1. Snon Samaria oso ḇesmai pararei ro Yesus ani, rariso fyasnai syowi ya rai?

SNON risamfur sisya sismai roi ḇeḇyeḇa kaku. Siduf pado, ma na jadi fa siprei ḇa. Ḇape, ras oso smam Yesus ro swaf ḇebinkwane. Srower kwar Yesus ḇyuk pararei faro dafduf nakam, ma sikyar na ipok fa ḇyuk pararei ḇe si kako. Inja, siyiw ḇo soḇo, ”Yesus, Guru, waswar inko!” Mura Yesus ḇye si fa siprei beri. Kakuḇae, sikame na sesyowi kaku Yesus ḇaḇenaḇye ḇyena. Ḇape, oso ro fandu si fyasnai syowi * faro Yesus i, ḇyaḇir ro sne ḇyedi monda ḇa. Snon ḇeprei ani ryamaker Samaria. Sneri idif i fa isandik Allah ”kuker mkaren ḇeba”.​—Luk. 17:12-19.

2-3. (a) Rosai ḇefnai fa fafisu ono na kofasnai syowi ya ḇa? (b) Rosai na kawos ro farkarkor inena?

² Raris snon Samaria ani, komarisen kofasnai syowi faro snonkaku ḇefrur pyum konsya. Ḇape, fafisu ono na koḇefnder fa kofasnai syowi ro wos ma roi kofrur na faro snonkaku ḇesesya.

³ Ro farkarkor ine, na kawos rosai ḇefnai fandun fa kofasnai syowi roro wos ma roi kofrur na. Na kofarkor ro snonkaku ḇeḇeso ḇeḇeyap ro Refo ḇefasnai syowi ma ḇefasnai syowi ḇa sya. Ramnai, na kawos moḇsa kofasnai syowi ya rai.

4-5. Rosai ḇefnai fandun fa kofasnai syowi ya?

⁴ Yahwe fyasnai kwar nyan ḇe ko fa kofasnai syowi. Nyan oser ifrur ya iso ḇyebarakas snonkaku ḇefrur marisen Ḇyena sya. (2 Sam. 22:21; Mz. 13:6; Mat. 10:40, 41) Refo ya kako danun ḇe ko fa ’koso asuser Allah, imnis romawa iswar kaku’. (Ef. 5:1) Inja, roi ḇefnai kaku fa kofasnai syowi ya iso snar komarisen kosoasuser Yahwe nyan Ḇyena.

⁵ Kokarapan roi ḇese wer ḇefnai fa komarisen kofasnai syowi ḇe snonkaku ḇesesya. Rofyor sesyowi ko ido, na komarisen kaku. Ma rofyor kofasnai syowi koḇena, kofrur ḇesesya simarisen. Rofyor kokofen kasumasa faro snonkaku ḇesewar fa ḇefnoḇek ko ḇaido ḇeḇuk roi kofandun na, nari ifawi roi ifrur na nun fainda ḇe ko. Bon ḇepyum ya, ḇaḇebati koḇena kuker i na nsambraḇ syadi.

6. Rariso kofasnai syowi ro wos koḇena namnis kuker apel ḇeḇefrur ro brawen na?

⁶ Syowi kofasnai na nemaeja kaku. Refo ikofen, ”Raris apel brawen ḇero rosaser sarak, rarirya wos neḇekofen ro oras ḇemnis.” (Ams. 25:11) Kowasen kada apel ḇeḇefrur ro brawen srir i ro rosaser sarak, na ipyum kaku! Na ḇyemaeja kaku! Moḇsa ḇaḇir rai fyor sḇuk ḇe au roi ḇepyum kaku ḇeradirya? Kaku, syowi kofasnai ro wos koḇena ḇe snonkaku ḇesesya na nemaeja kaku. Kokarapan roi ine: Apel oso ḇyeḇefrur ro brawen na kyain fyoro. Rarirya kako, rofyor kofasnai syowi ro wos koḇena, ḇerower sya na siswarepen na ma sesyowi na isof fyoro.

