1, 2. а) Моисейы тыххӕй Библийы цы фыст ис ӕмӕ цавӕр хъуыддӕгтӕ сарӕзта? б) Сӕрныллӕг уӕм, уый ахсджиаг цӕмӕн у?

БИБЛИЙЫ Моисейы тыххӕй фыст ис, зӕгъгӕ, «зӕххыл... [уый] хуызӕн сабыр адӕймаг нӕ уыд» (Ным. 12:3). Цымӕ уый ууыл дзурӕг у, ӕмӕ лӕмӕгъ ӕмӕ ӕнӕныфсхаст адӕймаг уыд ӕмӕ иннӕты ныхмӕ фидар фӕлӕууын йӕ бон нӕ уыд? Иуӕй-иуты хъуыдымӕ гӕсгӕ, растдӕр ахӕм вӕййы сабыр, кӕнӕ сӕрныллӕг, адӕймаг. Фӕлӕ ӕцӕгӕй та уый афтӕ нӕу. Моисей уыд ныфсхаст ӕмӕ хъӕбатыр адӕймаг. Йегъовӕйы ӕххуысӕй уый Египеты хъомысджын паддзахы ныхмӕ ӕрлӕууыд, стӕй дуне адӕмы,– уыдаиккой 3 милуаны бӕрц,– ӕдзӕрӕг быдырыл акодта ӕмӕ израилӕгтӕн баххуыс кодта, цӕмӕй се знӕгтыл фӕуӕлахиз уыдаиккой.

² Кӕд мах Моисейы хуызӕн зындзинӕдтыл не ’мбӕлӕм, уӕддӕр алы бон дӕр ахӕм уавӕрты бахауӕм, ӕмӕ нын ӕнцон нӕ вӕййы сӕрныллӕгдзинад ӕвдисын. Фӕлӕ уыцы миниуӕгыл кусын ахсджиаг у, уымӕн ӕмӕ Йегъовӕ зӕрдӕ ӕвӕры, «сабыр адӕм... зӕхх бынӕн [кӕй] райсдзысты» (Пс. 37:11). Дӕхи сӕрныллӕг адӕймаг схонис? Иннӕтӕ дӕр дӕ ахӕм адӕймагӕй зонынц? Цалынмӕ ацы ахсджиаг фарстатӕн дзуапп нӕ раттай, уӕдмӕ уал аныхас кӕнӕм, сӕрныллӕг уай, уый цӕуыл дзурӕг у, ууыл.

3, 4. а) Сӕрныллӕгдзинад цӕимӕ ис абарӕн? б) Цӕмӕй сӕрныллӕг уӕм, уый тыххӕй нӕ цавӕр миниуджытыл хъӕуы кусын ӕмӕ уый ахсджиаг цӕмӕн у?

³ Сӕрныллӕгдзинад * абарӕн ис рӕсугъд нывимӕ. Нывгӕнӕджы  алыхуызон рӕсугъд хуызтӕ куыд хъӕуы, цӕмӕй цыдӕр сныв кӕна, раст афтӕ мах дӕр хъӕуы алыхуызон миниуджытыл кусын, цӕмӕй сӕрныллӕг уӕм. Уыцы миниуджытӕй иуӕй-иутӕ сты коммӕгӕсдзинад, фӕлмӕн удыхъӕд ӕмӕ хъӕбатырдзинад. Кӕд нӕ Йегъовӕйы зӕрдӕ рухс кӕнын фӕнды, уӕд нӕ ӕнӕмӕнг хъӕуы ацы миниуджытыл кусын. Цӕмӕн ис афтӕ зӕгъӕн?

