1-2. (a) Mizé woniwa ninga muttu owila dhavi, nanda txini ekosiliye? (b) Ninawodhe dhavi okala attu okurumuwa?

BIBILIA onomuttonya Mizé ninga muttu wokurumuwa “mukurumuwelo waye kwafwanyiwa mwa muthu mwina mwilaboni.” (Oleb. 12:3) Ejo yatapulela wi iyene wali muttu wawobana? Attu enjene muttu agakala wokurumuwa anloga wila ddowobana. Mbwenye iyene kali dhawene. Mizé wali wovadda, wowimela pwi vina woniwa ninga mulabeli wa Yehova woliba murima. Na nikamihedho na Yehova wahifiyedha ologa na mulamuleli wa elabo ya Ejipitu, wahaweddiha mwiddeddereni attu owakwakana 3.000.000 wahakamihedha ana Izrayel wapemberha amwiddani awa.

² Iyo kaninagumanena makattamiho oligana na abale a Mizé. Mbwenye masaka abano ninowagumanana attu owali obe mapadduwo anirutxiha okala attu okurumuwa. Mbwenye iyo ninokokomeziwa okana mukalelo wokurumuwa. Yehova ohilibela wila “akurumuwi aner’okala anya a elabo.” (Masal. 37:11) Weyo onovyona ninga muttu wokurumuwa? Attu ena anowuzinddiyelana mukalelo obu? Nihinatti wakula mavuzo aba amakamaka, ninofwanyela oziwa txini entapulela okurumuwa.

3-4. (a) Okurumuwa onladdanihiwa na nni? (b) Ninfwanyelela okana mikalelo gani wila nikale attu okurumuwa nanda sabwaya jani?

³ Okurumuwa * onoladdanihiwa na guwo yokoddela. Na  mukalelo gani? Guwo enkoddela sabwa yokana kore dhottiyana-ttiyana, iyo vina nigatonyihedha mikalelo dhottiyana-ttiyana pankalihu attu okurumuwa. Mikalelodha sisi: oviyeviha, wiwelela, oliba murima na dhina. Ninfunela nni okana mikalelo esi wila nimwagalalihe Yehova?

⁴ Muttu woviyeviha onorumela onowiwelela enimuruma Mulugu. Yehova onfuna wi nikale attu okurumuwa. (Mt. 5:5; Gal. 5:23) Iyo nigamwiwelela Mulugu, Satana onosilidhiwa vaddiddi. Nona attu a mwilaboni anosilidhiwa nigatamelaga okala attu oviyeviha vina okurumuwa. (Jo. 15:18, 19) Mowidhawo ninofwanyela okala attu okurumuwa wila ninarumele onyengettiwa na Satana.

5-6. (a) Satana onawiddela nni attu okurumuwa? (b) Ninakule mavuzo gani?

⁵ Muttu ohili wokurumuwa ddovittukulela, kanrutxa osilidhiwa vina kanfuna omwiwelela Yehova. Satana mukalelo waye bubwene. Nona kanziveliwa na attu okurumuwa! Attu aba aderetu anotonyihedha wila Satana ddowopiha. Vina anowoniha wila iyene muttambi. Sabwaya? Sabwani masiki aloge dhottambi dhaye kanwodha wapupurutxa attu animulabela Yehova ali okurumuwa!—Job 2:3-5.

⁶ Okala wokurumuwa onrutxa na mukalelo gani? Ninfwanyelela nni okala attu okurumuwa mudhidhi wotene? Wila nakule mavuzo aba ndoweni nubuwele yotagiya ya Mizé, Ayuda araru atxedheliwe o’Babilónia vina Yezu.

7-8. Mizé okosile nni valogiwiye bure na abale?

⁷ Nigakana ettomo: Muttu agakana ettomo enokala yorutxa okala wokurumuwa, ttabwa-ttabwa akala anamalaba aye kanimuriha vina onopambiha elobo elogiliye eli yokalaya. Yaromaga opadduwa na weyo? Akala mmodha wa vamuralani vawo onokosa ejene? Ogakosile nni? Kobuwela ekosile Mizé mufwanyiwiye makattamiho ninga abene.

