1, 2. 1) ¿Bibliajj Moisesat kamsisa, ukat kunsa jupajj luräna? 2) ¿Kunatsa llampʼu chuyman jaqëñatak chʼamachasiñasa?

BIBLIANJJA, “Moisesajj cheqpachansa llampʼu chuymani jaqënwa akapachanjja” sasaw qhanañchi (Núm. 12:3). ¿Uka arunakajj jan chʼamani, pächasiri, ajjsariri jaqënwa sañti munpacha? Mä llampʼu chuymanejj ukhamawa sasaw waljanejj sapjjaspa. Ukampis Moisesajj janiw ukhamäkänti, jupajj chʼamani, jan pächasiri, jan ajjsariri ukham jaqënwa. Diosan yanaptʼapampejja, Egipto marka apnaqer reyimpejj jan ajjsartʼasaw parläna, mä kimsa millón jaqenakaruw wasaran pʼeqtʼäna, enemigonakapar atipjañatakiw israelitanakar yanaptʼarakïna.

² Jiwasajj janis Moisesjam jan walinakan uñjaskstanjja, sapüruw jan wali jaqenakarusa jan walinakarus saykattanjja, ukatwa llampʼu chuymanïñajj chʼamakïspa. Ukampis ¿kunatsa ukham chuymanïñatak chʼamachasiñasa? Jehová Diosajja, “llampʼu chuymaninakasti oraq katoqapjjani” sasaw sistu, ukatwa chʼamachasiñasa (Sal. 37:11). Akham jisktʼasiñäni: “¿Nayajj llampʼu chuyman jaqëtti? ¿Yaqhanakas ukham jaqewa sapjjaspati?” sasa. Uka jisktʼanakar qhanañchañatakejja, llampʼu chuyman mä jaqejj kunjamasa uk amuytʼañasawa.

3, 4. 1) ¿Kunatsa llampʼu chuymanïñajj mä cuadro pintañamp sasispa? 2) ¿Llampʼu chuyman jaqëñatakejj kunjam chuymanïñas wakisiraki, ukat kunatsa?

³ Llampʼu chuyman jaqejja, mä cuadro pintañampi sasiwa.  ¿Kunatsa ukham sistanjja? Mä cuadro pintañatakejj kunayman coloranakaw munasi. Llampʼu chuymanïñatakejj ukhamarakiw humilde chuymanïña, istʼasirïña, suma chuymanïña, jan ajjsarirïñajj munasi. Diosatakjam sarnaqañ munstan ukhajja, ukham jaqëñasawa, ¿kunatsa? Uk jichhajj yatjjatañäni. *

⁴ Humilde chuyman jaqenakakiw Diosar istʼapjje, munañaparjamas sarnaqapjje. Jehová Diosajj suma chuymanïsna ukwa muni (Gál. 5:22). Ukampis Diosan munañaparjam sarnaqtan ukhajja, Supayajj wal colerasi. Ukatwa humilde chuymanïkstansa suma chuyman jaqëkstansa, akapachankir jaqenakajj uñisipjjestu (Juan 15:18, 19). Ukatwa jan ajjsarirïñasa.

5, 6. 1) ¿Kunatsa Supayajj llampʼu chuyman jaqenakar uñisi? 2) ¿Kuna jisktʼanakarus aka yatichäwin qhanañchaskañäni?

⁵ Jan llampʼu chuymanïpki uka jaqenakajj jachʼa jachʼa tukuri, wali coleriri ukhamäpjjewa, janiw Diosarus istʼapkiti. Supayajj ukhamawa. Ukatwa llampʼu chuymaninakar uñisi, jupanakajj suma sarnaqatapampiw jan sinttʼasirïtapsa kʼarïtapsa uñachtʼayapjje. Supayajj kuns parlaskpan jan ukajj luraskpan, janipuniw llampʼu chuyman jaqenakarojj Jehová Diosat apaqkaniti (Job 2:3-5).

