1-2. (a) Mawshe hpe gara hku nna hkrang shapraw da ai kun? Shi hpa ni galaw wa ai kun? (b) Sumnung ai myit rawt jat hkra gara lam gaw shadut ya lu ai kun?

CHYUM Laika hta Mawshe hpe “ga ningtsa ting na masha nlang hta myit grau sumnung ai wa rai nga ai” ngu nna tsun da ai. (Bhk 12:3) Dai majaw Mawshe gaw, gawng kya ai, dawdan lam n jahkrat gwi ai, ninghkap ai lam ni hpe hkrit ai ngu tsun mayu ai kun? Masha nkau gaw myit sumnung ai ni hpe dai zawn sha mu mada ma ai. Raitim, gaja nga yang dai hku n re. Mawshe gaw nden marai rawng ai Karai a mayam langai re. Dawdan lam jahkrat gwi nna n-gun atsam mung nga ai. Yehowa a karum shingtau ya ai lam hte Mawshe gaw Egutu uphkang madu hte myi man chyaw hkrum wa ai. Masha wan 3 daram hpe woi awn wa nna, hpyen ni hpe awng dang lu hkra Israela ni hpe karum ya wa ai.

² Mawshe hkrum wa ai mayak mahkak ni hte anhte hkrum na gaw n raitim, sumnung ai myit madun na matu yak chye ai masha ni, masa lam ni hte shani shagu hkrum na re. Raitim, sumnung ai myit matut nna rawt jat nga hkra shadut ya lu ai lam anhte hta nga ai. “Myit sumnung ai ni gaw mungkan ga hpe madu lu na” ngu nna Yehowa ga sadi jaw da ai. (Shk 37:11, NW) Myit sumnung ai ngu tinang hkum tinang tsun lu ai kun? Myit sumnung ai ngu nna kaga ni nang hpe mu mada ai kun? Ahkyak ai dai ga san ni a mahtai hpe n htai shi yang, myit sumnung ai ngu ai lachyum hpe chye na da ra ai.

3-4. (a) Myit sumnung ai gaw hpa hte bung ai kun? (b) Myit sumnung na matu gara atsam ningja mali ra ai kun? Hpa majaw kun?

³ Myit sumnung * ai gaw, grai tsawm ai sumla hte bung ai.  Gara hku nna kun? Sumla soi sara gaw, sumla langai soi na matu, nsam hkum ai tsi amyu myu hpe akyu jashawn ai zawn, myit sumnung na matu mung tsawm htap ai atsam ningja amyu myu hpe akyu jashawn ra ai. Dai atsam ningja nkau gaw, shagrit shanem ai myit, npu taw ai myit, myit nem ai hte nden marai rawng ai myit ni re. Yehowa a myit shapyaw ya na matu dai atsam ningja ni hpa majaw nga ra ai kun?

⁴ Shagrit shanem ai myit nga ai wa sha Yehowa a myit ra ai hpe hkan shatup lu ai. Karai a myit ra ai lam langai gaw, anhte myit nem ai lam nga na matu re. (Mat 5:5; Gal 5:23) Yehowa a myit ra ai hpe anhte galaw na nga yang, Satan hpe masin shapawt ya nga ai re. Anhte gaw shagrit shanem nna myit nem ai lam madun ai shaloi, Satan a mungkan na masha law malawng gaw anhte hpe nju ndawng ma ai. (Yhn 15:18, 19) Dai majaw, Satan hpe ninghkap lu na matu nden marai nga ra ai.

5-6. (a) Myit sumnung ai ni hpe Satan hpa majaw nju ai kun? (b) Gara ga san ni a mahtai hpe hkaja mat wa na kun?

⁵ Sumnung ai myit n nga ai wa gaw, myit tsaw myit dap nna pawt sindawng nga ai. Yehowa hpe madat mara ai lam mung n nga ai. Dai lam ni yawng Satan kaw nga ai. Dai majaw myit sumnung ai ni hpe Satan nju ai re. Satan hta n nga ai atsam ningja ni hpe myit sumnung ai ni madun nga ai majaw, Satan a nhkru ai lam gaw grau nna dan dawng wa ai. Grau sawng ai gaw, Satan hpe masu ai wa re ai ngu shanhte sakse madun nga ai. Gara hku nna kun? Satan hpa mi galaw tim, tsun tim, myit sumnung ai ni gaw Yehowa hpe matut nna nawku ngu ai majaw re.​—⁠Yob 2:3-5.

