1. Paano ipinahiling kan Samaritanong pinaumayan ni Jesus an saiyang pasasalamat?

DESPERADO na an sampulong lalaki. May leproso sinda, asin mayo nang paglaom na mararahay pa sinda. Pero sarong aldaw, natanaw ninda si Jesus, an Dakulang Paratukdo. Nabaretaan ninda na nagpaumay si Jesus nin manlain-lain na klase nin hilang, asin kumbinsido sinda na mapapaumayan niya man sinda. Kaya nagkurahaw sinda: “Jesus, Paratukdo, mahirak ka sa samuya!” Lubos na naumayan an sampulong lalaki. Siguradong gabos sinda nagpapasalamat sa kabuutan ni Jesus. Pero an saro sa sainda, dai lang basta nakamati nin pasasalamat, kundi ipinahayag niya an saiyang pasasalamat * ki Jesus. An pinaumayan na lalaking iyan, na sarong Samaritano, napahiro na pamurawayon an Diyos “sa makusog na boses.”—Luc. 17:12-19.

2-3. (a) Taano ta tibaad dai ta naipapahiling an satong pasasalamat? (b) Ano an pag-uulayan niyato sa artikulong ini?

² Arog kan Samaritano, gusto niyatong ipahayag an satong pasasalamat sa mga mabuot. Pero may beses na tibaad nalilingawan tang ipahiling an namamatian niyatong pasasalamat paagi sa tataramon o gibo.

³ Sa artikulong ini, pag-uulayan niyato kun taano ta mahalaga na ipahiling niyato an satong pasasalamat paagi sa tataramon asin gibo. Makakanuod kita sa halimbawa kan pirang karakter sa Bibliya na mapagpasalamat asin sa iba pa na bako. Dangan tutukaron niyato an espesipikong mga paagi na puwede kitang makapahayag nin pasasalamat.

4-5. Taano ta dapat tang ipahayag an satong pasasalamat?

⁴ Si Jehova marahayon na halimbawa sa sato kun dapit sa pagpahayag nin pasasalamat. An sarong paagi na ginigibo niya ini iyo an pagtao nin balos sa mga lingkod niya na nagpapaugma sa saiya. (2 Sam. 22:21; Sal. 13:6; Mat. 10:40, 41) Asin dinadagka kita kan Kasuratan na “magin paraarog . . . sa Diyos bilang mga aking namumutan.” (Efe. 5:1) Kaya an sarong mahalagang marhay na dahilan kaya dapat niyatong ipahayag an satong pasasalamat iyo na gusto niyatong arugon an halimbawa ni Jehova.

⁵ Pag-isipan an saro pang dahilan kun taano ta gusto niyatong ipahayag an satong pasasalamat sa iba. An pasasalamat garo masiram na kakanon—mas nakakaugma pag ihinihiras. Pag namamatian tang inaapresyar kita, nauugma kita. Pag ipinapahayag ta an satong pasasalamat, napapaugma ta an iba. Namamatian kan tawong pinapasalamatan ta na talagang sulit an saiyang paghihinguwa na tabangan kita, o itao an kaipuhan ta. Bilang resulta, napapakusog an pagigin mag-amigo niyato asin kan tawong iyan.

6. Ano an pirang pagkakaagid kan mga tataramon nin pasasalamat asin kan mga mansanas na bulawan?

⁶ Mahalaga an pagpahayag niyato nin pasasalamat. Sinasabi kan Bibliya: “Siring sa mga mansanas na bulawan sa mga inukit na plata an tataramon na sinabi sa tamang panahon.” (Tal. 25:11, NW) Isipa kun gurano kagayon an sarong bulawan na mansanas na nasa inukit na plata! Asin isipa na sana kun gurano kamahal iyan! Ano an mamamatian mo kun tinawan ka nin siring kaiyan na regalo? Puwede man na magin arog kaiyan kahalaga an saimong mga tataramon nin pasasalamat sa iba. Asin isip-isipa ini: An mansanas na gibo sa bulawan puwedeng magdanay nin haluyon na panahon. Kaagid kaiyan, an ipinahayag mong pasasalamat sa saro puwede niyang magirumduman asin pahalagahan na marhay sa bilog niyang buhay.