⁴ Цӕмӕй Хуыцауы фӕндон ӕххӕст кӕнӕм, уый тыххӕй хъуамӕ уӕм коммӕгӕс. Хуыцауы фӕндонмӕ хауы, фӕлмӕн удыхъӕд нын уа, уый дӕр (Матф. 5:5; Гал. 5:23). Йӕ фӕндон ын куы феххӕст кӕнӕм, уӕд Хӕйрӕг тынг фӕмӕсты кӕны. Ӕмӕ кӕд сӕрныллӕг стӕм ӕмӕ нын фӕлмӕн удыхъӕд ис, уӕддӕр нӕ Хӕйрӕджы дунейы адӕмӕй бирӕтӕ се сӕфт уынынц (Иоан. 15:18, 19). Ӕмӕ цӕмӕй Хӕйрӕджы ныхмӕ фидар фӕлӕууӕм, уый тыххӕй та нӕ хъӕуы хъӕбатырдзинад.

5, 6. а) Хӕйрӕг сӕрныллӕг адӕмӕй йе сӕфт цӕмӕн уыны? б) Цавӕр фарстатӕн базондзыстӕм дзуапп?

⁵ Сӕрныллӕг чи нӕу, уыдон та сӕхицӕй вӕййынц хъал ӕмӕ уайтагъд рамӕсты вӕййынц, стӕй уыдон Йегъовӕйы коммӕ нӕ кӕсынц. Ӕмӕ растдӕр ахӕм у Хӕйрӕг дӕр. Уӕдӕ диссаг нӕу, сӕрныллӕг адӕмӕй йе сӕфт кӕй уыны! Уыдон хорз миниуджытӕ куы равдисынц, уӕд уымӕн йе ’взӕр миниуджытӕ ноджы тынгдӕр рабӕрӕг вӕййынц. Уый нӕ, фӕлӕ ма афтӕмӕй сбӕлвырд кӕнынц, Хӕйрӕг мӕнгдзурӕг кӕй у. Ома куыд? Уыдон цыфӕнды зын уавӕрты дӕр Йегъовӕйӕн дарддӕр дӕр фӕлӕггад кӕнынц. Уӕдӕ Хӕйрӕг цыфӕнды ма дзура ӕмӕ цыфӕнды ма араза, уӕддӕр сӕ йӕ бон бауромын нӕу! (Иов 2:3–5).

⁶ Сӕрныллӕгдзинад ӕвдисын нын цавӕр уавӕрты вӕййы зын? Ӕмӕ дарддӕр дӕр уыцы миниуӕгыл цӕмӕн хъуамӕ кусӕм? Ацы фарстатӕн дзуапп базоныны тыххӕй ӕркӕсдзыстӕм цалдӕр цӕвиттонмӕ: Моисейы, Вавилоны уацары чи уыд, уыцы ӕртӕ дзуттаг лӕппуйы ӕмӕ Йесойы цӕвиттонтӕм.

7, 8. Кӕд Моисейӕн йӕ хо ӕмӕ йе ’фсымӕр йӕ ныхмӕ дзырдтой, уӕддӕр куыд бакодта?

⁷ Нӕ къухы бартӕ куы вӕййы. Адӕймагӕн йӕ къухы бартӕ куы вӕййы, уӕд ын алы хатт ӕнцон нӕ вӕййы сӕрныллӕгдзинад ӕвдисын, уӕлдайдӕр та, йӕ дӕлбар чи ис, уыдон ӕй куы ницӕмӕ фӕдарынц кӕнӕ йын йӕ разамындмӕ фау куы ’рхӕссынц, уӕд. Ды дӕр ахӕм уавӕры искуы уыдтӕ? Зӕгъӕм, кӕд дӕ бинонтӕй исчи йӕхи афтӕ фӕдары, уӕд куыд бакӕныс? Ӕркӕсӕм, Моисей ахӕм уавӕры куыд бакодта, уымӕ.

