1-2. (1) ?Baebol i talem se Moses i olsem wanem, mo hem i mekem wanem? (2) ?Wanem gudfala risen we yumi gat blong wokem tingting daon?

BAEBOL i talem se “i no gat wan narafala man long wol we tingting blong hem i stap daon olsem” Moses. (Nam. 12:3) ?Hemia i min se Moses i wan man we i slak, i no save mekem desisen, mo i fraet blong stanap strong taem narafala i agensem hem? Maet samfala oli ting se man we i gat tingting daon i olsem. Be hemia i no tru. Moses i wan man blong God we i gat strong tingting, i mekem plante bigfala desisen, mo i no fraet. Jehova i givhan long hem blong i stanap long fored blong king blong Ijip, i lidim samwe long tri milian man oli gotru long draeples, mo i halpem neson blong Isrel blong i winim ol enemi blong hem.

² Yumi no stap fesem ol trabol we Moses i fesem, be i gat sam samting we oli hapen long laef blong yumi evri dei o sam man we yumi mitim olgeta, we oli mekem i had blong gat tingting daon. Be i gat wan gudfala risen blong wokem fasin ya. Jehova i promes se: “Ol man we tingting blong olgeta i stap daon, bambae oli tekem graon ya i blong olgeta.” (Sam 37:11) ?Yu ting se yu yu gat tingting daon? ?Ol narafala oli tingbaot yu olsem wan man we i gat tingting daon? Bifo we yu ansarem ol impoten kwestin ya, yu mas save wanem ya tingting daon.

3-4. (1) ?Tingting daon i olsem wanem? (2) ?Wanem tri narafala fasin we yumi nidim, mo from wanem?

³ Tingting daon * i olsem wan naes pija we man i droem. ?From wanem yumi talem olsem? Man we i droem pija i mas joenem ol defdefren kala blong mekem wan naes pija. Yumi tu yumi mas  joenem plante gudfala fasin blong gat tingting daon, olsem fasin blong obei, kwaet fasin, mo strong tingting. ?From wanem yumi nidim ol fasin ya blong mekem Jehova i glad?

⁴ Ol man we oli gat tingting daon, oli obei long samting we God i wantem. Wan samting we God i wantem, hemia se yumi mas kwaet man. (Mat. 5:5; Gal. 5:23) Taem yumi mekem samting we God i wantem, Setan i kros we i kros. Taswe plante man long wol blong Setan oli no laekem yumi, nating se yumi gat tingting daon mo yumi kwaet man. (Jon 15:18, 19) From samting ya, yumi nidim strong tingting blong agensem Setan.

5-6. (1) ?From wanem Setan i no laekem ol man we oli gat tingting daon? (2) ?Wanem tufala kwestin we bambae yumi ansarem?

⁵ Man we i no gat tingting daon, hem i flas, i kros kwiktaem, mo i no obei long Jehova. Hemia nao ol fasin blong Setan. !Yumi kasem save from wanem hem i no laekem ol man we oli gat tingting daon! Ol man ya oli soemaot se Setan i rabis from we oli gat ol gudfala fasin we hem i no gat. Mo tu, oli pruvum se Setan i wan man blong giaman. ?Olsem wanem oli pruvum samting ya? !Nomata wanem samting Setan i talem o i mekem, hem i no save pulum olgeta blong oli lego Jehova mo wok blong hem!—Job 2:3-5.

⁶ ?Wetaem i had blong gat tingting daon? ?From wanem yumi mas traehad blong wokem fasin ya? Blong ansarem tufala kwestin ya, bambae yumi tokbaot Moses, trifala Hibru we oli kalabus long Babilon, mo Jisas.

7-8. ?Moses i mekem wanem taem samfala oli no soemaot respek long hem?

⁷ Taem yumi kasem wan hae posisen: I had long olgeta we oli kasem wan hae posisen blong oli gat tingting daon, antap moa, taem wan man we i stap aninit long olgeta i no soemaot respek long olgeta o i talem se oli no mekem gudfala desisen. ?Samting olsem i bin hapen long yu? ?Olsem wanem sipos hem i wan famle blong yu? ?Bambae yu mekem wanem? Traem tingbaot samting we Moses i mekem.

