1. Apré Jézi géri-y, kijan on Samariten montré rèkonésans a-y ?

DIS nonm adan on sitiyasyon ki rèd toubònman. Yo ni lalèp é sé désann kò a yo ka désann. Men on jou, étan olwen, yo ka vwè Jézi, gran anségnan-la. Yo tann-di kè i ka géri tout kalté maladi é yo sèten kè i ké pé fè on biten pou yo osi. Alò, yo hélé tout fòs a yo é yo di-y : « Jézi, Anségnan, pran penn an nou ! » É Jézi géri-yo, i woté tout lèp-la yo té ni asi yo la ! Sèten kè yotout té ni rèkonésans pou bonté a Jézi. Men ni yonn adan yo, on Samariten, ki pa kontanté-y dè rèsanti rèkonésans * andidan tchè a-y. I ay pli lwen, i montré kè i té ka aprésyé sa Jézi fè pou-y. Géri i géri, Samariten-la santi kè fò i ba Bondyé glwa, é pou sa i « palé byen fò » (Lik 17:12-19).

2-3. a) Poukwa, dépawfwa, nou pa’a montré rèkonésans an nou ? b) Ka nou kay vwè adan awtik-lasa ?

² Menmjan ki Samariten-la, lè moun ka fè-nou dibyen, nou anvi di-yo mèsi. Men défwa, nou ka oubliyé di-yo oben montré-yo kè nou ka aprésyé sa yo fè pou nou.

³ Adan awtik-lasa, nou ké vwè poukwa sa enpòwtan dè montré kè nou ni rèkonésans. Adan Bib-la, ni dé moun ki montré rèkonésans a yo é ni dòt ki pa fè-y. Nou ké vwè ka ègzanp a yo ka aprann-nou. É nou ké vwè osi ki biten nou pé fè pou montré rèkonésans an nou.

4-5. Poukwa fò-nou montré kè nou ni rèkonésans ?

⁴ Adan zafè a montré rèkonésans, Jéova sé on modèl pou nou. Pa ègzanp, i ka montré rèkonésans a-y lè i ka rékonpansé moun ki ka fè-y plézi (2 Sam. 22:21 ; Sòm 13:6 ;  Mat. 10:40, 41). Labib ka ankourajé-nou « imité Bondyé, kon timoun kè [i] enmé » (Éféz. 5:1). On rézon enpòwtan ki fè nou ka montré rèkonésans an nou, sé kè nou vlé imité Jéova.

⁵ An-nou palé dè ondòt rézon kè nou ni dè montré rèkonésans an nou. Rèkonésans ka touvé-y kon on bon manjé : i ka pli bon ankò lè ou ka pawtajé-y èvè dòt moun. Lè nou ka santi kè lézòt ni rèkonésans pou sa nou ka fè, nou ka kontan, pa vré ? É lè nou ka montré on moun kè nou ka aprésyé sa i ka fè pou nou, li osi, a tou a-y, i ka kontan. Konsa, i sav kè éfò-la i fè-la pou édé-nou oben pou ban-nou on biten nou té bizwen té vréman itil. Anfinaldikont, nou ka vin pi bon zanmi ankò èvè moun-lasa.

6. Ki rèsanblans ki ni ant ponm an lò é sa nou ka fè pou montré rèkonésans an nou ?

⁶ Tousa nou ka fè pou montré rèkonésans an nou ni onlo valè. Labib ka di : « On pawòl yo di lè pou yo té di-y ka touvé-y kon ponm an lò ki adan dékorasyon an awjan » (Pwov. 25:11). Ponm an lò, ki adan dékorasyon an awjan ! Ou ka imajiné jan sa bèl é ki valè sa ni ! Ka ou té ké rèsanti si yo té ka ba-w on kado konsa ? Ében sa ou ka di lézòt pou montré kè ou rèkonésan ni otan valè. Anplisdisa, on biten ki an lò ka diré lontan toubònman. Menmjan-la, tousa ou ka fè pou montré lézòt rèkonésans a-w pé rété gravé an mémwa a yo tout rèstan a vi a yo.