⁶ Ukampis ¿kunapachas llampʼu chuymanïñajj chʼamakïspa? ¿Kunatsa ukham chuymanïñatakejj chʼamachasiskakiñasa? Uka jisktʼanakar qhanañchañatakejja, Moisesampita, kimsa hebreonakampita, Jesusampit parltʼañäni.

7, 8. Jupa contra parlapjjäna ukhajja, ¿kunsa Moisesajj luräna?

⁷ Familiana jan ukajj congregacionan pʼeqtʼkasa. Ukhaw llampʼu chuymanïñajj chʼamäspa. Khitinakarutï pʼeqtʼktan ukanakajj jan respetapkistu, jan ukajj kun lurañtï amtktan ukar jan istʼañ munapki ukhaw jukʼamp chʼamäspa. ¿Ukhaman uñjasirïtati? ¿Familiasat maynejj ukham luraspa ukhajj kamachsnasa? Moisesajj kunsa luräna uk yatjjatañäni.

 ⁸ Jehová Diosajj Israel markar pʼeqtʼañapatakiw Moisesar uttʼayäna, uka markar churkäna uka leyinaksa juparuw qellqayäna. Ukhamajja, Jehová Diosajj jupampïskänwa. Ukhamäkchïnsa, Miriamampi (María) Aaronampejj jupa contraw Cus markankir mä warmimp casarasitapat parlapjjäna. Ukanak istʼasajja, inas yaqhajj coleraschispäna, jan ukajj ukhamat ukham lurchispäna. Ukampis Moisesajj janiw coleraskänti, antisas Miriamar jan castigjjañapatakiw Diosar wal ruwtʼäna (Núm. 12:1-13). ¿Kunatsa jan coleraskäna?

9, 10. 1) ¿Kunsa Moisesajj Jehová Diosan yanaptʼatäsajj yateqäna? 2) Familia pʼeqtʼirinakasa jilïr irpirinakasa, ¿kunsa Moisesat yateqasipjjaspa?

⁹ Moisesajj Diosatwa yateqasïna, ukatwa jan coleraskänti. Niya pusi tunka maranak nayrajj Egipto marka apnaqer familia taypinkkäna ukhajja, janiw llampʼu chuymanïkänti, colerir jaqënwa, ukatwa mä chachar jiwayäna. Amuyuparjamajja, uka chachajj jan walinakwa luräna. Moisesajja, kuntï lurkäna ukajj Diosatak walikïskaspas ukhamwa amuyäna. Ukampis israelitanakar pʼeqtʼañatakejja, janiw jan ajjsariri jaqëñapakejj wakiskänti, llampʼu chuymanïñaparakïnwa, uk amuyañapatakiw Jehová Diosajj 40 maranakan yanaptʼäna. Humilde chuymani, istʼasiri, suma chuymani ukham jaqëñaparakïnwa. Ukanak sumwa Moisesajj yateqäna, ukhamatwa Israel markar sum pʼeqtʼäna (Éx. 2:11, 12; Hech. 7:21-30, 36).

¹⁰ Jichhürunakanjja, familia pʼeqtʼirinakasa jilïr irpirinakas Moisesatwa yateqasipjjañapa. Jumatï jupanakat maynïrïstajja, jan respetapkätam ukhajj jan jankʼak colerasimti, jan ukasti, pantjasitanakam humilde chuymamp uñtʼasim (Ecl. 7:9, 20). Jan waltʼäwinakjja, Diosajj siski ukarjamaw askichañama, suma arunakampiw parlañamaraki (Prov. 15:1). Ukham lurir familia pʼeqtʼirinakasa jilïr irpirinakas Diosaruw kusisiyapjje, sumankañ utjañapatakiw yanaptʼapjje, llampʼu chuyman jaqejj kunjamäñapasa uksa uñachtʼayapjjarakiwa.

11-13. ¿Kunsa kimsa hebreo waynanakat yateqassna?