 ⁸ Йегъовӕ Моисейы Израилы адӕмӕн разамонӕгӕй сӕвӕрдта ӕмӕ йӕ ахӕм кады аккаг скодта, цӕмӕй сын йӕ номӕй закъӕттӕ ныффыстаид. Бӕрӕг уыд, Йегъовӕ Моисейӕн кӕй ӕххуыс кодта. Фӕлӕ уӕддӕр Моисейӕн йӕ хо, Мариам, ӕмӕ йе ’фсымӕр, Аарон, иуафон йӕ ныхмӕ дзурын райдыдтой ӕмӕ йӕм фау ӕрхастой, ӕндӕрбӕстаг ус ын кӕй уыд, уый тыххӕй. Моисейы бынаты ӕндӕр исчи куы уыдаид, уӕд, ӕвӕццӕгӕн, рамӕсты уыдаид ӕмӕ сӕ йӕ маст райстаид. Фӕлӕ Моисей афтӕ нӕ бакодта. Уый сӕм нӕ фӕхъыг. Суанг ма Йегъовӕйӕн ныллӕгъстӕ кодта, цӕмӕй, Мариамыл цы хъотыр бафтыдта, уымӕй йӕ сдзӕбӕх кодтаид (Ным. 12:1–13). Цымӕ Моисей афтӕ цӕмӕн бакодта?

9, 10. а) Йегъовӕ Моисейӕн цавӕр хъуыддаг бамбарынӕн баххуыс кодта? б) Бинонты хистӕртӕ ӕмӕ хистӕр нӕлгоймӕгтӕ Моисейы цӕвиттонӕй цӕуыл ахуыр кӕнынц?

⁹ Моисей Йегъовӕйӕн уый бар лӕвӕрдта, цӕмӕй йын йӕ удыхъӕд ивынӕн ӕххуыс кодтаид. Иу-40 азы размӕ Моисей уыд Египеты паддзахы бинонтӕй, ӕмӕ йӕ уӕд сӕрныллӕг адӕймаг схонӕн нӕ уыд. Моисей ахӕм мӕстыгӕр разынд, ӕмӕ иу лӕджы амардта, хӕрам хъуыддаг кӕй сарӕзта, уый тыххӕй. Моисеймӕ афтӕ каст, ӕмӕ раст бакодта ӕмӕ дзы Йегъовӕ райгонд у. Йегъовӕ йын 40 азы дӕргъы ӕххуыс кодта, цӕмӕй бамбӕрстаид, израилӕгты цагъарадӕй ссӕрибар кӕнынӕн ӕрмӕст хъӕбатырдзинад фаг кӕй нӕу. Хъуыди ма йӕ сӕрныллӕгдзинадыл кусын дӕр. Ӕмӕ уый тыххӕй та хъуамӕ суыдаид коммӕгӕс ӕмӕ йын хъуамӕ уыдаид фӕлмӕн удыхъӕд. Моисей уыцы миниуджытыл бакуыста, ӕмӕ сси хорз разамонӕг (Рац. 2:11, 12; Хъуыд. 7:21–30, 36).

¹⁰ Абон бинонты хистӕртӕ ӕмӕ хистӕр нӕлгоймӕгтӕ хъуамӕ Моисейы фӕзмой. Исчи-иу дын дӕ ныхас куы ницӕмӕ ӕрдара кӕнӕ та дӕм фау куы ’рхӕсса, уӕд-иу ӕм ма фӕхъыг у. Сӕрныллӕг у ӕмӕ, куы фӕрӕдийыс, уӕд-иу дӕ рӕдыдыл басӕтт (Еккл. 7:9, 20). Алыхуызон зындзинӕдтӕ скъуыддзаг кӕнгӕйӕ Йегъовӕйы разамындмӕ гӕсгӕ архай. Ӕмӕ дӕ чи смӕсты кӕны, уыдонимӕ-иу фӕлмӕнӕй ныхас кӕн (Ӕмб. 15:1). Бинонты хистӕртӕ ӕмӕ хистӕр нӕлгоймӕгтӕ афтӕ куы фӕархайынц, уӕд Йегъовӕйы зӕрдӕ барухс вӕййы, бинонты ’хсӕн ӕмӕ ӕмбырды вӕййы фарн ӕмӕ сӕ сӕрныллӕгдзинадӕй иннӕтӕн вӕййынц фӕзминаг.

