1-2. (a) A Mose se vaegā tino pefea, kae ne a mea ne fai ne ia? (e) Se a te pogai e ati aka ei ne tatou a te uiga agamalu?

E FAKAMATALA mai ne te Tusi Tapu a Mose e pelā me ko te “‵toe tagata agamalu eiloa i tāgata katoa i te lalolagi.” (Nume. 12:3) E mata, e fakauiga i ei me i a ia e ‵seva, mataku mā fai ana fakaikuga, io me mataku i ‵tekemaiga? Tenā te auala e fakamatala mai ei ne nisi tino a te tino telā e agamalu. Kae ko te vaegā manatu tenā e ‵kese ‵mao eiloa mai te munatonu. A Mose se tagata malosi, poto i te faiga o ana fakaikuga, kae se tavini loto toa a te Atua. Mai te fesoasoani o Ieova, ne mafai ei ne ia o fakafesagai atu ki te ‵toe pule malosi eiloa o Aikupito, ‵taki ne ia kāti se toko 3,000,000 tino i loto i te koga lavaki, kae fesoasoani atu ki te fenua o Isalaelu ke fakatakavale ne latou a olotou fili.

² E se fakafesagai atu tatou ki mea faiga‵ta kolā ne manumalo i ei a Mose, kae e ‵tau mo tatou i aso takitasi o fakafesagai atu ki tino io me ko tulaga kolā e fai ei ke faigata o agamalu tatou. Kae e ui ei, e maua ne tatou te loto malosi ke ati aka a te uiga tenei. E tauto mai a Ieova me i “tino agamalu ka fai mō latou te lalolagi.” (Sala. 37:11) E mata, ka taku ne koe a koe eiloa e pelā me se tino agamalu? E mata, ka ‵kilo mai pefea a tino ki a koe? A koi tuai o tali ne tatou a fesili tāua konei, e ‵tau o iloa ne tatou a te uiga ke agamalu.

3-4. (a) Se a te mea e mafai o fakatusa ki ei a te uiga agamalu? (e) Ne a uiga e fa e ‵tau o ati aka ne tatou ke maua te uiga agamalu, kae kaia?

³ A te agamalu * e fai pelā me se ata telā ne pēni fakagaligali. I  te auala fea? E pelā me se tino ‵lomi ata telā e fakaaoga ne ia a vaegā ‵kala kese‵kese ke pēni ki ei se ata, e ‵tau o ati aka ne tatou a uiga ‵gali kese‵kese ke mafai o uiga agamalu. Nisi uiga tāua e pelā mo te loto maulalo, fakalogo, uiga filemu, mo te loto malosi. Kaia e manakogina i ei ne tatou a uiga konā māfai e ma‵nako tatou o fakafiafia atu a Ieova?

⁴ Ko tino loto maulalo fua ka faka‵logo o fai te loto o te Atua. A te uiga filemu se vaega o te faiga o te loto o te Atua. (2 Timo. 2:24) Kafai e fai ne tatou te loto o te Atua, ko fai ne tatou a Satani ke kaitaua. Tela la, e tiga eiloa e loto maulalo kae uiga filemu tatou, a te tokoukega o tino kolā ne vaega o te lalolagi a Satani e takalia‵lia mai ki a tatou. (Ioa. 15:18, 19) Tela la, e ‵tau o maua ne tatou te loto malosi ke ‵teke atu a Satani.

5-6. (a) Kaia e takalialia ei a Satani ki tino uiga agamalu? (e) Ne a fesili ka tali aka ne tatou?

⁵ A te tino sē agamalu e fakamatamata, e kaitaua vave, kae sē fakalogo ki a Ieova. Konā eiloa a uiga o Satani. E takalialia a ia ki tino agamalu, me e fakaasi atu ne latou i a ia se tino masei, mai te mauaga ne latou a uiga ‵lei kolā e se maua ne ia. Kae e sili atu i te matagā, e fakamaoni mai ne latou i a Satani se tino loi. Kaia? Me faitalia me ne a ana pati io me ko ana mea e fai, e se mafai o taofi ne ia a tino agamalu mai te tavini atu ki a Ieova!—Iopu 2:3-5.

