1, 2. 1) ¿Baʼax ku yaʼalik le Biblia yoʼolal Moisesoʼ, yéetel baʼax tu beetaj? 2) ¿Baʼax oʼolal maʼ unaj k-séeb pʼuʼujuliʼ?

LE BIBLIAOʼ ku yaʼalikeʼ Moiseseʼ letiʼe máak jach kabal u yóol anchajaʼan way Luʼumaʼ (Núm. 12:3). ¿U kʼáat wa túun u yaʼal tʼonaʼan, séeb u kaʼapʼéeltal u tuukul yéetel sajak? Yaan máaxeʼ bey u yilik le máaxoʼob maʼatech u séeb pʼuʼujuloʼoboʼ. Baʼaleʼ maʼ beyiʼ. Moiseseʼ juntúul máak muʼukʼaʼan, maʼatech u kaʼapʼéeltal u tuukul yéetel maʼ saajkiʼ. Yéetel u yáantaj Jéeobaeʼ tʼaanaj yéetel u reyil Egipto, tu nuʼuktaj kex tres millones máakoʼob teʼ desiertooʼ yéetel tu yáantaj u kaajil Israel utiaʼal u ganartikoʼob le máaxoʼob pʼekmiloʼoboʼ.

² U jaajileʼ maʼatech k-aktáantik le baʼaxoʼob tu aktáantaj Moisesoʼ, baʼaleʼ sáamsamal k-aktáantik jejeláas baʼaloʼob wa k-tʼaan yéetel máaxoʼob jeʼel u beetik k-séeb pʼuʼujuleʼ. Chéen baʼaleʼ yaan baʼax oʼolal maʼ unaj k-séeb pʼuʼujuliʼ. Jéeobaeʼ ku yaʼalikeʼ «le kabal óoloʼoboʼ bíin u tiaʼalintoʼob le luʼumaʼ» (Sal. 37:11). Le oʼolal unaj k-tuklik: «¿Maʼatech wa in séeb pʼuʼujul? ¿Bey wa u yilken u maasiloʼ?». Utiaʼal k-núukik le kʼáatchiʼobaʼ unaj k-naʼatik bix juntúul máak maʼatech u séeb pʼuʼujul.

3, 4. 1) ¿Baʼaxten u kanáantik maʼ u séeb pʼuʼujul máakeʼ bey jeʼex u boʼonol junpʼéel cuadroeʼ? 2) ¿Máakalmáak le kanpʼéel modos unaj k-eʼesikoʼ, yéetel baʼaxten?

³ U kanáantik máak maʼ u séeb pʼuʼujuleʼ * jeʼel u páajtal u keʼetel yéetel junpʼéel jatsʼuts cuadroeʼ. ¿Baʼaxten? Tumen utiaʼal u  boʼonol junpʼéel cuadroeʼ ku meyaj jejeláas jatsʼuts coloroʼob. Juntúul máak ku kanáantik maʼ u séeb pʼuʼujuleʼ ku yeʼesik xan uláakʼ jatsʼuts modos. Ichileʼ táakaʼan le kabal óolaloʼ, u yuʼubik tʼaan, maʼ u séeb pʼuʼujul yéetel maʼ saajkiʼ. Wa k-kʼáat lúubul utsil tiʼ Jéeobaeʼ kʼaʼabéet k-eʼesik le jatsʼuts modosoʼobaʼ. Koʼoneʼex ilik baʼaxten.

⁴ Chéen le máaxoʼob kabal u yóoloʼob ku yuʼubikoʼob u tʼaan Dios yéetel ku beetkoʼob baʼax u kʼáatoʼ. Junpʼéel baʼax u kʼáat ka k-beeteʼ letiʼe maʼ k-séeb pʼuʼujuloʼ (Mat. 5:5; Gal. 5:23). Baʼaleʼ Satanaseʼ ku pʼuʼujul kéen k-beet baʼax ku yaʼalik Jéeoba. Le oʼolal kex kabal k-óol yéetel maʼatech k-séeb pʼuʼujuleʼ, k-pʼektaʼal tumen le máaxoʼob yanoʼob yáanal u nuʼuktaj Satanasoʼ (Juan 15:18, 19). Le oʼolal kʼaʼabéet maʼ k-chʼaʼik saajkil.

