1. ?Wan man Sameria we Jisas i hilim, i mekem wanem?

I GAT ten man we oli kasem rabis sik ya leprosi. Oli harem nogud tumas, mo oli no gat hop blong kam gud bakegen. Wan dei, oli luk Bigfala Tija ya Jisas i stap kam. Oli harem nius finis se Jisas i hilim ol defdefren kaen sik, mo oli bilif se hem i save hilim olgeta tu. Ale oli singaot se: “!Jisas, Tija, yu sore long mifala!” Wantaem nomo, sik blong ol ten man ya i finis. I sua se olgeta evriwan oli glad long kaen fasin we Jisas i mekem long olgeta. Be wan nomo we i man Sameria, i talem tangkiu. * Hem i no harem nomo se hem i glad. Be glad we i stap long hat blong hem, i pulum hem blong presem God “long bigfala voes.”—Luk 17:12-19.

2-3. (1) ?From wanem samtaem yumi no talem tangkiu? (2) Long stadi ya, ?bambae yumi tokbaot wanem?

² Olsem man Sameria ya, yumi wantem talem tangkiu long olgeta we oli kaen long yumi. Be samtaem yumi foget blong talem tangkiu o mekem wan samting, blong soemaot filing blong glad we yumi gat.

³ Long stadi ya, bambae yumi tokbaot from wanem i impoten blong talem tangkiu mo mekem samting blong soemaot glad blong yumi. Bambae yumi tokbaot samfala long Baebol we oli talem tangkiu mo samfala we oli no talem, mo lesen we yumi lanem. Mo bambae yumi tokbaot sam rod blong soemaot tangkiu.

4-5. ?From wanem yumi mas talem tangkiu?

⁴ Jehova i nambawan eksampol blong talem tangkiu. Hem i mekem olsem taem hem i givim blesing long olgeta we oli obei long hem. (2 Saml. 22:21; Sam 13:6; Mat. 10:40, 41) Baebol i pulum yumi blong “folem fasin blong God, olsem ol pikinini we hem i lavem olgeta tumas.” (Efes. 5:1) Taswe, wan impoten risen blong talem tangkiu, hemia from we yumi wantem folem eksampol blong Jehova.

⁵ Traem tingbaot wan narafala risen. Fasin blong talem tangkiu i olsem wan gudfala kakae. Kakae ya i gud moa taem yumi serem wetem narafala. Taem narafala i talem tangkiu long yu from samting we yu mekem, yu yu glad. Mo taem yu talem tangkiu long narafala from samting we hem i mekem, hem i glad. Hem i save se samting we hem i mekem blong givhan long yu o samting we hem i givim long yu, i rili halpem yu. Nao yutufala i fren moa.

6. ?Olsem wanem pija we oli wokem long gol i sem mak long ol gudfala tok blong talem tangkiu?

⁶ Fasin ya blong talem tangkiu i olsem wan sas samting. Baebol i talem se: “Sipos yu talemaot wan tingting blong yu, we yu mekem i klia gud long ol man, hemia i olsem we yu wokem wan pija long gol, mo yu putum silva i goraon long hem blong flasem.” (Prov. 25:11) !Traem tingbaot olsem wanem wan pija we oli wokem long gol i naes mo i sas tumas! Sipos yu kasem wan presen olsem, ?bambae yu harem olsem wanem? Taem yu talem tangkiu long narafala, hemia i sas olsem pija ya. Mo traem tingbaot: Pija we oli wokem long gol i save stap longtaem. Long sem fasin, taem yu talem tangkiu long narafala, hem i save gohed blong tingbaot tok ya long ful laef blong hem.