⁶ Myit sumnung na matu gara aten hta yak chye ai kun? Sumnung ai myit hpe hpa majaw matut nna tam ra ai kun? Dai ga san ni a mahtai hpe chye lu na matu, Mawshe a kasi ningli, Babelon de bawng masha hku nna woi mat wa hkrum ai Hebre ramma masha 3 a kasi ningli hte Yesu a kasi ningli ni hpe hkaja mat ga.

7-8. Mawshe gaw masha ni shi hpe n hkungga ai shaloi gara hku galaw wa ai kun?

⁷ Ahkang aya lu da yang: Ahkang aya lu ai ni matut myit sumnung na matu, chyam dinglik lam hkrum chye ai. Laksan hku nna, shanhte woi awn nga ai marai langai ngai gaw shanhte hpe n hkungga ai hku tsun shaga wa yang (sh) kaja ai daw dan lam hpe n jahkrat ya ai ngu shanhte hpe tsun ai aten hta re. Dai  zawn hkrum ga ai kun? Nta masha langai gaw dai zawn nang hpe mu mada yang gara hku kun? Nang gara hku bai htang na kun? Dai zawn masa lam hta Mawshe gara hku galaw wa ai hpe hkaja yu ga.

⁸ Israela ni hpe woi awn na matu Mawshe hpe Yehowa lit shatsam da nna, tara ni ka na matu mung ahkang jaw da ai. Mawshe hpe Yehowa teng sha madi shadaw ya ai. Raitim, Mawshe a kahpu Arun hte kana Miriam gaw, shi a madu jan hte seng nna jahte tam wa ai. Masha nkau gaw, Mawshe a ahkang aya hte seng nna masin pawt wa nna matai htang wa ma tim, Mawshe gaw shanhte zawn n galaw wa ai. Aloi sha myit n daw wa ai. Kana Miriam hkrum ai ari hpe jahkring kau ya na matu pyi Yehowa kaw hpyi nem ya ai. (Bhk 12:1-13) Hpa majaw Mawshe dai hku galaw ai kun?

9-10. (a) Mawshe hpa hpe chye na na matu Yehowa karum ya wa ai kun? (b) Dinghku a ningbaw ni hte myitsu salang ni gaw Mawshe kaw nna gara lam sharin la lu ai kun?

⁹ Mawshe gaw Yehowa shaman shakyang ya ai hpe hkam la wa ai. Egutu hkawhkam a nta masha langai hku nna shaning 40 nga wa ai aten, Mawshe hta sumnung ai myit n nga ai. Alawan masin pawt wa ai. N tara ai lam hpe hparan ya ai hku nna masha langai hpe sat kau ai. Dai zawn shi galaw ai hpe Yehowa hkap la na ngu nna mung shadu wa ai. Israela ni hpe woi awn na matu, nden marai grau ra nna myit sumnung ra na hpe Mawshe chye na na matu, shaning 40 tup aten jaw nna Yehowa karum ya wa ai. Myit sumnung na matu, shagrit shanem ai myit, myit nem ai hte npu taw ai myit ni nga ra ai. Dai atsam ningja ni hpe shi atsawm sharin la ai majaw, kaja htum ningbaw langai byin wa ai.​—⁠Pru 2:11, 12; Kas 7:21-30, 36.

¹⁰ Dai ni na aten hta, dinghku a ningbaw ni hte myitsu salang ni gaw Mawshe hpe kasi la ging ai. N hkungga ai hku kanawn mazum hkrum tim, aloi hte sha myit hkum daw u. Shagrit shanem nna tinang galaw shut ai mara ni hpe yin la u. (Hpj 7:9, 20) Manghkang ni hpe gara hku hparan na hte seng nna Yehowa a lam matsun ni hpe hkan sa u. Ayan na myit sumnung let bai htang u. (Gsh 15:1) Dinghku a ningbaw ni hte woi awn na lit lu da ai ni gaw, Yehowa ra sharawng ai hte maren simsa lam rawt jat hkra galaw nna, myit sumnung ai kasi hpe madun ra ai.

11-13. Hebre ramma 3 gaw anhte a matu gara kasi ningli hpe madun wa ai kun?