7. Rariso Daud, raris komam ro Mazmur 27:4, ma ḇefas Mazmur ḇesesya sifasnai syowi ya rai?

⁷ Allah manfamyan Ḇyesi ḇepon siwara  sifasnai syowi. Oser ya iso Daud. (Wasya Mazmur 27:4.) Ḇyesyowi kaku samsyom ḇekaku ya ma fyasnai na ro roi ifrur na. Ḇyuk roi ḇepyum ḇebor ro arasai ḇyena fa ḇyukisaramper ḇaḇawes bait ya. Asaf kpu up ḇyesi sifasnai syowi kuker sfas mazmur, ḇaido dow sanandik. Ro dow oso, sikofen kasumasa ḇe Allah ma sifasnai simanen kaku faro ’fararur ḇeba kaku [Yahwe] Ḇyena’. (Mz. 75:1) Nasnai kaku, Daud ma Asaf kpu up ḇyesi simarisen sfasnai ḇe Yahwe sesyowi kaku barakas ḇebor kam sismai ro I na. Na kwara nyan rariso wakso ḇefas Mazmur ansine ke?

8-9. Rariso Manwawan Paulus fyasnai syowi faro naek srar ḇyesi, ma rosai bon ya?

⁸ Manwawan Paulus ḇyesyowi naek srar ḇyesi ma fyasnai na ro rosai ikofen ḇekur si na. Ro nadi mankun ḇyedi, ikofen kasumasa ḇesya kwar ḇe Allah snar ḇyuk naek srar sya ḇe i. Ro syapram ḇyena ikofenḇair syowi ḇyena faro si. Ro syap Roma 16:1-15, Paulus dapḇair min Kristen ri 27 sisnosna. Paulus dapmnis kaku Priska ma Akuila ’indokada sumar sadwer i’. Ma fyasnaiḇair Febe ”ifnoḇek snonkaku sibor kwar”, Paulus i kako. Isandik naek srar ḇesaswar ma ḇefararur marḇak ansine.

⁹ Paulus ifawi naek srar ḇyesi sima sinapes ḇa. Ḇape, kyara monda faro rari ḇepyum sena, imnis neḇemam ro ḇar pupes syapram fyarem ḇe naek srar ḇero Roma. Kwarapan, fyor naek srar ro sidang srower siwasya kuker mkaren naba Paulus anun ḇyena na sisambraḇ kaku! Bon ya, sifanam syadi kuker Paulus i. Au ido, wakfasnai syowi ḇesyakwar faro roi ḇepyum naek srar ḇero sidang Bedi sikofen ḇaido sifrur na ke?

10. Rosai kofarkor ro nyan Yesus fyasnai syowi faro manfamyan ḇyesi?

¹⁰ Rofyor Yesus ḇyuk ananun ḇe sidang riḇeḇeso ro Asia Kasun, fyasnai syowi faro manfamyan ḇyesi snar fararur marḇak sena. Imnis raris, ḇyerandak ananun ḇyena faro sidang Tiatira kuker ikofen, ”Yafawi roi ḇeḇor mkofrur na, yafawi mkosaswar, mkosouser, mkofararur, ma mkofarmku ro kandera. Yafawi baboine mkofararur nabor syadi ro ḇeponiwara.” (Why. 2:19) Yesus dap monda ḇa sifrur fararur ḇebor kwar. Mboi, isandik si snar rari ḇepyum ḇedif si fa sifrur roi ḇeḇye na. Yesus imbe isonek naek srar ḇeḇeso ro Tiatira, ḇape ḇyerandak ma isisen ananun ḇyena kuker wos ḇesambraḇser si. (Why. 2:25-28) Kwarapan kada, Yesus nya papoik fa ḇyebru ro sidang nakam. Fandun ḇa fa ikofen kasumasa faro ko faro roi kofrur ḇe I na. Ḇesyaḇo, fyasnai syowi pdef. Inema nyan ḇepyum kaku faro penatua fa siso na!

11. Raris ḇeḇefas ro Ibrani 12:16, rariso Esau mamam ḇyena faro roi ḇesren na?

¹¹ Faḇye kaku, snonkaku ono ḇeḇeyap ro Refo sifasnai syowi ya ḇa. Imnis raris, Esau i. Sinan ḇemam faduru i suma suswar ma susyowi kaku Yahwe I. Ḇape, dakḇesyowi roi ḇesren na ḇa. (Wasya Ibrani 12:16.) Moḇsa nane nfasnai rai? Esau kyara kawan ḇa ḇesyaḇo ḇyoḇ nasan romawa rawer ḇyedi ḇe ḇedar ḇyani, Yakub i, faro roḇean ben oser monda. (Kej. 25:30-34) Ḇarpur mura, Esau fyafko kaku faro roi kyinfir kwar ya. Ḇape, fyasnai kwar ḇyesyowi roi ismai na ḇa. Inja, nya knam noḇa fa imsore fyor ismai ḇok ḇe romawa rawer ya ḇa.

