1-2. (a) Kunnasi nadeskriba si Moises, anna anni i kingnguana? (b) Anni i rasottam tapenu kultiban i kinapakalinno?

DINESKRIBA na Biblia si Moises nga “kuruga mapakalinno anne ta ngamin nga totolay ta utun na davvun.” (Num. 12:3, ftn.) Kayà kari kagian naw nga makafi yayya, ari makapaddesision, anna maganassing nga itaddaggan i posisionna nu egga mangontra sa? Kunnatun i kagian na karuan nu ideskribada i tolay nga mapakalinno. Ngem ari tu kurug yatun. Si Moises ay masikan, desididu, anna magutu nga aripan na Dios. Ta uffun ni Jehova, inarubanna i makapangngua nga mammaguray ta Ehipto, nirolluanna ta tana-tana i ma-3,000,000 nga totolay, anna inuffunanna i nasion na Israel tapenu affutan i kalabadda ira.

² Kattam meparubang ta problema ira nga nappasan ni Moises, ngem kada aggaw mawag nga arubangattam i totolay onu situasion ira nga mamarriga nittam nga mappakalinno. Ngem, dakal i rasottam tapenu kultiban yaw nga kualidad. Nipromesa ni Jehova nga “i minappakalinno ay irensiad-da i davvun.” (Sal. 37:11) Makagim kari nga mapakalinno ka? Kunnatun kari gapa i paningan na karuan nikaw? Tapenu matabbag tam danatun nga importante nga pakkiavu, ammuattam labbi i kayà kagian na pappakalinno.

3-4. (a) Sitaw meyarig i kinapakalinno? (b) Anni ira nga kualidad i mawag tam tapenu mappakalinno, anna ngatta?

³ Kagitta na makakkasta nga painting i kinapakalinno. Kunnasi? Gitta na gumappinta nga pakkirivuanna i makkarasta nga kulor tapenu mamadday tu painting, mawag tam gapa pakkirivuan i makkarasta nga kualidad tapenu mappakalinno. I karuan taw nga kualidad ay pakimoray, kinalumamo, anna  sikan na nono. Ngatta mawag tam danatun nga partikular nga kualidad tapenu mapagayayya si Jehova? *

⁴ Danuri mapakalinno laman i makimoray ta uray na Dios. Parte na uray na Dios i pabbalittam tu malumamo. (Mat. 5:5, NW; Gal. 5:23, NW ) Nu kuattam i uray na Dios, pallussawattam si Satanas. Maski paga minappakalinno anna masippo ittam, aru nga totolay nga parte na mundo ni Satanas i mangikalussaw nittam. (Juan 15:18, 19) Megafu tatun, mawag tam i sikan na nono tapenu labanan si Satanas.

5-6. (a) Ngatta ikalussaw ni Satanas danuri mapakalinno? (b) Anni ira nga pakkiavu i tabbagattam?

⁵ I katulia na mapakalinno nga tolay ay i tadday nga minappakatannang, arianna kontroladu i porena, anna ari tumuttul kani Jehova. Yatun i perfekto nga deskripsion ni Satanas. Yari tu ikala-kalussaw ni Satanas i mapakalinno nga totolay! Mas gare nga mapalawadda nu kunnasi karake i personalidadna. Ari laman tu yatun, pakurugadda paga nga laddug yayya. Ngatta? Megafu ta maski anni i kagian onu kuanna, arianna mapagimmang danuri mapakalinno nga totolay nga masserbi kani Jehova!​—Job 2:3-5.

⁶ Anni ira nga situasion nga marigatattam nga mappakalinno? Ngatta kanayuttam nakuan nga mappakalinno? Tapenu tabbagan danatun nga pakkiavu, repasuattam i ehemplo da Moises, na tallu nga Hebreo nga aripan ta Babilonia, anna ni Jesus.

7-8. Anni i kingngua ni Moises turi ta ari yayya nirespeto na tanakuan?

⁷ Nu meddan tu autoridad: Mariga turi ta egga ta autoridad nga mattalupaddian nga mapakalinno, mas ngana nu ari ira irespeto na sakupda onu kuestionadda i desisiodda ira. Nesimmu kari ngana yatun nikaw? Kunnasi nu kunnatun i nipasingan na miembro na familiam? Anni i kuammu? Innattam nu anni i kingngua ni Moises.