11–13. Ӕртӕ дзуттаг лӕппуйы нын фӕзминаг цӕмӕй сты?

¹¹ Хицауад нӕ ныхмӕ куы фӕархайы. Ӕнусты дӕргъы зӕххон хицӕуттӕ Йегъовӕйы адӕмы ныхмӕ архайдтой. Хатгай нӕ хицауад алыхуызон фыдхъуыддӕгты фӕаххосджын кӕны. Фӕлӕ ӕцӕгӕй та хъуыддаг уый мидӕг ис, ӕмӕ нӕм мӕсты кӕнынц, фыццаджыдӕр уыдонмӕ нӕ, фӕлӕ Хуыцаумӕ кӕй хъусӕм, уый тыххӕй (Хъуыд. 5:29). Ӕмӕ уый тыххӕй ӕфхӕрд феййафӕм – фӕхудынц ныл, ахӕстӕтты нӕ сбадын кӕнынц, суанг ма нӕ нӕмгӕ дӕр фӕкӕнынц. Фӕлӕ мах Йегъовӕйы ӕххуысы фӕрцы ахӕм уавӕрты вӕййӕм сабыр ӕмӕ сӕ нӕ маст нӕ фӕисӕм.

¹² Ныр та ӕркӕсӕм, Вавилоны уацары чи уыд, уыцы ӕртӕ дзуттаг лӕппуйы – Анани, Мисаил  ӕмӕ Азари – махӕн фӕзминаг цӕмӕй сты, уымӕ *. Вавилоны паддзах сын загъта, цӕмӕй, цы стыр сызгъӕрин гуымиры сарӕзта, уый раз сӕ зонгуытыл ӕрхаудаиккой. Фӕлӕ уыдон нӕ бакуымдтой ӕмӕ, цӕуылнӕ, уый дӕр ын фӕлмӕнӕй бамбарын кодтой. Ӕмӕ сӕм кӕд паддзах бартхъирӕн кодта, судзгӕ пецы ӕппӕрст ӕрцӕудзыстут, зӕгъгӕ, уӕддӕр уыдон, Хуыцауӕн коммӕгӕс кӕй уыдысты, уымӕ гӕсгӕ гуымирыйӕн нӕ бакуывтой. Ӕмӕ сӕ пецы куы баппӕрстой, уӕд сӕ Йегъовӕ уыцы тӕккӕ фервӕзын кодта, кӕд уый ӕнхъӕл дӕр нӕ уыдысты, уӕддӕр. Йегъовӕ сӕ куы нӕ фервӕзын кодтаид, уӕддӕр цӕмӕфӕнды дӕр цӕттӕ уыдысты (Дан. 3:1, 8–28). Сӕ хабарӕй бӕрӕг у, сӕрныллӕг адӕймаг ӕцӕгӕй хъӕбатыр кӕй вӕййы. Нӕ ныхмӕ чифӕнды ма цӕуа, цӕмӕйфӕнды нын тӕссаг ма уа ӕмӕ цыфӕнды ӕфхӕрд ма ӕййафӕм, уӕддӕр мах Йегъовӕйыл нӕ зӕрдӕ ницы хуызы сивдзыстӕм, ӕрмӕстдӕр ууыл уыдзыстӕм иузӕрдион (Рац. 20:4, 5).