7. Arog kan mababasa ta sa Salmo 27:4, paano ipinahayag ni David asin kan ibang mga salmista an saindang pasasalamat?

⁷ Dakul sa mga lingkod nin Diyos kaidto an nagpahiling nin pasasalamat. Saro sa sainda si David. (Basahon an Salmo 27:4.) Pinahalagahan niyang marhay an dalisay na pagsamba asin ipinahayag niya iyan sa gibo. Itinao niya an dakulang kabtang kan saiyang kayamanan para sa pagtugdok kan templo. An mga gikan ni Asaf nagpahayag nin pasasalamat paagi sa pagsurat nin mga salmo, o kanta nin pag-umaw. Sa sarong kanta, pinasalamatan ninda an Diyos asin ipinahayag an saindang paghanga sa ‘makangangalas na mga gibo’ ni Jehova. (Sal. 75:1, An Marahay na Bareta Biblia) Malinaw nanggad, gusto ni David asin kan mga gikan ni Asaf na ipahiling ki Jehova kun gurano ninda pinapasalamatan an gabos na bendisyon na itinao niya sa sainda. May naiisip ka daw na mga paagi tanganing maarog an mga salmistang iyan?

8-9. Paano ipinahiling ni apostol Pablo an saiyang pasasalamat sa mga kapagtubod niya, asin ano an posibleng marhay na nagin resulta kaiyan?

⁸ Pinahalagahan ni apostol Pablo an saiyang mga kapagtubod asin mahihiling iyan sa paagi nin pagsambit niya mapadapit sa sainda. Sa saiyang personal na mga pamibi, pirmi niyang pinasalamatan an Diyos huli sa sainda. Ipinahayag niya man an saiyang pasasalamat sa mga surat niya sa sainda. Sa inot na 15 bersikulo kan Roma 16, sinambit ni Pablo sa pangaran an 27 kapwa niya Kristiyano. Espesipikong sinambit ni Pablo na si Prisca asin Aquila ‘isinapeligro an saindang buhay’ para sa saiya, asin sinabi niya na si Febe “parasurog . . . sa dakul,” pati na ki Pablo. Kinomendaran niya an namumutan asin mahigos na mga tugang na idto.—Roma 16:1-15.

⁹ Aram ni Pablo na bakong perpekto an saiyang mga kapagtubod, pero sa pagtatapos kan surat niya sa mga taga Roma, nagpokus siya sa marahay na mga kuwalidad ninda. Isipa na sana kun gurano napakusog an mga Kristiyanong idto kan madangog nindang makusog na binabasa sa kongregasyon an mga sinabi ni Pablo! Bilang resulta, posibleng marhay na nagin mas dayupot sinda ki Pablo. Pirmi mo daw ipinapahayag an saimong pasasalamat sa marahay na mga bagay na sinasabi asin ginigibo kan mga kakongregasyon mo?

10. Ano an manunudan niyato sa paagi ni Jesus nin pagpahayag nin pasasalamat sa saiyang mga parasunod?

¹⁰ Sa mga mensahe ni Jesus sa partikular na mga kongregasyon sa Asia Minor, ipinahayag niya an saiyang pasasalamat sa ginibo kan saiyang mga parasunod. Halimbawa, pinunan niya an saiyang mensahe para sa kongregasyon sa Tiatira sa pagsabing: “Aram ko an saimong mga gibo, asin an saimong pagkamuot asin pagtubod saka paglilingkod asin pakatagal, asin aram kong an saimong mga ginibo kaining huri mas urog kisa sa mga ginibo mo kan primero.” (Kap. 2:19) Sinambit ni Jesus bako sana an pag-uswag kan saindang gibuhon kundi kinomendaran niya man sinda sa mga kuwalidad na nagpahiro sa sainda na gumibo nin marahay. Maski ngani kaipuhan tawan ni Jesus nin konseho an nagkapira sa Tiatira, pinunan asin tinapos niya pa man giraray an saiyang mensahe paagi sa pampakusog nin buot. (Kap. 2:25-28) Isipa an awtoridad na igwa si Jesus bilang payo kan gabos na kongregasyon. Dai niya kita kaipuhan na pasalamatan sa ginigibo ta para sa saiya. Dawa arog kaiyan, nagpapahayag pa man giraray siya nin pasasalamat. Marahayon nanggad na halimbawa para sa mga elder!

11. Siring kan mababasa ta sa Hebreo 12:16, ano an sabuot ni Esau mapadapit sa mga bagay na sagrado?

¹¹ Nakakamundo, may mga karakter sa Bibliya na dai nagpahiling nin pasasalamat. Halimbawa, dawa ngani pinadakula si Esau nin mga magurang na namumutan asin iginagalang si Jehova, dai niya pinahalagahan an mga bagay na sagrado. (Basahon an Hebreo 12:16.) Paano nagin risang-risa an pagigin bako niyang mapagpasalamat?  Basta na sana ipinabakal ni Esau an saiyang deretso bilang panganay sa nguhod niyang tugang na si Jacob para lang sa sarong mangko nin linagang kakanon. (Gen. 25:30-34) Kan huri, pinagbasulan na marhay ni Esau an saiyang ginibo. Pero dai siya nagin mapagpasalamat sa kun ano an igwa siya, kaya wara siyang dahilan na magreklamo kan dai saiya itao an bendisyon para sa panganay.

