1-2. a) Ka Labib ka di asi Moyiz ? É ka i fè konsa ? b) Pou ki rézon fò-nou travay imilité an nou ?

LABIB ka di kè Moyiz « té ni lontan plis imilité ki toutmoun asi latè » (Nonb 12:3). Ès sa vlé di kè sété on féba, on moun ki té pè pran on désizyon oben on moun ki té pè lézòt antré an lagè èvè-y ? Pou désèrten moun, on moun ki ni imilité, sé konsa i yé. Men a pa sa ditou. Moyiz, sété on boug solid, on mòso-fè, i té sav sa i vlé, é i té ni kouraj. Èvè èd a Jéova, i pa té pè ay douvan chèf a Léjip, magré sété on boug puisan. I fè anviwon 3 000 000 moun travèsé on dézè é i édé nasyon a Izrayèl gangné sé lènmi-la i té ni la.

² Sé vré, nou pa ka jwenn menm pwoblèm ki Moyiz. Men, a pa touléjou sa fasil pou nou dè aji èvè imilité, pas défwa, nou ka touvé-nou douvan sèwten moun oben adan sèwten sitiyasyon ki ka rann sa konpliké. Magrésa, nou ni on bon rézon toubònman dè fè éfò pou nou travay kalité-lasa. Mi sa Jéova pwomèt : « Moun ki ni imilité, toutlatè sé ké ta yo » (Sòm 37:11). Ès ou pé di ou sé on moun ki ni imilité ? É lézòt aprézan, ès yo pé di sa dè-w ? Men avan nou réponn a sé kèsyon enpòwtan lasa, ni on biten nou bizwen sav : lè on moun ni imilité, ka sa vlé di ojis ?

3-4. a) Ki ègzanp ka pèwmèt-nou konprann ka ki imilité ? b) Ki twa bèl kalité nou bizwen pou ni imilité, é poukisa ?

³ Lè on moun ni imilité, i kon on bèl tablo. An ki sans nou ka di sa ? Menmjan on pent ka mayé plizyè bèl koulè  pou penn on tablo, menmjan-la osi fò-nou sèvi èvè plizyè bèl kalité pou nou ni imilité. An-nou palé dè twa kalité an pawtikilyé : obéyisans, dousè é kouraj. Poukwa nou bizwen sé twa bèl kalité-lasa pou nou fè Jéova plézi ? *

⁴ Sé yenki moun ki ni imilité ki dakò pou obéyi Bondyé. On biten Bondyé ka mandé osi, sé kè nou ni dousè (Mat. 5:5 ; Gal. 5:23). Difètkè nou ka fè volonté a Bondyé, Satan kòlè. Sé pousa, menmsi nou ni imilité é nou ni dousè, onlo moun, ki adan mond a Satan, hay-nou (Jan 15:18, 19). Kifè, nou bizwen kouraj pou nou pa lésé Satan pran lanmen asi nou.

5-6. a) Poukwa Satan hay moun ki ni imilité ? b) A ki kèsyon nou kay réponn ?

⁵ On moun ki ni òwgèy pa ni ayen a vwè èvè on moun ki ni imilité. On moun konsa, latè pa’a pòté-y, i ka fè mové kòlè é i pa ka kouté Jéova. Sé ègzaktèman konsa Satan yé ! Nou ka tou konprann poukwa i hay moun ki ni imilité ! Bèl kalité kè yo tini ka mèt tout vyé défo a Satan déwò. Men on biten ki pli rèd pou-y ankò, sé kè moun ki ni imilité ka pwouvé kè Satan sé on mantè. Poukwa nou ka di sa ? Magré tousa i pé fè oben magré tousa i pé di, i pé pa fè moun ki ni imilité arété sèvi Jéova ! (Jòb 2:3-5).

⁶ A ki moman nou pé touvé sa rèd dè ni imilité ? É poukwa fò-nou kontinyé kiltivé imilité ? Pou nou réponn a sé kèsyon-lasa, nou ké ègzaminé ègzanp a Moyiz, ègzanp a sé twa Ébré-la yo té menné pa fòs a Babilòn, é ègzanp a Jézi.

7-8. Kijan Moyiz réyaji lè sèwten moun dérèspèkté-y ?

⁷ Lè nou ni otorité si dòt moun : Lè on moun ni on sèwten otorité, délè sa pé rèd pou-y dè aji èvè imilité, siwtou lè yo ka dérèspèkté-y oben lè yo ka tèsté èvè-y. Ès sa ja rivé-w ? É si on moun adan fanmi a-w ka aji konsa èvè-w, kijan  ou ké réyaji ? An-nou gadé ka Moyiz fè adan on sitiyasyon kon tala.

