1-2. (a) Baibul ese Mose be ede e herevalaia toma, bona ia be dahaka e kara? (b) Manau karana baita hahedinaraia badina be dahaka?

BAIBUL ese Mose na ini e herevalaia toma: “Tanobada taudia iboudiai bogaraḡidiai ia mo sibona manau herea.” (Num. 12:3) Una anina be ia be asi goadana, asi dibana dahaka baine kara, bona asie matauraiava neganai e gariva, a? Reana haida ese manau tauna na unu be gwauraia tomamu. To una na dia momokani. Mose na Dirava ena hesiai tauna goadana ta, mai dibana dahaka baine kara, bona se gariva. Iehova ese e durua dainai, Aigupto pavapavana e hereva henia, taunimanima 3,000,000 heḡereḡerena na tano ḡaḡaena ai e gunalaidia, bona Israel besena e durudia inaidia bae hadareredia.

² Mose e davari hekwakwanaidia na asita davarimu, to dina ta ta ai taunimanima edia kara o hereva ese eda manau karana bae tohoa diba. To una kara baita hahedinaraia badina namona ta na mia. Iehova na e gwauhamata “manau taudia ese tano bae abia.” (Sal. 37:11) Sibomu bo hegwauraimu, oi na lalomanau tauna ta, a? Haida ese oi be unu e gwauraimu tomamu, a? Unu henanadai do asita haerelai lalonai, namona na lalomanau anina baita dibaia.

3-4. (a) Lalomanau be dahaka ida baita haheḡereḡerea? (b) Baita lalomanau totona ededia kara 4 baita hahedinarai, bona dahaka dainai?

³ Lalomanau * na laulau (painting) mai hairaina ta na heto. Edena dala ai? Laulau e penimu tauna na kala idauidau e haboumu bena laulau mai hairaina ta e peniamu, una heḡereḡerena  baita lalomanau totona, namona na kara namodia ma haida baita hahedinarai. Unu kara namodia haida na, manau, Dirava ibadinana karana, manada, bona lalogoada. Dahaka dainai unu kara namodia baita hahedinarai bema ta uramu Iehova baita hamoalea?

⁴ Manau taudia sibodia mo Dirava ena ura e badinamu. Dirava ena ura ta na manada karana baita hahedinaraia. (Mat. 5:5; Gal. 5:23) Dirava ena ura ta badinaiamu neganai, Satana na e badu dikadikamu. Una dainai ena be ta manaumu, to Satana e badinaiamu taudia momo ese ita na e inai henidamu. (Ioa. 15:18, 19) Una dainai, Satana baita dadaraia totona namona na baita lalogoada.

5-6. (a) Dahaka dainai Satana ese manau taudia e inai henidiamu? (b) Ededia henanadai baita herevalaimu?

⁵ Se lalomanaumu tauna na e hekokorokumu, e badu haraḡamu, bona Iehova se badinaiamu. Unu na Satana ena kara. Una dainai ia ese manau taudia na e inai henidiamu! Badina idia ese kara namodia amo e hahedinaraiamu ia na tau dikana. Bona edia kara amo e hamomokaniamu Satana na koikoi tauna. Dahaka dainai? Herevana Satana na dahaka baine gwaurai eiava dahaka baine kara, to manau taudia na basine koudia dibamu Iehova bae hesiai henia totona!​—Iob. 2:3-5.

⁶ Dahaka dainai nega haida baita lalomanau na auka? Dahaka dainai hanaihanai baita lalomanau? Unu henanadai baita haerelai totona, Mose, Babulono ai e nohova Heberu memerodia tatoi, bona Iesu baita herevalaidia.

7-8. Haida ese Mose asie matauraia neganai, ia be dahaka e kara?

⁷ Dagi ta abimu neganai. Nega haida mai edia dagi taudia bae lalomanau na auka bema edia heitatao henunai e nohomu tauna ta ese se matauraidiamu, eiava e gwaumu edia abi hidi na kerere. Nega ta oiemu ai una de vara? Bema emu ruma bese tauna ta ese unu baine karamu toma, dahaka bo karamu? Mani Mose enai e vara ḡauna aita herevalaia.

