1, 2. a) ¿Chuqui miʼ yʌl jiñi Biblia tiʼ tojlel Moisés, i chuqui tsiʼ mele? b) ¿Chucoch yomʌch mi lac chaʼlen wersa lac pʌs la cutslel?

JIÑI Biblia miʼ yʌl chaʼan «uts i pusicʼal Moisés ñumen bajcheʼ pejtelel winicob ti pañimil» (Nm. 12:3). ¿Yom ba i yʌl jiñi chaʼan juntiquilʌch lijicña bʌ wiñic, mach bʌ yujilic chuqui miʼ mel yicʼot yujil bʌ bʌqʼuen? An muʼ bʌ i yʌlob chaʼan cheʼʌch yilal juntiquil uts bʌ bajcheʼ jiñi. Pero mach cheʼiqui. Moisés jiñʌch juntiquil i wiñic Dios wen pʼʌtʌl bʌ, yujil chuqui yom melol yicʼot an i chʼejlel. Tiʼ coltaya Jehová tsiʼ contraji jiñi pʼʌtʌl bʌ rey i chaʼan Egipto, tsiʼ colta cheʼ bʌ 3 millón israelob chaʼan miʼ xʌñob ñumel yaʼ tiʼ tiquiñal lum yicʼot tsiʼ colta jiñi tejclum Israel chaʼan miʼ mʌlbeñob (jotbeñob) i contrajob.

² Joñonla maʼañic lac wocol tac bajcheʼ i chaʼan Moisés, pero ti jujumpʼejl qʼuin an la quicʼot yambʌ quixtañujob o an chuqui tac mi lac ñusan muʼ bʌ i yʌcʼ chaʼan wocol mi lac pʌs la cutslel. Jin chaʼan, an wen ñuc bʌ i sujmlel cheʼ yom mi lac chaʼlen wersa. Jehová miʼ yʌcʼ i tʼan: «Jini utsoʼ bʌ i pusicʼal mi caj i yʌqʼuentelob i wenlel [«pañimil», TNM]» (Sal. 37:11). Laʼ laj cʼajtiben lac bʌ: «¿Mejl ba j cʌl chaʼan añʌch cutslel? ¿Bajcheʼ yʌlʌ jiñi yambʌ quixtañujob?». Chaʼan mi la cʌqʼuen i jacʼbal ili ñuc tac bʌ cʼajtiya, yom mi lac chʼʌmben i sujm chuqui yom i yʌl cheʼ utsonla.

3, 4. a) ¿Chucoch lajal bajcheʼ jochʼbil bʌ blusa wen utsʼatax bʌ cheʼ mi lac pʌs la cutslel? b) ¿Baqui bʌ melbalʌl tac yom an lac chaʼan chaʼan mi lac pʌs la cutslel, i chucoch?

³ Cheʼ utsonla lajal bajcheʼ jochʼbil bʌ blusa wen utsʼatax bʌ. ¿Chucoch mi la cʌl bajcheʼ jiñi? Come chaʼan utsʼatax miʼ cʌytʌl yom miʼ cʼʌjñel utsʼat bʌ color tac. Cheʼ jaʼel, chaʼan mi lac pʌs la  cutslel yom an lac chaʼan utsʼatax bʌ lac melbal (chaʼlebal) tac bajcheʼ jiñi pecʼlel, i jacʼol tʼan yicʼot lac chʼejlel. Mi la com chaʼan wen miʼ qʼuelonla Jehová yom an lac chaʼan ili melbalʌl tac. Laʼ laj qʼuel chucoch. *

⁴ Cojach jiñi quixtañujob añoʼ bʌ i pecʼlel miʼ jacʼbeñob i tʼan Dios yicʼot miʼ pʌsob i yutslel (Gá. 5:23; Tit. 3:2). Pero Satanás miʼ wen michʼan cheʼ mi lac mel chuqui yom Jehová. Jin chaʼan, anquese mi lac pʌs lac pecʼlel yicʼot la cutslel cabʌl quixtañujob añoʼ bʌ tiʼ pañimil (mulawil) Satanás miʼ tsʼaʼleñoñobla (Jn. 15:18, 19). Jin chaʼan yom chʼejlonla.

