1-2. a) Moses nottonkaciya cani mbiiblyani, ni isiyani yaapankalyaawe? b) Isiyani innisovenriha ukhala owaatanannya?

IBIIBLYA inaattonka wiira Moses “aari namwiiyeviha waapwaha atthu otheene ntuninyani.” (Manu. 12:3) Niireke iyo maanaaya wiira Moses aari nlopwana owoolwa, owoova upanka itthu ni aanawoova oopopihiyaka? Atthu enci phimmoonaaya ukhala commo ntthu owaatanannya. Masi ayo anawiithepya. Moses aari nlopwana answalela Nluku ookhomaala, ohoova ni oolipa nrima. Niikuru ca Yehova, uyo ahonwanana mwene o Wiiciipitu, ahaahoolela muuthakoni atthu ookhalaka 3 milhões ni ahaakavihera apoovu o Isarayeli waatthema awanannyaaya.

² Hiiva khannikhumelela marikariko yankhumelenle Moses, masi khula nihuku, ahaavo atthu awula marikariko annirikihela ukhala atthu owaatanannya. Hataa ukhalaka commo, ihaavo itthu innisovenriha ukhala atthu owaatanannya. Yehova naakhuluveliha wiira “atthu owaatanannya phankookhala watuniyani”. (Isaa. 37:11) Niireke nyuuva nnawiicoona ukhala ntthu owaatanannya? Niireke atthu akina anaawoonani wiira nyuuva ntthu owaatanannya? Nihinaaya waakhula ala makohwaala, nihaana nicuwelaka ukhala ntthu owaatanannya maanaaya isiyani.

3-4. a) Waatanannya unlattanaca ni isiyani? b) Makhaleloni macese anlamuliyeehu woonihera wiira nikhale owaatanannya, ni nlattuni?

³ Waatanannya * unlattanaca ni ikuwo yooreera. Manannani?  Toko ntthu woopintari ikuwo naatakanihacera ikoore cinci wiira ikuwo itepe ureera, hiiva ciicammo nihaana nooniheraka makhalelo menci ooreera wiira nikhale atthu owaatanannya. Nhina ayo makhalelwaayo, ahaavo ootepa woonannya toko wiiyeviha, wiiwelela, umaala ni ulipa nrima. Nlattuni ninlamuliyeehu ukhalana ayo makhalelwaayo napheelaka unciveliha Yehova?

⁴ Ntthu owiiyeviha paasi phinkhitiri wiiwelela inrumaawe Nluku. Ni itthu imoca innirumaawe Nluku, uri ukhala oomaala. (Mat. 5:5; Akalas. 5:23) Napankaka innirumaawe Nluku, ninanvirusa Sotwani. Phimaana hataa nikhalaka owiiyeviha ni oomaala, atthu enci ontuninyani ya Sotwani anaarusiya ni hiiva. (Joau 15:18, 19) Vano, nihaana nikhalaka oolipa nrima wiira ninwanane Sotwani.

5-6. a) Kontha isiyani Sotwani naakasiriya naatthu owaatanannya? b) Makohoni anhaleehu waakhula?

⁵ Ukhala ntthu owaatanannya unaavirikana ni ukhala ntthu owiicoona, oohipica utthekeliya, ni oohimwiiwelela Yehova. Ayo phi makhalelo a Sotwani. Unawoonannya wiira Sotwani naakasiriya naatthu owaatanannya! Kontha atthu owaatanannya anawoonihera wiira makhalelo a Sotwani khanamaana. Intepa untakhaliha Sotwani, ukhalaka wiira ayo anawoonihera wiira uyo namootha. Kontha isiyani? Kontha hataa Sotwani oolumaka awula apankaka isiyani, uyo khankhitiri waahiiha atthu owaatanannya unswalela Yehova!—Jó 2:3-5.