12-13. Rariso snonkaku Israel sifasnai sesyowi Yahwe I ḇa, ma rosai sismai na?

 ¹² Snonkaku Israel sya sna sano ḇebor fa sifasnai syowi. Yahwe ḇye Kandera Risamfur fa nkur Masir ya raposa, imkei si ro ḇaḇewomen ya. Mura, Allah fyaspar si kuker myun pres sordade Masir ro Soren Ḇerik sya. Snonkaku Israel sikofen kasumasa inja sidisen dow ḇaḇemkei ḇesandik Yahwe I. Ḇape, sifasnai syowi pdef ke?

¹³ Rofyor snonkaku Israel sismai samswen wer, fasaw fa siḇefnder roi ḇepyum nakam Yahwe ifur kwar ḇe si na. Mura, sifrur wer roi ḇefasnai sesyowi Yahwe I ḇa. (Mz. 106:7) Rosai rirya? ”Kawasa Israel syakam sisurem Moses ma Harun su”. Mboi kakuya, sisurem faro Yahwe I. (Kel. 16:2, 8) Yahwe fyafko kaku snar kawasa Ḇyesi sakfawi sakfasnai syowi ḇe I ḇa. Ḇarpurya, ḇyardi syos ro snonkaku Israel syakam nari simar ro moḇ ḇeursḇa. Yosua ma Kaleb su mande nari sukenem pdef. (Bil. 14:22-24; 26:65) Mkorama komam rariso kakso awer nyan ḇeḇyeḇa nane ma koso snonkaku ḇeḇye sya rai.

14-15. (a) Moḇsa snonswa ḇaido binswa fyasnai syowi ḇe suminya rai? (b) Moḇsa sinan sya na sfarkor romawa sesi fa sifawi sfasnai syowi rai?

¹⁴ Ro kina ya dori. Rofyor oser-oser ḇero kina fyasnai syowi nari sikam sismai fainda. Snonswa ḇaido binswa fyasnai syowi ḇe sumin ya ido, nari sufanam yae su. Nari napyan ḇe su fa suḇuk ampunyae fyor oso ifrur sasar. Snonswa fyasnai syowi ḇe swari kuker myam faro roi ḇepyum ikofen ma ifrur na monda ḇa, ḇape ”dores ma isandik i”. (Ams. 31:10, 28) Ma binswa ḇefrur pyum oso na ikofenbos ḇe swari roi ḇefrur fa ḇyesyowi i.

¹⁵ Sinan disau ido, moḇsa na wafarkor romawa besi fa sifawi sfasnai syowi rai? Waswarepen, romawa besi na siso mnis rosai wakofen ma wafrur na. Inja, fasnai nyan ḇepyum kuker wakofen kasumasa yoḇ si fyor sifrur roi oso ḇe Au. Osower ido, farkor si fa sifawi sikofen kasumasa fyor ḇesesya sifrur roi ḇeḇye faro si. Wafnoḇek romawa besi infa sifawi sfasnai syowi kuker sne ḇesiper ma wos sena ido na nun fainda kaku. Imnis raris, bin ḇebabo oso snori  Clary doḇe, ”Fafisu awini ḇyeumur taun ri 32, kamam ibur inko inja awin demir ḇefarus inko, romawa rikyor ḇyeskoya. Fyor yakḇeumur taun ri 32, yawasenkara samswen awin ismai ro fafisu anya. Inja, yakofen kasumasa faro roi nakam ifrur kwar na fa fyarus inko isof ro nkoba ine. Fyoro ḇaim ine, awin ikofen ḇe aya ḇo doḇe wos yakofen anya nun sneprei kaku. Ikofen kyara ker na, ma nafrur fa iryaḇ kaku.”

16. Far farfyar oso ḇefasnaiḇair rariso kofasnai syowi na nasambraḇser ḇesesya rai.

¹⁶ Ro sidang. Fafisu kofasnai syowi faro naek srar koḇesi, nane nasambraḇser si. Imnis ra, Jorge, penatua ḇyeumur taun ri 28, iduf marḇak kaku. Swaf paik oser dakso fananjur ya ḇa. Fyor dakso wer, samswen kaker ḇe i fa dun pyum ḇar ḇyena ro fananjur. Jorge ikofen, ”Yaḇoryae snar yaryarḇa ma jadi fa yuf fakamamar yedi ro sidang ya ḇa. Ḇape, ras oso fyor fananjur ya imnai, naek oso ikofen ḇe aya ryadine, ’Yaḇe yakofen kasumasa ḇe au snar fasnai kwar roi ḇepyum faro kina ayesi. Nkomarisen faya bena wakofen ro taun riḇeso naiwara. Faya anna nasambraḇser kakyar nkoḇena.’ Roi naek ani ikofen na nsun kaku ro sne yedi ma yakanes. Naiso nesambraḇser kaku aya.”