5, 6. a) ¿Chucoch miʼ tsʼaʼlen Satanás jiñi utsoʼ bʌ? b) ¿Baqui bʌ cʼajtiya tac mi caj lac jacʼ?

⁵ Cheʼ maʼañic la cutslel mi lac chanʼesan lac bʌ, mi lac michʼan ti ora yicʼot maʼañic mi lac jacʼben i tʼan Jehová. Ili melbalʌl tac i chaʼañʌch Satanás. Jin chaʼan, miʼ tsʼaʼlen jiñi quixtañujob utsoʼ bʌ come jiñi wem bʌ i melbalob miʼ yʌcʼ ti tsictiyel bajcheʼ yilal i jontolil. I ñumen tsʌts bʌ miʼ yujtel tiʼ tojlel jiñʌch cheʼ miʼ pʌsob chaʼan juntiquil xlot, come chuqui jach miʼ yʌl o miʼ mel maʼañic miʼ mejlel i mʌctan chaʼan jiñi utsoʼ bʌ miʼ melbeñob i yeʼtel (troñel) Jehová (Job 2:3-5).

⁶ Jin chaʼan, ¿chuqui tac miʼ mejlel i yʌcʼ chaʼan wocol mi lac pʌs la cutslel? I ¿chucoch yom mi lac chʌn chaʼlen wersa chaʼan utsonla? Chaʼan mi lac jacʼ ili cʼajtiya tac, laʼ laj qʼuel jiñi ejemplo i chaʼan Moisés, jiñi uxtiquil hebreojob yicʼot i chaʼan Jesús.

7, 8. ¿Chuqui tsiʼ mele Moisés cheʼ bʌ maʼañic tsaʼ qʼuejli ti ñuc?

⁷ Cheʼ an ñuc bʌ la queʼtel. Miʼ mejlel i yʌcʼ chaʼan wocolʌch mi la cubin chaʼan mi lac pʌs la cutslel, ñumento cheʼ an majqui maʼañic miʼ qʼuelonla ti ñuc o miʼ yʌl mach tac bʌ weñic chaʼan tsaʼ bʌ lac mele. ¿Am ba ujtem ti lac tojlel iliyi? ¿Chuqui mi caj lac mel mi juntiquil ti lac familia miʼ melbeñonla jiñi? Laʼ laj qʼuel chuqui tsiʼ mele Moisés.

⁸ Jehová tsiʼ waʼchoco bajcheʼ yumʌl i chaʼan Israel i tsiʼ yʌcʼʌ chaʼan miʼ tsʼijbun jiñi mandar tac tsaʼ bʌ i yʌqʼue jiñi tejclum. Jiñi miʼ pʌs  chaʼan Moisés an yicʼot i coltaya Dios. Pero jiñi i yerañob, Míriam yicʼot Aarón, tsiʼ yʌlʌyob mach tac bʌ weñic tiʼ tojlel chaʼan jiñi xʼixic tsaʼ bʌ i pʌyʌ. Tajol an yambʌlob tsaʼ bʌ i michʼesayob yicʼot tsiʼ meleyob mach tac bʌ weñic chaʼan iliyi. Pero Moisés mach orajic tsaʼ michʼa i ti wocol tʼan tsiʼ cʼajtibe Jehová chaʼan miʼ cʼoqʼuesan Míriam chaʼan jiñi tsʌts bʌ cʼamʌjel woli (choncol) bʌ i ñusan (Nm. 12:1-13). ¿Chucoch cheʼ tsiʼ mele bajcheʼ jiñi?