⁶ Ko te taimi fea kāti e faigata ei ke agamalu? Kae kaia e ‵tau ei mo tatou o tumau i te atiakaga o te uiga agamalu? Ke tali aka a fesili konā, ka sau‵tala eiloa tatou ki te fakaakoakoga a Mose, tamataene Epelu kolā ne ‵nofo fakapagota i Papelonia, mo Iesu.

7-8. Ne saga atu pefea a Mose i te taimi ne seki fakaasi atu ne tino a te āva ki a ia?

⁷ Māfai koe e pule: Se mea faigata ke tumau te agamalu o tino kolā e ‵nofo i tulaga pule māfai e sē āva io me se lotomalie se tino mai lalo i olotou pulega ki olotou fakaikuga e fai. Kai tupu aka eiloa se mea penā ki a koe? E a māfai e fai penā se tino i te kāiga? Ka saga atu pefea koe ki ei? Mafaufau ki te auala ne fakafesagai atu ei a Mose ki te tulaga tenā.

⁸ Ne ‵tofi aka ne Ieova a Mose e pelā me se takitaki o Isalaelu kae ne talia ne ia ke tusi ne Mose a tulafono kolā ne takitaki ki ei a te fenua. E mautinoa eiloa me ne ‵lago atu a Ieova ki a Mose. Kae ko te tuagane mo te taina o Mose, ko  Miliama mo Alona, ne fai‵pati ‵teke atu ki a ia kae mui‵mui ki te fakaikuga a Mose ki te filiga o tena avaga. A nisi tāgata kolā e ‵pau olotou tulaga mo Mose ne kaitāua kae fia taui ma sui—kae e se ko Mose. Ne seki kaitaua vave a ia. Ne fakamolemole atu foki a ia ki a Ieova ke fakagata te fakasalaga o Miliama. (Nume. 12:1-13) Kaia ne saga atu ei a Mose i te auala tenā?

9-10. (a) Se a te mea ne fesoasoani atu a Ieova ke malamalama a Mose i ei? (e) Se a te mea e mafai o tauloto ne ulu o kāiga mo toeaina mai i a Mose?

⁹ Ne talia ne Mose ke akoako a ia ne Ieova. I se 40 tausaga mai mua, i te taimi ne aofia ei a ia i te kaukāiga tupu o Aikupito, ne seki agamalu a Mose. A te ‵tonuga loa, ona ko tena kaitaua, ne tamate ei ne ia se tagata telā ne mafaufau a ia me e fapito i ana mea e fai. Ne mafaufau a Mose me ka ‵lago atu a Ieova ki ana mea ne fai. Ne fesoasoani atu Ieova i se 40 tausaga ke malamalama a Mose me e manakogina ne ia te loto malosi ke ‵taki te kau Isalaelu; ne tāua ‵ki ke agamalu tou tagata. Kae ke agamalu, ne ‵tau foki mo ia o loto maulalo, fakalogo, kae uiga filemu. Ne tauloto faka‵lei ne ia te akoakoga tenā kae ne fai a ia pelā me se ovasia ‵lei ‵ki.—Eso. 2:11, 12; Galu. 7:21-30, 36.

¹⁰ I aso nei, e ‵tau mo ulu o kāiga mo toeaina o fakaakoako ki a Mose. Kafai e se āva atu a tino ki a latou, e se ‵tau o kaitaua vave latou. Ke loto maulalo kae talia so se mea ‵se a koe. (Fai. 7:9, 20) Ke fakalogo o tautali i fakatonuga a Ieova e uiga ki te auala ke faka‵lei aka ei a fakalavelave. Kae ke tali atu i se leo filemu. (Faata. 15:1) A ulu o kāiga mo ovasia kolā e fai penā e fakafiafia ne latou a Ieova, e tausi ne latou te filemu, kae tuku atu foki se fakaakoakoga ki te auala ke fakaasi atu te uiga agamalu.

11-13. Se a te fakaakoakoga ne tuku mai ne te tokotolu Epelu konei ki a tatou?

¹¹ Māfai ko fakasauagina: E ‵tusa mo tala fakasolopito, ne fakasauagina ne tino pule a tino o Ieova. E mafai o fakasala ne latou tatou e pelā me ne tino e fai “amioga solitulafono,” kae ko te pogai tāua e kaitāua mai ei latou, me e filifili tatou ke “faka‵logo ki te Atua e pelā me ko te pule i lō tāgata.” (Galu. 5:29) E mafai o fakatauemugina, falepuipui, io me fai fakamasei tatou. Kae e auala i te fesoasoani o Ieova, ka se taui ma sui tatou kae ka tumau eiloa i te ‵nofo filemu i tofotofoga.

