1-2. (a) Halak na sonaha do si Musa, janah aha do na dob ibahen ia? (b) Aha do na porlu idingat hita ase boi patuduhkon halamlamon?

BIBEL mangkatahon “jolma na lamlam tumang do si Musa lobih humbani sagala jolma na i atas tanoh on”. (4 Mus. 12:3) Dong do piga-piga halak na marpandapot halak na lamlam ai galek janah parbiar. Tapi sasintongni lang tongon ai. Halak na toguh do si Musa, boi mambahen haputusan, janah barani. Halani iurupi Naibata, barani do ia manjumpahi Parao, raja ni halak Masir. Dob ai, ia do homa na mambobahon hira-hira 3.000.000 halak Israel i padang belantara janah mangurupi sidea manaluhon munsuhni.

² Sonari on, ra do lang songon si Musa hasunsahan na roh hubanta. Tapi sai dong do situasi na mambahen hita lang urah patuduhkon halamlamon. Hassi pe sonai, marjanji do Jahowa “na lamlam maruhur do sitean tanoh in”. (Ps. 37:11) Anggo idingat hita janji ai, gabe tarojur ma hita patuduhkon halamlamon. Ai halak na lamlam do nasiam? Ai sonai do homa halak mangidah nasiam? Paima ibalosi hita sungkun-sungkun ai, iulas hita ma lobei aha do artini halamlamon ai.

3-4. (a) Usih songon aha do halamlamon ai? (b) Ase boi patuduhkon halamlamon, dong ompat biak na maningon ipatuduh hita. Aha ma ai?

³ Songon lukisan na jenges do halamlamon * ai. Ase jenges lukisan, maningon igunahon pelukis ma marmasam warna. Sonai homa hita. Ase boi patuduhkon halamlamon  maningon ipatuduh hita homa biak na legan, songon toruh ni uhur, unduk, lamlam, ampa habaranion. Mase maningon ipatuduh hita biak sisonai laho pamalaskon uhur ni Jahowa?

⁴ Pitah halak na martoruh ni uhur do na unduk bani titah ni Naibata. Iparentahkon Naibata do ase hita patuduhkon halamlamon. (Mat. 5:5; Gal. 5:23) Tapi anggo lamlam hita, gabe sogam ma Sibolis ampa bahat halak i dunia on mangidah hita. (Joh. 15:18, 19) Jadi maningon barani ma hita manlawan Sibolis.

5-6. (a) Mase sogam uhur ni Sibolis mangidah halak na lamlam maruhur? (b) Sungkun-sungkun aha ma na laho iulas hita?

⁵ Halak na lamlam ai sedo halak na gijang uhur, urah manggila, atap pe manlawan dompak Jahowa. Parlahou ni Sibolis do na sonai. Halani ai ma sogam tumang uhurni mangidah halak na lamlam maruhur. Anggo totap hita lamlam, gabe taridah ma sambor do parlahou ni Sibolis, anjaha tarbukti ma parladung do ia. Mase? Halani lang soal aha pe na ibahen atap ihatahon Sibolis, lang boi ai mambahen halak na lamlam manlawan dompak Jahowa!​—Job 2:3-5.

⁶ Bani situasi na sonaha do lang urah hita patuduhkon halamlamon? Janah mase maningon marusaha hita patuduhkon ai? Laho mambalosi sungkun-sungkun ai, ulas hita ma sitiruon na ibahen si Musa, tolu garama halak Heber i habuangan Babel, pakon Jesus.

7-8. Aha do na ibahen si Musa sanggah dong halak na lang mangkargai ia?

⁷ Sanggah ibere tanggung jawab: Sipata lang urah bani sasahalak na ilantik gabe pengawas laho patuduhkon halamlamon. Ra do adong halak na lang mangkargai pengawasni atap pe mangkatahon anggo haputusan na ibahen sidea ai lang dear. Ongga do iahapkon ham sonai? Sonaha porini kaluargamu na mambahen sisonai? Aha ma bahenonmu? Pardiateihon hita ma sitiruon na ibahen si Musa bani situasi sisonai.