⁸ Sé Moyiz Jéova té chwazi pou gidé Izrayèl. Anplisdisa, sé li i mandé maké sé lwa-la ki té kay sèvi pou dirijé pèp-la. Jéova té èvè Moyiz, pa té ni pon dout asi sa. Magrésa, pwòp sè a-y é pwòp frè a-y, Miryam é Aawon, koumansé malpalé-y. Yo té ka di kè i pa té dwèt mayé èvè madanm-la i té mayé èvè-y la. An plas a Moyiz, ni désèrten moun ki pa té’é pran sa, ki té’é fè kòlè é ki té’é chèché a vanjé-yo. Men Moyiz pa monté an présyon. I jous mèt jounou atè pou mandé Jéova on favè parapòt a pinisyon-la Miryam rèsèvwa la (Nonb 12:1-13). Poukwa Moyiz réyaji konsa ?

9-10. a) Ka Jéova édé Moyiz konprann ? b) Ka ègzanp a Moyiz pé aprann sé chèf a fanmi la é sé ansyen-la ?

⁹ Moyiz té lésé Jéova fè on travay anlè-y. Karant an avan, lè i té an Éjipt é kè i té ka fè pati a fanmi a wa-la, Moyiz pa té ni imilité. Tèlman i té ka monté an présyon vit, i jous tchouyé on boug. Dapré-y, boug-lasa té fè on moun sibi on enjistis. I konpranndèdi kè Jéova té’é dakò èvè sa i fè la. Alò, pannan karant an, Jéova chèché a fè-y konprann kè pou rivé menné pèp-la, a pa yenki kouraj i té bizwen ; fò i té ni imilité osi. É pou ni imilité, fò i té ni obéyisans é dousè. I aksèpté sa Jéova té vlé fè-y konprann é i vin on bon gid toubònman (Ègz. 2:11, 12 ; Akt 7:21-30, 36).

¹⁰ Jòdijou, lè sé chèf a fanmi la é sé ansyen-la ka imité Moyiz, sé on bon biten yo ka fè. Lè yo ka dérèspèkté-zòt, pa monté kon lèt si difé. Sonjé kè zòt osi zò ka fè érè (Ékl. 7:9, 20). Obéyi ! Jéova ka ba-zòt enstriksyon pou sav kijan pou réglé sé pwoblèm-la, suiv-yo. É toujou palé èvè dousè (Pwov. 15:1). Konsa, zò ké fè Jéova plézi, zò ké travay pou lapé, é zò ké bay on bon ègzanp a imilité.

11-13. Ki bèl ègzanp sé twa Ébré-la lésé ban nou ?

¹¹ Lè yo ka pèwsékité-nou : Dépi nanni-nannan, ni moun ki antèt a gouvènman ki ka pèwsékité sèwvitè a Jéova. Pétèt yo ka akizé-nou dè tout kalté biten, men an réyalité, si yo kòlè kont nou, sé pas nou ka « kouté Bondyé olyé nou kouté lézòm » (Akt 5:29). Sa pé rivé kè yo fè jé èvè tèt an nou, kè yo mèt-nou lajòl, oben kè yo fè-nou sibi bon abominasyon. Men, èvè èd a Jéova, nou ké rété dous, olyé nou vanjé-nou.

¹² An-nou palé dè Ananya, Michaèl é Azarya, twa Ébré yo té menné pa fòs a  Babilòn *. Ki ègzanp yo lésé ban nou ? Wa a Babilòn di-yo mèt jounou atè douvan on gran manman èstati an lò. Èvè onlo dousè, yo èspliké wa-la kè yo pé ké adoré èstati-la. Magré wa-la di-yo i kay jété-yo adan on fouw plen difé, yo kontinyé kouté Bondyé. Jéova chwazi dè sové-yo. Yomenm a yo pa té sèten kè Jéova té’é fè sa ba yo. Men kèlkèswa sa Jéova té ké pèwmèt, yo té paré a aksèpté-y (Dan. 3:1, 8-28). Ègzanp a yo montré kè on moun ki ni imilité, sé on moun ki ni kouraj. Pa ni pon wa, pa ni pon mennas, ni pon pinisyon ki pé anpéché-nou kontinyé sèvi Jéova (Ègz. 20:4, 5).

¹³ Lè yo ka mèt fidélité an nou a léprèv, kijan nou pé imité sé twa Ébré-la ? Èvè onlo imilité, fò-nou fè Jéova konfyans, kivédi fò-nou sèten kè i ké pran swen an nou (Sòm 118:6, 7). Lè moun ka chèché-nou tren, fò pa nou réponn nenpòt kijan, men fò-nou aji on mannyè ki dous é èvè rèspé (1 Pyè 3:15). É fò pa nou fè ayen ki pé fè-nou pèd lanmityé an nou èvè Jéova.

