1-2. (1) Mose onatharihiwa hai, nave tiheeni owo aapankeiye? (2) Nthowa taani nryaahuno na wunnuwiha wiichacala?

PIIPILIYA onnamuloca Mose wi owo “aari muchu oomaala [naari awiichacala], waapwaha achu oothene a veelaponi ya vathi.” (Nam. 12:3) Apwanne ela enataphulela wi aari awoova opaka soolakelela, naari awoova wiikhalelaru oolipa vaavaa akina yaamwaakaahaaya? Ola mukhalelo yoowo akina anamutharihaaya muchu awiichacala. Nyenya ela tahi eparipari. Mose aari oolipa, oolakelela weera echu, navetho mulapeli oolipa murima a Muluku. Nnikhaviheryo na Yehova, owo aahimvootha mwene oowerya o Yikuputu, akhweya aahaahoolela achu 3.000.000 ovira mutakhwani, nave aahikhaviherya nloko na Aisarayeli waavootha amwiicani aya.

² Hiyo hannahoolela makacamiho yaawo Mose aavoontheiye, nyenya nihiku ti nihiku nnahaala ovilela ni achu naari miyaha seiho sineeriha okhala woovila wiikhalelaru awiichacala. Mwawiihiiha, nookhalano nceenyeryo ntokweene na wunnuwiha mukhalelo yoola. Yehova oororomeliha wi “awiichacala enarwa yaakhela elapo ya vathi.” (Sal. 37:11) Apwanne munniisoona ntoko muchu awiichacala? Apwanne akina annawoonani mmukhalelo yoowo? Nihaakumve waakhula makoho yaala ookhweleya, nnachuna osuwela yootaphulela ya okhala muchu awiichacala.

3-4. (1) Wiichacala onalikana ni eheeni? (2) Mikhalelo taani misese nnachunaahu wi nikhale awiiyeviha, nave ntakhara heeni?

³ Wiichacala * ori ntoko muthete wooreera. Mmukhalelo taani? Hiiha ntoko muchu onapaka muthete oniiwananiheiye ikoore  soohiyana hiyana sooreera wi apake muthete, nnaphwanela wiiwananiha mikhalelo soohiyana hiyana sooreera wi nikhale awiichacala. Mikhalelo mikina sa seiho, ti wiiyeviha, wiiwelela, ni olipa murima. Ntakhara heeni ninnaphwanela wooniherya mikhalelo seiha wakhala wi ninnachuna omuhakalaliha Yehova?

⁴ Pahiru achu awiiyeviha tanahaala wiiwelela yookhwela ya Muluku. Makupa a yookhwela ya Muluku tawi nikhale achu awiisumaaliha naari awiiyeviha. (Mat. 5:5; Gal. 5:23) Vaavaa nnapakaahu yookhwela ya Muluku, ninnamweeriha Satana okhala oonyeenyeya. Naamwi nri achu awiiyeviha, achu ancipale yaawo anapaka makupa a elapo ya Satana annaniica. (Yoh. 15:18, 19) Ntoko yookhumelela, nnaphwanela okhala oolipa murima wi nimvoothe Satana.

5-6. (1) Ntakhara heeni Satana onnawiica achu awiichacala? (2) Makoho taani nnahaalaahu waakhula?

⁵ Moohiyana ni muchu awiichacala, muchu yoole ori awiisoona, onooniherya owali, nave ohinamwiiwelela Yehova. Mikhalelo seiha sinnamusuwanyeiha phaama Satana. Moohikhwa minikwa owo onnawiica achu awiichacala! Achu awiichacala aakhalano mikhalelo saphaama seiyo Satana ohireiyeno. Awo annahiya vanlakani wi Satana toonanara. Nave voopwaha, awo annooniherya wi owo nawoothe. Ntakhara heeni? Nthowa nawi moohipwacha yeeyo owo onaloceiye naari onapakeiye, owo hani aamaalihe awiichacala omurumeela Yehova!—Yobi 2:3-5.

⁶ Elukuluku taani onakhalaaya woovila okhala awiichacala? Nave ntakhara heeni ninnaphwanela wunnuwiha wiichacala? Wi naakhule makoho yaala, nnahaala wuuluulela yootakiherya yeeyo etikitheryiwe ni Mose, Aheepiri araru yaawo yaakerihiwe wookapuroni o Papulu, ni Yesu.

