1-2. (a) Waut sajcht de Schreft äwa Moses? (b) Waut deed Moses? (c) Waut vonne Uasoak hab wie to lieren, saunftmootich to sennen?

DE Schreft sajcht: “Mose wea sea saunftmootijch, mea aus aule Mensche, dee oppem Eadboddem weare” (4. Mo. 12:3, Friesenbibel). Meent daut, daut hee schwak wia, Angst haud Entscheidungen to trafen ooda trigjbekjt, wan aundre jäajen am wieren? Eenje wudden veleicht eenen saunftmootjen Mensch soo beschriewen. Oba daut es nich soo. Moses wia een stoakja, äwanämenda Deena von Gott un twieweld nich. Met Jehova siene Help jinkj hee jäajen dän majchtjen Harscha von Ägipten un leid woomäajlich 3 Millionen Menschen derch de Wiltnis un holp daut Volkj Israel, äare Fiend to jewennen.

² Wie haben nich soone Schwierichkjeiten aus Moses, oba jieda Dach mott wie met Menschen ooda Omstend foadich woaren, waut daut schwoa moaken, saunftmootich to sennen. Oba wie haben goode Uasoak to lieren, saunftmootich to sennen, wiels Jehova vesprakjt, daut de Deemootje, ooda Saunftmootje, woaren daut Launt oawen (Psa. 37:11). Wurscht du sajen, daut du saunftmootich best? Wudden aundre daut von die sajen? Ea wie dise wichtje Froagen beauntwuaten, mott wie weeten, waut saunftmootich sennen bediet.

3-4. (a) Met waut jeit Saunftmoot to vejlikjen? (b) Woone vea Ieejenschoften sent needich toom saunftmootich sennen? (c) Wuarom sent dee needich?

³ Saunftmoot * es soo aus een schmocket Bilt. Wuarom?  Krakjt soo aus een Mola schmocke Kalieren brukt toom een Bilt moaken, mott wie uk feine Ieejenschoften haben toom saunftmootich sennen. Doatoo jehieren Deemoot, unjadon sennen, Jelindichkjeit un äwanäment sennen. Wuarom bruck wie dise Ieejenschoften toom Jehova jefaulen?

⁴ Bloos deemootje Menschen sent Gott sienen Wellen unjadon. Een Poat von Gott sienen Wellen es, daut wie jelind, ooda gootjesonnen, sent (Mat. 5:5; Gal. 5:22). Wan wie Gott sienen Wellen doonen, moak wie dän Soton wuttich. Wan wie uk deemootich un jelind sent, haussen ons väle, waut Poat von dän Soton siene Welt sent (Joh. 15:18-19). Doawäajen mott wie äwanäment sennen toom dän Soton wadastonen.

5-6. (a) Wuarom haust de Soton saunftmootje Menschen? (b) Woone Froagen woa wie nu beauntwuaten?

⁵ Daut Jäajendeel von eenen saunftmootjen Mensch es een stolta un wutja, waut Jehova nich jehorcht. Krakjt soo es de Soton. Kjeen Wunda, daut hee de Saunftmootje haust. Dee bewiesen, woo schlajcht hee es, wiels dee haben goode Ieejenschoften, waut hee nich haft. Un waut noch schlemma fa dän Soton es – dee bewiesen, daut hee een Läajna es. Wuarom? De Soton kaun de saunftmootje Menschen nich bat doa brinjen, daut see nich mea Jehova deenen, endoont waut hee sajcht ooda deit (Hiob 2:3-5).

⁶ Wanea es daut fa ons veleicht schwoa saunftmootich to sennen? Wuarom sell wie wieda Saunftmoot sieekjen? Toom dise Froagen beauntwuaten, well wie mol de Biespels seenen von Moses, von de dree Hebräa, waut musten en Babel sennen, un von Jesus.

7-8. Waut deed Moses, aus see am onen Respakjt behaundelden?

⁷ Wan wie Veauntwuatunk kjrieen. Fa dee, waut een Aumt haben, kaun daut schwoa sennen, saunftmootich to bliewen, wan irjentwäa, waut unja äare Oppsecht es, an nich Respakjt wiest ooda sajcht, daut dee schlajchte Entscheidungen moaken. Hast du mol soont beläft? Waut, wan eena ut de Famielje soont deit? Waut wurscht du dan doonen? Kjikj mol, waut Moses deed.

