NSUNZO 8
Kalá Muttu Wotamalela
‘Mukalegevi attu otamalela.’—KOL. 3:15.
JIBO 2 Ninowutamalelani, Yehova
DHINASUNZE IYO *
1. Musamariya ovulumutxiwe na Yezu olagihile dhavi otamalela?
ALOBWANA dhahi owakwana kumi ahikana eredda yawopiha vaddiddi. Ereddeya yali ya maranya, movira wa mudhidhi maranyaya el’ottabwavi. Siku nina muttukulelani mento, amona Yezu Namasunziha Munddiwa; amuttamagela, nomala ahimela wolapela-wene. Aweneya ahiwa miselu dhawi Yezu wahavulumutxa aredda enjene, ejo yahattukulela okuluvela wila onele wavulumutxa. Akuwa eraga: ‘Yezu namasunziha, muneddele ttagaraga!’ Vasogorhova ahivulumutxiwa. Otene ahimutamalela mwaha wa opama olagihiliye. Mmodhavo wawa, ottiya otamalelavi—wahiyela balagiha vamentoni va Yezu ntamalelona * naye. Mmodhavoya oddo wali Musamariya wattukuleleye omuttittimiha Mulugu na ‘lizu noliba.’—Lk. 17:12-19.
2-3. (a) Txini ennirutxiha otamalela? (b) Ninasunze nni mwari mwa mutoma obu?
2 Dhahene ninga Musamariya ologiwe; natamalelege na murima wotene abale annikosela dhilobo dhapama. Ebaribari wila masaka mena ninodduwalaga otamalela obe ologa, ddinotamalela.
3 Mwari mwa mutoma obu ninele osunza ekalelani yofuneya otamalela na mazu obe na merelo. Ninele vina wasunza attu alebiwe mBibiliani alagihile otamalela na ena ahilagihile. Omamalelowa ninele osunza marhe olagiha otamalela.
NINFWANYELELA NNI OKALA ATTU OTAMALELA
4-5. Ninfuneliwana nni okala attu otamalela?
4 Yehova yotagiha yapama ya muttu ontamalela. Mukalelo mmodha wolagiha otamalela waye bwa wattuva na egumi abale anivilibihedha wedda wokoddelene vamentoni vaye. (2 Sam. 22:21; Masal. 13:6; Mt. 10:40, 41) Malebo anloga wi ‘tamelani ottukula mweddelo wa Mulugu.’ (Ef. 5:1) Ennittukuleletxa okala attu otamalela jofuna omutagiha Mulugu wehu Yehova.
5 Ehikalawo elobo yina ennikaniha efunelo ya otamalela. Otamalela onoladdanihiwa na yoja yoziva—enfwasedhihu oja na akwihu. Iyo nigatamaleliwa ninkala woziveliwene. Vina nigatamalelaga attu ena, attuya ankala murima ttukuttu. Nigamutamalela muttu onikoseli obe onivahile elo, muttuya onofiyedha ononela wi guru ekosiliye kattiddilena vati. Dhawene mandano ehu anelege olibavi.
6. Otamalela onladdanihedhiwa nni na yobo ya parata yabalihiwe visangu dha nddarhama?
6 Mazu awi, ddinotamalela, anotomola murima kandduwaleya. Malebo anologa: ‘Mazu anlogiwa vanfwanyelani, anokoddela ninga yobo ya parata yabalihiwe visangu dha nddarhama.’ (Gano 25:11) Yobo ya parata yabalihiwe visangu dha nddarhama wang’anavi enozivela mmetoni! Kavali waganyedha wila engulihiwa korowa yinjene! Ovahiwaga yobo ninga ejo kunziveliwa? Mazu awi: Ddinotamalela, akana ttima ninga yobo ya parata yabalihiwe visangu dha nddarhama. Elobo yina enfwanyelihu wubuwela jiji: Yobo ya nddarhama yabalihiwe visangu dha nddarhama enogonela yaka na yaka. Yakene vina ogamutamalela muttu na murima wotene, mazu alogiliwe anele olebeya mmirimani mwaye, kanadduwale vina.