5, 6. 1) ¿Baʼaxten Satanaseʼ u pʼekmaj le máaxoʼob maʼatech u séeb pʼuʼujuloʼoboʼ? 2) ¿Baʼax kʼáatchiʼiloʼob ken k-núuke?

⁵ Juntúul máax séeb u pʼuʼujuleʼ nojbaʼal u taaskuba, séeb u kʼuuxil yéetel maʼatech u yuʼubik u tʼaan Jéeoba. Lelaʼ jach bey u beetik Satanasoʼ. Le oʼolal u pʼekmaj le máaxoʼob maʼatech u séeb pʼuʼujuloʼoboʼ, tumen le jatsʼuts modos ku yeʼeskoʼoboʼ ku chíikbesik Satanaseʼ jach kʼasaʼan. Tsʼoʼoleʼ ku yeʼeskoʼobeʼ chéen tuus ku beetik, tumen jeʼel baʼaxak ka u beet wa ka u yaʼaleʼ, maʼ kun páajtal u beetik u xuʼulul u meyajtaʼal Jéeoba (Job 2:3-5).

⁶ Baʼaleʼ ¿tiʼ baʼax súutukiloʼob jeʼel u talamtal maʼ k-séeb pʼuʼujuleʼ? ¿Baʼaxten unaj k-kanáantik maʼ k-séeb pʼuʼujul? Utiaʼal k-núukik le kʼáatchiʼobaʼ, koʼoneʼex ilik baʼax tu beetaj Moisés, le óoxtúul hebreoʼoboʼ yéetel Jesús.

7, 8. ¿Baʼax tu beetaj Moisés ka tʼaanaj Aarón yéetel Míriam tu contra?

⁷ Wa tsʼaʼantoʼon páajtalileʼ yaan kʼiineʼ jach séeb jeʼel k-pʼuʼujuleʼ, maases wa le máax k-nuʼuktikoʼ maʼatech u yeʼesiktoʼon tsiikil wa maʼ maʼalob u yilik le baʼaxoʼob k-chʼaʼtuklik k-beetkoʼ. ¿Tsʼoʼok wa u yúuchultoʼon beyoʼ? ¿Baʼax jeʼel k-beetik wa juntúul k-láakʼtsil ku xuʼulul u yeʼesiktoʼon tsiikileʼ? Koʼoneʼex ilik baʼax tu beetaj Moisés ka úuchtiʼ beyoʼ.

⁸ Jéeobaeʼ tu yéeyaj utiaʼal u nuʼuktik u kaajil Israel yéetel tu tsʼáaj u páajtalil tiʼ utiaʼal u tsʼíibtik le leyoʼob kun nuʼuktik le israelitaʼoboʼ. Lelaʼ ku yeʼesikeʼ Moiseseʼ ku lúubul utsil tiʼ  Dios. Kex beyoʼ, Aarón, u sukuʼun, yéetel Míriam, u kiikeʼ, tʼaanajoʼob tu contra yoʼolal u yatan. Wa tiʼ yaanal máax ka beetaʼak lelaʼ, maʼ xaaneʼ jeʼel u séeb pʼuʼujuleʼ yéetel jeʼel u sutik u jeeleʼ. Baʼaleʼ Moiseseʼ maʼ séeb pʼuʼujiʼ, baʼaxeʼ tu kʼáataj tiʼ Jéeoba ka u luʼs le castigo tu tsʼáaj tiʼ Miriamoʼ (Núm. 12:1-13). ¿Baʼaxten tu beetaj beyoʼ?

9, 10. 1) ¿Baʼax tu kanaj Moisés yéetel u yáantaj Jéeoba? 2) ¿Baʼax jeʼel u kanik le taatatsiloʼob yéetel le ancianoʼob tiʼ Moisesoʼ?

