1-2. (a) Moˉseˍ hkʼaˬ hkʼe ve chaw hpehꞈ ve le? Yawˇ aˬ htoꞈ ma te ve le? (b) Nyi ma nuˇ nehˬ ve chaw hpehꞈ tuˬ aˬ htoꞈ ma te ngaˬ hui te jawˬ gaˇ ve le?

 Liꞈ hpu hkʼaw kʼoˆ ve Moˉseˍ lehˬ “miˬ guiˬ hkʼoˆ chehˇ ve chaw hkʼa peu˗eˬ aꞈ kehˉ nyi ma nuˇ nehˬ jaˇ.” (Heh puiˉ hkʼaw 12:3) Moˉseˍ awˬ gʼaˇ maˇ cawˬ ve, dawˇ cheˆ maˇ puiˉ ve, shu mehˆ gʼuˇ suhˍ maˇ tawˍ daꞈ haˆ ve htaꞈ kʼoˆ gaˇ ve laˇ? Nyi ma nuˇ nehˬ ve chi hkʼe hpehꞈ ve tehꞈ chaw teˇ hpaˍ dawˇ ve yoˬ. Yaꞈ hkʼaˇ, chi awˬ tehˬ maˇ heˆ. Moˉseˍ awˬ gʼaˇ hehnˇ ve, yawˇ hkʼaˇ yawˇ dawˇ cheˆ gʼa ve, leh Gʼuiˬ sha ve kanˉ te shehˍ hpaˇ haꞈ hanˉ ve chaw hpehꞈ ve yoˬ. Yaˬhoˉvaˬ Moˉseˍ htaꞈ ga piˇ ve pa taw, yawˇ Eˇjiˇtuꞈ jawˇ mawˇ geh ca mawˬ daꞈ˗e gʼa ve yoˬ. Iˉsaˍreˍlaˆ chaw aˬ laˬ hkʼe 3,000,000 gʼaˇ shehˇ de mvuhˇ miˬ lo hpanˍ kʼai leh canˇ paˍ htaꞈ tawˍ daꞈ gʼaˇ tuˬ yawˇ shehˍ kʼai piˇ gʼa ve yoˬ.

² Moˉseˍ te jaw ve hkʼe ngaˬ hui maˇ gʼa te. Yaꞈ hkʼaˇ, teˇ nyi le le gʼa hpuˇ ve awˬ ceuˬ htaꞈ pa taw nyi ma nuˇ nehˬ ve chaw hpehꞈ tuˬ haˍ jaˇ. Ngaˬ hui te hkʼaˇ dawˇ hkʼaˇ chi hkʼe ve cawˬ tuˬ te jawˬ gaˇ ve yoˬ. Awˬ lawn kʼo, Yaˬhoˉvaˬ ka tiꞈ te taˍ laˇ ve “nyi ma nuˇ nehˬ ve chaw hui lehˬ mvuhˇ miˬ hkʼaw” gʼa chehˇ tuˬ yoˬ. (Chiˇ mvuh ve 37:11) Nawˬ nyi ma nuˇ nehˬ ve chaw hpehꞈ˗aw laˇ? Shu nawˬ htaꞈ hkʼaˬ hkʼe dawˇ ve le? A yeˇ uiˍ ve na hkawˇ chi ve teˇ hpaˍ maˇ hkʼawꞈ sheˍ htaˇ, nyi ma nuˇ nehˬ ve aˬ htoꞈ ma htaꞈ kʼoˆ gaˇ ve awˉ lawˉ shiˍ cawˇ ve yoˬ.

3-4. (a) Nyi ma nuˇ nehˬ ve aˬ htoꞈ ma htaꞈ tehˆ taˍ ve le? (b) Nyi ma nuˇ nehˬ ve cawˬ tuˬ, aˬ htoꞈ ma ve te hkʼaˇ dawˇ hkʼaˇ gʼa cawˬ ve le? Aˬ htoꞈ ma pa taw le?

³ Nyi ma nuˇ nehˬ ve lehˬ awˬ han shawehˇ ve daꞈ jaˇ ve htaꞈ shuˍ ve yoˬ. Chi hkʼaˬ hkʼe kʼoˆ gaˇ ve le? Awˬ han shawehˇ paˍ awˬ sheuˉ laiˉ ceuˬ htaꞈ yehˇ ve hkʼe, nyi ma nuˇ nehˬ ve chaw hpehꞈ tuˬ daꞈ ve te hkʼaˇ dawˇ hkʼaˇ gʼa cawˬ ve yoˬ. A yeˇ uiˍ ve teˇ hpaˍ lehˬ uˉ peunˍ ve  awˬ hawˉ lo chehˇ ve, ha kʼaˉ puiˉ ve, leh nyi ma yeˬ ve yoˬ. Ngaˬ hui Yaˬhoˉvaˬ nyi hkʼaˇ suh tuˬ te piˇ gaˇ ve kʼo, te hkʼaˇ dawˇ hkʼaˇ chi ve teˇ hpaˍ aˬ htoꞈ ma te gʼa cawˬ cawˇ ve le? *