AWENE ATAMALELA
7. David olagihile dhavi va Masalmo 27:4 otamalela waye, vina anamaleba ena a masalmo alagihile dhavi otamalela wawa?
7 Emeleli enjene a Mulugu a masaka a mundduni ahilagiha otamalela. Mmodhayavo ddi David. (Kengesa Masalmo 27:4.) Iyene wanvaha ttima webedha webaribari, ejo ehoneya na mazu alogiliye. Wila alagihe otamalela waye, wahiburhutxa munifumoni mwaye dhokamihedhana omagiwa wa mparha. Ziza na Asaf nihilagiha vina otamalela wawa mmasalmuni obe na jibo dhilebilani dhomuttittimihana Mulugu. Ninga motagiha jibo modha elebilani, amutamalela Yehova ologaga wi, ahuma milomo na ‘dhotikiniha dhiriliye.’ (Masal. 75:1) Eji enoniha wi David na ziza na Asaf afuna amulagihe Yehova otamalela wawa mwaha wa dhilobo dhotene dhireliwani. Kito weyo, onawodhe dhavi watagiha alobwana aba alebile nivuru na masalmo?
Karta ya Paulo yalebeliye akadda Roma ennisunziha nni mwaha wotamalela? (Koona ddima 8-9) *
8-9. Murumiwi Paulo walagihile dhavi otamalela waye, nanda wapurelimo nni?
8 Murumiwi Paulo vawoniye abali na arogora, wannatamalela vaddiddi, ejo yoneyile na mazu alogiye. Mmalobeloni mwaye wannaromola abalaye na matamalelo. Vina Mmakartani alebiye wannikamu mazu owatamalelana abaliya. Ninga motagiha va Roma kapitulu 16 versu yoroma mpaka 15, Paulo oromola mazina 27 a Akristu akwaye. Iyene wahiloga wi Priska na Ákila ‘kovile dhawopiha’ venevo vafunani onvuna, vina wahiloga wi Febe ‘wahavuna enjene,’ vamodha na murumiwiya Paulo. Iyene watamaleletxa abali na arogora sabwa ya okwela wawa vina mabasa menjene akosani.—Rom. 16:1-15.
9 Paulo wannonelamo wi abali na arogoraya kaliganile, nona mazu ogomihana karta yalebeliye akadda Roma, iyene ologa mikalelo dhapama dhana abaliya ottiya ogilatela ologa dhovirigana dhawa. Mudhidhi wengeseliwa muttugumano kartaya na lizu nowiweya, attuya avuruwana anlibiheya vaddiddi! Ninga yopurelamoya mandano awa na Paulo anlibavi siku na siku. Kito weyo ohikana elemelelo yawatamalela abali na arogora a mmulogoni mwawo na dhilobo dhapama dhinlogana vina dhinirani ottiya ogilatela tikini dhovirigana dhawa?
10. Ninsunzavo nni na otamalela olagihile Yezu?
10 Mpaganyo wa Yezu operhekeliye mitugumano dha Asia, mwakala mazu otamalela mabasa erile anamafwara aye. Ninga motagiha iyene wahilamula mazu aba addagana mulogo w’o Tiatira: ‘Ddiziwa mabasa awo, okwela wawo, ororomela wawo, ovilevela wawo mutugumano, ntidi nawo muroromelani. Ddiziwa wi ddabuno onowaralela mabasa opitta wale.’ (Ovuh. 2:19) Yezu ottiya ologavi mabasa attiddilani vina merelo awa apama, wahitamalela vina weka wawa murima mmabasani akosani. Masiki vonileyi wi attu ena a mulogo w’o Tiatira anfwanyela osumuleliwa; mazu aye oroma vina ofugana makaniya ali olibiha. (Ovuh. 2:25-28) Yezu ninga musorho wa milogo dhotedhene, kafwanyela otamalela mabasa animukoselihu. Masiki dhawene wahitamalela. Ekosiliye enowakamihedha anddimuwa a mmulogoni okosa yakene!
AWENE KATAMALELI
11. Ninga munlagihedhiwa va Ahebreu 12:16, Ezawú olagihile dhavi wi kavaha ttima dhilobo dha Mulugu?
11 Mbibiliani munologiwa vina attu ohitamalela. Ninga motagiha, Ezawú waleliwe na amambali amukwela vina amulabela Yehova, masiki dhawene iyene kavaha ttima dha Mulugu. (Kengesa Ahebreu 12:16.) Ohitamalela waye woneyile dhavi? Ezawú wahirumela omuttiyedha mbale Jakobi omuttaji waye, vavahiwiye mikatte na nyemba mmuziyoni mwa dhoja. (Wita 25:30-34) Musogorhomwa wahitxinuwa, baroma wubuwela envahiliye mbalaye. Mbwenye kana yologa sabwani wafunile mwinya; kavahile ttima omuttaji wavahiwiye.
12-13. Ana Izrayel alagihile dhavi ohitamalela, sabwaya ya ejuwene txini yapadduweli?