¹¹ Arknaqat uñjaskasa. Nayra tiempotpachaw marka apnaqerinakajj Diosan servirinakapar arknaqawayapjje. “Jan walinakwa lurapjje” sasin inas sapjjchi. Ukampis janiw ukhamäkiti, ‘jaqenakar istʼañat sipansa Diosar istʼañ’ amtatasatwa arknaqapjjestu (Hech. 5:29). Inas jiwasat sawkasipjjchispa, carcelarus llawintapjjchistaspa, jan ukajj nuwjapjjchistaspa. Ukampis Diosan yanaptʼapampejja, janiw ukhamat ukham kuttʼayktanti, jan ukasti, pacienciampiw suytʼtanjja.

¹² Babiloniar apatäpkäna uka Ananías, Misael, Azarías waynanakat kunsa yateqassna  uk amuytʼapjjañäni. * Nabucodonosor reyejja, qorit lurat mä jachʼa idolor altʼasipjjañapatakiw jupanakar mayïna. Ukampis llampʼu chuymampi, respetompiw jupanakajj ‘janiw altʼasipkiristti’ sasin sapjjäna, kunatsa jan altʼasipkani uksa qhanañchapjjarakïnwa. ‘Nakhaskiri mä hornoru jaqontataw uñjasipjjäta’ satpachas Diosaruw istʼapjjäna. Jehová Diosajj ukspachas jupanakar qhespiykchïnjja, “Diosaw salvaskistani” sasajj janiw suyapkänti, jan ukasti, Jupan munañap luraspan sasaw sapjjäna (Dan. 3:1, 8-28). Ukham lurasajj akwa uñachtʼayapjjäna, llampʼu chuymaninakajj jan ajjsarirïpjjewa, janirakiw kuna marka apnaqerisa ni castigos Diosar adorañat jarkʼkaspati (Éx. 20:4, 5).

¹³ ¿Kunsa kimsa hebreonakat yateqassna? Jehová Diosat jitheqtayañ munapjjestani ukhajja, humilde chuymanïtaswa uñachtʼayañasa, Jupaw yanaptʼitani sasaw confiyañasaraki (Sal. 118:6, 7). “Jan walinak lurtajja” sasin juchañchapjjestani ukhasti, respetompi, llampʼu chuymampiw qhanañchañasa (1 Ped. 3:15). Kunanakatï Diosamp sum apasitas aptʼasiykistaspa ukanaksa janiw lurañasäkiti.

14, 15. 1) ¿Kunas wali llakit uñjastan ukhajj pasaspa? 2) Isaías 53:7, 10 qellqatarjamajja, ¿kunatsa wali llakit uñjaskasas Jesusatwa llampʼu chuymanïñ yateqassna sasin sissna?

¹⁴ Wali llakit uñjaskasa. Taqeniw llakita jikjjatassna. Inas escuelan mä examen utjipana, jan ukajj trabajosan mä kun lurañ utjipan llakissna. Inas ‘operayasiñamawa’, jan ukajj ‘doctorampiw uñjayasiñama’ sasin sapjjchistu. Ukham llakit uñjastan ukhajja, janiw llampʼu chuymanïñajj faciläkiti. Kunatï nayrajj jan coleraykistäna ukas colerayjjakistaspawa. Ukatwa yaqhanakarojj chuyma ustʼayir arunak sisjjsna, jan ukajj jan walinak lurjjsna. Ukhaman uñjasisajj Jesusatwa amtasiñasa.

¹⁵ Alajjpachar sarañapatak mä qhawqha phajjsinak faltjjäna ukhajja, Jesusajj kunayman jan walinakanwa uñjasïna. Wal tʼaqesiyasaw jiwayapjjañapäna, uk jupajj yatisïnwa (Juan 3:14, 15; Gál. 3:13). Jiwañapatak mä qhawqha phajjsinak nayrajja, “wali llakitätwa” sasaw säna (Luc. 12:50). Mä qhawqha urunak faltkipansti, “wali llaktʼatätwa” sasaw sarakïna. Ukjjarojj akham sänwa: “Awkiy, aka horasat salvita. Nayajj ukatakiw aka horasar jutta. Awkiy, sutim jachʼañcham” sasa. Uka arunakajj humilde chuymanïtapa, Diosar istʼirïtapwa amuytʼayistu (Juan 12:27, 28). Jiwañap horasajj purinjjäna ukhajja, jan ajjsarasaw Diosan enemigonakapamp katuntayasïna, jupanakasti jan sinttʼasisaw jan wali jaqerjam jiwayapjjäna. Ukham llakinakansa Jesusajj uñjaskchïnjja, llampʼu chuymanïskakïnwa, Diosan munañapsa luraskakïnwa. Ukhamajj wali llakitas uñjaskchiñänejja, Jesusatwa llampʼu chuymanïñ yateqassna (Isaías 53:7, 10 liytʼañataki).