⁹ Moiseseʼ maʼ séeb pʼuʼujiʼ, tumen tsʼoʼok u kanik yaʼab baʼaloʼob tiʼ Jéeoba. Kex cuarenta años táanil tiʼ lelaʼ, teʼ kʼiinoʼob tiʼ kajaʼan tu palacio u reyil Egiptooʼ, séeb u pʼuʼujul kaʼachi. Le oʼolaleʼ tu kíimsaj juntúul máak, tumen utiaʼal letiʼeʼ maʼ maʼalob baʼax ku beetkiʼ. Tumen nojbaʼal u taaskubaeʼ, tu tukleʼ yaan u kʼaʼamal tumen Dios baʼax ku beetik. Jéeobaeʼ tu kaʼansaj tu yáamil cuarenta años utiaʼal u yáantik u naʼateʼ maʼ chéen unaj u yeʼesik maʼ saajkiʼ, baʼaxeʼ unaj u yilik maʼ u séeb pʼuʼujul utiaʼal u nuʼuktik u kaajil Israel. Baʼaleʼ unaj xan u yeʼesik kabal óolal, u yuʼubik tʼaan yéetel maʼ u séeb kʼuuxil. Jach maʼalob bix kaʼansaʼabik, le oʼolal páajchaj u nuʼuktik tubeel le kaajoʼ (Éxo. 2:11, 12; Bax. 7:21-30, 36).

¹⁰ Le taatatsiloʼob yéetel le ancianoʼob teʼ kʼiinoʼobaʼ unaj u beetkoʼob jeʼex tu beetil Moisesoʼ. Wa teech juntúul tiʼ letiʼobeʼ, ilawil maʼ a séeb pʼuʼujul wa maʼatech u yeʼesaʼaltech tsiikil. Kʼam yéetel kabal óolal yaan baʼaxoʼob maʼ maʼalobtak ka beetkiʼ (Ecl. 7:9, 20). Uʼuy tʼaan yéetel chaʼa u yáantkech Jéeoba utiaʼal a wutskíintik le talamiloʼoboʼ, tsʼoʼoleʼ ilawil maʼ a séeb pʼuʼujul (Pro. 15:1). Le taatatsiloʼob yéetel le ancianoʼob ku beetkoʼob beyoʼ ku kiʼimakkúuntkoʼob u yóol Jéeoba, ku yáantajoʼob utiaʼal u yantal jeetsʼelil yéetel ku yeʼeskoʼob tiʼ u maasil maʼ unaj u séeb pʼuʼujuloʼob xaniʼ.

11-13. ¿Baʼax k-kanik tiʼ le óoxtúul hebreoʼoboʼ?

¹¹ Kéen chʼaʼpachtaʼakoʼon. Desde úuchjeakileʼ ku chʼaʼpachtaʼal u kaajal Jéeoba tumen yaʼab gobernanteʼob. ¿Baʼaxten? Yaneʼ ku yaʼalikeʼ tumen k-beetik baʼax kʼaas, baʼaleʼ u jaajileʼ k-chʼaʼpachtaʼal tumen «k-uʼuyik u tʼaan Dios bey k-gobernanteeʼ, maʼ u tʼaan chéen máakoʼobiʼ» (Bax. 5:29). Maʼ xaaneʼ jeʼel k-pʼaʼastaʼaleʼ, jeʼel k-kʼaʼalal carceleʼ wa jeʼel tak k-jaʼajatsʼaʼaleʼ. Baʼaleʼ Jéeobaeʼ ku yáantkoʼon utiaʼal maʼ k-sutik u jeel yéetel maʼ k-séeb pʼuʼujul kéen chʼaʼpachtaʼakoʼon.