7. Folem Ol Sam 69:30, ?olsem wanem Deved mo sam narafala we oli raetem ol Sam, oli soemaot glad blong olgeta?

⁷ Plante man blong God bifo oli gat fasin ya  blong talem tangkiu. Wan long olgeta, hemia Deved. (Ridim Ol Sam 69:30.) Hem i tingbaot tru wosip olsem wan samting we i sas, mo ol aksen blong hem oli soemaot samting ya. Taswe hem i givim plante sas samting blong wokem tempol. Ol pikinini blong Asaf tu oli raetem ol gudfala Sam o singsing blong presem God. Long wan singsing, oli talem tangkiu long God mo oli tokbaot olsem wanem oli glad long “ol gudgudfala samting” we Jehova i wokem. (Sam 75:1) I klia se Deved mo ol pikinini blong Asaf oli wantem soemaot se oli glad long ol presen we Jehova i givim long olgeta. ?Yu save mekem wanem, blong folem fasin blong ol man we oli raetem ol Sam ya?

8-9. ?Olsem wanem aposol Pol i soemaot se hem i glad long ol brata mo sista? ?I sua se hemia i mekem wanem long olgeta?

⁸ Aposol Pol i glad long ol Kristin brata mo sista, mo hem i soemaot samting ya long ol toktok blong hem. Long ol prea blong hem, hem i talem tangkiu long God from olgeta. Mo long ol leta we hem i raetem tu, hem i talem ol gudfala toktok long olgeta. Long Rom 16:1-15, Pol i talem nem blong 27 brata mo sista. Hem i tokbaot Priska mo Akwila se “tufala ya i rere blong lusum laef blong tufala,” blong sevem hem. Mo hem i tokbaot Fibi se, “hem i givhan gud long mi mo plante narafala.” Hem i talem ol gudfala toktok from hadwok blong ol brata mo sista ya we hem i lavem olgeta.—Rom 16:1-15.

⁹ Nating se ol brata mo sista long Rom oli save mekem mastik, be long en blong leta blong Pol, hem i tokbaot ol gudfala fasin blong olgeta nomo. !Traem tingbaot olsem wanem oli mas harem gud taem oli ridimaot leta ya long kongregesen! Samting ya i mas mekem se oli fren gud wetem Pol. ?Yu yu stap talem ol gudfala toktok long ol brata mo sista long kongregesen, from ol samting we oli talem mo mekem?

10. ?Yumi lanem wanem from fasin blong Jisas blong talem ol gudfala toktok long ol kongregesen?

¹⁰ Taem Jisas i raetem leta long sam kongregesen long Esia Maena, hem i soemaot se hem i glad long wok we oli mekem. Tingbaot fastok blong leta we i go long kongregesen blong Tuatira: “Mi mi save ol samting we yu yu mekem, mo lav blong yu, mo bilif blong yu, mo wok blong God we yu mekem, mo fasin blong yu blong stanap strong. Mo mi save tu we wok blong yu naoia i bigwan moa long wok ya we yu mekem fastaem.” (Rev. 2:19) Jisas i glad long olgeta from we oli mekem moa wok i bitim bifo, mo antap long samting ya, hem i talem ol gudfala toktok from ol fasin we i pulum olgeta blong mekem ol gudfala wok ya. Nating se Jisas i mas stretem olgeta from sam fasin, be hem i statem mo finisim leta blong hem wetem ol toktok blong leftemap tingting. (Rev. 2:25-28) Traem tingbaot haenem we Jisas i gat olsem hed blong kongregesen. I no nid blong hem i talem tangkiu from ol wok we yumi mekem. Nating se i olsem, hem i no mestem janis blong talem tangkiu. !Hemia nambawan eksampol we ol elda oli save folem!

11. Folem Hibrus 12:16, ?Esao i gat wanem tingting long ol tabu samting?

¹¹ Sore tumas, sam man long Baebol oli no gat fasin ya blong talem tangkiu. Traem tingbaot Esao. Papa mo mama blong hem i lavem mo respektem Jehova mo tufala i tijim hem blong mekem olsem. Be Esao i ting nating long ol samting we oli tabu. (Ridim Hibrus 12:16.) ?Olsem wanem hem i soemaot nogud fasin ya? Hem i lego raet blong hem olsem fasbon i go long smol brata blong hem Jekob, blong kasem wan plet supsup nomo. (Jen. 25:30-34) Biaen, hem i harem nogud tumas, be i let finis. Hem nomo i no tinghae  long raet blong hem olsem fasbon, taswe hem i no save komplen taem i no kasem blesing from.

