1-2. a) Bibulu be mun lo fɔ Musa koo la? Musa ye mun lo kɛ do? b) Mun na an ka ɲi k’a ɲini ka kɛ ni majigilenya ye?

BIBULU b’a fɔ ko Musa “tun ye mɔgɔmajiginin ye ka tɛmɛ mɔgɔw bɛɛ kan dugukolo kan.” (Nɔnb. 12:3). Yala o kɔrɔ ko a tun fagonin lo, a tun be siran ka desizɔnw ta ani a tun be siran mɔgɔw ɲɛ wa? Mɔgɔ dɔw b’a miiri ko mɔgɔ majiginin b’o cogo lo la. Nka o tɛ tiɲɛn ye. Musa tun ye Ala sagokɛla jagwɛlɛ ye, barika tun b’a la ani siranbagatɔ tun tɛ. Jehova ka dɛmɛ sababu la, a sera ka Ala kitikow lase Ezipiti masacɛba ma. A ye mɔgɔ miliyɔn saba ɲɔgɔn ɲɛminɛ kongokolon kɔnɔ ani a ye Israɛldenw dɛmɛ ka see sɔrɔ u juguw kan.

² Musa ka gwɛlɛyaw ɲɔgɔn t’an kan. Nka loon o loon, mɔgɔ dɔw wala koo dɔw b’a to a man nɔgɔ k’an yɛrɛ majigi. O bɛɛ n’a ta, an ka ɲi k’a ɲini ka kɛ n’o jogo ye kuun jɔnjɔn dɔ kama. Jehova ye layidu ta ko: “Mɔgɔmajigininw bena jamana nin tigiya kɛ.” (Zab. 37:11). Ele fɛ, i ye mɔgɔ majiginin ye wa? Yala tɔɔw b’i jati mɔgɔ majiginin ye wa? Walisa ka se k’o ɲiningali jɔnjɔnw jaabi, an k’a ɲini k’a lɔn fɔlɔ majigilenya kɔrɔ ye min ye.

3-4. a) An be se ka majigilenya suma ni mun lo ye? b) An ka ɲi ka kɛ ni jogo jumanw lo ye walisa ka kɛ mɔgɔ majigininw ye ani mun na do?

³ An be se ka majigilenya * suma ni desɛn cɛɲumanin dɔ ye. Cogo di do? Desɛnkɛla be kulɛri cɛɲumanin caaman lo fara fara ɲɔgɔn kan walisa ka desɛn kɛ. O cogo kelen na, jogo caaman lo b’a to an be kɛ mɔgɔ majigininw ye.  O jogo jɔnjɔn dɔw ye nunu ye: jagwɛlɛya, sabali ani ka sɔn ka mɛnni kɛ. N’an b’a fɛ an koo ka diya Jehova ye, mun na an mako b’o jogow la?

⁴ Mɔgɔ majigininw dɔrɔn lo be sɔn ka mɛnni kɛ Ala fɛ. Ala b’a fɛ an ka kɛ mɔgɔ sabalininw wala mɔgɔ dususumaninw ye (Mat. 5:5; Gal. 5:22). N’an be mɛnni kɛ Ala fɛ, o be Sutana dusu gwan kosɔbɛ. O kama, hali n’an majiginin lo ani an sabalinin lo, Sutana ka duniɲamɔgɔw fanba b’an kɔniya (Zan 15:18, 19). O lo y’a to an mako be jagwɛlɛya la walisa ka Sutana kɛlɛ.

5-6. a) Mun na Sutana be mɔgɔ majigininw kɔniya? b) An bena ɲiningali jumanw lo lajɛ?

⁵ Mɔgɔ min majiginin tɛ, o tigi ye kuncɛba ye, a be dimi joona ani a tɛ mɛnni kɛ Jehova fɛ. Sutana be ten le jaatika! O lo kama a be mɔgɔ majigininw kɔniya. O mɔgɔw ka jogo ɲumanw fɛ, u b’a yira ko Sutana ka jugu kosɔbɛ. Min yɛrɛ be Sutana tɔɔrɔ, o ye k’o mɔgɔw b’a yira ko a ye ngalontigɛla ye. Mun na do? Sabu Sutana ka kuma n’a ka kɛta si tɛ se ka mɔgɔ majigininw bali ka Jehova sago kɛ!—Zɔbu 2:3-5.

