1-2. (a) Mosesa bamulumbulula byepi, kabiji waubile byepi? (b) Ñanyi kintu kitutundaika kwikala na kyubilo kya bukimote?

BAIBOLO walumbulula Mosesa amba “wajinga kimote kukila bantu bonse bajinga pano pa ntanda.” (Bala. 12:3) Nanchi kino kibena kulumbulula’mba wazenzalele, wachinanga kufuukula bya kuba, nangwa wachinanga kuba kyawama inge bakwabo bamwimena ku ntundwa nyi? Bamo byo byo balanguluka pa muntu kimote. Pano bino, ino milanguluko kechi ya kine ne. Mosesa kechi wajinga na moyo ne, wafuukulanga bintu bulongo, kabiji wajinga kalume wa Lesa wachinchikile. Na bukwasho bwa Yehoba, wayile na kwisamba na mfumu wa Ijipita wajinga bingi na bulume, watangijile bantu nobe 3,000,000 mu kiselebwa, ne kukwasha kisaka kya bena Isalela kushinda balwanyi babo.

² Kechi tupita mu makatazho apichilemo Mosesa ne, pano bino, pa juba pa juba tutaanwa na bantu nangwa tupita mu bintu byakonsha kwitulengela kukankalwa kumwesha bukimote. Nangwa byonkabyo, kuji kintu kitutundaika kwikala na kyubilo kya bukimote. Yehoba walaya’mba “bakimote bakaswana ntanda.” (Sala. 37:11) Nanchi mwakonsha kwamba’mba mwi bakimote nyi? Nanchi ne bakwenu byobyo bemumona nyi? Saka tukyangye kukumbula ano mepuzho, patanshi twafwainwa kuyuka kwikala kimote byo kulumbulula.

3-4. (a) Bukimote twakonsha kwibwesakanya ku ka? (b) Ñanyi byubilo bina byo twafwainwa kwikala nabyo pa kuba’mba twikale bakimote, kabiji mambo ka?

³ Bukimote * buji nobe kipikichala kyawama bingi. Mu ñanyi jishinda?  Byonkatu muntu ulenga bipikichala byo engijisha misombelo yapusana-pusana pa kuba’mba alenge kipikichala kyawama, ne atweba twafwainwa kwikala na byubilo byawama pa kuba’mba twikale bakimote. Byubilo bimo byo twafwainwa kwikala nabyo ke kwipelula, lukookelo, kukooka muchima, ne kuchinchika. Mambo ka o twafwainwa kwikela na bino byubilo inge tukeba kutokesha Yehoba ku muchima?

⁴ Bantu bepelula bo bakookela kyaswa muchima wa Lesa. Lubaji lwa kyaswa muchima wa Lesa ke kuba’mba twikale bakooka muchima. (Mat. 5:5; Nga. 5:23) Inge ketube kyaswa muchima wa Lesa, tuzhingijisha Satana. Onkao mambo, nangwatu twipelula ne kukooka muchima, bantu bavula baji ku lubaji lwa Satana betushikwa. (Yoa. 15:18, 19) Na mambo a kino, twafwainwa kwikala bachinchika pa kuba’mba tukane Satana.

5-6. (a) Mambo ka Satana o ashikilwa bakimote? (b) Ñanyi mepuzho o tusakukumbula?

⁵ Muntu wabula kimote ke muntu witota, uzhingila bingi, kabiji ubula kukookela Yehoba. Ne Satana byo byo aji. O ene mambo o ashikilwa bakimote. Bakimote basolola patoka byubilo byanji byatama. Kabiji bamwesha ne kuba’mba Satana wa bubela. Mambo ka? Bintu byo amba ne byo oba kechi byakonsha kulengela bantu bakimote kuleka kwingijila Yehoba ne.—Yoba 2:3-5.