⁸ Jehova i putumap Moses blong i kam lida blong ol man Isrel mo i givim nambawan wok long hem blong raetemdaon ol loa blong  neson ya. Jehova i stap givhan long Moses blong mekem wok ya. Nating se i olsem, Eron, mo Meriam we i stret sista blong Moses, tufala i tok agensem Moses from woman we hem i maredem. Maet sam man we oli gat posisen olsem Moses oli kros mo oli wantem givimbak, be Moses i no mekem olsem. Hem i no harem nogud kwiktaem. Hem i plis long Jehova blong i finisim panis we Meriam i kasem. (Nam. 12:1-13) ?From wanem Moses i mekem olsem?

9-10. (1) ?Jehova i givhan long Moses blong i kasem save wanem? (2) ?Hed blong famle mo ol elda oli save lanem wanem long fasin blong Moses?

⁹ Moses i letem Jehova i trenem hem. Samwe long 40 yia bifo long taem ya, Moses i stap long haos blong king blong Ijip, mo hem i no gat tingting daon. Wan taem, hem i kam kros tumas nao i kilim i ded wan man we hem i ting se i no stap mekem i stret. Moses i ting se Jehova bambae i agri long samting we hem i mekem. Blong 40 yia, Jehova i givhan long Moses blong i kasem save se i no strong tingting nomo we hem i nidim blong lidim ol man Isrel, be hem i mas gat tingting daon tu. Mo blong gat tingting daon, hem i mas obei, mo i mas wan kwaet man. Hem i lanem lesen ya mo i kam wan nambawan lida.—Eks. 2:11, 12; Wok 7:21-30, 36.

¹⁰ Sipos yu yu hed blong famle no yu wan elda, i gud yu traem folem fasin blong Moses. Taem narafala i no soemaot respek long yu, yu no mas kam kros kwiktaem. Yu mas mekem tingting blong yu i stap daon mo luksave ol mastik blong yu. (Pri. 7:9, 20) Obei long ol advaes we Jehova i givim blong stretem ol problem. Mo oltaem yu mas ansa long kwaet fasin. (Prov. 15:1) Hed blong famle mo ol elda we oli gat fasin ya oli mekem Jehova i glad, oli givhan blong mekem pis i stap, mo oli soemaot wan gudfala eksampol blong tingting daon.

11-13. ?Trifala Hibru i soemaot wanem eksampol?

¹¹ Taem ol man oli mekem i nogud tumas long yumi: Long ol yia we i pas, plante gavman oli ronem mo kilim ol man blong Jehova. Maet oli talem se yumi stap “brekem loa,” be samting we i tru se, yumi ‘obei long God we i rula i bitim we yumi obei long ol man.’ (Wok 5:29) Maet oli laf long yumi, sakem yumi long kalabus, mo kilim yumi tu. Jehova i save givhan long yumi, blong yumi no givimbak nogud fasin long olgeta, be yumi stap kwaet nomo.

¹² Tingbaot gudfala eksampol blong trifala Hibru ya Hanania, Misael, mo Asaria, taem trifala i stap long Babilon. * King blong Babilon i talem se trifala i mas bodaon long wan bigfala pija we oli wokem long gol. Long kwaet fasin, trifala i eksplenem long king from wanem trifala  i no save bodaon long pija ya. King i talem se bambae hem i sakem trifala long wan bigfala faea. Be trifala i obei long God nomo. Trifala i no ting se Jehova i mas sevem trifala. Trifala i rere blong ded blong obei long Jehova. Be Jehova i jusum blong sevem trifala. (Dan. 3:1, 8-28) Trifala i soemaot se ol man we oli gat tingting daon oli no fraet. Maet wan king i talem se yumi no mas obei long Jehova, o maet ol man oli talem se bambae oli kilim yumi sipos yumi no folem tingting blong olgeta, o yumi kasem panis long wan narafala rod. Nating se i olsem wanem, be bambae yumi gohed blong wosipim Jehova nomo, yumi no save “mekem wosip long narafala god bakegen.”—Eks. 20:4, 5.

¹³ Taem wan samting olsem i traem bilif blong yumi, ?olsem wanem yumi save folem fasin blong trifala Hibru ya? Yumi mekem tingting blong yumi i stap daon mo yumi trastem Jehova se bambae hem i lukaot long yumi. (Sam 118:6, 7) Yumi ansa wetem respek mo long kwaet fasin, taem ol narafala oli agensem yumi. (1 Pita 3:15) Mo yumi no joen long eni samting we i save mekem se yumi no moa fren gud wetem Papa blong yumi long heven we i lavem yumi.