⁴ Nyi ma nuˇ nehˬ ve chaw ceh tiˉ Gʼuiˬ sha ve a loˍ htaꞈ gʼaꞈ te ve yoˬ. Gʼuiˬ sha ve te hkʼaˇ dawˇ hkʼaˇ teˇ ceuˬ lehˬ ngaˬ hui ha kʼaˉ puiˉ ve chaw gʼa hpehꞈ ve yoˬ. (Maꞈhtehˍ 5:5; Gaˍlaˍtiˆ 5:23) Ngaˬ hui Gʼuiˬ sha ve a loˍ htaꞈ gʼaꞈ te htaˇ, Saˍtanˍ nyi ma zuhˆ jaˇ. Chi htaꞈ pa taw, ngaˬ hui nyi ma nuˇ nehˬ leh ha kʼaˉ puiˉ ve chaw hpehꞈ ve kʼo, Saˍtanˍ leh miˬ guiˬ yaˇ ngaˬ hui htaꞈ nyi ma zuhˆ jaˇ tuˬ yoˬ. (Yoˇhanˬ 15:18, 19) Saˍtanˍ htaꞈ tawˍ daꞈ gʼaˇ tuˬ ngaˬ hui nyi ma gʼa yeˬ ve yoˬ.

5-6. (a) Aˬ htoꞈ ma te Saˍtanˍ nyi ma nuˇ nehˬ ve chaw htaꞈ nyi bawˬ ve le? (b) Aˬ htoꞈ ma ve na hkawˇ htaꞈ hkʼawꞈ tuˬ le?

⁵ Nyi ma nuˇ nehˬ ve maˇ cawˬ ve chaw hkʼaˬ hkʼe hpehꞈ ve le? Yawˇ uiˍ muiˬ caˆ muiˬ ve, yawˇ ve nyi ma htaꞈ maˇ yuˬ tiˍ ve, leh Yaˬhoˉvaˬ hkawˇ maˇ na yuˬ. Chi ve hkʼa peu˗eˬ Saˍtanˍ ve te hkʼaˇ dawˇ hkʼaˇ hpehꞈ ve yoˬ. Saˍtanˍ yawˇ nyi ma nuˇ nehˬ ve chaw htaꞈ nyi bawˬ ve anˇ tuˬ maˇ loˍ! Saˍtanˍ ve te hkʼaˇ dawˇ hkʼaˇ hkʼaˬ hkʼe maˇ daꞈ ve, yawˇ heˍ shehˍ hpaˇ hpehꞈ ve, nyi ma nuˇ nehˬ ve chaw hkʼa tawˍ lehˆ hpeuꞈ maw laˇ ve yoˬ. Aˬ htoꞈ ma pa taw le? Saˍtanˍ kʼoˆ ve te ve Yaˬhoˉvaˬ ve chaw yawˇ ve kanˉ maˇ te tuˬ te piˇ maˇ gʼa!—Yawˇbaˆ 2:3-5.

⁶ Ngaˬ hui nyi ma nuˇ nehˬ ve cawˬ tuˬ haˍ jaˇ ve aˬ htoꞈ ma te laˇ ve le? Aˬ htoꞈ ma te ngaˬ hui gʼa coˇ caˇ ve le? Moˉseˍ, Baˍbuˍlonˍ mvuhˇ miˬ hkʼaw chehˇ ve Heˍbrehˇ chaw yaˇ nehˬ 3 gʼaˇ, Yeˍsuˆ leh chaw chi teˇ hpaˍ ve awˬ lawn htaꞈ hkʼawꞈ tuˬ yoˬ.

7-8. Moˉseˍ htaꞈ maˇ yawˆ yan piˇ htaˇ yawˇ hkʼaˬ hkʼe te ve le?

⁷ Ngaˬ hui kanˇ paˆ cawˬ htaˇ. Kanˇ paˆ cawˬ ve chaw nyi ma nuˇ nehˬ ve cawˬ tuˬ haˍ jaˇ. Aˬ htoꞈ ma pa taw le? Teˇ pawˆ pawˆ kanˇ paˆ cawˬ ve awˬ hawˉ lo chehˇ ve chaw lehˬ yawˇ htaꞈ maˇ yawˆ yan, maˇ heˆ leh yawˇ suhˉ jehˬ ve htaꞈ htawˇ dawˇ nawˬ dawˇ cawˬ ve yoˬ. Nawˬ chi hkʼe gʼa hpuˇ jaw˗aw laˇ? Nawˬ ve yehˬ kʼa hkʼaw ve chaw chi hkʼe hpehꞈ ve kʼo˗ehꞈ? Nawˬ hkʼaˬ hkʼe te tuˬ le? Moˉseˍ hkʼaˬ hkʼe te ve teˇ geh dawˇ nyi sheˍ.