⁸ Si Musa do na ilantik Jahowa laho mambobahon halak Israel. Isuruh do homa ia manuratkon titah bani bangsa ai. Tontu iurupi Jahowa do si Musa ase boi mangkorjahon ai. Tapi, halani istri ni  si Musa sedo bangsa Israel, gabe marungut-ungut ma si Aron abangni pakon si Miryam botouni. Anggo halak na legan bani situasi ai, ra do manggila ia anjaha mardomdom. Tapi anggo si Musa lang borit uhurni. Sanggah iuhum Jahowa si Miryam marhitei gadam, ipindo ia do ase ipamalum Jahowa botouni ai. (4 Mus. 12:1-13) Mase sonai ibahen si Musa?

9-10. (a) Aha do na iajarhon Jahowa bani si Musa? (b) Sonaha kopala kaluarga pakon sintua i kuria maniru si Musa?

⁹ Sasintongni 40 tahun na salpu paima masa ai, sedo halak na lamlam si Musa. Ijia, ia tading pakon kaluarga ni raja Masir. Sanggah mangidah dong sada dalahi na mambahen na geduk, mintor manggila ma ia, lanjar ibunuh do dalahi ai. Pangahapni marosuh do Naibata mangidah ai. Halani ai gabe iajari Jahowa ma ia sadokah 40 tahun laho mangarusi lang sungkup pitah barani ase boi mambobahon halak Israel; porlu do homa halamlamon. Leganni ai, maningon do homa ia martoruh ni uhur, unduk, janah bujur. Itangihon si Musa do pangajaran humbani Jahowa. Ujungni gabe pambobai na dear tumang ma ia.​—2 Mus. 2:11, 12; Lah. 7:21-30, 36.

¹⁰ Maningon itiru kopala kaluarga ampa sintua ma si Musa. Porini dong na lang mangkargai pambahenanmu, ulang mintor manggila. Martoruh ni uhur ma mangakui hasalahanmu. (Par. 7:9, 20) Porini dong parsoalan, ihutkon ma podah ni Jahowa laho pasaloseihon ai. Anjaha totap ma lamlam sanggah mambalosi. (Pod. 15:1) Malas ma uhur ni Jahowa mangidah hita, dong hadameion, janah itiru halak ma halamlamonta ai.

11-13. Sitiruon aha do na ibahen tolu garama halak Heber?

¹¹ Sanggah iparburu: Humbani sapari ronsi sonari iparburu pamarentah do juakjuak ni Jahowa. Halani “balosan do [hita] bani Naibata ase bani jolma”, gabe ituduh ma hita mambahen hajahaton. (Lah. 5:29) Leganni ai irisai do homa hita, dong na ipenjarahon, atap pe ibogbogi. Tapi halani iurupi Naibata, boi ma hita totap lamlam hassi pe ibagas situasi sisonai.

¹² Pardiateihon hita ma sitiruon na ibahen tolu garama halak Heber, ai ma si Hananya, si Misael ampa si Asarya. * Bani panorang ai, iparentahkon raja Babel ma sidea ase manombah gana-gana omas. Anggo lang ra sidea, ipamasuk ma sidea hubagas apuy. Tapi lamlam do sidea patorangkon  mase lang ra sidea manombah gana-gana ai. Totap do ipilih sidea unduk bani Naibata janah iondoskon sidea do hagoluhanni hubagas tangan-Ni. Hape lang isangka sidea, mintor ipaluah Naibata do sidea bani panorang ai. (Dan. 3:1, 8-28) Tangkas ma halak na barani do na lamlam maruhur ai. Lang dong age aha atap ise pe na boi manlanglangi sidea manombah Jahowa, “Naibata parsimburu” in.​—2 Mus. 20:4, 5.

¹³ Porini dong na manguji haporsayaonta bani Jahowa, sonaha hita boi maniru tolu garama nongkan ai? Totap ma martoruh ni uhur janah porsaya isarihon Jahowa do hita. (Ps. 118:6, 7) Anggo ituduh hita mangkorjahon na jahat, totap ma lamlam sanggah marbalos bani sidea. (1 Ptr. 3:15) Anjaha ulang ma ra hita mangkorjahon aha pe na pasedahon parhasomananta pakon Jahowa.