⁶ Ñanyi kimye po kikatazha kumwesha bukimote? Kabiji mambo ka o twafwainwa kutwajijila kukeba bukimote? Pa kuba’mba tukumbule ano mepuzho, tusakwisamba pa byaubile Mosesa, Bahebelu basatu bajinga mu buzha mu Babilona, ne Yesu.

7-8. Mosesa waubile byepi kimye bakwabo kyo babujile kumunemeka?

⁷ Inge betupa luusa lwa kutangijila bakwetu: Kyakonsha kukatazha bingi boba baji na luusa lwa kutangijila bakwabo kutwajijila kwikala bakimote, kikatakata inge muntu ye batangijila wabula kwibamwesha mushingi nangwa wazhinauka bintu byo bafuukulapo. Nanchi kino kyakimumwekelapo kala nyi? Ibyepi inge wa mu kisemi ye waubile byobyo? Inge mwaubile byepi? Langulukai pa byaubile Mosesa.

⁸ Yehoba wasajile Mosesa kwikala ntangi wa bena Isalela kabiji wamwambijile kunemba mizhilo ya kutangijila kino kisaka. Kine, Mosesa bamukwashishenga kwi Yehoba. Nangwa byonkabyo, nyenga ya kwa Mosesa aye Milyama  ne kolojanji aye Alona bamunenenga ne kwamba’mba kechi wafwainwe kusongola mwanamukazhi ye asongwele ne. Kino inge kyamwekejile banabalume baji pa bifulo bamo, inge bakebele kushinkanya, bino Mosesa kechi byo byo aubile ne. Kechi wafikenejiletu kuzhingila ne. Aye wasashijile Yehoba kuba’mba abuke mbumba yaishile pe Milyama. (Bala. 12:1-13) Mambo ka Mosesa o aubijile bino?

9-10. (a) Ñanyi kintu Yehoba kyo akwashishe Mosesa kumvwisha? (b) Mitwe ya bisemi ne bakulumpe mu kipwilo bakonsha kufunjilako ka kwi Mosesa?

⁹ Mosesa waswishishe Yehoba kumufunjisha. Myaka 40 yo ajinga mu Ijipita mu kisemi kya bufumu, Mosesa kechi wajinga kimote ne. Wazhingilanga bingi bukiji kya kuba waipayilepo ne mwanamulume umo ye amwene’mba kechi wajinga na byubilo byawama ne. Mosesa walangulukilenga’mba Yehoba usakuswisha byubilo byanji. Pano bino, Yehoba wafunjishe Mosesa pa myaka ikwabo 40, kumukwasha kuyuka’mba wafwainwe kwikala wachinchika pa kuba’mba atangijile bena Isalela, kabiji wafwainwe kwikala kimote. Kikwabo, pa kuba’mba ekale kimote, wafwainwe ne kwikala wipelula, wa lukookelo, kabiji wakooka muchima. Wafunjile kwikala kimote kabiji waikele ntangi wawama bingi.—Lupu. 2:11, 12; Byu. 7:21-30, 36.

¹⁰ Lelo jino, mitwe ya bisemi ne bakulumpe mu kipwilo bafwainwa kwikala byonka byajinga Mosesa. Inge bakwenu babula kwimupa mushingi, kechi mwafwainwa kuzhingilanga bukiji ne. Ikalai bepelula ne kuswa kuba’mba ne anweba mulubankanya. (Sapwi. 7:9, 20) Londelainga lutangijilo lwa Yehoba pa kupwisha makatazho. Kabiji mwafwainwa kukumbulanga na jiwi jakooka kimye kyonse. (Maana 15:1) Mitwe ya bisemi ne bakalama mu kipwilo bakumbula na jiwi jakooka batokesha Yehoba ku muchima, batundaika mutende, kabiji balengela bakwabo kufunjilako kwi abo bya kwikala bakimote.

11-13. Tufunjilako ka ku Bahebelu basatu?

