1-2. (a) Sasintongna halak na songon dia do si Musa, jala aha buktina? (b) Aha do na mangonjar rohanta asa patuduhon lambok ni roha?

DIDOK Bibel, si Musa ma halak na ‘lumambok sian saluhut jolma na di atas tano on’. (4 Mus. 12:3) Maksudna, na parbiar do si Musa? Manang na so barani do ibana mambahen keputusan dohot mangadopi halak? Ndang songon i. Alai molo pandapot ni godang halak, songon i do halak na lambok. Sasintongna halak na togu, tegas, jala halak na barani do si Musa. Ala sai diurupi Jahowa, barani do ibana manjumpangi si Firaun, mamimpin hira-hira tolu juta halak mangalewati padang pasir, jala mangurupi halak Israel manaluhon musu.

² Ndang sarupa hasusaan na taadopi songon na diadopi si Musa. Ganup ari, ingkon taadopi do angka halak manang situasi na boi mambahen hita maol patuduhon lambok ni roha. Marjanji do Jahowa “sai na teanon ni angka parlambohi do sogot tano i”. (Ps. 37:11) Alani i, gabe taronjar do rohanta patuduhon lambok ni roha. Molo songon i, nunga gabe halak na lambok roha hamu? Didok na asing do hamu halak na lambok roha? Andorang so taalusi sungkun-sungkun on, ingkon taantusi do lapatan ni lambok ni roha.

3-4. (a) Dipatudos songon aha do lambok ni roha? (b) Asa boi gabe halak na lambok aha do opat parange na ingkon tapatudu, jala boasa?

³ Lambok ni roha dipatudos do songon lukisan na bagak. Boasa? Songon sahalak pelukis, asa boi bagak lukisanna  dipangke ibana do marragam warna. Suang songon i ma, asa boi gabe halak na lambok ingkon tapatudu do angka parange na denggan. Umpamana, serep ni roha, unduk, burju, jala barani. Alai, molo naeng mambahen las roha ni Jahowa, boasa ingkon tapatudu angka parange i? *

⁴ Holan halak na serep roha do na olo unduk tu parenta ni Debata. Jala diparentahon Debata do hita asa gabe halak na burju. (Gal. 5:22) Alai, on mambahen sogo roha ni Sibolis. Jala godang do halak di portibi on, na so lomo rohana molo serep rohanta jala lambok. (Joh. 15:18, 19) Alani i, ingkon barani do hita mangalo Sibolis.

5-6. (a) Boasa sogo roha ni Sibolis tu angka halak na lambok roha? (b) Sungkun-sungkun aha do na laho taulas?

⁵ Imbar do halak na ginjang roha tu halak na lambok roha. Molo na ginjang roha, mura do muruk jala ndang mangoloi Jahowa. Songon i ma parange ni Sibolis. Alani i, ndang pola longang rohanta molo sogo roha ni Sibolis tu angka na lambok roha. Alana dipatudu halak na lambok roha do na roa pangalaho ni Sibolis. Aha pe na dibahen Sibolis, ndang boi diambati ibana halak na lambok roha manomba Jahowa! Dipatudu nasida do molo Sibolis i pargabus.​—Job 2:3-5.

⁶ Aha do na boi mambahen hita maol marlambok ni roha? Jala boasa ingkon tongtong lambok rohanta? Laho mangalusi sungkun-sungkun on, taulas ma contoh sian si Musa, tolu halak Heber na ditaban di Babel, dohot Jesus.

7-8. Aha do na diulahon si Musa tingki adong na so mangargai ibana?

⁷ Tingki dilehon tanggung jawab: Tingki dilehon tanggung jawab, ra maol do hita marlambok ni roha, tarlumobi molo adong na so mangargai hita. Hea do dihilala hamu songon i? Songon dia molo keluargamuna na mambahen songon i? Aha do na laho  ulahononmuna? Saonari, taulas ma songon dia si Musa mangadopi situasi sisongon i.