⁸ Iehova ese Mose e abia hidi Israel baine gunalaidia bona bae badina taravatudia  baine toredia. Ta dibamu Iehova ese Mose na e durua. Mose na taihuna Miriama bona kakana Aaron ese e gwauraia dika bona e adavaia hahinena dainai e maumauraia. Tatau haida ediai una na bema badulaia bona edia kara davadia bema halou, to Mose na unu se kara toma. Ia na se badu. To Iehova hari e noia Miriama ena lepra gorerena baine kokia. (Num. 12:1-13) Mose be dahaka dainai unu e kara toma?

9-10. (a) Iehova ese Mose e durua dahaka baine lalopararalaia? (b) Ruma bese kwaradia bona elda taudia na Mose amo dahaka e dibamu?

⁹ Mose na e laloparara Iehova ese baine hadibaia na namo. Laḡani 40 gunadiai, Mose do Aigupto lohiana natuna ta neganai, ia na se manau. Tau ta ena kerere e itaia neganai, e badu haraḡa bona una tau e hamasea. Mose na e laloava ia ese e karaia karana na Iehova ese be abia daemu. Iehova na laḡani 40 lalodiai Mose e durua unu amo baine laloparara Israel besena baine gunalaia totona baine lalogoada bona baine lalomanau na ḡau badana. Danu namona na baine manau, Dirava baine badinaia, bona baine manada. Unu e kara toma dainai, ia na hegunalai tauna namona ai ela.​—Eso. 2:11, 12; Apos. 7:21-30, 36.

¹⁰ Hari, namona na ruma bese kwaradia bona elda taudia ese Mose bae tohotohoa. Haida ese se matauraimuimu neganai, basio badu haraḡa. Ba manau bona emu kerere ba gwaurai hedinarai. (Koh. 7:9, 20) Hekwakwanai ihamaoromaorodiai Iehova ena hahekau daladia ba badina. Bona nega iboudiai mai manaumu ida ba haere. (Her. 15:1) Ruma bese kwaradia bona elda taudia na unu e kara tomamu neganai Iehova e hamoalemu, maino e havaraiamu, bona manau karana ai haheitalai namona e hahedinaraiamu.

11-13. Heberu memero tatoi amo dahaka ta dibamu?

¹¹ E hahisidamu neganai. Idaunega amo ema bona hari, lohia haida na Iehova ena taunimanima e hahisidiamu. E gwaumu ita na “kerere” ta karamu, to e badu henidamu badina korikorina na, ita ese ina sisiba ta badinaiamu: “Dirava ikamonai-henina be namo; taunimanima ikamonai-henidia be dika.” (Apos. 5:29) Reana bae kirikirilaida, bae hadiburada, eiava bae dadabada. To, Iehova ena heduru dainai edia dika davadia na basita haloumu, a unu hahetoho lalodiai dounu baita manau.

¹² Heberu memero tatoiosi​—⁠Hanania, Misael, bona Asaria​—mani aita lalodia. *  Babulono pavapavana ese e haduadia golo kaivakukuna bae toma henia diho. Idia na mai hematauraidia ida king enai una kaivakuku basie toma henia diho badina e herevalaia. Idia ese Dirava e badinaia ena be king ese e hagaridia eto lahi lalonai baine tahodia vareai. Iehova ese maoromaoro e hamauridia; idia na se lalo Dirava na idia daidiai unu baine kara toma. To, mai edia ura ida Iehova ese baine karaia ḡauna na e abia dae. (Dan. 3:1, 8-28) Edia kara ese e hamomokania, manau taudia na se garimu. Ena be king ese bae dorida Iehova basita badinaia, haida ese bae hagarida, eiava bae hahisida, to una ese na basine kouda Iehova sibona baita tomadiho henia totona.​—Eso. 20:4, 5.

¹³ Dirava ibadinana karana ai hahetoho ta davarimu neganai, edena dala ai Heberu memerodia tatoi baita tohotohodia? Baita manau bona baita abia dae Iehova ese ita na be naridamu. (Sal. 118:6, 7) E habadelaidamu taudia na mai manauda bona hematauraida ida baita haere henidia. (1 Pet. 3:15) Bona asita uramu baita karaia karana ta ese eda hetura karana Tamada lalokauna ida baine hadikaia.