7. Dapré sa nou ka li adan Sòm 27:4, kijan David é désandan a Asaf montré rèkonésans a yo ?

⁷ An tan lontan, onlo sèwvitè a Bondyé montré kè yo té ni rèkonésans. David, sé yonn adan yo (li Sòm 27:4). David té enmé adoré Bondyé toubònman é ou  té ka vwè sa adan jan i té ka aji. I té rich é i bay bon tibwen adan sa i té ni pou yo té konstwi tanp-la. Nou pé palé dè désandan a Asaf osi. Pou yo té montré rèkonésans a yo, yo ékri plizyè sòm, kivédi dé chanté ki ka ba Jéova louwanj. Adan on chanté yo fè, yo ka di Bondyé mèsi é yo ka di-y kè tout « biten èstraòwdinè » i fè, ka fè-yo rété bouch gran wouvè (Sòm 75:1). Nou ka byen vwè kè David é désandan a Asaf té vlé montré Jéova kijan yo té kontan toubònman pou tout bénédisyon i té ka vidé asi yo. Ès ou ka vwè ka ou té’é pé fè pou imité-yo ?

8-9. Kijan Pòl montré frè é sè a-y kè i té ni rèkonésans pou yo, é ki rézilta sa dwèt bay ?

⁸ Lapòt Pòl té enmé frè é sè a-y toubònman, é i té ka montré sa adan jan i té ka palé dè yo. Lè i té ka priyédyé tousèl a-y, i toujou té ka di Bondyé mèsi padavwa i té ba-y sé frè é sè-lasa. Lè i té ka ékri-yo, i té ka fè-yo sav kè yo té ni onlo valè pou-y. Adan 15 prèmyé vèwsé a Women chapit 16, Pòl ka nonmé non a 27 frè é sè. Pòl présizé kè Priska é Akila té « riské pwòp vi a yo » pou-y. I di osi kè Fébé té « défann anpil frè », é Pòl té adan sé frè-lasa. Pòl té enmé sé frè é sè-lasa onlo é i félisité-yo pas yo té ka travay rèd toubònman (Wom. 16:1-15).

⁹ Pòl té sav byen kè yo té enpawfè, men i té pisimé arété lidé a-y si bèl kalité kè yo té ni. Imajiné jan sa dwèt ankourajé frè é sè a-y, lè yo li félisitasyon a Pòl adan lasanblé lokal a yo ! É yo li sa pou toutmoun té tann ! Sèten sa dwèt fè-yo vin pi bon zanmi èvè Pòl ankò. É vou, èskè sa ka rivé-w souvan dè di frè é sè a-w kè ou ni rèkonésans pou yo pou tout bon biten yo ka di é yo ka fè ?

10. Jézi di disip a-y kè i té ni rèkonésans pou yo. Lè nou ka gadé jan-la i fè sa la, ka sa ka aprann-nou ?

¹⁰ Jézi voyé plizyè mésaj ba déotwa lasanblé an Azi Minè pou félisité disip a-y pou bon travay-la yo té ka fè la. Pa ègzanp, prèmyé biten i di lasanblé a Tiyati sé : « An konnèt jan ou ka aji, lanmou-la ou ni la, fwa-la ou ni la, sèwvis-la ou ka fè la é andirans a-w, é an sav kè, alèla, ou ka fè lontan plis ki sa ou té ka fè avan » (Rév. 2:19). Jézi félisité-yo pas yo té ka préché plis ki avan, men osi pas yo té ni dé bèl kalité ki té ka pousé-yo aji. É menmsi i té oblijé ba déotwa frè a lasanblé-lasa konsèy, i koumansé pa ankourajé-yo é i fin mésaj a-y menmjan-la (Rév. 2:25-28). Jézi sé chèf a tout sé lasanblé-la : sonjé ki otorité i ni ! I pa oblijé di-nou mèsi pou travay-la nou ka fè ba-y la. Men magrésa, i ka tchenn a montré-nou kè i ni rèkonésans pou sa nou ka fè. Mi on bèl ègzanp pou sé ansyen-la !

11. Sèlon sa ki maké an Ébré 12:16, ki valè Ézayi té ka ba biten ki sakré ?

¹¹ Malérèzman, ni sèwten moun an Bib-la ki pa té ni pon rèkonésans. Nou pé pran ka a Ézayi, frè a Jakòb. Magré manman-y é papa-y té enmé Jéova é té ka rèspèkté-y, Ézayi pa té ni pon rèkonésans pou sa ki sakré (li Ébré 12:16). Kijan Ézayi montré kè i té engra ? Antankè prèmyé gason a fanmi a-y, Ézayi té ni on dwa èspésyal. Men Ézayi alé, i vann dwa-lasa ba frè a-y Jakòb, pou on bòl lanti (Jén. 25:30-34). Plita, Ézayi règrété chwa-la i té fè la toubònman. Men konm i pa ba dwa-la i té ni la pon valè, i pa rèsèvwa bénédisyon-la yo té pou ba-y la é i pa té pé di ayen.