⁸ Dipillit Jahowa do si Musa gabe pamimpin ni bangso Israel. Disuru do muse ibana manurathon patik tu bangso i. Tontu, diurupi Jahowa do si Musa mangulahon i. Alai tingki dipillit si Musa sian bangso na asing na gabe istrina, muruk do itona si Miriam dohot abangna si Aron. Ra, molo halak na asing na gabe si Musa, olo do gabe muruk jala balas dendam ibana. Alai ndang hansit roha ni si Musa disi. Gariada, dipangido ibana do tu Jahowa asa dipamalum si Miriam. (4 Mus. 12:1-13) Boasa olo si Musa mangulahon i?

9-10. (a) Songon dia do Jahowa mangurupi si Musa asa boi gabe pamimpin na denggan? (b) Aha do na boi ditiru kepala keluarga dohot sintua sian si Musa?

⁹ Olo do si Musa dilatik Jahowa. Alana ndang halak na lambok roha ibana tingki gabe keluarga ni si Firaun saleleng 40 taon. Buktina, tingki diida ibana sahalak baoa ni halak Mesir mambahen na so denggan tu halak Israel, pintor muruk do ibana jala dibunu baoa i. Dirimpu si Musa lomo roha ni Jahowa tu na niulahonna i. Alani i, asa boi gabe pamimpin ni halak Israel, diurupi Jahowa ma si Musa asa gabe halak na barani jala lambok. Jala ingkon serep do rohana, unduk, jala burju. Gabe boi ma ibana pamimpin na denggan ala diihuthon do sude na didok ni Jahowa.​—2 Mus. 2:11, 12; Ul. 7:21-30, 36.

¹⁰ Ingkon ditiru kepala keluarga dohot angka sintua do si Musa. Tingki adong na so mangargai hamu, unang ma mura hansit rohamuna. Alana hamu pe hea do ra mambahen na sala, alani i serep ma rohamuna mangangkui i. (Pjm. 7:9, 20) Laho pasaehon parsoalan, ihuthon ma tudu-tudu ni Jahowa. Jala tongtong ma lambok mangalusi. (Poda 15:1) Molo diihuthon hamu tudu-tudu i, on mambahen las roha ni Jahowa, mambahen dame, jala gabe sitiruon ma hamu taringot lambok ni roha.

11-13. Aha do na boi taparsiajari sian tolu halak Heber?

¹¹ Tingki dianiaya: Sian najolo, dibahen angka pamarenta do angka na so denggan tu naposo ni Jahowa. Ra, ditudu nasida do hita mambahen “na jahat”, hape sasintongna na tapillit do “mangoloi Debata gabe parhuaso unang apala jolma”. (Ul. 5:29) Alani i, olo do hita gabe direhei, dipenjarahon, manang dipungkuli. Alai ala diurupi Jahowa, ndang tabalos i tu nasida jala ndang balas dendam. Alai tongtong do hita lambok tu nasida.

¹² Rimangi ma contoh taringot tolu halak  Heber na ditaban di Babel, i ma si Hanania, si Misael, dohot si Azaria. * Diparentahon raja Babel ma asa disomba nasida patung mas na balga. Alai lambok do dipatorang nasida, boasa ndang olo nasida manomba i. Nang pe gabe ditutung raja nasida, alai tongtong do unduk nasida tu Debata. Jala ndang dirimpu nasida pintor diurupi Jahowa nasida di tingki i. Aha pe na masa, rade do nasida manjalo i. (Dan. 3:1, 8-28) Gabe taboto ma, barani do halak na lambok roha. Ise pe, jala aha pe na dibahen, ndang adong na boi mangambati hita manomba Jahowa.​—2 Mus. 20:4, 5.

¹³ Tingki diuji haporseaonta, songon dia do hita boi maniru tolu halak Heber i? Serep ma rohanta jala porsea ma tu Jahowa sai urupanna do hita. (Ps. 118:6, 7) Tingki adong mandok ndang taulahon na denggan, burju jala denggan ma taalusi nasida. (1 Ptr. 3:15) Jala tapasiding ma na boi mambahen hita ndang marale-ale tu Jahowa.

