1-2. (a) San Bijbel e taki fu Moses èn san a du? (b) Fu san ede wi musu meki muiti fu kon abi safri-ati?

BIJBEL e taki dati Moses na „a moro safri-ati sma fu ala libisma di ben de na grontapu” (Num. 12:3). Disi wani taki dati a ben de wan swaki man di ben frede fu teki bosroiti èn taki a ben e frede sma di ben gens en? Na so son sma e si trawan di abi safri-ati. Ma a sani disi no tru. Moses ben abi deki-ati èn a no ben e frede fu teki bosroiti. Yehovah yepi en fu go taki nanga a makti kownu fu Egepte, fu de fesiman fu sowan 3.000.000 sma na ini a sabana èn fu yepi den Israelsma fu wini den feanti fu den.

² Wi no e miti den srefi sani leki Moses, ma ibri dei wi e kisi fu du nanga sma di kan meki en muilek gi wi fu sori safri-ati noso wi e kon na ini situwâsi pe wi kan lasi wisrefi. Toku wi abi bun reide fu kon abi a fasi disi. Yehovah e pramisi taki „den safri-ati sma o kisi grontapu” (Ps. 37:11). Yu feni taki yu na wan safri-ati sma? Na dati trawan ben o taki fu yu? Fosi wi piki den aksi disi, wi musu kon sabi san a wani taki fu abi safri-ati.

3-4. (a) Nanga san wi kan agersi safri-ati? (b) San na den fo fasi di wi musu abi fu man sori safri-ati èn fu san ede dati de so?

³ Safri-ati * de leki wan moi tekening. Fa so? Neleki fa wan sma e gebroiki difrenti kloru fu meki wan tekening,  na so wan sma musu abi difrenti fasi fu man sori safri-ati. Wan tu fu den fasi di wan sma musu abi na sakafasi, switifasi, deki-ati èn a musu gi yesi na Yehovah. Fu san ede wi musu abi den fasi disi efu wi wani taki Yehovah breiti nanga wi?

⁴ Soso sma di abi sakafasi de klariklari fu gi yesi na Gado. Gado wani taki wi sori switifasi (Gal. 5:22; 2 Tim. 2:24). Te wi e du a wani fu Gado, dan Satan e ati bron. Sobun awinsi wi abi sakafasi nanga switifasi, toku furu sma na ini a grontapu fu Satan no lobi wi (Yoh. 15:18, 19). Dati meki wi abi deki-ati fanowdu fu kakafutu gi Satan.

5-6. (a) Fu san ede Satan no lobi safri-ati sma? (b) Sortu aksi wi o luku?

⁵ Te wan sma no abi safri-ati, dan a abi heimemre, a no man hori ensrefi te a e atibron èn a no e gi yesi na Yehovah. Dati na soifri fa Satan de. Dati meki a no lobi sma di abi safri-ati fu di den abi bun fasi di en no abi. Èn a sani di e hati en moro na taki den e sori taki en na wan leiman. Fu san ede? Fu di awinsi san a e taki noso san a e du a no man tapu safri-ati sma fu dini Yehovah!​—Yob 2:3-5.

⁶ O ten a kan muilek gi wi fu abi safri-ati? Èn fu san ede wi musu tan meki muiti fu kon abi a fasi disi? Fu piki den aksi disi wi o luku na eksempre fu Moses, a di fu den dri Hebrew man di ben de srafu na ini Babilon èn a di fu Yesus.

7-8. San Moses du di trawan no sori lespeki gi en?

⁷ Te wi abi bigi frantwortu: A no makriki gi sma di abi bigi frantwortu fu tan abi safri-ati, spesrutu te den sma di de na den ondro no e sori lespeki gi den noso te den feni taki den no e teki bun bosroiti. A sani disi miti yu kaba? Kon meki wi taki dati wan famiriman fu yu no e sori lespeki gi yu. San yu o du? Meki wi luku san Moses du di a ben de na ini so wan situwâsi.