7-8. Mose aakhulenle hai vaavaa akina yahaamukhalinhaaya mwa ncicimiho?

⁷ Elukuluku nnakhalaahuno olamulelo. Wa yaale arino olamulelo enamukhala yoovila otitelela okhala awiichacala, xaxaxa vaavaa akina analocaaya wi awo hanapaka soolakelela mwaphaama. Apwanne ela yohintoko weereya ni nyuwo? Hanka wakhala wi muchu a veemusini oheera echu mmukhalelo yoola? Mwaahaala waakhulela hai? Muthokororye yeeyo Mose aapankeiye.

⁸ Yehova aahimuthanla Mose okhala muhooleli a Aisarayeli nave aahimweemererya orepa malamulo yaawo yaalamulela nloko nle.  Hisaarivo minikwa wi Yehova aanamukhaviherya Mose. Naamwi hiiha, munnawe ni murokora awe, Aroni ni Miriyamu yaahimphwanyerya mathowa nave yaahiloca wi owo haaphwanela omuthela muthiyana yoowo aamuthenleiye. Alopwana akina yaawo yaari mmakupa a Mose yaahitepa onanariwa yaaheererya winla ikuhu—nyenya Mose heenreno. Owo haakuvenle onyeenyeya. Ophiyerya wi Mose aahimveka Yehova wi amaale omulaka Miriyamu. (Nam. 12:1-13) Ntakhara heeni Mose aakhulenleiye mmukhalelo yoola?

9-10. (1) Yehova aamukhavihenrye Mose wiiwexexa eheeni? (2) Miru sa ichoko ni atokweene a mmulokoni tiheeni anahuseryaaya orweela wa Mose?

⁹ Mose aaheemererya ovyakihiwa ni Yehova. Mu iyaakha makhumi masese soopacerya, vaavaa aareiye mu emusi ya mwene o Yikuputu, Mose haari awiichacala. Mweeparipari, owo aahaakuvela onanariwa ophiyerya omwiipha mulopwana yoowo aammana Muhepri. Mose uupuwela wi Yehova aahaala weemererya meerelo awe. Yehova aahimaliha iyaakha makhumi masese amuhusihaka Mose wi iiwexexe wi aanachuna sincipale opwaha oolipa murima wi aahoolele Aisarayeli; owo aaphwanela okhala awiichacala. Nave wi akhale awiichacala, Mose tho aaphwanela okhala awiiyeviha, awiiwelela, ni oomaaleleya. Owo aahipharihela nihusiheryo nle phaama nave aahikhala muhooleli aphaamaxa.—Muk. 2:11, 12; Saw. 7:21-30, 36.

¹⁰ Olelo, miru sa ichoko vamoha ni atokweene a mmulokoni anaphwanela omutakiherya Mose. Elukuluku anakhalihiwaaya moohikhala ncicimiho, hanaphwanela waakuvela onanariwa. Mukhale awiiyeviha nave mweemererya soohesa sanyu. (Ekle. 7:9, 20) Mucharihe ni murima woothene ohoolela wa Yehova wi mmalihe makacamiho. Nave ilukuluku soothene mwaakhulele mwawiiyeviha. (Masi. 15:1) Miru sa ichoko ni atokweene a mmulokoni yaawo anaakhulela mmukhalelo yoola annamuhakalaliha Yehova, annaaceererya murecele, nave annatikitherya yootakiherya mmukhalelo wa okhala awiichacala.

11-13. Yootakiherya taani Ahepri araru atikithenryaaya wa hiyo?

¹¹ Elukuluku nniikariwaahu: Ovinyerya khalai, alamuleli annawiikara achu a Yehova. Awo akhweya anamuneerela “sawoopiha” soohiyanahiyana, nave echu yookhweleya tiyawi nthanlile “omwiiwelela Muluku, opwaha achu.” (Saw. 5:29) Akhweya nnamunyemuliwa, owaleliwa mukalaposo, naari ophiyerya omaniwa. Nnikhaviheryo na Yehova, hinni nikookiherye yoonanara nyenya nnamutitelela okhala awiiyeviha variyari va yaweeha.