 ⁸ Yaˬhoˉvaˬ Moˉseˍ Iˉsaˍreˍlaˆ chaw htaꞈ sheh kʼai tcuh leh yawˇ hui htaꞈ uˉ peunˍ tuˬ awˬ liˇ bvuhꞈ tcuh ve yoˬ. Moˉseˍ htaꞈ Yaˬhoˉvaˬ awˬ gʼaˇ piˇ ve ngaˬ hui htawˇ dawˇ nawˬ dawˇ cawˬ tuˬ maˇ loˍ. Yaꞈ hkʼaˇ, Moˉseˍ ve awˬ viˉ paˍ Aˍronˍ leh awˬ viˉ ma Meˇriˆanˍ Moˉseˍ htaꞈ daꞈ ve awˬ miˇ ma maˇ heuˆ tehꞈ kʼoˆ piˇ ve yoˬ. Chaw teˇ hpaˍ Moˉseˍ hkʼe aˉ yaˇ cawˬ ve kʼo, yawˇ nyi ma zuhˆ leh te hkʼawꞈ gaˇ tuˬ yoˬ hehˉ. Yaꞈ hkʼaˇ, yawˇ chi hkʼe maˇ dawˇ. Yawˇ nyi ma haˆ haˆ maˇ zuhˆ tcuh. Meˇriˆanˍ htaꞈ hkeu piˇ ve pa taw hkiˬ tuꞈ a naˍ keuˆ leh haꞈ shaˉ piˇ tuˬ, Moˉseˍ Yaˬhoˉvaˬ geh bon lawˬ ve yoˬ. (Heh puiˉ hkʼaw 12:1-13) Aˬ htoꞈ ma pa taw le?

9-10. (a) Moˉseˍ na gʼa tuˬ Yaˬhoˉvaˬ aˬ htoꞈ ma ga piˇ ve le? (b) Yehˬ shehˍ hpaˇ leh nyi haꞈ shaˉ paˍ Moˉseˍ ve awˬ lawn htaꞈ aˬ htoꞈ ma henˇ yuˬ gʼa ve le?

⁹ Moˉseˍ Yaˬhoˉvaˬ htaꞈ maˍ tcuh ve yoˬ. Peuˬ taˉ ve 40 hkʼawꞈ yawˇ Eˇjiˇtuꞈ ve hawˉ yehˬ hkʼaw chehˇ htaˇ yawˇ nyi ma maˇ nuˇ nehˬ. Awˬ tehˬ kʼo, yawˇ nyi ma zuhˆ puiˉ jaˇ. Teˇ pawˆ htaˇ, chaw teˇ gʼaˇ maˇ hteˇ maˇ cawˇ ve tehꞈ Moˉseˍ dawˇ leh yawˇ htaꞈ tiˇ pehˍ piˇ ve yoˬ. Yawˇ te ve htaꞈ Yaˬhoˉvaˬ dawˇ cawˇ ve tehꞈ yawˇ dawˇ ve yoˬ. Moˉseˍ na gʼa tuˬ Yaˬhoˉvaˬ awˬ yanˇ 40 hkʼawꞈ yehˇ ve yoˬ. Hkʼe te leh, Iˉsaˍreˍlaˆ chaw htaꞈ sheh kʼai tuˬ haꞈ hanˉ ve ceh maˇ lawꞈ. Nyi ma nuˇ nehˬ ve kaꞈ gʼa cawˬ ve yoˬ. Moˉseˍ kanˇ paˆ awˬ hawˉ lo gʼa chehˇ leh ha kʼaˉ puiˉ cawˇ ve yoˬ. Moˉseˍ hkʼa dehꞈ na yuˬ leh daꞈ jaˇ ve sheh kʼai paˍ hpehꞈ ve yoˬ.—Tawˆ kʼai ve 2:11, 12; Tcuh yaˇ 7:21-30, 36.

¹⁰ Chi beuꞈ teˇ co˗e yehˬ shehˍ hpaˇ leh nyi haꞈ shaˉ paˍ Moˉseˍ htaꞈ henˇ yuˬ cawˇ ve yoˬ. Nawˬ htaꞈ shu maˇ yawˆ yan laˇ htaˇ, nyi ma haˆ haˆ taˇ zuhˆ. Nyi ma nuˇ nehˬ te leh nawˬ te yaꞈ ve htaꞈ haꞈ yuˬ sheˍ. (Cuˇ yiˍ piˇ ve 7:9, 20) Yaˬhoˉvaˬ ve kanˇ paˆ awˬ hawˉ lo chehˇ leh shoꞈ shaꞈ ve awˬ lawn htaꞈ gu laˇ tuˬ beˆ maˍ laˇ ve htaꞈ haꞈ yuˬ sheˍ. Shu htaꞈ hkʼaˬ htaˆ kaꞈ nuˇ nehˬ ve hkʼaw hkʼawꞈ piˇ sheˍ. (Tawˇ naˉ ve 15:1) Yehˬ shehˍ hpaˇ leh nyi haꞈ shaˉ paˍ chi hkʼe te htaˇ Yaˬhoˉvaˬ nyi hkʼaˇ suh tuˬ te piˇ leh, dawˇ sha gawˬ lehˍ ve cawˬ leh, nyi ma nuˇ nehˬ ve daꞈ ve henˇ yuˬ tuˬ hpehꞈ ve yoˬ.