14-15. (a) Aha do na boi masa tingki marsak hita? (b) Songon didok di Jesaya 53:7, 10, boasa Jesus gabe sitiruon na denggan taringot marlambok ni roha nang pe tingki marsak?

¹⁴ Tingki marsak: Godang do na boi mambahen hita gabe marsak. Ra, marsak do hita tingki naeng ujian di singkola, manang tingki mangulahon sada tugas di parkarejoan. Manang olo do hita marsak ala ingkon mangihuthon perawatan kesehatan. Alani i, tingki masa sisongon i gabe maol do hita marlambok ni roha. Masala na gelleng pe, boi do gabe mambahen jut rohanta. Jala olo do gabe posi manang kasar hatanta. Molo songon i do na dihilala hamu, rimangi ma contoh ni Jesus.

¹⁵ Piga-piga bulan andorang so mate, marsak do Jesus. Ala diboto, laho dibahen do ibana susa jala diuhum mate. (Joh. 3:14, 15; Gal. 3:13) Didok Jesus marsak situtu do rohana alani i. (Luk. 12:50) Piga-piga ari andorang so mate, didok Jesus do muse, “Susa do huhilala.” Didok ibana do di tangiangna, “Ale Amang, palua ma ahu sian hasusaan on. Alai alani on do ahu umbahen na ro, asa hubolus hasusaan i. Ale Amang, pasangap ma goarmi.” (Joh. 12:27, 28) Sian tangiangna taboto ma na serep do roha ni Jesus jala unduk do ibana tu Debata. Dung dapot tingkina, ro ma angka musu ni Debata, disiksa ma ibana jala diuhum. Alai barani do Jesus mangadopi i. Nang pe songon i situasina, tongtong do Jesus marlambok ni roha. Tangkas ma, sitiruon na denggan do Jesus taringot patuduhon lambok ni roha nang pe tingki marsak.​—Jaha Jesaya 53:7, 10.

16-17. (a) Songon dia do angka sisean ni Jesus manguji lambok ni rohana? (b) Songon dia hita boi maniru Jesus?

¹⁶ Bayangkon songon dia arsak ni roha ni Jesus di borngin andorang so mate ibana. Diuji do lambok ni roha ni Jesus di tingki i. Marsoal do angka siseanna taringot “ise na umsangap” sian nasida. Ndang muruk Jesus tu nasida alai lambok do Jesus pasingothon. Jala ndang holan sahali i nasida dipasingot. Nang pe burju Jesus, alai tegas do ibana. Jala dipatorang ibana do tu nasida parange aha na ingkon dipatudu. Nang pe songon i, dipuji ibana do angka siseanna i ala tongtong setia tu ibana. (Luk. 22:24-28; Joh. 13:1-5, 12-15) Molo ndang setia hian Jesus sahat tu na mate, tontu ndang adong halak na boi mandapot hangoluan salelengna. (Rom 5:18, 19) Jala goar ni Jahowa pe gabe ndang dipasangap.​—Job 2:4.

 ¹⁷ Molo masa tu hamu songon na dihilala Jesus, songon dia do hamu mangadopi i? Tiru ma Jesus, nang pe marsak tongtong ma hamu lambok. Jala unduk ma tu parenta ni Jahowa na mandok, “Tongtong ma hamu sabar tu na asing.” (Kol. 3:13) Taingot ma, hita pe olo do mambahen na sala. Molo taingot i, mura ma hita unduk tu parentana i. (Poda 12:18; Jak. 3:2, 5) Jala sai taingot ma angka na denggan sian donganta.​—Eps. 4:29.