⁶ Ukatini unnirikelaaya ukhala owaatanannya? Ni nlattuni ninlamuliyeehu utotha ukhala atthu owaatanannya? Wiira naakhule ala makohwaala, ninaahala woopela mwaha citthu cankhumelenle Moses, maberewu araru yaarwaaniye uBabilooniya ni Yesu.

7-8. Moses aapankale isiyani ukati wahaahisimiyaawe?

⁷ Nakhalanaka ukhulupale: Ale ankhalana ukhulupale pooti waarikela ukhala owaatanannya, venci-venci wakhalaka wiira ntthu nonhoolelaaya khanaahisima awula nawaavaanyiha. Niireke iyo ihopaca wuukhumelelani? Ni waari wiira ntthu mmoca owatthokoni winyu hopanka commo, mwaahala upankani? Moone itthu yaapankalyaawe Moses.

⁸ Yehova ahonthanla Moses wiira akhale nhooleli o Isarayeli ni ahontthunihera wantikha malamulo wiira atthareliye ni apoovu  otheene. Waanoonannya wiira Yehova aanankavihera Moses. Masi unookhalaru commo, nrokorawe Moses ni muulupalyaawe, Miriyaa ni Arawu, yahomuuluma pusya ni yahonvaanyiha, yamwiirelaka wiira khaalamuliya waathela athiyana yaathenlyaawe. Anari alopwana akina, yaanaahala utthekeliya ni uviruwa—masi Moses khaapankale commo. Uyo khaakuvale utthekeliya. Moses mpaka ahonlepela Yehova wiira ahiye unttarusa Miriyaa. (Manu. 12:1-13) Nlattuni Moses waapankalyaawe commo?

9-10. a) Isiyani Yehova yankavihenryaawe Moses ucuwela? b) Ahooleli itthoko ni mahumu owanlokoni aneetthuca isiyani ni ntakihero na Moses?

⁹ Moses ahotthuna ulakiheriya ni Yehova. Myaakha 40 uttuli, ukati waakhalaawe watthokoni wa mwene o Wiiciipitu, Moses khaari owaatanannya. Uyo khaapica utthekeliya, mpaka ahomwiiva nlopwana mmoca aamoonalyaawe uhikhala nasariya. Moses oopuwenle wiira citthu caapankaawe caanaahala unciveliha Yehova. Yehova ahovira myaakha 40 ankaviheraka Moses ucuwela wiira khawaatosa paasi ulipa nrima wiira aahoolele asarayeli; uyo ahaana akhalaka owaatanannya. Ni wiira akhale owaatanannya, uyo ahaana akhalaka owiiyeviha, owiiwelela ni oomaala. Uyo aheetthuca iyo ni ahokhala nhooleli omaana.—Nkw. 2:11, 12; Mite. 7:21-30, 36.

¹⁰ Ilelo, ahooleli itthoko ni mahumu owanlokoni anlamuliya untakiha Moses. Mwaahihisimiyeke, nhaakuve utthekeliya. Mwiiyevihe ni mwaamini wiira nnaavonyaka. (Ekles. 7:9, 20) Mwiiwelele malakihero a Yehova anttonka mananna ommaliha nanrokottole. Nhihiye waakhula ratta. (Miru. 15:1) Ahooleli itthoko ni mahumu owanlokoni ampanka commo, anaawaana nnema ni anaavaha ntakihero ninthoonyera mananna ookhala owaatanannya.

11-13. Ntakiheroni nivahiyeehu ni maberewu araru?

¹¹ Nalupatthiyaka: Ukhuma nenne nokhalayi, ahooleli apinaatamu anawaalupattha apoovu a Yehova. Ayo pooti unootheriha upanka “ikhirini”, masi khweeliini itthu inaapankiha univiruwela ukhalaka wiira hiiva ninoothanla “umwiiwelela Nluku khampa nhooleli, waahiya apinaatamu.” (Mite 5:29) Hiiva pooti utarawaciya, utthukiya awula waattiya. Masi niikuru ca Yehova, ninaamaala woohaahokolosera ale annilupattha.