⁸ Yehovah poti Moses leki fesiman fu Israel èn a gi en a grani fu skrifi den wet di a ben gi a pipel. A ben de krin taki Yehovah ben horibaka gi Moses. Toku en eigi sisa Meriam nanga en brada Aron  ben krutu en, èn den ben feni taki a no ben musu trow nanga a frow di a ben abi. Efu son man ben de na ini a presi fu Moses, dan kande den ati ben o bron èn den ben o puru atibron na den tapu. Ma Moses no ben de so. A no ben ati bron esi. A begi Yehovah srefi fu dresi Meriam di ben kisi gwasi (Num. 12:1-13). Fu san ede Moses du a sani dati?

9-10. (a) San Yehovah yepi Moses fu kon frustan? (b) San osofamiri edeman nanga owruman kan leri fu Moses?

⁹ Moses gi pasi taki Yehovah yepi en fu kon abi safri-ati. Sowan 40 yari na fesi di a ben de wan memre fu a kownu-oso fu Egepte, a no ben de wan safri-ati man. Wan leisi a ben ati bron so te taki a kiri wan man fu di a ben feni taki a man ben du wan ogri. Moses ben denki taki Yehovah ben o breiti nanga san a du. Ma 40 yari langa Yehovah yepi Moses fu frustan taki a no ben abi deki-ati wawan fanowdu fu tiri den Israelsma. A ben musu abi safri-ati tu. Ma fu man sori safri-ati a ben musu kon abi sakafasi, switifasi èn a ben musu gi yesi na Yehovah. Moses meki muiti fu kon abi ala den fasi disi èn a tron wan bun fesiman.​—Eks. 2:11, 12; Tori 7:21-30, 36.

¹⁰ Na ini a ten disi osofamiri edeman nanga owruman musu teki na eksempre fu Moses. Te sma no e sori lespeki gi yu, dan yu no musu ati bron esi. Abi sakafasi èn no syen fu taki dati yu meki wan fowtu (Preik. 7:9, 20). Lusu problema na a fasi fa Yehovah e sori yu èn taki na wan switi fasi ala ten (Odo 15:1). Yehovah o breiti nanga den osofamiri edeman nanga den owruman di e tyari densrefi na a fasi disi. Te den abi safri-ati, dan freide o de na ini na osofamiri èn na ini a gemeente èn den o de wan bun eksempre gi trawan.

11-13. San wi kan leri fu na eksempre fu den dri Hebrew man?

¹¹ Te sma e frufolgu wi: Na ini den hondrohondro yari di pasa furu tiriman frufolgu Yehovah en pipel. Sonwan fu den e lei gi wi taki wi e du ogri, ma fu taki en leti wi wani ’gi yesi na Gado moro leki na libisma’ (Tori 5:29). Kande den e spotu wi, den e poti wi na strafu-oso, noso den e fon wi srefi. Ma Yehovah kan yepi wi fu no pai ogri fu ogri èn fu tan abi safri-ati te wi e kisi den sortu tesi disi.

¹² Meki wi luku na eksempre fu Hananya, Misael, nanga Asaria, den dri Hebrew man di sma ben tyari go na Babilon. *  A kownu fu Babilon ben meki wan wet taki ala sma ben musu boigi gi wan bigi gowtu popki. Na wan lespeki fasi den sori a kownu fu san ede den no ben o anbegi a popki. Den tan gi yesi na Gado aladi a kownu ben taki dati a ben o trowe den go na ini wan faya onfu. Yehovah frulusu den man disi wantewante, aladi den no ben fruwakti dati. Den ben o tan gi yesi na Yehovah awinsi a no ben o frulusu den (Dan. 3:1, 8-28). Den dri Hebrew man disi sori taki safri-ati sma abi deki-ati. Ala ten safri-ati sma o ’anbegi Yehovah wawan’ awinsi san tiriman wani du èn awinsi sortu strafu den o gi den.​—Eks. 20:4, 5.

