1. ¿Kunjamsa mä samaritano jaqejj Jesusar yuspäräna?

UKA tunka chachanakajj lepra usunïpjjatap laykojj wali llakitäpjjänwa. “Jachʼa Yatichiri Jesusajj taqe kasta usunakwa qollaski” sasin istʼasajja, “jiwasarojj qollarakistaspawa” sasaw taqe chuyma confiyapjjäna. Ukatwa mä urojj jutaskir uñjasajj akham sasin artʼapjjäna: “Jesús, Yatichiri, nanakat khuyaptʼayasipjjeta” sasa. Uk istʼasajja, Jesusajj tunkpachaniruw qolläna. Ukham qollatäjjasajj chuymapan wal yuspärapjjpachäna. * Ukampis maynikiw Jesusar yuspärirejj kuttʼäna. Uka chachajj samaritano jaqënwa, jupajj arnaqtʼasisaw Diosar jachʼañchäna (Luc. 17:12-19).

2, 3. 1) ¿Kunatsa awisajj mayninakar jan yuspärjjsna? 2) ¿Kunanakatsa aka yatichäwin yatjjataskañäni?

² Jiwasanakajj uka samaritano chachjamarakiw jiwas layku kuns lurapki ukanakarojj yuspärañasa. Ukampis awisajj mayninakar arunakasampi, jan ukajj luratanakasampi yuspärañ armasjjsnawa.

³ Aka yatichäwinjja, kunatsa yuspärasirïñajj wali wakiskirïpacha, Biblian parlki uka jaqenakat khitinakas yuspärasirïpjjäna, khitinakas janiraki, kunjamsa yuspärasirïtas uñachtʼaysna uka toqenakatwa yatjjataskañäni.

4, 5. ¿Kunatsa yuspärasirïñasa?

⁴ Jehová Diosatwa yuspärasirïñ yateqassna. Jupajja, khitinakatï  Jupatakjam sarnaqapki ukanakar bendisisaw yuspärasirïtap uñachtʼayi (2 Sam. 22:21; Sal. 13:6; Mat. 10:40, 41). Bibliajj akham sasaw ewjjtʼistu: “Diosan munat wawanakapjamajj jupat yateqasipjjam” sasa (Efes. 5:1). Ukhamajj Jehová Diosatwa yateqasiñ muntanjja, ukatwa yuspärasirïñasa.

⁵ ¿Kunatsa yuspärasir jaqëñasaraki? Ak amuytʼañäni. Yuspärasirïñajj yaqhanakamp mä suma manqʼa manqtʼasiñampi sasiwa. Yuspärapjjestu ukhajj kusistanwa. Ukampis jiwasajj yuspärtan ukhajja, jupanakaruw kusisiytanjja, ¿kunatsa? Yuspärtan ukhajja, jiwasar yanaptʼañatak chʼamachasitapajj jan inamayätapwa amuyapjje. Ukhamatwa jupanakampejj jukʼamp sum apastanjja.

6. Qorit lurat manzanampi yuspärasiñampejj ¿kunansa niya kikpäpjje?

⁶ Yuspärasirïñajj wali valoranit uñjatawa. Bibliajj akham siwa: ‘Horasapar arsut mä suma arojja, qori manzanajj qollqe bandejar uchatäki ukhamawa’ sasa (Prov. 25:11, NM). Qollqe bandejar uchat qori manzanajj wali sumitäspawa, wali valoranirakïspawa. Ukham mä regalo churapjjestaspa ukhajj ¿kunjamakis jikjjatassna? Maynir yuspärañajj ukhamarakïspawa. Kunjamatï qorit lurat mä manzan wali sum imasksnajja, ukhamarakiw yuspärktan uka jaqenakajj arunakas imapjjaspa, mä arunjja, janiw armapkaspati.

7. Kunjamtï Salmo 27:4 qellqatajj siskejja, ¿kunjamsa Davidasa Asaf chachat jutir jaqenakas Diosar yuspärapjjäna?

⁷ Diosan nayra servirinakapat waljanejj yuspärasirïpjjänwa, jupanakat maynïrejj Davidänwa (Salmo 27:4 liytʼañataki). Jupajja, luratanakapampiw Diosar serviñajj qhawqha valoranisa uk uñachtʼayäna. Ukatwa templo lurasiñapatakejj kunatï jupan  utjkäna ukamp yanaptʼäna. Asaf chachat jutir jaqenakas ukham yuspärasirïpjjarakïnwa. Jupanakajj salmonaka, mä arunjja, Diosatak qʼochunak qellqasaw yuspärasirïpjjatap uñachtʼayapjjäna. Uka qʼochunakat maynïrinjja, ‘musparkañ luräwinakapatwa’ Jehová Diosar yuspärapjjäna (Sal. 75:1). Ukhamajja, David chachasa Asaf chachat jutir jaqenakasa, Diosat katoqapkäna uka bendicionanakatwa wal yuspärapjjäna. ¿Kunsa ukajj yatichistu?