⁸ Sinunno ni Jehova si Moises nga lider na Israel anna niddanna yayya tu pribilehio nga  itura i dorob para ta Israel. Manawag nga sussuportan ni Jehova si Moises. Maski kunna, krinitika yayya na mismu nga wawwaragina nga da Miriam anni Aaron anna kinuestiodda i pinilina nga atawa. Nu tanakuan laman nga tolay i egga ta posision ni Moises, posible nga napporay onu nangibalo ira​—ngem ari yayya tu kunna. Ari yayya insigida nga nassinti. Nakimemallo paga yayya kani Jehova nga uruanna i palleproso ni Miriam. (Num. 12:1-13) Ngatta kunnatun i reaksion ni Moises?

9-10. (a) Anni i nipalippawa ni Jehova kani Moises? (b) Anni i magigiammu na ulu na familia anna elder ira kani Moises?

⁹ Nappasanay si Moises kani Jehova. Ma-40 dagun nige natun, turi miembro paga yayya na familia na patul ta Ehipto, ari nga mapakalinno si Moises. Kakuruganna, mittan nappatu i uluna yayya nga insigida nga pinatena i tadday nga Ehipsio nga ari patas i kukukuanna. Ninonona nga magga umanugu si Jehova ta kingnguana. Kuarenta dagun i inusa ni Jehova tapenu ipalippawa kani Moises nga ari laman tu gutu i kawagan tapenu irollu i Israelita ira; mawagna i mappakalinno. Tapenu mabbalin tu mapakalinno, mawag nga minakkimoray anna malumamo yayya. Nakagigiammu yayya tu mapia anna nabbalin tu pinakamalalaki nga mangirollu.​—Ex. 2:11, 12; King. 7:21-30, 36.

¹⁰ Ta maddaggun, mawag nga parigan na ulu na familia anna na elder ira si Moises. Nu egga i ari mangirespeto nikaw, ari insigida matakitan. Sigga-pakalinno nga aminan i nakkamaliammu ira. (Ecl. 7:9, 20) Sigga-paran nga tuttulan i direksion ni Jehova ta passolba ta problema ira. Kanayun nakuan nga malumamo nga tubbag. (Prov. 15:1) Danuri ulu na familia anna manangngal nga kunnatun i kuadda ay mapagayayyada si Jehova, makoffun ta imammo, anna makepasingan tu ehemplo nu kunnasi mappakalinno.

11-13. Anni nga ehemplo i nipasingan nittam na tallu nga Hebreo?

¹¹ Nu mapeppersigi: Ta interu historia, pineppersigi na gobiernu na totolay i ili ni Jehova. Awayyada ittam akusan tu madduruma nga “krimen,” ngem i kurug nga isyu ay i pappili tam nga ‘kurugan [onu, tuppalan] i Dios anne ta tolay.’ (King. 5:29) Puede ittam mauyu-uyaw, mefuku, onu maabuso paga ta pisikal. Ngem, ta uffun ni Jehova, ariattam mangibalo, nu ari, mattalupaddian ittam nga kalmadu.

¹² Ikonsidera i ehemplo nga nipasingan nittam na tallu nga Hebreo nga naaripan ta Babilonia​—da Hananias, Misael, anni Azarias. *  Nimandu nira na patul na Babilonia nga makkummag ta dakal nga imahe nga vulawan. Malumamo nga niyesplikada ta patul nu ngatta ariadda maddayaw ta imahe. Nakimoray lagapa ira ta Dios maski paga inananassing ira na patul nga metabbo ta umafa-afi nga ornu. Insigida nga nipaliag ira ni Jehova, ngem ariadda nga ninono nga magga ipaliagna ira. Lallagu, sigga-paran ira nga akseptan maski nu anni i ipamavulun ni Jehova nga mesimmu. (Dan. 3:1, 8-28) Napakurugda nga magutu danuri mapakalinno​—awan tu patul, awan tu pangananassing, ni tu pangastigo i makadaral ta determinasiottam nga iyawa kani Jehova i “interu-futu nga debosion.”​—Ex. 20:4, 5.

¹³ Nu mapurueban i kinamatalo tam ta Dios, kunnasi tam maparigan i tallu nga Hebreo? Mappakalinno anna mattalo ittam nga tangngallan ittam ni Jehova. (Sal. 118:6, 7) Tabbagattam danuri mangakusa nittam ta malumamo anna marespeto. (1 Ped. 3:15, 16) Manaki tam gapa nga ikompromiso i pakikofuttam ta nelangitan nga Yama tam.