⁸ Ddi Yehova wamusakulile Mizé wila akale musogoreli wa ana Izrayel vina alebe malamulo wila eddihena nlogo nttile. Kiyali yowaganyedha wi dhaloga Mizé dhadha wa Yehova. Masiki dhawene, abalaye Aroni na Maria  animuloga bure sabwa ya omutela muyana wa nlogo nina. Muttu mwina kokala vamburoni va Mizé agahisakula wakosela elobo-txilobo—mbwenye Mizé kakosile ejuwene. Kanyonyehile momaguva. Mbwenye wahimulobelela Yehova wila ahimutxinyutxe Maria. (Oleb. 12:1-13) Mizé okanile dhavi murima obu?

9-10. (a) Yehova omukamihedhile Mizé ononelamo nni? (b) Amwazambo a vamuralani na anddimuwa a mmulogoni anamutagiye dhavi Mizé?

⁹ Mizé wavittiya oshagihiwa na Yehova. Mwa vyaka dhowakwana 40 akalaga elabo ya Ejipitu iyene kali muttu wokurumuwa. Labo nimodha wahimona mulobwana dhahi akosaga elobo yoniliye wi kiyali yaderetu, wahifiyedha ompa onaga wila yakosiye yali yapama. Iyene wali muttu wovittukulela obuwela wila dhotedhene dhakosiye Yehova wanziveliwa. Vahivira vyaka dhowakwana 40 Yehova amushagihaga wila, okala muttu oliba murima kinakwana. Wila akale musogoreli wapama wanfwanyela okala muttu woviyeviha, wowiwelela vina wokurumuwa. Mizé wahirumela malago a Yehova bafiyedha okala musogoreli wapama.—Obud. 2:11, 12; Mer. 7:21-30, 36.

¹⁰ Masaka abano amwazambo na anddimuwa a mmulogoni anofuniwana omutagiha Mizé. Muttu agahutuwa nriho kumaguvele osilidhiwa. Kakala muttu oviyeviha orumele yovirigana yawo. (Koh. 7:9, 20) Kala muttu wowiwelela ogomihe makani na mukalelo onimuzivela Yehova. Wakulege n’ofewa. (Gano 15:1) Mwazambo wa vamuralani na anddimuwa a mmulogoni agakulaga na mukalelo obu anomwagalaliha Yehova, anodhana murenddele vina anokala tagiha yotonyihedha okurumuwa.

11-13. Azombwe abale araru Ahebereu anittiyedhile yotagiha gani?

¹¹ Nigafwara-fwariwaga: Nlogo na Yehova masaka menjene ninofwara-fwariwa na alamuleli amwilaboni. Awene anowamagedha okosa ‘dhoddawa’ dhinjene, mbwenye kahiyo ejuwene enattukulela wawidda, wafwara-fwara, mbwenye sabwa ‘yomurumela Mulugu opitta attu.’ (Mer. 5:29) Masiki ateye, afugele mukambura, atabutxe kaniyelela mundduni. Na nikamihedho na Yehova, ninele okala attu okurumuwa nigafwanyiwa yoweha.

¹² Kobuwela yotagiha ya azombwe abale araru Ahebreu atxedheliwe o Babilonia anromoliwa—Sidrak, Mizak na Abdenago—nddowe nitanalele. * Mwene Nabukodonosor wahapanga wila ebedhe engamuttu yubileye  ya nddarhama. Na mukalelo wa okurumuwa awene ahimutapulelamo mwahaya enattukulela ohiwebedha engamuttuya. Mwene wahatxutxa wila agahaponyedha vamottoni kokodda webedha, awene ahisakula okalavi owiwelela. Masiki ahiziwaga wi anele ovuniwa, ahikalavi owiwelela. Azombweya ali omala-nawale wila arumele enapadduwele. (Dan. 3:1, 8-28) Azombwe abale araru ahidha woniha wila ole oli wokurumuwa txibarene ddili woliba murima—kawo mulamuleli, yowopiha, nne yodhavo enawodhe onittihiya omvaha Yehova ‘webedha oninfwanyelela.’—Olib. 20:4, 5.

¹³ Nigafwanyiwa yoweha ninatagihe dhavi azombwe abale araru? Nikale attu oviyeviha niroromelaga wila Yehova onele onikamihedha. (Masal. 118:6, 7) Muttu aganimagedha wi nihikosa elobo yabure nimwakule na mukalelo wokurumuwa vina na nriho. (1 Ped. 3:15) Nivilibihedhe ohikosa elobo enanyonge wandano wehu na Yehova vina omukwela wehu.