¹² Moone ntakihero nivahiyeehu ni maberewu araru yaarwaaniye uBabilooniya—Ananiyasi, Misayeli ni Azariya. * Mwene ooBabilooniya ahaaruma unkhoromela ttontto muulupale owooru. Niihisima, ayo yahomwiirela mwene wiira khayaahala unswalela ule ttonttoole. Ayo yahomwiiwelela Nluku, hataa yoopopihiyaka  ni mwene wiira yaanaahala upahiya nfoorununi yomooro. Wowaakuvya, Yehova ahowoopola ale amirawaale, masi ayo khayoopuwenle wiira yaanaahala woopoliya ni Yehova. Uhiya commo, ayo yahotthuna wiira yaakhumelele yotheene yaahalaawe Yehova uhiya wiira ikhumelele. (Dan. 3:1, 8-28) Ayo yahoonihera wiira atthu owaatanannya anaalipa nrima weekhweeli—khaavo mena mwene, woopopihiya awula uttarusiya unhala ukhitiri unihiiha unswalela Yehova “veekhaawe”.—Nkw. 20:4, 5.

¹³ Unvaresesa wihu Nluku waattehattehiyaka, ninhala waatakiha cani maberewu araru? Nihaana wiiyeviha ni ukhuluvela wiira Yehova naahala unaakiha. (Isaa. 118:6, 7) Ale annootheriha upanka citthu coohinamaana, ninaawaakhula ratta niihisima. (1 Pet. 3:15) Ni khanimpheela mena vakaani upanka itthu inhala uhonona upatthaniihu ni Paapeehu Yehova.

14-15. a) Isiyani innikhumelela nakhalaka ni masukhuli? b) Toko cinttonkaaya ilivuru ya Isaiya 53:7, 10, nlattuni nineereehu wiira Yesu hoonihera ratta-raata ukhala owaatanannya ukati waakhanlyaawe ni masukhuli?

¹⁴ Nakhalaka ni masukhuli: Otheene cihu ninaakhalaka ni masukhuli nlattu wo citthu cinci. Atthunaka nihopaca ukhala ni masukhuli nihinaaya upanka iporova ucikolani awula upanka itthu untekoni. Ciicammo ninaakhalaka ni masukhuli noopuwelaka wiira nihaana nirwaaka usipiritaali utafiti iretta irineehu. Nakhalaka ni masukhuli, unaanirikela ukhala owaatanannya. Pooti ukasiriya nlattu wo citthu cankani paasi. Ni pooti wuuluma citthu woohuupuwela awula pooti uhaawacera ratta akhwiihu. Mwakhala wiira nhopaca ukhala ni masukhuli, moone ntakihero na Yesu.

¹⁵ Wiimaleloni ukumyaawe watuninyani, Yesu ahokhala ni masukhuli menci. Uyo aanaacuwela wiira aakowiiviya ni aakoohuvihiya cinene. (Joau 3:14, 15; Akalas. 3:13) Myeeri vakaani hinaaya ukhwa, uyo aheera wiira aari ni masukhuli. (Luka 12:50) Ni yahaleelaka mahuku vakaani hinaaya wiiviya, uyo aheera: “Kiri ni masukhuli.” Moolumwaawe ukati wanlompaawe Nluku wiira anhimerye masukhulyaawe, anoonihera wiira Yesu aanawiiyeviha ni aanaamwiiwelela Nluku: “Paapa, nkoopole ula ukatyuula. Unookhalaru commo, iyo phi itthu miiva iwenlyaaka, kiwaale nlattu wo ula ukatyuula. Paapa, nttitthimihe ncina ninyu.” (Joau 12:27, 28) Ukati waaphiyalyaaya, Yesu aholipa nrima ni aheevaherera waalupatthi a Nluku. Ayo yahomwiiva ni mananna oowerya ni owoonihaca ihaaya. Hataa akhalaka ni masukhuli menci ni hataa ahuvaka, Yesu ahokhala owaatanannya ni ahopanka yaapheelaawe Nluku. Khweeliini, pooti waneereehu wiira Yesu hoonihera ratta-raata ukhala owaatanannya ukati waaryaawe ni masukhuli!—Nsome Isaiya 53:7, 10.

