1, 2. а) Кыӵе адями вал Моисей но мар со лэсьтыны быгатӥз Инмарлэн юрттэменыз? б) Малы милемлы зӥбыт-востэм сямез будэтоно?

 БИБЛИЫН гожтэмын, «Моисей дунне вылысь вань адямиослэсь зӥбыт-востэм вал» шуыса (Лыд. 12:3). Возьматэ-а со, куке мукетъёсыз Моисеез тэргазы, со ляб, дӥсьтӥсьтэм но юн луэмзэ возьматыны кышка вал шуыса? Озьы куд-ог адямиос зӥбыт-востэм адямиез син азязы пукто. Но со озьы ӧвӧл. Зэмзэ вераса, Инмарлэн та ужась-тыршисез кужмо, дӥсьтӥсь но кышкасьтэм адями вал. Иеговалэн юрттэменыз, со ӧз кышка кужмо фараонлы пумит мыныны, кыр дуннеетӥ калыкез нуыны, кудӥз пӧлын 3 000 000 адямиос вал, вылды, но Израильлы юрттӥз тушмонъёссэ вормыны.

² Ми Моисейлэн кадь шуг-секытъёсын ум пумиськиське ке но, котькуд нунал сюриськомы учыръёсы, кудъёсаз зӥбыт-востэм луыны капчи ӧвӧл. Но милям мугмы вань та сямез будэтыны. Иегова кылзэ сётэ, «зӥбыт-востэм улӥсьёс музъем басьтозы» шуыса (Пс. 36:11). Лыдъяськоды-а тӥ асьтэдыз зӥбыт-востэм адямиен? Нош малпало-а озьы мукет адямиос? Та кулэ луись юанъёслы валэктонъёс шедьтон понна, нырысь тодоно, мае возьматэ зӥбыт-востэм луон.

3, 4. а) Маин ӵошатыны луэ зӥбыт-востэм луонэз? б) Кыӵе сямъёс милемлы кулэ, зӥбыт-востэм луон понна? Малы?

³ Зӥбыт-востэм b сямез чебер суредэн ӵошатыны луэ. Суредасьлы суредан понна пӧртэм буёлъёс кулэ, озьы ик зӥбыт-востэм  луон понна пӧртэм сямъёс кулэ. Соос пӧлы пыро лякыт, кылзӥськись но кышкасьтэм сямъёс. Инмарез шумпоттэммы потэ ке, малы милемлы та сямъёс кулэ?

⁴ Зӥбыт-востэм адями гинэ Инмарлэсь эриксэ дась луыса быдэсъя. Со сяна, Инмарлэн потэ, ми асьмеды ваньмыныз лякытэн мед возёмы шуыса (2 Тим. 2:24). Куке ми Инмарлэсь эриксэ быдэсъяськомы, Шайтан туж лекоме. Соин ик ми зӥбыт-востэмесь но лякытэсь луыны тыршиськомы ке но, тросэз адямиос, кудъёсыз Шайтанлэн ки улаз возисько, милемыз адӟемпотостэм каро (Иоанн 15:18, 19). Озьыен, Шайтанлы пумит сылон понна, милемлы кышкасьтэм луоно.

5, 6. а) Малы Шайтан зӥбыт-востэм адямиосты адӟемпотостэм каре? б) Кыӵе юанъёслы милемлы валэктонъёс шедьтоно?

⁵ Вылтӥяськись адями зӥбыт-востэм адямилэсь чылкак мукет луэ. Со вожпотэмзэ уг ваты но Иеговалэсь уг кылзӥськы. Ӵапак озьы Шайтан ассэ возе. Паймонэз ӧвӧл, со зӥбыт-востэм адямиосты адӟемпотостэм каре шуыса! Зӥбыт-востэм луыса, соос Шайтанлэсь вылтӥяськись луэмзэ шараяло. Но Шайтан понна тужгес но уродэз, соос солэсь пӧяськемзэ шараяло шуыса, малы ке шуоно мар гинэ Шайтан медам вера но медам лэсьты, со зӥбыт-востэм адямиосты Иеговалы ужам-тыршемысь дугдытыны уг быгаты (Иов 2:3—5).