¹³ Te sma wani tapu wi fu dini Yehovah, dan fa wi kan teki na eksempre fu den dri Hebrew man disi? Wi musu abi sakafasi èn wi musu abi a frutrow taki Yehovah o yepi wi (Ps. 118:6, 7). Te sma feni taki wi e du ogri, dan wi e piki den na wan safri fasi èn na wan lespeki fasi (1 Petr. 3:15). Èn wi e weigri fu du iniwan sani di kan pori wi matifasi nanga wi lobi-ati Papa.

14-15. (a) San kan pasa nanga wi te wi e stress? (b) Soleki fa Yesaya 53:7, 10 e sori, dan fu san ede wi kan taki dati Yesus na a moro moi eksempre fu wan sma di ben abi safri-ati aladi a ben e stress?

¹⁴ Te wi e stress: Wi alamala e stress son leisi. Kande wi e stress fu di wi musu meki wan eksame na skoro noso fu di wi kisi wan nyun sani fu du na wroko. Kande wi e stress te wi musu du wan oparâsi noso te datra musu ondrosuku wi fu luku san e du wi. Te wi e stress a no makriki fu abi safri-ati. Ala pikinpikin sani e bigin fuga wi. Kande wi e bigin taki grofu noso wi no e sori switifasi. Efu yu de na ini wan situwâsi di e meki yu stress, dan prakseri na eksempre fu Yesus.

¹⁵ Den lasti mun fu Yesus na grontapu ben hebi gi en. A ben sabi taki sma ben o kiri en èn taki den ben o pina en (Yoh. 3:14, 15; Gal. 3:13). Wan tu mun fosi a dede a taki dati a ben de na ini banawtu (Luk. 12:50). Èn wan tu dei fosi a dede, a taki: „A hebi gi mi trutru.” Den wortu di a gebroiki fu taigi Yehovah fa a ben e firi e sori taki a ben abi sakafasi èn taki a ben de klariklari fu du a wani fu Gado. A ben taki: „Mi Tata, grantangi, puru mi na ini a nowtu disi. Toku mi musu pasa a muilek ten disi, bika na fu dati ede mi kon. Mi Tata, gi yu nen glori” (Yoh. 12:27, 28). Yesus ben sabi taki a ben o dede na wan hati fasi èn taki den ben o gi en syen. Ma di a ten doro, a ben abi deki-ati fu meki den feanti fu Gado tyari en go kiri. Aladi a ben e stress èn a ben e pina, toku a du a wani fu Gado. Iya, Yesus na a moro moi eksempre fu wan sma di ben abi safri-ati aladi a ben e stress!​—Leisi Yesaya 53:7, 10.

16-17. (a)  Fa den mati fu Yesus meki en muilek gi en fu abi safri-ati? (b) Fa wi kan teki na eksempre fu Yesus?

¹⁶ A lasti neti fu Yesus na grontapu, den bun mati fu en ben meki en muilek gi en fu abi safri-ati. Prakseri o furu stress Yesus ben abi a neti dati. A ben o tan du a wani fu Yehovah te na dede? Efu a no ben o horidoro, dan milyunmilyun sma no ben o kisi na okasi fu kisi têgo libi (Rom. 5:18, 19). Èn san moro prenspari na taki a nen fu en Papa ben de na ini a tori (Yob 2:4). Ma di a ben nyan nanga den bun mati fu en, den apostel, den  bigin meki „wan bigi trobi suma fu den ben de a moro bigiwan”. Omeni leisi Yesus ben gi den rai fu a sani disi kaba. A srefi neti dati a ben taki nanga den fu a tori disi. Toku Yesus no mandi nanga den. Na wan switi fasi a taigi den baka sortu fasi den ben musu abi. Èn baka dati a prèise den fu di den tan horibaka gi en.​—Luk. 22:24-28; Yoh. 13:1-5, 12-15.

¹⁷ San yu ben o du efu so wan sani ben miti yu? Wi musu abi safri-ati neleki Yesus, srefi te wi e stress. Wi musu de klariklari fu gi yesi na a rai disi: „Tan frudrage makandra” (Kol. 3:13). Wi o man gi yesi na a rai disi te wi e hori na prakseri taki wi alamala e taki noso du sani di kan meki trawan ati bron (Odo 12:18; Yak. 3:2, 5). Èn wi musu prèise trawan gi den bun di den e du.​—Ef. 4:29.