¹² Tuukulnakoʼon tiʼ le baʼax tu beetaj le óoxtúul hebreoʼob bisaʼaboʼob palitsiltbil Babiloniaoʼ: Hananías, Misael yéetel Azarías. * U reyil Babiloniaeʼ tu yaʼalajtiʼob ka chinlakoʼob tu táan junpʼéel estatua de oro. Letiʼobeʼ  tu tsoloʼob yéetel tsiikil baʼax oʼolal maʼ ken u beetoʼob. Tu yuʼuboʼob u tʼaan Dios kex aʼalaʼabtiʼob tumen le rey yaan u píikchʼintaʼaloʼob ichil junpʼéel horno jach chokokíintaʼanoʼ. Kex salvartaʼaboʼob tumen Dioseʼ, letiʼobeʼ maʼ tu tukloʼob wa yaan u salvartaʼaloʼob kaʼach teʼ súutuk jeʼeloʼ. Baʼaxeʼ tu chʼaʼtukloʼob u kʼamkoʼob le baʼax ken u chaʼa Jéeoba u yúuchleʼ (Dan. 3:1, 8-28). Beyoʼ tu yeʼesoʼobeʼ le máaxoʼob maʼatech u séeb pʼuʼujuloʼoboʼ, maʼ saajkoʼobiʼ, tsʼoʼoleʼ tu yeʼesoʼobeʼ minaʼan mix juntúul gobernante yéetel mix junpʼéel castigo jeʼel u beetik u xuʼulul k-adorartik Jéeobaeʼ (Éxo. 20:4, 5).

¹³ ¿Bix jeʼel k-beetik jeʼex le óoxtúul hebreoʼob kéen túuntaʼak k-óol utiaʼal u xuʼulul k-adorartik Jéeobaoʼ? Kʼaʼabéet k-eʼesik kabal óolal yéetel k-creertik jeʼel u kanáantkoʼoneʼ (Sal. 118:6, 7). Wa ku yaʼalaʼal yaan baʼax maʼ maʼalob k-beetkeʼ, unaj k-kanik k-núuk yéetel jeetsʼelil bey xan yéetel tsiikil (1 Ped. 3:15). Tsʼoʼoleʼ maʼatech k-óotik k-beet mix baʼal jeʼel u beetik u xuʼulul k-bisikba yéetel Jéeoba, k-Taata yaan teʼ kaʼanoʼ.

14, 15. 1) ¿Baʼax jeʼel k-beetik wa jach chiʼichnakoʼoneʼ? 2) Jeʼex u yaʼalik Isaías 53:7 yéetel 10, ¿baʼaxten k-aʼalik Jesuseʼ ku yeʼesik baʼax unaj k-beetik kéen chiʼichnakchajkoʼon?

¹⁴ Wa jach chiʼichnakoʼon. Tuláakloʼon k-chiʼichnaktal yoʼolal jejeláas baʼaloʼob. Maʼ xaaneʼ tumen yaan k-beetik k-examen teʼ escuelaoʼ wa kʼaʼabéet k-tsʼoʼoksik wa baʼax meyajil. Wa maʼ xaaneʼ k-jach chiʼichnaktal, tumen yaan k-operartaʼal wa yaan u beetaʼaltoʼon junpʼéel estudio yoʼolal junpʼéel kʼojaʼanil. Wa chiʼichnak máakeʼ maas séeb u pʼuʼujul. Maʼ xaaneʼ jeʼel tak k-pʼuʼujul yoʼolal baʼaloʼob maʼatech u beetkoʼob k-kʼuuxil kaʼacheʼ. Jeʼel tak k-aʼalik baʼaloʼob jeʼel u beetik u yaatal u yóol u maasileʼ wa k-tratartikoʼob maʼ maʼalobiʼ. Wa yaan kʼiin k-uʼuyik jach chiʼichnakoʼoneʼ, maʼalob ka tuukulnakoʼon tiʼ baʼax tu beetaj Jesús.