¹¹ Inge babena kwitumanyika: Kufumatu ne kala, bantangi ba makafulumende bamanyika bingi bantu ba Yehoba. Bakonsha kwitupamo mambo apusana-pusana, bino kishinka ke kya kuba’mba “Lesa ye kalama ye twafwainwa kukookela kechi bantu ne.” (Byu. 5:29) Bakonsha kwitwendeleka, kwitukasa, nangwatu kwitupuma. Bino na bukwasho bwa Yehoba, kechi tukashinkanya ne, atweba tukatwajijila kwikala bakooka muchima mu meseko onse.

¹² Akilangulukai pa byaubile Bahebelu basatu bajinga mu buzha, abo ba Hananiya, Mishela ne Azaliya ne kumona byo twakonsha kufunjilako. * Mfumu wa Babilona wibakambizhe’mba bapone panshi kinkuvumene ne kupopwela kipashañano kya ngolode. Balumbulwijile mfumu na jiwi  jakooka ene mambo o bakaine kupopwela kipashañano. Batwajijile kukookela Lesa nangwa kya kuba mfumu waambile’mba basakwibataya mu kisha kya mujilo. Yehoba wafuukwilepo kupulusha bano banabalume bukiji bukiji, bino kechi baketekejile’mba usakuba bino ne. Pakuba bepaine kupita mu bintu byonse byaswishishe Yehoba kuba’mba bibamwekele. (Da. 3:1, 8-28) Bamwesheshe kuba’mba bakimote ke bantu babula moyo. Kafwako mfumu, kintu kilengesha moyo, nangwa lumanamo, byakonsha kwitulengela kuleka kwingijila Yehoba na muchima yense ne.—Lupu. 20:4, 5.

¹³ Inge twaesekwa kuba’mba tuleke kwikala ba kishinka kwi Lesa, twakonsha kulondela byepi byaubile Bahebelu basatu? Twafwainwa kwikala bepelula ne kuketekala’mba Yehoba usakwitukwasha. (Sala. 118:6, 7) Tukumbula na jiwi jakooka ne na mushingi boba betupamo mambo a bubela. (1 Pe. 3:15) Kabiji kechi tuswa kusankilapo bulunda bwetu na Shetu wa butemwe ne.

14-15. (a) Ñanyi kintu kyakonsha kumweka inge twaikala na bijikila? (b) Kwesakana na byaamba Isaya 53:7, 10, mambo ka o twafwainwa kwambila’mba Yesu ye mwine ye twafwainwa kufunjilako kumwesha bukimote inge twaikala na bijikila?

¹⁴ Inge tuji na bijikila: Atweba bonse twikala na bijikila na mambo a bintu byapusana-pusana. Kampe twaikelepo na bijikila byo kwashajiletu pacheche kunemba mpeso ku sukulu nangwa saka tukyangye kutendeka kwingilapo mwingilo umo. Kimo kimye twikala na bijikila inge ketulanguluke pa mashinda a kubukilwamo. Inge tuji na bijikila, kikatazha bingi kumwesha bukimote. Bintu bibula kwitukatazha kimye kyonse byakonsha kutendeka kwituzhingijisha. Twakonsha kutendeka kwamba byambo bya kupulumuka. Inge mwaikala na bijikila, vulukainga byaubile Yesu.

¹⁵ Mu bañondo bapeleleko pano pa ntanda, Yesu waikele bingi na bijikila. Wayukile’mba bakamumanyika kya mama nafwa ne kumwipaya. (Yoa. 3:14, 15; Nga. 3:13) Byo kwashajile bañondo bacheche kuba’mba bamwipaye, waambile’mba wajinga bingi na bijikila. (Luka 12:50) Kabiji byo kwashajiletu moba acheche kuba’mba bamwipaye, Yesu waambile’mba: “Muchima wami wankatazha bingi.” Tumona byo epelwile ne kukookela Lesa mu byo alombele ne kwamba byajinga mu muchima wanji amba: “Tata, mpulushai ku kino kimye. Pano bino, kino kyo kyo naishila ku kino kimye. Tata tumbijikai jizhina jenu.” (Yoa. 12:27, 28) Kimye byo kyafikile kya kumwipaya, Yesu wachinchikile ne kwisolola mwine ku balwanyi ba Lesa, kabiji bamwipayile lufu lwatama bingi. Nangwa kya kuba wajinga na bijikila kabiji wamanamine bingi, Yesu waubile kyaswa muchima wa Lesa. Kwa kubula nangwa kuzhinaukatu ne, Yesu ye mwine ye twafwainwa kufunjilako bya kwikala bakimote inge tuji na bijikila.—Tangai Isaya 53:7, 10.