⁶ Ку милемлы зӥбыт-востэм луыны капчи ӧвӧл? Малы со сямез азьланяз но будэтоно? Та юанъёслы валэктонъёс шедьтон понна, ойдолэ эскеромы Моисейлэсь, куинь еврей пиослэсь но Иисуслэсь примеръёссэс.

7, 8. Кызьы Моисей ассэ возиз, куке мукетъёсыз сое ӧз гажалэ?

⁷ Куке ми мукетъёсыныз кивалтӥськомы. Адямилы, кудӥзлы кивалтэт сётэмын, зӥбыт-востэм кыльыны секыт луыны быгатэ тужгес но соку, куке адямиос, кудъёсыз сярысь со сюлмаське, сое уг гажало но кутэм ужпумъёссэ тэргало. Пумиськиды-а тӥ таӵе югдурен? Нош матысь адямиосты пӧлысь кин ке но ассэ озьы возьыны кутскиз ке? Мар тӥ кароды? Ойдолэ тодомы, кызьы со выллем учырын Моисей ассэ возиз.

⁸ Иегова Моисеез Израиль калыклы азьветлӥсь карыса пуктӥз но ас калыкезлы катъёс гожтыны дано уж сётӥз. Валамон вал, Моисейлы Иегова юрттэ шуыса. Озьы ке но солэн апаез но агаез, Мариам но Аарон, сое тэрганы кутскизы со понна, кыӵе со аслыз  кышно бырйиз. Кин ке но Моисей интыын вожзэ поттыны но пунэмзэ берыктыны тыршысал. Но Моисей ассэ мукет сямен возиз. Со ассэ кияз кутӥз но Иеговаез сюлворыса куриз Мариамез бурмытыны, кудӥз гижлочерен шобырскемын вал (Лыд. 12:1—13). Малы Моисей ассэ озьы возиз?

9, 10. а) Мае валаны юрттӥз Иегова Моисейлы? б) Малы дышетскыны быгато Моисейлэсь семьяослэн йыръёссы но тӧроос?

⁹ Моисей Иеговалы ассэ тупатъяны лэзиз. Ог 40 арлэсь азьло, куке Моисей фараонлэн семьяез пӧлы пыре вал, сое зӥбыт-востэм адями шуыны уг луы вал. Одӥг пол солэн туж вожез потӥз, но со пиосмуртэз вииз, кудӥз, солэн малпамезъя, шонертэм уж лэсьтӥз. Моисей малпаз, со Иеговалы ярамон луоз шуыса. 40 ар ӵоже Иегова Моисеез дышетӥз, израиль калыкез нуон понна, кышкасьтэм гинэ луыны тырмыт ӧвӧл, зӥбыт-востэм но луыны кулэ шуыса. Нош со понна солы зӥбыт-востэм, лякыт но кылзӥськыны дась луыны дышетсконо вал. Моисейлы та дышетон пайда вайиз, но со туж умой азьветлӥсь луиз (Пот. 2:11, 12; Ап. уж. 7:21—30, 36).

¹⁰ Семьяослэн йыръёссылы но тӧроослы Моисейлэсь адӟем карыны туж кулэ. Тӥледыз уг гажало ке, асьтэдыз кияды кутыны тырше. Зӥбыт-востэм луэ но янгышъёстэс валалэ (Екк. 7:9, 20). Кылзӥське Иеговалэн визь-кенешъёсызлэсь со сярысь, кызьы валамтэосты тупатоно. Мукетъёсыныз котьку но зӥбыт-востэмен вераське (Мад. 15:1). Семьяослэн йыръёссы но тӧроос, кудъёсыз озьы лэсьто, Иеговаез шумпотто, тупаса улон возьыны юртто но адӟем карон возьмато, кызьы зӥбыт-востэм луоно.

11—13. Кыӵе адӟем карон милемлы возьматӥзы Анания, Мисаил но Азария?

¹¹ Куке милемыз уйыло-улляло. Вань дауръёс ӵоже кивалтӥсьёс Иеговалэсь ужась-тыршисьёссэ уйылӥзы-уллязы. Милемыз туннэ но янгыше уськытыны быгато йыружъёс понна, кудъёссэ ми ӧм лэсьтэ. Нош зэмос муг, малы ми уйылон-уллянъёсын пумиськиськомы,— со «адямиослы сярысь, Инмарлы золгес тэрытскыны» тыршеммы (Ап. уж. 5:29). Милемыз ултӥяны, пытсэтэ пуктыны яке жугыны но быгато. Ми пунэмзэ ум берыктӥське, но куке шуг-секытъёсын пумиськиськомы, Иеговалэн юрттэменыз, асьмемыз зӥбыт-востэм возиськомы.