18. Fa Yehovah e yepi safri-ati sma fu teki bun bosroiti, ma san den musu du?

¹⁸ Wi o teki moro bun bosroiti. Te wi no sabi san wi musu du, dan Yehovah kan yepi wi fu teki bun bosroiti. Ma a o du disi soso te wi abi safri-ati. A pramisi wi taki a o arki „a begi fu den safri-ati sma” (Ps. 10:17). Ma boiti taki a o arki den begi fu wi, a o du moro gi wi. Bijbel e taki: „A o meki den safri-ati sma waka soleki fa a wèt fu en e sori. A o leri den safri-ati sma fa fu waka den pasi fu en” (Ps. 25:9). Yehovah e gi wi rai na ini Bijbel èn na ini den buku * di wi e kisi. Wi e kisi rai tu na den konmakandra di „a koni srafu di de fu frutrow” seti èn na ini felem (Mat. 24:45-47). Wi musu abi sakafasi èn wi musu suku yepi na Yehovah. Wi musu studeri en Wortu èn wi musu du san wi e leri.

19-21. Sortu fowtu Moses meki di a ben de na Kades èn san disi e leri wi?

¹⁹ A o yepi wi fu no meki fowtu. Prakseri a tori fu Moses. Furu yari langa a ben abi safri-ati èn Yehovah ben breiti nanga en. Ma baka di den Israelsma ben de na ini a sabana 40 yari, Moses ati bron èn a lasi ensrefi. En sisa di ben yepi kibri en libi di a ben de na ini Egepte, ben dede èn den ben beri en na Kades. Baka  dati den Israelsma bigin krutu baka taki Moses no ben gi den san den ben abi fanowdu. A leisi disi den ben feni taki den no ben abi nofo watra. Aladi Yehovah ben gi Moses a makti fu du so furu wondru gi den èn aladi Moses ben de den fesiman so langa, toku den ben krutukrutu. Den no ben e krutu fu a watra wawan, ma den ben gi Moses a fowtu taki watra no ben de.​—Num. 20:1-5, 9-11.

²⁰ Moses ati bron so te taki a lasi ensrefi. Na presi fu taki nanga a stonbergi soleki fa Yehovah ben taigi en, Moses taki grofu nanga a pipel èn a no gi Yehovah grani. Baka dati a naki a stonbergi tu leisi èn bun furu watra bigin komoto fu a ston. A meki wan seryusu fowtu fu di a ben kon abi heimemre èn a ben ati bron (Ps. 106:32, 33). Fu di Moses no ben sori safri-ati, meki a no ben mag go na ini a Pramisi Kondre.​—Num. 20:12.

²¹ Wi kan leri wan tu prenspari sani fu a tori disi. A fosi sani na taki wi musu tan meki muiti fu abi safri-ati. Efu wi no e du dati, dan wi kan kisi heimemre èn wi kan taki èn du don sani. A di fu tu sani na taki srefi te wi e stress wi musu meki muiti fu abi safri-ati.

22-23. (a) Fu san ede wi musu tan meki muiti fu abi safri-ati? (b) San den wortu na Sefanya 2:3 wani taki?

²² Wi o kisi kibri. Heri esi Yehovah o puru ala den ogrisma na grontapu èn soso den safri-ati sma o de na libi. Dan fosi freide o de na grontapu (Ps. 37:10, 11). Yu o de wan fu den safri-ati sma disi? Yu kan de wan fu den efu yu e du san Yehovah taki na Sefanya 2:3. (Leisi en.)

²³ Fu san ede Sefanya 2:3 e taki: „Kande unu sa kisi kibri”? Den wortu disi no wani taki dati Yehovah no man kibri den wan di a lobi èn di a feni bun. Den wani taki dati wi musu du wan sani efu wi wani kisi kibri. Efu wi e du muiti now fu kon abi safri-ati, dan Yehovah o breiti nanga wi. Wi o pasa „a dei fu Yehovah en atibron” èn wi o libi fu têgo.