14-15. (a) Sanggah bulinsah, aha do ra na ibahen hita? (b) Domu bani Jesaya 53:7, 10, mase sosok ihatahon Jesus do siusihan na sidearan na patuduhkon halamlamon age ibagas situasi na borat?

¹⁴ Sanggah bulinsah atap pe gulut pingkiran: Bahat do na mambahen hita bulinsah atap pe gulut pingkiranta. Umpamani, paima ujian atap pe sanggah mangkorjahon sada tugas. Ra do homa gabe gulut pingkiran halani maningon mangihutkon bahatni aturan sanggah martambar. Bani situasi sisonai, ra do lang urah patuduhkon halamlamon. Parsoalan na otik pe boi gabe ipabanggal. Gabe kasar ma parsahap janah lang be bujur bani halak. Anggo sonai na iahapkon nasiam, pardiateihon ma sitiruon na ibahen Jesus.

¹⁵ Bani piga-piga bulan paima matei Jesus, bulinsah do pangahapni. Ibotoh ia na laho ibunuh ma ia janah marsik do holi sitarononni. (Joh. 3:14, 15; Gal. 3:13) Ipatugah ia do homa sunsah pangahapni. (Luk. 12:50) Dob ai, piga-piga ari paima matei ia, sanggah martonggo ihatahon ma, “Bulinsah do uhurhu nuan.” Ihatahon ia use, “Ham Bapa, paluah Ham ma ahu humbani panorang on. Tapi tene, halani in do ase das ahu bani panorang on. Ham Bapa, pasangap Ham ma goran-Mu!” (Joh. 12:27, 28) Hunjon taridah ma martoruh ni uhur do Jesus halani ra ia patugahkon pangahapni. Unduk do homa ia halani ra mangkorjahon harosuh ni Naibata. Sanggah jumpah panorangni, barani do Jesus mangondoskon dirini hu tangan ni munsuhni, na laho mamunuhsi janah mangapasi ia. Hassi pe marsik tumang sitarononni, unduk do ia laho mangkorjahon harosuh ni Bapani. Tangkas ma taridah Jesus do siusihan na sidearan na patuduhkon halamlamon hassi pe ibagas situasi na borat.​—Basa Jesaya 53:7, 10.

16-17. (a) Aha do ra na mambahen Jesus lang urah patuduhkon halamlamon? (b) Sonaha hita boi maniru Jesus?

¹⁶ Bani borngin paima matei Jesus, tontu sunsah tumang pangahapni. Ra do ipingkirhon ia anggo lang setia ia, gabe lang dong jolma na boi mandapot haluahon. (Rom 5:18, 19) Anjaha gabe sambor ma holi goran ni Bapani. (Job 2:4) Ambahni ai, lambin sunsah ma pangahapni mangidah susianni na ‘maringori pasal ise do sidea sibanggalan’. Hape domma gati ipasingat Jesus ase ulang sonai sidea. Hassi pe sonai lang manggila ia bani sidea. Totap do ia lamlam. Hassi pe sonai tangkas do ipatugah aha na maningon ibahen susianni. Dob ai, ipuji ia do homa  susianni halani tongtong mangihutkonsi.​—Luk. 22:24-28; Joh. 13:1-5, 12-15.

¹⁷ Porini nasiam ibagas situasi na sonai, aha ma na laho bahenonmu? Tiru hita ma Jesus. Ulang ma hita urah manggila hassi pe sunsah pangahapta. Totap ma unduk mandalankon titah ni Jahowa na mangkatahon ase hita “marsianju-anjuan anjaha marsisasapan dousa”. (Kol. 3:13) Lambin urah do hita mandalankon ai anggo mardingat ganup hita gati do marsalah. (Pod. 12:18; Jak. 3:2, 5) Janah marusaha ma hita mangindahi habujuron humbani halak na legan. Dob ai puji ma sidea.​—Ep. 4:29.