12-13. Kijan sé Izraélit-la montré kè té ka manké-yo rèkonésans, é difètkè yo montré-yo engra, ki rézilta sa bay ?

 ¹² Sé Izraélit-la té ni onpakèt rézon dè montré rèkonésans a yo. Yo té èsklav an Éjipt é pou libéré-yo, Jéova fè dis malè rivé an péyi-lasa. Aprésa, alòskè yo té toupré pran mò a yo, Jéova anpéché sa fèt. I détwi tout lawmé a sé Éjipsyen-la adan lanmè Wouj la. Lè sa fèt, tèlman sé Izraélit-la té ni rèkonésans pou Jéova, yo chanté louwanj ba-y pou sélébré viktwa-la. Men èskè yo kontinyé ni rèkonésans ?

¹³ Apenn yo vin jwenn dòt difikilté, yo oubliyé tout bèl biten Jéova té fè pou yo. Mi sé la yo montré té ka manké-yo rèkonésans (Sòm 106:7). Ankijan ? « Tout pèp a Izrayèl koumansé ka malpalé Moyiz é Aawon. » An réyalité, sé Jéova yo té ka malpalé (Ègz. 16:2, 8). Yo montré-yo engra é sa désèvwa Jéova toubònman. Plita, i anonsé kè tout sé Izraélit-la ki té ka viv a épòk-lasa té ké mò an dézè-la, sòf Joziyé é Kalèb (Nonb 14:22-24 ; 26:65). An-nou vwè ka nou pé fè pou nou pa suiv sé mové ègzanp-lasa, é ka nou pé fè pou nou suiv sé bon-la.

14-15. a) Ka dé moun-mayé pé fè pou montré kè yo enmé-yo ? b) Ka léparan pé fè pou aprann timoun a yo montré rèkonésans a yo ?

¹⁴ An fanmi an nou. Lèwvwè chak moun adan on fanmi ka montré rèkonésans a-y, tout fanmi-la ka bénéfisyé dè sa. Pli ou vwè on misyé èvè madanm a-y ka montré kè yo ni rèkonésans yonn pou lòt, pli yo ka vin soudé. Anplisdisa, yonn ka padonné lòt pli fasilman. On mari ki enmé madanm a-y pa’a kontanté-y dè vwè bon biten madanm a-y ka di oben ka fè : i « ka doubout, é i ka di jan i ka aprésyé-y » (Pwov. 31:10, 28). É on madanm ki ni sajès ka fè mari a-y sav pou ki rézon ègzaktèman i ka aprésyé-y.

¹⁵ Léparan, kijan zò pé aprann timoun a zòt montré rèkonésans a yo ? Pa oubliyé kè yo enmé imité sa zòt ka di é sa zòt ka fè. Alò, pou pé sa ba-yo on bèl ègzanp, di-yo mèsi lè yo fè on biten ba zòt. Anplisdisa, aprann-yo di mèsi lè on moun fè on biten ba yo. Édé timoun a zòt konprann kè sé tchè a yo ki dwètèt pousé-yo a montré rèkonésans a yo é kè pawòl a yo pé fè on moun dibyen toubònman. Pa ègzanp, mi sa on jenn  madanm, non a-y sé Clary, ka di : « A 32 an, manman-mwen enki touvé-y tousèl èvè twa timoun, pas yo mèt papa lajòl. Lè an vin ni 32 an, an éséyé konprann jan sa dwèt té rèd pou-y a laj-lasa. É an di-y kè an ni onlo rèkonésans pou tout sakrifis i fè pou lévé-nou, mwen é dé frè an mwen. Pa ni lontan, manman di-mwen kè tousa an té di-y la ka touché tchè a-y jousalè, é byen souvan lè i ka sonjé sa, sa ka mèt onlo jwa an vi a-y. »

16. Lè ou ka montré rèkonésans a-w, sa pé ankourajé lézòt. Bay on ègzanp.

¹⁶ An lasanblé-la. Lè nou ka montré frè é sè an nou kè nou ni rèkonésans pou yo, sa ka ankourajé-yo. An-nou pran ègzanp a Jorge, on ansyen ki ni 28 an. I trapé on maladi grav é akòz dè sa, i touvé-y pé pa ay réinyon pannan on mwa. É menm lè i wouviré lasal, kò a-y potoko asé bon pou i té fè on sijè oben on diskou. Mi sa Jorge admèt : « An té ka santi-mwen initil pas an pa té pé okipé-mwen dè pon sèwvis adan lasanblé-la. Men on jou, on frè vin vwè-mwen apré on réinyon é i di-mwen : “An vlé di-w mèsi pas ou ka ba fanmi an mwen on bèl ègzanp menm. Diskou a-w toujou té ka fè-nou dibyen, ou pé pa imajiné-w ! Yo konsolidé fwa an nou.” Tèlman sa touché tchè an mwen, an mèt-mwen ka pléré. Sé ègzaktèman sa an té bizwen tann. »

17. Dapré sa nou ka li adan Kolosyen 3:15, ka nou pé fè pou montré Jéova kè nou ka aprésyé pakèt nouriti-la i ka ban-nou la ?