⁶ Tuma juman lo a be se ka gwɛlɛya an ma k’an yɛrɛ majigi? Mun na an ka ɲi ka to k’a ɲini ka kɛ ni majigilenya ye? Walisa k’o ɲiningaliw jaabi, an ka mɔgɔ nunu ka ɲɛyirali lajɛ: Musa, Eburu kanbele saba minw tun be jɔnya la Babilɔni ani Yezu.

7-8. Musa ye mun lo kɛ tuma min na u ma bonya la a kan?

⁷ N’an be kuntigiya kɛra dɔw kun na: O ɲɔgɔn na, a man nɔgɔ dɔw fɛ k’u yɛrɛ majigi tuma bɛɛ. U be kuntigiya kɛra minw kun na, n’olu ma bonya la u kan wala n’u y’u sɔsɔ u ka desizɔn dɔ kosɔn, o wagati yɛrɛ lo la a ka gwɛlɛ u ma k’u yɛrɛ majigi. O ɲɔgɔn delila k’i sɔrɔ wa? N’i ka denbayamɔgɔ dɔ y’o ɲɔgɔn kɛ, i bena mun lo kɛ do? An k’a filɛ Musa ye min kɛ.

⁸ Jehova ye Musa sigi Israɛldenw kun na ani a y’a to a ye sariyaw sɛbɛ u ye. Siga t’a la, Jehova tun be ni Musa ye. O bɛɛ n’a ta, Musa kɔrɔmuso Miriyama ani a kɔrɔcɛ Arɔn y’a kɔrɔfɔ ani u y’a fɔ ko a tun man kan ka Sipora furu. Ni mɔgɔ  dɔw lo tun be Musa nɔɔ na, u tun be se ka dimi ani k’a ɲini k’u yɛrɛ mɔnɛ bɔ. Nka Musa m’o si kɛ. Jehova tun ye kuna bana bila Miriyama na. Musa yɛrɛ y’a deli a k’a kɛnɛya (Nɔnb. 12:1-13). Mun na Musa y’o kɛ do?

9-10. a) Jehova ye Musa dɛmɛ ka mun lo faamu? b) Sotigiw ni diinan mɔgɔkɔrɔw be kalan jumanw lo sɔrɔ Musa fɛ?

⁹ Musa y’a to Jehova y’a kolo. Tuma min na a tun be ni saan 40 ye ani a tun be Ezipiti masaso kɔnɔ, a tun majiginin tɛ. Loon dɔ, a dimina fɔɔ a ye cɛɛ dɔ faga sabu a tun b’a jati k’o cɛɛ ye tilenbaliyako kɛ. Musa y’a miiri ko Jehova tun bena sɔn o ma. Jehova ye Musa dɛmɛ saan 40 kɔnɔ a y’a faamu ko a mako tun tɛ jagwɛlɛya dɔrɔn na walisa ka Israɛldenw ɲɛminɛ. A mako tun be majigilenya fana na. Walisa k’a yɛrɛ majigi, a tun ka ɲi ka sɔn ka mɛnni kɛ Jehova fɛ ani ka kɛ mɔgɔ sabalinin ye. A sɔnna o kololi ma ani a kɛra ɲɛminɛbaga ɲuman ye.—Ɛkiz. 2:11, 12; Kɛw. 7:21-30, 36.

¹⁰ Sotigiw ni diinan mɔgɔkɔrɔw, aw ka Musa ladegi. Ni dɔ ye aw mafiɲɛya, aw kana dimi joona. Nka, aw k’aw yɛrɛ majigi ka sɔn aw ka filiw ma (Waaj. 7:9, 20). Jehova be cikan minw di an ma ka ɲɛsin gwɛlɛyaw ɲɛnabɔcogo ma, aw k’o sira tagama. Aw ka mɔgɔw jaabi ni dususuman ye tuma bɛɛ fana (Talenw 15:1). N’aw b’o kɛ, aw koo bena diya Jehova ye. Aw bena hɛɛrɛ sabati Jehova sagokɛlaw cɛ ani aw bena kɛ ɲɛyirali ɲuman ye tɔɔw fɛ majigilenya koo la.

11-13. Eburu kanbele saba ye ɲɛyirali juman lo to an ye?