16-17. (a) Ñanyi kintu kyaubile balunda ba kwa Yesu kyakonsheshe kumulengela kukatazha kwikala kimote? (b) Twakonsha kulondela byepi byaubile Yesu?

¹⁶ Bufuku bwapeleleko pano pa ntanda, balunda bwa kwa Yesu baubile kintu kyafwainwe kumulengela kuleka kwikala kimote. Akifwanyikizhai bijikila byo ajinga nabyo pa bobwa bufuku. Nanchi wakonsheshe kutwajijila kwikala wa kishinka kufika ne ku lufu nyi? Umvwe kya kuba Yesu kechi watwajijile kwikala wa kishinka ne, inge kafwako wakonsheshe kwikala na bumi ne. (Loma 5:18, 19) Ne kyakilamo kunema, jizhina ja Shanji javwangilwemo. (Yoba 2:4) Kimye kyo aikele na kijiilo kyapeleleko na balunda nanji, ko kuba’mba batumwa, pabuukile “mapata akatampe” pa mambo a “wajinga mukulumpe pe abo.” Yesu wibolweleko balunda nanji pa luno lukatazho pa bimye byavula ne pa jonkaja juba mabanga. Kyawaminekotu ke kya kuba’mba Yesu kechi wazhingijile ne. Aye watwajijile kwikala wakooka muchima. Nangwa kya kuba wajinga wakooka muchima, Yesu kechi wapichile mu mbaji pa kwibalumbulwila  kyubilo kyo bafwainwe kwikala nakyo ne. Kabiji wasanchijile balunda nanji byo batwajijile kwikala pamo ne aye mu bukishinka.—Luka 22:24-28; Yoa. 13:1-5, 12-15.

¹⁷ Umvwe kintu kya uno mutundu kimumwekejile anweba, inge mwaubile byepi? Twakonsha kulondela byaubile Yesu ne kutwajijila kwikala bakooka muchima inge tuji na bijikila. Mwafwainwa kutwajijila kukookela mukambizho wa Yehoba wa kuba’mba: “Itekenyainga anwe bene na bene ne.” (Kolo. 3:13) Kiketupeelela kukookela uno mukambizho inge saka tuvuluka kuba’mba ne atweba twamba ne kuba bintu bifichisha bakwetu ku muchima. (Maana 12:18; Yako. 3:2, 5) Kabiji ibikaingako kusanchila bakwenu pa byubilo byabo byawama.—Efi. 4:29.

18. Yehoba ukwasha byepi bakimote kufuukula bulongo bya kuba, bino twafwainwa kuba byepi?

¹⁸ Tukafuukulanga bintu bulongo. Inge kitukatazha kufuukula bintu mu bwikalo, Yehoba uketukwasha kufuukula bintu byawama. Bino wakonsha kwitukwashatu inge twatwajijila kwikala bakimote. Walaya kuba’mba ukomvwa “misashijilo ya bakimote.” (Sala. 10:17) Uketubila bintu byavula kukila ne pa bintu byo tumulomba. Baibolo waamba’mba: “Ukatangijila bakimote mu bintu byaoloka, kabiji bakimote ukebafunjisha jishinda janji.” (Sala. 25:9) Yehoba upana lutangijilo kupichila mu Baibolo, mabuku, * mavidyo ne kupwila kwitunengezhezha “kalume wa kishinka kabiji wa maana.” (Mat. 24:45-47) Twafwainwa kuswa bukwasho bwa Yehoba kupichila mu kwikala bepelula ne kuyuka amba tukebewa bukwasho kupichila mu kufunda bintu bitunengezhezha Yehoba ne kwingijisha bintu byo tufunda.