9, 10. a) ¿Chuqui tsiʼ chʼʌmbe i sujm Moisés tiʼ coltaya Jehová? b) ¿Bajcheʼ miʼ mejlel i lajiñob Moisés jiñi añoʼ bʌ tiʼ wenta i familia yicʼot jiñi ancianojob?

⁹ Moisés wen jach chuqui tsiʼ mele come cabʌl chuqui tsiʼ cʌñʌ tiʼ tojlel Jehová. Cheʼ anto yom 40 jab chaʼan iliyi i yaʼto chumul ti Egipto, maʼañic i yutslel. Tiʼ sujm, wen yujil michʼ i tsaʼto i tsʌnsa juntiquil wiñic come tsiʼ qʼuele chaʼan mach weñic chuqui woli (yʌquel) i mel. Tsiʼ ñaʼta chaʼan Dios mi caj i qʼuel ti wen jiñi tsaʼ bʌ i mele. Jehová tsiʼ colta 40 jab chaʼan miʼ chʼʌmben i sujm chaʼan mach cojach yom chʼejl chaʼan miʼ yuman jiñi tejclum Israel, yom miʼ pʌs i yutslel jaʼel. Chaʼan miʼ mejlel, yomʌch an i pecʼlel yicʼot miʼ jacʼ tʼan. Moisés tsaʼʌch i chʼʌmbe i sujm, i tsaʼ sujti ti wem bʌ yumʌl (Éx. 2:11, 12; Hch. 7:21-30, 36).

¹⁰ Wʌle ora, jiñi añoʼ bʌ tiʼ wenta i familia yicʼot jiñi ancianojob weñʌch cheʼ miʼ lajibeñob i melbal Moisés. Mi yaʼ ochemet jaʼel, mach orajic yom maʼ michʼan cheʼ an majqui maʼañic miʼ qʼuelet ti ñuc. Pʌsʌ a pecʼlel i ñaʼtan chaʼan añʌch a sajtemal jaʼel (Ec. 7:9, 20). Jacʼben i tʼan Jehová yicʼot tojʼesan jiñi wocol tac cheʼ bajcheʼ miʼ yʌl, i chʌn pʌsʌ a wutslel (Pr. 15:1). Jiñi añoʼ bʌ tiʼ wenta i familia yicʼot jiñi ancianojob muʼ bʌ i melob bajcheʼ jiñi miʼ yʌqʼueñob i tijicñʌyel Jehová, miʼ chaʼleñob coltaya chaʼan an ñʌchʼtʌlel yicʼot miʼ pʌsob bajcheʼ yom mi lac pʌs la cutslel.

11-13. ¿Chuqui wem bʌ ejemplo tsiʼ cʌybeyoñobla jiñi uxtiquil hebreojob?

¹¹ Cheʼ bʌ mi laj contrajintel. Cʼʌlʌl ti wajali cabʌl yumʌlob an i contrajiyob i tejclum Jehová. ¿Chucoch? Tajol miʼ yʌlob chaʼan an chuqui mach weñic tsaʼ lac mele, pero tiʼ sujm woliʼ contrajiñoñobla come la com lac «jacʼben [...] i mandar Dios anquese miʼ ñusʌntel i mandar winicob» (Hch. 5:29). An i tajol mi lac wajlentel, mi la cotsʌntel ti cárcel o mi lac jajtsʼel. Pero tiʼ coltaya Jehová, ñʌchʼʌl jach mi la cajñel cheʼ mi lac ñusan wocol i maʼañic mi lac sutqʼuibeñob i jontolil.

