1-2. (a) San Beibel e taki fu Mosesi? Sowtu wooko Mosesi be du? (b) Saide u mu meke moiti fu abi safu-ati?

BEIBEL taki „fu ala libisama a goontapu, a Mosesi a be a moo safu-ati wan” (Num. 12:3). A feele Mosesi be e feele fu du sani? A feele a be e feele sama? A so son sama e si sama di abi safu-ati. Ma a sani ya a ná tuu. Mosesi be abi deki-ati. A á be e feele fu du san a mu du. Yehofa be yeepi en fu go taki anga a makiti kownu fu Egepte. A be yeepi en tu fu de fesiman fu wan sani fu dii miliyun sama aini a sabana. Boiti dati a yeepi den Islayelisama fu wini den feyanti fu den.

² U ná abi denseefi polobelema di Mosesi be abi, ma toku son sama e meke ai taanga gi u fu abi safu-ati. Boiti den sama ya taa sani e miti u di e meke ai taanga gi u fu abi safu-ati. Ma wan sani e gi u taanga-sikin fu meke moiti fu abi a manii ya. Dati na a paamisi di Yehofa paamisi u taki a „den safu-ati sama o fende goontapu” (Ps. 37:11). Yu e si enke yu a wan sama di abi safu-ati? Fosi i piki a akisi ya, i mu sabi on ten u sa taki wan sama abi safu-ati.

3, 4. (a) Anga san u sa maiki a abi di wan sama mu abi safu-ati? (b) San a den dii manii di u mu abi efu u wani abi safu-ati?

³ Safu-ati * de enke wan moin asekedeei. A on fasi? Leti  enke fa wan sama di sabi meke asekedeei e mokisa omen kololu fu meke wan asekedeei, a letiso u mu meke moiti fu abi taa bun manii efu u wani abi safu-ati. Wantu fu den manii ya a sakafasi, switifasi, deki-ati anga a aliki di u mu aliki Yehofa. Saide u mu abi den manii ya efu u wani Yehofa piisii?

⁴ A den sama di abi sakafasi wawan e du san Gadu wani. Wan fu den manii di Gadu wani wi abi a switifasi (Gal. 5:22; 2 Tim. 2:24). Te wi e du san Gadu wani, da Saatan ati e boon. Neen meke winsi fa wi abi sakafasi anga switifasi, omen sama fu a goontapu fu Saatan e buuse u (Yoh. 15:18, 19). Neen meke wi abi deki-ati fanowdu fu toto futu gi Saatan.

5-6. (a) Saide Saatan á lobi sama di abi safu-ati? (b) Sowtu akisi wi o luku?

⁵ Te wan sama ná abi safu-ati ai fii enseefi, ai abi takuu atiboon, boiti dati a nai du san Yehofa wani. A so Saatan de. Neen meke a nai foondoo wi taki ai buuse den sama di abi safu-ati! Den sama ya e soi kiin anga a fasi fa den e tyai denseefi taki Saatan abi takuu manii. Ma a sani di e moo du en ogii, na a soi di den e soi taki en a wan leiman. Saide? Bika winsi san a du a á poi tapu den sama di abi safu-ati fu dini Yehofa!​—Yopu 2:3-5.

⁶ On ten a sa taanga gi u fu abi safu-ati? Saide u mu e meke moiti naamo fu abi a manii ya? A toli fu Mosesi, Yesesi anga den dii boi di be de a katibo a Babilon o yeepi u fu piki den akisi ya.

7-8. San Mosesi du di taawan á be e lesipeki en?

⁷ Te wi abi gaan faantiwowtu: Te wan sama abi faantiwowtu a sa taanga gi en fu soi taki a abi safu-ati, moomoo te den sama di de neen ondoo nai lesipeki en efuso te den fende taki a fasi fa ai du sani á bun. A sani ya miti i kaba? Efu a wan famii fi yu e du so noh? San i be o du? Meke u luku san u sa leli fu a toli fu Mosesi.