14-15. a) Lè nou istrésé, ka ki pé rivé ? b) Menm lè nou anba présyon, fò-nou ni imilité. Sèlon Izayi 53:7, 10, poukwa nou pé di kè Jézi sé méyè ègzanp ki ni an domenn-lasa ?

¹⁴ Lè nou istrésé : Nenpòt kilès adan nou pé santi-y istrésé. Ni sa sé ké avan yo pasé on lègzamen lékòl, ni sa sé parapòt a on biten yo mandé-yo fè an travay a yo. Sé pé osi pas yo kay sibi on opérasyon oben pas yo kay lopital pou fè ègzamen. Lè nou istrésé, sa rèd dè ni imilité. Ni dé tibiten, dabitid sa pa’a fè-w ayen, men i sifi kè ou istrésé é sa ka enki fè-w fè kòlè ! Ou pé mété-w ka palé nenpòt ki jan, é ou pé mété-w ka di nenpòt ki biten. Si sa ja rivé-w, gadé ki ègzanp Jézi lésé ban nou.

¹⁵ Pannan lé dènyé mwa i pasé asi latè, Jézi té istrésé toubònman. I té sav kè yo té kay tchouyé-y é kè yo té kay fè-y sibi bon abominasyon menm (Jan 3:14, 15 ; Gal. 3:13). Détwa mwa avan i mò, i di disip a-y kè i té angwasé toubònman (Lik 12:50). É kèktan avan i mò, Jézi di : « An boulvèsé. » I wouvè tchè a-y ba Papa-y é sa i di la ka montré kè i té ni imilité é kè i té obéyisan. I di : « Papa, woté-mwen anba éprèv-lasa. É poutan si an vin si tè sé pou sibi sé éprèv-lasa. Papa, ba non a-w glwa » (Jan 12:27, 28). Lè lè-la rivé, Jézi pran kouraj a-y a dé men é i lésé lènmi a-y pati èvè-y. Yo fè-y soufè onlo é yo fè-y wont toubònman. Magré i té istrésé é i té ka soufè, Jézi fè volonté a Bondyé èvè onlo imilité. Menm lè i té anba présyon, Jézi kontinyé aji èvè imilité. Asiré pa pétèt, adan domenn-lasa, méyè ègzanp ki ni, sé Jézi ! (li Izayi 53:7, 10).

16-17. a) Kijan zanmi a Jézi mété imilité a-y a léprèv ? b) Kijan nou pé imité Jézi ?

¹⁶ Dènyé lannuit-la Jézi pasé asi latè la, pi bon zanmi a-y mété imilité a-y a léprèv. A moman-lasa Jézi dwèt té ni bon présyon asi-y. Sèten i mandé-y si i ké rivé rété fidèl a san a pou san jiskatan i mò. Si i pa té rété fidèl, ponmoun pa té’é pé ni lavi étèwnèl (Wom. 5:18, 19). Men ni on biten ki té pli enpòwtan ankò, sé kè fidélité a-y té ké ni on éfé asi non a Papa-y (Jòb 2:4). Men, dènyé fwa i manjé èvè zanmi a-y, sé apòt-la mété-yo ka « babyé, gwo babyé menm, pou sav kilès adan yo ki té pli gran ». Jézi té ja fè-yo konprann plizyè fwa kè a pa sa ki ka konté. Dayè, jouswa-lasa i té ja ni lokazyon  di-yo sa ! Magrésa, i pa fè kòlè, men i réyaji èvè onlo dousè. Ondòt fwa ankò, i èspliké-yo franchman men jantiman ki atitid pou yo té ni. É i félisité-yo pas yo té ka soutyenn-li fidèlman (Lik 22:24-28 ; Jan 13:1-5, 12-15).

¹⁷ Kijan ou té’é réyaji adan on sitiyasyon konsa ? Nou pé imité Jézi é rété dous, menm lè nou anba présyon. Pousa, an-nou obéyi èvè tout tchè an nou lè Jéova ka di-nou kè « fò yonn kontinyé sipòté lòt » (Kol. 3:13). Nou ké obéyi si nou ka sonjé kè noutout ka di oben kè noutout ka fè dé biten ki ka énèwvé lézòt (Pwov. 12:18 ; Jak 3:2, 5). Anplisdisa, fò-nou félisité lézòt pou bèl kalité a yo (Éféz. 4:29).

