. ¿Baʼax tu chʼaʼtuklaj u beetik Job kex sen muʼyajnaji?

⁹ ¿Baʼax tu beetaj Job kex sen muʼyajnaji? Letiʼeʼ j-kʼeban máak, le oʼolal kʼuuxilnajeʼ ka tu kʼeyaj le máaxoʼob ku yaʼalikoʼob táan kaʼach u líiʼskoʼob u yóoloʼ, tsʼoʼoleʼ tu yaʼalaj baʼaloʼob chéen minaʼan u cuentail. Tu yaʼalaj maas maʼalob baʼax ku beetik tak tiʼ Dios (Job 6:3; 13:4, 5; 32:2; 34:5). Baʼaleʼ tak teʼ súutukiloʼob jach talamtakoʼ, maʼ xuʼul u yeʼesik chúukaʼan óolal tiʼ Jéeobaiʼ. Maʼ tu creertaj le baʼaloʼob maʼ jaajtak aʼalaʼabtiʼ tumen le máaxoʼob ku yaʼalik u amigoʼoboʼ. Tu yaʼalaj: «¡Junpuliʼ maʼ ken in waʼal wa jaaj baʼax ka waʼalikeʼex! ¡Mientras kuxaʼaneneʼ yaan u chúukpajal in wóol in beet baʼax maʼalob!» (Job 27:5, TNM). Yéetel le tʼaanoʼobaʼ tu tsʼáaj naʼatbileʼ u chʼaʼtukultmaj u chúukpajal u yóol kex jeʼel baʼalak ka u aktáanteʼ. Toʼon xaneʼ unaj k-chʼaʼtuklik k-beetik jeʼex Jobeʼ.

10. Kex chéen tu contra Job tʼaanaj Satanaseʼ, ¿baʼaxten k-aʼalik tak t-contra tʼaanaji?

¹⁰ Kex chéen tu contra Job tʼaanaj Satanaseʼ, ¿baʼaxten k-aʼalik tak t-contra tʼaanaji? Tumen letiʼeʼ ku yaʼalikeʼ maʼ k-yaabiltmaj Jéeoba tu jaajil k-óoliʼ, yaan u xuʼulul k-meyajtik utiaʼal k-salvartik k-kuxtal yéetel maʼ kun chúukpajal k-óol tiʼ (Job 2:4, 5; Apo. 12:10). ¿Bix k-uʼuyikba yoʼolal le baʼax ku yaʼalikoʼ? ¿Máasaʼ ku yaatal k-óol? Baʼaleʼ tuukulnakoʼon tiʼ lelaʼ: Jéeobaeʼ jach ku confiar tiʼ toʼon, le oʼolal ku chaʼik u túuntaʼal k-óol utiaʼal k-eʼesik chúukaʼan k-óol yéetel Satanaseʼ chéen táan u tuus. Tsʼoʼoleʼ Dioseʼ ku yaʼalikeʼ yaan u yáantkoʼon utiaʼal ka chúukpajak k-óol (Heb. 13:6). Kéen k-il ku confiar Jéeoba tiʼ toʼoneʼ jach ku kiʼimaktal k-óol. ¿K-tsʼáaik wa cuenta baʼaxten jach kʼaʼanaʼan ka chúukpajak k-óol? Tumen wa ku chúukpajal k-óoleʼ yaan k-eʼesik chéen táan u tuus Satanás, yaan k-eʼesik maʼalob bix u gobernar Jéeoba yéetel maʼ jaaj le baʼaxoʼob aʼalaʼan tu contraoʼ. Le oʼolaleʼ, ¿baʼax unaj k-beetik utiaʼal maʼ u xuʼulul u chúukpajal k-óol?

11. ¿Baʼax jeʼel k-kanik tiʼ Jobeʼ?