¹² Laʼ lac ñaʼtan tsaʼ bʌ ujti tiʼ tojlel jiñi uxtiquil hebreojob tsaʼ bʌ cʌjchiyob majlel ti Babilonia, jiñi Ananías, Misael yicʼot Azarías. * Jiñi i rey Babilonia tiʼ subeyob chaʼan miʼ ñocchocoñob  i bʌ tiʼ tojlel jiñi i yejtal melbil bʌ ti oro. Ti uts bʌ tʼan tiʼ tsictesayob chaʼan maʼañic mi caj i chʼujutesañob i chucoch maʼañic mi caj i melob. Tsiʼ pʌsʌyob i xucʼtʌlel ti Dios anquese jiñi rey tsiʼ yʌlʌ chaʼan mi caj i chocob ochel ti jumpʼejl horno woli bʌ ti wen lejmel i cʼʌcʼal. Anquese Dios ti orajach tsiʼ coltayob, maʼañic tsiʼ ñaʼtayob mi cheʼʌch mi caj i yujtel. Pero ti jumpʼejlob i pusicʼal tsiʼ ñaʼtayob i ñusan chuqui jach miʼ yʌcʼ ti ujtel Jehová (Dn. 3:1, 8-28). Cheʼ bajcheʼ jiñi, tsiʼ pʌsʌyob chaʼan jiñi utsoʼ bʌ añobʌch i chʼejlel, i chaʼan maʼañic jumpʼejl yumʌl o wocol mejl bʌ i mʌctañob chaʼan miʼ chʼujutesañob Jehová (Éx. 20:4, 5).

¹³ ¿Bajcheʼ miʼ mejlel lac lajin jiñi uxtiquil hebreojob cheʼ bʌ miʼ ñojpel lac xucʼtʌlel ti Jehová? Jiñʌch cheʼ mi lac pʌs lac pecʼlel yicʼot cheʼ mi lac ñop chaʼan jin mi caj i cʌntañonla (Sal. 118:6, 7). I cheʼ an majqui miʼ jopʼ lac mul, ti uts bʌ tʼan mi caj lac pejcan (1 P. 3:15). Cheʼ jaʼel, maʼañic miʼ lac jacʼ lac mel mach bʌ weñic mejl bʌ i ticʼlan bajcheʼ añonla la quicʼot jiñi lac Tat am bʌ ti panchan.

14, 15. a) ¿Chuqui miʼ mejlel ti ujtel cheʼ an laj cʌlʌx pensar? b) Cheʼ bajcheʼ miʼ yʌl Isaías 53:7, 10, ¿chucoch Jesús jiñʌch jiñi wem bʌ ejemplo chaʼan chuqui yom i yʌl cheʼ mi lac pʌs la cutslel anquese an laj cʌlʌx pensar?

¹⁴ Cheʼ bʌ an laj cʌlʌx pensal. Cabʌl chuqui miʼ mejlel i yʌcʼ chaʼan mi laj cʌlʌx cʼojoʼtan lac bʌ. Jumpʼejl ejemplo, tajol cheʼ bʌ mi caj lac mel jumpʼejl examen ti escuela o chuqui wen ñuc bʌ yom mi lac mel ti la queʼtel. O tajol come mi caj lac pʼojʼel o mi caj lac melbentel jumpʼejl estudio ti doctor. Cheʼ cabʌl chuqui mi laj cʼojoʼtan, wocolʌch chaʼan mi lac pʌs la cutslel. Tajol muqʼuix i tech i michʼesañonla chuqui tac miʼ yujtel, mach bʌ lecojic mi laj qʼuel ti ñaxan. I miʼ mejlel la cʌl o lac mel chuqui tac mach weñic tiʼ tojlel yambʌlob. Mi an qʼuiñil mi la cubin lac bʌ bajcheʼ jiñi, laʼ lac ñaʼtan chuqui tsaʼ ujti tiʼ tojlel Jesús.