¹² Muthokororye yootakiherya ya Ahepri araru yaawo yaakerihiwe o Papulu—Hananiya, Misayeli ni Asariya—atikithenryaaya wa hiyo. *  Mwene o Papulu aahaalamulela wi awo ekokhorele eruku etokweene ya eparata. Mwawiiyeviha, awo yaahimutharihela mwene ntakhara heeni hiyaahaala ohikokhorela eruku. Awo yaahititelela omwiiwelela Muluku ni murima woothene naamwi mwene ahaala waakhaliha mmukhalelo woonanara moorweela wa waakeriha mu nipuro na mooro. Yehova aahithanla waavulusa alopwana ale mwawaakuveya, nyenya awo hiyaasuwela wi owo aahaala waavulusa. Opwaha yeeyo, awo yaari ooreheryeya wa yeeyo Yehova eereiye eemererye wi yeereye wa yaawo. (Dan. 3:1, 8-28) Awo yaahooniherya wi achu awiichacala toolipa murima chiryene—moohipwacha mwene , yawoopiha, naari ohoosa howerya onanariha yoolakelelaahu ya omulapela pahiru Yehova.—Muk. 20:4, 5.

¹³ Elukuluku ororomeleya wahu wa Yehova oneehiwaaya, nni ncharihe hai yootakiherya ya Ahepri araru? Naachu awiiyeviha nave ninnaroromela wi Yehova onahaala onikhapelela. (Sal. 118:6, 7) Ninnawaakhula yaale ananootherya soonanara mwawiiyeviha, ni mwancicimiho. (1 Ped. 3:15) Ninnasepa opaka echu vyakala yaahaala onanariha onthamwene ahu ni Tiithi ahu oosivela.

14-15. (1) Tiheeni eni yeereye elukuluku nnakhalaahu awuukhuwa? (2) Mwawiiwanana ni Isaiya 53:7, 10, ntakhara heeni nnanwerya oloca wi Yesu yootakiherya yaphaamaxa ya muchu yoowo oonihenrye wiichacala variyari va wuukhuwa?

¹⁴ Vaavaa nnakhalaahu awuukhuwa: Oothene ahu ninnakhala awuukhuwa ni mathowa oohiyanahiyana. Akhweya nnamukhala awuukhuwa nihaakumve opaka eporova osikola naari opaka muteko vyakala omutekoni. Naari nnamukhala awuukhuwa pahiru vooloca sa oloola yoowo nnachunaahu. Elukuluku nnakhalaahu awuukhuwa, onnakhala woovila okhala awiichacala. Ichu seiho sahinihonse sinampacerya onikhulumula. Nnamuloca ichu soohiphwanelela nave nnamwaakhaliha akina mmukhalelo woonanara. Wakhala wi nyuwo munniisoona okhala awuukhuwa, muthokororye yootakiherya ya Yesu.

¹⁵ Variyari va mahiku ookuchula a ekumi awe veelaponi yavathi, Yesu aahikhala awuukhuwaxa. Owo aahisuwela wi aahaala othorihiwa nave wi ahaala ohoolela sawoopiha. (Yoh. 3:14, 15; Gal. 3:13) Mu miyeeri vakhaani ahaakumve okhwa, owo aahiloca wi aari awuukhuwaxa. (Luka 12:50) Nyenya mmahiku vakhaani ahaakumve okhwa, Yesu aahiloca: “Okumi aka onnuukhuwa.” Masu Yesu aapharihenleiye wi ooniherye moonelo awe vaavaa aavekenleiye annooniherya wi owo aari awiiyeviha ni oomwiiwelela Muluku. Owo aaloca: “Tiithi kivulusheeni mwa elukuluku yeela. Nto, kirweenle nthowa na elukuluku yeela. Atiithi, cicimihani nsina nanyu.” (Yoh. 12:27, 28) Vaavaa elukuluku yaaphin’yaaya, Yesu aahiiveleela mmatani mwa amwiicani a Muluku, yaawo yaamuthorinhe mmukhalelo wawiicela ni wa wuuliha muru. Moohipwacha wuukhuwa, moohipwacha ohooseya, Yesu mwawiichacala aahipaka yookhwela ya Muluku. Moohikhwa minikwa, nnanwerya oloca wi Yesu yootakiherya yaphaamaxa ya muchu yoowo oonihenrye wiichacala variyari va wuukhuwa!—Mwaalakhanye Isaiya 53:7, 10.

