1-2. (a) Baibel i tok Moses i gat wanem kain pasin? (b) Moses i mekim wanem? (c) Wai na yumi mas kisim pasin bilong daunim yumi yet?

BAIBEL i tok Moses em “man bilong mekim pasin daun tru, na i no gat wanpela man long dispela graun i save daunim em yet olsem Moses.” (Nam. 12:3) Yu ting dispela i makim olsem Moses i no gat strong, em i surik long mekim disisen, na em i pret taim ol narapela i birua long em? Sampela manmeri inap ting olsem. Tasol dispela tingting i no stret. Moses em strongpela wokman bilong God, em i holim wanpela tingting tasol, na em i gat pasin bilong strongim bel. Jehova i helpim Moses na em inap feisim strongpela king bilong Isip, na stiaim bikpela lain tru, inap olsem 3 milion manmeri i go long ples drai nating, na helpim ol long daunim ol birua.

² Yumi no bungim wankain hevi olsem Moses, tasol pasin bilong ol manmeri o sampela samting inap mekim na i hatwok long yumi daunim yumi yet. Maski i olsem, yumi gat gutpela risen long kisim pasin bilong daunim yumi yet. Jehova i tok promis olsem “ol man i gat pasin daun, ol bai kisim graun olgeta.” (Sng. 37:11) Yu ting yu gat pasin bilong daunim yu yet? Yu gat nem long dispela pasin? Yumi bai skelim bekim bilong ol dispela askim. Tasol pastaim yumi laik save, sapos man i gat pasin daun, dispela bai kirapim em long mekim wanem?

3-4. (a) Taim man i daunim em yet, dispela i olsem wanem samting? (b) Wanem ol pasin bai helpim yumi long daunim yumi yet? Bilong wanem?

³ Taim man i daunim em yet, * dispela em naispela pasin tru  na i kain olsem wanpela naispela piksa. Bilong wanem yumi tok olsem? Atis i save bungim na miksim ol naispela kala na bai em inap peintim piksa. Olsem tasol, yumi mas bungim na miksim sampela gutpela pasin na bai yumi inap daunim yumi yet. Sampela bilong ol dispela pasin em pasin bilong bihainim tok, pasin isi, na pasin bilong strongim bel. Wai na yumi mas i gat ol dispela pasin?

⁴ Ol man i gat pasin daun bai daunim laik bilong ol yet na bihainim laik bilong God. Em i laik bai yumi bihainim pasin isi. (Mat. 5:5; Gal. 5:23) Taim yumi bihainim laik bilong God, dispela i save mekim Satan i belhat nogut tru. Olsem na maski yumi bihainim pasin daun na pasin isi, ol manmeri bilong graun bai heitim yumi. (Jon 15:18, 19) Yumi mas strongim bel na bai yumi inap sakim Satan.

5-6. (a) Wai na Satan i heitim ol manmeri i daunim ol yet? (b) Yumi laik kisim bekim bilong wanem ol askim?

⁵ Sapos man i no gat pasin bilong daunim em yet, em bai mekim pasin antap, em i no inap bosim belhat, na em bai sakim tok bilong Jehova. Dispela em ol pasin tru bilong Satan. Olsem na em i heitim tru ol man i daunim ol yet! Pasin bilong ol i soim klia olsem Satan em man nogut na man bilong giaman. Bilong wanem? Taim ol manmeri i daunim ol yet, ol i no inap larim wanpela tok o pasin bilong Satan i stopim ol long mekim laik bilong Jehova!—Jop 2:3-5.

⁶ Wanem ol samting inap mekim na i hatwok long daunim yumi yet? Wai na yumi mas wok yet long kisim dispela pasin? Yumi bai kisim bekim bilong ol dispela askim taim yumi skelim eksampel bilong Moses, 3-pela Hibru em ol i kalabus long Babilon, na Jisas.

7-8. Moses i mekim wanem taim ol narapela i no rispektim em?

⁷ Holim namba bilong mekim wok bos: Taim man i mekim wok bos, i hatwok long daunim em yet sapos wanpela wokman i sutim tok na i no rispektim em. Olsem wanem? Dispela hevi i bin painim yu? Yu bai mekim wanem sapos wanfamili i sutim tok long yu? Dispela hevi i bin painim Moses. Yumi bai skelim samting em i mekim.

