1-2. (a) Ngapi omu Bibeli za singonona Mosesa ntani yisinke ga rugene? (b) Konda musinke zeyi natu tungira po sikara selinunupiko?

BIBELI kutanta asi Mosesa kwa kere “mugara gomulinunupiki kupitakana navenye vepevhu.” (Num. 12:3) Eyi kutanta nye asi age kwa kere nowoma wokutura po matokoro ntani nga tjira kumurwanesa ndi? Wovanzi yimo ava tara muntu gokulinunupika ngoso. Nye eyi kapisi usili. Mosesa kwa kere nouradi ntani kapi nga tjira kutura po matokoro. Nevatero lyaJehova, age kwa zire komupangeli gononkondo gwaEgipite, ntani kwa pitisilire vantu wokusika nampo po-3 000 000 momburundu nokuvatera Vaisraeli va funde po nonkore dawo.

² Naina kapi atu ligwanekere nomaudigu ngwendi gaga ga ligwanekerere nago Mosesa, nye ose kuligwanekera novantu ndi maukaro aga aga tu ninkisa yi tu karere udigu kulinunupika. Nye twa kara nokonda zeyi natu tungira po sikara oso. Jehova kwa tumbwidira asi: “Valinunupiki yiwo ngava hingira sirongo.” (Epis. 37:11) Kuvhura o tante asi nove wa linunupika ndi? Yimo va ku diva vantu ngoso ndi? Komeho tu ka limburure mapuro ogo tanko twa hepa kudiva eyi ayi tanta kulinunupika.

3-4. (a) Ngapi omu lya fana elinunupiko? (b) Yikara musinke twa hepa kutunga po nsene tuna hara kulinunupika ntani morwasinke?

³ Elinunupiko * kwa fana ngwendi efano lyewa. Monkedi  musinke? Ngwendi moomu mufaneki a ruganesa maruvara gokulisiga-siga yipo a faneke efano, nose twa hepa kutunga po yikara yokulisiga-siga yipo yi tu tompoke kulinunupika. Yikara yimwe oyo kuna kara ulimburukwi, ugomoki ntani uradi. Morwasinke ya karera nomulyo tu likide yikara oyo nsene tuna hara kuhafesa Jehova?

⁴ Vantu wokulinunupika, yiwo tupu ava limburukwa eyi ga hara Karunga. Ano Karunga kwa tu harera asi tu kare nougomoki. (Mat. 5:5; Gar. 5:23) Apa atu rugana eyi ga hara Karunga, ayo kuhandukisa Satana. Vantu ava va hamena kouzuni waSatana ngava tu nyenga nampili tu kare nelinunupiko nougomoki. (Joh. 15:18, 19) Eyi yiyo nye twa hepera uradi yipo tu rwanese Satana.

5-6. (a) Morwasinke Satana ga dilira kuhara vantu wokulinunupika? (b) Mapuro musinke natu ka limburura?

⁵ Muntu ogu a dili kulinunupika age kulinenepeka ntani kapi a pangere ehandu lyendi ntani kapi a limburukwa Jehova. Ezi kuna kara nkareso zaSatana. Eyi yiyo Satana ga dilira kuhara vantu wokulinunupika. Awo kwa kara noyikara yoyiwa kapisi ngwendi yendi. Ntani awo kulikida asi age munayipempa. Monkedi musinke? Yikare asi yisinke na rugana Satana, age kapi nga vhura kukondera vantu wokulinunupika mokukarera Jehova.—Joba 2:3-5.

⁶ Poyiruwo musinke ayi tu karere udigu kulinunupika? Morwasinke natu tungira po elinunupiko? Mokulimburura mapuro ogo, tatu ka konakona sihonena saMosesa noVahebeli vatatu ava va kere mounkwate waBabironi ntani sihonena saJesus.

7-8. Yisinke ga rugene Mosesa apa wopeke va dilire kumufumadeka?

⁷ Nsene twa kara nositumbukira: Ayo kudigopera ava va kara noyitumbukira mokulinunupika nsene gumwe ogu ga kara konhi zawo a dira kuvafumadeka ndi nsene a tanta asi awo kapi ava tura po matokoro gomawa. Ya ku horokera rumwe oyo ndi? Ngapi nsene gumwe gekoro lyoge a ku tekura ngoso? Yisinke no  rugana? Tu tareni eyi ga rugene Mosesa apa ga kere moukaro wangoso.