14-15. (a) Nigakala odhugudheya txini enapadduwe? (b) Modhela Izaiya 53:7, 10, ninlogela nni wila Yezu yotagiya ya muttu okalilevi wokurumuwa masiki afwayiwaga odhugudheya wottabwa?

¹⁴ Nigakala odhugudheya: Dhikalawo dhilobo dhinjene dhinidhugudha. Ninga motagiha akala nihikana mabigiho oskola obe mabasa menjene anfunihu okosa. Ninodhugudheya mwaha wa oziwa wi nindowa omparhani wegumi wila none mukalelo onfwanyeya maningo ehu. Nigakala odhugudheya ninorutxiwa vaddiddi otonyihedha okurumuwa. Dhilobo dhahanisilidha dhinoroma onisilidha. Esene dhinonittukulela ologa na mukalelo wovadda vina nowali. Ogana wila oli wodhugudheyene yotagiha ya Yezu enoukamihedha.

¹⁵ Malabo omariha ali Yezu velaboni ya vati iyene wali wodhugudheya vaddiddi. Wanziwa wila agatabutxiwa mpaka opiwa. (Jo. 3:14, 15; Gal. 3:13) Dhihalaga myeri dhing’ono wila apiwe wahiloga wi murima waye kuwafwasile. (Lk. 12:50) Ahalagawo malabo mang’onovi Yezu wahiloga: “Murima waga onoddiparhuwa.” Iyo ninononelamo wila Yezu wali muttu woviyeviha vina wowiwelela mmulobeleliye Yehova alogaga dhahi: “Babani, thithimihani nzina nenyu. Venevo wirimu odha nzu naloga: Ddimala othithimiha, ddinothithimiha vina.” (Jo. 12:27, 28) Mufiyedhi mudhidhi wopiwa kattawile wavipereka wa amwiddani a Mulugu wila atabutxiwe anyampwarhihiwe mpaka okwa. Masiki bali wodhugudheyene atabuwaga, Yezu wali wokurumuwene vina wahirumela okosa yamukumbirile Mulugu. Mohaganyedha Yezu yotagiha yaderetu ya muttu okalile wokurumuwa masiki afwanyiwaga odhugudheya wottabwaya!—Kengesa Izaiya 53:7, 10.

16-17. (a) Amaro a Yezu ehile dhavi okurumuwa waye? (b) Ninamutagiye dhavi Yezu?

¹⁶ Labo nomariha na Yezu velaboni ya vati anamafwara aye aheha okurumuwa waye. Onowubuwela mukalelo ogadhugudhehile iyene. Yezu wawodha okalavi wororomeleya mpaka okwa waye? Iyene korimeliwa ororomeleya waye kawo agavunehile. (Rom. 5:18, 19) Yamakamakaya, jawi iyene wanfwanyela okoddeliha omuttu wa Yehova. (Job 2:4) Omattiyu womariha bali na anamafwara aye vasiyarini ahiroma “opambihana” awenevi “atamelaga anakale munddimuwayámo.” Yezu wahimala ologela makani aba nawene dila dhinjene! Masiki dhawene Yezu kasilidhiwe. Iyene wahawakula nokurumuwa. Na mukalelo waderetu owatapulelamo—wili—mweddelo waderetu wafwanyelani  okana. Vasogorova ohatamalela sabwa yokala na iyene mmasosoni mwaye mwetemwene.—Lk. 22:24-28; Jo. 13:1-5, 12-15.

¹⁷ Weyo kofwanyiwa mmakanini ninga abane ogakosile nni? Osaze yotagiha ya Yezu okale wokurumuwa masiki ogakala wodhugudheya. Okane efunelo yodhowavi bugewelela elogile Yehova “muvilelagane.” (Kol. 3:13) Txibarene jorutxa okosa ejene mbwenye nihidduwale wila notene ninovonya ninologa obe ninokosa elobo enasilidha attu ena. (Gano 12:18; Tia. 3:2, 5) Kapura mudhidhi wi watamaalele attu ena agakosa elobo yaderetu.—Ef. 4:29.

