1-2. (a) Moisés mak ema hanesan saida, no nia halo saida? (b) Ita iha razaun diʼak saida atu haburas hahalok laran-maus?

BÍBLIA dehan katak Moisés mak “ema neʼebé laran-maus liu fali ema seluk hotu iha mundu tomak”. (Núm 12:3) Neʼe katak nia fraku, taʼuk halo desizaun, no taʼuk bainhira ema kontra nia ka lae? Karik ema balu hanoin katak ema laran-maus mak hanesan neʼe. Maibé neʼe la loos. Moisés mak Maromak nia atan neʼebé forte, la taʼuk halo desizaun, no aten-brani. Ho Jeová nia ajuda, Moisés hasoru ukun-naʼin kbiit boot iha rai-Ejitu, lori ema maizumenus naʼin–3.000.000 hodi laʼo liu rai-fuik, no ajuda nasaun Izraél atu manán sira-nia inimigu.

² Ita la hasoru susar neʼebé hanesan Moisés, maibé loroloron iha situasaun ka ema neʼebé halo susar mai ita atu hatudu laran-maus. Maski nuneʼe, ita iha razaun diʼak atu haburas hahalok neʼe. Jeová promete katak “ema laran-maus sei simu rai nuʼudar sira-nian”. (Sal 37:11) Ita bele dehan katak ita mak ema laran-maus ka lae? Ema seluk mós dehan katak ita laran-maus ka lae? Antes hatán pergunta importante sira-neʼe, ita presiza hatene laran-maus katak sá.

3-4. (a) Ita bele kompara hahalok laran-maus ho saida? (b) Hahalok haat saida mak ita presiza atu sai ema laran-maus, no tanbasá?

³ Laran-maus * mak hanesan dezeñu furak ida. Oinsá? Hanesan pintór uza kór furak oioin hodi halo dezeñu ida, ita mós tenke hatudu hahalok furak oioin atu sai ema laran-maus. Hahalok sira-neʼe balu mak haraik an, halo tuir, laran-diʼak, no aten-brani. Tanbasá mak ita presiza  hahalok sira-neʼe se ita hakarak atu halo kontente Jeová?

⁴ Ema haraik an sei halo tuir Maromak nia hakarak. Maromak nia hakarak ida mak ita tenke hatudu laran-diʼak. (Gal 5:22) Satanás sai hirus bainhira ita halo Maromak nia hakarak. Tan neʼe maski ita haraik an no laran-diʼak, ema barak iha Satanás nia mundu neʼe odi ita. (João 15:18, 19) Entaun, ita presiza aten-brani atu kontra Satanás.

5-6. (a) Tanbasá mak Satanás odi ema laran-maus? (b) Ita sei buka resposta ba pergunta saida deʼit?

⁵ Ema laran-maus la hanesan duni ho ema foti an, la kontrola hirus, no la halo tuir Jeová. Satanás mak hanesan neʼe duni. Tan neʼe mak nia odi ema laran-maus! Sira hatudu katak nia aat tebes liuhusi sira-nia hahalok diʼak. Sira mós hatudu katak Satanás bosok-teen. Tanbasá? Tanba buat naran deʼit neʼebé nia hatete no halo, labele hanetik ema laran-maus atu serbí Jeová!​—Job 2:3-5.

⁶ Bainhira mak susar atu hatudu laran-maus? Tanbasá mak ita presiza kontinua haburas hahalok laran-maus? Atu hatán ba pergunta sira-neʼe, ita sei estuda ezemplu husi Moisés, mane Ebreu naʼin-tolu neʼebé dadur iha Babilónia, no mós Jesus.

7-8. Saida mak Moisés halo bainhira ema la hatudu respeitu ba nia?

⁷ Bainhira hetan pozisaun: Dala ruma susar ba ema sira neʼebé iha pozisaun atu laran-maus nafatin, liuliu se ema neʼebé sira tau matan la hatudu respeitu ka kritika sira-nia desizaun. Neʼe akontese ona ba Ita ka lae? Oinsá se Ita-nia família ida halo nuneʼe? Ita sei halo saida? Hanoin toʼok saida mak Moisés halo iha situasaun hanesan neʼe.