¹³ Нӕ иузӕрдиондзинад фӕлвӕрд куы цӕуа, уӕд нӕ бон куыд у ӕртӕ дзуттаг лӕппуйы бафӕзмын? Хъуамӕ сӕрныллӕг уӕм ӕмӕ ныл Йегъовӕ кӕй батыхсдзӕн, ууыл ма дызӕрдыг кӕнӕм (Пс. 118:6, 7). Стӕй нӕ исчи исты фыдхъуыддаджы куы аххосджын кӕна, уӕд дӕр-иу йемӕ хъуамӕ фӕлмӕнӕй ӕмӕ уӕзданӕй дзурӕм (1 Пет. 3:15). Уымӕй уӕлдай, нӕ уӕларвон Фыдӕй цӕй тыххӕй адард уыдзыстӕм, ахӕм исты саразыныл хъуамӕ макуы сразы уӕм.

14, 15. а) Тыхст уавӕры куы вӕййӕм, уӕд хатгай хабар куыд рауайы? б) Исайы 53:7, 10 стихтӕм гӕсгӕ, цӕмӕн ис зӕгъӕн, ӕмӕ тыхст уавӕры Йесойы хуызӕн сӕрныллӕгдзинад никуы ничи равдыста?

¹⁴ Тыхст уавӕры куы уӕм. Не ’ппӕт дӕр тыхст уавӕры бахауӕм. Зӕгъӕм, скъолайы нӕ экзаментӕ дӕттын куы фӕхъӕуы кӕнӕ та нын куысты ног цыдӕр куы бахӕс кӕнынц, уӕд тынг фӕтыхсӕм. Йе та, чи зоны, фӕтыхсӕм, дохтырмӕ цӕуын ӕмӕ нӕ нӕхи дзӕбӕх кӕнын куы фӕхъӕуы, уӕд. Тыхст куы вӕййӕм, уӕд нын сӕрныллӕгдзинад ӕвдисын ӕнцон нӕ вӕййы. Ӕмӕ ахӕм уавӕрты, гӕнӕн ис, смӕсты уӕм, ӕндӕр уавӕрты цӕуыл не смӕсты уаиккам, ууыл. Ӕмӕ ма, чи зоны, иннӕтимӕ тызмӕгӕй ӕмӕ мӕстыйӕ дӕр дзурӕм. Кӕд ды дӕр тыхст уавӕры вӕййыс, уӕд ахъуыды кӕн Йесойы цӕвиттоныл.

¹⁵ Йесо йӕ мӕлӕты размӕ цалдӕр мӕйы дӕргъы уыд тынг тыхст уавӕры. Уый зыдта, стыр хъизӕмӕрттӕ кӕй бавзардзӕн ӕмӕ йӕ кӕй амардзысты (Иоан. 3:14, 15; Гал. 3:13). Йӕ мӕлӕтӕй цалдӕр мӕйы размӕ йӕхӕдӕг загъта, «тынг хъуырдухӕн кӕнын», зӕгъгӕ (Лук. 12:50). Ӕмӕ йӕ мӕлӕтмӕ бирӕ куы нал хъуыд, уӕд та загъта: «Мӕ уд катай кӕны». Йесо Хуыцауӕн йӕ зӕрдӕйы сагъӕстӕ дзургӕйӕ цы загъта, уымӕй бӕрӕг у, сӕрныллӕг ӕмӕ коммӕгӕс кӕй уыд. Уый загъта: «Мӕ Фыд, фервӕзын мӕ кӕн, ацы сахат мӕм цы ӕнхъӕлмӕ кӕсы, уымӕй. Уӕвгӕ, ӕз цӕугӕ дӕр ацы фӕлварӕны тыххӕй ӕркодтон. Мӕ Фыд, скадджын кӕн дӕ ном» (Иоан. 12:27, 28). Рӕстӕг куы ’рцыд, уӕд Йесо хъӕбатырдзинад равдыста ӕмӕ йӕхи Хуыцауы знӕгты къухмӕ радта. Уыдон ын стыр хъизӕмӕрттӕ бавзарын кодтой ӕмӕ йӕ фыдгӕнӕджы мард акодтой. Кӕд Йесо тыхст уавӕры уыд ӕмӕ хъизӕмӕрттӕ бавзӕрста, уӕддӕр сӕрныллӕгӕй Хуыцауы фӕндон сӕххӕст кодта. Ахӕм уавӕры уый ӕнцон кӕцӕй уыдаид. Уӕдӕ Йесойы сӕрныллӕгдзинадӕн ӕмбал нӕй! (Бакӕс Исайы 53:7, 10.)