¹⁵ Cheʼ bʌ maʼañix jaypʼejl uw wʌʼan ti Pañimil, cabʌl chuqui an tiʼ tojlel. Yujil chaʼan mi caj i tsʌnsʌntel yicʼot chaʼan wen tsʌts mi caj i ticʼlʌntel (Jn. 3:14, 15; Gá. 3:13). Cheʼ bʌ an jax yom chaʼpʼej uxpʼejl uw chaʼan miʼ chʌmel (sajtel), tsiʼ yʌlʌ chaʼan cabʌl chuqui woliʼ cʼojoʼtan (Lc. 12:50). I cheʼ chaʼpʼej uxpʼejl jax qʼuin yom chaʼan miʼ chʌmel, tsiʼ yʌlʌ: «Wen chʼijiyem jax woli cubin tic pusicʼal». Miʼ mejlel laj qʼuelben i pecʼlel yicʼot chaʼan mucʼʌch i jacʼben i tʼan Dios chaʼan bajcheʼ tiʼ tsictesʌbe chuqui woliʼ yubin tiʼ pusicʼal cheʼ tsiʼ cʼajtibe: «C Tat coltañon chaʼan maʼanic chuqui miʼ yujtel ti ili ora. [...] [Pero] tsaʼ tiliyon chaʼan mic chʌmel ti ili ora. C Tat, pʌsʌ i ñuclel a cʼabaʼ» (Jn. 12:27, 28). Cheʼ tsaʼ cʼoti i yorajlel, tsiʼ pʌsʌ i chʼejlel i tsiʼ yʌcʼʌ i bʌ ti chʌmel tiʼ cʼʌb i contrajob Dios, wen pʼumpʼun jax bajcheʼ tiʼ tsʌnsayob. Anquese cabʌl i cʼojol yicʼot i wocol, tsiʼ pʌsʌ i yutslel yicʼot tsiʼ mele chuqui yom Dios. Tiʼ sujm, tsiʼ cʌntesayonla chuqui yom i yʌl cheʼ mi lac pʌs la cutslel anquese an laj cʌlʌx pensar (pejcan Isaías 53:7, 10).

16, 17. a) ¿Bajcheʼ tsiʼ yʌcʼʌyob ti wocol i yutslel Jesús jiñi i apóstolob? b) ¿Bajcheʼ miʼ mejlel lac lajin Jesús?

¹⁶ Ti jiñi cojix bʌ acʼʌlel wʌʼan Jesús ila ti Pañimil, jiñi i apóstolob tsiʼ yʌcʼʌyob ti wocol jiñi i yutslel. Laʼ lac ñaʼtan pejtelel chuqui an tiʼ jol ti jiñi acʼʌlel. Yom miʼ pʌs i xucʼtʌlel cʼʌlʌl miʼ chʌmel come an tiʼ wenta chaʼan yonlel quixtañujob miʼ tajob i cuxtʌlel. ¿Muʼ ba caj i mejlel i mel? (Ro. 5:18, 19). Pero ñumen ñuc bʌ jiñʌch cheʼ yom miʼ yʌqʼuen i ñuclel i Tat (Job 2:4). Cheʼ bʌ woliʼ mel jiñi cojix bʌ cena yicʼot jiñi cʼuxbibil bʌ i yapóstolob, iliyob tsaʼ caji i «cʌlʌx pejcañob i bʌ, o i yʌʼleñob i bʌ» chaʼan «majqui ñumen ñuc tiʼ tojlelob». Jesús mach cojaxto an i tojʼesayob tiʼ caj jiñi, tsaʼto  i tojʼesayob jaʼel ti jiñi bʌ ora. Pero Jesús maʼañic tsaʼ michʼa yicʼotob. Tiʼ yutslel i pusicʼal tsiʼ chaʼ tsictesʌbeyob bajcheʼ yomob i melbal. Cheʼ jiñi, tsiʼ ñuqʼuesʌbeyob i pusicʼal cheʼ chʌn xucʼul yicʼotob (Lc. 22:24-28; Jn. 13:1-5, 12-15).