⁸ Jeová hili Moisés nuʼudar ulun-naʼin ba Izraél no fó priviléjiu ba nia atu hakerek ukun-fuan ba nasaun neʼe. Klaru  katak Jeová apoia Moisés. Maski nuneʼe, Moisés nia biin no maun rasik, Miriam no Arão, koʼalia kontra nia no kritika ninia desizaun kona-ba feto neʼebé nia hola. Se mane seluk mak iha Moisés nia pozisaun, karik sira sei sai hirus no rai odi, maibé Moisés la halo nuneʼe. Nia la sente an lalais. Nia mós husu Jeová atu la fó kastigu tan ba Miriam. (Núm 12:1-13) Tanbasá mak Moisés halo hanesan neʼe?

9-10. (a) Jeová ajuda Moisés atu komprende saida? (b) Saida mak família nia ulun no katuas sira aprende husi Moisés?

⁹ Moisés simu ona treinu husi Jeová. Tinan 40 antes neʼe, bainhira Moisés mak membru ida iha família liurai nian iha rai-Ejitu, nia la hatudu laran-maus. Tuir loloos, nia sai hirus lalais toʼo nia oho mane ida neʼebé nia sente katak halo hahalok la justu. Moisés sente katak Jeová sei apoia ninia hahalok neʼe. Jeová uza tinan 40 atu ajuda Moisés komprende katak hahalok aten-brani deʼit la toʼo, maibé nia presiza laran-maus atu dirije ema Izraél. Atu sai laran-maus, nia mós tenke sai haraik an, halo tuir, no hatudu laran-diʼak. Nia aprende no sai ulun-naʼin neʼebé diʼak.​—Éx 2:11, 12; Após 7:21-30, 36.

¹⁰ Ohin loron, família nia ulun no katuas kongregasaun sira tenke banati-tuir Moisés. Bainhira ema la hatudu respeitu, keta sente an lalais. Ho haraik an rekoñese ita-nia sala. (Ecle 7:9, 20) Halo tuir Jeová nia matadalan kona-ba oinsá rezolve problema ruma. Sempre hatán ho laran-diʼak. (Prov 15:1) Hodi halo nuneʼe, família nia ulun no katuas sira bele halo Jeová kontente, haburas dame, no hatudu ezemplu kona-ba oinsá sai ema laran-maus.

11-13. Mane Ebreu naʼin-tolu hatudu ezemplu saida ba ita?

¹¹ Bainhira ema kontra: Ba tempu kleur, ukun-naʼin sira kontra Jeová nia povu. Karik sira duun ita kona-ba krime oioin, maibé loloos problema nia hun mak tanba ita hili atu “halo tuir Maromak nuʼudar ukun-naʼin duké halo tuir ema”. (Após 5:29) Karik ema goza ita, hatama ita ba komarka, ka baku ita. Maibé ho Jeová nia ajuda, ita sei la selu aat fali no nafatin kalma bainhira hetan koko.

¹² Hanoin toʼok ezemplu husi mane Ebreu naʼin-tolu neʼebé sai dadur. Sira mak Hananias, Misael, no Azarias. * Liurai Babilónia haruka sira atu hakruʼuk ba  estátua boot husi osan-mean. Ho kalma, sira esplika ba liurai tanbasá mak sira lakohi adora estátua neʼe. Sira nafatin halo tuir Maromak maski liurai ameasa atu sunu sira iha fornu neʼebé ahi lakan makaʼas. Jeová deside atu salva sira kedas, maibé sira la hanoin katak Jeová sei halo hanesan neʼe. Sira prontu atu simu konsekuénsia naran deʼit neʼebé Jeová husik atu akontese. (Dan 3:1, 8-28) Sira hatudu katak ema laran-maus mak aten-brani duni. Liurai sira, liafuan ameasa, ka kastigu labele hapara ita atu adora Jeová mesak deʼit.​—Éx 20:4, 5.

¹³ Bainhira ita hetan koko kona-ba ita-nia laran-metin, oinsá mak ita bele banati-tuir mane Ebreu naʼin-tolu? Ita hatudu haraik an hodi fiar katak Jeová sei tau matan ba ita. (Sal 118:6, 7) Ita hatán ho kalma no respeitu ba ema neʼebé duun ita. (1 Ped 3:15) No ita lakohi duni halo buat neʼebé estraga ita-nia relasaun ho ita-nia Aman neʼebé hadomi ita.