16, 17. а) Йесо зӕххыл фӕстаг ӕхсӕв куы уыд, уӕд йе ’мбӕлттӕ сӕхи куыд равдыстой? б) Нӕ бон куыд у Йесойы бафӕзмын?

¹⁶ Йесо зӕххыл фӕстаг ӕхсӕв куы уыд, уӕд йе ’ввахс ӕмбӕлттӕ сӕхи афтӕ равдыстой, ӕмӕ сӕм чифӕнды дӕр рамӕсты уыдаид. Дӕ цӕстытыл-ма ауайын кӕн, Йесо уыцы рӕстӕг цы тыхст уыдаид, уый. Йӕ мӕлӕты онг хъуамӕ иузӕрдионӕй баззадаид. Ууыл баст уыд миллиардгай адӕймӕгты цард (Ром. 5:18, 19). Ноджы ахсджиагдӕр та уый уыд, ӕмӕ, куыд бакӕндзӕн, уымӕй кӕнгӕ уыд, йӕ Фыды ном фӕхудинаг уыдзӕн ӕви срухс уыдзӕн (Иов 2:4). Ӕмӕ йе ’ввахс ӕмбӕлттимӕ, ома йӕ апостолтимӕ, фӕстаг хатт ӕхсӕвӕр куы скодта, уӕд уыдоны ’хсӕн карз быцӕу рауад, «уӕлдӕр сӕ чи хъуамӕ уа, ууыл». Йесо сын сӕ зондахаст сраст кӕныныл иу ӕмӕ дыууӕ  хатты нӕ архайдта, уыимӕ уыцы изӕр гыццыл раздӕр дӕр, сӕ къӕхтӕ сын куы ныхсадта, уӕд. Диссаг уый у, ӕмӕ сӕм мӕсты не сси, фӕлӕ семӕ сабырӕй ныхас кодта. Ногӕй та сын фӕлмӕнӕй, фӕлӕ фидарӕй бамбарын кодта, кӕрӕдзийӕн куыд хъуамӕ уыдаиккой, уый. Ӕмӕ сӕ стӕй раппӕлыд, йӕ фӕлварӕнты рӕстӕг йӕ фарсмӕ кӕй уыдысты, уый тыххӕй (Лук. 22:24–28; Иоан. 13:1–5, 12–15).

¹⁷ Ды та ахӕм уавӕры куыд бакодтаис? Тыхст уавӕры куы уӕм, уӕддӕр нӕ бон у Йесойы фӕзмын ӕмӕ иннӕтимӕ фӕлмӕнӕй дзурын. Архай, Йегъовӕ нын цы дзуры, уымӕ гӕсгӕ. Уый нын фӕдзӕхсы, зӕгъгӕ, «исчи уӕ истӕмӕй куы фӕхъыг кӕна, уӕддӕр кӕрӕдзийӕн барут» (Кол. 3:13). Ацы фӕдзӕхст ӕххӕст кӕнын нын ӕнцондӕр уыдзӕн, нӕ зӕрдыл уый куы дарӕм, ӕмӕ не ’ппӕт дӕр, иннӕтӕ нӕм цӕй тыххӕй смӕсты вӕййынц, ахӕм цыдӕр кӕй фӕзӕгъӕм ӕмӕ кӕй фӕаразӕм (Ӕмб. 12:18; Иак. 3:2, 5). Хорз ма уаид, иннӕтӕй-иу сӕ хорз миниуджыты тыххӕй куы раппӕликкам (Еф. 4:29).