14-15. (a) Ta lalohekwarahimu neganai dahaka baine vara diba? (b) Isaia 53:7, 10 ena hereva heḡereḡerena, dahaka dainai baita gwaumu Iesu na haheitalai hereadaena?

¹⁴ Ta lalohekwarahimu neganai. Ita iboudai na ḡau idauidau daidiai ta lalohekwarahimu. Reana sikuli ai test ta do asita karaia eiava ḡaukara gabunai ḡaukara ta ta karaiamu neganai ta lalohekwarahimu. Eiava e goreredamu neganai, reana baita abi medikol hedurudia ta lalohekwarahilaimu. Nega unu bamodiai baita lalomanau na mai hekwarahina. Reana guna asita badulaiva ḡaudia na baita badulaimu. Baita hereva aukamu eiava haida baita kara auka henidiamu. Bema o lalohekwarahimu, namona na Iesu ena haheitalai ba laloa.

¹⁵ Tanobada ai ena mauri ginigabedia lalodiai, Iesu lalona na e hekwarahi bada herea. Dibana ia na au ai bae taua dae bona bae hahisia. (Ioa. 3:14, 15; Gal. 3:13) Iesu do se mase neganai, sibona eto ia na e lalometau bada herea. (Luk. 12:50, NW) Bena bae hamasea dinadia e kahikahiva ai, Iesu eto, “Kudougu eme hetaha.” Ena ḡuriḡuri ai e gwaurai herevadia amo ta dibamu ia na manau tauna bona Dirava e badinaia. Eto, “‘Tamagu e, ina hora amo ame hamaurigu’? Lasi; badina bina hari ina hora ai vada name kau. Tamagu e, ladamu a heatolaia.” (Ioa. 12:27, 27) Bae hamasea dinana e kau neganai, sibona e heni Dirava e inai heniamu taudia ediai, bena idia ese e hahisia bona e hahemaraia bada. Herevana lalona e hekwarahi bada herea bona hisihisi bada e ani, to mai manauna ida Dirava ena ura e karaia. Baita gwau dibamu, Iesu na haheitalai hereana ita edai, ena be e lalohekwarahi to manau karana e hahedinaraia!​—Isaia 53:7, 10 ba duahi.

16-17. (a) Iesu turana be dahaka e kara bona una ese ena manau karana e tohoa? (b) Iesu be ede baita tohotohoa toma?

¹⁶ Iesu na ena hanuaboi ginigabena ai, turana namodia edia kara ese ena lalomanau karana e tohoa. Una hanuaboi ai ena lalohekwarani mani a laloa. Ia be Dirava be badinaiamu ela bona ena mase eiava? Bema Dirava basinema badinaia, ita na basitama mauri diba. (Rom. 5:18, 19) Bona mai anina bada ḡauna na, iena kara ese Tamana ladana baine hanamoa eiava baine hadikaia diba. (Iob. 2:4) Bena edia aniani hebou orena ai, aposetolo taudia na sibodia padadiai “e hepapahuahu” daika be herea. Nega momo una hepapahuahu dainai  Iesu ese e sisiba henidiava, bona una hanuaboina danu ma e sisiba henidia. Iesu na se badu, to mai manauna ida e durudia. Mai lalo goadana ida e hadibadia lou bae manau na namo. Bena e hanamodia badina be idia ese ia na se rakatania.​—Luk. 22:24-28; Ioa. 13:1-5, 12-15.

¹⁷ Bema Iesu enai e vara ḡauna na emu ai bema vara, dahaka boma kara? Haida ese laloda e hahisimu neganai, Iesu baita tohotohoa bona baita manau. Mai eda ura ida Iehova ena haheḡani baita badinaia, eto, “Ba haheauka heheni.” (Kol. 3:13) Una hahegani na baita badinaiamu, bema baita helalotaomu, ita danu nega haida eda hereva eiava kara amo haida ta hahisidiamu. (Her. 12:18; Iak. 3:2, 5) Bona haida edia kara namodia o itamu neganai ba hanamodia.​—Efe. 4:29.

