1. Paano ginpakita sang isa ka Samaritano ang iya apresasyon sang gin-ayo sia ni Jesus?

MAKALULUOY gid ang napulo ka tawo. May aro sila, kag daw wala na sila sing paglaum nga mag-ayo. Pero isa ka adlaw, nakita nila sa unhan si Jesus, ang Daku nga Manunudlo. Nabalitaan nila nga gin-ayo ni Jesus ang tanan nga klase sang balatian, kag nagapati gid sila nga maayo man niya sila. Gani nagsinggit sila: “Jesus, Instruktor, maluoy ka sa amon!” Nag-ayo ang napulo ka aruon. Sigurado gid nga nagapasalamat sila sa kaayo ni Jesus. Pero ang isa sa ila wala lang nagbatyag sini, ginpakita man niya ang iya apresasyon * kay Jesus. Ining nag-ayo nga tawo, nga isa ka Samaritano, naghimaya sa Dios “sa mabaskog nga tingog.”—Luc. 17:12-19.

2-3. (a) Ngaa indi naton mapakita ang aton apresasyon kon kaisa? (b) Ano ang binagbinagon naton sa sini nga artikulo?

² Pareho sa sini nga Samaritano, gusto man naton magpasalamat sa mga nagpakita sing kaayo sa aton. Pero kon kaisa, mahimo malipatan naton nga ihambal ukon ipakita nga nagapasalamat kita.

³ Sa sini nga artikulo, binagbinagon naton kon ngaa dapat naton ihambal kag ipakita ang aton pagpasalamat kag apresasyon. Tun-an naton ang mga halimbawa sa Biblia sang mga nagpasalamat kag sang mga wala magpasalamat. Dayon binagbinagon  naton ang mga paagi nga mapakita naton ang aton apresasyon.

4-5. Ngaa dapat naton ipakita ang aton apresasyon?

⁴ Ginapakita ni Jehova ang iya apresasyon. Ginahimo niya ini paagi sa pagpadya sa mga nagapahamuot sa iya. (2 Sam. 22:21; Sal. 13:6; Mat. 10:40, 41) Ginapalig-on kita sang Kasulatan nga ‘mangin manug-ilog sa Dios, subong mga anak nga hinigugma.’ (Efe. 5:1) Gani dapat naton ipakita ang aton apresasyon bangod gusto naton ilugon si Jehova.

⁵ Binagbinaga ang isa pa ka rason kon ngaa gusto naton ipakita ang aton apresasyon sa iban. Ang pag-apresyar daw pareho sa aton ginabatyag kon nagakaon sang manamit nga pagkaon, kay mas makalilipay magkaon kon may kaupod kita. Kon nabal-an naton nga ginaapresyar sang iban ang aton ginahimo, nalipay kita. Kon ipakita naton ang aton apresasyon sa iban, malipay sila. Kon mabal-an sang ginpasalamatan naton nga nakabulig gid sa aton ang iya ginhimo ukon ginhatag, mangin suod pa gid kita nga mag-abyan.

6. Ngaa pareho sa mansanas nga bulawan ang aton ginahambal para pasalamatan ang iban?

⁶ Ginapabaloran gid ang aton pagpasalamat. Ang Biblia nagsiling: “Ang pulong nga ginahambal sa nagakaigo nga tion daw mga mansanas nga bulawan sa pilak nga suludlan.” (Hulu. 25:11) Katahom gid tulukon sang mansanas nga bulawan sa isa ka pilak nga suludlan! Malahalon gid ini! Ano ang batyagon mo kon nakabaton ka sini nga regalo? Pareho sini ka hamili ang imo ginahambal para pasalamatan ang iban. Binagbinaga man ini: Ang mansanas nga bulawan nagatener sa malawig nga panahon. Ang imo ginpakita nga apresasyon mahimo nga dumdumon man kag pabaloran sang imo ginpasalamatan samtang buhi sia.

7. Suno sa Salmo 27:4, paano ginpakita ni David ang iya apresasyon, kag paano man nagpakita sing apresasyon ang mga kaliwat ni Asaf?