18. Sonaha Jahowa mangurupi halak na lamlam mambahen haputusan, tapi aha do na maningon ibahen sidea?

¹⁸ Boi mambahen haputusan na dear. Sipata ra do lang urah mambahen haputusan. Tapi anggo ipatuduh hita halamlamon iurupi Jahowa do hita ase boi mambahen haputusan na madear. Marjanji do Ia tangihonon-Ni do ‘pangindoan ni halak na masombuh [“lamlam maruhur”, NW]’. (Ps. 10:17) Tapi lang pitah itangar. Bibel mangkatahon, “Itogu-togu do halak na lamlam maruhur mardalan ibagas hasintongan, anjaha iajarhon do dalan-Ni bani halak na lamlam maruhur.” (Ps. 25:9, NW) Domma ibere Jahowa panogu-noguon marhitei Bibel, publikasi *, video, ampa partumpuan na ipasirsir “juakjuak na bujur anjaha na maruhur”. (Mat. 24:45-47) Maningon martoruh ni uhur ma hita manjalo ganupan ai. Parlajari hita ma ai, janah unduk ma mandalankon aha na dob iparlajari.

19-21. Hasalahan aha do na ibahen si Musa sanggah i Kades, janah aha ma parlajaranni hubanta?

¹⁹ Manjaga diri ase ulang mambahen na lepak. Rimangi hita ma use contoh ni si Musa. Domma martahun-tahun si Musa patuduhkon halamlamon, na mambahen malas uhur ni Jahowa mangidahsi. Tapi dob 40 tahun, lang be sonai si Musa. Ijia, sanggah sidea i padang belantara, matei ma si Miryam botouni ai, janah itanom i Kades. Tapi marungut-ungut ma use halak Israel halani seng dong bah janah ‘martinggil ma sidea dompak si Musa’. Hape sadokah on domma ipatuduh Jahowa halongangan marhitei si Musa. Anjaha dear do homa carani  si Musa mambobahon sidea. Tapi sanggah lang dong bah, isalahkon sidea do si Musa. Nini sidea halani si Musa do sidea gabe horahan.​—4 Mus. 20:1-5, 9-11.

²⁰ Halani ai gabe manggila tumang ma si Musa janah lang be ipatuduh halamlamon. Isuruh Jahowa do ia ase marsahap bani batu gingging na dong ijai. Tapi lang sonai ibahen si Musa. Manggila do ia bani halak Israel ai janah ihatahon ia na laho bahenonni ma halongangan. Dob ai, ibogbog ma batu ai ronsi dua hali janah kaluar ma bah. Halani manggila janah gijang uhurni, gabe lepak tumang ma pambahenanni. (Ps. 106:32, 33) Ujungni si Musa lang boi masuk hu Tanoh Parpadanan.​—4 Mus. 20:12.

²¹ Humbani sarita on, dong na boi iparlajari hita. Na parlobei, maningon marusaha ma hita patuduhkon halamlamon. Anggo lang ipatuduh hita halamlamon, hassi pe pitah sahali, ujungni boi do gabe manggila hita janah ihorjahon hita ma na lepak. Na paduahon, sanggah gulut pingkiranta ra do gabe urah hita manggila. Tapi maningon ilawan hita do ai.

22-23. (a) Mase maningon marusaha hita patuduhkon halamlamon? (b) Aha do artini na ihatahon bani Sepanya 2:3?

²² Ilinggomi do hita. Tongkin nari, laho iripaskon Jahowa ma ganup parjahat. Pitah halak na lamlam maruhur do na boi manean tanoh on janah gabe gok ma holi hadameion ijai. (Ps. 37:10, 11) Ai ra do nasiam dihut manean tanoh on? Anggo sonai dalankon ma podah ni Jahowa na isurat si Sepanya. Ia mangkatahon, “Pindahi ma Jahowa, nasiam na lamlam maruhur i tanoh on, na mangkorjahon aturan-Ni na pintor. Pindahi ma hapintoron, patuduh ma halamlamon. Andohar iondingi nasiam humbani ari panringison ni Jahowa.”​—Sep. 2:3, NW.

²³ Mase bani Sepanya 2:3 ihatahon, “Andohar iondingi nasiam”? On sedo artini na lang boi Naibata manlinggomi juakjuak na hinaholongan-Ni. Tapi on mangartihon dong na porlu ibahen hita ase ilinggomi Jahowa. Maningon marusaha ma hita patuduhkon halamlamon janah mambahen malas uhur-Ni. Anggo sonai ibahen hita, boi ma hita maluah humbani “ari panringison ni Jahowa”, janah mandapot hagoluhan na sadokah ni dokahni.