¹¹ Satanaseʼ tsʼoʼok u yilik u maas chʼaʼpachtik le máaxoʼob meyajtik Dios teʼ «tu tsʼook kʼiinoʼob[aʼ]» (2 Tim. 3:1). Bey túunoʼ ¿baʼax unaj k-beetik utiaʼal maʼ u xuʼulul u chúukpajal k-óol? Láayliʼ jeʼel u páajtal k-kaanbal tiʼ le baʼax tu beetaj Joboʼ. Táanil tiʼ u aktáantik le baʼaxoʼob tu muʼyajtoʼ, tsʼokaʼaniliʼ u yeʼesik yaʼab u téenel chúukaʼan u yóoleʼ. Koʼoneʼex ilik óoxpʼéel baʼax tu beetaj yéetel bix jeʼel k-beetik jeʼex letiʼeʼ.

12. 1) Jeʼex u yaʼalik Job 26:7, 8 yéetel 14, ¿baʼax áant Job utiaʼal u yaabiltik yéetel u yeʼesik tsiikil tiʼ Jéeoba? 2) ¿Baʼax jeʼel u yáantkoʼon k-yaabilt Jéeobaeʼ?

¹² Tuukulnaj tiʼ le baʼaxoʼob u beetmaj Jéeoba utiaʼal u maas yaabiltikoʼ. Jobeʼ tu jóoʼsaj tiempo utiaʼal u tuukul tiʼ le baʼaxoʼob u beetmaj Jéeobaoʼ (xok Job 26:7, 8, 14). Letiʼeʼ jaʼakʼ u yóol ka tuukulnaj tiʼ le Luʼumaʼ, le kaʼanoʼ, le múuyaloʼoboʼ yéetel le u kíilbal cháakoʼ, baʼaleʼ tu yaʼaleʼ maʼ yaʼab baʼax u yojel yoʼolal le baʼaxoʼob u beetmaj Diosoʼ. Tsʼoʼoleʼ jach jatsʼuts úuchik u yilik le baʼaxoʼob ku kaʼansaʼaltiʼ tumen Jéeobaoʼ, le oʼolal tu yaʼalaj: «Mantatsʼ kin tsʼoʼokbesik [...] baʼaxoʼob ku yaʼalik tiʼ teen» (Job 23:12). Letiʼeʼ  tuukulnaj tiʼ le baʼaxoʼob u beetmaj Jéeobaoʼ yéetel tu yeʼesaj tsiikil tiʼ, le oʼolal jach tu yaabiltaj yéetel tu beetaj baʼax uts tu tʼaan. Lelaʼ le áant utiaʼal u chúukpajal u yóol. Jeʼex Jobeʼ toʼon xaneʼ unaj k-jóoʼsik u súutukil utiaʼal k-tuukul tiʼ le jatsʼuts baʼaloʼob u beetmaj Jéeobaoʼ. Teʼ kʼiinoʼobaʼ maas yaʼab baʼax u yojel máak tiʼ le baʼaxoʼob beetaʼanoʼoboʼ ke tu kʼiiniloʼob Job. Tsʼoʼoleʼ yaantoʼon le Biblia tu chúukaʼanil utiaʼal k-maas kʼaj óoltik Diosoʼ. Le baʼaxoʼob ken k-kanoʼ yaan u yáantkoʼon tuukul tiʼ le baʼaxoʼob u beetmaj Jéeobaoʼ yéetel yaan k-eʼesik tsiikil tiʼ. Tsʼoʼoleʼ yaan k-yaabiltik, yaan k-uʼuyik u tʼaan yéetel yaan u seguer u chúukpajal k-óol tiʼ (Job 28:28).

13, 14. 1) Jeʼex u yaʼalik Job 31:1, ¿bix úuchik u yeʼesik Job ku yuʼubik u tʼaan Jéeoba? 2) ¿Bix jeʼel k-beetik jeʼex tu beetiloʼ?

¹³ Tu beetaj baʼax uts tu tʼaan Jéeoba. Jobeʼ u yojleʼ utiaʼal u chúukpajal u yóoleʼ kʼaʼabéet u beetik baʼax uts tu tʼaan Jéeoba. Wa maas k-uʼuyik u Tʼaan Jéeobaeʼ, maas ku yáantkoʼon utiaʼal u chúukpajal k-óol. Jobeʼ tu tsʼáaj u yóol u beet baʼax uts tu tʼaan Dios sáamsamal. Letiʼeʼ jach tu kanáantaj bix u tratartik le koʼoleloʼoboʼ (xok Job 31:1). Tumen tsʼokaʼan u beeleʼ u yojel maʼ unaj u tusik u núup yéetel yaanaliʼ. Teʼ kʼiinoʼobaʼ jach yaʼab tuʼux ku chíikpajal baʼaloʼob yaan yil yéetel núupkʼeban. ¿Yaan wa k-beetik jeʼex Job yéetel yaan k-ilik maʼ k-tusik k-núup yéetel yaanal? ¿Yaan wa k-ilik maʼ k-chaʼantik mix baʼal yaan yil yéetel núupkʼeban? (Mat. 5:28). Wa sáamsamal k-beetik baʼax maʼalobeʼ maas yaan u chúukpajal k-óol.