¹¹ Zingri zingrat hkrum yang: Labau ni hta masha uphkang madu ni gaw Yehowa a amyu masha ni hpe zingri ma ai. Shanhte gaw, anhte hpe “tara tawt lai ai” lam amyu myu galaw ai ngu mara shagun ma ai. Raitim, gaja wa nga yang, anhte gaw “masha ga madat na hta, Karai Kasang a ga mahtang grau madat” ai majaw re. (Kas 5:29) Jahpoi asawng hkrum ai, htawng jahkrat hkrum ai, kayat pyi kayat hkrum ai. Matai htang ai lam anhte n galaw ai. Yehowa a karum shingtau lam hte hkam jan lu nga ai.

 ¹² Anhte a matu kasi madun wa ai Hebre ramma 3 * re ai Hanani, Mishaela hte Azaria ni a kasi ningli hpe hkaja yu ga. Babelon hkawhkam gaw, ja sumla kaba hpe gum dagup nna hkungga jaw na matu matsun da ai. Sumla hpe hpa majaw n nawku ai lam hkawhkam wa hpe myit sumnung let shanhte sang lang dan ai. Hkawhkam wa gaw, wan grung nga ai wan htung de kabai bang kau tim, shanhte gaw Karai Kasang hpe matut nna madat mara wa ai. Shanhte hpe hkye la na ngu n myit mada da tim, Yehowa gaw shanhte hpe kalang ta hkye la wa ai. Hpa mi hkrum wa tim, Yehowa ahkang jaw ai lam yawng hpe sharawng awng let hkap la na matu shanhte jin jin rai nga ai. (Dan 3:1, 8-28) Myit sumnung ai ni gaw nden marai rawng ai hpe shanhte 3 sakse madun nga ai. Yehowa langai hpe sha nawku na ngu ai anhte a dawdan lam hpe hten mat hkra, uphkang madu ni, zingri zingrat ai lam ni, jahkrit shama ai lam ni gaw n lu galaw ai.​—⁠Pru 20:4, 5.

¹³ Karai Kasang hpe sadi dung na lam hte seng nna chyam dinglik hkrum yang Hebre ramma 3 hpe gara hku kasi la mai na kun? Yehowa anhte hpe lanu lahku ya na hpe shagrit shanem let kamhpa ga ai. (Shk 118:6, 7) Anhte hpe n teng n man ai hku mara shagun ai ni hpe, myit nem nna hkungga ai hku tsun shaga ai. (1 Pe 3:15) Anhte tsawra ai Kawa hte hku hkau lam hten za shangun na gara lam hpe mung anhte nyet kau ai.

14-15. (a) Myit tsang lam ni nga yang hpa byin chye ai kun? (b) Esaia 53:7, 10 hku nga yang, myit tsang lam ni nga tim myit sumnung ai hpe madun wa ai hta kaja htum kasi gaw Yesu re ai ngu hpa majaw tsun lu ai kun?

¹⁴ Myit tsang lam ni hte hkrum yang: Lam amyu myu a majaw anhte myit tsang ga ai. Jawng hta hkrum na chyam dinglik lam (sh) bungli hta hkrum wa chye ai chyam dinglik lam ni a majaw myit tsang chye ai. Tsi tsi ai hte seng nna anhte myit ai shaloi mung, myit tsang wa chye ai. Myit tsang lam ni anhte hta nga ai shaloi, myit sumnung na matu yak chye ai. Manghkang kaba n raitim pyi, anhte hpe masin pawt shangun wa chye ai. Anhte tsun dat ai ga ni gaw mazut wa chye nna, galaw ai lam mung tsawra myit n lawm wa chye ai. Nang myit tsang nga yang, Yesu a kasi ningli hpe myit yu u.