11-13. Heˍbrehˇ chaw 3 gʼaˇ ngaˬ hui henˇ tuˬ aˬ htoꞈ ma te maˍ laˇ ve le?

¹¹ Fawˉ mehˍ ve gʼa hpuˇ htaˇ: Peuˬ laˬ ve awˬ yanˇ uˉ peunˍ shehˍ hpaˇ chaw yaˇ lehˬ Gʼuiˬ sha ve chaw htaꞈ fawˉ mehˍ ve yoˬ. Ngaˬ hui laiˉ ceuˬ te yaꞈ ve tehꞈ yawˇ hui kʼoˆ laˇ ve yoˬ. Awˬ tehˬ kʼo, “chaw yaˇ ve tawˇ hkawˇ aꞈ kehˉ Gʼuiˬ sha ve tawˇ hkawˇ htaꞈ ngaˬ hui gʼa na yuˬ ve yoˬ.” (Tcuh yaˇ 5:29) Ngaˬ hui htaꞈ kʼoˆ guiˇ gʼuiˬ guiˇ laˇ ve, htawnˍ hkʼaw lo gʼa chehˇ ve, maˇ heˆ leh awˬ to htaꞈ naˬ tuˬ te laˇ ve yoˬ hehˉ. Yaꞈ hkʼaˇ, Yaˬhoˉvaˬ ga laˇ ve pa taw, fawˉ mehˍ ve gʼa hpuˇ htaˇ, ngaˬ hui nyi ma gawˬ lehˍ cawˬ leh maˇ te hkʼawꞈ ve yoˬ.

¹² Heˍbrehˇ chaw yaˇ nehˬ 3 gʼaˇ Shaˆdraˆ,  Meˍshehˆ, leh Aˍbeˍdaˍneˍgoˍ htaꞈ dawˇ nyi sheˍ. * Baˍbuˍlonˍ jawˇ mawˇ yawˇ hui shi shaˉ hoꞈ lonˉ htaꞈ oˉ kʼoˍ pui tcuh ve yoˬ. Yawˇ hui aˬ htoꞈ ma te oˉ kʼoˍ maˇ pui ve, nyi ma nuˇ nehˬ ve hkʼaw kʼoˆ piˇ ve yoˬ. Aˬ miˍ buiˬ hpfuh hkʼaw lo baˬ keu tuˬ yoˬ tehꞈ jawˇ mawˇ kawˆ ho piˇ ve htawˇ, yawˇ hui Yaˬhoˉvaˬ hkawˇ na yuˬ ve yoˬ. Yaˬhoˉvaˬ laꞈ haˉ ga piˇ ve yoˬ. Yawˇ chi hkʼe te tuˬ yawˇ hui maˇ dawˇ law. Awˬ tehˬ kʼo, yawˇ hkʼaˬ hkʼe hpehꞈ la tcuh ve htawˇ, yawˇ hui haꞈ yuˬ ve yoˬ. (Daˍyeˍlaˆ 3:1, 8-28) Nyi ma nuˇ nehˬ ve chaw haꞈ hanˉ jaˇ ve tehꞈ yawˇ hui hpeuꞈ maw piˇ ve yoˬ. Ngaˬ hui ‘Yaˬhoˉvaˬ teˇ gʼaˇ htaꞈ ceh tiˉ oˉ kʼoˍ pui ve’ dawˇ teh taˍ ve htaꞈ jawˇ mawˇ, kawˆ ho ve, leh fawˉ mehˍ ve teˇ hpaˍ te luˬ laˇ maˇ gʼa.—Tawˆ kʼai ve 20:4, 5.

¹³ Ngaˬ hui Gʼuiˬ sha htaꞈ ka tiꞈ yeˬ ve lawˇ nyi laˇ htaˇ, yaˇ nehˬ 3 gʼaˇ htaꞈ hkʼaˬ hkʼe te henˇ yuˬ gʼa tuˬ le? Ngaˬ hui nyi ma nuˇ nehˬ leh Yaˬhoˉvaˬ ga laˇ tuˬ yoˬ tehꞈ yonˍ ve yoˬ. (Chiˇ mvuh ve 118:6, 7) Ngaˬ hui yaꞈ ve tehꞈ shu kʼoˆ laˇ htaˇ, nyi ma nuˇ nehˬ ve hkʼaw yaw hkʼawꞈ piˇ ve yoˬ. (1 Peˍtruˆ 3:15) Chi hkʼoˆ kaꞈ, ngaˬ hui ve Awˬ pa geh meuˆ daꞈ ve htaꞈ teˇ gʼaˇ˗ehˬ kaꞈ maˇ te luˬ laˇ tcuh.