14-15. (a) Saida mak bele akontese bainhira ita estrese? (b) Tuir Isaias 53:7, 10, oinsá mak Jesus hatudu ezemplu diʼak liu hotu kona-ba hatudu laran-maus bainhira estrese?

¹⁴ Bainhira estrese: Ita hotu sente estrese tanba razaun oioin. Karik tanba ezame iha eskola ka halo knaar ida iha serbisu-fatin. Ka tanba hanoin kona-ba tratamentu médiku neʼebé ita presiza. Bainhira ita estrese, susar atu hatudu nafatin laran-maus. Situasaun ruma neʼebé baibain diʼak ba ita karik agora halo ita lakon pasiénsia. Karik ita koʼalia liafuan neʼebé la diʼak no trata aat ema. Se ita sente estrese, hanoin kona-ba Jesus nia ezemplu.

¹⁵ Durante fulan ikus sira husi ninia moris iha rai, Jesus hetan estrese boot. Nia hatene katak nia sei hetan terus makaʼas no kastigu-mate. (João 3:14, 15; Gal 3:13) Fulan balu antes nia mate, nia hatete katak nia laran-susar. (Lc 12:50) No loron balu antes nia mate, nia hatete: “Haʼu sente laran-susar tebes.” Ninia liafuan iha orasaun neʼebé fó sai ninia sentimentu hatudu katak nia haraik an no halo tuir Maromak. Nia dehan: “Aman, salva haʼu husi oras neʼe. Maski nuneʼe, haʼu tenke hetan susar neʼe, tanba neʼe mak haʼu mai. Aman, fó glória ba Ita-nia naran.” (João 12:27, 28) Bainhira tempu toʼo, Jesus ho aten-brani entrega nia an ba inimigu neʼebé sei fó kastigu-mate ba nia iha dalan neʼebé sei haterus no hamoe nia. Maski Jesus estrese no hasoru susar boot, nia ho laran-maus halo tuir Maromak nia hakarak. Jesus hatudu ezemplu diʼak liu hotu kona-ba hatudu laran-maus bainhira estrese!​—Lee Isaias 53:7, 10.

16-17. (a) Oinsá mak Jesus hetan koko kona-ba ninia hahalok laran-maus? (b) Oinsá mak ita bele banati-tuir Jesus?

¹⁶ Iha Jesus nia kalan ikus iha rai, ninia belun diʼak sira koko ninia hahalok laran-maus. Hanoin toʼok kona-ba estrese neʼebé Jesus sente iha kalan neʼebá. Nia bele hatudu nafatin laran-metin toʼo mate ka lae? Ema rihun ba rihun nia moris iha ninia liman. (Rom 5:18, 19) Importante liu mak, neʼe envolve mós ninia Aman nia naran. (Job 2:4) No durante han-kalan ikus ho ninia belun sira, katak apóstolu sira, sira komesa “haksesuk malu makaʼas kona-ba sé mak boot liu entre sira”. Jesus tenke korrije beibeik sira kona-ba problema neʼe, inklui iha kalan neʼe! Maski nuneʼe, nia la sai hirus maibé nia hatán ho kalma. Ho laran-diʼak Jesus  esplika fali kona-ba hahalok neʼebé sira tenke haburas. Tuirmai nia gaba ninia belun sira tanba sira apoia nafatin nia ho laran-metin.​—Lc 22:24-28; João 13:1-5, 12-15.

¹⁷ Saida mak Ita sei halo se Ita hasoru situasaun hanesan? Ita bele duni banati-tuir Jesus no hatudu nafatin laran-maus maski ita estrese. Halo tuir Jeová nia mandamentu hodi “kontinua hatudu pasiénsia ba malu”. (Kol 3:13) Ita sei halo tuir mandamentu neʼe, se ita hanoin-hetan katak ita hotu koʼalia no halo buat neʼebé halo ema seluk hirus. (Prov 12:18; Tgo 3:2, 5) No koko atu gaba ema seluk kona-ba sira-nia hahalok diʼak.​—Éf 4:29.