19-21. Ñanyi mambo alengele Mosesa ku Kadeshi, kabiji tufunjilako ka?

¹⁹ Tukachinuzhukanga kulubankanya. Akilangulukai jibiji pe Mosesa. Waikele kimote pa myaka yavula ne kutokesha Yehoba ku muchima. Bino ku mpelo ya myaka 40 yo baendele mu kiselebwa, Mosesa wakankelwe kumwesha bukimote. Kabiji kyamweka nyenga yanji yenka wamupulwishe mu Ijipita, wafwile kabiji bamuzhiikile ku Kadeshi. Kabiji bena Isalela batendekele jikwabo kwijizhanya’mba kechi bebapelenga bikebewa ne. Pa kikye kimye “batobweshenga Mosesa” na mambo a kubula mema a kutoma. Nangwa kya kuba Yehoba waubile bya kukumya kupichila mwi Mosesa, kabiji nangwa kya  kuba Mosesa watangijile bantu bulongo pa myaka yavula, bino bantu bamutobweshenga. Kechi bejizhenyengatu pa kubula mema ne, bino ne pe Mosesa, uba nobe ye walengejile’mba bomvwe kilaka.—Bala. 20:1-5, 9-11.

²⁰ Na mambo a bukaji, Mosesa walekele kwikala wakooka muchima. Yehoba wamukambizhe’mba ambile jibwe, bino aye wanenene bantu ne kwitumbijika mwine. Kepo apumine mu jibwe bimye bibiji kabiji mema apokomokele. Bwitote ne bukaji bwamulengejile kulenga mambo akatampe. (Sala. 106:32, 33) Na mambo a kuba’mba pa kikye kimye kechi wamwesheshe bukimote ne, Mosesa kechi bamuswishishe kutwela mu Ntanda ya Mulaye ne.—Bala. 20:12.

²¹ Kino kyamwekele kitufunjisha bintu byanema bingi. Kitanshi, twafwainwa kutwajijila kwingila na ngovu pa kuba’mba bukimote bwetu bubule kupwa. Inge twaleka kukosesha bukimote, tukekala na bwitote ne ñambilo yatama, kabiji kechi tukobanga bintu na maana ne. Kya bubiji, inge twaikala na bijikila, kyakonsha kwitukatazha kwikala bakimote. Onkao mambo, twafwainwa kwibikako kwikala bakimote nangwatu inge tubena kupita mu makatazho.

22-23. (a) Mambo ka o twafwainwa kutwajijila kukeba bukimote? (b) Byambo biji pa Zefwaniya 2:3 bilumbulula ka?

²² Tukazhikijilwa. Katatakatu Yehoba akafumyepo babi bonse pano pa ntanda, kabiji bakimote bo bakashalapo. Kepo pa ntanda ponse pakakumbana mutende. (Sala. 37:10, 11) Nanchi ne anweba mukataanwa pa bakimote nyi? Mukataanwapo inge kemumvwine byambo bya Yehoba byanembele ngauzhi Zefwaniya.—Tangai Zefwaniya 2:3.

²³ Mambo ka Zefwaniya 2:3 o aambila’mba: “Apo kampe bakemufyako”? Abino byambo kechi bilumbulula’mba Yehoba wakonsha kukankalwa kuzhikijila bantu bakeba kumutokesha ku muchima kabiji bamutemwa ne. Pakuba bimwesha’mba twafwainwa kubapo bimo pa kuba’mba aketuzhikijile. Tukapuluka “juba ja bukaji bwa Yehoba” ne kwikala myaka ne myaka inge twatwajijila kwibikako luno kwikala bakimote ne kutokesha Yehoba ku muchima.