TANE MEKUN 7
Loi e Troa Thiina Ka Menyik Matre Amadrinë Iehova
“Thele Iehova jë, nyipunie asë ange ka menyike ngöne la nöj . . . Thelejë la ka menyik.”—ZEF. 2:3.
NYIMA 80 “Demeju, Nge Atejë Laka Ate Ihnimi Iehova”
MEKUN KA TRU *
1-2. (a) Ka tune kaa Mose, nge nemene la hnei angeic hna kuca? (b) Pine nemene matre nyipiewekë tro sa eënyine la thiina ka menyik?
ÖNI Tusi Hmitrötr, ketre atr “ka nyipi menyike Mose hune la nöjei ate asë e celë fen.” (Num. 12:3) Hapeu, kolo kö lai a hape, Mose a xou troa axecië mekun ngöne la kola icilekeu? Celë hi aqane goeëne itre xan, la atr ka thiina ka menyik. Ngo tha eje kö lai. Mose la hlue i Akötresie ka catr me ka atreine axecië mekun. Jëne la ixatua i Iehova, hnei Mose hna cile kowe la joxu ne Aigupito ka catr, me eatrongëne la 3 milio lao atr ngöne la hnapapa. Hnei angeice fe hna xatuane la nöje Isaraela troa lepe la itre ithupëjia.
2 Eje hi laka, tha easë kö a melëne la itre jole hnei Mose hna cile kow ekö. Ngo, ame ngöne la nöjei drai, easa cile kow la itre jol me itre atr ka ajolë së troa thiina ka menyik. Nyipiewekë tro sa eënyine la thiina cili ke, öni Iehova, “tro la ange ka menyike a hetenyi la nöj.” (Sal. 37:11) Hapeu, ka thiina ka menyik kö së? Itre xane kö a goeë së ceitu me ketre atr ka thiina ka menyik? Qëmekene troa sa la lue hnying celë, tro sa pane ce wang la aliene la hna hape, thiina ka menyik.
ALIENE LA HNA HAPE, THIINA KA MENYIK
3-4. (a) Hna aceitunëne me nemene la thiina ka menyik? (b) Nemene la foa lao thiina ka xatua së troa hetrenyi la thiina ka menyik, nge pine nemen?
3 Hna aceitunëne la thiina ka menyik * memine la ketre desë. Tune kaa? Ame la atr ka desë, tre, angeic a xome la nöjei pengöne han, matre troa mingöming la desë. Ketre tu së fe, loi e tro sa pane eënyine la nöjei thiina ka lolo, matre hetrenyi së la thiina ka menyik. Kola qaja la troa hetre hni ka ipië, me idrengethenge, me thiina ka lolo me catr. Pine nemene matre ka nyipiewekë la itre thiina cili koi Iehova?
4 Itre ka hni ka ipië hmekuje hi la ka aejëne la aja i Iehova. Nyidrëti a ajane tro sa thiina ka loi. (Mat. 5:5; Gal. 5:23) Ame la easa drengethenge Iehova, kola elëhni hnei Satana. Celë hi matre, ngacama hni ka ipië ju hë së me thiina ka menyik, ngo tro palakö a xele ma wai së hnei itre xan. (Ioane 15:18, 19) Haawe, nyipiewekë tro sa catr, matre tro sa atreine cile koi Satana.
5-6. (a) Pine nemene matre methi Satana la itre atr ka hni ka menyik? (b) Nemene la lue hnying hne së hna troa sa?
5 Ame la atr ka thiina ka menyik, tre, tha ka pi tru kö angeic. Ame la atr ka pi tru, tre, ka canga elëhni, nge tha ka drei Iehova kö. Celë hi itre thiina i Satana ka ifeketh memine la itre ka thiina ka menyik. Methi angeic la itre ka thiina ka lolo ke, pëkö thei angeic la itre thiina cili ke, ka ngazo angeic nge ka thoi. Nyimutre ju hë la itre hnei Satana hna qaja maine kuca, ngo thatreine kö angeic troa sawa la itre atr ka hni ka menyik troa nyihlue i Iehova!—Iobu 2:3-5.
6 Eue la kola jole koi së troa thiina ka menyik? Pine nemene matre ka nyipiewekë tro palahi sa eëne la thiina ka menyik? Tro la tulu i Mose me Iesu, memine la köni atre Heberu ka po e Babulona, a xatua së troa sa la lue hnying celë.