⁸ Jehova stald Moses aus Leida äwa Israel aun un leet am daut Jesaz fa daut  Volkj oppschriewen. Moses siene Sesta Mirjam un sien Brooda Aaron räden jäajen am, wan daut uk kloa to seenen wia, daut Jehova Moses unjastett. See wieren äwa am ontofräd wäajen de Fru, waut hee sikj jewält haud. Eenje Mana wudden en Moses siene Städ sennen doll jeworden un sikj haben wult aufrajchnen, oba Moses nich. Hee wort nich leicht beleidicht. Moses prachad Jehova mau rajcht, daut hee Mirjam de Strof wajchnämen sull (4. Mo. 12:1-13). Wuarom deed Moses daut?

9-10. (a) Waut lieed Jehova Moses? (b) Waut kjennen dee, waut een Famieljenhaupt sent, un de Eltestasch von Moses lieren?

⁹ Moses leet sikj von Jehova belieren. Soo bie 40 Joa ea, aus hee noch to de ägiptische Kjennichsfamielje jehieed, wia hee nich saunftmootich. Don wia hee soo haustich doll, daut hee eenen Maun dootmuak, waut opp sienen deisent no ojjerajcht jehaundelt haud. Moses haud daut soo tohoolen, daut Jehova doamet envestonen wia, waut hee deed. Jehova lieed Moses 40 Joa, daut et nich bloos Moot brukt toom de Israeliten leiden, oba uk Saunftmoot. Om saunftmootich to sennen, must hee uk deemootich, unjadon un gootjesonnen sennen. Hee lieed daut fein un wort een sea gooda Leida (2. Mo. 2:11-12; Apj. 7:21-30, 36).

¹⁰ En onse Tiet sellen dee, waut een Famieljenhaupt sent, un de Eltestasch Moses nodoonen. Wan jie onen Respakjt behaundelt woaren, woat nich leicht beleidicht. Siet deemootich un aunerkjant uk june Fäla (Liera 7:9, 20). Hoolt junt aun Jehova siene Aunwiesungen, woo eena met Trubbels omjeit, un auntwuat emma leeftolich (Spr. 15:1). Wan daut Haupt von de Famielje un de Oppsechtasch soo haundlen, dan jefaulen dee Jehova, sträwen no Fräd un sent een goodet Väabilt fa Saunftmoot.

11-13. Waut fa een Biespel jeewen de dree Hebräa ons?

¹¹ Wan wie vefolcht woaren. Aul von jeehäa haben menschelje Harscha Jehova siene Deena vefolcht. Dee beschuljen ons met veschiednet, oba waut dee werkjlich baudat, es, daut wie “Gott mea jehorchen aus Menschen” (Apj. 5:29). Ons woat veleicht vespott, enjestopt ooda mau rajcht kjarpalich Schoden aunjedonen. Oba met Jehova siene Help kjenn wie en soone Proowen ruich bliewen un ons nich aufrajchnen.

¹² Well wie mol daut Biespel von de dree Hebräa Hananja, Mischael un Asarja unjasieekjen, waut en Babel wieren. * De Kjennich von Babel velangd, daut dee sikj sullen  ver een goldnet Stauntbilt bekjen. Leeftolich erkjläaden see dän, wuarom see daut nich wudden aunbäden. Dee bleewen Gott unjadon, wan de Kjennich uk säd, daut hee an en eenen jlieejent heeten Hettowen vebrennen wudd. Dee wieren reed daut auntonämen, waut Jehova tooleet, endoont woo daut utkjeem. Dee meenden nich, daut Jehova daut schuldich wia an to raden, wan hee daut uk fuaz deed (Dan. 3:1, 8-28). Dee beweesen, daut saunftmootje Menschen werkjlich Moot haben. Kjeen Kjennich, kjeen dreiwen un kjeene Strof kaun ons doavon aufhoolen, eensich Jehova auntobäden (2. Mo. 20:4-5).

¹³ Wan wie aufjeprooft woaren, aus wie Gott tru bliewen, woo kjenn wie dan de dree Hebräa nodoonen? Wan wie ons deemootich doaropp veloten, daut Jehova fa ons sorjen woat (Psa. 118:6-7). Wie auntwuaten dee leeftolich un met Respakjt, waut ons beschuljen orrajchtet to doonen (1. Pet. 3:15). Un wie sent ons gaunz eenich nuscht to doonen, waut ons von onsen leeftoljen Voda aufbrinjen kaun.