⁸ Jehova kwa tulire Mosesa a kare mupitisili goVaisraeli ntani kwa mu pere situmbukira sokutjanga noveta domuhoko goVaisraeli. Jehova kwa pitisilire Mosesa. Nye nampili ngoso, mukurwendi Arona nampanzendi Miliyama kwa mu tangwisire kweyi ga kwere mukadi goMuetiopiya. Ngano asi yininke eyi kwa horokerere vamwe, ayo ngano ya va handukisire, nye Mosesa kapi ga yi rugene oyo. Age kwa likwamberere kwaJehova yipo a verure Miliyama. (Num. 12:1-13) Morwasinke ga yi ruganene eyi Mosesa?

9-10. (a) Yisinke Jehova ga vaterere Mosesa a kwate egano? (b) Yisinke nava lirongera ko vanturagumbo novakuronambunga kwaMosesa?

⁹ Jehova kwa dewire Mosesa. Apa Mosesa ga kere membo lyaFarawo, age kapi ga kere muntu gokulinunupika. Morwa nga handuka usimbu, ayo ya mu ninkisire a dipage mugara ogu ga mwene asi mepuko ana kara. Age kwa gazarere asi Jehova na kwatesa ko eyi ga rugene. Monomvhura 40 edi da kweme ko, Jehova kwa vaterere Mosesa a kwate egano asi mokupitisira Vaisraeli ga hepere elinunupiko nye kapisi uradi welike. Mokukara nelinunupiko ga hepere kukara nougomoki ntani noulimburukwi. Apa ga yi lirongere eyi, age kwa ya kere mupitisili gomuwa.—Ex. 2:11, 12; Yirug. 7:21-30, 36.

¹⁰ Naina, vanturagumbo novakuronambunga nawo va hepa kuhonena Mosesa. Nsene wopeke kapi vana kukufumadeka, wa ha genderera kuhanduka. Tambura mapuko goge nelinunupiko. (Muud. 7:9, 20) Kwama mavyukiso gaJehova kuhamena omu nokohonona po maudigu. Ntani limburura nombili. (Yis. 15:1) Vanturagumbo novapitisili ava ava kwama mavyukiso ogo, kuhafesa Jehova nokuretesa po mbili ntani awo kutura po sihonena selinunupiko.

11-13. Yisinke natu lirongera ko koVahebeli vatatu?

¹¹ Nsene kuna kutuhepeka: Kutunda kwanare vapangeli kuhepeka vakareli vaJehova. Awo kuturundira asi ose kurugana yoyidona, nye eyi ayi va handukisa po unene, morwa ose “kulimburukwa unene Karunga, kupitakana vantu.” (Yirug. 5:29) Kuvhura va tu swaure nokututura monodorongo nokutuhepeka, nye nevatero lyaJehova, ose ngatu twikira kukara ngorooro nougomoki nye kapi ngatu va rugwida kuwoko.

¹² Koneka eyi natu lirongera ko koVahebeli vatatu ava, Hananiya naMisayeli  naAsaliya. * Hompa gwaBabironi kwa va pangerere va tongamene efano lyenene lyongorodo. Nye awo kwa fatwilire hompa nelinunupiko konda zeyi va nyokerere. Awo kwa limburukwire Karunga, nampili ngomu hompa ga va tjilisire asi ta va zugumine mesuga lyomundiro. Jehova ga va poperere, nampili ngomu va dilire kuyindindira. Awo kwa ndindilire yi va horokere nkenye eyi. (Ndan. 3:1, 8-28) Awo kwa yi likidire asi vantu velinunupiko kwa kara nouradi. Ose ngatu twikira kulimburukwa Jehova nampili vahompa ndi wopeke va tu tjilise.—Ex. 20:4, 5.

¹³ Ngapi natu honena Vahebeli vatatu nsene kuna kuheteka ulimburukwi wetu? Twa hepa kuhuguvara asi Jehova ngatu kwafa. (Epis. 118:6, 7) Twa hepa kulimburura nombili ava ava tu rundire asi ose kurugana yoyidona. (1 Pet. 3:15) Ntani twa hepa kunyokera po nkenye eyi nayi zonagwisa po ukaume wetu naJehova.