ITRE EWEKË KA AJOLË SË TROA THIINA KA MENYIK
7-8. Nemene la aqane ujë i Mose ngöne la kola xöjetriji angeic?
7 Ngöne la easa cilëne la ketre hnëqa: Ketre jol ka tru kowe la itre trene hnëqa troa thiina ka menyik. Tha ka hmaloi kö troa loi thiina kowe la itre atr ka pë metrötr, me ka icilekeu memine la itre hna amekötin. Hapeu, hna hane fe traqa tune lai koi epun? Nge tune kaa e traqa ju ujë tun hnene la ketre sinee i epun? Nemene la aqane tro epuni a ujë? Tro sa ce wang la hna kuca hnei Mose.
8 Hnei Iehova hna acili Mose troa elemekene la nöje Isaraela, me cinyihane la itre wathebo kowe la nöj. Eje hi, hnei Iehova palahi hna ceme Mose. Ngo hnei Miriama me Aarona, lue sipu trejin me Mose, hna xöjetriji angeic memine la föe i angeic. Ame la itre ka cilë hnëqa tui Mose ke, canga tro hi angatr a elëhni me itëkeune la ngazo. Ngo tha celë kö aqane ujë i Mose. Tha hnei angeice kö hna canga elëhni. Hnei angeice pe hna treije me sipo iele Iehova, matre troa amele Miriama. (Num. 12:1-13) Pine nemene matre Mose a ujë tune lai?
Hnei Mose hna treije me sipo iele Iehova troa amele Miriama (Wange ju la paragarafe 8)
9-10. (a) Nemene la hnei Mose hna troa trotrohnin? (b) Nemene la ini hna xom hnene la itre he ne hnepe lapa me itre qatre thup, qa ngöne la tulu i Mose?
9 Hnei Mose hna kapa hnyawa la itre ini qaathei Iehova. Ame ngöne lo 40 lao macatre qëmeken ke, Mose la ketre atrene la lapa ne la Joxu e Aigupito. Tha ka thiina ka menyike kö angeic ngöne la ijine cili. Hnei Mose hna canga elëhni me humuthe la ketre atre Aigupito. Ame koi Mose, Iehova a madrine la aqane ujë i angeic. Traqa koi 40 lao macatre ne xatua Mose hnei Iehova, troa trotrohnine la enyipiewekëne troa catr, matre troa atreine elemekene hnyawa la nöje Isaraela. Nyipiewekë koi Mose troa hetrenyi la thiina ka menyik, matre troa hni ka ipië, me idrengethenge me loi thiina. Pine laka hnei Mose hna kapa la itre eamo qaathei Iehova, haawe, pëkö atre thup ka lolo tui angeic.—Eso. 2:11, 12; Itre hu. 7:21-30, 36.
10 Loi e tro la itre he ne la itre hnepe lapa me itre qatre thup a nyitipu Mose. Tha tro kö angatr a canga elëhni ngöne la kola akötrë angatr. Nyipiewekë la troa hetre hni ne ipië, matre troa wangatrehmekune la itre tria i angatr. (Ate cai. 7:9, 20) Xötrethenge jë la itre hna amekötin hnei Iehova, göne la aqane troa nyinyine la itre jol. Ketre, loi e tro palahi a menyik la aqane ithanata. (Ite edomë 15:1) Maine tro la itre he ne la hnepe lapa me itre qatre thup a ujë tune lai, tro hë angatr a amadrinë Iehova. Angatre fe a thele tingeting me amamai tulu ka lolo, göne la aqane troa thiina ka menyik.
11-13. Nemene la ini hne së xome qa ngöne la tulu ne la köni nekö i angetre Heberu?
11 Ngöne la kola qanangazo së: Ekö hë qanangazone la itre hlue i Iehova hnene la itre ka cilëne la itre mus. Hna upe zö së la “itre ihumuth,” ngo trengathoi pe. Easa ajane troa “denge thenge Akötesie hune la at.” (Itre hu. 5:29) Maine jë, troa qanangazo së me akalabusi së me lepi së. Ngo hnene la ixatua i Iehova, matre tha tro pi kö sa xou me enije menu ngöne la itupath. Loi e tro pe sa lapa thaup me cile catr.