14-15. (a) Woo kaun daut utkomen, wan eena äwafoddat es? (b) Wuarom kjenn wie no Jesaja 53:7, 10 no sajen, daut Jesus daut baste Biespel es saunftmootich to bliewen, wan eena sikj uk äwafoddat feelt?

¹⁴ Wan eena sikj äwafoddat feelt. Wie aula feelen ons mol äwafoddat wäajen veschiedne Uasoaken. Veleicht feel wie ons mol soo ver eenen Test enne School ooda wan wie bie de Oabeit waut butajeweeneljet doonen motten ooda wan wie noch mau bloos aun eene Doktarie denkjen, waut ons veleicht fält. Wan wie äwafoddat sent, es daut schwoa saunftmootich to sennen. Sachen, waut ons jeweenlich nich baudren, fangen ons veleicht aun to oajren un wie woaren kort. Wan du die mol hast äwafoddat jefeelt, dan denkj aun Jesus sien Biespel.

¹⁵ En Jesus siene latste Moonaten oppe Ieed wia hee sea unja Druck. Hee wist, daut hee wudd sea lieden motten un daut se am dootmoaken wudden (Joh. 3:14-15; Gal. 3:13). Waut Moonaten ver sienen Doot säd Jesus, daut hee daut sea schwoa haud (Luk. 12:50). Un een poa Doag ver sienen Doot säd hee, daut siene “Seel bedrekjt” wia. Wie seenen, daut hee deemootich un Gott unjadon wia, aus hee sikj to am em Jebäd utschedd. Hee säd: “Voda, rad mie ut dise Stund . . . Oba dit es wuatoo ekj en dise Stund nenjekomen sie. Voda, veharlich dienen Nomen” (Joh. 12:27-28). Aus de Tiet kjeem, haud Jesus dän Moot, sikj von Gott siene Fiend faustnämen to loten. Dee muaken am gaunz tonuscht un brochten am grausom om. Wan hee sikj uk sea äwafoddat feeld un sea lieden must, deed hee saunftmootich Gott sienen Wellen. Onen Twiewel jeef Jesus daut baste Biespel, woo eena saunftmootich sennen kaun, wan eena sikj uk sea äwafoddat feelt (läs Jesaja 53:7, 10).

16-17. (a) Woo proowden Jesus siene Frind siene Saunftmoot auf? (b) Woo kjenn wie Jesus nodoonen?

¹⁶ Dän latsten Owent ver sienen Doot wort Jesus siene Saunftmoot von siene baste Frind oppe Proow jestalt. Stal die väa, woo äwafoddat hee sikj feeld: Wudd hee gaunz tru bliewen batem Doot? Daut Läwen von dusende Millionen Menschen wia opp Spell (Reem. 5:18-19). Un noch wichtja wia, daut et uk doarom jinkj, woo sien Voda wudd aunjeseenen sennen (Hiob 2:4). Bie de latste Moltiet met siene baste Frind toop fungen dee dan “aun sikj doaräwa to Zanken, wäa mank an sull aus de jratsta aunjeseenen woaren”. Jesus haud dee aul mieremol wäajen dit trajchtjewäsen, mau rajcht noch dänselwjen Owent. Oba Jesus wort nich doll; hee bleef ruich. Leeftolich,  oba strenj erkjläad Jesus an wada, waut fa eene Enstalunk see sullen haben. Un dan lowd hee an, daut see am tru biestunden (Luk. 22:24-28; Joh. 13:1-5, 12-15).

¹⁷ Waut wurscht du jedonen haben, wan du en biejlikj soone Loag jewast wieescht? Wie kjennen Jesus nodoonen, wan wie ruich bliewen, wan wie uk äwafoddat sent. Siet unjadon un jehorcht Jehova sien Jeboot, waut sajcht: “Vedroacht eena dän aundren” (Kol. 3:13). Wie woaren dit Jeboot hoolen, wan wie doaraun denkjen, daut wie aula mol waut sajen un doonen, waut aundre oajat (Spr. 12:18; Jak. 3:2, 5). Un prooft emma de aundre fa äare goode Sieden to lowen (Efs. 4:29).

18. (a) Woo halpt Jehova de Saunftmootje, goode Entscheidungen to trafen? (b) Waut motten dee doonen?