18. Йегъовӕ сӕрныллӕг адӕймӕгтӕн хорз уынаффӕтӕ хӕссынӕн куыд ӕххуыс кӕны? Фӕлӕ сӕхи дӕр цы хъӕуы аразын?

¹⁸ Хуыздӕр уынаффӕтӕ хӕсдзыстӕм. Нӕ царды нӕ исты зын фарста алыг кӕнын куы хъӕуа, уӕд-иу нын Йегъовӕ баххуыс кӕндзӕн хорз уынаффӕ рӕхӕссынӕн, ӕрмӕст кӕд сӕрныллӕг стӕм, уӕд. Уый зӕрдӕ ӕвӕры, «сабыр адӕмӕн сӕ лӕгъстӕтӕ» кӕй фехъусдзӕн (Пс. 10:17). Ӕмӕ Хуыцау ахӕм адӕймӕгты ӕрмӕст хъусгӕ нӕ фӕкӕны. Библийы фыст ис: «Уый сабыр адӕмӕн баххуыс кӕндзӕн, цӕмӕй йӕ тӕрхӕттӕм гӕсгӕ цӕрой, сабыр адӕмы сахуыр кӕндзӕн йӕ фӕндагыл цӕуын» (Пс. 25:9). Йегъовӕ ахӕм адӕймӕгты ахуыр кӕны Библийы фӕрцы, стӕй, «ӕууӕнкджын ӕмӕ зондджын цагъар» цы публикацитӕ * рауадзы ӕмӕ цы программӕтӕ бацӕттӕ кӕны, уыдоны фӕрцы (Матф. 24:45–47). Хъуамӕ уӕм сӕрныллӕг ӕмӕ ӕмбарӕм, Йегъовӕйы ӕххуыс нӕ ӕнӕмӕнг кӕй хъӕуы. Ӕмӕ хъуамӕ Библи ӕмӕ нӕ публикацитӕ иртасӕм ӕмӕ, цы базонӕм, уымӕ гӕсгӕ зӕрдиагӕй архайӕм.

19–21. Израилӕгтӕ Кадесы куы уыдысты, уӕд Моисей цавӕр рӕдыд ӕруагъта? Уыцы хабарӕй цӕуыл ахуыр кӕнӕм?

¹⁹ Къаддӕр рӕдийдзыстӕм. Ногӕй та-ма Моисейыл ахъуыды кӕнӕм. Израилӕгтӕ 40 азы дӕргъы ӕдзӕрӕг быдыры куы уыдысты, уӕд Моисей сӕрныллӕгдзинад ӕвдыста ӕмӕ афтӕмӕй Йегъовӕйы зӕрдӕ рухс кодта. Фӕлӕ сӕ балц кӕронмӕ куы ’рхӕццӕ, уӕд иу уавӕры Моисей сӕрныллӕгдзинад нӕ равдыста. Уыцы рӕстӕг йӕ хо,– ӕвӕццӕгӕн ын Египеты йӕ цард фервӕзын кӕнынӕн чи баххуыс кодта, уый,– амард ӕмӕ йӕ  Кадесы баныгӕдтой. Израилӕгтӕ та ногӕй хъаст кӕнын райдыдтой, цы сӕ хъӕуы, уый сын кӕй нӕй. Уыдон Моисеимӕ «хыл кодтой», дон сӕм кӕй нӕ уыд, уый тыххӕй. Израилӕгтӕ хъуыр-хъуыр кодтой, кӕд ӕмӕ Йегъовӕ Моисейы уылты бирӕ диссӕгтӕ сарӕзта, стӕй сын Моисей бирӕ азты дӕргъы разамынд лӕвӕрдта ӕмӕ сын удуӕлдайӕ ӕххуыс кодта, уӕддӕр. Дон сӕм кӕй нӕ уыд, уый тыххӕй Моисеймӕ смӕсты сты, раст цыма уый аххосӕй уыдысты дойны, уыйау (Ным. 20:1–5, 9–11).