18. Songon dia do Jahowa mangurupi halak na lambok roha tingki mambahen keputusan, jala aha do na ingkon taulahon?

¹⁸ Boi mambahen keputusan na denggan. Molo sai tapatudu do lambok ni roha, urupan ni Jahowa do hita asa boi mambahen keputusan na denggan. Marjanji do Ibana, tangihononna do “pinangido ni angka na dangol”. (Ps. 10:17) Jala lehononna do lobi sian na tapangido. Bibel mandok, “Ditogutogu do angka na patutoru dirina tu dalan na sintong, jala diajari do nasida tu lomo ni rohaNa.” (Ps. 25:9, Bibel siganup ari) Jala marhite “naposo haposan”, dilehon Jahowa do tudu-tudu na boi mangurupi hita mambahen keputusan na denggan. Angka tudu-tuduna i adong di Bibel, angka sijahaonta, * angka video dohot angka parpunguan. (Mat. 24:45-47) Alani i, ingkon serep do rohanta manjangkon tudu-tudu sian Jahowa, mamparsiajari sude na diajarhon Ibana jala rade mangulahon na taparsiajari i.

19-21. Hasalaan aha do na dibahen si Musa tingki di Kades, jala parsiajaran aha do na tadapot sian i?

¹⁹ Manat ma asa unang taulahon na sala. Rimangi ma muse contoh sian si Musa. Saleleng martoan-taon dipatudu si Musa do lambok ni roha jala dibahen ibana do las roha ni Jahowa. Alai dung laho 40 taon nasida di padang pasir, ndang marlambok ni roha be ibana. Alana, di tingki i mate do itona jala dikubur di Kades. Lungun do roha ni si Musa alani i. Dung i, marungut-ungut ma muse halak Israel tu si Musa ala ndang adong aek. Didok roha ni nasida, ndang boi be nasida mangolu. Nang pe burju si Musa mamimpin nasida jala dibahen Jahowa muse tanda halongangan, alai sai marungut-ungut  dope nasida. Sasintongna ndang ala na so adong aek umbahen marungut-ungut nasida, alai disalahon nasida do si Musa ala diboan nasida tu padang pasir.​—4 Mus. 20:1-5, 9-11.

²⁰ Alani i, muruk hian ma si Musa jala gabe mago ma lambok ni rohana. Sasintongna, holan mangkatai do ibana disuru Jahowa tu batu i. Hape gabe muruk do si Musa tu bangso i huhut didok ibana, boi do bahenonna tanda halongangan. Dipungkul si Musa ma batu i sampe dua hali, dung i kaluar ma godang aek. Alani muruk ni rohana dohot ginjang ni rohana, gabe dibahen ibana ma hasalaan na balga. (Ps. 106:32, 33) Ala ndang marlambok ni roha be si Musa, gabe ndang dipaloas be ibana dohot tu Tano na Dijanjihon.​—4 Mus. 20:12.

²¹ Sian on, tadapot ma parsiajaran na ringkot. Na parjolo, ingkon tongtong do hita marlambok ni roha. Molo ndang tapatudu be lambok ni roha, boi do gabe ginjang rohanta jala gabe tadok hata na oto. Na paduahon, nang pe marsak hita jala mangadopi hasusaan, ingkon tongtong ma marlambok ni roha.

22-23. (a) Boasa ingkon tongtong tapatudu lambok ni roha? (b) Aha do lapatan ni hata na didok di Sepania 2:3?

²² Asa dilinggomi hita. Ndang sadia leleng nai, ripashonon ni Jahowa nama angka parjahat sian tano on. Holan angka halak na lambok roha nama na tading disi. Jala dame ma haduan tano on. (Ps. 37:10, 11) Molo diulahon hamu hata ni Jahowa na disurat di Sepania 2:3 (jaha), boi ma hamu tading disi.

²³ Boasa didok di Sepania 2:3 “anggiat tung diondingi hamu”? Lapatanna, ndang na so tolap Jahowa mangalinggomi angka halak na dihaholongi Ibana. Alai asa dilinggomi Jahowa hita, ingkon adong do na taulahon. Molo tongtong tapatudu lambok ni roha jala tabahen las roha ni Jahowa, boi ma hita malua “di ari pangarimasan ni Jahowa” jala mangolu salelengna.