18. Yehova onakamihedha dhavi attu okurumuwa okosa dhosakula dhaderetu, nanda awene anfwanyela okosa nni?

¹⁸ Nigakala attu okurumuwa dhosakula dhehu dhinele okala dhapama. Akala ninofanyiwa yosakula yorutxa mwigumini, Yehova onele onikamihedha osakula dhapama—mbwenye ejiya enapadduwe bahi iyo nigakala attu okurumuwa. Iyene ohilibela wiwa okumbirha wa ‘attu okurumuwa.’ (Masal. 10:17) Yehova kaniwa bahi wunla wawa. Bibilia onopikirela wila: Mulugu “onoaweddiha mudila mwaye animukurumuwela, onowasunziha enafuneyena.” (Masal. 25:9) Wila aneddiye Yehova onlabihedha Bibilia, manivuru * mattugumano mavidiyu onsasanyedha “mwimeleli wororomeleya, wa malago.” (Mt. 24:45-47) Iyo ninorumela nikamihedho na Yehova modhela okala attu oviyeviha vina nirumele wila ninofuna nikamihedho, nigamala nivilibihedhege osunza dhilobo dhotene dhinnivaha Yehova vina wila nitonyihedhe wila nili attu owiwelela nivirihegemo mwigumini mwehu dhotedhene dhinsunzihiwa iyo.

19-21. Yoddawa gani ekosile Mizé o Kades nanda ninasunze nni na empadduweli?

¹⁹ Nigakala attu okurumuwa kaninavonyetxe. Karoma omubuwela Mizé. Mwa vyaka dhinjidhene wali muttu wokurumuwa vina animwagalaliha Yehova. Mbwenye vaniye vyaka dhowakwana 40 Mizé wahittiya okala wokurumuwa. Murogoraye wavunile egumi yaye Mwejipito, wahikwa wekiwa elabo ya Kades. Mudhidhi mwina ana Izrayel animupambiha Mizé alogaga wila anjombeliwa dhilobo. Mudhidhi obu “nlogo nimunyanyuwela Mizé” niraga, nivaheni manje omwa. Masiki  vawonani mattikiniho akosa Mizé na nikamihedho na Yehova, vina Mizé wanivilibihedha wi akale musogoreli wapama awene ampambihavi. Awene kapambiha mwaha wa manje bahi, animupambiha Mizé okalaga ninga nttonana ototile ddiyene.—Oleb. 20:1-5, 9-11.

²⁰ Mizé wahisilidhiwa vaddiddi barimeliwa okurumuwa waye. Ottiya ologa na mwango ninga mwalogile Yehova, wanyanyuwela nlogo bafiyedha ologa wila nttikiniho nttile akosa ddiyene. Wattukula mwiri bavadda mwango dila bili mmwangoni bamubudduwa manje gwé. Ovittukulela na owali ohimuttukulela Mizé okosa yoddawa yowopiha. (Masal. 106:32, 33) Mwaha wa orimeliwa okurumuwa mwa mudhidhi mung’onovi Mizé wahiyelela gari yovolowa Elabo Yolibeleliwa.—Oleb. 20:12.

²¹ Empadduweli Mizé enonisunziha elobo. Yoroma, nivilibidhedhege mudhidhi wotene okala attu okurumuwa. Akala ninottiya okurumuwa mudhidhi mung’onovi ninofiyedha okosa obe ologa elobo yohifanyelela. Yanawili, odhugudheya onowobaniha okurumuwa, nona masiki nigadideliwaga wi nittiye okurumuwa wehu nihirumele nivilibihedhege odhowanavi okurumuwawa.

22-23. (a) Ninfwanyelela nni odhowaganavi okurumuwa wehu? (b) Txini ennaddela Sofoniya 2:3?

²² Ninele obareliwa. Mohigonela Yehova onele watolotxa attu otene ahili apama mbwenye akurumuwi banakalege anya a elabo. Mwilabonimwa munele okala mburo wa murenddele. (Masal. 37:10, 11) Onofuna okosa mpaddi wa attu anakale mwilaboni eswa? Akala yowakula yawo ndde, enofwanyela orumela niwobo nikosile Yehova modhela Sofoniya.—Kengesa Sofoniya 2:3.

²³ Sofoniya 2:3 onologa: “Txino mugafwanya vothawela”? Eji kintapulela wila Yehova kana ewodhelo yowavuna attu antamela omwagalaliha vina animukwela. Ebaribariya jawi versu eji enfuna eninonihedhemo wila ovuniwa oli mmadani mwehu. Nona akala ninofuna ovuniwa “siku nintatamuwa owali wa Nabuya” vina okalawo na mukalakala, nivilibihedhe okala attu okurumuwa vina nimwagalalihege Yehova.