¹⁵ Teʼ tu tsʼook kʼiinoʼob tu máansaj way Luʼumoʼ jach chiʼichnakchaji. U yojel yaan u sen muʼyaj yéetel yaan u kíimsaʼal (Juan 3:14, 15; Gal. 3:13). Le maʼ yaʼab u bin u kíimsaʼaloʼ tu yaʼaleʼ jach yaachajaʼan u yóol (Luc. 12:50). Tsʼoʼoleʼ le taʼaytak u kíimsaʼaloʼ tu yaʼalaj: «Péeknajaʼan u yóol in puksiʼikʼal». Kéen tuukulnakoʼon tiʼ le baʼaxoʼob tu yaʼaloʼ k-ilik jach tu jaajil kabal u yóol yéetel ku yuʼubik u tʼaan Dios. Tu yaʼalaj: «In Yuum, salvarten tiʼ le muʼyajil kun taal tin wóokʼolaʼ. Baʼaleʼ yoʼolal le jeʼel taaljaʼanenaʼ. In Yuum, nojbeʼenkúunt a kʼaabaʼ» (Juan 12:27, 28). Ka kʼuch u kʼiinil u kíimileʼ tu yeʼesaj maʼ saajkiʼ yéetel tu kʼububa tiʼ le máaxoʼob pʼekmil Diosoʼ, letiʼobeʼ tu beetoʼob u muʼyaj le ka tu kíimsoʼoboʼ. Kex jach chiʼichnakchaj yéetel jach muʼyajnajeʼ, Jesuseʼ maʼ pʼuʼujiʼ yéetel tu beetaj baʼax uts tu tʼaan Dios. Jeʼex túun k-ilkoʼ, le baʼax tu beetaj Jesusoʼ, ku yeʼesik baʼax unaj k-beetik kéen jach chiʼichnakchajkoʼon (xok Isaías 53:7, 10).

16, 17. 1) ¿Baʼax tu beetaj Jesús ka baʼateltʼaanaj le apostoloʼoboʼ? 2) ¿Bix jeʼel k-beetik jeʼex Jesuseʼ?

¹⁶ Teʼ tu tsʼook áakʼab tu máansaj Jesús way Luʼumoʼ, le apostoloʼob, le máaxoʼob jach ku biskubaʼob tu yéeteloʼ, tu beetoʼob junpʼéel baʼal jeʼel u beetik u pʼuʼujul kaʼach Jesuseʼ. Chéen tukult bix wal tu yuʼubiluba teʼ áakʼab jeʼeloʼ. Utiaʼal ka yanak kuxtal tiʼ u millonesil máakoʼobeʼ kʼaʼabéet u chúukpajal u yóol tak kéen kíimik. ¿Yaan wa u béeytal u beetik? (Rom. 5:18, 19). Tsʼoʼoleʼ, u maas kʼaʼanaʼanileʼ, unaj u yeʼesik maʼ jaaj baʼax aʼalaʼan tu contra u Taataiʼ (Job 2:4). Bey túunoʼ, le táan u kʼiinbesik U Ookʼin Janal Yuumtsil yéetel u amigoʼoboʼ, káaj «u baʼateltʼantikoʼob máax ichiloʼob ku tuklaʼal letiʼ u maas nojchil». Jesuseʼ yaʼab u téenel tsʼoʼok u tsolik u nuʼuktiʼob yoʼolal  leloʼ, ¡tak le táanil tiʼ u muchʼkubaʼob utiaʼal le kʼiinbesajoʼ! Kex beyoʼ, letiʼeʼ maʼ kʼuuxilnaj tu yéeteloʼobiʼ. Tu tsolaj u nuʼuktiʼob yéetel yaabilaj, tu kaʼa eʼesajtiʼob baʼax modosil unaj u yeʼeskoʼob. Tsʼoʼoleʼ ka tu yaʼalajtiʼob jach kiʼimak u yóol úuchik u pʼáatloʼob tu yiknal mantatsʼ (Luc. 22:24-28; Juan 13:1-5, 12-15).