⁸ Jehova i makim Moses long kamap lida bilong lain Israel na raitim ol lo bilong stiaim ol manmeri. Jehova  yet i sambai long Moses. Maski i olsem, susa tru na brata tru bilong Moses, em Miriam na Aron, ol i kros na toktok planti long em i maritim meri bilong narapela lain. Sapos ol narapela man i holim wankain namba olsem Moses, ating ol bai kros na bekim rong—Moses i no mekim olsem. Em i no belhat kwik. Taim Miriam i kisim panismen bilong sik lepra, Moses i askim Jehova long oraitim Miriam. (Nam. 12:1-13) Wai na Moses i mekim olsem?

9-10. (a) Jehova i trenim Moses long luksave long wanem samting? (b) Ol het bilong famili na ol elda inap kisim wanem skul long Moses?

⁹ Moses i larim Jehova i trenim em. Inap olsem 40 yia paslain, Moses i no daunim em yet taim em i stap long haus king bilong Isip. Em i lukim olsem wanpela man i no bihainim stretpela pasin, olsem na em i belhat kwik na kilim dispela man. Moses i ting Jehova bai wanbel long samting em i mekim. Jehova i yusim 40 yia long trenim Moses long luksave olsem em i mas strongim bel bambai em inap stap lida bilong lain Israel; em i mas daunim em yet. Moses i mas daunim laik bilong em yet na bihainim laik bilong ol narapela, na mekim pasin isi. Em i bihainim gut trening em i kisim long God na em i kamap gutpela wasman.—Kis. 2:11, 12; Apo. 7:21-30, 36.

¹⁰ Long nau, ol het bilong famili na ol elda i mas bihainim pasin bilong Moses. Sapos wanpela i no soim rispek, yu no ken belhat kwik. Daunim yu yet na luksave long popaia bilong yu. (Ekl. 7:9, 20) Bihainim tok bilong Jehova long wei bilong stretim hevi. Oltaim yu mas bekim tok long pasin isi. (Prov. 15:1) Taim het bilong famili na wasman i mekim olsem, Jehova bai belgut, dispela bai strongim pasin wanbel, na ol bai stap gutpela eksampel long pasin bilong daunim ol yet.

11-13. Olsem wanem 3-pela Hibru i stap gutpela eksampel long yumi?

¹¹ Taim yumi kisim hevi: Kirap long bipo yet na i kam inap long nau, ol lida bilong graun i mekim nogut long ol manmeri bilong Jehova. Ol i sutim tok olsem yumi mekim kain kain pasin nogut, tasol dispela i no tru. Yumi ‘bihainim tok bilong God tasol, na yumi no bihainim tok bilong ol man.’ (Apo. 5:29) Ol inap tok bilas, kalabusim, paitim, o mekim nogut tru long yumi. Maski ol i putim wanem hevi long yumi, Jehova bai sambai long yumi, na yumi bai stap isi na yumi no inap bekim pait.

¹² Tingim gutpela eksampel bilong 3-pela Hibru em ol i stap kalabus—Hanania, Misael, na Asaria. * King bilong Babilon i tokim ol long brukim skru long traipela imis ol i wokim long gol. Long pasin isi, ol i tokim king olsem ol i no inap lotuim imis. Ol i daunim  laik bilong ol yet na bihainim laik bilong God, maski king i tok long tromoi ol i go insait long traipela paia. Kwiktaim Jehova i seivim laip bilong ol, tasol ol i no ekspektim God long seivim ol. Ol i redi tasol long karim wanem hevi Jehova i larim i kamap long ol. (Dan. 3:1, 8-28) Dispela i soim klia olsem sapos yumi daunim yumi yet, yumi bai strongim tru bel bilong yumi—i no gat wanpela king, wanpela tok, o wanpela strafe inap stopim yumi long “lotu long [Jehova] wanpela tasol.”—Kis. 20:4, 5.

¹³ Sapos hevi i kamap na traim pasin bilong yumi long i stap gut long God, hau bai yumi inap bihainim eksampel bilong 3-pela Hibru? Yumi bilip olsem Jehova bai lukautim yumi. (Sng. 118:6, 7) Taim ol narapela i sutim tok long yumi, yumi bekim tok long pasin isi na pasin rispek. (1 Pita 3:15) Yumi no laik tru long mekim wanpela samting we inap bagarapim pasin bilong yumi long i stap pren bilong gutpela Papa bilong yumi.