14-15. (a) Yisinke ayi horoka apa atu kara nosinka? (b) Kuliza naJesaya 53:7, 10, morwasinke natu uyungira asi Jesus yige ga tura po sihonena sosiwa po omu natu linunupika nampili kuna kara nosinka?

¹⁴ Nsene tuna kara nosinka: Natuvenye kukara nosinka morwa nokonda dokulisiga-siga. Nampo ya tu horokera koyirugana ntani komeho zokutjanga ekona-kono kosure. Ndi nampo komeho zokuza kosipangero. Ayo udigu kulinunupika apa atu kara nosinka. Nsene tuna kara nosinka, nampili yininke yoyinunu kuvhura kutuhandukisa. Ose kuyatameka kuruganesa nonkango dononkukutu. Nsene wa kara rumwe nosinka, koneka eyi natu lirongera ko kwaJesus.

¹⁵ Momakwedi gongandi komeho va ka mu dipage, age kwa kere nosinka unene. Age ga yi divire asi ngava mu hepeka nokumudipaga. (Joh. 3:14, 15; Gar. 3:13) Sikando simwe komeho va ka mu dipage age kwa tente asi ana guwu. (Ruk. 12:50) Ano mazuva gongandi komeho va ka mu dipage, age kwa tente asi: “Yina limbi nge.” Nonkango edi ga ruganesere apa ga kanderere kwa likidire asi age kwa linunupika ntani kulimburukwa Karunga. Age kwa kandererere asi: “Tate, yoworora nge mo mokaruwo aka, ndi? Nye eyi yiyo yina reta nge mokaruwo aka. Tate, yererepeka edina lyoge!” (Joh. 12:27, 28) Apa sa sikire mo siruwo, Jesus kwa ligeve mwene kovantu ava va mu dipagere monkedi zokuswaukisa. Nampili ngomu ga kere nosinka sosinene nokumuhepeka unene, Jesus kwa twikilire kurugana mpango zaKarunga nelinunupiko. Yosili, Jesus yige ga tura po sihonena sosiwa omu natu likida elinunupiko nampili kuna kara nosinka.—Resa Jesaya 53:7, 10.

16-17. (a) Ngapi vakaume vaJesus wovanene va hetekere elinunupiko lyendi? (b) Ngapi natu honena Jesus?

¹⁶ Vakaume vaJesus wovanene kwa hetekere elinunupiko lyendi mesiku lyendi lyokuhulilira pevhu. Gazara tupu sinka sosinene esi ga kere naso. Age nampo kwa lipulire nsene nga twikira kulimburukwa dogoro konomfa dendi. Eparu lyovantu kwa korerere koulimburukwi wendi. (Rom. 5:18, 19) Nye unene po, age kwa kere nosinka omu nayi kundama edina lyoGuhwe. (Joba 2:4) Ano apa ga lire murarero gokuhulilira novapositoli vendi, mokatji kawo kwa kere mo nompata “asi pwawo yilye munene po.” Jesus nga vyukisa varongwa vendi yikando yoyinzi  kuhamena sitwa esi, kukwatera mo ngurova ezi va kere kumwe. Nye Jesus kapi ga handukire. Age kwa va fatwilire hena nombili kuhamena nkareso ezi va hepere kukara nazo. Ntani ta va pandura kweyi ngava kara kumwe nage.—Ruk. 22:24-28; Joh. 13:1-5, 12-15.

¹⁷ Ngano nyove wa kere moukaro waJesus, yisinke ngano wa rugene? Nose kuvhura tu honene Jesus pokudira kuhanduka usimbu nsene tuna kara nosinka. Ya wapa kulimburukwa mpango zaJehova ezi asi: “Omu lididimike-didimikire, tomu ligusa-gusire po.” (Koros. 3:13) Nsene tu diworoka asi natuvenye kuuyunga nokurugana eyi ayi handukisa wopeke, ngayi tu vatera tu limburukwe mpango ozo. (Yis. 12:18; Jak. 3:2, 5) Ayo mulyo hena tu pandadeke vakwetu koyikara yawo yoyiwa.—Efe. 4:29.