⁸ Yehofa be poti Mosesi enke fesiman fu tii den Islayelisama. A be meke a sikiifi den weiti di a be gi den Islayelisama tu. Den sani ya e soi kiin taki Yehofa be  e holibaka gi Mosesi. Ma toku Mosesi eigi sisa Meriyam anga en baala Aron be e kuutu en. Den be fende taki a uman fi en á be bun. Efu a son man be de a Mosesi peesi, den ati be o boon. Den be o du sani anga Meriyam anga Aron, ma Mosesi á du so. En ati á be e boon gaw. A begi Yehofa seefi fu a á sitaafu Meriyam moo (Num. 12:1-13). Saide Mosesi tyai enseefi so?

9-10. (a) San Yehofa yeepi Mosesi fu a fusutan? (b) San osufamii edeman anga owluman sa leli fu Mosesi?

⁹ Mosesi be gi Yehofa a okasi fu a leli en. Wan sani fu 40 yali a fesi, a be e tan aini a kownu fu Egepte osu. A ten de a á be abi safu-ati. En ati be e boon gaw. Neen meke a kii wan man fu di a be fende taki a be e du ogii anga wan taawan. Mosesi be denki Yehofa be lobi a sani di a du. Ma Yehofa teke 40 yali fu yeepi Mosesi fu a fusutan taki a ná deki-ati wawan a be mu abi, ma a be mu abi safu-ati tu. Efu a be wani abi safu-ati a be mu abi sakafasi, a be mu e aliki Yehofa tu. Boiti dati en ati á be mu e boon gaw. A teke den sani di Yehofa leli en, neen meke a be man tii a foluku bun.​—Ek. 2:11, 12; Toli 7:21-30, 36.

¹⁰ Osufamii edeman anga owluman sa waka a Mosesi baka aini a ten ya. Te wan sama du wan sani di e soi taki a nai lesipeki i, yu ati á mu boon gaw. Te i meke wan fowtu, i mu abi sakafasi fu soi taki i meke wan fowtu (Peleik. 7:9, 20). Du sani enke fa Yehofa wani te yu e losi polobelema. Taki anga lesipeki ala yuu (Odo 15:1). Te osufamii edeman anga owluman e tyai denseefi so, den e meke Yehofa piisii. Den e yeepi taawan fu libi na a wan aini a osufamii anga a kemeente. Boiti dati den e yeepi taawan fu abi safu-ati tu.

11-13. San u sa leli fu a fasi fa den dii Hebrew boi tyai denseefi?

¹¹ Te taawan e du ogii anga u: Ná a tide sama e du ogii anga a foluku fu Yehofa. Den e lei gi u taki wi e du omen „ogii”. Ma u sabi taki a fu di wi e „aliki Gadu moo libisama” meke den e du a sani ya (Toli 5:29). Son leisi den e soso wi, den e poti wi a sitaafu-osu efuso den e fon wi. Ma Yehofa e yeepi u fu holi useefi fu wi á du ogii anga den baka.

¹² Pakisei a toli fu den dii Hebrew boi, Hananiya, Misayel anga Asariya. *  A kownu fu Babilon be taigi den taki den mu boigi gi wan gaan gowtu pobiki. Anga ala lesipeki den taigi a kownu saide den ná o boigi gi a pobiki. Den aliki Yehofa winsi fa a kownu be taigi den taki a o boon den aini wan gaan faya. Yehofa yeepi den boi ya wanten, ma den á be sabi taki a so a be o yeepi den. Den be de kabakaba fu du sani enke fa Yehofa wani winsi san be o pasa (Dan. 3:1, 8-28). Den boi ya soi taki sama di abi safu-ati abi deki-ati tuutuu. Nawan kownu efuso taa sama poi tapu u fu dini Yehofa anga u hii ati. Boiti dati winsi sama e du ogii anga wi, winsi den e sitaafu wi, a ’Yehofa wawan wi o dini’.​—Ek. 20:4, 5.

¹³ Fa u sa waka a den dii Hebrew boi ya baka te tesi e miti u? A te wi e soi taki wi abi sakafasi anga te wi e fitoow taki Yehofa o yeepi u (Ps. 118:6, 7). Te sama e lei gi u wi ati á mu boon, ma u mu piki den a wan lesipeki fasi (1 Peit. 3:15). Boiti dati u ná o du nawan sani di sa poli wi anga Yehofa.