¹¹ N’u b’an kɛlɛla: Sanga ni wagati bɛɛ, faamanw be Jehova sagokɛlaw kɛlɛ. U be se k’an jalaki ko an ye koo jugu caaman kɛ. Nka tiɲɛn na, kuun jɔnjɔn min kama u diminin b’an kɔrɔ, o ye ko an be mɛnni kɛ Jehova fɛ sanni ka mɛnni kɛ olu fɛ (Kɛw. 5:29). U be se k’an lɔgɔbɔ, k’an don kaso la wala k’an bugɔ yɛrɛ. Nka Jehova ka dɛmɛ sababu la, an t’an yɛrɛ mɔnɛ bɔ. An b’an dusu suma kɔrɔbɔli tuma na.

¹² An ka Eburu kanbele saba nunu ka koo lajɛ minw tun be jɔnya la Babilɔni: Ananiya, Mikayɛli ani Azariya. * Babilɔni masacɛ ye jaa belebeleba dɔ dilan ni sanu ye ani a ko u k’u kunbiri gwan k’o jaa bato. U y’u dusu suma k’a ɲɛfɔ fɛɛn min kama u tɛna o kɛ. U tora ka mɛnni kɛ Ala fɛ hali k’a sɔrɔ masacɛ tun y’a fɔ  ko a bena u fili dingɛ tasumaman kɔnɔ n’u banna ka mɛnni kɛ ale fɛ. Jehova y’a latigɛ k’o cɛɛw kisi yɔrɔnin kelen. Nka, u tun t’a jati ko waajibi lo a k’o kɛ. Jehova tun mana a to min o min ka kɛ, u tun labɛnnin lo ka sɔn o ma (Dan. 3:1, 8-28). U y’a yira o cogo la ko mɔgɔ majigininw jaa ka gwɛlɛ tiɲɛn na. Masacɛ wo, bagabagari wo, ɲangili wo, u si tɛ se k’an bali ka Jehova kelenpe bato.—Ɛkiz. 20:4, 5.

¹³ N’an ka kantigiya be kɔrɔbɔra, an be se k’o kanbele saba ladegi cogo di? An b’o kɛ n’an b’an yɛrɛ majigi ka la a la ko Jehova bena an dɛmɛ (Zab. 118:6, 7). Minw be baga an ma ko an ye kojugukɛlaw ye, an b’olu jaabi ni dususuman ni bonya ye (1 Piyɛri 3:15). Fɛɛn o fɛɛn be se k’an ka jɛnɲɔgɔnya nagasi n’an Faa kanutigi ye, an be ban k’o kɛ.

14-15. a) Mun lo be se ka kɛ n’an hakili ɲagaminin lo? b) Yezu ye koow kɛ ni majigilenya ye hali k’a sɔrɔ a hakili tun ɲagaminin lo. Ka kɛɲɛ ni Ezayi 53:7, 10 ye, mun na an be se k’a fɔ ko a ka ɲɛyirali ɲɔgɔn tɛ yen?

¹⁴ N’an hakili ɲagaminin lo: An kelen kelen bɛɛ hakili be se ka ɲagami koo dɔw kosɔn. N’an be tagara ɛkizamɛn dɔ la lakɔliso la wala n’an ka ɲi ka koo tigitigi dɔ kɛ baarakɛyɔrɔ la, an hakili be se ka ɲagami. O be se ka kɛ fana n’an ka ɲi ka ɛkizamɛn wala operasɔn dɔ kɛ dɔgɔtɔrɔso la. N’an do hakili ɲagaminin lo, a ka gwɛlɛ k’an yɛrɛ majigi. Koo minw tɛ deli ka foyi kɛ an na, o be se k’an kɔnɔ gwan. O be se k’a to an tɛ tɔɔw minɛ ni ɲumanya ye wala an be kuma juguw fɔ u ma. N’i hakili delila ka ɲagami, miiri Yezu ka ɲɛyirali la.

¹⁵ Yezu ye kalo laban minw kɛ dugukolo kan, a hakili tun ɲagaminin lo kosɔbɛ. A tun b’a lɔn ko u tun bena a tɔɔrɔ kosɔbɛ ani k’a faga (Zan 3:14, 15; Gal. 3:13). Kalo damanin ka kɔn a ka saya ɲɛ, Yezu y’a fɔ ko ale hakili “ɲagaminin” lo (Luka 12:50, Biblu Ala ta Kuma). Tile damanin ka kɔn a ka saya ɲɛ, a y’a fɔ fana ko: “Ne nii tɔɔrɔnin lo.” A ye kuma minw fɔ a ka delili la, o b’a yira ko a majiginin lo ani ko a be mɛnni kɛ Ala fɛ. A ko: “N Faa, k’a fɔ ko i ka ne kisi nin waati tɔɔrɔ ma wa? Nga ne nakun le y’o ye. N Faa, i k’i yɛrɛ tɔgɔ boɲa!” (Zan 12:27, 28). Yezu faga wagati sera tuma min na, a y’a yɛrɛ di Ala juguw ma. U y’a tɔɔrɔ kosɔbɛ, k’a lamaloya ani k’a faga. Yezu ye mɛnni kɛ Ala fɛ ni majigilenya ye hali k’a sɔrɔ a hakili tun ɲagaminin lo ani a tun be tɔɔrɔla kosɔbɛ. Tiɲɛn na, an be se k’a fɔ ko a ka ɲɛyirali ɲɔgɔn tɛ yen.—Ezayi 53:7, 10 kalan.