18. Oinsá mak Jeová ajuda ema laran-maus atu halo desizaun diʼak? Maibé saida mak ita tenke halo?

¹⁸ Ita sei halo desizaun diʼak. Bainhira hasoru desizaun neʼebé susar, Jeová sei ajuda ita atu halo desizaun diʼak. Nia bele ajuda ita só deʼit se ita hatudu laran-maus. Nia promete katak nia sei “rona ba ema laran-maus sira-nia harohan”. (Sal 10:17) No nia laʼós rona deʼit ita-nia harohan. Bíblia promete: “Nia sei dirije ema laran-maus sira atu halo buat neʼebé loos, no nia sei hanorin ema laran-maus sira kona-ba ninia dalan.” (Sal 25:9) Jeová fó matadalan ba ita liuhusi Bíblia, publikasaun sira * no programa neʼebé “atan laran-metin no matenek” prepara. (Mt 24:45-47) Ita tenke ho haraik an rekoñese katak ita presiza Jeová nia ajuda, hodi estuda informasaun sira neʼebé Jeová fó no aplika buat neʼebé ita aprende.

19-21. Moisés halo sala saida iha Kades, no ita bele aprende lisaun saida husi ida-neʼe?

¹⁹ Ita sei hadook an husi hahalok sala. Hanoin fali kona-ba Moisés. Ba tinan barak nia hatudu hahalok laran-maus no halo kontente Jeová. Maibé, iha tinan 40 nia rohan durante sira-nia viajen iha rai-fuik, Moisés la hatudu hahalok laran-maus. Ninia biin neʼebé karik ajuda salva ninia moris iha rai-Ejitu, foin mate no hakoi iha Kades. No agora ema Izraél dehan katak sira la hetan ajuda neʼebé sira presiza. Iha tempu neʼe sira “haksesuk malu ho Moisés” kona-ba la iha bee.  Maski sira haree ona milagre barak neʼebé Jeová halo liuhusi Moisés no mós Moisés hatudu ona nia mak ulun-naʼin neʼebé la hanoin an deʼit, maibé povu muramura. Sira muramura kona-ba la iha bee no mós kona-ba Moisés hodi fó sala ba nia.​—Núm 20:1-5, 9-11.

²⁰ Moisés sai hirus tebes no lakon ninia hahalok laran-maus. Maski Jeová haruka Moisés atu koʼalia ba fatuk neʼe, maibé nia koʼalia fali ba povu neʼe ho hirus no dehan katak nia sei halo milagre. Tuirmai, nia baku fatuk neʼe ba dala rua no bee barak suli sai. Moisés halo sala boot tanba nia sai foti an no hirus. (Sal 106:32, 33) Maromak la husik Moisés tama ba Rai Promete tanba nia lakon ninia hahalok laran-maus ba tempu uitoan.​—Núm 20:12.

²¹ Ita bele aprende lisaun importante husi akontesimentu neʼe. Primeiru, ita tenke hakaʼas an beibeik atu mantein ita-nia hahalok laran-maus. Se lae, hahalok foti an bele mosu fali no halo ita koʼalia no hatudu hahalok beik. Segundu, bainhira ita estrese, susar ba ita atu hatudu nafatin hahalok laran-maus, tan neʼe ita tenke hakaʼas an nafatin, maski ita sente estrese.

22-23. (a) Tanbasá mak ita tenke kontinua haburas hahalok laran-maus? (b) Liafuan iha Sofonias 2:3 katak sá?

²² Ita sei hetan protesaun. Lakleur tan, Jeová sei halakon ema aat, no ema laran-maus deʼit mak sei moris nafatin. Tuirmai mundu sei iha dame. (Sal 37:10, 11) Ita mós sei moris hamutuk ho ema laran-maus sira ka lae? Ita bele se Ita halo tuir Jeová nia liafuan neʼebé profeta Sofonias hakerek.​—Lee Sofonias 2:3.

²³ Tanbasá mak Sofonias 2:3 hatete: “Karik imi sei hetan protesaun”? Liafuan neʼe la dehan katak Jeová la iha kbiit atu proteje sira neʼebé hakarak halo nia kontente no neʼebé nia hadomi. Maibé, neʼe katak ita presiza halo buat ruma hodi hetan protesaun. Ita bele hetan salvasaun iha “Jeová nia loron hirus” no bele moris ba nafatin se ita hakaʼas an haburas hahalok laran-maus no halo Jeová kontente.