1. Miadahan ni Yis a Samariya tamdaw, samaanay paihkal to miakoˈiday cingra?

MASOMADAY koniya mamoetepay faˈinayan. Ciadadaay to midengaay a adada no fanges, hato awaay ko hatokel. Kawra, cecay romiˈad maˈaraway nangra ko Kasapaan a Singsi ci Yis. Na matengilay nangra to miadahay cingra to masakenaay a adada, pakasoˈlin ci Yisan mamiadah to adada nangra. Milekalay cangra: “Yis singsi, kasiniˈadaenho kami”! Ikor, maadahay ko moetepay faˈinayan. Maedeng miakoˈiday cangra to sidaˈit ni Yis cangranan. Nikawrira, cecayay aca ko patikolay a paihkal ci Yisan to piakoˈid * ningra. Oniya maadahay a Samariya tamdaw mitemeray ko falocoˈ, mansa ‘lekal sa a paˈdil to Kawas.’​—Luka 17:12-19.

2-3. (1) Misamaanay latekay mapawanay kita paihkal to nai falocoˈay a miakoˈid? (2) Wa milengo kita to manan?

² Mahecaday kita toniya Samariya tamdaw, mamiakoˈid to sidaˈitay kitaanan a tamdaw. Kawra, ˈifowaay kita alatek, mapawanay tano sowalen ato waywayan a paihkal to nai falocoˈay a miakoˈid.

³ Oniya lalakaw wa milengo kita misamaan tano sowalen ato waywayan a paihkal to masemeray kita, tada kalimlaan. Wa minanam kita to taˈarawan ato sapirikec naitini i Fangcalay Cudad, halo milengo tano maanan a pakayraan ngaˈ paihkal to miakoˈiday kita.

4-5. Hano paihkalen ita ko miakoˈiday?

⁴ Itini paihkal to miakoˈiday, patirengay ci Yihofa to taˈarawan ita. Ano masemeray Cingra to midokoay Cingranan a tamdaw i, papalifon cangranan. (2 Samuil 22:21; ˈOlic 13:6; Matay 10:40, 41) Palimoˈotay ko Fangcalay Cudad kitaanan “tona o kakaolahan no Kawas a wawa kamo saka, o tatodongen namo Cingra.” (Ifiso 5:1) Mihaenay, sapitodongaw kita ci Yihofaan wa paihkal to miakoˈiday.

⁵ Iraayho ko maanan a lalangian, papaihkal to nai falocoˈay a miakoˈid hani? Haratengen hena, paihkal to nai falocoˈay a miakoˈid kita mahecaday o papatahekaen, ano paladaˈay kita to tao, mamatongal ko ˈaredet no kakaenen. Mahecaday, ano miakoˈiday ko tao kitaanan i, lipahakay ko falocoˈ ita; ano miakoˈid kita to tao i, wa lipahak cangra. Paihkal kita to miakoˈiday i tamdaw, wa cipinang ko tao, o sadama anca sapafeli ningra, iraay ko epoc. Mihaen ko demak ita matongal ko kalawidang i kalalaˈed.

6. O miakoˈiday a sowal ato tadaekim a lingko, ira ko manan a kahecadan?

⁶ Paihkal kita to miakoˈiday iraay ko epoc. Sowal i Taneng 25:11: “Ano mangaˈay ko pisaheci a patalahkal to cecay a sowal i, matiya o nitelian i ekim a sala a tadaekim a lingko.” O cecay tadaekim a lingko telien i ekim a sala, tada fangcalay a matedi! Ano macadaay ko hatiniay a sapatelong, wa samaan ko harateng iso? Ano paihkalen iso ko nai falocoˈay a miakoˈiday, o harateng no tao wa mahecad o micadaay to kalimlaan a sapatelong. Roma i, tano tadaekim misangaˈ a lingko ano halafinto ko toki cowa ko mamapalak, o paihkalan iso a nai falocoˈay a miakoˈid wa tahacerem a maharateng no tao.