8, 9. Jilat kullakanakar wali valoranit uñjatapjja, ¿kunjamsa Pablojj uñachtʼayäna, ukat kunjamsa jilat kullakanakajj jikjjatasipjjpachäna?

⁸ Apóstol Pablojj wali valoranitwa jilat kullakanakapar uñjäna, ukajj kuntï jupanakat siskäna ukanwa amuyasi. Sañäni, oración lurkäna ukhajj jupanakat Diosar yuspärapunirïnwa. Cartanakapansa, ukhamarakiw qhawqsa jupanakar munasïna uk qellqäna. Sañäni, Romanos 16:1-15 textonjja, 27 cristianonakan sutinakapwa aytäna. Ukanjja, Priscampi Aquilampejj ‘niyapuniw naya laykojj jakañap aptʼasipjjäna’ sasaw amtäna. Febe kullakajj “walja jilatanakar arjjatiriwa, naya pachparus arjjatarakitänwa” sasaw sarakïna. Ukhamasti, Pablojj chʼamañchtʼkir arunakwa uka munat jilat kullakanakar säna.

⁹ Jilat kullakanakajj pantjasirïpjjänwa, Pablojj uk yatïnwa. Ukhamäkchïnsa, Roma markankir jilat kullakanakar qellqkäna uka carta tukuyanjja, suma luratanakapatwa qellqäna. Uka cartajj congregacionan liytʼaskäna ukhajja, Pablojj jupanakat siskäna uk istʼasajj wal jilat kullakanakajj kusisipjjpachäna, Pablorojj jukʼampiw munasipjjarakpachäna. ¿Jiwasajj ukhamarakit jilat kullakanakasarojj luratanakapatsa suma arunakapatsa sapa kut yuspärtanjja?

10. ¿Kunsa Jesusat yateqassna?

¹⁰ Jesusajj Asia Menor cheqankir yaqhep congregacionanakarojj suma luratanakapatwa chʼamañchtʼäna. Sañäni, Tiatira markankir jilat kullakanakarojj akham sasaw parlañ qalltäna: “Nayajj luratanakamsa, munasirïtamsa, Diosar confiyatamsa, jupar servitamsa, aguantatamsa yattwa. Kunanaktï jichhajj lurkta ukanakajja, qalltan lurkayäta ukanakat sipansa jukʼamp waljawa” sasa (Apoc. 2:19). Jesusajj janiw ‘luratanakamajj jukʼampiwa’ sasakejj siskänti, jan ukasti, kunatsa ukham lurapjjäna ukwa amtayarakïna. Uka congregacionankir yaqhep cristianonakar cheqañchkchïnsa, chʼamañchtʼkir arunakampiw jupanakar parlañ qalltäna, tukuyarakïna (Apoc. 2:25-28). Niyakejjay Jesusajj taqpach congregacionanakan pʼeqtʼiripächejja, jupanakjjar wali autoridadaniwa, ukhamajj janiw luratanakasat yuspärañapapunejj wakiskiti, ukhamäkchisa yuspärapunistuwa. Jilïr irpirinakajj jupatwa yateqasipjjaspa.

11. Hebreos 12:16 qellqatarjamajja, ¿kunjamsa Esaú chachajj kunatï sagradöki ukar uñjäna?

¹¹ Biblian parlki uka jaqenakat yaqhepajj jan yuspärasirïpjjänwa. Maynïrejj Esaú satänwa. Awk taykapajj Jehová Diosar wal munasipjjäna, respetapjjarakïnwa, ukampis jupajj kunatï sagradöki ukar jiskʼachänwa (Hebreos 12:16 liytʼañataki). ¿Kunjamsa jiskʼachäna? Jilïr wawäñjja, jan amuytʼasisaw Jacob sullkaparojj lenteja manqʼa laykuk aljantäna (Gén. 25:30-34). Qhepat kuntï jilïr wawjamajj katoqañapäkäna uk jan katoqasajj wal quejasïna, kuntï lurkäna ukatsa wal amtasïna. Ukampis niyakejjay jilïr wawäñar jan valoranit uñjchïnjja, janiw quejasiñapajj wakiskänti.