¹⁸ Wie woaren bätre Entscheidungen trafen. Wan wie schwoare Entscheidungen em Läwen haben, woat Jehova ons halpen, daut rajchte to doonen, oba bloos wan wie saunftmootich sent. Hee vesprakjt, daut hee de Saunftmootje “äa velangen” hieet (Psa. 10:17). Oba hee woat daut nich bloos hieren. De Schreft sajcht, daut hee de Deemootje, ooda Saunftmootje, halpt daut rajchte to finjen un dee sienen Wajch lieet (Psa. 25:9). Jehova lieet ons derch de Schreft, de Bieekja * un de Videos un de Toopkomes, waut de “trua, weisa Kjnajcht” reedmoakt (Mat. 24:45-47). Wie motten ons Poat doonen un deemootich aunerkjanen, daut ons Help fält. Daut doo wie, wan wie daut studieren, waut Jehova ons jeft, un daut wellich nokomen, waut wie lieren.

19-21. (a) Waut von Fäla muak Moses bie Kadesch? (b) Waut kjenn wie doavon lieren?

¹⁹ Wie woaren daut väabieejen Fäla to moaken. Denkj mol wada aun Moses. Joarenlank bleef hee saunftmootich un jefoll Jehova. Oba aum Enj von de schwoare 40-joasche Reis derch de Wiltnis bleef hee nich saunftmootich. Siene Sesta, waut woomäajlich en Ägipten holp sien Läwen to raden, wia jroz jestorwen un wort en Kadesch begroft. Un nu grunzten de Israeliten wada, daut fa an nich rajcht jesorcht wort. Ditmol bekloagden dee sikj äwa Moses, wäajen dee nich Wota hauden. Wan Moses uk väl Wunda met Jehova siene Help deed un een sea gooda Leida wia un emma daut ieeschte aun  aundre docht, grunzt daut Volkj doawäajen noch. Un daut wia nich bloos, wäajen see nich Wota hauden, oba uk wäajen Moses, aus wudd hee schuldich sennen, daut see kjeen Wota hauden (4. Mo. 20:1-5, 9-11).

²⁰ Nu wia Moses sea doll un bleef nich mea jelind. Enne Städ daut hee Gloowen haud un to dän Steen räd, soo aus Jehova am säd, räd Moses vebettat to daut Volkj un ieed sikj selfst. Dan schluach hee dän Steen tweemol un doa schäld väl Wota rut. Stolt un Wutt brochten am bat doa, eenen schlemmen Fäla to moaken (Psa. 106:32-33). Wäajen hee fa een Stootje nich saunftmootich wia, kunn hee nich en daut vesproakne Launt nenn (4. Mo. 20:12).

²¹ Von dit kjenn wie väl lieren. Ieeschtens mott wie emma doaraun schaufen saunftmootich to bliewen. Wan wie bloos een Stootje nich oppaussen, dan kjenn wie haustich stolt woaren un onbedocht räden un haundlen. Tweedens: Wan wie ons äwafoddat feelen, kjenn wie schwak woaren un doawäajen mott wie doano sträwen saunftmootich to sennen, wan wie uk unja Druck sent.

22-23. (a) Wuarom sell wie wieda Saunftmoot sieekjen? (b) Waut wiest Zefanja 2:3 ons?

²² Wie woaren beschizt woaren. Em korten woat Jehova aule Gottloose oppe Ieed äwatsied schaufen un bloos de Saunftmootje woaren bliewen. Dan woat oppe Ieed werkjlich Fräd sennen (Psa. 37:10-11). Woascht du mank de Saunftmootje sennen? Du kaust, wan du Jehova siene leeftolje Enlodunk aunnemst, waut de Profeet Zefanja oppschreef (läs Zefanja 2:3, NW *).

²³ Wuarom sajcht daut en Zefanja 2:3, daut wie “woomäajlich . . . beschizt” woaren? Daut bediet nich, daut Jehova dee nich beschitzen kaun, waut am jefaulen wellen un waut hee leeft. Daut meent, wie motten doa uk waut too doonen, daut wie kjennen beschizt woaren. Wie haben de Mäajlichkjeit, “dän Dach, wan Jehova sien Oaja kjemt” to äwaläwen un fa emma to läwen, wan wie ons nu aunstrenjen, Saunftmoot to sieekjen un Jehova to jefaulen.