7. Ci Tafiti ato teloc ni Asaf, samaanay cangra paihkal to masemeray a miakoˈid hani?

⁷ Adihayay nolitengan a madimadiay sikawdan, paihkalay to miakoˈiday, cecay i ci Tafiti. Misakaretengay cingra to soˈlinay a pihakelongan, tano demakan a paihkal. (ˈOsien ko ˈOlic 27:4.) Pakiyaho cingra to hafay a midama to patirengay to fangcalay sefi a tayal. O teloc ni Asaf mitiliday to pahemekay romadiw a paihkal to miakoˈiday. Itini ˈOlic 75:1, pakayni i “kafahkaˈan a demak” no Kawas, paihkalay ko teloc ni Asaf to piakoˈid ato kasemer. Sapafanaˈaw ci Tafiti ato teloc ni Asaf ci Yihofaan, nai falocoˈay cangra miakoˈid to sapalemed ni Yihofa. Samaanen iso mitodong cangraanan paihkal to nai falocoˈay a miakoˈid hani?

8-9. (1) Samaanay ci Pawlo paihkal to pisaareteng to salikaka? (2) Telocto, samanay ko kalalaˈed nangra?

⁸ Misaaretengay ko tarokos ci Pawlo to salikaka, miceriday cingra i satolon pakayni i salikaka a miakoˈid to Kawas, halo patikami cingra to salikaka paihkal to pisaareteng cangraanan. Itini Loma 16:1-15, milengoan ni Pawlo ko 27 ngangan no salikaka. Milengo cingra to pisiˈayaw ni Priskila aci Akuila to katalawan, ‘caay ka limla cangra to ˈorip’ a midipot ci Pawloan. Masowalayho ni Pawlo ci Fipi, na midamaay cingranan, midamaayho to ˈalomanay tamdaw. Pakahemekan ningra ko kaolahan ningra, marorayay matayal saki Kawas a Krisciyang.

⁹ Soˈlin mafanaˈay ci Pawlo to iraay ko dangoc no salikaka, kawra itini salikoray no tikami, misowalan ningra ko makapahay capeling no salikaka. Haratengen, ano matengil no Lomaay salikaka ko sapakahemak ni Pawlo i tikami, maedeng taˈangayay ko sapakalalok cangranan. Telocto, matongalay ko kalawidang nangra ci Pawloan. Ano ngaˈayay ko sasowalen ato waywayan no salikaka, wa pakahemeken iso cangra han?

10. Paihkalay ci Yis to pisaareteng i nisawawaan, o manan ko mananamay ita to taˈarawan ningra?

¹⁰ Mikitini i sowal ni Yis to Aciyaay kasakopang mahapinangay ita, misaareteng cingra to nisawawaan. Tinakoen, somowal cingra to Tiyatira a kasakopang i, sanay: “Mafanaˈ kako to demak iso ato olah, soˈlin no falocoˈ, tayal ato kodait no falocoˈ iso. Mafanaˈ kako to nika ikakaay no iˈayaway a demak iso ko adihay no demak iso anini.” (Paˈarawan 2:19) Masowalay ni Yis matongalay ko midemakan nangra, pakahemekayho to ngaˈayay a demak ato makapahay capeling nangra. Soˈlin o papalimoˈoten ni Yis ko Tiyatira a kasakopang, kawra itini satapangan ato sapihererek a lihaf, pakalalokan ningra cangra. (Paˈarawan 2:25-28) Malo ˈaˈideman no kasakopang no Krisciyang ci Yis, ngaˈayay eca piakoˈid cingra to tayal nangra. Kawra, kamayan ci Yis paihkal to kasemer to tamdaw, o mikiriwiˈay a taˈarawan ningra, coko tatodongen no malohemay malitengay han?

11. Pakayni fangcalay dafong samaanay ko waywayan ni Isau?

¹¹ Itini Fangcalay Cudad iraay ko tinakoan to cangoˈotay ko nai falocoˈay a miakoˈid. Ci Isau, o wama wina ningra maolahay ci Yihofaan, halo pasifanaˈ cangra to wawa ka mangodo ato miakoˈid to palinian no Kawas. Kawra cowa pisaareteng cingra to fangcalay dafong. (ˈOsien ko Hipray 12:16.) Samaan mahapinang ita to cangoˈotay ci Isau to nai falocoˈay a miakoˈid hani? Pakayni cecay kaysing a raˈraˈ, pacakay hananay ningra ko fadangalan no fisac i safa ci Yakopan. (Satapangan 25:30-34) Ikorto, masomaday ci Isau to misaˈosian no  niyah. Samanen cowa pisaareteng cingra to fadangalan no fisac, awaay ko tatodong ningra a ngaliwngiw.