14-15. (a) Ngaˬ hui dawˇ haˍ dawˇ hkiˉ htaˇ aˬ htoꞈ ma hpehꞈ la gʼa ve le? (b) Iˉsaˍyaˆ liꞈ 53:7, 10 hkʼaw kʼoˆ taˍ ve hkʼe, Yeˍsuˆ dawˇ haˍ dawˇ hkiˉ ve gʼa hpuˇ htaˇ kaꞈ nyi ma nuˇ nehˬ jaˇ ve tehꞈ aˬ htoꞈ ma te ngaˬ hui kʼoˆ gʼa ve le?

¹⁴ Dawˇ haˍ dawˇ hkiˉ htaˇ. Teˇ gʼaˇ leh teˇ gʼaˇ dawˇ haˍ ve maˇ shuˍ daꞈ. Liꞈ henˇ yehˬ lo liꞈ maˇ na sheˍ htaˇ, kanˉ teˇ ceuˬ ceuˬ maˇ te sheˍ htaˇ, maˇ heˆ leh chehˇ sha cawˬ sha hpawˇ gʼa nyi haꞈ shaˉ htaˇ, ngaˬ hui dawˇ haˍ dawˇ hkiˉ ve yoˬ. Ngaˬ hui dawˇ haˍ dawˇ hkiˉ htaˇ, nyi ma nuˇ nehˬ tuˬ maˇ sha. A hkʼe leˇ ve awˬ lawn htawˇ, shoꞈ shaꞈ tuˬ te laˇ gʼa ve yoˬ. Ngaˬ hui maˇ daꞈ ve tawˇ yaw la ve yoˬ. Nawˬ dawˇ haˍ dawˇ hkiˉ htaˇ, Yeˍsuˆ htaꞈ dawˇ nyi sheˍ.

¹⁵ Yeˍsuˆ miˬ guiˬ hkʼoˆ chehˇ ve hkʼaˬ nyiˇ ha pa maˇ cawˬ˗o htaˇ, yawˇ dawˇ haˍ dawˇ hkiˉ jaˇ. Yawˇ htaꞈ tuꞈ hkanˍ jaˇ ve hkʼaw tiˇ pehˍ laˇ tuˬ yawˇ shiˍ ve yoˬ. (Yoˇhanˬ 3:14, 15; Gaˍlaˍtiˆ 3:13) Yawˇ suh˗e tuˬ ve hkʼaˬ nyiˇ ha pa maˇ cawˬ˗o htaˇ, yawˇ tuꞈ hkanˍ jaˇ. (Luˉkaꞈ 12:50) Yawˇ suh˗e tuˬ ve hkʼaˬ nyiˇ nyi maˇ cawˬ˗o htaˇ yawˇ kʼoˆ ve, “ngaˬ nyi ma dawˇ haˍ jaˇ.” Yeˍsuˆ bon lawˬ ve hkʼaw dawˇ haˍ ve hkʼa peu˗eˬ Yaˬhoˉvaˬ htaꞈ hto piˇ ve pa taw, yawˇ nyi ma nuˇ nehˬ leh Gʼuiˬ sha ve kanˇ paˆ awˬ hawˉ lo chehˇ ve tehꞈ ngaˬ hui hkʼa tawˍ lehˆ gʼa mawˬ ve yoˬ. Yeˍsuˆ kʼoˆ ve, “A pa˗oˬ, awˬ yanˇ chi awˬ hkʼaw lo ngaˬ htaꞈ htaiˍ hkʼawꞈ laˇ˗oˆ tehꞈ gʼa kʼoˆ tuˬ laˇ. Maˇ heˆ, awˬ lawn kʼo awˬ yanˇ chi awˬ pon ngaˬ gaˬ la peuˬ. A pa˗oˬ, nawˬ ve awˬ meh htaꞈ awˬ meꞈ awˬ hponˇ tawˆ la piˇ˗oˆ.” (Yoˇhanˬ 12:27, 28) Awˬ yanˇ gaˬ la htaˇ, Yeˍsuˆ haꞈ hanˉ ve hkʼaw canˇ paˍ htaꞈ awˬ to aꞈ piˇ ve yoˬ. Yawˇ hui tuꞈ hkanˍ leh yaꞈ taw jaˇ ve hkʼaw tiˇ pehˍ piˇ ve yoˬ. Tuꞈ jaˇ hkanˍ jaˇ leh dawˇ haˍ jaˇ ve htawˇ, yawˇ nyi ma nuˇ nehˬ ve hkʼaw Gʼuiˬ sha ve a loˍ htaꞈ gʼaꞈ te ve yoˬ. Yeˍsuˆ dawˇ haˍ htaˇ kaꞈ nyi ma nuˇ nehˬ ve daꞈ ve henˇ yuˬ tuˬ hpehꞈ ve tehꞈ ngaˬ hui kʼoˆ gʼa ve yoˬ!—Iˉsaˍyaˆ 53:7, 10 gʼaw sheˍ.