14-15. (a) Anni i mesimmu nu ma-stress ittam? (b) Segun ta Isaias 53:7, 10, ngatta makagi tam nga si Jesus i kapianan nga ehemplo na pappakalinno maski nu mavuru-vurung?

¹⁴ Nu ma-stress: Ma-stress ittam ngamin gafu ta nagganna-gannug nga rason. Awayyana nga matageno tam yatun nige na exam ta eskuela onu nige kuan i tadday nga trabahu. Onu ma-stress ittam maski ta pannono laman meyannung ta medikal nga operasion onu eksaminasion nga kawagattam. Nu ma-stress ittam, mariga i mappakalinno. Mairita ittam ngana maski ta gannug ira nga dati nga ariattam probleman. Onu makapataki ngana i uvovug tam anna ari tu masippo i pattratu tam ta tanakuan. Kada ma-stress ka, ikonsidera i ehemplo ni Jesus.

¹⁵ Ta ultimu ira nga vulan ni Jesus ta davvun, grabe i vuru-vurunna. Ammuna nga mapatay yayya anna maziga-riga. (Juan 3:14, 15; Gal. 3:13) Piga vulan nige na patena, kinagina nga ari yayya makemammo. (Luc. 12:50) Piga aggaw nige na patay ni Jesus, kunna: “Mavvuru-vurung sangawe i nono ku.” Masingattam i kinapakalinno anna i pakimorena ta Dios turi ta nivuvvuna i mataga-tagenona ta pakimallo: “‘Ama, ililli mà taw nga oras,’ . . . Ngem yaw i inangayak-ku taw tapenu addetak-ku yaw nga oras. Ama, ipasingam-mu ngana i dayaw na ngagam-mu!” (Juan 12:27, 28) Turi zimittal i oras, magutu nga nituluna i baggina ta kalaban na Dios, nga namatay sa ta pinakamataki anna kappasirang nga metodo. Maski turi ta kuruga mavuru-vurung anna marigi-rigatan si Jesus, sigga-pakalinno lagapa nga kingnguana i uray na Dios. Sigga-komfiansa nga makagi tam nga si Jesus i kapianan nga ehemplo na pappakalinno maski ta grabe nga vuru-vurung!​—Bibbigan i Kingngua 8:32.

16-17. (a) Kunnasi pinurueban na kokkofun ni Jesus i kinapakalinnona? (b) Kunnasi tam maparigan si Jesus?

¹⁶ Ta ultimu nga gabi ni Jesus ta davvun, pinurueban na madukko nga kokkofunna i kinapakalinnona. Daddamman ngana laman nga ari makemammo i nono ni Jesus tatun nga gabi. Mattalupaddian kari yayya nga matalo adde ta patena? Nu ari yayya nga mattalupaddian nga matalo, awan tu tiansa na maski sinni nga mapeggan tu inango. (Roma 5:18, 19) Mas importante paga, puede nga madaral i reputasion na Yamana. (Job 2:4) Tapus, turi ta ultimu nga pamugagna kavulu i madukko nga kokkofunna, i apostolesna, “naddidiskusionan na disipulo ira nu sinni nira i katannangan tu paddian.” Namippiga nga sinunung ni Jesus i kokkofunna tatun nga gannug, kasali ngana yatun nga nesimmu tatun nga gabi! Ngem, ari nga nairita si Jesus. Lallagu, nattalupaddian yayya nga  kalmadu. Malumamo ngem serioso nga niyesplikana mangana i ugali nakuan nga egga nira. Kabalinna, kinomendanna i kokkofunna ta matalo nga passuportada nisa.​—Luc. 22:24-28; Juan 13:1-5, 12-15.

¹⁷ Anni i kuammu nu mesimmu nikaw i kunnatun? Puede tam parigan si Jesus anna mattalupaddian nga kalmadu maski nu ma-stress ittam. Sigga-paran nga tuttulan i bilin ni Jehova nga “makkapasa-pasensia.” (Col. 3:13) Matuppal tam yaw nga bilin nu daddammattam nga makekagi anna makakua ittam ngamin tu makapataki ta tanakuan. (Prov. 12:18; Sant. 3:2, 5) Kanayun nga komendan i tanakuan ta makasta ira nga ugalida.​—Efe. 4:29.