16-17. a) Apatthani a Yesu yaapankale isiyani yaahala unrikihela Yesu ukhala owaatanannya? b) Ninlamuliya untakiha cani Yesu?

¹⁶ Uhiyu woomalihera ukumi wa Yesu watuninyani, apatthannyaawe yahopanka itthu yaahala unrikihela Yesu ukhala owaatanannya. Muupuwele masukhuli yaarinaawe Yesu ule ukatyuule. Niireke aanaahala ukhala ookhuluvelya mpaka waahalaawe ukhwa? Ahaakhanle ookhuluvelya, khaavo aahaala uweherera uphwanya ukumi woohimala. (Aroo. 5:18, 19) Itthu yuulupale cinene, ukhalaka wiira yotheene yaahalaawe upanka Yesu, yaanaahala unanariha awula utepa ureeriha imaani ya Yehova. (Jó 2:4) Uhiya iyo, ukati woyoolya yoomalela nkhayi naattharyaawe, maapostolu “yahancera uvaanyihana venci, wiira tipani aari muulupale.” Yesu ahopaca waahiiha iyo itthwiiyo imaara cinci, ni mpaka yoole uhiyuule aapacale waahiiha iyo! Masi Yesu khaaviruwale. Uhiya commo, uyo anoomaala. Yesu  ahaahimerya-tho sana-saana meettelo yaalamuliyaaya ukhalana. Ni ahaattottopela nlattu wonvaresesa uyova.—Luka 22:24-28; Joau 13:1-5, 12-15.

¹⁷ Unari wiira nyuuva yahookhumelelani iyo itthwiiyo, mwaahala upankani? Ninlamuliya untakiha Yesu ni umaala, hataa nikhalaka ni masukhuli. Nihaana niiwelelaka innirumaawe Yehova upanka, ‘uhihiya uvilelana’. (Akol. 3:13) Ninaahala upanka iyo noopuwelaka wiira otheene cihu ninawaatthekelaka ni ninawaanyoonyihaka akhwiihu. (Miru. 12:18; Tiya. 3:2, 5) Ni nhihiye waattottopela akhwiinyu nlattu wo citthu comaana cimpankaaya.—Efesu. 4:29.

18. Yehova naakavihera cani ale aneeyeviha uthanla upanka citthu comaana, masi isiyani ayo inlamuliyaaya upanka?

¹⁸ Kontha ninaahala uthanla upanka citthu comaana. Wanirikelaka ucuwela itthu yoopheela upanka, Yehova naahala unikavihera uthanla upanka citthu comaana. Masi nihaana ukhala atthu owaatanannya wiira anikavihere. Uyo naanikhuluveliha wiira naahala “wiiwelela mavekelo aatthu owaatanannya.” (Isaa. 10:17) Ni uhiya uniiwelela, ihaavo-tho itthu inhalaawe upanka. Ibiiblya ineera: “Uyo naahala uweettiha atthu owaatanannya nhina wo citthu comaana, ni naahala weetthuciha iphirwaawe ale anaatanannya.” (Isaa. 25:9) Yehova naaniitthuciha avarelaka nteko Ibiiblya, ilivuru, * ividiyu ni mikutthaano cintthenkaceriyeehu ni “nanteko ookhuluvelya ni ankhili.” (Mat. 24:45-47) Nihaana wiiyeviha ni ukupali ukaviheriya, nasomaka ilivuru cinnivahaawe Yehova ni neewelelaka citthu cineetthuceehu.