14-15. (1) ?Wanem i save hapen taem yumi wari? (2) Folem Aesea 53:7, 10, ?olsem wanem Jisas i nambawan eksampol blong tingting daon taem hem i wari mo i fesem hadtaem?

¹⁴ Taem yumi wari: Yumi evriwan yumi wari from ol defdefren risen. Maet yu wari from wan eksam we yu mas mekem long skul o from wan samting we yu mas mekem long wok. Maet yu wari from wan samting we dokta bambae i mekem long yu. Long taem olsem, i had blong gat tingting daon. Sam samting we yu no stap kam kros from, oli save mekem yu yu kros. Nao yu save tok strong o talem wan samting we i no kaen. Sipos samting olsem i bin hapen long yu, traem tingbaot eksampol blong Jisas.

¹⁵ Long ol manis bifo we Jisas i ded, hem i tingting tumas. Hem i save se bambae oli kilim hem i ded mo bambae hem i safa bitim mak. (Jon 3:14, 15; Gal. 3:13) Sam manis bifo we hem i ded, hem i talem se tingting blong hem i trabol tumas. (Luk 12:50) Mo sam dei nomo bifo we hem i ded, hem i talem se: “Tingting blong mi i hevi tumas.” Ol filing we hem i talemaot long prea oli soemaot tingting daon mo fasin blong obei, hem i se: “Papa, yu sevem mi blong hadtaem ya i no kasem mi. Be hadtaem ya i mas kasem mi, mo mi mi kam from samting ya nao. Papa, yu leftemap nem blong yu.” (Jon 12:27, 28) Taem ol enemi blong God oli kam blong holem Jisas, hem i no fraet, be hem i letem hem i go long han blong olgeta. Nao oli kilim hem i ded long fasin we i mekem hem i sem mo i harem i soa bitim mak. Nating se hem i wari mo i safa tumas, be hem i mekem samting we God i wantem. !I klia se Jisas i nambawan eksampol blong tingting daon taem hem i wari mo i fesem hadtaem!—Ridim Aesea 53:7, 10.

16-17. (1) ?Olsem wanem ol fren blong Jisas oli traem tingting daon blong hem? (2) ?Olsem wanem yu save folem fasin blong Jisas?

¹⁶ Long naet bifo we Jisas i ded, ol gudfala fren blong hem oli mekem wan samting we i traem tingting daon blong hem. Traem tingbaot olsem wanem tingting blong Jisas i hevi long naet ya. ?Bambae hem i stanap strong go kasem ded? Laef blong plante milian man i dipen long samting ya. (Rom 5:18, 19) Antap moa, samting we hem i mekem i save leftemap o i save spolem nem blong Papa blong hem. (Job 2:4) Mo tu, long las kakae we hem i mekem wetem ol gudfala fren blong hem, hemia ol aposol, “oli stap raorao se hu long olgeta i hae moa.” !Jisas i stretem olgeta plante taem finis from fasin ya, mo wan long ol taem ya hemia long sem naet ya nomo! Yumi sapraes se Jisas i no kam kros, be hem i ansa long  kwaet fasin. Hem i toktok kaen blong eksplenem bakegen wanem fasin we oli mas gat. Mo hem i talem gudfala toktok long ol fren ya from we oli sapotem hem.—Luk 22:24-28; Jon 13:1-5, 12-15.

¹⁷ ?Sipos yu, bambae yu mekem wanem? Taem yu wari mo fesem hadtaem, i gud yu folem fasin blong Jisas mo no kam kros. Yumi mas rere oltaem blong obei long tok blong Jehova se: “Yufala i no mas hareap blong kros long yufala.” (Kol. 3:13) Bambae yu obei long ol tok ya sipos yu tingbaot se, yumi evriwan i stap talem mo mekem sam samting we narafala i save kam kros from. (Prov. 12:18; Jem. 3:2, 5) Mo tu, i gud yu talem gudfala toktok long ol narafala from ol gudfala fasin we oli gat.—Efes. 4:29.

18. ?Olsem wanem Jehova i save givhan long ol man we oli gat tingting daon, blong oli mekem ol gudfala desisen? ?Be yumi mas mekem wanem?