12-13. ?Olsem wanem ol man Isrel oli no gat fasin blong talem tangkiu, mo wanem i kamaot from?

¹² Ol man Isrel oli gat plante samting blong talem tangkiu from. Jehova i mekem se Ten Panis i kasem Ijip, mo hem i mekem ol man Isrel we oli slef oli kamfri. Biaen, hem i spolem ol ami blong Ijip long Red Si blong sevem ol man blong hem. Ol man Isrel oli glad tumas, ale oli singsing blong presem Jehova mo talem tangkiu. ?Be olsem wanem? ?Oli gohed blong talem tangkiu?

¹³ Taem ol man Isrel oli fesem hadtaem bakegen, oli fogetem ol gudfala samting we Jehova i bin mekem long olgeta. Oli no moa talem tangkiu. (Sam 106:7) ?Oli mekem wanem? “Oli stap tok agens long Moses mo Eron.” Blong talem stret, oli tok agensem Jehova. (Eks. 16:2, 8) Jehova i no glad long nogud fasin ya. Biaen, hem i talem se ol man Isrel we oli laef long taem ya bambae oli ded long draeples. Josua mo Keleb nomo bambae i laef. (Nam. 14:22-24; 26:65) Bambae yumi tokbaot olsem wanem blong blokem nogud fasin we oli soemaot, mo folem fasin blong ol man we oli talem tangkiu.

14-15. (1) ?Olsem wanem hasban mo waef i save soemaot se tufala i glad long tufala? (2) ?Olsem wanem Papa mo Mama i save tijim ol pikinini blong oli talem tangkiu?

¹⁴ Insaed long famle. Evriwan long famle oli glad taem olgeta wanwan oli talem tangkiu. Taem hasban mo waef i talem tangkiu long tufala, tufala i lavlavem tufala moa. Mo tu, i isi moa blong tufala i fofogivim tufala. Wan gudfala hasban i no luksave nomo ol gudfala samting we waef blong hem i talem mo mekem, be hem i ‘talemaot long hem tu we i glad tumas long hem.’ (Prov. 31:10, 28) Mo waef we i waes, i talemaot klia ol fasin we hem i laekem long hasban blong hem.

¹⁵ Papa mo Mama, ?olsem wanem yutufala i save tijim ol pikinini blong oli talem tangkiu? Yutufala i no mas fogetem se ol pikinini oli stap folem ol toktok mo aksen blong yutufala. Taswe yutufala i mas soemaot gudfala eksampol mo talem tangkiu taem ol pikinini oli mekem wan samting blong yutufala. Mo tu, i gud yutufala i tijim ol pikinini blong oli talem tangkiu taem narafala i mekem wan samting blong olgeta. Givhan long olgeta blong oli kasem save se ‘tangkiu’ i mas kamaot long hat blong olgeta, mo se ol toktok blong olgeta oli save givhan bigwan long narafala. Traem tingbaot wan yangfala woman we nem blong hem Kleri.  Hem i se: “Taem mama blong mi i gat 32 yia, Papa i no moa stap wetem mifala, ale Mama nomo i lukaotem mitrifala. Taem mi mi kasem 32 yia, mi tingbaot olsem wanem i had long Mama long taem ya. Ale mi talem tangkiu long hem from ol samting we hem i lego long laef blong hem, blong tijim mo lukaot gud long mitrifala. I no longtaem i pas, hem i talem se hem i holemtaet ol tok ya long hat blong hem, plante taem hem i tingbaot, mo oltaem oli mekem hem i harem gud.”

16. Talem wan stori blong soemaot olsem wanem yumi leftemap tingting blong narafala taem yumi talem tangkiu.

¹⁶ Insaed long kongregesen. Taem yumi talem tangkiu long ol brata mo sista, yumi leftemap tingting blong olgeta. Traem tingbaot Joj we i gat 28 yia mo i wan elda. Hem i kasem wan bigfala sik mo i no save go long miting blong wan manis. Taem hem i gobak long miting, hem i no naf yet blong mekem ol tok. Joj i talem se: “Mi harem se mi gud blong nating nomo, from we mi no save mekem ol wok blong mi long kongregesen. Be wan dei, afta we miting i finis, wan brata i talem long mi se: ‘Mi wantem talem tangkiu long yu from gudfala eksampol we yu givim long famle blong mi. Mifala i glad tumas long ol tok we yu mekem long ol yia we oli pas. Oli givhan bigwan long bilif blong mifala.’ Tok ya i tajem hat blong mi mo wota blong ae blong mi i ron. Mi mi nidim tumas blong harem ol gudfala toktok olsem.”