12-13. Paano nagpahiling nin kawaran nin pasasalamat an mga Israelita, asin ano an resulta kaiyan?

¹² Dakul an dahilan kan mga Israelita na magpahiling nin pasasalamat. Pinatalingkas sinda sa pagkauripon kan paabutan ni Jehova nin Sampulong Damat an Ehipto. Dangan ilinigtas sinda nin Diyos sa grabeng kapahamakan paagi sa paglaglag sa bilog na hukbo kan Ehipto sa Dagat na Pula. Grabe an pasasalamat kan mga Israelita kaya nagkanta sinda nin kanta nin kapangganahan bilang pag-umaw ki Jehova. Pero nagdanay daw sindang mapagpasalamat?

¹³ Kan mapaatubang sa bagong mga kadipisilan an mga Israelita, nalingawan tulos ninda an gabos na marahay na ginibo ni Jehova para sa sainda. Dangan ipinahiling ninda na bako sindang mapagpasalamat. (Sal. 106:7) Paano? ‘An bilog na katiripunan nin mga Israelita naggumod-gumod tumang ki Moises asin Aaron’—an totoo, naggumod-gumod sinda tumang ki Jehova. (Ex. 16:2, 8) Dai nagustuhan ni Jehova an pagigin bakong mapagpasalamat kan saiyang banwaan. Kan huri, ihinula niya na magagadan sa kaawagan an bilog na henerasyon na idto nin mga Israelita apuwera ki Josue asin Caleb. (Bil. 14:22-24; 26:65) Aramon niyato kun paano ta malilikayan na maarog an maraot na mga halimbawang ini asin kun paano ta maaarog idtong marahay na mga halimbawa.

14-15. (a) Paano maipapahiling kan mag-agom na mapagpasalamat sinda sa lambang saro? (b) Paano matutukduan nin mga magurang an saindang mga aki na magpahiling nin pasasalamat?

¹⁴ Sa laog nin pamilya. Nakikinabang an bilog na pamilya pag an lambang miyembro kaiyan nagpapahayag nin pasasalamat. Mantang urog na nagpapahiling nin pasasalamat sa lambang saro an mag-agom, nagigin mas dayupot sinda. Nagigin mas madali man saindang patawadon an mga sala kan lambang saro. An sarong mapagpasalamat na agom na lalaki dai lang hinihiling an marahay na mga sinasabi asin ginigibo kan saiyang agom, kundi ‘minatindog siya asin inuumaw ini.’ (Tal. 31:10, 28, NW) Asin an madunong na agom na babayi, sinasabi sa saiyang agom an espesipikong mga bagay na ipinagpapasalamat niya digdi.

¹⁵ Mga magurang, paano nindo matutukduan an saindong mga aki na magpahiling nin pasasalamat? Girumdumon na inaarog kan saindong mga aki an sinasabi asin ginigibo nindo. Kaya magpahiling nin marahay na halimbawa paagi sa  pagpasalamat sa sainda pag may ginibo sinda para sa saindo. Dugang pa, tukduan an saindong mga aki na magpasalamat pag may ginibo an iba para sa sainda. Tabangan an saindong mga aki na masabutan na an pagpahayag nin pasasalamat hali sa puso, asin na marahayon an puwedeng magin resulta kan saindang mga tataramon nin pasasalamat. Halimbawa, sinabi nin sarong hoben na babayi na si Clary: “Kan 32 anyos si Mama, bigla siyang nagin nagsosolong magurang na mapadakula sa tulong aki. Kan mag-32 na ako, inisip-isip ko kun gurano kadipisil iyan sa saiya sa edad niyang idto. Kaya sinabi ko sa saiya na pinapasalamatan kong marhay an gabos na sakripisyo niya sa pagpadakula sa samo kan mga tugang kong lalaki. Dai pa sana nahaloy, sinabi niya sako na mahalagang marhay sa saiya an mga sinabi kong idto, na pirmi niyang iniisip-isip iyan, asin pirming napapaugma kaiyan an aldaw niya.”

16. Magtao nin halimbawa kun paano puwedeng makapakusog sa iba an pagpahayag nin pasasalamat.

¹⁶ Sa laog nin kongregasyon. Pag nagpapahayag kita nin pasasalamat sa satong mga tugang, napapakusog ta sinda. Halimbawa, nagkahilang nin grabe an sarong 28 anyos na elder na si Jorge. Dai siya nakaatender sa mga pagtiripon sa laog nin sarong bulan. Dawa kan nakakaatender na siya, dai niya pa man giraray kayang magpresentar nin mga kabtang. Inadmitir ni Jorge: “Pagmati ko mayo na akong halaga huli sa sakong mga limitasyon asin dai ko maasikaso an mga responsabilidad sa kongregasyon. Pero pagkatapos nin sarong pagtiripon, sarong brother an nagsabi sako: ‘Gusto takang pasalamatan sa marahayon na halimbawa mo sa pamilya ko. Talagang nakinabang kaming marhay sa mga pahayag mo sa nakaaging mga taon. Nakatabang iyan sa samo na umuswag sa espirituwal.’ Dai ako makataram, asin napaluha ako. Iyo mismo idto an kaipuhan kong madangog.”