¹⁴ Job xaneʼ tu beetaj baʼax uts tu tʼaan Jéeoba, maʼ tu kʼubaj u yóol tiʼ le ayikʼaliloʼoboʼ. Tu yaʼaleʼ wa ka u beet beyoʼ jeʼel u náajmatik ka castigartaʼak tumen u jueziloʼob le kaajoʼ (Job 31:24, 25, 28). Teʼ kʼiinoʼobaʼ le yóokʼol kaabaʼ ku péeksik máak utiaʼal ka xiʼik tu paach ayikʼaliloʼob. Wa k-beetik baʼax  ku yaʼalik le Biblia yoʼolal bix unaj k-ilik le ayikʼaliloʼoboʼ, yaan u chúukpajal k-óol (Pro. 30:8, 9; Mat. 6:19-21).

15. 1) ¿Baʼax áant Job utiaʼal u chúukpajal u yóol? 2) ¿Baʼaxten unaj k-kʼaʼajsik le jatsʼuts esperanza yaantoʼonoʼ?

¹⁵ Tu creertaj yaan u bendecirtaʼal tumen Dios. Jobeʼ u yojel Dioseʼ ku yilik wa chúukaʼan u yóol (Job 31:6). Kex yaʼab baʼaloʼob tu muʼyajteʼ letiʼeʼ ku creertik yaan u bendecirtaʼal tumen Dios, lelaʼ le áant utiaʼal ka chúukpajak u yóol. Jéeobaeʼ jach kiʼimakchaj u yóol ka tu yilaj chúukaʼan u yóol Job, le oʼolal jach tu bendecirtaj (Job 42:12-17; Sant. 5:11). Tsʼoʼoleʼ maʼ kun xáantaleʼ yaan u kʼamik uláakʼ bendicionoʼob kéen ka kuxkíintaʼak. ¿Kux túun toʼon? ¿K-creertik wa yaan u bendecirkoʼon Jéeoba yoʼolal le chúukaʼan óolal k-eʼesikoʼ? Dioseʼ maʼ kʼexpajkiʼ (Mal. 3:6). Wa k-kʼaʼajsik nojoch baʼal u yilik le chúukaʼan óolal k-eʼesikoʼ yaan u yáantkoʼon utiaʼal ka k-kʼaʼajs le jatsʼuts esperanza yaantoʼonoʼ (1 Tes. 5:8, 9).

16. ¿Baʼax unaj k-chʼaʼtuklik k-beetik?

¹⁶ Unaj k-chʼaʼtuklik u chúukpajal k-óol mantatsʼ. Maʼ xaaneʼ jeʼel k-tuklikeʼ chéen toʼon táan k-ilik u chúukpajal k-óol, baʼaleʼ maʼ beyiʼ. Tiʼ tuláakal yóokʼol kaabeʼ yaan u millonesil sukuʼunoʼob táan u yilik u chúukpajal u yóoloʼob. Tsʼoʼoleʼ yaan k-beetik jeʼex le máaxoʼob chúukpaj u yóol u meyajtoʼob Jéeoba úuchjeakil kex kíimsaʼaboʼoboʼ (Heb. 11:36-38; 12:1). Tuláakloʼon unaj u chúukpajal k-óol jeʼex Jobeʼ yéetel k-aʼalik: «¡Mientras kuxaʼaneneʼ yaan u chúukpajal in wóol in beet baʼax maʼalob!». Wa k-beetik beyoʼ yaan k-nojbeʼenkúuntik Jéeoba utiaʼal mantatsʼ.