¹⁷ Pou Dyé an nou ki donan. Jéova ka ban-nou nouriti èspirityèl pou tann-é-konprann. Pa ègzanp, nou ka rèsèvwa on ansègnman ki itil grasa réinyon an nou, jounal an nou é sit entèwnèt an nou. Ès sa ja rivé-w dè li on awtik, dè tann on diskou oben dè gadé on émisyon asi JW Télédifizyon é dè di : « Men sé ègzaktèman sa an té bizwen ! » ? Ka nou pé fè pou montré Jéova kè nou ni rèkonésans pou-y ? (li Kolosyen 3:15). On biten nou pé fè, sé pran labitid di-y mèsi lè nou ka priyé-y. Fò-nou di-y mèsi pou tout bèl kado i ka fè-nou (Jak 1:17).

18. Sé Jéova ki fè si nou ni on Sal di Wayòm. Ka nou pé fè pou nou montré-y rèkonésans an nou ?

¹⁸ Ondòt jan ankò nou ka montré Jéova nou ni rèkonésans pou-y, sé lè nou ka fè atansyon pou la nou ka adoré-y la toujou pwòp é byen ranjé. Nou ka fè sa lè nou ka pran labitid nétwayé é pran swen  a Sal di Wayòm an nou. Séla ki ka sèvi èvè sé mikro-la é sé aparèy élèktronik la dwètèt pran prékosyon pou yo pa abimé-yo. Si nou ka pran swen a Sal di Wayòm an nou byen konm i fo, i ké diré pli lontan é nou ké ni mwens réparasyon a fè. Konsa, nou ké ni plis lajan pou konstwi é pou ranjé dòt Sal di Wayòm toupatou asi latè.

19. Ka nou pé aprann dè sa ki rivé on rèsponsab a siwkonskripsyon é madanm a-y ?

¹⁹ Pou sa ki ka travay rèd pou nou. Lè nou ka montré rèkonésans an nou, nou pé édé on moun vwè sé difikilté-la i ka jwenn la ondòt jan. Enki gadé sa on rèsponsab a siwkonskripsyon é madanm a-y ni lokazyon viv. Apré on gwo jouné prédikasyon, an plen livè, yo rantré akaz a yo, byen las menm. Tèlman té ka fè fwèt, sè-la ay dòmi èvè manto a-y asi-y. Lè lendèmen maten, i di mari a-y kè i pé’é pé kontinyé adan sèwvis-lasa. Plita, menm joumaten-lasa, sè-la rèsèvwa on lèt a Bétèl-la. Adan lèt-la, sé frè-la té ka félisité-y onlo pou andirans a-y é pou sa i té ka fè an prédikasyon. Yo té ka rèkonnèt kè sa dwèt té rèd pou-y dè chanjé kaz chak simenn konsa. Mi sa mari a-y ka di : « Tèlman sé félisitasyon-lasa touché-y, i pa jenmé woupalé-mwen dè arété sèwvis a siwkonskripsyon la ankò. Dayè, plizyè fwa, sé-y ki té ka ankourajé-mwen kontinyé lè an té ka anvi arété. » Frè-lasa é madanm a-y rété adan sèwvis a siwkonskripsyon-la pannan prèskè 40 lanné.

20. Ka fò-nou éséyé fè chak jou, é poukwa ?

²⁰ Chak jou, an-nou fè éfò pou montré rèkonésans an nou, ki adan sa nou ka di, ki adan sa nou ka fè. Ou pa jen sav, pétèt kè sé pawòl an nou oben aksyon an nou ki ké ba on frè fòs-la i bizwen la pou tchenbé adan mond engra lasa. Konsa nou ké pé vin bon zanmi èvè-y é lanmityé-lasa ké diré pou touttan. Men sa ki pli enpòwtan, sé kè nou ké imité Jéova, Pap’an nou ki donan é ki plen rèkonésans.