¹⁷ ¿Baʼax jeʼel k-beetik wa tiʼ toʼon ka úuchuk beyoʼ? Kex jach táaj chiʼichnakoʼoneʼ, maʼ unaj k-pʼuʼujuliʼ, baʼaxeʼ unaj k-beetik jeʼex Jesuseʼ. Unaj k-beetik le baʼax ku yaʼaliktoʼon Jéeobaaʼ: «Seguernak a muʼyajtikabaʼex ta baatsileʼex» (Col. 3:13). Junpʼéel baʼax jeʼel u yáantkoʼoneʼ, letiʼe k-kʼaʼajsik yaan kʼiineʼ k-aʼalik wa k-beetik baʼaloʼob jeʼel u beetik u kʼuuxil u maasileʼ (Pro. 12:18; Sant. 3:2, 5). Tsʼoʼoleʼ maʼalob xan ka k-aʼal tiʼ u maasil kiʼimak k-óol yoʼolal le jatsʼuts modos ku yeʼeskoʼoboʼ (Efe. 4:29).

18. 1) ¿Bix u yáantkoʼon Jéeoba utiaʼal k-chʼaʼtuklik k-beetik baʼax maʼalob? 2) ¿Baʼax unaj k-beetik utiaʼal ka u yáantoʼon Dios?

¹⁸ Utiaʼal k-chʼaʼtuklik k-beetik baʼaloʼob maʼalobtak. Kéen kʼaʼabéetchajak k-chʼaʼtuklik k-beetik junpʼéel baʼax kʼaʼanaʼan ichil k-kuxtaleʼ, jeʼel k-áantaʼal tumen Jéeoba wa maʼatech k-séeb pʼuʼujuleʼ. Letiʼeʼ ku yaʼalikeʼ yaan u yuʼubik u oración le máaxoʼob maʼatech u séeb pʼuʼujuloʼoboʼ (Sal. 10:17). Tsʼoʼoleʼ le Bibliaoʼ ku yaʼalikeʼ yaan u nuʼuktikoʼob. Ku yaʼalik: «Ku bisik tiʼ maʼalob bej le j-kabal óoloʼoboʼ; ¡ku nuʼuktikoʼob utiaʼal toj kuxtal!» (Sal. 25:9). Jéeobaeʼ ku nuʼuktikoʼon yéetel le Bibliaoʼ, le publicacionoʼoboʼ, * videoʼob bey xan yéetel muchʼtáambaloʼob ku tsʼáaik «le palitsil chúukaʼan u yóol yéetel yaan u naʼat[oʼ]» (Mat. 24:45-47). Baʼaleʼ unaj k-kʼamik yéetel kabal óolal kʼaʼabéettoʼon áantaj, unaj k-xakʼalxoktik le publicacionoʼob ku tsʼáaiktoʼon Jéeobaoʼ yéetel k-beetik yéetel kiʼimak óolal le baʼax k-kanikoʼ.

19-21. 1) ¿Baʼax maʼ maʼalob tu beetaj Moisés tu luʼumil Cadesiʼ? 2) ¿Baʼax k-kanik tiʼ le baʼax tu beetoʼ?

¹⁹ Utiaʼal maʼ k-beetik baʼax maʼ maʼalobiʼ. Tuukulnakoʼon tu kaʼatéen tiʼ Moisés. Ichil yaʼab añoseʼ, letiʼeʼ tu yeʼesaj maʼatech u séeb pʼuʼujul yéetel tu beetaj baʼax uts tu tʼaan Jéeoba. Baʼaleʼ tu tsʼoʼokbal le cuarenta años tu beetaj le israelitaʼob teʼ desiertooʼ, Moiseseʼ séeb pʼuʼuji. Le u kiik salvart u kuxtal tu luʼumil Egiptooʼ, táant u kíimil yéetel u muʼukul tu luʼumil Cadeseʼ. Teʼ kʼiinoʼob jeʼeloʼ le  israelitaʼoboʼ joʼopʼ u kʼuuxiloʼob tu kaʼatéen, tumen minaʼan le baʼaxoʼob kʼaʼabéettiʼoboʼ. Le Bibliaoʼ ku yaʼalikeʼ joʼopʼ u tʼaanoʼob tu contra Moisés, tumen minaʼan jaʼ u yukʼoʼob. Kex tsʼoʼok u yilkoʼob yaʼab milagroʼob beetaʼab tumen Moisés yéetel u yáantaj Jéeoba yéetel kex úuch joʼopʼok u nuʼuktaʼaloʼobeʼ, láayliʼ táan u boboʼchiʼobeʼ. Joʼopʼ u tʼaanoʼob tu contra Moisés, bey tiʼ letiʼ yaan u culpail minaʼan jaʼ u yukʼoʼobeʼ (Núm. 20:1-5, 9-11).