18. Iehova ese manau taudia be ede e durudia tomamu abi hidi maorodia bae kara, to idia be dahaka bae kara na namo?

¹⁸ Abi hidi maorodia baita karamu. Abi hidi ikaradiai ta daradaramu neganai, Iehova ese be durudamu abi hidi maorodia baita kara. To baine duruda totona ḡau badana na baita manau. Ia na e gwauhamata, “manau taudia edia noinoi” na baine kamonai. (Sal. 10:17) Dia baine kamonai henida mo to Baibul na ini e gwau tomamu: “Ia ese lalo-manau taudia na kara maoromaoro ai e hakaudiamu, lalo manau taudia na iena dala e hadibalaidiamu.” (Sal. 25:9) Iehova ese Baibul, pablikeisen * idauidau, bona “hesiai tauna mai ena kamonai bona mai ena kara maoromaoro” amo e halasimu program idauidau amo e hakaudamu. (Mat. 24:45-47) Namona na baita manau bona baita abia dae Iehova ese baine duruda na namo, danu ia ese e henidamu ḡaudia baita stadilai, bona ta dibamu ḡaudia na mai kudouda idoinai ida baita badinadia.

19-21. Kade ai Mose ese e karaia kererena be dahaka, bona dahaka ta dibamu?

¹⁹ Kara kereredia na basita karamu. Mose aita laloa lou. Ia na laḡani momo lalodiai e manau bona Iehova e hamoalea. To laḡani 40 muridiai Israel taudia na tano ḡaḡaena ai edia laolao dokona e lao heniava lalonai, Mose na se manau. Ia taihuna, Aigupto ai ia e durua hahinena, na e mase bena Kade ai e guria. Unuseni ai Israel taudia  na ma e maumau lou, e tomava idia na se haerodia namonamova. Una gabu na asi ranuna dainai idia ese “Mose e ḡadeḡade henia.” Ena be Iehova na Mose amo hoa karadia momo e kara, bona Mose ese laḡani momo lalodiai mai manauna ida e hakaudia, to idia na dounu e maumau. Idia na ranu lasi dainai e maumau, to dia una mo, Mose danu e maumauraia, e gwauva iena kerere dainai idia na asi edia inuinu ranudia.​—Num. 20:1-5, 9-11.

²⁰ Mose na e badu dikadika dainai se manau. Ena be Iehova ese e hamaoroa nadi baine hereva henia, to Mose na mai baduna ida taunimanima e gwau henidia bona e gwa ia sibona ese hoa karana ta baine karaia. Bena nega rua nadi e kwadia bona ranu e aru lasi. E hekokoroku bona e badu dainai, kerere badana ta e karaia. (Sal. 106:32, 33) Mose na una nega sisina lalonai se manau dainai, Dirava ese e hamaoroa ia na Gwauhamata Tanona ai basine vareai.​—Num. 20:12.

²¹ Una sivarai amo mai anidia bada ḡaudia haida ta dibamu. Ḡau ginigunana na, hanaihanai baita hekwarahi baita lalomanau. Bema unu basita kara tomamu, baita hekokorokumu bena hereva kereredia baita gwauraimu bona kara kereredia baita karamu. Ḡau iharuana be, ta lalometaumu neganai baita lalomanaumu na auka, una dainai namona na baita hekwarahi baita manau, hekwakwanai negadiai danu.

22-23. (a) Dahaka dainai hanaihanai baita hekwarahi baita lalomanau totona? (b) Sefania 2:3 amo dahaka ta dibamu?

²² Be gimadamu. Kahirakahira, Iehova ese kara dika taudia iboudiai na tanobada amo be kokidiamu, to manau taudia sibodia mo be nohomu. Bena tanobada ai maino korikorina do baine vara. (Sal. 37:10, 11) Oi be unu manau taudia bogaraḡidiai bo nohomu, a? Bo noho dibamu, bema Iehova ena hereva, peroveta tauna Sefania amo e gwauraia herevana, bo badinaiamu.​—Sefania 2:3 ba duahia.

²³ Dahaka dainai Sefania 2:3 na e gwaumu: “Reana ba hehuni diba”? Basitato una hereva anina na Iehova ese e lalokau henidiamu bona ia e hamoaleamu taudia na basine gimadia dibamu. Lasi, to Ia ese baine gimada totona namona na kara haida baita kara. “Iehova ena badu dinana ai” baita roho mauri bona baita mauri hanaihanai diba, bema hari baita hekwarahi baita lalomanau bona Iehova baita hamoalea.