¹² Mafaufau la ki te fakaakoakoga ne tuku mai ne tamataene Epelu e tokotolu—Hanania, Misaeli, mo Asalia. * Ne fakatonu atu te tupu o Papelonia ki a latou ke ifo ki te tupua telā e faite ki aulo. Ne fakamatala atu ne latou mo te atafai ki te tupu a te pogai e se tapuaki atu ei latou ki te tupua faite tenā. Ne tumau eiloa latou i te faka‵logo ki te Atua faitalia a fakamatakutakuga  a te tupu ke ‵sunu latou ki te afi ‵ka ulaula. Ne gasuesue eiloa a Ieova o faka‵sao fakavave a tamataene konei, kae ne seki mafau‵fau latou me ka fai ne Ieova a te mea tenā ki a latou. Kae ne toka eiloa latou o talia so se ikuga telā e talia ne Ieova. (Tani. 3:1, 8-28) Ne fakamaoni atu ne latou me i tino agamalu, e loto ma‵losi eiloa—e seai se tupu, mea fakama‵taku, io me se fakasalaga e mafai o taofi ne ia te lotou fakaikuga ke “tapuaki” atu fua ki a Ieova tokotasi.—Eso. 20:4, 5.

¹³ Kafai ko tofotofogina a ‵tou fakamaoni ki te Atua, e mafai pefea o fakaakoako tatou ki tamataene Epelu e tokotolu konei? E tali‵tonu tatou mo te loto maulalo me ka tausi ne Ieova tatou. (Sala. 118:6, 7) E tali atu tatou ki tino kolā e kinau mai i se auala atafai kae āva. (1 Pe. 3:15) Kae e mautinoa eiloa me e se ma‵nako tatou o gutugutulua i ‵tou va fakataugasoa mo te ‵tou Tamana alofa.

14-15. (a) Ne a mea e mafai o ‵tupu māfai e manava‵se tatou? (e) E ‵tusa mo te Isaia 53:7, 10, kaia e fai ei tatou me i a Iesu ko te ‵toe fakaakoakoga ‵lei o te fakaasi atu o te agamalu faitalia te mafatia?

¹⁴ Māfai e fakafesagai atu ki te manavase: E kese‵kese a pogai e manava‵se i ei a tatou. Kāti e manava‵se tatou mai mua o fai se sukega i te akoga io me se galuega tāua i te koga ga‵lue. Io me ko kamata o manava‵se tatou mai te mafau‵fau ki togafiti fakatokita kolā e manakogina ne tatou. Kafai ko manava‵se valevale tatou, ko faigata i ei ke uiga agamalu. E mafai o ‵sae aka a fakalavelave kolā e fai ei ke kaitāua kae fai atu i ei ne tatou a pati kolā e ‵tagi ‵sala kae sē atafai. Kafai koe se tino telā ne manavase sāle, ke mafaufau ki te fakaakoakoga a Iesu.

¹⁵ Talu mai masina fakaotioti o tena olaga i te lalolagi nei, ne mafatia malosi eiloa a Iesu. Ne iloa ne ia me ka tamate a ia kae ka logo‵mae malosi. (Ioa. 3:14, 15; Kala. 3:13) I nāi masina mai mua o tena mate, ne fai mai i a ia e mafatia. (Luka 12:50) Kae i nāi aso mai mua o tena mate, ne fai mai a Iesu: “Ko se toka toku loto.” E mafai o lavea ne tatou tena loto maulalo mo tena fakalogo ki te Atua i te taimi ne fakaasi atu katoa ana lagonaga e auala i se ‵talo: “Toku Tamana, fakaola aka au mai i te itula tenei. E ui i ei, tenei eiloa te pogai ne oko mai ei au ki te itula tenei. Toku Tamana, faka‵malu tou igoa.” (Ioa. 12:27, 28) I te okoatuga ki te taimi tonu, ne tuku atu ne Iesu mo te loto malosi a ia eiloa ki lima o fili o te Atua, kolā ne tamate ne latou a ia i se auala logo‵mae kae fakamasiasi. Faitalia te mafatia mo te logo‵mae, ne agamalu eiloa a Iesu o fai te loto o te Atua. E mafai o fai atu tatou me i a Iesu ko te ‵toe fakaakoakoga tu ‵kese o se tino telā e fakaasi atu ne ia te agamalu i te taimi e loto mafatia ei!—Faitau te Isaia 53:7, 10.

