1. Songon dia do sahalak Samaria na dipamalum mangargai na binahen ni Jesus?

ADONG ma sampulu baoa na mandele ala marsahit kusta. Sada tingki, diida nasida ma Jesus sian na dao. Dibege nasida do naung godang halak na dipamalum Jesus. Alani i, pos do roha ni nasida na boi pamalumon ni Jesus nasida. Gogo ma didok nasida, “Jesus, Guru, asi ma roham tu hami!” Dipamalum Jesus ma na sampulu baoa i. Tontu, las do roha ni nasida ala nunga dipamalum. Alai adong ma sada sian nasida halak Samaria. Dung dipamalum, ndang holan mangkilala las ni roha ibana, alai diargai ibana do i marhite mandok mauliate tu Jesus. Alani las ni rohana, gabe dipagogo ma soarana mamuji Debata.​—Luk. 17:12-19.

2-3. (a) Sipata, aha do na lupa taulahon? (b) Aha do na laho taulas di parsiajaran on?

² Songon halak Samaria i, lomo do rohanta mandok mauliate tu halak na burju tu hita. Alai sipata, olo do lupa hita mandok mauliate marhite pangkataion dohot parniulaon.

³ Di parsiajaran on, laho taulas ma taringot boasa ringkot tadok mauliate. Taulas ma piga-piga contoh na dipaboa di Bibel taringot angka halak na mandok mauliate dohot na so mandok mauliate. Jala taulas ma muse, songon dia carana mandok mauliate.

4-5. Boasa ingkon tadok mauliate?

⁴ Jahowa ma sitiruon na dumenggan taringot mandok  mauliate. Sada cara ni Jahowa mandok mauliate tu angka halak na mambahen las rohana, i ma marhite mamasu-masu nasida. (2 Sam. 22:21; Ps. 13:6; Mat. 10:40, 41) Didok Bibel, “Ala angka anak na dihaholongi Debata do hamu, tiru hamu ma Ibana.” (Eps. 5:1) Ala lomo do rohanta maniru Jahowa, i do alana boasa ingkon tadok mauliate.

⁵ Taulas ma muse alasan na asing boasa lomo rohanta mandok mauliate tu na asing. Mandok mauliate, dipatudos do i songon sipanganon na tabo jala lomo rohanta mambagi tu na asing. Suang songon i ma, tingki adong na mandok mauliate tu hita, tontu las do rohanta. Jala tingki tadok mauliate tu na asing, tontu las do roha ni nasida. Alana molo tadok mauliate, diboto nasida do na taargai pangurupion ni nasida tu hita. Jala ndang marisuang pambahenanna i. On boi mambahen lam solhot hita tu nasida.

6. Boasa dipatudos hata mauliate songon hiasan na sian mas?

⁶ Tingki tadok mauliate tu halak, arga do i dihilala nasida. Bibel mandok, “Songon hiasan mas do i na dilongkothon di perak.” (Poda 25:11, Bibel siganup ari) Bayangkon ma songon dia bagak ni hiasan mas molo dilongkothon di perak. Tontu mansai arga do i! Songon dia do pangkilalaanmuna molo adong na mangalehon hadiah sisongon i tu hamu? Tontu didok hamu do mauliate jala mansai arga do hatamuna i di nasida. Songon hiasan mas na boi leleng martahan, dos songon i ma tingki tadok mauliate tu halak, boi do i sai diingot nasida saleleng ngoluna.

7. Songon na didok di Psalmen 27:4, songon dia si Daud dohot panurat psalmen na asing mandok mauliate tu Debata?

⁷ Godang do naposo ni Debata najolo na mamboto mandok mauliate. Umpamana  songon si Daud. (Jaha Psalmen 27:4.) Mansai arga do di ibana manomba Debata jala dipatudu do i sian parniulaonna. Dilehon ibana do godang sumbangan laho pajongjongkon bagas joro. Contoh na asing muse, i ma angka pinompar ni si Asap. Disurat nasida do angka buku psalmen manang angka ende puji-pujian tu Debata. Sada sian ende ni nasida i, didok do mauliate tu Debata jala dipuji nasida do sude “halongangan” na dibahen Jahowa. (Ps. 75:2) Taboto ma, na lomo do roha ni si Daud dohot pinompar ni si Asap mandok mauliate tu Jahowa di sude pasu-pasu na dijalo nasida. Molo songon i, songon dia do caramuna maniru nasida?

8-9. Songon dia do si Paulus mangargai angka dongan, jala aha do hasilna?

⁸ Diargai si Paulus do sude angka dongan. Jala tarida do i sian na didok ibana taringot nasida. Di tangiangna sai didok si Paulus do mauliate tu Debata alani nasida. Di suratna didok si Paulus do muse na mansai arga nasida di ibana. Di Rom 16:1-15, adong 27 halak angka dongan na didok si Paulus disi jala didok ibana do goar ni nasida sada-sada. Didok si Paulus muse, rade do mate si Priska dohot si Akuila alani ibana. Didok muse nunga “godang angka dongan diurupi” si Poibe dohot ma i ibana sandiri. Dipuji si Paulus do sude angka dongan na dihaholongi ibana di sude naung diulahon nasida.

