1. Paquemodo ya dale mira apreciacion el un Samaritano con quien ya cura si Jesus?

BIEN dificil el situacion del diez leproso hombre. Nuay mas sila esperanza queda bueno. Pero un dia, ya puede sila mira con Jesus, el Buen Maestro. Ya puede sila oi que ya cura si Jesus todo clase de enfermedad y convincido sila que puede tambien le cura kanila. Poreso ya grita sila: “Jesus Maestro! Tene lastima canamon.” Ya queda bueno este diez hombre. Asigurao, todo sila ya aprecia con el cosa ya hace si Jesus. Pero el uno kanila, nuay lang basta sinti apreciacion * sino ya dale le este mira. Este hombre que un Samaritano ya alaba con Dios “con alto voz.”​—Luc. 17:12-19.

2-3. (a) Porque tiene vez gendeh kita ta puede dale mira apreciacion? (b) Cosa kita considera na este articulo?

² Igual con el Samaritano, quierre tambien kita dale mira diaton apreciacion con aquellos ya hace buen cosas para kanaton. Pero tiene vez, posible que ta ulvida kita este hace.

³ Na este articulo, considera kita si porque importante que dale kita mira apreciacion por medio na diaton palabra y accion. Hay aprende kita na cuanto ejemplo na Biblia de aquellos quien ta agradece y aquellos gendeh. Despues, discuti kita cuanto maga practical manera para dale mira apreciacion.

4-5. Porque kita debe dale mira apreciacion?

⁴ Si Jehova el de con todo buen ejemplo para kanaton. Para dale le mira apreciacion, ta bendici le con aquellos quien ta hace alegre con ele. (2 Sam. 22:21; Sal. 13:6; Mat. 10:40, 41) Y ta anima kanaton el Escritura que “precura [kita] imita con el Dios, como maga anak disuyo con quien Ele ta ama.” (Ef. 5:1) Entonces, el un importante razon si porque kita debe dale mira apreciacion amo cay quierre kita imita con Jehova.

⁵ Considera otro razon si porque kita ta dale mira apreciacion con otro. Puede kita compara con el apreciacion como un sabroso comida. Mas tan enjoy kita con este si tan share kita con otro. Si ta aprecia el otro con el cosa kita ta hace, ta queda kita alegre. Si ta dale kita mira diaton apreciacion, ta hace kita alegre con otro. Hay sabe el persona con quien kita ya dale mira apreciacion que el de suyu esfuerzo o el cosa le ya dale, ya puede gayot ayuda kanaton. Como resulta, hay tiene kita mas buen amistad con ese persona.

6. Na cosa manera el diaton maga palabra de apreciacion igual como manzanas que hacido de oro?

⁶ Bien valuable el diaton maga palabra de apreciacion. El Biblia ta habla: “El palabra que ya habla na justo tiempo amo como manzanas de oro na un bandejao que hacido de plata.” (Prov. 25:11) Imagina si paquemodo de bonito el un manzanas que hacido de oro que talli na un bandejao de plata! Bien valuable gayot este! Cosa tu sinti si ricibi tu ansina regalo? Asigurao, ansina tambien de valuable el diaton maga palabra de apreciacion para con otro. Pensa este: El un manzanas que hacido de oro puede dura por largo tiempo. Na igual manera, posible gendeh gayot ulvida aquel persona con el de tuyu maga palabra de apreciacion.

7. Asegun na Salmo 27:4, paquemodo si David y el maga descendiente de Asaf ya dale mira diila apreciacion?

⁷ Manada maga siervo del Dios de antes el quien ya dale mira apreciacion. Uno kanila amo si David. (Le con el Salmo 27:4.) Ya dale le mira na de suyu maga accion que ta aprecia gayot le con el verdadero adoranza. Ya contribui le grande cantidad del de suyu riqueza para na construccion del templo. El maga descendiente de Asaf ya dale tambien mira apreciacion por medio de maga cancion de alabanza que ya escribi sila. Na un cancion, ya rindi sila gracias con Dios y ya declara diila apreciacion na maga “bien bonito trabajo” de Jehova. (Sal. 75:1) Claro que si David y el maga descendiente de Asaf quierre dale mira con Jehova que ya aprecia gayot sila con el todo maga bendicion que estaba con ele. Na cosa manera tu puede imita con este maga salmista?

8-9. Paquemodo si apostol Pablo ya dale mira de suyu apreciacion con el maga hermano y hermana y cosa el resulta de este?

⁸ Ya dale mira si apostol Pablo que ta aprecia le con el maga hermano y hermana por medio na de suyu maga palabra. Na de suyu maga personal rezo, pirmi le ta rindi gracias con Dios por causa kanila. Na de suyu maga carta, ya manda le sabe que importante sila para con ele. Na primer 15 versiculo del Roma capitulo 16, si Pablo ya menciona el nombre del 27 hermano y hermana na fe. Ya acorda le que kanda Prisca y Aquila “ya pone el diila vida na peligro” para con ele. Ya menciona tambien le que si Febe mucho con quien ya ayuda, incluido ya con Pablo. Ya dale le comendacion con ese maga amable hermano y hermana.​—Rom. 16:1-15.