12 Hanawang la tulu i Hanania, me Misaela, me Azaria, köni thöth ne Heberu ka po e Babulona. * Hnene la joxu ne Babulona hna upi nyudren troa thili kowe la hnasaatr gool ka tru. Hnei nyudreni hna qaja cememine la hni ka menyik kowe la joxu, la kepin matre tha nyudreni kö a thili kow ej. Ngacama hna thele troa axouenyi nyudren me kuië nyudren hnine la hnaop ka mele hnei eë, ngo hnei nyudreni palahi hna cile catr me mele nyipici koi Akötresie. Ketre, tha hnei nyudreni kö hna mekun laka, tro Iehova a canga thepe nyudren. Ngo ame pe, xecie hnyawa koi nyudreni laka, tro kö Iehova a ceme nyudren. (Dan. 3:1, 8-28) Eje hi, hnene la köni nekö i angetre Heberu hna amaman laka, tha ka xoue atr kö la itre atr ka menyik. Pëkö joxu, pëkö ithupëjia, nge pëkö wathebo ka troa sewe së troa nyihlue i Iehova, ‘Akötesie ka zalu.’—Eso. 20:4, 5.
13 Maine troa tupathe la aqane mele nyipici së koi Akötresie, tro sa nyitipune tune kaa la köni nekö i angetre Heberu? Tha luelu kö së laka, tro kö Iehova a thupëne la mele së. (Sal. 118:6, 7) Loi e tro palahi sa thiina ka menyik me metrötrëne la itre ka qanangazo së. (1 Pet. 3:15) Easë fe a thipetrije la itre ewekë ka troa thë la aqane imelekeu së me Iehova, Tretretro së ka tru ihnimin.
Loi e tro palahi sa thiina ka menyik me metrötrëne la itre ka qanangazo së (Wange ju la paragarafe 13)
14-15. (a) Nemene la ka troa traqa ngöne la easa hnehengazo? (b) Thenge la hna qaja ngöne Isaia 53:7, 10, pine nemene matre Iesu hmekuje hi la tulu, göne la aqane troa thiina ka menyik ngöne la easa hnehengazo?
14 Ngöne la easa hnehengazo: Pë ju pë hë ka tha hnehengazo. Maine jë, easa hnehengazo qëmekene troa itupath ngöne la hnaini, maine ngöne pena la kola upi së troa kuca la ketre jol ngöne la hna huliwa. Maine jë pena, easa hnehengazo göne la hna troa qaja hnei droketre. Eje hi, itre ijine lai ka ajolë së troa hni ka menyik. Easa calogitr me qaja la itre trengewekë ka akötr. Maine hna hane traqa koi epun la itre ewekë cili, hanawang la tulu i Iesu.
15 Hnehengazo catre Iesu ngöne lo itre treu tixenuë ne nyidrëti e celë fen. Atre hnyawa hi nyidrëti laka, kola troa humuthi nyidrë, nge tro nyidrëti a akötr. (Ioane 3:14, 15; Gal. 3:13) Hnei Iesu hna qaja ngöne la ijine cili ka hape, akötre catre nyidrë. (Luka 12:50) Itre drai qëmeken tro Iesu a mec, öni nyidrë: “Hlohlo hë la hning.” Kola mama ngöne la thithi Iesu, la hni ne ipië me aqane drengethenge nyidrë. Öni nyidrë ka hape: “Angakaka, da amele ni qa ngöne la ijine celë. Ngo ngöne pe lai laka traqa ha ni kowe la ijine celë. Angakaka, atrunejë la atesiwa i cilie.” (Ioane 12:27, 28) Ame hë la kola troa humuthi Iesu ke, hnei nyidrëti hna nue la itre ithupëjia troa othi nyidrë, me qanangazo nyidrë, me humuthi nyidrë. Ngacama hnei Iesu hna hnehengazo me akötr, ngo hnei nyidrëti palahi hna catre amamane la thiina ka menyik me kuca la aja i Iehova. Ijije hi tro sa qaja e celë ka hape, Iesu hmekuje hi la tulu, göne la aqane troa thiina ka menyik ngöne la easa hnehengazo!—E jë la Isaia 53:7, 10.
Iesu la tulu ka tru göne la aqane troa thiina ka menyik (Wange ju la paragarafe 16-17) *
16-17. (a) Nemene la hna kuca hnene la itre aposetolo, nge ka troa sewe Iesu troa thiina ka menyik? (b) Tro sa nyitipu Iesu tune kaa?