17. Folem Kolosi 3:15, ?olsem wanem yu save soemaot se yu glad long ol gudfala presen we Jehova i givim?

¹⁷ Long God blong yumi we i givim plante presen. Jehova i givim fulap save long yumi we i olsem kakae. I gat ol save we yumi kasem long ol miting, ol magasin, mo long websaet. Maet samtaem yu harem wan tok, ridim wan magasin, o wajem JW Brodkasting, nao yu tingting se, ‘Hemia nao stret samting we mi mi nidim.’ ?Olsem wanem yu save soemaot long Jehova se yu glad long ol save ya? (Ridim Kolosi 3:15.) Wan rod i blong talem tangkiu oltaem long ol prea blong yu, from ol gudfala presen ya we hem i givim.—Jem. 1:17.

18. ?Olsem wanem yumi talem tangkiu from Haos Kingdom blong yumi?

¹⁸ Wan narafala rod blong talem tangkiu long Jehova, hemia blong mekem haos wosip blong yumi i stap klin mo naes. I gud yumi joen oltaem blong klinim mo fiksimap ol samting long Haos Kingdom, mo i gud se olgeta we oli wok wetem saon mo ol video oli lukaot gud long ol masin blong kongregesen. Taem yumi lukaot gud long Haos Kingdom blong yumi, hem i stap gud oltaem mo i no gat ol bigfala  samting blong fiksimap. Olsem nao, i gat moa mane i stap blong wokem mo fiksimap ol narafala Haos Kingdom long ol defdefren ples long wol.

19. ?Stori blong wan eria elda mo waef blong hem i tijim yumi long wanem?

¹⁹ Long olgeta we oli wok had blong givhan long yumi. Taem yumi talem tangkiu, yumi save mekem se narafala i no wari tumas long ol trabol we hem i fesem. Tingbaot wan eria elda mo waef blong hem. Tufala i prij blong fuldei, mo tufala i kambak long haos we tufala i taed tumas. Ples i kolkol bitim mak, mekem se waef i putum bigfala kot antap long ol klos blong hem, blong slip long naet. Long moning, hem i talem long hasban blong hem se wok ya i had tumas, hem i no moa save gohed. Be long sem moning ya, hem i kasem wan leta long branj ofis, we i talem ol gudfala toktok from wok blong prij we hem i mekem, mo from we hem i stap stanap strong. Leta i tokbaot se i no isi blong muv i go long narafala kongregesen evri wik mo slip long ol defdefren haos. Hasban blong sista ya i talem se: “Ol gudfala toktok ya i mekem hem i harem gud tumas. Afta long taem ya, hem i neva talem bakegen se hem i no moa save gohed long wok ya. Be plante taem hem i leftemap tingting blong mi, taem mi harem se mi no naf blong gohed.” Tufala i gohed long wok blong eria elda blong klosap 40 yia.

20. ?Evri dei, yumi mas traehad blong mekem wanem, mo from wanem?

²⁰ I gud yumi traehad evri dei blong talem tangkiu long ol toktok mo aksen blong yumi. Gudfala toktok mo aksen we i kamaot long hat blong yumi, i save mekem se narafala i naf blong gotru long wan moa dei blong ol trabol long rabis wol ya, we ol man oli no stap talem tangkiu. Mo ol tok mo aksen we oli soemaot tangkiu, oli save mekem se yumi fren gud wetem ol narafala blong olwe. Samting we i moa impoten, se yumi stap folem eksampol blong Papa blong yumi Jehova, we i givim plante presen mo i glad blong talem tangkiu.