¹² Тодамы ваёмы Анания, Мисаил но Азария нимо куинь еврей пиослэсь учырзэс, кудъёсыз Вавилонэ пытсэтэ сюризы c. Вавилон эксэй соосты бадӟым зарни сульдэрлы йыбырттыны косӥз, но соос зӥбыт-востэмен шуизы солы, озьы уз лэсьтэ шуыса. Эксэй вераз ке но, соосты ӟырдам ӝуась гуре  куштоз шуыса, соос Инмарлэсь кылзӥськизы. Иегова ужась-таршисьёссэ утиз, нош соос ӧз но малпалэ, Инмар сое лэсьтыны кулэ вал шуыса. Соос котьмарлы дась вал (Дан. 3:1, 8—23, 91—95). Соослэн учырысьтызы адӟиське, зӥбыт-востэм адямиос зэмзэ ик кышкасьтэмесь шуыса. Кивалтӥсьёс милемыз Иеговалэсь палэнскыны косо ке но, вӧсь каронэн кышкато яке кыл кутыто ке но, милемыз номыр но Иеговалы гинэ ужам-тыршемысь дугдытыны уз быгаты (Пот. 20:4, 5).

¹³ Кызьы ми Ананиялэсь, Мисаиллэсь но Азариялэсь адӟем карыны быгатӥськомы, куке Иеговалы оскымон луэммы эскериське? Ми асьмемыз зӥбыт-востэм возиськомы но оскиськомы, Иегова ми сярысь сюлмаськоз шуыса (Пс. 117:6, 7). Соослы, кинъёс милемыз кыӵе ке йыружъёс понна янгыше уськыто, ми «востэмен, гажась мылкыдын» ответ сётӥськомы (1 Пётр 3:15). Но ми кышкатэк палэнтӥськомы ваньзэ, мар яратӥсь Атаенымы эшъяськонмес тӥяны быгатэ.

14, 15. а) Кызьы ми вылын сюлмаськонъёс шӧдӥськыны быгато? б) Исаиялэн 53:7, 10 гожтэм кылъёсъя, малы Иисус туж умой адӟем карон возьматӥз, кызьы зӥбыт-востэм луоно, сюлмаськонъёсын пумиськыку?

¹⁴ Куке ми сюлмаськонъёсын пумиськиськомы. Вань трос мугъёс, кудъёсыз сэрен ми сюлмаськиськомы. Кылсярысь, школаын дышетскисьёс ӵем дыръя сюлмасько экзамен азьын, нош мукетъёсыз — уж доразы кыӵе ке ужез быдэстон азьын. Тросэз сюлмасько операция лэсьтон азьын яке тазалыксэс эскерон азьын. Куке ми сюлмаськиськомы, зӥбыт-востэм луыны капчи ӧвӧл. Милесьтым йыркурмес поттыны быгатэ со, малы огшоры дыръя ми саклыкмес ик ум висъяське. Ми асьмемыз соосын чурыт возьыны но соослы лек кылъёсын вазьыны быгатӥськомы. Тӥледлы кыӵе ке сюлмаськон пыр потоно луиз ке, малпаське Иисус Христослэн примерез вылын.

¹⁵ Музъем вылын улонэзлэн берпуметӥ толэзьёсаз Иисус туж бадӟым сюлмаськон пыр потӥз. Со тодӥз, солы туж курадӟоно но виёнэз чидано луоз шуыса (Иоанн 3:14, 15; Гал. 3:13). Кулон азяз кӧня ке толэзьёслэсь азьло со дышетскисьёслы вераз, макем солы секыт шуыса (Лука 12:50). Нош куке кортӵоган дырозь кӧня ке нуналъёс кылизы, со шуиз: «Мынам лулы бугырскиз». Солэн вӧсяськонысьтыз адӟиське, со зӥбыт-востэм но Атаезлэсь кылзӥськыны дась вал шуыса. Со вӧсяськиз: «Атае! Мозмыты Монэ та часлэсь! Но Мон та час понна ик лыктӥ уго. Атае! Аслэсьтыд нимдэ данъя» (Иоанн 12:27, 28). Куке дыр вуиз, Иисус кышкатэк Иеговалэн тушмонъёсызлы ассэ курадӟытыса но сантэмаса виыны лэзиз. Сюлмаськонъёс но курадӟонъёс шоры учкытэк, Иисус зӥбыт-востэм луэмзэ возьматӥз но Инмарлэсь эриксэ быдэстӥз. Веранэз ӧвӧл, Иисус туж умой адӟем карон возьматӥз, кызьы зӥбыт-востэм луоно, сюлмаськонъёсын пумиськыку. (Лыдӟе Исаиялэсь 53:7, 10.)