16 Ame ngöne lo jidri tixenuë i Iesu ke, hnene la itre sinee i nyidrë hna kuca la ketre ewekë ka sewe Iesu troa thiina ka menyik. Pane mekune jë së la jidri cili, ngöne la Iesu a hnehengazo. Hapeu, hnei nyidrëti kö hna mele nyipici utihë la pun? Eloine hi hnei nyidrëti hna mec ke, maine ju pëkö ka troa mel. (Rom. 5:18, 19) Ketre, troa hetre thangane la aqane ujë i Iesu kowe la ëje i Akötresie. Maine jë, troa qaja angazo Iehova maine qaja aloinyi Nyidrëti pena. (Iobu 2:4) Thupene la pui ne xeni tixenuë i Iesu me itre aposetolo i nyidrë, hnei angatr hna iwesitrë me thele ka hape, “dei la ka troa sisitia e angat.” Anyimua amekötine Iesu la itre aposetolo pine la aqane ujë ka ngazo cili, tune la jidri cili! Ngo tha hnei Iesu kö hna elëhni. Hnei nyidrëti pe hna ithanata amenyikenyi koi angatr. Hnei Iesu hna amamane koi angatr la aqane troa ujë. Nge hnei nyidrëti fe hna qaja aloinyi angatr ke, hnei angatre palahi hna mele nyipici koi nyidrë.—Luka 22:24-28; Ioane 13:1-5, 12-15.
17 Maine easë ju fe, nemene jë la hne së hna troa kuca? Ngacama easa hnehengazo, ngo loi e tro sa nyitipu Iesu me hni ka menyik. Trongëne jë la hna amekötine hnei Iehova, lo Nyidrëti a hape, “loi e ixomi hninekeune me inuekeune nyipunie.” (Kol. 3:13) Ngo eje hi laka, tro sa trongëne la hna amekötine celë, e atre hnyawa hi së la nyine troa qaja maine kuca pena, ngöne la kola akötrë së hnei itre xan. (Ite edomë 12:18; Iako. 3:2, 5) Ketre, loi e tro palahi sa qaja aloine la itre xan.—Efe. 4:29.
KEPIN MATRE TRO PALAHI A THIINA KA MENYIK
18. Iehova a xatuane tune kaa la itre ka hni ka menyik, matre troa axecië mekune hnyawa, nge nemene la nyine tro angatr a kuca?
18 Maine tro sa thiina ka menyik, tro hë sa atreine axecië mekune hnyawa. Nyipici laka, nyimutre la itre mekun hne së hna xom ngöne la mele së. Ngo nyipiewekë tro sa hetrenyi la thiina ka menyik, matre tro Iehova a xatua së. Hnei Iehova hna thingehnaean ka hape, tro Nyidrëti a drenge la “aja i ange ka ipië.” (Sal. 10:17) Ngo tha Iehova hmekuje kö a troa dreng. Tusi Hmitrötr a qaja ka hape: “Tro nyidëti a ea la ite ka ipië ngöne la thina ka meköt; me inine la ite ka ipië la jë i nyidë.” (Sal. 25:9) Iehova a hamëne la itre eamo e hnine la Tusi Hmitrötr, me jëne la itre itusi së. * Itre itusi hna fejan, me itre video me itre icasikeu hna hnëkëne hnene la “hlue ka nyipici me ka inamacan.” (Mat. 24:45-47) Ngo eje hi, hetre hne së hna troa kuca. Maine easa ajane troa xatua së hnei Iehova, loi e tro sa hni ka ipië me hetre hni ne ole. Ketre, loi e tro sa inine la Tusi Hmitrötr, me trongëne la itre hne së inin.
19-21. Nemene la ewekë ka ngazo hna kuca hnei Mose e Kadesi, nge nemene la ini hne së hna xom?
19 Maine tro sa thiina ka menyik, tha tro kö sa tria. Hanawang la tulu i Mose. Itre macatre ne thiina ka menyik angeic, me kuca la itre ewekë ka amadrinë Iehova. Ngo ame pe, 40 lao macatre ne trongëne la angetre Isaraela la hnapapa ke, tha hnei Mose kö hna thiina ka menyik. Hna meci fe hnei Miriama, trejin me Mose, lo ka thepe angeic e Aigupito, nge hna kelemi eahlo pë hë e Kadesi. Ketre, öni angetre Isaraela ka hape, tha hna thupëne hnyawa kö la mele i angatr. Angatr a eetr me “iwatratra me Mose” ke, pëhë tim. Hnei Iehova hna aijijë Mose troa kuca la nöjei iamamanyikeu. Hna hamëne fe la trengecatre koi Mose troa eatrongë angetre Isaraela ngöne la hnapapa. Ngo ame pe, hnei angatre palahi hna eetr me hape, zö i Mose la kola pë tim.—Num. 20:1-5, 9-11.