⁹ Diboto si Paulus do ndang sempurna angka dongan na di Rom. Alai di hata panutup ni suratna, dipaboa ibana do angka parange na denggan sian nasida. Bayangkon ma songon dia pangkilalaan ni angka dongan tingki gogo dijahahon surat ni si Paulus i di huria. Dung dibege nasida, gabe lam togu do nasida. Ujungna gabe lam solhot ma parale-aleon ni nasida dohot si Paulus. Tingki adong dongan di huria na mandok manang na mangulahon na denggan, didok hamu do mauliate?

10. Aha do na boi taparsiajari sian cara ni Jesus mandok mauliate?

¹⁰ Di bagasan suratna, didok Jesus do mauliate tu angka dongan na adong di piga-piga huria di Asia Kecil. Umpamana, di hata pamungka ni suratna tu huria na di Tiatira didok ibana do, “Huboto do angka na niulam, holong ni roham, haporseaonmu, na niulam tu Debata, dohot hasabaronmu. Huboto do gumodang na niulam saonari sian na parjolo i.” (Pgk. 2:19) Ndang holan angka naung diulahon nasida na dipujihon Jesus, alai dipuji do muse angka parange ni nasida na denggan. Nang pe porlu dope dipaingot Jesus piga-piga halak na di Tiatira, alai di hata pamungka dohot di hata panutup ni suratna tongtong do dipatogu nasida. (Pgk. 2:25-28) Sasintongna ndang porlu Jesus mandok mauliate tu sude naung taulahon. Alana ibana do na manguluhon sude huria. Alai nang pe songon i, tongtong do didok ibana mauliate. Sitiruon na denggan do ibana di angka sintua!

11. Songon na dipaboa di Heber 12:16, songon dia do si Esau ndang mangargai silehon-lehon sian Debata?

¹¹ Alai adong do piga-piga na dipaboa di Bibel na so mamboto mandok mauliate. Umpamana, songon si Esau, ndang diargai ibana silehon-lehon sian Debata, nang pe natua-tuana mangkaholongi Jahowa. (Jaha Heber 12:16.) Songon dia do i boi masa? Digadis ibana do hakna siangkangan tu anggina si Jakkob holan alani samangkuk sipanganon. (1 Mus. 25:30-34) Alai pudian ni ari disolsoli ibana do i. Sasintongna, ndang marhak  ibana muruk alana nunga digadis ibana hak siangkanganna.

12-13. Songon dia do halak Israel ndang mangargai na binahen ni Jahowa, jala aha do hasilna?

¹² Sasintongna, godang do alasan ni halak Israel laho mandok mauliate tu Jahowa. Tingki dibahen Jahowa Sampulu Tulah di Mesir, dipalua do nasida. Dipalua do muse nasida sian tentara ni Mesir tingki di Laut Merah. Tontu mandok mauliate do nasida alani i. I do alana diendehon nasida ende puji-pujian ala dipalua Jahowa nasida. Alai tongtong do nasida mandok mauliate?

¹³ Tingki adong muse hasusaan na diadopi nasida, gabe lupa do nasida tu angka na denggan na binahen ni Jahowa. Ndang mandok mauliate be nasida. (Ps. 106:7) Aha buktina? Didok Bibel, “Marmungutmungut ma sandok luhutan ni halak Israel dompak si Musa dohot dompak si Aron.” Sasintongna, na marungut-ungut tu Jahowa do nasida. (2 Mus. 16:2, 8) Hansit do roha ni Jahowa ala ndang diargai nasida sude pambahenanna. Alani i gabe didok Jahowa ma, asing ni si Josua dohot si Kaleb, pasombuonna ma sude halak Israel mate di padang pasir. (4 Mus. 14:22-24; 26:65) Saonari taulas ma songon dia carana asa unang tatiru na so denggan, alai tatiru ma angka na denggan.

14-15. (a) Songon dia do na mardongan saripe patuduhon pangargaion tu dongan saripena? (b) Songon dia do natua-tua mangajari ianakhonna asa mangargai na asing?

¹⁴ Di keluarga. Sude keluarga boi do mandapot laba molo olo sude anggota keluarga mandok mauliate. Molo sai dipatudu na mardongan saripe do pangargaion tu dongan saripena, gabe lam solhot ma nasida. Gabe mura ma nasida manalpuhon hasalaan ni dongan saripena. Sahalak suami na mangargai istrina ndang holan na denggan na dibahen istrina i na diida ibana, alai ingkon dipuji do istrina i. (Poda 31:10, 28) Jala molo istri na marbisuk, diargai do na diulahon suamina.