14-15. (a) San sa pasa te wi abi booko-ede? (b) Enke fa Yesaya 53:7, 10 e soi, da saide u sa taki Yesesi na a moo bun sama di soi taki a abi safu-ati winsi fa tesi be e miti en?

¹⁴ Fa u sa soi taki wi abi safu-ati te wi abi booko-ede: A omen sani sa gi u booko-ede. Kande wi e booko wi ede te u mu meke wan sani a sikoo efuso te u mu du wan wooko. Kande wi e booko wi ede tu te u mu go du wan ondoosuku a dataa. Te wi abi booko-ede a á makiliki fu abi safu-ati. Ala pikinpikin sani e fuka wi. A sani ya sa meke u du efuso taki sani di e hati taawan. Wi o luku fa a toli fu Yesesi sa yeepi u te wi abi booko-ede.

¹⁵ Den lasiti mun di Yesesi be de a goontapu, a be hebi gi en tuutuu. A be sabi taki den be o pina en te enke den kii en a wan ogii-ati fasi (Yoh. 3:14, 15; Gal. 3:13). Wantu mun fosi a dede a be taki ai booko en ede (Luk. 12:50). Boiti dati wantu dei fosi Yesesi dede a taki ’mi de aini banowtu’. Den sani di a taki di a be e begi e soi taki a be abi sakafasi. A be e aliki Yehofa tu. A taki: „Nda, gaantangi puu mi aini a nowtu ya baa. Ma mi abi fu pasa a tesi ya, bika a fu a sani ya ede mi kon. Nda, gi a nen fi i gaandi” (Yoh. 12:27, 28). Di a yuu doo, neen Yesesi soi deki-ati. A meke den feyanti fu Gadu kisi en tyai go kii. Te i luku a fasi fa den kii en, da ná pikin sen den gi en. Ná pikin pen a fii tu. Winsi fa sani be e moo Yesesi, toku a du san Gadu wani. A ná abi misi, Yesesi na a moo bun sama di soi taki a abi safu-ati winsi fa tesi be e miti en!​—Leisi Yesaya 53:7, 10.

16-17. (a) Fa den mati fu Yesesi be sa meke a lasi enseefi? (b) Fa u sa waka a Yesesi baka?

¹⁶ A lasiti neti di Yesesi be de a goontapu ya, den moo bun mati fi en be du sani di be sa meke a lasi enseefi. Pakisei fa Yesesi be e booko-ede en ede a neti de. A be o holidoo te enke a dede? Efu a á be holidoo nawan sama be o fende a okasi fu libi fu teego (Rom. 5:18, 19). Ma a moo gaan sani na a gi di a be o gi en Dda poli nen (Yopu 2:4). A lasiti leisi di a be e nyan makandaa anga den apostel fi en, den apostel be e „sitee” anga denseefi sama na a moo gaanwan. A neti de, Yesesi be wasikoi den fu aseefi sani de kaba. Ma toku Yesesi á lasi enseefi. A taki anga den a wan lesipeki fasi baka. A soi den kiin fa den mu tyai denseefi.  Baka dati a gafa den fu di den tan holibaka gi en.​—Luk. 22:24-28; Yoh. 13:1-5, 12-15.

¹⁷ San i be o du efu a sani ya miti i? U sa waka a Yesesi baka. Winsi tesi e miti u, wi á mu lasi useefi. U mu de kabakaba fu du san Yehofa wani. A taki „u mu abi boo anga taawan” (Kol. 3:13). Te wi e holi a pakisei taki useefi e du efuso e taki sani di e hati taawan, a o moo makiliki gi u fu du a sani ya (Odo 12:18; Yak. 3:2, 5). Meke moiti fu gafa taawan te den du wan bun sani.​—Efe. 4:29.