¹⁵ Yesu gaw, mungkan asak aprat a hpang jahtum shata ni hta grai myit tsang nga ai. Laja lana zingri hkrum nna sat hkrum na hpe shi chye ai. (Yhn 3:14, 15; Gal 3:13) Shi garai n si shi ai shata ni hta, nachying myit nni nkri hkrum nga ai ngu nna tsun wa ai. (Luk 12:50) N si shi ai shawng shani hta Yesu ndai hku tsun ai: “Ngai myit ru nga nngai.” Yesu a shagrit shanem ai myit hte Karai Kasang a ga madat mara ai lam hpe shi a akyu pyi ga kaw nna chye lu ai: “Wa e, ndai ahkying hta na ngai hpe hkye hkrang la e: ning ngu yang mung ndai lam a majaw she, ndai ahkying de ngai du wa ni ai: Wa e, na a mying ningsang hpe sha shagrau u law.” (Yhn 12:27, 28) Aten du wa ai shaloi, Karai Kasang a hpyen ni gaw shi hpe laja lana zingri nna kaya jahkrum na hpe chye tim, shanhte a lata de shi a asak hpe nden marai hte sak jaw wa ai. Myit tsang lam ni hte jamjau lam ni a lapran, Karai a myit ra ai lam hpe Yesu gaw myit sumnung let galaw wa ai. Myit tsang lam ni nga tim, myit sumnung ai hpe madun wa ai hta kaja htum kasi gaw Yesu re ai ngu anhte tsun lu ai.​—⁠Esaia 53:7, 10 hpe hti u.

16-17. (a) Yesu a sumnung ai myit hte seng nna kasa ni gara hku chyam dinglik wa ai kun? (b) Yesu hpe gara hku nna kasi la mai na kun?

¹⁶ Yesu a ginding aga asak aprat hpang jahtum shana hta, kasa ni a galaw ai lam gaw shi myit sumnung na matu yak shangun wa ai. Dai shana hta kade daram shi myit ru myit tsang wa na hpe shingran yu u. Si ai aten du hkra  sadi dung lu na kun? Shi sadi n dung yang, kadai mung asak hkrung na myit mada lam n nga sai. (Rom 5:18, 19) Grau nna ahkyak ai gaw shi Kawa a amying san seng chyoi pra na matu re. (Yob 2:4) Kasa ni hte hpang jahtum shana shat sha ai aten hta, kasa ni gaw, “shanhte hta na kadai wa mahtang grau kaba nga ai kun, nga nna shanhte shada da tsun shajang pru ma ai.” Dai lam hte seng nna shi a kasa ni hpe dai shana hta mung, kaga aten ni hta mung Yesu gaw law law lang shading sharai ya ngut sai. Yesu masin n pawt wa ai gaw laklai ai lam re. Myit sumnung ai hku bai htang wa ai. Tsawra matsan dum nna ngang kang let kasa ni hta nga ra na myit jasat hpe sang lang dan wa ai. Shi hpe sadi dung let madi shadaw ya wa ai lam hpe mung shakawn ya wa ai.​—⁠Luk 22:24-28; Yhn 13:1-5, 12-15.

¹⁷ Dai zawn masa hte nang hkrum yang gara hku bai htang na kun? Myit ru myit tsang hkrum nga tim, matut myit sumnung ai hku nna Yesu hpe kasi la mai ai. Anhte shada da matut nna “hkam mana” lu na matu, Yehowa a lam matsun ni hpe sharawng awng let madat mara ra ai. (Kol 3:13) Anhte tsun shaga ai hte galaw ai lam ni gaw, kaga ni hpe mung masin pawt shangun ai hpe dum na nga yang, dai matsun ga hpe hkan sa lu na re. (Gsh 12:18; Yak 3:2, 5) Kaga ni hta nga ai kaja ai atsam ningja ni hpe shakawn ya u.​—⁠Ehp 4:29.

18. Kaja ai dawdan lam jahkrat lu hkra myit sumnung ai ni hpe Yehowa gara hku karum ya ai kun? Raitim hpa galaw ra na kun?

¹⁸ Grau nna kaja ai dawdan lam hpe jahkrat lu na. Prat hta gara lam galaw na hte seng nna dawdan na matu yak nga yang, kaja ai dawdan lam jahkrat lu hkra Yehowa karum ya na re. Raitim, anhte hta sumnung ai myit nga yang she shi karum ya na re. “Myit sumnung ai ni a hpyi shawn ai lam hpe” madat ya na ngu nna shi ga sadi jaw da ai. (Shk 10:17, NW) Hpyi shawn ai hta pyi grau nna karum ya na re. Chyum Laika hta ndai hku ga sadi jaw da ai: “Teng man ai lam hta myit sumnung ai ni hpe shi woi lakawn wa nna; shi a myit ra ai lam shanhte hpe sharin ya nga ai.” (Shk 25:9, NW) Yehowa gaw Chyum Laika hte ‘sadi dung ai hte myitsu ai mayam’ hku nna lajang ya ai laili laika ni, * lamang ni hku nna lam matsun ya nga ai. (Mat 24:45-47) Yehowa lajang ya ai lam amyu myu hpe hkaja ai hku nna, anhte chye wa ai lam ni hpe tatut hkan sa ai hku nna, Yehowa a karum shingtau lam hpe shagrit shanem let hkap la ra ai.