16, 17. а) Кызьы Иисуслэн зӥбыт-востэм луэмез эшъёсыз пыр эскериськиз? б) Ма ласянь ми Иисуслэсь адӟем карыны быгатӥськомы?

¹⁶ Кулон азяз ӝытазе Иисуслэн зӥбыт-востэм луэмез нош ик эскериськиз — табере матысь эшъёсыз пыр. Пуктэ син азяды, макем сюлмаськоно луиз Иисуслы со ӝытэ. Солы кулытозяз ик Инмарлы оскымон кылёно вал. Со оскымон ӧз кыльысалыз ке, одӥг адямилэн но пырак улыны осконэз ӧй луысал (Рим. 5:18, 19). Но тужгес но кулэез: оскымон кылеменыз со Атаезлэсь ӟеч нимзэ данъясал (Иов 2:4). Но тани, Иисус апостолъёсыныз берпуметӥ ӝытсэ ортчытэ. Ӝыт сиськыкузы дышетскисьёсыз куспын ченгешон потӥз «соос пӧлысь кудзэс бадӟымез шуыса лыдъян пумысен». Иисус трос пол ини соослэсь шонертэм малпамзэс тупатыны тыршиз, кылсярысь, со ӝытэ ик кӧня ке азьлогес. Паймоно  кадь, но Иисус соослы вожзэ ӧз потты но умоен вераськиз. Иисус нош ик соослы лякытэн, но со дыре ик юн мылкыдын, валэктӥз, кызьы соослы асьсэды возьыны кулэ. Собере Иисус эшъёссэ ушъяз солы ялан юрттэмзы понна (Лука 22:24—28; Иоанн 13:1—5, 12—15).

¹⁷ Кызьы тӥ асьтэдыз возьысалды та выллем учырын? Тӥ сюлмаськонъёсын пумиськиськоды ке, Иисуслэсь адӟем каре но каньыл мылкыд возе. Инмарлэн Кылаз гожтэмын: «Ог-огдэс чидаса улэ» (Кол. 3:13). Та косонлэсь дась луыса кылзӥське. Сое капчигес быдэстыны, куке ми тодамы возиськомы, куддыръя ми ваньмы вераськомы но лэсьтӥськомы шуыса сое, мар мукетъёслы уг кельшы (Мад. 12:18; Иак. 3:2, 5). Озьы ик мукетъёссэ умой сямъёссы понна ушъяны тырше (Еф. 4:29).

18. Кызьы Иегова зӥбыт-востэм адямиослы шонер ужпумъёс кутыны юрттэ? Мар милемлы кароно?

¹⁸ Ми шонер ужпумъёс кутомы. Быръён лэсьтыны секыт луиз ке, Иегова юрттоз милемлы шонер ужпум кутыны, но соку гинэ, куке ми зӥбыт-востэм луиськомы. Со кылзэ сётэ, «востэм муртъёслэсь кулэ каронъёссэс» кылэ шуыса (Пс. 9:39). Но куронъёсмес со огшоры гинэ уг кылзы. Библиын гожтэмын: «Зӥбыт улӥсьёсты шонерлыкез пала нуэ, зӥбыт муртъёсты сюресэзлы дышетэ» (Пс. 24:9). Иегова милемыз сюресэзлы дышетэ Библия пыр, озьы ик кенешлэн пумиськонъёсыз, видеороликъёс но Библия вылэ пыкиськыса гожтэм публикациос пыр d, кудъёссэ милемлы сётэ «оскиськымон, визьмо ляльчи» (Матф. 24:45—47). Нош мар милемлы кароно? Зӥбыт-востэмен валано, милемлы Иеговалэсь юрттэт кулэ шуыса, соин сётэм публикациосты эскероно но дась луыса улонэ пыртоно сое, мае тодӥмы.