18. Kijan Jéova ka édé moun ki ni imilité pran bon désizyon, men ka yo dwètèt fè ?

¹⁸ Sa ké édé-nou pran pli bon désizyon. Lè nou ni dimal a fè on chwa, Jéova pé édé-nou a pran bon désizyon, men sé sèlman si nou ni imilité kè i ké fè sa. I pwomèt kè i ké kouté « priyè a moun ki ni imilité » (Sòm 10:17). É a pa kouté tousèl i ka kouté. Labib ka di : « I ké fè moun ki ni imilité maché adan sa ki dwèt é i ké montré-yo ki chimen pou yo pran » (Sòm 25:9). Jéova ka gidé-nou * èvè Bib-la, é èvè piblikasyon é vidéo kè « lèsklav fidèl é prévwayan » ka pwodui (Mat. 24:45-47). Pou nou bénéfisyé anplen dè tousa Jéova ka ban-nou, fò-nou rèkonnèt kè nou bizwen èd a-y. Fò-nou étidyé tousa i ka ban-nou, é apliké sa nou ka aprann èvè tout tchè an nou.

19-21. Ki érè Moyiz fè lè i té Kadèch, é ka sa ka aprann-nou ?

¹⁹ Sa ké évité-nou fè érè. Sonjé Moyiz. Pannan plizyè dizenn dè lanné, i pa jen pèd imilité a-y é i kontinyé fè Jéova plézi. Aprésa, alòskè sé Izraélit-la té ja pasé prèskè karant lanné byen rèd adan dézè-la, pannan on moman, Moyiz pèd imilité a-y. Yo té a Kadèch, é Moyiz té sòti téré sè a-y. Sé sè a-y ki fè si i pa mò an Éjipt. É konnyéla la, sé Izraélit-la ka plenn-yo ondòt fwa ankò pas yo pa dakò èvè jan-la Moyiz ka dirijé-yo la. Kou-lasa, yo « tonbé an zo a Moyiz » pas  té ka manké dlo. Jéova sèvi èvè Moyiz pou fè onpakèt mirak ba pèp-la. Moyiz limenm gidé-yo pannan konmen lanné san mandé ayen an rètou. Men magrésa, sé Izraélit-la plenn-yo kanmenm. Yo pa plenn-yo yenki pas pa té ni dlo, men sété osi parapòt a Moyiz, konsi sé-y ki fè si yo té swèf (Nonb 20:1-5, 9-11).

²⁰ Tèlman Moyiz lévé cho, i pa sonjé zafè a dousè. Jéova té mandé-y palé ba wòch-la. Si i té fè sa, toutmoun té’é vwè kè i ka fè Jéova konfyans. Men olyé i té fè sa, i tonbé an zo a pèp-la. É i fè-yo konprann kè sé li ki té kay fè on mirak. Aprésa, i konnyé asi wòch-la dé fwa èvè baton a-y é onpakèt dlo koumansé tijé. Moyiz té ni òwgèy é i fè kòlè, sé sa ki pousé-y fè on gwo érè (Sòm 106:32, 33). Moyiz pèd dousè a-y on ti moman, é sa kouté-y chè. Jéova pa lésé-y rantré adan Péyi-la i té pwomèt-yo la (Nonb 20:12).

²¹ Ègzanp-lasa ka aprann-nou onlo biten enpòwtan. On prèmyé biten sé kè, toutlè, fò-nou lité pou nou pa pèd imilité an nou. Si nou pa fè sa, adan on ti moman, lòwgèy pé woupran lanmen asi nou é i pé fè-nou di é fè dé biten san réfléchi. On dòt biten, sé kè lè nou istrésé, nou pli fasil a fè kòlè. Kifè, fò-nou fè onlo éfò pou nou pa pèd imilité an nou lè yo ka mèt présyon asi nou.

22-23. a) Poukisa fò-nou kontinyé fè éfò pou ni imilité ? b) Ka nou ka aprann dè sa Sofoni 2:3 ka déklaré ?

²² Sa ké pwotéjé-nou. Talè, Jéova ké woté tout méchan ki asi latè, é sé yenki moun ki ni imilité ki ké rété asi-y. Toutmoun ké viv trankil (Sòm 37:10, 11). Sé moun ki ni imilité ki ké la, ès ou ké pawmi yo ? Sé on biten ki posib si ou ka fè sa Jéova ka ankourajé-w fè adan liv a Sofoni (li Sofoni 2:3).

²³ Poukwa Sofoni 2:3 ka di kè « pétèt » nou ké kaché ? Ès sa vlé di kè Jéova pa kapab pwotéjé sa ki vlé fè-y plézi é sa ki enmé-y ? Non, sa vlé di kè nou ni on biten a fè si nou vlé i pwotéjé-nou. Si, dépi aprézan, nou ka fè éfò pou nou ni imilité, sa ké fè Jéova plézi. É « lè jou a kòlè a-y ké vin », i ké sové-nou é nou ké pé viv pou touttan !