16-17. (a) Yeˍsuˆ ve awˬ chawˇ meuˆ daꞈ jaˇ ve yawˇ htaꞈ hkʼaˬ hkʼe lawˇ nyi piˇ ve le? (b) Ngaˬ hui hkʼaˬ hkʼe te Yeˍsuˆ htaꞈ henˇ yuˬ gʼa tuˬ le?

¹⁶ Yeˍsuˆ miˬ guiˬ hkʼoˆ chehˇ ve awˬ leh meuˇ teˇ haˉ htaˇ, meuˆ daꞈ jaˇ ve awˬ chawˇ yawˇ htaꞈ lawˇ nyi piˇ ve yoˬ. Yeˍsuˆ hkʼaˬ hkʼe taw dawˇ haˍ ve htaꞈ dawˇ nyi sheˍ. Yawˇ awˬ leh meuˇ hkʼa gaˬ ka tiꞈ yeˬ gʼa˗aw laˇ? Chi ve chaw laiˉ lanˬ gʼaˇ htaꞈ heuˆ la kuiˬ cawˬ ve yoˬ. (Roˉmaꞈ 5:18, 19) Yawˇ ve Awˬ pa ve awˬ meh htaꞈ kaꞈ caˉ daꞈ ve yoˬ. (Yawˇbaˆ 2:4) Peuˬ hkʼawꞈ nawˉ, yawˇ ve awˬ chawˇ meuˆ daꞈ jaˇ ve geh awˬ leh meuˇ teˇ pawˆ awˍ caˇ chehˇ htaˇ, “yawˇ  hui awˬ hkʼaw lo hkʼaˬ ve teˇ gʼaˇ shu aꞈ kehˉ gʼa uiˍ tuˬ le tehꞈ, teˇ gʼaˇ leh teˇ gʼaˇ gʼawˬ daꞈ ve yoˬ.” Awˬ lawn chi hkʼe ve Yeˍsuˆ yawˇ hui ve dawˇ hkʼaˇ htaꞈ laiˉ pawˆ gu piˇ˗oˬ. Oˇ ve teˇ haˉ hkʼaw ceh kaꞈ gu piˇ! Yaꞈ hkʼaˇ, yawˇ nyi ma maˇ zuhˆ leh nyi ma nuˇ nehˬ ve hkʼaw hkʼawꞈ piˇ ve yoˬ. Awˬ tehˬ ha kʼaˉ ve dawˇ hkʼaˇ yawˇ hui cawˬ cawˇ ve Yeˍsuˆ teˇ pawˆ kʼawꞈ kʼoˆ maˍ piˇ ve yoˬ. Yawˇ ve awˬ chawˇ ka tiꞈ yeˬ leh yawˇ hpawˇ chehˇ ve htaꞈ pa taw, chiˇ mvuh piˇ ve yoˬ.—Luˉkaꞈ 22:24-28; Yoˇhanˬ 13:1-5, 12-15.

¹⁷ Nawˬ chi hkʼe gʼa hpuˇ htaˇ hkʼaˬ hkʼe te tuˬ le? Dawˇ haˍ dawˇ hkiˉ htaˇ, Yeˍsuˆ htaꞈ henˇ yuˬ leh nyi ma maˇ zuhˆ tuˬ coˇ caˇ sheˍ. Ngaˬ hui Yaˬhoˉvaˬ uˉ peunˍ ve awˬ hawˉ lo chehˇ leh “teˇ gʼaˇ leh teˇ gʼaˇ yeunˇ hkanˍ daꞈ˗oꞈ” tehꞈ yawˇ kʼoˆ ve htaꞈ na yuˬ sheˍ. (Kawˇlawˇsehˇ 3:13) Ngaˬ hui kʼoˆ ve leh te ve shu nyi ma zuhˆ tuˬ te piˇ gʼa ve tehꞈ tawnˇ taˍ ve kʼo, tawˇ hkawˇ oˇ ve na yuˬ gʼa ve yoˬ. (Tawˇ naˉ ve 12:18; Yaˍkoˆ 3:2, 5) Shu daꞈ ve awˬ ceuˬ htaꞈ kaꞈ kʼoˆ sheˍ.—Eˇfeˇsuꞈ 4:29.

18. Yaˬhoˉvaˬ nyi ma nuˇ nehˬ ve chaw hkʼa dehꞈ dawˇ cheˆ gʼa tuˬ hkʼaˬ hkʼe ga piˇ ve le? Ngaˬ hui coˇ caˇ leh aˬ htoꞈ ma gʼa te cawˇ ve le?