16, 17. 1) ¿Kunjamsa apostolonakajj Jesusan llampʼu chuymanïtap yantʼapjjäna? 2) ¿Kunsa Jesusat yateqassna?

¹⁶ Jiwayañatak katuntapkäna uka arumajja, apostolonakapaw Jesusan llampʼu chuymanïtap yantʼapjjäna. Jupajj kunja llakitas uñjaspachäna uk amuytʼañäni. Jaqenakan wiñay jakañ katoqapjjañapatakejja, jiwañkamaw Diosar serviñapäna (Rom. 5:18, 19). Awkipan sutipajj ukarjamaw walitsa jan walitsa uñjatäñaparakïna (Job 2:4). Ukampis munat amigonakapamp qhep qhepa kuti manqʼkäna uka arumajja, “khitis jiwas taypit jilïrejja sasaw jupanakkam wal chʼajjwarapjjäna”. Uka toqetjja, Jesusajj walja kutiw jupanakar cheqañchjjäna, uka jaypʼukiw uka toqet parläna.  Ukhamäkchïnsa, Jesusajj janiw jupanakatak coleraskänti, jan ukasti, pacienciampiw yanaptʼäna. Munasiñampi, qhana arunakampiw kunjam jaqëpjjañapasa uk mayamp yatichäna. Qhepatjja, “jumanakajj nayamp chikapuniw sarnaqapjjtajja” sasaw sarakïna (Luc. 22:24-28; Juan 13:1-5, 12-15).

¹⁷ ¿Kunsa ukhaman uñjasisajj lurasäna? Wali llakit uñjaskasas Jesusat yateqasisaw llampʼu chuymanïtas uñachtʼayañasa. “Maynit maynikam aguantasisipkakim” sasin Jehová Diosajj siskistu ukarjamaw lurañasaraki (Col. 3:13). ¿Kunas ukatak yanaptʼistaspa? Taqeniw arsutasampisa luratasampis mayninakar chuym ustʼaytanjja, uk amtañaw yanaptʼistaspa (Prov. 12:18; Sant. 3:2, 5). Yaqhanakarus “suma chuymanïtawa” sasaw sañasaraki (Efes. 4:29).

18. 1) Suma amtanakar puripjjañapatakejja, ¿kunjamsa Diosajj llampʼu chuyman jaqenakar yanaptʼi? 2) ¿Kunsa jupanakajj Diosampi yanaptʼayasiñatakejj lurapjjañapa?

¹⁸ Suma amtanakaruw puriñäni. Jakäwisan chʼama amtanakar puriñ utjani ukhajja, Jehová Diosaw llampʼu chuymanïñäni ukhajj yanaptʼistani. Ukham chuyman jaqenakan mayisitanakap istʼañwa Jupajj arsuwayi (Sal. 10:17). Janiw ukakïkiti, “[Diosaw] llampʼu chuymaninakarojj cheqa thakin irpi” sasaw Bibliajj qhanañcharaki (Sal. 25:9). Jehová Diosajj Biblia toqe, ukhamarak suma phoqeri amuyasir esclavojj wakichki uka qellqatanaka, * videonaka, tantachäwinak toqew irpistu (Mat. 24:45-47). Ukampis jiwasaw Diosan yanaptʼap humilde chuymampi katoqasiñasa. Ukatakejj Bibliat yatjjatañatakiw chʼamachasiñasa, ukarjamaw sarnaqañasaraki.