19—21. Кыӵе янгыш лэсьтӥз Моисей Кадесын? Малы дышетэ милемыз та учыр?

¹⁹ Ми ӧжытгес янгышаломы. Нош ик малпаськомы Моисей сярысь. Трос дасо аръёс ӵоже со ассэ зӥбыт-востэм возиз но Иеговаез шумпоттыса улӥз. Нош куке 40 ар ӵоже израиль калыклэн кыр дуннеетӥ курадӟыса ветлэмез йылпумъяське вал ини, кылдӥз учыр, кудаз Моисей ассэ зӥбыт-востэм возьыны ӧз быгаты. Али гинэ солэн Мариам апаез кулӥз, кудӥз Египетын солэсь улонзэ утиз, вылды. Мариамез Кадесын ватӥзы.  Та дыре израиль калык нош ик ӝожтӥськыны кутскиз, со сярысь уг сюлмасько шуыса. Ву тырмымтэен, «калык Моисей вылэ йыркуръяськыса» улӥз. Моисей, Иеговалэн юрттэменыз, трос паймымон ужъёс лэсьтӥз ке но, озьы ик трос аръёс ӵоже со, ассэ жалятэк, израиль калыкез нуиз ке но, соос Моисей вылэ йыркуръяськыны кутскизы. Соос, ву тырмымтэен гинэ, ӧз ӝожтӥське. Калык Моисеез пыкылыны кутскиз, со ваньмыз понна янгыш шуыса (Лыд. 20:1—5, 9—11).

²⁰ Моисейлэн туж вожез потӥз, но со зӥбыт-востэм луон сярысь вунэтӥз. Солы осконзэ возьматоно но, Иеговалэн косэмезъя, изгурезьлы вазиськоно вал. Нош вожез потыса, Моисей калыклы вазиськиз но вераз, та паймымон ужез ачиз лэсьтоз шуыса. Со бере Моисей изгурезь борды кык пол шуккиз, но отысь ву бызьыны кутскиз. Вылтӥяськонлы но вожпотонлы сётскыса, со туж янгышаз (Пс. 105:32, 33). Та учырын Моисей ассэ зӥбыт-востэм возьыны ӧз быгаты но соин сэрен Сӥзем музъеме ӧз пыры (Лыд. 20:12).

²¹ Та учыр милемыз тросэзлы дышетэ. Нырысетӥез, милемлы ялан тыршоно зӥбыт-востэм сямо луыны. Ми огдырлы ке но тыршемысь дугдӥмы ке, ми соку ик вылтӥяськись луыны но маке кулэтэмзэ вераны яке лэсьтыны быгатомы. Кыкетӥез, сюлмаськонъёсын сэрен кужым быре, соин ик, секыт югдуръёсын зӥбыт-востэм луон понна, тыршоно луэ.

22, 23. а) Малы милемлы азьланяз но зӥбыт-востэм луыны тыршоно? б) Мае возьмато Софониялэн 2:3 кылъёс?

²² Ми утиськомы. Ӝоген Иегова вань лек адямиосыз быдтоз, но зӥбыт-востэм адямиос гинэ кылёзы. Соку музъем вылын зэмос тупаса улон луоз (Пс. 36:10, 11). Луоды-а тӥ со зӥбыт-востэм адямиос пӧлын? Луоды, Иеговалэн сюлмысь ӧтёнэзлы вазиськиды ке, кудзэ гожтӥз Софония пророк. (Лыдӟе Софониялэсь 2:3.)

²³ Малы Софониялэн 2:3 гожтэмын: «Оло нош... ватӥськыны быгатоды»? Со уг возьматы: Иегова уг быгаты утьыны соосты, кинъёс сое ярато но кинъёслэн сое шумпоттэмзы потэ. Та кылъёс возьмато, утиськон понна милемлы асьмелы но мар ке но кароно шуыса. Ми али ик ини зӥбыт-востэм луыны но Иеговаез шумпоттыны тыршиськомы ке, «Кузё-Инмарлэн вожпотон нуналаз» утиськыны но пырак улыны быгатомы.