⁷ Ginpakita sang madamo nga alagad sang Dios sang una nga nagapasalamat sila. Ang isa ka halimbawa amo si David. (Basaha ang Salmo 27:4.) Ginpabaloran gid niya ang pagsimba kay Jehova kag makita ini sa iya ginhimo. Ginhatag niya ang daku nga bahin sang iya manggad para matukod ang templo. Ginpakita naman sang mga kaliwat ni Asaf ang ila apresasyon paagi sa pagsulat sang mga salmo, ukon mga ambahanon nga nagadayaw sa Dios. Sa isa ka ambahanon, nagpasalamat sila sa Dios kag gindayaw nila ang “makatilingala nga mga binuhatan” ni Jehova. (Sal. 75:1) Maathag nga gusto ipakita ni David kag sang mga kaliwat ni Asaf nga ginapasalamatan nila si Jehova bangod sang tanan niya nga pagpakamaayo sa ila. Mailog mo man bala sila?

8-9. Paano ginpakita ni apostol Pablo nga ginpabaloran niya ang iya mga kauturan, kag ano ang posible nga natabo bangod sini?

⁸ Ginpabaloran ni apostol Pablo ang iya mga kauturan kag makita ini kon nagaistorya sia parte sa ila. Pirme niya ginapasalamatan ang Dios bangod sa ila sa iya mga pangamuyo. Ginpabalo man niya paagi sa sulat nga ginapabaloran niya sila. Sa Roma 16:1-15, ginsambit ni Pablo ang mga ngalan sang 27 ka Cristiano nga kauturan. Ginsiling niya nga sanday Prisca kag Aquila “nagbutang sang ila kabuhi sa katalagman” tungod sa iya. Nagsiling man si Pablo nga ‘madamo na ang nabuligan’ ni Febe, pati na sia. Ginkomendahan niya ang iya pinalangga kag mapisan nga mga kauturan.

⁹ Bisan pa kabalo si Pablo nga indi perpekto ang iya mga kauturan, nagpokus sia sa ila maayo nga mga kinaiya, kag ginsambit niya ini sa katapusan nga bahin sang iya sulat sa mga taga-Roma. Mahimo gid nga napalig-on ini nga mga kauturan sang mabatian nila ang sulat ni Pablo nga ginbasa sa kongregasyon. Bangod sini, posible gid nga nagsuod pa gid sila kay Pablo. Pirme mo man bala ginapasalamatan ang maayo nga ginasiling kag ginahimo sang mga kauturan sa inyo kongregasyon?

10. Ano ang matun-an naton sa ginpakita ni Jesus nga apresasyon sa iya mga sumulunod?

¹⁰ Paagi sa mga mensahe ni Jesus sa mga kongregasyon sa Asia Minor, ginpakita niya ang iya apresasyon sa ginhimo sang iya mga sumulunod. Halimbawa, sa umpisa sang iya mensahe sa kongregasyon sa Tiatira, nagsiling sia: “Nahibaluan ko ang imo mga buhat, ang imo gugma kag pagtuo kag ministeryo kag pagbatas. Ang imo mga buhat sining ulihi mas maayo pa sangsa una.” (Bug. 2:19) Ginsambit ni Jesus nga nag-uswag sila, pero ginkomendahan man niya sila bangod sang ila mga kinaiya nga nagpalig-on sa ila sa paghimo sang maayo. Bisan pa dapat niya laygayan ang iban sa Tiatira, ginpalig-on niya sila sa umpisa kag sa katapusan nga bahin sang iya mensahe. (Bug. 2:25-28) Hunahunaa ang awtoridad ni Jesus bilang ulo sang tanan nga kongregasyon. Indi niya obligasyon nga pasalamatan kita bangod sang ginahimo naton para sa iya. Pero ginapakita gid niya ang iya apresasyon. Maayo gid sia nga halimbawa sa mga gulang!

11. Suno sa Hebreo 12:16, paano gintamod ni Esau ang sagrado nga mga butang?

¹¹ May pila nga ginsambit sa Biblia nga wala magpakita sing apresasyon. Halimbawa, wala gin-apresyar ni Esau ang sagrado nga mga butang bisan pa ginpadaku sia sang mga ginikanan nga nagapalangga kag nagatahod kay Jehova. (Basaha ang Hebreo 12:16.) Ano ang iya ginhimo? Padasudaso nga ginbaligya ni Esau ang iya kinamatarong bilang panganay sa iya manghod nga si Jacob kabaylo sang linaga  nga lentehas. (Gen. 25:30-34) Sang ulihi, ginkasubo gid ni Esau ang iya ginhimo nga desisyon. Pero bangod wala sia sing apresasyon, wala sia sing rason sa pagreklamo sang wala niya mabaton ang pagpakamaayo nga para kuntani sa mga panganay.