19-21. Kadesha shara hta Mawshe hpa mara galaw wa ai kun? Anhte hpa sharin la lu ai kun?

¹⁹ Shut ai lam galaw hkrup ai hpe koi lu  na. Mawshe a lam bai myit yu ga. Shi gaw, shaning ladaw law law myit sumnung wa nna Yehowa a myit shapyaw ya wa ai. Raitim, nam maling hkrun lam hkawm ai 40 ning daram du wa ai aten hta sumnung ai myit n lu madun mat ai. Egutu mung hta shi a asak hpe hkye la wa ai rai na masa nga ai kana gaw, Kadesha shara hta n nga mat ai. Makoi mayang ngut nna kade nna yang, Israela ni gaw shanhte hpe atsawm yu lanu lahku ai lam n nga ai ngu nna aput angun bai tsun ai. Hka n nga ai majaw, “Mawshe hte ndang kalang hkat” ma ai. Mawshe gaw tingkyeng akyu n tam ai sha, mauhpa amu ni galaw let aten grai na hkra woi awn wa tim, shanhte gaw aput angun tsun wa ai. Hka n nga ai majaw sha n-ga, Mawshe galaw shut ai lam a majaw, lu hka n nga ai ngu aput angun tsun ma ai.​—⁠Bhk 20:1-5, 9-11.

²⁰ Mawshe grai masin pawt wa ai majaw sumnung ai myit n nga mat sai. Yehowa a lam matsun hte maren, kam sham let lunghkrung hpe ga shaga na malai, masha ni hpe asung arung tsun nna mauhpa lam shi galaw ya na ngu tsun wa ai. Dai hpang lunghkrung hpe lahkawng lang kayat dat ai majaw hka law law pru wa ai. Gumrawng nna masin pawt ai myit gaw, mara kaba hpe galaw hkrup mat shangun ai. (Shk 106:32, 33) Chyahkring chyahkra sumnung ai myit n nga mat ai majaw, Ga Sadi Tawn Da Ai Mungdan de shang lu na ahkang Mawshe n lu mat ai.​—⁠Bhk 20:12.

²¹ Dai mabyin kaw nna manu dan ai lam sharin la lu ai. Langai, sumnung ai myit ayan na nga na matu shakut ra ai. Chyahkring chyahkra mat mat yang pyi, gumrawng ai myit nga wa nna angawk ai hku tsun wa chye ai, galaw wa chye ai. Lahkawng, myit tsang lam ni gaw anhte hpe gawng kya shangun chye ai. Dai majaw, gara hku mi shadut hkrum tim, sumnung ai myit matut nna nga ra ai.

22-23. (a) Hpa majaw matut nna myit sumnung ra ai kun? (b) Zehpani 2:3 hta madun da ai lam gaw hpa hpe tsun mayu ai rai kun?

²² Anhte makawp maga hkrum na. Kade nna yang, Yehowa gaw mungkan hta nga ai nhkru ai masha yawng hpe yeng seng kau na re. Dai shaloi, myit sumnung ai ni sha ngam sana re. Mungkan gaw ngwi pyaw simsa nga na re. (Shk 37:10, 11) Myit sumnung ai ni hta nang mung lawm ai kun? Myihtoi Zehpani kaw nna Yehowa saw shaga da ai lam hpe hkan sa na nga yang lawm lu na re.​—⁠Zehpani 2:3 hpe hti u.

²³ Zehpani 2:3 hta “hprawng makoi shara mu dam nhten” ngu nna hpa majaw tsun da ai kun? Yehowa gaw, shi a myit shapyaw ya nna shi tsawra ai ni hpe n lu makawp maga ya lu ai ngu nna tsun mayu ai n re. Anhte makawp maga hkrum na matu lama ma galaw ra na ngu tsun mayu ai re. Ya aten hta myit sumnung nna Yehowa a myit shapyaw ya na nga yang, “Yehowa a masin pawt ai nhtoi” kaw nna hkye hkang la hkrum na re. Htani htana asak hkrung lu na re.