12-13. (1) Samaan mahapinang ita to cangoˈotay ko Israil tamdaw to miakoˈiday falocoˈ? (2) O manan ko teloc nangra hani?

¹² Adihayay ko lalangian no Israil tamdaw paihkal to miakoˈiday. Mitefadan ni Yihofa ko 10 a pades i Icip, paliyas to kalakoli nangra. Patayanho no Kawas ko sofitay no Icip i Kahngangay a Riyar, ho caka malaˈafo no ˈada cangra. Tada miakoˈiday cangra ci Yihofaan, halo romadiway pakahemek Cingranan. Kawra, padotocay cangra paihkal to nai falocoˈay a miakoˈid hokira?

¹³ Malifa no Israil tamdaw ko faelohay sapalifet i, kahnayay cangra mapawan to nano demak ni Yihofa cangranan. Cangoˈotay cangra to piakoˈid ci Yihofaan ato cowa kasemer to nidemakan Ningra. (ˈOlic 106:7) Sowal no Fangcalay Cudad: “Itira toya kohkohan a ngaliwngiw ci Mosian aci Aronan ko polong no Israil a finawlan.” O ngaliwngiway cangra ci Yihofaan. (Kasadakan 16:2, 8) Masomaday ci Yihofa to waywayan no finawlan Ningra, pasowalan Ningra cangra, edengan ci Yosuwa aci Kalip, oya lintad a Israil tamdaw wa mapatay i kohkohan maemin. (Saˈosi 14:22-24; 26:65) Dotoc wa milengo kita sasamaan ho eca ka hecad to hatiniay a sapirikec, ato sasamaan mitodong to ngaˈayay taˈarawan.

14-15. (1) Samaan ko mararamoday paihkal to nai falocoˈay a miakoˈid hani? (2) Samaan ko wama wina pasifanaˈ to wawa paihkal to miakoˈiday ato masemeray?

¹⁴ Paro no lomaˈ: Ano mararid ko paro no lomaˈ paihkal to nai falocoˈay a piakoˈid, wa milifok toha epoc maemin. O mararamoday mararid makakoˈid, wa matongal ko olah. Roma i, wa madoloay a masasisodod. Masemer ko faˈinay to fafahi, wa sinanoten ko sasowalen ato nidemakan no fafahi, halo ‘lomowad a pakahemek cingranan.’ (Taneng 31:10, 28) Wa fanaˈen no fafahi ko faˈinay, miakoˈiday cingra to nano demak no faˈinay.

¹⁵ O wama wina sasamaan pasifanaˈ to wawa paihkal to nai falocoˈay a miakoˈid hani? Aka mapawan, minanamay ko wawa to sasowalen ato waywayan no wama wina. Mihaenay ano padama ko wawa tisowanan i, akoˈiden cangra. O roma i, pasifanaˈen ko wawa paihkal to miakoˈid to tao, halo masemer to sadama no tao. Padamaen ko wawa cipinang kitinien i falocoˈ a miakoˈid, fanaˈen ko  wawa taˈangayay ko pifiyor no sowal nangra. O cecay kaemangay fafahiyan ci Kelari, sanay cingra: “32 ko mihecaan no wina i, fahal sanay misiˈayaw to mamiteked a palahad to tatoloay wawa. Tiya 32 ko mihecaan ako i, soˈlinayto a mafanaˈ to pasangaray ko masiˈayaway no wina itiya. Mansa pasowalen ako ko wina, masemeray kako to kinafalah ningra palahad tamiyanan. Caka halafin, pasowalay ko wina takowanan, kalimlaan ko nano sowal ako cingraanan, marariday maharateng ningra ko sowal ako, saromiˈad sanay a pakahemek cingraanan,” sanay.