17. Siring kan sinambit sa Colosas 3:15, paano niyato maipapahiling an satong pasasalamat sa pagkabukas-palad ni Jehova?

¹⁷ Sa bukas-palad niyatong Diyos. Tinatawan kita ni Jehova nin abundang espirituwal na kakanon. Halimbawa, nag-aako kita nin kapaki-pakinabang na mga instruksiyon paagi sa satong mga pagtiripon, magasin, asin website. Nakadangog ka na daw nin pahayag, nakabasa nin artikulo, o nakahiling nin programa sa JW Broadcasting asin naisip mo, ‘Iyan mismo an kaipuhan ko’? Paano ta maipapahiling an satong pasasalamat ki Jehova? (Basahon an Colosas 3:15.) An sarong paagi iyo an regular na pagpasalamat sa saiya sa satong mga pamibi para sa marahay na mga regalong ini.—Sant. 1:17.

18. Sa anong mga paagi ta maipapahiling an satong pasasalamat para sa satong mga Kingdom Hall?

¹⁸ Ipinapahayag man niyato an pasasalamat ki Jehova pag pinapagdanay tang malinig asin areglado an lugar niyato nin pagsamba. Regular kitang nagtatabang sa paglinig saka pagmentenar  kan satong mga Kingdom Hall, asin an mga nag-aasikaso sa elektronikong mga kagamitan kan kongregasyon maingat sa paggamit kaiyan. Pag minementenar niyato an satong Kingdom Hall, mas haloy iyan na magagamit asin daing gayo mangangaipo nin mayor na mga paghirahay. Paagi kaiyan, mas dakul na kuwarta an magagamit sa pagtugdok asin pagpakarhay nin iba pang Kingdom Hall sa iba pang parte kan kinaban.

19. Ano an nanudan mo sa eksperyensiya nin sarong paraataman nin sirkito asin kan saiyang agom?

¹⁹ Sa mga mahigos na naglilingkod para sa sato. Pag nagpapahayag kita nin pasasalamat, an mga tataramon niyato puwedeng makapabago sa pagmansay nin sarong tawo sa mga kadipisilan na inaatubang niya. Pag-isipan an eksperyensiya nin sarong paraataman nin sirkito asin kan saiyang agom. Pagkatapos nin bilog na aldaw na pagmiministeryo sa panahon nin tiglipot, pagal-pagal sindang nagpuli sa dagusan ninda. Maliputon na marhay kaya nagturog an agom na babayi na sulot an bado niyang panglipot. Kinaagahan, sinabi niya sa saiyang agom na garo dai na niya kayang magpadagos sa saindang asignasyon. Dangan kan aga man sanang idto, may nag-abot na surat hali sa sangang opisina, asin para iyan sa agom na babayi. Mainit siyang kinomendaran sa surat huli sa saiyang ministeryo asin pakatagal. Sinabi diyan na nasasabutan ninda kun gurano kadipisil an pagpaburubalyo nin dagusan kada semana. Sinabi kan agom niya: “Nataros na marhay kan komendasyon na iyan an saiyang puso kaya dai niya na nuarin man nasambitan an mapadapit sa pagpundo sa asignasyon. Sa katunayan, nagkapirang beses niya akong pinakusog na magpadagos pag naiisip kong magpundo.” An mag-agom na iyan nagdanay sa asignasyon ninda bilang nagbibiyaheng paraataman sa laog nin haros 40 taon.

20. Ano an dapat na hinguwahon niyato kada aldaw, asin taano?

²⁰ Lugod na hinguwahon niyato na magpahiling nin pasasalamat kada aldaw paagi sa tataramon asin gibo. An satong udok sa pusong mga tataramon asin gibo tibaad iyo mismo an kaipuhan nin saro tanganing makayanan an mga problema asin kadipisilan sa aroaldaw sa bakong mapagpasalamat na kinaban na ini. Asin an mga kapahayagan niyato nin pasasalamat makakatabang na magkaigwa kita nin dayupot na mga pakikiamigo na puwedeng magdanay sagkod lamang. Urog sa gabos, kun ginigibo ta iyan, inaarog niyato an satong bukas-palad asin mapagpasalamat na Ama, si Jehova.