20 Hnei Mose hna elëhni, matre patre hë thei angeic la thiina ka menyik. Tha hnei angeice kö hna ithanata kowe la etë, tune lo hna amekötine hnei Iehova. Hnei Mose pe hna ithanata akökötrene kowe la nöj, me qaja ka hape, tro angeic a kuca la ketre iamamanyikeu. Angeice hë a alua lepe la etë, matre kaca pi hi la tim. Hna tria hnei Mose, pine laka, hnei angeic hna pi mama me canga elëhni. (Sal. 106:32, 33) Ame hë la pun, tha hnei Mose kö hna lö kowe la Nöje Hna Thingehnaean.—Num. 20:12.
21 Hetre ini hne së hna xom. Ame la hnapan, tre, loi e troa kuca la hne së hna atrein, matre tro palahi sa thiina ka menyik. Maine tha thupëne kö së, tro hë sa pi mama me ithanata menu, maine kuca pena la ketre ewekë ka ngazo. Ame la hnaaluen, tre, jole koi së troa thiina ka menyik ngöne la easa hnehengazo. Celë hi matre, loi e tro palahi sa catre thiina ka menyik, ngacama easa elëhni.
22-23. (a) Pine nemene matre tro palahi sa thiina ka menyik? (b) Nemene la hna qaja ngöne Zefania 2:3?
22 Maine tro sa thiina ka menyik, tro hë sa mel. Calemi hë la ijine tro Iehova a apatrene la itre atr ka ngazo qa la fen. Troa lapa pe la itre atr ka thiina ka menyik. E cili, tro ha tingeting me lolo la ihnadro. (Sal. 37:10, 11) Hapeu, tro kö epuni elanyi a hane cememine la itre atr ka thiina ka menyik? Ijije hi, e hne së hna kapa la ihë i Iehova, hna cinyihane hnei Zefania perofeta.—E jë la Zefania 2:3.
23 Pine nemene matre kola qaja ngöne Zefania 2:3, ka hape: “Maine troa juetë nyipunie”? Tha kolo kö a hape, thatreine kö Iehova troa thupëne la itre ka amadrinë Nyidrë me hnimi Nyidrë. Ngo kola hape, hetre nyine tro sa kuca matre tro sa mel. Ijije hi troa thepe së “ngöne la drai ne elëhni Iehova,” matre troa hetrenyi la mele ka epine palua. Celë hi matre, loi e tro sa thele enehila troa thiina ka menyik me amadrinëne la hni Iehova.
NYIMA 120 Nyitipune Jë La Thiina Ka Menyike i Keriso
^ par. 5 Tha hna hnaho së kö cememine la hni ka menyik, matre nyipiewekë tro sa eënyine la thiina cili. Eje hi, ka hmaloi troa thiina ka menyik kowe la atr ka loi thiina, ngo ka jole catr kowe la atr ka pi draië. Ame ngöne la tane mekun celë, tro sa ce wang la itre ewekë ka troa ajolë së troa eënyine la thiina ka menyik.
^ par. 3 GÖI TROA TROTROHNIN: Thiina ka menyik. Ame la atr ka thiina ka menyik, tre, angeic a thiina ka loi koi itre xan, ngacama kola thele iwesitrë me angeic. Hni ka ipië. Ame la atr ka hni ka ipië, tre, tha ka pi tru kö angeic me pi mama. Angeic a wangatrune la itre xan. Ka hni ka ipië Iehova ke, Nyidrëti a wangatrunyi së me hnimi së.
^ par. 12 Hnei angetre Babulona hna saze la ëjene la köni nekö i angetre Heberu. Hna hë nyudren ka hape, Saderaka, Mesaka, me Abedenego.—Dan. 1:7.
^ par. 18 Wange ju fe la tane mekun hna hape, “Xome Jë La Itre Mekun Ka Atrunyi Akötresie,” ngöne la Ita Ne Thup ne 15 Eiperem 2011, qene Wiwi.
^ par. 59 GÖTRANE: Hnei Iesu palahi hna thiina ka menyik, ngöne lo nyidrëti a amekötine lo itretre drei nyidrë ka iwesitrë matre troa atre la ka troa sisitia e angatr.