²⁰ Моисей сӕм мӕстӕй рафыхт. Йегъовӕйы ныхасмӕ гӕсгӕ Моисей хъуамӕ къӕдзӕхӕн загътаид, цӕмӕй дон ратта. Фӕлӕ уый бӕсты адӕммӕ мӕстыйӕ сдзырдта ӕмӕ загъта, йӕхӕдӕг кӕй сараздзӕн диссаг. Стӕй къӕдзӕх дыууӕ хатты ӕрцавта, ӕмӕ дзы дон рагуылф кодта. Сӕрбӕрзонддзинадӕн йӕ зӕрдӕйы бынат кӕй радта ӕмӕ кӕй рамӕсты, уый тыххӕй стыр рӕдыд ӕруагъта (Пс. 106:32, 33). Уыцы уавӕры Моисей сӕрныллӕгдзинад нӕ равдыста, ӕмӕ уый тыххӕй Зӕрдӕвӕрд зӕхмӕ бацӕуыны фадатӕй ӕнӕхай фӕци (Ным. 20:12).

²¹ Ацы хабарӕй ахуыр кӕнӕм дыууӕ ахсджиаг хъуыддагыл. Фыццаг: хъуамӕ ӕдзухдӕр сӕрныллӕгдзинадыл кусӕм, науӕд ныл сӕрбӕрзонддзинад фӕтых уыдзӕн, ӕмӕ ӕнӕзонд ныхӕстӕ ӕмӕ митӕ кӕнын райдайдзыстӕм. Дыккаг: тыхст уавӕры адӕймагӕн сӕрныллӕгдзинад ӕвдисын ӕнцон нӕ вӕййы, ӕмӕ уымӕ гӕсгӕ хъуамӕ суанг ахӕм уавӕры дӕр архайӕм, цӕмӕй сӕрныллӕг уӕм.

22, 23. а) Дарддӕр дӕр сӕрныллӕгдзинадыл цӕмӕн хъуамӕ кусӕм? б) Софонийы 2:3 стихы ныхӕстӕ цӕуыл дзурӕг сты?

²² Уыдзыстӕм хъахъхъӕд. Тагъд рӕстӕджы Йегъовӕ фыдгӕнджыты се ’ппӕты дӕр зӕххӕй фесафдзӕн, ӕмӕ йыл цӕргӕйӕ баззайдзысты ӕрмӕстдӕр сӕрныллӕг, кӕнӕ сабыр, адӕм. Ӕмӕ уӕд зӕххыл уыдзӕн ӕцӕг фарн (Пс. 37:10, 11). Ды дӕр уыцы сабыр адӕмы ’хсӕн уыдзынӕ? Уыдзынӕ, кӕд, Йегъовӕ пехуымпар Софонийӕн цы ныхӕстӕ ныффыссын кодта, уыдонмӕ гӕсгӕ архайай, уӕд. (Бакӕс Софонийы 2:3.)

²³ Цымӕ ацы стихы афтӕ цӕмӕн ис фыст, «кӕд... ӕмбӕхсӕн ссариккат», зӕгъгӕ? Ацы ныхӕстӕ ууыл дзурӕг не сты, ӕмӕ Йегъовӕйӕн йӕ бон нӕу, йӕ зӕрдӕ йын чи рухс кӕны ӕмӕ кӕй уарзы, уыдоны бахъахъхъӕнын. Уый ууыл дзурӕг у, ӕмӕ нӕхи дӕр цыдӕр аразын хъӕуы, цӕмӕй нӕ Йегъовӕ бахъахъхъӕна. Ныр сӕрныллӕгдзинадыл куы кусӕм ӕмӕ Хуыцауы зӕрдӕ куы рухс кӕнӕм, уӕд «Йегъовӕйы судзгӕ масты бон» фервӕздзыстӕм.