⁹ Sabe si Pablo que imperfecto el de suyu maga hermano y hermana pero na ultimo parte del de suyu carta para na maga Romano, yan focus le na diila maga buen calidad. Imagina si paquemodo de alegre el maga hermano y hermana cuando ya le con este carta na congregacion! Como resulta, asigurao que ya tiene sila mas buen amistad con Pablo. Pirmi ba tu ta dale mira de tuyu apreciacion na maga hermano y hermana na congregacion na maga buen cosas que ta habla y ta hace sila?

10. Cosa kita puede aprende na manera ya dale mira apreciacion si Jesus con el de suyu maga siguidores?

¹⁰ Na de suyu mensaje na cuanto maga congregacion na Asia Minor, si Jesus ya dale mira de suyu apreciacion con el de suyu maga siguidores. Por ejemplo, na principio del de suyu mensaje para na congregacion de Tiatira, ele ya habla: “Sabe Yo todo el dituyo maga trabajo: el dituyo amor, fe, servicio y paciencia na maga sufrimiento. Y sabe Yo que na todo este maga cosa-cosa ta progresa pa tu.” (Rev. 2:19) Nuay lang le basta menciona el progreso del congregacion sino ya dale le kanila comendacion por el diila maga buen trabajo. Maskin necesita si Jesus dale consejo con el cuanto na Tiatira, ya anima siempre le kanila na principio y na fin del de suyu mensaje. (Rev. 2:25-28) Como cabeza de todo congregacion, gendeh ya era si Jesus debe rindi gracias kanaton na maga cosas kita ta hace para con ele. Maskin pa ansina, gendeh le ta ulvida dale mira de suyu apreciacion. Un buen ejemplo gayot le para na maga anciano!

11. Base na Hebreo 12:16, cosa el mirada de Esau na maga cosas sagrao?

¹¹ Makatriste que tiene cuanto individual na Biblia quien nuay dale mira apreciacion. Considera kita el ejemplo de Esau. Maskin ta ama y ta respeta el de suyu maga mayores con Jehova, nuay le apreciacion na maga cosas sagrao. (Le con el Hebreo 12:16, El Nuevo  Testamento.) Paquemodo ya queda notable este de suyu custumbre? Ya vende le dayun na de suyu menor hermano, si Jacob, el de suyu derecho como mayor anak para lang na un comida. (Gen. 25:30-34) Na uliji, ya arripinti si Esau na de suyu decicion. Pero ciendo nuay le aprecia con el cosa ele tiene, nuay le razon para reclama cuando nuay le ricibi el bendicion que para lang na mayor anak.

12-13. Paquemodo ya dale mira el maga Israelita que falta sila apreciacion y cosa el resulta?

¹² Manada razon el maga Israelita para dale mira apreciacion. Ya libra kanila si Jehova desde na Egipto despues le dale el Diez Castigo. Ya salva tambien kanila el Dios cuando ya destroza le con el maga soldao de Egipto na Colorao Mar. Por causa na diila apreciacion, ya canta sila un cancion de alabanza con Jehova. Pero ya continua ba sila dale mira apreciacion?

¹³ Cuando ya enfrenta maga nuevo probanza el maga Israelita, ya ulvida sila con el maga buen cosas que ya hace si Jehova para kanila. Nuay dura, ya dale sila mira que falta sila apreciacion. (Sal. 106:7) Paquemodo? “El maga Israelita ya murmura contra con Moises y Aaron” pero actualmente, con Jehova sila ya murmura. (Ex. 16:2, 8) Ya queda triste si Jehova na custumbre que ya dale sila mira. Na uliji, ya predicta le que el entero generacion del maga Israelita hay muri na desierto puera con Josue y Caleb. (Num. 14:22-24; 26:65) Mira kita si paquemodo kita puede evita sigui con este maga mal ejemplo y imita con el maga buen ejemplo.

14-15. (a) Paquemodo dale mira el man maridable que ta aprecia sila con uno’y otro? (b) Paquemodo el maga mayores puede enseña con el diila maga anak para dale mira apreciacion?

¹⁴ Na familia. Ta beneficia el entero familia si el cada miembro ta dale mira apreciacion. Si pirmi ta dale mira apreciacion na uno’y otro el man maridable, ta queda mas fuerte el diila relacion. Mas facil para kanila perdona con uno’y otro. El marido quien ta aprecia con el de suyu mujer gendeh lang ta nota con el maga buen cosas que ta habla y ta hace le sino “ta levanta y ta alaba con ele.” (Prov. 31:10, 28) Y el un sabio mujer ta habla na de suyu marido si cosa le particular ta aprecia con ele.