16-17. (1) Asinthamwene a Yesu yeenhe hai wiichacala wawe? (2) Nni nimutakiherye hai Yesu?

¹⁶ Mu ohiyu wookuchula wa okumi wa Yesu veelaponi yavathi, asinthamwene awe awaacameleya yaaheeha wiichacala wawe. Mwaanyiherye wuukhuwa Yesu aareiyeno mu ohiyu yoole. Apwanne aahaala otitelela okhala oororomeleya ophiyerya okhwa? Waakhanle wi Yesu haari oororomeleya, haavo muchu aahaala okhalano ekari ya ophwanya ekumi yoohimala. (Aro. 5:18, 19) Echu yookhweleyasa, yaanavolowela ophwanelela wa Tiithi awe. (Yobi 2:4) Voocharela, variyari va yoolya awe yookuchula ni asinthamwene awe awaacameleya, arummwa awe yaahaakhulana vooloca sa “taani ori mutokweenesha.” Yesu aahiwookolola asinthamwene  awe vooloca sa mwaha yoola mu ikwaha sincipale, ophitaanyerya omapacereryo wa ohiyu omohamoha yoole! Mootikhiniha, Yesu haanyeenyen’ye. Ohiya yeeyo, owo aahititelela okhala awiiyeviha. Mooreera murima, nyenya moolipa, wanaawiili Yesu aahithariha moonelo yoowo yaaphwanelaaya okhalano. Nave Yesu aahaalamulela asinthamwene awe wi emukhaviherye moororomeleya.—Luka 22:24-28; Yoh. 13:1-5, 12-15.

¹⁷ Nyuwo mwahaala waakhulela hai waakhanle wi muri mmukhalelo woolikana? Nnanwerya omutakiherya Yesu ni otitelela okhala awiichacala naamwi nuukhunwe. Mwiiwelele ni murima woothene nlamulo na Yehova nawi, “muvilelaneke mukina ni mukhwaawe.” (Kol. 3:13) Nnahaala wiiwelela nlamulo nenla wakhala wi ninnuupuwela wi ninnaloca nave ninnapaka seiyo sinawuukhula akina. (Masi. 12:18; Tiy. 3:2, 5) Nave wiiliwiili mwaathamaleleke akina ntakhara mikhalelo saya saphaama.—Éfe. 4:29.

18. Yehova onaakhaviherya hai achu awiichacala opaka soolakelela saphaama, nyenya tiheeni awo anaphwanelaaya opaka?

¹⁸ Wakhala wi naachu awiichacala nnahaala opaka soolakelela soophwanelela. Elukuluku nnahoolelaahu soothanla soovila mookumini, Yehova onahaala onikhaviherya opaka soolakelela soophwanelela—nyenya pahiru wakhala wi naachu awiichacala. Owo onnaroromeliha owiriyana “nivekelo na [awiichacala.”] (Sal. 10:17) Nave owo onahaala opaka sincipale opwaha owiriyana nivekelo nahu. Piipiliya onnaniroromeliha: “Annaahoolela [awiichacala] mu ephiro yaphaama, ewooniheryaka yookhwela aya.” (Sal. 25:9) Yehova onnavahererya ohoolela yoola orweela Mpiipiliyani, * mu soolaleeryiwa, mu ixilema, nave mmithukumano orweela wa “namuteko oororomeleya ni amiruku.” (Mat. 24:45-47) Nnaphwanela waakhela nikhaviheryo na Yehova moorweela wa okhala awiiyeviha nave nsuwelaka wi ninnachuna nikhaviheryo moorweela wa ohuserya ikaruma seiyo Yehova onanivahereryeiye, nave niiwelele ni murima woothene nipharihelaka yeeyo nnahuseryaahu.