¹⁷ ¿Chuqui tsaʼ lac mele cheʼ joñoñicla tsaʼ ujtiyonla bajcheʼ jiñi? Miʼ mejlel lac lajin Jesús cheʼ mi lac pʌs lac ñʌchʼtʌlel anquese an chuqui mi lac wen cʼojoʼtan. Laʼ lac jacʼ ti jumpʼejl lac pusicʼal ili i mandar Jehová: «Cuchben laʼ bʌ laʼ sajtemal» (Col. 3:13). Miʼ mejlel lac mel iliyi mi mucʼʌch laj cʼajtesan chaʼan ti lac pejtelel mi la cʌl o mi lac mel maʼañic bʌ miʼ mulan yambʌlob (Pr. 12:18; Stg. 3:2, 5). Cheʼ jaʼel, yom mi lac ñuqʼuesʌben i pusicʼal yambʌlob chaʼan jiñi wem bʌ i melbalob (Ef. 4:29).

18. a) ¿Bajcheʼ miʼ coltan Jehová jiñi utsoʼ bʌ chaʼan miʼ ñaʼtañob chuqui yom miʼ melob? b) ¿Chuqui yom miʼ melob chaʼan Dios miʼ coltañob?

¹⁸ Come wen chuqui mi caj lac yajcan lac mel. Cheʼ bʌ woli lac ñaʼtan chuqui mi caj lac mel ti laj cuxtʌlel, Jehová mi caj i coltañonla, pero yom mi lac pʌs la cutslel. Miʼ yʌcʼ i tʼan chaʼan mi caj i ñʌchʼtʌben i yoración jiñi utsoʼ bʌ (Sal. 10:17). I mach cojach jiñi, jiñi Biblia miʼ yʌl jaʼel chaʼan mi caj i subeñonla chuqui yom mi lac mel. Miʼ yʌl: «Miʼ pʌsben jini utsoʼ bʌ i pusicʼal bajcheʼ yom miʼ melob. Miʼ tojʼesan majlel jini pecʼoʼ bʌ tiʼ bijlel» (Sal. 25:9). Chaʼan miʼ yʌqʼueñonla ili coltʌntel, Jehová miʼ cʼʌn jiñi Biblia, jiñi jun tac, * video tac yicʼot tempa bʌ tac muʼ bʌ i chajpan jiñi «xucʼul bʌ xʼeʼtel am bʌ cabʌl i ñaʼtʌbal» (Mt. 24:45-47). Pero joñonla jaʼel yom an lac pecʼlel chaʼan mi laj cʌn chaʼan la comʌch laj coltʌntel, jin chaʼan yom mi lac pejcan muʼ bʌ i yʌqʼueñonla Jehová i ti jumpʼejl lac pusicʼal mi lac mel bajcheʼ mi laj cʌn.

19-21. a) ¿Chuqui mach bʌ weñic tsiʼ mele Moisés yaʼ ti Qadés? b) ¿Chuqui tac miʼ cʌntesañonla jiñi tsaʼ bʌ ujti tiʼ tojlel?

¹⁹ Come maʼañic mi caj lac wen mel chuqui mach weñic. Laʼ lac chaʼ ñaʼtan tiʼ tojlel Moisés. Cabʌl jab tsiʼ pʌsʌ i yutslel yicʼot wen tsaʼ qʼuejli ti Jehová. Pero cheʼ muqʼuix caj i jilel jiñi 40 jab i xʌñob yaʼ ti tiquin bʌ lum, maʼañic tsiʼ pʌsʌ i yutslel. Jiñi i chich, tajol tsaʼ bʌ i coltʌbe i cuxtʌlel yaʼ ti Egipto, maxto wen jalic i chʌmel i tsaʼ mujqui yaʼ ti Qadés. Cheʼ jiñi, jiñi israelob tsaʼ chaʼ cajiyob ti wulwul tʼan  chaʼan maʼañic chuqui añob i chaʼan. Jiñi Biblia miʼ yʌl chaʼan «tsaʼ cajiyob ti aʼleya» tiʼ contra Moisés tiʼ caj jaʼ. Anquese Jehová tsiʼ cʼʌñʌ Moisés chaʼan miʼ mel milagro tac i añix cabʌl jab i caj i coltañob, tsiʼ bej chanʼesayob i bʌ. I tsiʼ yʌlʌyob mach tac bʌ weñic tiʼ tojlel Moisés, cheʼ bajcheʼ jin i mul yubil cheʼ maʼañic jaʼ (Nm. 20:1-5, 9-11).