¹⁸ Ngaˬ hui hkʼa dehꞈ dawˇ cheˆ gʼa ve. Haˍ jaˇ ve awˬ ceuˬ gʼa hpuˇ htaˇ, ngaˬ hui hkʼa dehꞈ dawˇ cheˆ gʼa tuˬ Yaˬhoˉvaˬ ga laˇ ve yoˬ. Yaꞈ hkʼaˇ, ngaˬ hui nyi ma gʼa nuˇ nehˬ ve yoˬ. Yawˇ ka tiꞈ te laˇ ve, “nyi ma nuˇ nuˇ nehˬ nehˬ cawˬ ve chaw hui ve bon lawˬ hkawˇ htaꞈ na yuˬ” tuˬ yoˬ. (Chiˇ mvuh ve 10:17) Yawˇ na ve ceh maˇ te. Liꞈ hpu hkʼaw ka tiꞈ te laˇ ve,“nyi ma nuˇ nehˬ cawˬ ve chaw hui htaꞈ cawˇ ve yaꞈ kʼaw hkʼaw yawˇ shiˍ kʼai piˇ leh, yawˇ ve dawˇ hkʼaˇ yawˇ hui htaꞈ maˍ piˇ ve yoˬ.” (Chiˇ mvuh ve 25:9) Yaˬhoˉvaˬ Liꞈ hpu, kanˉ hkʼaˇ hkʼaw ve liꞈ kʼoˆ, * leh “ka tiꞈ yeˬ leh cuˇ yiˍ cawˬ ve awˬ ceˬ” geh laˬ ve teˇ hpaˍ cuˇ leh beˆ maˍ laˇ ve yoˬ. (Maꞈhtehˍ 24:45-47) Ngaˬ hui ve awˬ vuiˬ ngaˬ hui gʼa te ve yoˬ. Ngaˬ hui ga laˇ tuˬ loˍ ve tehꞈ nyi ma nuˇ nehˬ ve hkʼaw haꞈ yuˬ ve, Yaˬhoˉvaˬ gu taˍ laˇ ve htaꞈ henˇ leh gʼaꞈ te cawˇ ve yoˬ.

19-21. Moˉseˍ Kaˍdeˍshaˆ venˇ lo aˬ htoꞈ ma te yaꞈ ve le? Awˬ lawn chi ngaˬ hui htaꞈ aˬ htoꞈ ma maˍ laˇ ve le?

¹⁹ Te yaꞈ ve htaꞈ ngaˬ hui jaw hpaw˗e gʼa ve. Moˉseˍ htaꞈ teˇ pawˆ kʼawꞈ dawˇ nyi sheˍ. Laiˉ chi hkʼawꞈ yawˇ nyi ma nuˇ nehˬ leh Yaˬhoˉvaˬ nyi hkʼaˇ suh tuˬ te piˇ ve yoˬ. Heh puiˉ hkʼaw lo 40 hkʼawꞈ te toˇ ve awˬ leh meuˇ htaˇ, Moˉseˍ nyi ma maˇ nuˇ nehˬ. Moˉseˍ awˬ viˉ ma Eˇjiˇtuꞈ mvuhˇ miˬ hkʼaw yawˇ htaꞈ ga piˇ jaw ve suh˗e leh Kaˍdeˍshaˆ venˇ  lo tuˍ taˉ ve yoˬ. Iˉsaˍreˍlaˆ chaw keunˍ lawꞈ cawˇ lawꞈ ve hkʼaw nyi haꞈ shaˉ laˇ tuˬ teˇ pawˆ kʼawꞈ lawˬ piˇ ve yoˬ. Yawˇ hui iˉ kaˆ maˇ cawˬ kʼoˆ leh Moˉseˍ geh hkʼanˇ maˍ piˇ ve yoˬ. Yaˬhoˉvaˬ Moˉseˍ htaꞈ cuˇ leh anˇ tuˬ laiˉ ceuˬ te tcuh ve, Moˉseˍ yawˇ awˬ to pon maˇ dawˇ nyi leh daꞈ ve sheh kʼai shehˍ hpaˇ hkʼaˬ htaˆ kaꞈ hpehꞈ ve htawˇ, yawˇ hui hkʼanˇ maˍ piˇ sheˍ ve yoˬ. Iˉ kaˆ maˇ cawˬ ve htaꞈ ceh hkʼanˇ ve maˇ heˆ. Yawˇ hui iˉ kaˆ maˇ gʼa dawˬ ve chi Moˉseˍ htaꞈ pa taw yoˬ tehꞈ kʼoˆ leh hkʼanˇ maˍ piˇ ve yoˬ.—Heh puiˉ hkʼaw 20:1-5, 9-11.