16-17. a) Yezu teriw ye mun lo kɛ min y’a ka majigilenya kɔrɔbɔ? b) An be se ka Yezu ladegi cogo di?

¹⁶ Yezu ka suu laban na dugukolo kan, a teri sɔbɛw ye koo dɔ kɛ min y’a ka majigilenya kɔrɔbɔ. Miiri k’a filɛ a hakili tun ɲagaminin lo cogo min na o loon sufɛ! N’a tun ma to kantigiya la, mɔgɔ si tun tɛna ɲɛnamaya banbali jigiya sɔrɔ (Ɔrɔm. 5:18, 19). Min yɛrɛ tun ka jugu, o ye ko a tun bena a Faa tɔgɔ tiɲɛ (Zɔbu 2:4). Yezu ka cidenw lo tun y’a teri sɔbɛw ye. Wagati min na a tun b’a ka dumuni laban kɛra n’u ye, u y’a daminɛ ka “ɲɔgɔn sɔsɔ kosɔbɛ, bari u tun b’a fɛ k’a lɔn ni mɔgɔ min ye ɲamɔgɔ ye u cɛma.” Yezu tun ye ladili di a teriw ma o koo la siɲɛ caaman, hali o loon wula fɛ yɛrɛ! O bɛɛ n’a ta, Yezu ma dimi u kɔrɔ. A y’u jaabi ni dususuman ye. U ka ɲi ka koow kɛ cogo min na, a y’o ɲɛfɔ u ye  tugun. A y’o kɛ ni ɲumanya ye. Nka, a y’a yira k’o tɛ tulonko ye. A y’u tando fana sabu u tora n’ale ye kantigiya la.—Luka 22:24-28; Zan 13:1-5, 12-15.

¹⁷ I tun bena mun lo kɛ n’o koo ɲɔgɔn tun y’i sɔrɔ? An be se ka Yezu ladegi ani ka kuma ni dususuman ye hali n’an hakili ɲagaminin lo. Jehova ko an “ka ɲɔgɔn dɛmɛdɛmɛ.” An k’an yɛrɛ majigi k’o cikan labato (Kɔlɔs. 3:13). An bena o kɛ n’an b’a to an hakili la ko an bɛɛ be koo dɔ kɛ wala ka kuma dɔ fɔ min be tɔɔw kɔnɔ gwan (Talenw 12:18; Zaki 3:2, 5). An k’an jija fana ka tɔɔw tando u ka jogo ɲumanw kosɔn.—Efɛz. 4:29.

18. Jehova be mɔgɔ majigininw dɛmɛ cogo di walisa u ka desizɔn ɲumanw ta? Nka u ka ɲi ka mun lo kɛ do?

¹⁸ N’an majiginin lo, an bena desizɔn ɲumanw ta. N’an t’a lɔn an bena min kɛ koo gwɛlɛ dɔw la, Jehova bena an dɛmɛ ka desizɔn ɲumanw ta. A bena o kɛ n’an majiginin lo le. A ye layidu ta ko a “bena mɔgɔ majiginin ka delili lamɛn.” (Zab. 10:17, NW). A tɛna dan o dɔrɔn ma. Bibulu b’a fɔ fana ko: “A be mɔgɔmajigininw ka tiɲɛ d’u ma, a b’a sago yira u la.” (Zab. 25:9). Jɔncɛ kantigiman hakiliman be gafew * ni videwo minw labɛn an ye, Jehova be tɛmɛ olu ni Bibulu ani lajɛnw lo fɛ k’an ɲɛminɛ (Mat. 24:45-47). Walisa ka nafa sɔrɔ u la, fɔɔ an k’an yɛrɛ majigi ka sɔn a ma ko an mako be Jehova ka dɛmɛ na. Jehova be fɛɛn minw labɛn an ye, an ka ɲi k’o sɛgɛsɛgɛ koɲuman ani k’a ka ladiliw sira tagama.