17. Raris ḇeḇeyap ro Kolose 3:15, moḇsa na kofasnai syowi ḇe Yahwe faro ḇaḇenaḇye Ḇyena rai?

¹⁷ Faro Allah ḇaḇenaḇye Ḇyena. Yahwe fyasos kwar roḇean rur ḇebor syadi ḇe ko. Rupa ra, kosmai farkankin ro fananjur, majalah koḇena, ma situs web koḇedi. Fafisu ono rwower faya oso, wawasya ḇar oso, ḇaido mam kwar JW Broadcasting ḇo woḇo, ’Ine imnis rosai yafandun na’ ke? Moḇsa na kofasnai kasumasa ḇe Yahwe I rai? (Wasya Kolose 3:15.) Nyan oser ya iso kokofen kasumasa ḇesya kwar ro nadi koḇena faro roi ḇepyum ḇyuk kwar anna.​—Yak. 1:17.

18. Nyan rosai monda na kofasnai syowi faro Balai Karajan koḇedi?

¹⁸ Kofasnai syowi ḇe Yahwe kako kuker komam faduru moḇ koḇukinadi ro ya fa isren ma ipyum pdef. Kakso warpu fa kofrur sren ma kofaduru Balai Karajan koḇedi. Ḇena fararur fa ḇefasospyan tata suara ma vidio ro fananjur sya, fandun fa sḇuk pyum roieḇor na. Kofaduru mnis Balai Karajan koḇedi ido, Balai anya na kyain fyoro ma roi nabor fandun  fa kofrur mnis na ḇa. Rarirya ido, kona kumpan sibor syadi fa koḇukiḇawes ma koḇukifrurmnis Balai Karajan ḇesena ro supswan ḇesiper.

19. Farkarkor rosai kun ro pengawas wilayah oso ma swari fawawar suḇena?

¹⁹ Faro snonkaku ḇefararur marḇak faro konsya. Rofyor kofasnai syowi, wos koḇena na nafnoḇek snonkaku oso fa nya kakara ḇemnis faro samswen ismai na. Kokarapan fawawar ro pengawas wilayah oso ma swari. Fyor suḇaryas ro ras ḇesiper ro fafisu ḇepnunek ya raposa, sukaḇer ḇe moḇ suḇarek ro ya. Swari isyuf fafayaḇa rawo isun sansun ḇekpor ḇo denef. Ro arwoya, ikofen ḇe swari na jadi fa ifrur pdef fararur pengawas wilayah ya werḇa. Mura, ro arwo anya kako, susmai syapram ḇeramaker kantor cabang, kyur ḇe imbesrar ani. Sfas ro syapram ani, sisandik imbesrar ani snar fararmyan ma ḇaḇefarmku ḇyena. Sifawi kako na samswen ḇesu fa sura ḇe moḇ oso ḇese ro minggu nakam. Swari ikofen, ”Wos ḇero syapram ani nafrur fa swa yedi sneri iprei kaku. Inja, dakawos fa numnai ro fararur ine werḇa. Kakuya, rarwan riḇeso iso ḇesambraḇser aya fyor yakara imbe yasusu.” Imbeswa suine suro fararur pengawas wilayah pdef isof ro fanam swaf taun ri 40.

20. Rosaiso fandun fa kosewar fa kofasnai na ro ras ḇe ras, ma rosai ḇefnai ya?

²⁰ Rirya kada, ras ḇe ras kosewar fa kofasnai kasumasa ḇaido syowi ro rosai kokofen ma kofrur na. Roi kokofen ḇaido kofrur kuker sne ḇesiper imbude na nafnoḇek snonkaku ḇese insama syambraḇ fa ikamar samswen ro dunya ḇefawi ḇefasnai syowi ḇa ine. Kofasnai syowi ido nari nasambraḇser ḇaḇebati koḇena kuker ḇesesya fa nakain fyoro. Ḇefandun syadiya, na koso mnis Kma koḇedi, Yahwe I, ḇefasnai ḇaḇenaḇye ma syowi faro ko kwar.