16. Paihkal to miakoˈiday, hano o sapakalalok a pakayraan hani? Patinakoen.

¹⁶ Salikaka: Paihkal kita to miakoˈiday ato masemeray i salikaka, wa ngaˈay pakalalok cangranan. Tinakoen o cecay 28 ko mihecaan a malohemay malitengay ci Hawerhe, na pakidemay ko adada ningra, cecayay folad caka ngaˈay mirienang to saˈopo. Ikor, soˈlin ngaˈay cingra mirienang to saˈopo, awaay ko pakayraan misikay to kamok no saˈopo. Sowal ni Hawerhe: “Awaayto ko kapo no niyah, awaay ko pakayraan mitamorong to ˈinorong no kasakopang. Kawra, kinacecayay maharek ko saˈopo, pasowalay ko cecay salikaka takowanan, ‘Aakoˈiden ako kiso, samanen patirengay kiso to ngaˈayay taˈarawan ako ato paro no lomaˈ. Cowa ka fanaˈ kiso, toniya pina miheca maolahay kami to kimad iso. Padamaay tamiyanan macakat i noˈadingoan.’ Matengil ako tomangicay, cilosaˈay ko mata. O misaalian ako koniya sowal no salikaka.”

17. Samaan kita paihkal to miakoˈiday to hinapaladaˈ ni Yihofa?

¹⁷ Hinapaladaˈay a Kawas: Adihayay ko sapafeli ni Yihofa kitaanan noˈadingoan a kakaenen, tinakoen o sapasifanaˈ no casi, wangcan a lalakaw ato saˈopo. Mikitini pitengil to cecay kimad, micekiw to cecay lalakaw anca minengneng to kamok no JW Tilifi, miharateng kiso: “Coko misaalian ako konini han?” Wa samaan kita paihkal to nai falocoˈay a miakoˈid ci Yihofaan hani? (ˈOsien ko Kolosay 3:15. *) O cecay pakayraan i micerid i satolon miakoˈid Cingranan pafeli kitanan to makapahay sapatelong.​—Yakop 1:17.

18. Iraho ko roma naifalocoˈay a miakoˈid ci Yihofaan a pakayraan han?

¹⁸ O roma pakayraan paihkal to piakoˈid ci Yihofaan i, mikorac to kasaˈopoan. Wa micerid kita a miasik ato mikinsa to Hongti Kitakit  kasaˈopoan, o citatodongay to laepa ato mayku a salikaka, songilaˈen a misaka dademak. Songilaˈen ita midimokos ko kasaˈopoan, mihaen cowato ko tataˈangay ko sasalofen, halafinto a saka dademaken. Ano mihaen, ngaˈayto saka dademaken no likakawa no Kawas ko sapakiyaho, patireng anca misafaeloh to kasaˈopoan itini roma kilac.

19. O manan ko mananamay iso mikitini nalifetan noniya kasakilac kantok ato fafahi ningra hani?

¹⁹ Marorayay matayal a salikaka: Somowal kita to miakoˈiday a sowal i tamdaw, wa mafalic ko pinengneng ningra to pasangaray a demak alatek. Nengnengen ko milifetan no kasakilac kantok ato fafahi ningra. Oniya mararamoday misaromiˈaday i kasienawan a mitosil, tada malotayayto. Sienaway ko romiˈad itiya, cikayfangay ko fafahi a mafotiˈ. To papacem, pasowalan no fafahi ko faˈinay, awaayto ko pakayraan no niyah padotoc to milisoˈay a tayal. Toya romiˈad papacem, macadaay no fafahi ko tikami no fenpo cingranan. Tada kasemeran ko mihadidiay a waywayan ningra a mitosil sanay. Somowalayho to lipalipay malinah ko kitiraan, cowa ko madoloay sanay. Sanay ko sowal noniya kasakilac kantok: “O sapakahemek a sowal no tikami mitemeray to fafahi ako, cowato ka pasowal to mamisawad to milisoˈay a tayal. Kako saan kinapinaay sapisawadaw to milisoˈay a tayal, cingrato ko pakalalokay takowanan materek toniya tayal.” Telocto, oniya mararamoday padotocay to milisoˈay a tayal to 40 miheca.

20. Wa misetek to falocoˈ kita misamaan to demak? Misamaanay?

²⁰ Nanay misaˈicel kita to romiˈamiˈad paihkal to miakoˈiday ato masemer to tao. Mikitiniay i falocoˈ a sowal ato waywayan ita, wa ngaˈay padama to roma tamdaw padotoc a mihadidi toniya cowa ka fanaˈ miakoˈid a hekal. Paihkal kita to miakoˈiday i tamdaw wa ngaˈay halafin ko kalawidang to tao. Sakalimlaan i, paihkal kita to nai falocoˈay a miakoˈid, o mitodongay to hinapaladaˈay mafanaˈay masemer to tamdaw a kakarayan wama ci Yihofa.