16-17. (a) Ne tofotofo pefea ne taugasoa o Iesu a tena uiga agamalu? (e) E mafai pefea o fakaakoako tatou ki a Iesu?

¹⁶ I te ‵toe po o Iesu i te lalolagi nei, ne tofotofo ne ana soko ‵pili a tena agamalu. Mafaufau ki te lasi o te mafatia o Iesu i te po tenā. E mata, ka tumau tena fakamaoni ke oko ki te mate? E faka‵na eiloa a ola o te fia piliona o tino ki a ia. (Loma 5:18, 19) Kae e sili atu i te tāua, me ne aofia i ei te igoa o tena Tamana. (Iopu 2:4) Kae i tena toe ‵kaiga mo ana taugasoa ‵pili, ko te kau apositolo, ne iku atu eiloa a te lotou sau‵talaga ki “se kinauga lasi” i a latou eiloa “me ko oi te ‵toe tino sili i a latou.” Ne faka‵tonu ne Iesu ana taugasoa i te ukega o taimi i te fakalavelave eiloa tenei, e aofia i ei te afiafi eiloa tenā! E fakaofoofogia me ne seki kaitaua eiloa a Iesu ki a latou, kae ne saga atu a ia mo te atafai. Ne fakamatala fakafia atu ne Iesu mo te atafai a te kilokiloga telā ne ‵tau o maua ne latou. Kae oti aka, fakamālō atu ei a ia ki ana taugasoa mō te fakamaoni o ‵lago atu ki a ia.—Luka 22:24-28; Ioa. 13:1-5, 12-15.

¹⁷ Ka saga atu koe pefea māfai e tu atu koe i se tulaga tai ‵pau? E mafai o fakaakoako tatou ki a  Iesu kae tumau i te loto maulalo faitalia me e loto mafatia tatou. Ke loto fia‵fia o faka‵logo ki te fakatonuga a Ieova ke “fakatau fa‵ki faeloa [tatou] i a [tatou] eiloa.” (Kolose 3:13) Ka faka‵logo tatou ki te fakatonuga tenei māfai e masaua ne tatou me i ‵tou pati mo faifaiga e mafai o fai ei ke kaitāua a nisi tino. (Faata. 12:18; Iako. 3:2, 5) Kae taumafai o fai‵pati ki mea ‵lei e lavea ne tatou i nisi tino.—Efe. 4:29.

18. E fesoasoani mai pefea a Ieova ki tino agamalu ke fai a fakaikuga ‵lei, kae ne a mea e ‵tau o fai ne latou?

¹⁸ Ka fai ne tatou a fakaikuga ‵lei. Kafai e fakafesagai atu tatou ki filifiliga e fai i te olaga, ka fesoasoani mai eiloa a Ieova ke fai ne tatou a fakaikuga ‵lei—māfai fua tatou e agamalu. E tauto mai a ia me ka lagona ne ia “te fakamolemole a te tino agamalu.” (Sala. 10:17) Kae ka uke atu a mea e fai ne ia i lō te fakalogologo mai fua ki ‵tou fakamolemole. E folafola mai te Tusi Tapu: “Ka takitaki ne ia a te tino agamalu ki te mea tonu, kae ka akoako ne ia a tino agamalu ki ana auala.” (Sala. 25:9) E tuku mai ne Ieova a te takitakiga tenā i te Tusi Tapu mo tusi * kae e penā foki a polokalame kolā ne fakatoka ne “te tavini fakamaoni kae poto.” (Mata. 24:45-47) E ‵tau o talia ne tatou mo te loto maulalo me e manakogina ne tatou te fesoasoani o Ieova, mai te suke‵suke ki tusi kolā e tuku mai ne ia, kae loto fia‵fia o fakagalue aka a mea e tauloto ne tatou.