19-21. Yoocheka taani Mose aapankeiye o Katesi, nave tiheeni nnahuseryaahu orweela wa yeeyo?

¹⁹ Wakhala wi naachu awiichacala, nnahaala osepa opaka soocheka. Muupuwele wanawiili vooloca sa Mose. Mu iyaakha masana aahiikhalelaru awiichacala nave aanamuhakalaliha Yehova. Voocharela, omakuchuwelo wa iyaakha makhumi masese sookacamiha mu mukwaha wa mutakhwani, Mose aahihesa wooniherya  wiichacala. Murokora awe yoowo onakhala wi taamukhavihenrye ovulusa ekumi awe o Yikuputu, aahikhwa nave aahivithiwa o Katesi. Nave wanaawiili Aisarayeli yaaniikhupanyerya wi hiyaakhapeleliwa mwawaakhwanela. Mu elukuluku yeela awo “yaanaceenya [wa Mose]” wa nthowa na orama wa maahi. Moohipwacha sootikhiniha soothene Yehova aapankeiye orweela wa Mose nave moohipwacha ohoolela wa Mose woohikhala nrima, achu yaaniikhupanyerya. Tahi wi awo yiikhupanyerya pahiru vooloca sa othowa wa maahi nyenya tho vooloca sa Mose, ntoko wi aari yoowo aatannyile nikacamiho na othowa yoolya ni maahi.—Nam. 20:1-5, 9-11.

²⁰ Ni murima woosarasareya, Mose aahiyeleela mukhalelo wawiiyeviha. Ohiya oloca mwa nroromelo wa mwala, ntoko Yehova aamulamulenleiye, Mose aahiloca mwawiirumiha wa achu iivahaka ncicimiho mukhateiye. Voocharela, Mose aahimana mwala ikwaha piili nave maahi mancipale yaahikhuma. Wiirumiha ni onanariwa saahimweeriha opaka yoocheka etokotoko. (Sal. 106:32, 33) Oyeleela wawe wiichacala mu elukuluku vakhaani, Mose heemereryiwe ovolowa mu elapo ya Nlakano.—Nam. 20:12.

²¹ Orweela wa yootakiherya yeela, ninnahuserya echu yoochuneya. Yoopacerya, nnaphwanela wiilipiserya wi nikhapelele moonelo ahu wa wiichacala. Wakhala wi noohiya yeela mu elukuluku vakhaani, wiirumiha onamunnuwa mukhataaya nave onamuneeriha oloca naari weera ichu moololo. Yanaawiili, elukuluku nnakhalaahu ookhulumuwa onamukhala woovila okhala awiichacala, mwawiihiiha nnaphwanela wiilipiserya wi nikhale awiichacala, naamwi nihoolelaka okhinyererya.

22-23. (1) Ntakhara heeni ninnaphwanela otitelela waavya wiichacala? (2) Masu anaphwanyeya mu Sofoniya 2:3 anooniherya eheeni?

²² Wakhala wi naachu awiichacala, nnahaala okhapeleliwa. Moohilekela, Yehova onahaala waaviihavo achu oonanara murima veelaponi, nave pahiru achu awiichacala tanahaala wiikhalelaru. Voocharela elapo enamusareya ni murecele. (Sal. 37:10, 11) Apwanne munahaala okhala variyari va achu yaawo awiichacala? Nyuwo munanwerya, wakhala wi munnapaka ichu mwawiiwanana ni olopola woosivela yoowo orempwale ni mulipa a miririmu Sofoniya.—Mwaalakhanye Sofoniya 2:3.

²³ Ntakhara heeni Sofoniya 2:3 olonceiye wi “Akhweya munarwa moopoliwa”? Masu ala hanataphulela wi Yehova hanawerya waavulusa yaale anachuna omuhakalaliha yoowo nave yaawo onaasiveleiye. Ohiya yeeyo, ela enathoonyerya wi nnaphwanela opaka echu vyakala wi nikhapeleliwe ni yoowo. Nookhalano ewehereryo ya ovulusiwa mu “nihiku na esara ya Apwiya [Yehova]” ni okhala wookhala wakhala wi nohiilipiserya hiihaano waavya wiichacala ni omuhakalaliha Yehova.