19-21. 1) ¿Kunansa Moisesajj Cades sat cheqan pantjasïna? 2) Kunatï Moisesar paskäna ukatjja, ¿kunanaksa yateqsna?

¹⁹ Janiw sint pantjaskañäniti. Moisés chachat parltʼaskakiñäni. Jupajj walja maranakaw llampʼu chuymanïtap uñachtʼayäna, Jehová Diosatakjamaw sarnaqarakïna. Ukampis 40 maranak wasarnam viaj-jjasajja, janiw ukham chuymanëjjänti. Egipto markan jan jiwañapatak yanaptʼkpachäna uka Míriam kullakapajj ukhakiw jiwjjäna, Cades sat cheqaruw imjjapjjarakïna. Ukhaw israelitanakajj kunatï jakañatak munaski ukanakat mayamp quejasipjjäna. Bibliajja, israelitanakajj ‘uma jan utjipanwa’ Moisés contra parlapjjäna sasaw  qhanañchi. Jehová Diosajj walja milagronakwa Moisés toqejj luräna, walja maranakaw Moisesajj israelitanakar pʼeqtʼjjarakïna, ukhamäkchïnsa jan walinak parlasipkakïnwa. Moisesan juchapatsa umajj jan utjkaspa ukhamwa parlapjjäna (Núm. 20:1-5, 9-11).

²⁰ Ukham jan walinakan uñjasisajja, Moisesajj jankʼakiw colerasïna. ‘Qarqaruw parlañama’ sasaw Jehová Diosajj säna. Diosar confiyasin ukham lurañat sipansa, wali colerataw israelitanakarojj ‘¿aka qarqatti uma apsurapipjjäma?’ sasin säna. Ukatsti, pä kutiw thujrupampejj qarqar jisktäna, ukat walja umaw mistüna. Moisesajj jachʼa jachʼa tukutapata, ukhamarak colerampi atipayasitapatwa ukhamar purtʼasïna (Sal. 106:32, 33). Mä jukʼa tiempo colerasitapatjja, Jehová Diosajj janiw Suma Oraqer mantaykänti (Núm. 20:12).

²¹ Kunatï Moisesar paskäna ukat ¿kunanaksa yateqsna? Maya, llampʼu chuyman jaqëñatakejj sapüruw chʼamachasiskakiñasa. Mä ratukis ukham jan lurjjsna ukhajja, jachʼa jachʼaw tukjjsna, ukat jan walinakwa parljjsna, lurjjaraksna. Paya, sint llakisiñajj aynachtʼayistaspawa, ukhamajj jan walinakan uñjaskasas llampʼu chuymanïñatak chʼamachasiskakiñäni.

22, 23. 1) ¿Kunatsa llampʼu chuymanïñatak chʼamachasiskakiñasa? 2) ¿Kuntï Sofonías 2:3 textojj siski ukajj kamsañsa munpacha?

²² Jarkʼaqatäñäniwa. Mä jukʼa tiempotjja, Jehová Diosajj jan wali jaqenakar chhaqtayjjaniwa, llampʼu chuyman jaqenakarukiw jakayjjani. Ukapachaw suman jakasiñajj aka oraqen utj-jjani (Sal. 37:10, 11). ¿Ukanti jiwasanakajj llampʼu chuyman jaqenakamp chik jakasiñäni? Jehová Diosajj kuntï Sofonías 2:3 (liytʼañataki) texton maykistu ukarjam lurañäni ukhajj ukankañäniwa.

²³ ¿Kunatsa Sofonías 2:3 textojj “inas” imatäsipkchisma sasin sispacha? ¿Jehová Diosajj janiw Jupar taqe chuyma servirinakar jarkʼaqkapuniniti sañti munpacha? Janiw uk sañ munkiti, jan ukasti, “Diosan jachʼa colerasïwi urupata” imatäñatakejja, jiwasaw chʼamachasiñasa. Ukhamajj jutïrin wiñay jakasiñatakejja, jichhaw llampʼu chuymanïñatakisa Diosatakjam sarnaqañatakis chʼamachasiñasa.