²⁰ Jiñi wocol tsiʼ yʌcʼʌ chaʼan miʼ wen michʼan Moisés. Maʼañic tsiʼ pʌsʌ i ñopoñel (chʼujbiya) come maʼañic tsiʼ pejca jiñi xajlel cheʼ bajcheʼ tsaʼ subenti ti Jehová, wen michʼ tsiʼ pejca jiñi israelob i tiʼ subeyob chaʼan jin mi caj i mel jumpʼejl milagro. Jin chaʼan, chaʼyajl tsiʼ jatsʼʌ jiñi xajlel i tsaʼ loqʼui cabʌl jaʼ. Tsiʼ mele mach bʌ weñic come tsiʼ chanʼesa i bʌ yicʼot tsaʼ wen michʼa (Sal. 106:32, 33). Come tsiʼ jumucʼ sʌtʌ i yutslel, Jehová maʼañix tsiʼ yʌcʼʌ ochel ti jiñi Lum tsaʼ bʌ wʌn subentiyob (Nm. 20:12).

²¹ ¿Chuqui tac miʼ cʌntesañonla jiñi tsaʼ bʌ ujti tiʼ tojlel Moisés? Ñaxam bʌ, chaʼan yom mi lac chaʼlen wersa chaʼan mi lac bej pʌs la cutslel. Mi maʼañic mi laj cʌntan lac bʌ, ti orajach miʼ mejlel lac chanʼesan lac bʌ i jiñʌch muʼ bʌ i yʌqʼueñonla la cʌl yicʼot lac mel mach bʌ weñic. I chaʼpʼejlel, jiñi cʌlʌx pensar miʼ mejlel i cʼuñʼesañonla, jin chaʼan yom mi lac pʌs la cutslel anquese woli lac ñusan tsʌts bʌ wocol tac.

22, 23. a) ¿Chucoch yom mi lac bej chaʼlen wersa chaʼan mi lac pʌs la cutslel? b) ¿Chuqui yom i yʌl am bʌ ti Sofonías 2:3?

²² Come mi caj lac taj laj coltʌntel. Mach jalix yom chaʼan Jehová miʼ jisan jiñi jontoloʼ bʌ ti ili Pañimil i cuxul mi caj i cʌytʌl jiñi utsoʼ bʌ. Cheʼ jiñi, tiʼ pejtelel pañimil miʼ cajel jiñi i sujm bʌ ñʌchʼtʌlel (Sal. 37:10, 11). ¿Yaʼ ba mi caj la cajñel yicʼot jiñi utsoʼ bʌ? Yaʼʌchi, mi mucʼʌch lac mel muʼ bʌ i subeñonla Jehová yaʼ ti Sofonías 2:3 (pejcan).

²³ ¿Chucoch miʼ yʌl Sofonías chaʼan «ticʼʌl» o tajol mi caj laj coltʌntel? ¿Yom ba i yʌl chaʼan Jehová maʼañic mi caj i coltan jiñi cʼuxbibil bʌ i wiñicob muʼ bʌ i wen chaʼleñob wersa chaʼan utsʼat miʼ yajñelob tiʼ tojlel? Maʼañic. Yom bʌ i yʌl jiñʌch chaʼan yom mi lac chaʼlen wersa jaʼel. Mi mucʼʌch lac chaʼlen wersa lac pʌs la cutslel yicʼot chaʼan utsʼat miʼ qʼuelonla Jehová ili ora, miʼ mejlel lac taj laj coltʌntel cheʼ miʼ «tilel i michʼajel» Dios i mi lac mejlel ti chumtʌl tiʼ pejtelel ora.