²⁰ Moˉseˍ nyi ma zuhˆ leh maˇ ha kʼaˉ puiˉ. Yonˍ ve hkʼaw haˉ hpawˇ htaꞈ tawˇ yaw piˇ cawˇ ve htawˇ, yawˇ chaw yaˇ htaꞈ nyi ma zuhˆ ve hkʼaw tawˇ yaw piˇ leh yawˇ awˬ to htaꞈ chiˇ mvuh ve yoˬ. Yawˇ haˉ hpawˇ htaꞈ 2 pawˆ dawˆ leh iˉ kaˆ maˇ maˇ tawˆ la ve yoˬ. Uiˍ muiˬ caˆ muiˬ ve leh nyi ma zuhˆ ve htaꞈ pa taw, yawˇ venˇ baˆ uiˍ ve htaꞈ te ve yoˬ. (Chiˇ mvuh ve 106:32, 33) Moˉseˍ teˇ tcuhˉ teˇ yanˇ nyi ma maˇ nuˇ nehˬ ve pa taw, ka tiꞈ te taˍ ve mvuhˇ miˬ hkʼaw maˇ gʼa loꞈ˗e.—Heh puiˉ hkʼaw 20:12.

²¹ Ngaˬ hui awˬ hpfuhˇ hkʼaˆ jaˇ ve htaꞈ gʼa henˇ ve yoˬ. (1) Nyi ma nuˇ nehˬ ve chaw hpehꞈ tuˬ gʼa coˇ caˇ jaˇ. Teˇ hkui tiˉ a yeˇ maˇ te ve kʼo, uiˍ muiˬ caˆ muiˬ leh cuˇ yiˍ maˇ cawˬ ve hkʼaw kʼoˆ leh te la ve yoˬ. (2) Dawˇ haˍ dawˇ hkiˉ ve ngaˬ hui awˬ gʼa nuˇ tuˬ te laˇ gʼa ve yoˬ. Chi htaꞈ pa taw, shu nyiˉ laˇ ve htawˇ, nyi ma nuˇ nehˬ tuˬ coˇ caˇ sheˍ.

22-23. (a) Aˬ htoꞈ ma te nyi ma nuˇ nehˬ ve chaw hpehꞈ tuˬ ngaˬ hui gʼa coˇ caˇ cawˇ ve le? (b) Zeˍhpaˍniˆ liꞈ 2:3 hkʼaw hkʼaˬ hkʼe kʼoˆ gaˇ ve le?

²² Ngaˬ hui haꞈ shaˉ laˇ ve htaꞈ gʼa ve. Maˇ maw kʼo Yaˬhoˉvaˬ haiˬ jaˇ ve hkʼa peu˗eˬ htaꞈ te luˬ leh nyi ma nuˇ nehˬ ve chaw ceh leuˉ taˉ tuˬ yoˬ. Miˬ guiˬ hkʼoˆ awˬ tehˬ dawˇ sha gawˬ lehˍ ve tiˉ cawˬ tuˬ yoˬ. (Chiˇ mvuh ve 37:10, 11) Nawˬ kaꞈ teˇ gʼaˇ nyi ma nuˇ nehˬ ve chaw hpehꞈ˗aw laˇ? Yaˬhoˉvaˬ tcuh kaˍ paˍ Zeˍhpaˍniˆ htaꞈ cuˇ leh kʼoˆ tcuh taˍ ve nawˬ na yuˬ ve kʼo, hpehꞈ gʼa tuˬ yoˬ.—Zeˍhpaˍniˆ 2:3 gʼaw sheˍ.

²³ Aˬ htoꞈ ma te Zeˍhpaˍniˆ liꞈ 2:3 hkʼaw kʼoˆ ve, “Gʼuiˬ sha nyi ma zuhˆ ve awˬ nyi gaˬ la htaˇ, yawˇ nawˬ hui htaꞈ ponˬ laˇ tuˬ naˍ, maˇ shiˍ.” Yaˬhoˉvaˬ htaꞈ haꞈ ve chaw hui yawˇ ponˬ piˇ maˇ gʼa ve tehꞈ kʼoˆ gaˇ ve maˇ heˆ. Yaꞈ hkʼaˇ, daꞈ ve awˬ bon htaꞈ gʼa tuˬ ngaˬ hui ve awˬ vuiˬ gʼa te ve tehꞈ kʼoˆ gaˇ ve yoˬ. “Gʼuiˬ sha nyi ma zuhˆ ve awˬ nyi gaˬ la htaˇ” ngaˬ hui ponˬ tuˬ a hkaw˗anˬ cawˬ leh co co taiˍ taiˍ ve a shaꞈ gʼa tuˬ yoˬ. Yaꞈ hkʼaˇ, ngaˬ hui chi teˇ hkui kaꞈ nyi ma nuˇ nehˬ ve chaw hpehꞈ tuˬ coˇ caˇ leh Yaˬhoˉvaˬ nyi hkʼaˇ suh tuˬ te cawˇ ve yoˬ.