14-15. (a) Yumi inap mekim wanem taim yumi wari na tingting planti? (b) Olsem Aisaia 53:7, 10 i kamapim, olsem wanem Jisas i stap gutpela eksampel tru long yumi?

¹⁴ Wari na tingting planti: Kain kain samting inap mekim yumi wari na tingting planti. Ating yumi bai mekim tes long skul o mekim wanpela projek long ples wok. O yumi mas i go long haus sik. Taim yumi wari na tingting planti, yumi bai hatwok long daunim yumi yet. Ol liklik hevi tu inap sikirapim bel bilong yumi. Yumi inap mekim strongpela tok na hatpela pasin. Sapos sampela samting i mekim yumi wari na tingting planti, yumi ken tingim eksampel bilong Jisas.

¹⁵ Sampela mun paslain long Jisas i dai, planti samting i mekim em i wari tru na tingting planti. Em i save olsem em bai karim bikpela pen na hevi na ol birua bai kilim em i dai. (Jon 3:14, 15; Gal. 3:13) Em i tok em i wari tru. (Luk 12:50) Sampela de paslain long Jisas i dai, em i tok: “Nau bel bilong mi i hevi na mi tingting planti.” Beten bilong em i soim olsem em i daunim em yet na bihainim laik bilong God. Em i tok: “Papa, kisim bek mi long dispela taim nogut. Tasol dispela taim nogut i mas kamap long mi, em long dispela as na mi kam. Papa, litimapim nem bilong yu.” (Jon 12:27, 28) Jisas i strongim bel na putim em yet long han bilong lain i birua long God na ol i givim bikpela pen long em, semim em, na kilim em i dai. Maski dispela hevi i mekim na Jisas i wari tru na tingting planti, em i daunim em yet na bihainim laik bilong God. Jisas i stap gutpela eksampel tru long yumi!—Ritim Aisaia 53:7, 10.

16-17. (a) Ol aposel i mekim wanem na dispela inap sikirapim bel bilong Jisas? (b) Olsem wanem yumi inap bihainim eksampel bilong Jisas?

¹⁶ Long nait paslain long Jisas i dai, ol aposel i mekim pasin we inap sikirapim bel bilong em. Planti samting i mekim na Jisas i wari na tingting planti. Em bai stap gut yet long God i go inap long em i dai o olsem wanem? Sapos em i no stap gut long God, laip bilong planti bilion manmeri bai lus. (Rom 5:18, 19) Bikpela samting moa em olsem, pasin bilong em bai bagarapim o stretim gutnem bilong Papa. (Jop 2:4) Long laspela kaikai wantaim ol aposel, em ol pren husat i pas gut tru wantaim em, ol i toktok i go na “bikpela kros i kamap” long “husat bilong ol i winim ol arapela.” Planti taim ol i tok pait long dispela samting na Jisas i stretim ol, na wankain samting i kamap paslain liklik long seim apinun! Tasol Jisas i no belhat. Em i bihainim pasin isi. Em i tok strong liklik, tasol em i laik helpim ol, olsem na em i stori gen long pasin ol i mas bihainim. Em i tok amamas long pasin bilong ol long stap gut long em.—Luk 22:24-28; Jon 13:1-5, 12-15.

 ¹⁷ Yumi bai mekim wanem sapos wankain samting i kamap long yumi? Yumi inap bihainim pasin bilong Jisas na stap isi maski sampela samting i mekim na yumi wari na tingting planti. Yumi mas daunim laik bilong yumi yet na bihainim laik bilong Jehova long “wok yet long karim hevi narapela i putim long [yumi].” (Kol. 3:13) Yumi bai bihainim dispela tok sapos yumi tingim olsem yumi olgeta i save mekim tok na pasin we i sikirapim bel bilong ol narapela. (Prov. 12:18; Jems 3:2, 5) Painim rot bilong tok amamas long ol narapela long gutpela pasin bilong ol.—Efe. 4:29.

18. (a) Taim yumi daunim yumi yet, hau bai Jehova i helpim yumi long mekim gutpela disisen? (b) Yumi yet i mas mekim wanem?