19-21. Musa ye fili juman lo kɛ Kadɛsi? An be kalan jumanw lo sɔrɔ o la?

¹⁹ N’an majiginin lo, an tɛna fili caaman kɛ. An ka miiri Musa koo la tugun. A majiginin tora saan caaman kɔnɔ ani a koo diyara Jehova ye. Israɛldenw ye saan 40 minw kɛ kongokolon kɔnɔ, o tun man nɔgɔ. O wagati laban fan fɛ, Musa m’a yɛrɛ majigi. A kɔrɔmuso tun sara a ma mɛɛn ani u tun y’a suu don Kadɛsi. A be komi ale lo tun ye Musa niin kisi Ezipiti. Ka fara o kan, Israɛldenw tun y’a daminɛ ka ŋunuŋunu tugun ko  Jehova t’a jantora olu la. Nin sen fɛ, “u y’a daminɛ ka Musa kɛlɛ” ko jii t’u fɛ. Jehova tun ye see di Musa ma a ye kabako caaman kɛ. Musa tun y’a janto Israɛldenw na ni kanuya ye ani a tun y’u ɲɛminɛ wagatijan kɔnɔ. O bɛɛ n’a ta, jama y’a daminɛ ka ŋunuŋunu. U ma ŋunuŋunu jintanya dɔrɔn kosɔn. Nka, u ŋunuŋununa Musa fana kosɔn. U tun b’a kɛra i n’a fɔ Musa lo ye minnɔgɔ bila u la.—Nɔnb. 20:1-5, 9-11.

²⁰ Musa dimina kosɔbɛ ani a ma kuma ni dususuman ye. Jehova tun y’a fɔ a ye ko a ka kuma farakurun fɛ. Nka sanni a k’o kɛ, a dimininba kumana jama fɛ ani a ko ale bena kabako dɔ kɛ. Musa ye farakurun gosi n’a ka bere ye siɲɛ fila ani jii caaman barila ka bɔ. Kuncɛbaya ni dimi y’a to a ye filiba kɛ (Zab. 106:32, 33). A m’a yɛrɛ majigi wagati dɔɔni dɔrɔn kɔnɔ. O kama, a ma don layidu jamana kɔnɔ.—Nɔnb. 20:12.

²¹ An be kalan nafaman jumanw lo sɔrɔ o koo la? A fɔlɔ, an ka ɲi k’an jija tuma bɛɛ walisa an majiginin ka to. N’o tɛ, an bena kɛ kuncɛbaw ye kokura. O be se k’a to an be kuma an kunfɛ ani ka hakilintanyakow kɛ. A filanan, n’an hakili ɲagaminin lo, a be se ka gwɛlɛya an ma k’an yɛrɛ majigi. O kama, an ka ɲi k’an jija ka kɛ ni majigilenya ye hali n’an hakili ɲagaminin lo.

22-23. a) Mun na an ka ɲi ka to k’an yɛrɛ majigi? b) Sofoni 2:3 kɔnɔko be mun lo yira?

²² N’an majiginin lo, Jehova bena an latanga. Yanni dɔɔni, Jehova bena mɔgɔjuguw bɛɛ halaki ka bɔ dugukolo kan. Mɔgɔ majigininw dɔrɔn lo bena kɛ yen hɛɛrɛ dafanin na (Zab. 37:10, 11). Yala i bena kɛ u cɛma wa? Jehova ka ladili min be sɔrɔ Sofoni 2:3 kɔnɔ, n’i b’o sira tagama, i bena kɛ o mɔgɔw cɛma.—Sofoni 2:3 kalan.

²³ Mun na Sofoni 2:3 b’a fɔ ko “n’a sɔrɔ a bena aw tanga”? Jehova be minw kanu ani u b’a fɛ k’u koo diya a ye, o kuma kɔrɔ tɛ ko a tɛ se k’olu kisi. Nka, o b’a yira ko an ka ɲi ka dɔ kɛ dɔ ye walisa ka kisi. An k’an jija kabini sisan k’an yɛrɛ majigi ani k’an koo diya Jehova ye. O la, an bena kisi a “ka dimilon na” ani ka ɲɛnamaya kɛ fɔɔ abada!