12, 13. ¿Kunjamsa israelitanakajj jan yuspärasirïpjjatap uñachtʼayapjjäna, ukat kuna jan walinsa uñjasipjjäna?

 ¹² Israelitanakajj taqe kunwa Diosat katoqapjjäna, ukatwa yuspärasirïpjjañapäna. Jupanakar esclavöñat qhespiyañatakejja, Jehová Diosajj tunka plaganakampiw egipcionakar castigäna. Qhepatsti, egipcionakan ejercitopar Mar Rojo sat qotan jiwarayasaw salvarakïna. Ukham luratapatjja, israelitanakajj Diosar wal yuspärapjjäna, mä cancionampiw atipjatapat jachʼañchapjjarakïna. ¿Kunas qhepat pasäna?

¹³ Jan walinakan uñjasjjapjjäna ukhajja, kuntï Diosajj jupanak layku lurkäna uk armasjjapjjänwa, janirakiw yuspärjjapjjänti (Sal. 106:7). Bibliajj akham siwa: “Taqpach israelitanakaw jan walinak Moisés toqe, ukhamarak Aarón toqjja parlapjjäna” sasa. Ukham lurasajja, Dios contraw parlasipkäna (Éx. 16:2, 8). Uk uñjasajja, Diosajj wal chuym ustʼayasïna, ukatwa qhepat akham säna: ‘Jupanakajj taqeniw wasaran jiwarapjjani. Caleb sat chachampi Josué sat chachampikiw qheparapjjani’ sasa (Núm. 14:22-24; 26:65). Uka jan yuspärasir jaqenakat jan yateqasiñatakejj ¿kunsa lursna? ¿Kunsa yuspärasir jaqenakat yateqasiñatakejj luraraksna? Uk jichhajj uñjañäni.

14, 15. 1) Casarat chacha warminakajja, ¿kunanak lurasas yuspärasirïpjjatap uñachtʼayapjjaspa? 2) Awk taykanakajja, ¿kunjamsa wawanakaparojj yuspärasirïñ yatichapjjaspa?

¹⁴ Familiasaru. Familian taqenis yuspärasirïpjje ukhajja, kusisitaw jakasipjje. Chacha warminakajj purapat jukʼamp yuspärasipjjani ukhajja, jukʼamp mayachtʼatäpjjaniwa, pantjasipjjani ukhas facilakiw perdonasipjjani. Esposapar munasir chachajja, suma luratanakapatsa suma arunakapatsa jachʼañchapuniwa (Prov. 31:10, 28). Yatiñani warmisti, esposopan kuna luratanakapsa wali valoranit uñji ukwa jupar saraki.

¹⁵ Awk taykanaka, ¿kunjamsa wawanakamarojj yuspärasirïñ yatichapjjasma? Ak janipun armapjjamti, kuntï parlapkäta lurapkarakïta ukwa jupanakajj parlapjjani, lurapjjarakini. Ukhamasti, wawanakamajj jumanak layku kuns lurapjjani ukhajj yuspärapjjam. Yaqhanakajj jupanak layku kuns lurapjjani ukhasti, yuspärasiñ yatichapjjarakim. Taqe chuyma yuspärañajj kunjamsa yaqhanakar  chʼamañchtʼaspa uk amuyapjjañapatak jupanakar yanaptʼapjjam. Clary sat mä kullakajj akham siwa: “Mamitajajj 32 maranïkäna ukhajj sapakiw kimsa wawanakapar uywañ qalltäna. Nayajj ukha maranëjjayäta ukhajja, wawanakar sapak uywañajj jupatak kunja chʼamäpachänsa ukwa amuyayäta. Ukatwa jupar akham sista: ‘Nanakar uywañatak chʼamachasitamat walpun yuspärsma’ sasa. Ukat jichhakiw mamitajajj akham situ: ‘Uka arunakam janipuniw armkti, wal kusisiyarakitu’ sasa”.