¹⁵ Hamu natua-tua, songon dia do caramuna mangajari ianakhonmuna asa mangargai na asing? Ingot ma, ditiru ianakhonmuna do pangkataion dohot parniulaonmuna. Alani i, bahen ma sitiruon na denggan. Carana, dokkon ma mauliate molo adong na denggan na dibahen nasida. Jala ajari ma nasida asa mandok mauliate sian ias ni roha tingki adong na mambahen na denggan tu nasida.  Jala paboa ma songon dia cara na denggan mandok mauliate. Umpamana sahalak donganta borua na margoar si Clary mandok, “Tingki marumur 32 taon omakku, masuk penjara ma bapaknami. Gabe sahalak ni omak ma na pagodang-godangkon ahu dohot dua itongku. Dung marumur 32 taon ahu, gabe huboto ma mansai maol do mangadopi situasi sisongon i. Alani i, hudok ma mauliate tu omak ala nunga dipagodang-godang ibana hami. Didok omak ma, mansai arga do hatangki jala sai torus do i diingot ibana. On mambahen ibana gabe tongtong marlas ni roha.”

16. Tingki tadok mauliate tu na asing, songon dia do i boi patoguhon nasida? Paboa ma sada pengalaman.

¹⁶ Di huria. Na tapatogu do angka dongan molo tadok mauliate tu nasida. Umpamana, songon pengalaman ni sahalak donganta sintua na marumur 28 taon na margoar si Jorge. Ala posi sahitna, ndang boi ibana marpungu saleleng sabulan. Alai nang pe naung boi ibana marpungu, ndang boi dope ibana mangulahon tugasna di huria. Didok ibana, “Hira na so mararga do ahu huhilala alani sahithon. Gabe ndang boi be huulahon tanggung jawabhu di huria. Alai sada tingki, dung sae marpungu, adong ma sahalak donganta baoa na mandok tu ahu: ‘Mandok mauliate do ahu tu hamu, ala gabe sitiruon na denggan do hamu di keluargangku. Ra, ndang diboto hamu songon dia las ni rohanami tingki mambege jamitamuna piga-piga taon naung salpu. Gabe lam togu do haporseaonnami alani i.’ Songgot do rohangku mambege hatana i, alani i gabe tangis ma ahu. Hatana i, mambahen las rohangku.”

17. Songon didok di Kolosse 3:15, songon dia do caranta mandok mauliate tu Jahowa?

¹⁷ Tu Jahowa. Godang do na dilehon Jahowa laho mangurupi hita asa lam togu parale-aleonta tu Ibana. Umpamana, dapotta do angka tudu-tudu sian angka parpunguan, sijahaonta, dohot sian jw.org. Ra, hea do di bege hamu sada jamita, dijaha hamu di majalah manang ditonton hamu video broadcasting, gabe didok rohamuna, ‘Hira na tu ahu do on dibahen.’ Alani i, songon dia do caranta mandok mauliate tu Jahowa? (Jaha Kolosse 3:15.) Carana, tingki martangiang jotjot ma tadok mauliate tu Jahowa alani silehon-lehonna i.​—Jak. 1:17.

18. Songon dia do caranta mangargai Bale Harajaonta?

¹⁸ Na mandok mauliate do hita tu Jahowa molo tajaga asa tongtong ias jala rapi ingananta marpungu. Sude ma hita dohot  paiashon jala mangurus Bale Harajaonta. Jala halak na martanggung jawab tu sound system, ingkon denggan do dijaga alat i asa unang hatop sega. Molo denggan dijaga, boi ma leleng tapangke alat i. Alani i, gabe boi ma dipangke hepeng sumbanganta laho mambangun dohot padengganhon angka Bale Harajaon di liat portibi on.

19. Aha do na boi taparsiajari sian pengalaman ni sahalak pengawas wilayah dohot istrina?

¹⁹ Tu angka dongan na mangurupi hita. Molo olo hita mandok mauliate, boi do gabe muba pangkilalaan ni sasahalak tingki mangadopi hasusaan. Taida ma pengalaman ni sahalak pengawas wilayah dohot istrina. Tingki musim salju, marbarita ma nasida sadari manipat. Dung sae marbarita mulak ma nasida tu penginapan. Alani ngalina, dipangke istrina ma muse baju panas tingki modom. Manogotna i didok istrina ma tu ibana asa so nasida sian penugasan i, ala ndang tolap be dihilala istrina i. Susa do dihilala istrina i ala ingkon marpinda-pinda nasida ganup minggu. Alai di manogot i, ro ma surat sian kantor cabang tu istrina. Di bagasan surat i, dipuji do istrina i ala boi tongtong martahan mangulahon tugasna. Didok suamina i ma, “Dung dijaha ibana surat i, gabe las do rohana jala ndang hea be didok asa so hami sian penugasan i. Gariada, molo hudok asa so hami sian penugasan i, gabe ibana do na patoguhon ahu asa tongtong martahan.” Tongtong do nasida martahan di penugasan i hampir 40 taon.

20. Aha do na ingkon taulahon ganup ari, jala boasa?

²⁰ Ganup ari, ra marsitutu do hita laho mandok mauliate jala tapatudu do i sian pangkataion dohot parniulaonta. Alana godang do halak di tingkinta saonari, ndang diboto mandok mauliate. Alani i, molo sian ias ni rohanta do tadok mauliate boi do i patoguhon roha ni na asing. Jala boi do i mambahen lam solhot parale-aleonta dohot nasida. Alai na rumingkot molo olo hita mandok mauliate, na lomo do rohanta maniru Jahowa.