¹⁸ Bambae yumi mekem ol gudfala desisen. Taem yumi no save wanem blong mekem, Jehova bambae i givhan long yumi blong mekem ol gudfala desisen. Be samting ya i save hapen nomo sipos yumi gat tingting daon. Hem i promes se bambae hem i lesin “taem man we i gat tingting daon i askem wan samting.” (Sam 10:17, NW) Be i no hemia nomo. Baebol i promes se: “Ol man we tingting blong olgeta i stap daon, hem i stap lidim olgeta long ol rod we i stret, mo i stap tijim olgeta long ol samting we hem nomo i wantem.” (Sam 25:9) Jehova i stap yusum Baebol mo ol buk * mo program we “gudfala slef we i waes” i rerem, blong givim advaes we i save lidim yumi. (Mat. 24:45-47) Be yumi mas mekem wok blong yumi tu. Yumi mas gat tingting daon mo luksave se yumi nidim help. Yumi soemaot samting ya taem yumi stadi long ol save we Jehova i givim, mo mekem i wok long laef blong yumi.

19-21. ?Moses i mekem wanem mastik long Kades, mo stori ya i tijim yumi long wanem?

¹⁹ Bambae yumi no mekem plante mastik. Traem tingbaot Moses bakegen. Hem i gohed plante yia blong gat tingting daon mo mekem Jehova i glad. Be afta we ol man Isrel oli stap long draeples blong klosap 40 yia, Moses i mestem mo i no moa soemaot tingting daon. Sista blong hem we maet hem nao i bin givhan blong sevem laef blong Moses long Ijip, i jes ded nomo mo oli berem hem long Kades. Nao  ol man Isrel oli komplen bakegen. Oli “tok agens” long Moses from we oli no gat wota. Nating se Jehova i givim paoa long Moses blong mekem merikel mo Moses i lego plante samting blong lidim olgeta long ol yia we i pas, be oli gohed blong komplen. Oli no komplen nomo se oli tosta, be oli tok agensem Moses tu, olsem se i fol blong hem.—Nam. 20:1-5, 9-11.

²⁰ Moses i kam kros tumas, mo i lusum kwaet fasin blong hem. Jehova i bin talem long Moses blong i toktok nomo long ston ya wetem strong bilif, be hem i no mekem olsem. Hem i girap i tok kros long ol man, mo i talem se hem nao bambae i givim wota long olgeta. Ale, hem i kilim ston ya tu taem mo bigfala wota i kamaot. Flas tingting mo kros i lidim hem blong i mekem bigfala mastik ya. (Sam 106:32, 33) Moses i lusum tingting daon blong smoltaem, mo from samting ya, God i no letem hem i go long Promes Lan.—Nam. 20:12.

²¹ Stori ya i tijim yumi long tu samting. Faswan: Oltaem yumi mas wok had blong gat tingting daon. Sipos no, flas fasin bambae i kam antap bakegen, nao yumi save talem ol toktok we i no stret o mekem samting we i krangke. Seken samting: I had blong gat tingting daon taem yumi wari o fesem hadtaem, taswe yumi mas traehad oltaem blong gat tingting daon.

22-23. (1) ?From wanem yumi mas traehad oltaem blong gat tingting daon? (2) Ol tok blong Sefanaea 2:3 i minim wanem?

²² Tingting daon bambae i protektem yumi. I no longtaem, Jehova bambae i spolem ol rabis man long wol, mo ol man we oli gat tingting daon nomo bambae oli stap. Long taem ya, bambae i gat pis long fulwol. (Sam 37:10, 11) ?Olsem wanem? ?Bambae yu yu stap wetem ol man ya we oli gat tingting daon? Yes, bambae yu stap sipos yu mekem samting we Jehova i askem, long profet tok blong Sefanaea.—Ridim Sefanaea 2:3.

²³ ?From wanem Sefanaea 2:3 i talem se: “Maet hem i no save givim panis long yufala”? Tok ya i no min se Jehova i no naf blong protektem ol man we oli wantem mekem hem i glad mo we hem i lavem olgeta, be i soemaot se yumi gat wok blong mekem sipos yumi wantem se Jehova i protektem yumi. Yumi save stap laef long “dei blong kros” blong Jehova mo gohed blong laef olwe, sipos yumi traehad naoia blong gat tingting daon mo mekem Jehova i glad.