¹⁸ Yumi bai mekim gutpela disisen. Taim yumi pilim hatwok long mekim gutpela disisen, Jehova bai helpim yumi—tasol pastaim, yumi mas daunim yumi yet. Em i tok promis long harim “singaut bilong ol man i gat pasin daun.” (Sng. 10:17) Em bai harim beten na mekim sampela samting moa. Baibel i tok: “Em bai stiaim man i gat pasin daun long bihainim pasin i stret, na em bai skulim ol man i gat pasin daun long bihainim rot bilong em.” (Sng. 25:9) Jehova i stiaim yumi long rot bilong ol tok i stap long Baibel, ol pablikesen * na ol program em “gutpela wokboi i gat savetingting” i redim. (Mat. 24:45-47) Yumi mas daunim yumi yet na luksave olsem yumi nidim helpim. Yumi mekim olsem taim yumi stadim ol pablikesen em Jehova i redim, na bihainim skul yumi kisim.

19-21. (a) Long Kades, Moses i mekim wanem popaia? (b) Stori bilong Moses i givim wanem skul long yumi?

¹⁹ Abrusim ol popaia. Tingim gen stori bilong Moses. Inap planti yia em i daunim em yet na Jehova i belgut long em. Tasol klostu long namba 40 yia bilong lain Israel long wokabaut long ples drai nating, Moses i lusim pasin bilong daunim em yet. Susa bilong em husat i bin seivim laip bilong em long Isip, em i dai na ol i planim em long Kades. Lain Israel i komplein gen. Ol i “kros long Moses” bikos ol i no gat wara. Maski Jehova i yusim Moses long wokim planti mirakel na Moses i daunim laik bilong em yet na stap lida bilong ol inap planti yia, ol manmeri i komplein yet. I olsem ol i laik sutim tok long Moses, olsem em asua bilong em na ol i no gat wara.—Nam. 20:1-5, 9-11.

 ²⁰ Moses i belhat nogut tru na em i mekim hatpela pasin na em i no bihainim pasin isi. Jehova i tokim Moses long toktok long ston, tasol Moses i toktok long ol manmeri na em i krosim ol. Em i tok em yet bai givim wara. Olsem na em i paitim ston 2-pela taim na bikpela wara i kamaut long ston. Pasin antap na belhat i pulim em long mekim bikpela popaia. (Sng. 106:32, 33) Moses i no daunim em yet, olsem na em i no kisim blesing bilong i go insait long Graun Bilong Promis.—Nam. 20:12.

²¹ Yumi kisim gutpela skul long dispela stori. Namba 1: Oltaim yumi mas wok strong long daunim yumi yet. Sapos yumi no mekim olsem, pasin antap inap pulim yumi long mekim pasin kranki. Namba 2: Taim yumi wari na tingting planti, yumi inap pilim hatwok long bihainim pasin daun. Olsem na yumi mas wok strong long daunim yumi yet, maski sampela samting i putim presa long yumi.

22-23. (a) Bilong wanem yumi mas wok yet long daunim yumi yet? (b) Tok bilong Sefanaia 2:3 i givim wanem skul long yumi?

²² Abrusim bagarap. Klostu nau Jehova bai pinisim olgeta manmeri nogut, na ol manmeri i gat pasin daun tasol bai stap. Olgeta manmeri bai i stap bel isi tru. (Sng. 37:10, 11) God bai lukautim ol manmeri husat i daunim ol yet. Yu inap kamap wanpela bilong ol sapos yu bihainim tok bilong Jehova olsem profet Sefanaia i bin raitim.—Ritim Sefanaia 2:3.

²³ Bilong wanem Sefanaia 2:3 i tok, “ating yupela bai i no kisim bagarap”? Jehova i gat strong long lukautim ol manmeri em i laikim na ol manmeri husat i laik mekim em i belgut. Tok bilong Sefanaia i makim olsem yumi mas mekim sampela samting sapos yumi laik bai God i lukautim yumi. Yumi inap abrusim bagarap long “de bilong belhat bilong Jehova,” na kisim laip oltaim. Olsem na long nau yumi mas wok strong long daunim yumi yet na mekim Jehova i belgut long yumi.