18. Fa Yehofa e yeepi den sama di abi sakafasi fu du sani anga koni? San den mu du efu den wani Yehofa yeepi den?

¹⁸ Efu wi abi safu-ati wi o du sani anga koni. Te wi á sabi san u mu du Yehofa o yeepi u fu du sani anga koni. Ma efu u wani a yeepi u, u mu abi safu-ati. A paamisi u taki a o „aliki den sama di ati safu te den e begi” (Ps. 10:17). Ma a ná aliki namo a o aliki te wi e begi en. Beibel taki: „A o yeepi den safu-ati sama fu du san a weiti fi en taki” (Ps. 25:9). Yehofa e koboloiki a Beibel, den buku * anga den taa sani fu a olikanisâsi fu yeepi u. Ai yeepi wi anga den leli di „a koni saafu di u sa fitoow” e gi wi a den komakandaa tu (Mat. 24:45-47). U mu abi sakafasi, da u meke Yehofa yeepi u. Wi o man du a sani ya te wi e sutudeli den sani di a olikanisâsi fu Yehofa e gi wi anga te wi e wooko anga den sani di u leli.

19-21. Sowtu fowtu Mosesi meke a Kades? San a toli ya e leli u?

¹⁹ Safu-ati o yeepi u fu wi á meke son fowtu. Pakisei a toli fu Mosesi baka. A omen yali langa Mosesi soi taki a abi safu-ati. A be e du sani di Yehofa lobi tu. Ma na a kaba fu den 40 yali aini a sabana, Mosesi á be soi sakafasi. Na a ten de a sisa fi en be kon dede, neen den beli en a Kades. A gei enke na a sisa fi en ya be yeepi en fu den á kii en di a be de beibi a Egepte. Boiti a sani di miti en ya, den Islayelisama bigin kuutu baka taki a nai tii den bun. A leisi ya den be e „kwali anga Mosesi” taki den ná abi wataa. Yehofa be  meke Mosesi du omen wonduu a fesi. Boiti dati a omen yali Mosesi du bun gi a foluku, toku den be e kuutu. Den á be e kuutu namo taki den ná abi wataa, ma den be e du enke a Mosesi be e meke wataa e kii den.​—Num. 20:1-5, 9-11.

²⁰ A sani ya be meke Mosesi ati boon te neen a lasi enseefi. A á be soi sakafasi moo. Pe fu Mosesi taki anga a siton enke fa Yehofa be taigi en, neen na bali a bali a foluku. Boiti dati a teke a gaandi di a be mu gi Yehofa. A naki a siton tu leisi neen wataa komoto aini dyullu. Heimembee anga ati boon meke a meke wan gaan fowtu (Ps. 106:32, 33). Fu di Mosesi á be soi sakafasi a leisi ya meke a be lasi a gaandi di a be abi fu go aini a kondee di Yehofa be paamisi den.​—Num. 20: 12.

²¹ A toli fu Mosesi ya e leli wi omen sani. A fosi sani: U mu meke moiti fu abi sakafasi ala yuu. Efu u lasi useefi wan leisi, heimembee o teke peesi. A sani ya sa meke u taki efuso du don sani. Du fu tu sani: Den booko-ede fu a libi sa meke a taanga gi u fu soi sakafasi, neen meke u mu meke moiti fu abi sakafasi winsi san e miti u.

22-23. (a) Saide u mu meke moiti fu abi safu-ati? (b) San a sani di sikiifi a Sefanya 2:3 wani taki?

²² Yehofa o kibii wi efu wi abi safu-ati. Dyonson Yehofa o puu ala den ogii sama a goontapu. A den sama di abi safu-ati wawan o fika, da freide o de a goontapu (Ps. 37:10, 11). Yu o de wan fu den sama ya? I sa de wan fu den sama ya, efi i du san Yehofa be meke polofeiti Sefanya taki.​—Leisi Sefanya 2:3.

²³ Saide Sefanya 2:3 taki: „Kande wi o tan a libi na a dei di Yehofa ati o boon”? A sani ya á wani taki Yehofa á poi kibii den sama di e meke moiti fu du san a taki. A á wani taki Yehofa á poi kibii den sama di a lobi. Ma a sani ya e soi taki efu u wani Yehofa kibii wi, useefi mu meke moiti. Wi abi a okasi fu pasa „a dei di Yehofa ati o boon” anga fu fende teego libi. Efu u meke moiti fu abi safu-ati da u du san Yehofa lobi, a o kibii wi.