¹⁵ Maga mayores, paquemodo ustedes enseña con el de ustedes maga anak para dale mira apreciacion? Acorda que ta copia el maga bata con el cosa ustedes ta habla y ta hace. Poreso, queda buen ejemplo para kanila.  Rindi gracias na cosas sila ya hace para con ustedes. Y enseña tambien kanila que rindi gracias si tiene cosas ya hace para kanila el otro. Hace kanila entende que el apreciacion ta sale na corazon y tiene buen efecto na otro el diila maga palabra. Por ejemplo, el un joven mujer, si Clary, ya habla: “Cuando 32 año de mio nana, solo-solo ya lang le ya hace engranda kanamon tres man hermano y hermana. Y cuando yan 32 ya yo, ya puede yo pensa si paquemodo de dificil quel situacion para con ele na ansina edad. Poreso, ya habla yo con ele que ta aprecia gayot yo con el todo sacrificio de suyu para hace engranda kanamon. Nuevo lang, ya habla le conmigo que bien precioso para con ele el cosa yo ya habla. Pirmi le con este ta pensa y ta hace este con ele alegre.”

16. Dale un ejemplo si paquemodo el diaton maga palabra de apreciacion puede anima con otro.

¹⁶ Na congregacion. Ta anima kita con el diaton maga hermano y hermana si ta dale kita mira apreciacion kanila. Por ejemplo, si Jorge, 28 año y un anciano, ya tiene grabe enfermedad. Por causa de este, nuay le puede atende miting por un mes. Maskin ya puede ya le otravez atende miting, gendeh le siempre ta puede dale maga parte. Si Jorge ya habla: “Ya sinti yo que nuay yo sirvi por causa na de mio maga limitacion y cay gendeh yo ta puede cumpli el maga responsibilidad na congregacion. Pero despues del un miting, un hermano el ya habla conmigo: ‘Gracias gayot contigo por el buen ejemplo de tuyu para na de mio familia. Yan enjoy gayot kame oi con el de tuyu maga talk de antes. Ya puede quel hace fuerte con el diamon fe.’ Ya puede yo llura na cosa le ya habla. Amo gayot quel el cosa yo necesita.”

17. Asegun na Colosa 3:15, paquemodo kita dale mira apreciacion con Jehova na de suyu pagka-bondadoso?

¹⁷ Con el diaton bondadoso Dios. Ya dale kanaton si Jehova abundancia de espiritual comida. Por ejemplo, ta ricibi kita maga instruccion por medio na miting, na magasin y na diaton website que ta puede gayot ayuda kanaton. Ya puede ya ba tu oi un talk, le un articulo o mira un video na broadcasting y ya puede habla, ‘Este gayot el cosa yo necesita’? Paquemodo kita dale mira apreciacion con Jehova? (Le con el Colosa 3:15.) Un manera amo si pirmi kita rindi gracias con ele na diaton maga rezo.​—Sant. 1:17.

18. Paquemodo kita puede dale mira que ta aprecia kita con el diaton Kingdom Hall?

¹⁸ Ta dale tambien kita mira apreciacion con Jehova si ta mentena kita el limpieza del diaton Kingdom Hall. Pirmi kita ta limpia y ta  mentena con este. Y aquellos quien tan operate con el maga sound y video equipment con cuidao si ta usa con este. Si ta mentena kita enbuenamente con el diaton Kingdom Hall, hay dura este y hay menora el cosas que necesita compone. Na ese manera, mas manada sen el puede usa para construi y compone otro maga Kingdom Hall na entero mundo.

19. Cosa tu ya aprende na experiencia del un circuit overseer y de suyu mujer?

¹⁹ Con aquellos quien ta hace esfuerzo para na bien diaton. Si ta dale kita mira apreciacion, el diaton maga palabra posible puede afecta con el mirada del un persona na maga problema que ta enfrenta le. Considera kita el experiencia del un circuit overseer y de suyu mujer. Despues del entero dia na ministerio, bien cansao sila ya bolbe na diila accomodation. Ciendo winter quel tiempo, bien frio gayot. Gane, de coat ya durmi el de suyu mujer. Ala-mañana, ya habla con ele de suyu mujer que gendeh ya le aguanta na diila assignment. Na ese mismo aga, ya ricibi un carta estaba na branch office el de suyu mujer. Ya dale con ele comendacion por el de suyu esfuerzo na ministerio y cay ta continua le na diila assignment. Ta entende sila si paquemodo de dificil que transfiri para na otro-otro maga accomodation cada semana. El circuit overseer ya habla: “Ya queda le bien alegre na comendacion que ya ricibi le. Gane, nuay mas le menciona que deja kame con el diamon assignment. Y manada beses, ele mismo el ta anima conmigo para continua si ta pensa yo que descanza ya.” Este man maridable ya continua sirvi cerca 40 año na diila assignment.

20. Cosa kita debe pricura hace cada dia y porque?

²⁰ Ojala pricura kita dale mira apreciacion cada dia por medio na diaton maga palabra y accion. Posible que el cosa kita hay habla o hace amo el cosa necesita el otro para aguanta na diila maga problema cada dia. Puede tambien este ayuda para tiene kita buen amistad con otro que puede continua hasta para cuando. Y el mas importante, si ta hace kita este, ta imita kita con Jehova, el diaton bondadoso Tata quien ta dale mira apreciacion.