²⁰ Teʼ súutukil jeʼeloʼ Moiseseʼ jach kʼuuxilnaji. Bey túunoʼ, maʼ tu tʼanaj le tuunich jeʼex aʼalaʼabiktiʼ tumen Jéeobaoʼ, baʼaxeʼ tu kʼeʼekʼeyaj le israelitaʼoboʼ, tsʼoʼoleʼ ka tu yaʼalaj yaan u beetik junpʼéel milagro. Letiʼeʼ tu jatsʼaj kaʼatéen le tuunichoʼ ka joʼopʼ u tuul jaʼiʼ. Úuchik u kaʼantal u yich yéetel úuchik u pʼuʼujuleʼ tu beetaj baʼax maʼ maʼalobiʼ (Sal. 106:32, 33). Tumen maʼ tu controlartuba teʼ súutukil jeʼeloʼ, Jéeobaeʼ maʼ tu chaʼaj u yokol teʼ Luʼum Aʼalaʼan u Tsʼaʼabaloʼ (Núm. 20:12).

²¹ ¿Baʼaxoʼob k-kanik tiʼ le baʼax úuch tiʼ Moisesoʼ? Yáaxeʼ, unaj k-ilik k-beetik tuláakal le ku páajtal utiaʼal maʼ k-séeb pʼuʼujuloʼ. Wa ku náayal k-óol kex jun chan súutukeʼ, jeʼel u kaʼantal k-icheʼ yéetel jeʼel k-aʼalik wa k-beetik junpʼéel baʼax maʼ maʼalobeʼ. U kaʼapʼéeleʼ, wa k-sen chiʼichnaktaleʼ maas séeb jeʼel k-puʼujuleʼ.

22, 23. 1) ¿Baʼaxten unaj k-ilik maʼ k-séeb pʼuʼujul? 2) ¿Baʼax u kʼáat u yaʼal Sofonías 2:3?

²² Utiaʼal ka kanáantaʼakoʼon tumen Jéeoba. Maʼ kun xáantaleʼ Jéeobaeʼ yaan u xuʼulsik tiʼ le j-kʼasaʼan máakoʼoboʼ, baʼaleʼ yaan u salvartik le máaxoʼob maʼatech u séeb pʼuʼujuloʼoboʼ. Kéen úuchuk lelaʼ yaan u yantal jeetsʼelil way Luʼumeʼ (Sal. 37:10, 11). ¿Yaan wa k-antal ichil le máaxoʼob kun pʼáatloʼob kuxtaloʼ? Wa k-beetik baʼax ku yaʼalik Jéeobaeʼ yaan (xok Sofonías 2:3).

²³ ¿Baʼaxten ku yaʼalik Sofonías «maʼ xaan» ka salvartaʼakoʼoniʼ? ¿U kʼáat wa u yaʼal maʼ xaaneʼ, maʼ ken u salvart Jéeoba tuláakal le máaxoʼob beetik baʼax uts tu tʼaanoʼ? Maʼatech. Baʼaxeʼ ku yeʼesikeʼ tak toʼoneʼ yaan baʼax kʼaʼabéet k-beetik utiaʼal k-salvartikba. Utiaʼal k-salvartikba tu «kʼiinil u pʼujaʼanil» Jéeoba yéetel utiaʼal ka kuxlakoʼon utiaʼal mantatsʼeʼ unaj k-ilik maʼ k-séeb pʼuʼujul utiaʼal k-kiʼimakkúuntik u yóol.