12 Ana Izrayel ahikoseliwa dhibo dhinji dhigattukuleli okala attu otamalela. Yehova wahitota milili kumi mw’Ejipitu mmalelani bafurula nlogo naye mudharini. Vasogorhova Mulugu wahivuna nlogo naye Mmwinjeni Wofila atolotxaga anyakoddo a Faraó. Mudhidhi ovuniwani mmwinjeni wofila, awene ahitomola jibo yomutamalelana Yehova sabwa ya wapemberhiha amwiddani awa. Otamalela wawa wahidhowavi obe wahigoma?
13 Ana Izrayel vagumanilanina magudulano mena, momaguva-mwene ahidduwala dhotedhene dhireliwani na Yehova. Venevo ahilagiha ohitamalela wawa. (Masal. 106:7) Alagihile dhavi? ‘Ana Izrayel otene aroma wasadduwela Mizé na Aroni,’—kuloga, ahimusadduwela Yehova. (Obud. 16:2, 8) Yehova wahinyimuwa moneliye ohitamalela wawa wunnuwaga mmirimani. Mmalelani wahiloga, onavolowe mwilaboni yaroromelihiliye ddi Josuwé na Kaleb mbwenye ena otene agakwa mwiddeddereni. (Oleb. 14:22-24; 26:65) Txini enanikamihedhe orabela ofwara dhotagiha dhabure mbwenye nifwara dhotagiha dhapama?
NIKALE ATTU OTAMALELA MASAKA ABANO
14-15. (a) Atelani analagihe dhavi wi anotamalelana? (b) Amambali anawodhe dhavi wasunziha anawa okala attu otamalela?
14 Vamuralani. Muttu-muttu vamuralani agakana elemelelo yotamalela etene anojavo. Atelani agakana elemelelo ya otamalelagana, ofiyedhana wawa welege wunuwavi. Mmodhavo agavonya mwina onokala womala nawale wi amulevelele. Mamuni onimuriha mwadhiye kanang’anavi dhilobo dhapama dhinlogiye obe dhinkosiye bahi mbwenye ‘onomutamalela guru dhinkosiye.’ (Gano 31:10, 28) Muyana wa malago onomutamalela mamunaye mwaha wa dhilobo dhapama dhinkosiye.
15 Amambali munawodhe dhavi wasunziha aninyu okala attu otamalela? Kamudduwale wi aima antagiha dhinloga vina dhinira amambali awa. Nona kalaní yotagiha yapama, aninyu agakosa elobo muhidduwale ologa, ddinotamalela. mwasunzihe aninyu ologa, ddinotamalela agakoseliwa obe agavahiwa elo. Mwasunzihe aninyu otamalela na murima wotene vina mwanonihedhemo wi ologa ddinotamalela japama. Motagiha muyana dhahi onkuweliwa Clary ologa: “Mmani vaniyena vyaka 32 wali yeka bagalela aima araru. Baddina vyaka dhakadhene, ddahinonela mabasa ana mmani a walela aima araru vyaka 32. Musogorhomwa ddahimutamalela vaddiddi guru dhotedhene dhakosiliye dhonilela. Muvireli mudhidhi mwinjene, mmani wahiloga wi mazu alogilemi okoyavi mmirimani mwaye, vina ohenjedhedha, vanubuwelimi mazu alogiliwe murimaga onkala ttukuttu, sikuna ninoddivirela pama.”
16. Kavaha yotagiha enoniha yopurelamo ya watamalela attu ena.
16 Mmulogoni. Nigatamalelaga na murima wotene abali vina arogora ejo enowalibiha vaddiddi. Ninga motagiha, Jorge oli munddimuwa wa mulogo ona vyaka 28 wahikana eredda yamuttiyile ttapatta, ofiyedha okala mweri ahiwodhaga otugumana. Muromeliye otugumana wili, kawodha okosa elobwene. Mwinyene wahifiyedha ologa: “Miyo kaddavyonana ttima vowi ereddaya yaddittiddile kiyaddittiya okosa mabasa aga a mmulogoni. Mbwenye labo nimodha niworuwaga, mbali dhahi wahiloga mazu awi: ‘Ddinotamalela guru enkosinyu yokala yotagiha yapama mwa amudhaga. Wamwinya kunubuwela madiskursu otomola murima akosiwe vyaka dha mundduni. Madiskursuya abale ahinikamihedha wunuwa mpaddi womuyani.’ Dhilogiliye dhaddumiha milomo, ddifiyedha otomola kutto. Elogiliye ehiddipangarhaza vopitta.”