18. Kunnasi uffunan ni Jehova danuri mapakalinno tapenu makapaddesision tu mapia, ngem anni nakuan i kuadda?

¹⁸ Makapaddesision ittam tu mas mapia. Nu meparubang ittam ta mariga ira nga desision ta pattolay, uffunan ittam ni Jehova tapenu makapaddesision tu mapia​—laman nu mapakalinno ittam. Nipromesana nga ginnanna i “pakimemallo na totolay nga minappakalinno.” (Sal. 10:17) Iyawana paga i mas anne ta kiddawattam. Nipromesa na Biblia: “Irolluan na ta matunung nga dalan i minappakalinno ira, ay ituddu na nira i uray na.” (Sal. 25:9) Irolluan onu igiya ittam ni Jehova gukaban na Biblia anna na publikasion ira * anna programa nga pinadday na “mekatalo anna nannono nga doroban.” (Mat. 24:45-47) Sigga-pakalinno tam nakuan nga rekunnisian nga mawag tam i uffun ni Jehova, gukaban na paggigiammu ta material ira nga iyawana, anna interu-futu nga pangiyaplika tatun.

19-21. Anni i kingngua ni Moises ta Kades, anna anni ira nga leksion i mala tam tatun?

¹⁹ Melilli ittam ta pangngua tu liwa. Daddamman uli si Moises. Piga dekada yayya nga nattalupaddian nga mapakalinno yatutta napagayayyana si Jehova. Tapus, ta ultimu na 40 dagun nga mariga nga pabbiahe ta tana-tana, ari nakepasingan tu kinapakalinno si Moises. Kapapatay laman anna netanam ta Kades i manangna nga si Miriam nga posible nga nanguffun sa tapenu mapaliag ta Ehipto. Tapus marreklamo mangana i Israelita ira nga mapaga-pagurayan ira. Taw nga tiempo, ‘kiddamadda si Moises’ megafu ta kawan na danum. Maski ta ngamin nga milagro  nga nipasingan ni Jehova gukaban ni Moises anna maski ta nabayag nga pinassakrifisiona nga mangirollu ta Israelita ira, narreklamo lagapa ira. Ari laman tu danum i nireklamoda, pati si Moises, nga gittana yayya i makalliwa ta kapangalda.​—Num. 20:1-5, 9-11.

²⁰ Ta patu na ulu ni Moises, napporay yayya anna ari nattalupaddian nga mapakalinno. Imbes nga sigga-pangurugna nga kiyuvovugan i batu, gitta na nidog ni Jehova, napporay yayya ta totolay anna kunna nga mammilagro yayya. Namidduana nga pinalu i batu, ay tu navvanomvor i danum. Nakaliwa yayya tu madammo megafu ta nappakatannang anna napporay yayya. (Sal. 106:32, 33) Megafu ta ari nattalupaddian nga mapakalinno si Moises, ari yayya nepamavulun nga tullung ta Nepromesa nga Davvun.—Num. 20:12.

²¹ Taw nga nesimmu, aru i mala tam tu importante nga leksion. Ollu, mawag tu kanayuttam itrabahu i pamattalupaddian ta mapakalinno nga ugali tam. Nu magimmang ittam ta pabbalin tu mapakalinno, awayyana nga mappakatannang ittam anna magguyu tu ari napannonopan. Mekadua, mariga i mattalupaddian nga mapakalinno nu ma-stress ittam, yari tu mawag tam pappursigian yatun, maski nu marigi-rigatan ittam.

22-23. (a) Ngatta kanayun ittam nakuan nga mappakalinno? (b) Anni i kayà kagian na mabibbig ta Zefanias 2:3?

²² Maprotektan ittam. Aranni ngana nga alsan ni Jehova i ngamin nga marake nga tolay ta davvun, anna danuri mapakalinno laman i mabattang. Kurug noka tu memammo i davvun. (Sal. 37:10, 11) Tadday ka kari tatun ta mapakalinno ira? Puede, nu kuammu i ipagaram ni Jehova nga kuammu ta Zefanias 2:3 (bibbigan.)

²³ Ngatta kagian na Zefanias 2:3: “Aber laman nu mepaliag kamu”? Ari kayà kagian natun nga awan tu pakawayya ni Jehova nga protektan danuri maya nga mapagayayya yayya anna danuri iddukanna. Lallagu, kayà kagian natun nga mawag nga egga i kuattam tapenu maprotektan ittam. Egga i tiansa tam nga mapaliag ta “aggaw na poray ni Jehova” anna mattolay tu mannanayun nu mappursigi ittam nga mappakalinno tapenu mapagayayya si Jehova.