18. Ngapi Jehova a vatere vantu wokulinunupika va ture po matokoro gomawa, nye yisinke twa hepa kurugana?

¹⁸ Ose ngatu tura po matokoro gomawa. Nsene twa linunupika, Jehova ngatu vatera tu ture po matokoro gomawa meparu. Age kwa tumbwidira asi: ‘nga tega kutwi kwendi komakanderero’ govalinunupiki. (Epis. 10:17) Nye yinzi nga rugana kupitakana tupu kupurakena komakanderero getu. Bibeli kwa tumbwidira asi: “Age kugendesa valinunupiki monzira zokuhungama, ta va rongo eharo lyendi.” (Epis. 25:9) Jehova kugava egendeso lyangoso kupitira moBibeli nomoyimbapiratjangwa * ntani kupitira momalikwamo gokutunda ‘komukareli gokulimburukwa gonondunge.’ (Mat. 24:45-47) Pokulironga nokutura pasirugana eyi a tu pe Jehova, ose ngoso kuna kulikida asi twa linunupika ntani twa hara a tu vatere.

19-21. Epuko musinke ga rugene Mosesa poKadesi, ntani yisinke natu lirongera ko?

¹⁹ Ngatu nyokera po kutura mapuko. Gazadara ko kuhamena Mosesa. Nomvhura dononzi age kwa linunupikire ntani nga hafesa Jehova. Nye Mosesa kapi ga linunupikire kouhura wonomvhura 40 edi va kere momburundu. Mukurwendi gomukadi ogu ga poperere eparu lyendi moEgipite, kwa fililire poKadesi.  Ano sikando esi, Vaisraeli kwa uyungire asi kapi vava pakerere mbili. Posiruwo esi awo kwa ‘tangwininine Mosesa’ kuhamena mema aga ga dilire kukara ko. Nampili ngomu Jehova ga rugene yitetu yoyinzi kupitira mwaMosesa ntani nampili ngomu Mosesa ga va pitisilire siruwo sosire, Vaisraeli kwa sivanene. Awo kapi tupu va sivanene kuhamena mema, nye hena kwa sivanenene Mosesa, ngwendi asi yige ga va ninkisire va fe enota.—Num. 20:1-5, 9-11

²⁰ Eyi kwa handukisire Mosesa. Mevango lyokuuyungisa emanya ngwendi moomu ga mu tanterere Jehova, age kwa uyungisire vantu nehandu nokutanta asi ta rugana sitetu. Makura ta toona pemanya ruvali, ano ta mu tundu mema gomanzi. Elinenepeko nehandu kwa mu ninkisire a rugane epuko lyenene. (Epis. 106:32, 33) Morwa kudira kulinunupika posikando simwe tupu, Mosesa kapi va mu pulisilire a ze moSirongo sEtumbwidiro.—Num. 20:12.

²¹ Sihorokwa esi kuna kuturonga yirongwa yomulyo. Sokuhova, twa hepa kulinunupika nkenye apa. Nsene tu hageka kulinunupika, ayo ngayi tu ninkisa tu linenepeke pokuuyunga ndi kurugana yininke yougova. Sauvali, nsene tu kara nosinka unene ngayi tu karera udigu kulinunupika, yipo nye twa hepa kulinunupika nampili kuna kara moukaro woudigu.

22-23. (a) Morwasinke natu twikilira kulinunupika? (b) Yisinke adi likida nonkango da kara mwaSefaniya 2:3?

²² Ngatu gwana epopero. Ntaantani tupu Jehova nga ka zonagure po vadinikarunga, ano valinunupiki yiwo tupu ngava tunga po pevhu. Ano vantu navenye ngava ka kara mombili. (Epis. 37:10, 11) Nove ngo kara gumwe govantu owo wokulinunupika ndi? Nhi, nsene o kwama epukururo lyakara mwaSefaniya.—Resa Sefaniya 2:3.

²³ Morwasinke Sefaniya 2:3 azi uyungire asi: “Mpamwe ngomu yoworoka kefutiso?” Nonkango odo kapi adi tanta asi Jehova kapi ta vhuru kupopera vantu ava va hara kumuhafesa nava ga hara. Nye ado kulikida asi twa hepa kurugana ko yuma yipo Jehova a tu popere. Ose kuvhura kukapita “mezuva eli nga horora HOMPA ehandu lyendi” ntani nokukaparuka narunye nsene tu linunupika nokuhafesa Jehova.