16. Jilat kullakanakar yuspärañajj ¿kunjamsa jupanakar chʼamañchtʼaspa? Uk mä experienciampi qhanañchtʼam.

¹⁶ Jilat kullakanakaru. Jilat kullakanakar yuspärtan ukhajja, chʼamañchtʼatäpjjañapatakiw yanaptʼtanjja. Amuytʼañatakejj 28 marani Jorge sat mä jilïr irpirit parltʼañäni. Wal usuntasajj mä phajjsiw tantachäwinakar jan sarjjänti. Sarañ qalltjjäna ukhajja, janiw mä discurso arstʼañsa puedkänti. Jupajj akham siwa: “Congregacionan jan yanaptʼirjamäsajja, janis kunatak sirvkirista ukhamwa amuyasiyäta. Ukampis mä urojja, mä jilataw tantachäw tukuyar akham situ: ‘Familiajatakejj wali yateqaskayätawa, ukatwa wal yuspärsma. Discursonakamajj walpun aka maranakajj chʼamañchtʼawayapjjetu. Diosar jukʼamp confiyañatakiw yanaptʼawayapjjarakitu’ sasa. Uk istʼañajj walpun chuym chʼalljjtayitäna, ukatwa jachaqtʼasiyäta. Walpun uka arunak istʼañ munayäta” sasa.

17. Colosenses 3:15 qellqatarjamajja, ¿kun lurasas Jehová Diosar yuspärsna?

¹⁷ Wali wajjtʼasir Diosaru. Jehová Diosajj walja yatichäwinakwa manqʼäkaspas ukham churistu. Sañäni, tantachäwinak toqe, revistanak toqe, Internetan jw.org toqejj walja suma yatichäwinakwa katoqtanjja. Discursonak istʼasasa, Bibliat apstʼat qellqatanak liytʼasasa, jan ukajj JW Broadcasting programa uñtasasa, ¿“akajj nayatakjamapuniwa” sasajj janit sirïkta? Ukhamajj ¿kunjamsa Diosarojj uka suma regalonakat yuspärsna? (Colosenses 3:15 liytʼañataki). Oracionanakasanwa ukanakat yuspärsna (Sant. 1:17).

18. ¿Kunanak lurasas Tantachasiñ Uta sum uñjatas uñachtʼaysna?

¹⁸ Jehová Diosar adorañatak tantachasktan uka Utan qʼomäñapataki ukat apthaptʼatäñapataki yanaptʼasaw Jupar yuspäratas uñachtʼayaraktanjja. Ukatwa uka Uta qʼomachañatakisa askichañatakis tiempo apstʼastanjja.  Videonaka jan ukajj grabacionanak istʼañataki equiponak apnaqerinakasa, cuidadompiw uka equiponak apnaqapjje. Tantachasiñ Uta sum uñjasajja, jukʼamp tiempo aguantañapataki, ukhamarak askichañanak jan sinti utjañapatakiw yanaptʼasktanjja. Ukhamatwa yaqha Tantachasiñ Utanak lurasiñapatakisa askichasiñapatakis qollqejj utjaskakini.

19. Kunatï congregacionanak tumptʼir mä jilatampiru esposapampir paskäna ukatjja, ¿kunsa yateqsna?

¹⁹ Diosan markapan jiwas layku wal trabajapki ukanakaru. Yuspärañajja, jan walinakar saykatapjjañapatakiw yaqhanakar yanaptʼaspa. Congregacionanak tumptʼir mä jilatampita esposapampit parltʼañäni. Wali thaya tiempon jornälpach predicasajja, wali qaritaw alojasipkäna uka utar kuttʼjjapjjäna. Wali thayätapatjja, kullakajj abrigop uchantatpachaw ikintjjäna. Qhepa alwajja, “janiw akham servirjamäjjtti” sasaw esposopar säna. Uka alwarakiw sucursalat mä cartajj kullakatak purinïna. Ukanjja, ‘walik ukham servisktajja, aguantaskaraktajja. Mä cheqat yaqha cheqar sapa semana sarañajj chʼamakïpachawa’ sasaw säna. Jilatajj akham siwa: “Uka arunakajj chuymaparupuniw purtʼäna. ‘Janiw Diosar akham serviñ munjjtti’ sasajj janiw mayamps sisjjänti. Antisas nayaruw congregacionanak tumptʼañ jaytañ munirïta ukhajj serviskakiñatak chʼamañchtʼirïtu” sasa. Uka jilatampi kullakampejja, niya 40 maranakaw congregacionanak tumptʼas serviwayapjje.

20. ¿Kunatakis sapür chʼamachasiñasa, ukat kunatsa?

²⁰ Yuspärasir chuymanïñatakejj sapür chʼamachasipjjañäni. Jan yuspärasir jaqenak taypinwa jaktanjja, ukhamajj arunakasasa luratanakasasa, nayrar sartañapatakiw maynir yanaptʼaspa. Mayninakamp wiñayatak amigöñatakiw yanaptʼarakistaspa. Taqe ukanakat sipansa, wajjtʼasiri ukhamarak yuspärasiri Jehová Dios Awkisat yateqasitaswa uñachtʼayaskañäni.