17. Ninga munlogela Kolosi 3:15, ninawodhe dhavi omutamalela Yehova na dhilobo dhinnivahiye?
17 Mulugu wovaha. Yehova ononivaha dhoja gwe dhomuyani, dhottiyana-ttiyana. Motagiha, ononisunziha alabihedhaga matugumano, marevista vina saite ehu. Txino yahiromaga wupadduwela dhahi; buwiwa diskursu, buwengesa mutoma obe buwona vidiyu mu tvjw omamalelowa buloga: ‘Makaniya aba ninga osasanyedheliwe ddi Miyo!’ Akala ehupadduwela, onawodhe dhavi omutamalela Yehova? (Kengesa Kolosi 3:15.) Ogakosaga malobelo kudduwale omutamalela Yehova na dhotedhene dhinuwireliye.—Tia. 1:17.
Okamihedha okuputta vina okoddeliha Numba ya Omwene mukalelo mmodha wolagiha otamalela (Koona ddima 18)
18. Ninawodhe dhavi olagiha otamalela Numba Yehu ya Omwene?
18 Mukalelo mwina w’omutamalela Yehova bwa okoddeliha vina osasanyedha Numba ya Omwene, vagakosiwa masasanyedho okuputta kosa muli mwetemwene wila okamihedhe. Abali anlabana dhipano dhovavihana mazu analagihe omutamalela Yehova mwa weddiha dhipanodha deretu. Numba ya Omwene engonela egasasanyedhiwaga vina egakoddelihiwaga. Dhawene nvaho onkosiwa orugunuwa elabo yotene ottiya ozuzumeliwana numba yehu ya omwene, enele olabihedhiwa wi dhisasanyiwena Numba dhiswa dha Omwene dhipaddi dhina, vina ovenyihedha dhinongeyile.
19. Osunzile nni na eji empadduweli nameddelela milogo na mwadhiye?
19 Abale annikosela mabasa na nttokoso. Omutamalela muttu na murima wotene japama, enomukamihedha muttuya akala txino onogumanana makattamiho. Kona yotagiha ya atelani dhahi. Mmalelani olaba mmabasani a olaleya oromana membesi mpaka egudduguddu nsaka noridha ahiyelela vatakulu wolemene. Oridhawa wattabwa ofiyedha muyanaya ogona na kazako. Siku nina mmebesinimwa wahimwaddela mamunaye wi kanawodhe mabasa a weddelela milogo. Mbwenye membesi akene ahakela karta yadhela Obetel, kartaya walebeliwe ddi muyanaya. Mukartanimwa mwahilebiwa mazu omutamalela sabwa ya mabasa aye na ovilela waye vina mwahilebiwa mazu awi ebaribari, okala omwalavi mudhowaga oku mweddelaga oku elobo yorutxa. Mamune wahiloga: “Mwadhaga mmaleliye wengesa wahiziveliwa vaddiddi mpaka ohiloga vina dha ottiya mabasa akosihu. Mudhidhi wobuwelimi wi kaddinawodhe odhowana vasogorho mabasa a weddelela milogo, waddilibiha wali iyene.” Ateleni aba alaba mmabasani a weddelela milogo waddamela vyaka 40.
20. Txini enfuniwehuna okosa siku na siku, kito sabwaya?
20 Kavilibihedhe masiku otene olagiha otamalela na mazu vina merelo. Ologa, ddinotamalela na murima wotene txino onomukamihedha muttu ovilela dhinji dhimpadduwa mwilaboni mpuno mudhali attu ahinziwa otamalela. Nigakala attu otamalelana ninolibiha mandano ehu ofiyedha ohigwaddeya. Nigakala attu antamalela mudhidhi wotene ninolagiha wi ninimutagiha Babi wehu Yehova onnikosela dhinjidhene.
JIBO 148 Muhinivaha Nammodha Wenyu
^ par. 5 Yehova, Yezu na Musamariya wana maranya annisunziha nni mwaha wa okala muttu wotamalela? Mwari mwa mutoma obu ninele osunza dhotagiha dha attu aba araru na ena. Ninele osunza ekalelani ya ttima otamalela vina ninele wubutxedhiwa dhilobo dhinanikamihedhe olagiha otamalelawa.
^ par. 1 ONONELEMO PAMA: Otamalela ontapulela ononelamo na murima wotene elobo yapama ekoseliwewi obe oriha elobo evahiwiwe. Nona nzuna nintapulela otamalela na murima wotene.