19-21. Se a te mea ‵se ne fai ne Mose i Katesa, kae ne a akoakoga e mafai o tauloto ne tatou mai i ei?

¹⁹ Ka ‵kalo kea‵tea tatou mai te faiga o mea ‵se. Toe mafaufau aka ki a Mose. Ne tumau eiloa a ia i te agamalu kae fakafiafia ne ia a Ieova mō se fia sefulu tausaga. Kae i te fakaotiotiga o te malaga faigata i te koga lavaki mō se 40 tausaga, ne seki mafai ne Mose o fakaasi atu te uiga agamalu. A tena tuagane, te ‵toe tino eiloa telā ne fesoasoani o fakasao tena ola i Aikupito, ne fatoā mate kae ne tanu i Katesa. Kae ne toe ‵losi mai te kau Isalaelu me i a latou ne seki tausi faka‵lei. I te taimi tenei, ne “kinau atu a tino ki a Mose” ona ko te sē lava o vai. E tiga eiloa ne tuku atu ne Ieova ki a Mose a te malosi ke fai a vavega e uke kae faitalia eiloa me ne loto fiafia a Mose ke ‵taki ne ia a tino konā mō se taimi leva, kae ne fameo eiloa a tino. Ne seki fameo fua latou ki te sē lava o vai kae e penā foki ki a Mose, e pelā me i o ia te ‵se ne ala ei o fiainu latou.—Nume. 20:1-5, 9-11.

 ²⁰ Ne kaitaua malosi a Mose, telā ne seki fakaasi atu ei ne ia te agamalu. I lō te faipati mo te fakatuanaki ki te kaupapa, e pelā mo te fakatonuga a Ieova, ne faipati eiloa a Mose mo te kaitaua ki tino kae tavae ne ia a ia eiloa. Oti aka, ‵kini ei ne ia te papa fakalua taimi kae ne ‵sali mai ei a vai e uke. Ne fai ne te fakamatamata mo te kaitaua ke fai ne ia se matugā mea ‵se. (Sala. 106:32, 33) Ona ko te sē lava o te uiga agamalu, ne seki talia ei ke ulu atu a Mose ki te Fenua o te Folafolaga.—Nume. 20:12.

²¹ Mai te fakalavelave tenei, e tauloto ne tatou a akoakoga tāua mai i ei. Muamua la, e ‵tau o ga‵lue faeloa tatou i te fakatumauga o se kilokiloga agamalu. Kafai e manatu mā‵ma tatou ki ei, ka faigofie o sae aka te uiga fakamatamata i a tatou, kae fai ei ke fai‵pati kae fai ne tatou a mea va‵lea. Te lua, e mafai o fai ne te manavase ke loto vāi‵vai tatou, tela la, e ‵tau mo tatou o agamalu faitalia me e manava‵se malosi tatou.

22-23. (a) Kaia e ‵tau ei mo tatou o tumau faeloa i te ‵sala atu ki te agamalu? (e) Se a te mea e fakaasi mai i te Sefanaia 2:3?

²² Ka puipuigina tatou. Se leva nei, ka fakaseai atu ei ne Ieova a tino ma‵sei katoa mai te lalolagi nei, kae ko tino agamalu fua ka ‵nofo i te lalolagi. Kae ka maua i ei te filemu tonu i te lalolagi. (Sala. 37:10, 11) E mata, ka aofia koe i tino agamalu konā? E mafai o fai koe penā māfai e fai ne koe a te mea telā e fakamalosi mai a Ieova ke fai ne koe telā ne fakamau ne te pelofeta ko Sefanaia.—Faitau te Sefanaia 2:3.

²³ Kaia e fai mai ei a te Sefanaia 2:3 penei: “Kāti ka ‵funa aka koutou”? E se fakauiga eiloa a te fakamatalaga tenā me e se mafai ne Ieova o puipui a latou kolā e ma‵nako o fakafiafia a ia mo tino kolā e alofa a ia ki ei. I lō te fai penā, e fakaasi mai me e ‵tau o fai ne tatou se mea ko te mea ke puipui ei tatou. E maua ne tatou te avanoaga ke ‵sao atu i “te aso o te kaitaua o Ieova” kae ola ki te se-gata-mai māfai e fai ne tatou a taumafaiga ke ‵sala atu ki te agamalu kae fakafiafia a Ieova.