19-21. Moses aatthekale cani uKaate, ni iyo inniitthuciha isiyani?

¹⁹ Kontha khaninhala utepa uttheka. Mmuupuwele-tho Moses. Uyo ahokhala myaakha cinci nari owaatanannya ni ahonciveliha Yehova. Masi wiimaleloni nkwaha wo myaakha 40 muuthakoni, Moses khaakhitinri ukhala owaatanannya. Nrokorawe Moses, atthunaka ule aamooponle Wiiciipitu khalayi, ahokhwa ni ahosikhiya uKaate. Vano asarayeli yahancera uttekutta wiira khayaawaceriya ratta. Ule ukatyuule, ayo “yaanaanyakulihana ni Moses” nlattu wowaathwaa maaci. Unookhalaru wiira Yehova ahonvaha ikuru Moses wiira apanke mitikhiniho cinci, ni  unookhalaru wiira Moses ahothoonyera imaara cinci ukhala nhooleli omaana, asarayeli yaanaattekutta. Ayo yaanaattekutta kahi nlattu wowaathwaa maaci paasi, masi ciicammo yaananttekutta Moses, khampa wiira uyo phaawaanenle ntthona naarinaaya.—Manu. 20:1-5, 9-11.

²⁰ Moses ahorusiya cinene ni ahohiya ukhala owaatanannya. Uhiya woonihera waamini ni wuuluma uhoolo wo mwala, khampa caarumiyaawe ni Yehova, Moses ahaacacera apoovu ni aheerela wiira uyo phaahala ukumiha maaci. Vano, ahaatta mwaloole imaara piili ni yahokhuma maaci menci. Moses ahottheka nlattu wowiicoona ni urusiya. (Isaa. 106:32, 33) Nlattu woohiya ukhala owaatanannya ukati vakaani paasi, Moses ahohaleela ukela ilapo yaakhuluvelihiyaaya asarayeli.—Manu. 20:12.

²¹ Iyo inaaniitthuciha citthu cinci. Yoopacera, nihaana niikurumicaka wiira nihihiye ukhala atthu owaatanannya. Nahiyaka ukhala owaatanannya ukati vakaani paasi, ninaahala wancera wiicoona ni pooti wuuluma awula upanka citthu coohinamaana. Yonayeeli, nakhalaka ni masukhuli unaanirikela ukhala atthu owaatanannya, phimaana nihaana wiikurumica wiira nihihiye ukhala owaatanannya hataa nikhalaka ni masukhuli.

22-23. a) Kontha isiyani khaninlamuliya uhiya wiikurumica ukhala atthu owaatanannya? b) Moolumo a Sofoniya 2:3 anthoonyera isiyani?

²² Kontha ninaahala ukhikiceriya. Woohipica, Yehova naahala waamalamaliha ntuninyani atthu oohinamaana otheene, ni atthu owaatanannya phinhala uhala paasi. Vano, ituninya inaahala ukhalana nnema neekhweeli. (Isaa. 37:10, 11) Niireke nyuuva nnaarwaa ukhala wamoca ni ayo atthwaayo? Nnaarwaa ukhala wamoca ni ayo mwatthunaka nlattulo na Yehova nantikhalyaawe porofeeta Sofoniya.—Nsome Sofoniya 2:3.

²³ Nlattuni ilivuru ya Sofoniya 2:3 ineeraaya: “Atthunaka nyuuva nnaahala woopoliya”? Ayo moolumwaayo khanahimya wiira Yehova khanhala ukhitiri woopola ale anonciveliha ni anaafentaawe. Uhiya commo, ayo moolumwaayo anthoonyera wiira hiivano ihaavo inlamuliyeehu upanka wiira nakhikiceriye. Naahihiyeke ukhala atthu owaatanannya ni nancivelihaka Yehova, ninaahala woopwa naphiyaka “nihuku noorusiya Yehova” ni ninaahala uphwanya ukumi woohimala.