12-13. Ngaa masiling naton nga wala magpakita sing apresasyon ang mga Israelinhon, kag ano ang natabo sa ila?

¹² Madamo sing rason ang mga Israelinhon para magpasalamat. Mga ulipon anay sila, pero ginhilway sila ni Jehova sang ginpahanabo niya ang Napulo ka Kalalat-an sa Egipto. Dayon ginluwas sila sang Dios sang ginlaglag niya ang tanan nga soldado sang Egipto sa Pula nga Dagat. Nagpasalamat gid ang mga Israelinhon kag nag-amba sila sang ambahanon sang kadalag-an nga nagadayaw kay Jehova. Pero padayon bala sila nga nagpasalamat?

¹³ Sang nakaeksperiensia ang mga Israelinhon sang lain naman nga mga kabudlayan, nalipatan nila dayon ang tanan nga maayo nga ginhimo ni Jehova para sa ila. Wala na sila magpakita sing apresasyon. (Sal. 106:7) Ngaa masiling naton ini? “Ang bug-os nga katilingban sang mga Israelinhon nagkumod batok kay Moises kag kay Aaron.” Ang matuod, nagkumod sila batok kay Jehova. (Ex. 16:2, 8) Nasubuan gid sia sa indi pag-apresyar sang iya katawhan. Sang ulihi, gintagna niya nga mapatay sa kamingawan ini nga kaliwatan sang mga Israelinhon, luwas kay Josue kag kay Caleb. (Num. 14:22-24; 26:65) Binagbinagon naton kon paano naton malikawan ining malain nga mga halimbawa kag mailog ang maayo nga mga halimbawa.

14-15. (a) Paano mapakita sang mag-asawa nga ginapabaloran nila ang kada isa? (b) Paano matudluan sang mga ginikanan ang ila kabataan nga magpakita sing apresasyon?

¹⁴ Sa pamilya. Makabenepisyo ang bilog nga pamilya kon nagapakita sing apresasyon ang kada isa. Kon pirme ginapasalamatan sang mag-asawa ang kada isa, mangin suod pa gid sila. Madali man sila makapatawad sa mga sala sang kada isa. Kon ginapabaloran sang bana ang iya asawa, talupangdon niya ang maayo nga ginasiling kag ginahimo sang iya asawa, kag ‘tahuron niya sia kag dayawon.’ (Hulu. 31:10, 28) Kag ginasugid sang maalam nga asawa sa iya bana kon ano ang ginapabaloran niya sa iya.

¹⁵ Mga ginikanan, paano ninyo matudluan ang inyo kabataan nga magpakita sing apresasyon? Dumduma nga ginailog sang inyo kabataan ang inyo ginasiling kag ginahimo. Gani mangin maayo nga halimbawa paagi sa  pagpasalamat sa ila kon may ginhimo sila para sa inyo. Tudlui man sila nga magpasalamat sa iban kon may ginhimo ang iban para sa ila. Ipahangop sa inyo kabataan nga dapat sinsero sila sa pagpasalamat kag ang ila ginasiling may maayo nga epekto sa iban. Halimbawa, ang pamatan-on nga si Clary nagsiling: “Sang 32 anyos si Nanay, nagaisahanon na lang sia nga nagsagod sa amon nga tatlo nga mag-utod. Sang mag-32 anyos ako, nahunahuna ko nga mabudlay gid ang kahimtangan niya sadto. Gani ginsugiran ko sia nga nagapasalamat gid ako sa tanan niya nga ginsakripisyo sa pagpadaku sa amon nga mag-utod. Sang ulihi, ginsilingan niya ako nga indi gid niya malipatan ang ginsiling ko sa iya, pirme niya ini ginapamensar, kag pirme ini nagapahalipay sa iya.”

16. Maghatag sing halimbawa kon paano mapalig-on ang iban kon pasalamatan naton sila.

¹⁶ Sa kongregasyon. Mapalig-on naton ang aton mga kauturan kon ginapasalamatan naton sila. Halimbawa, ang 28 anyos nga gulang nga si Jorge nagmasakit sing grabe. Isa ka bulan nga wala sia makatambong sa mga miting. Bisan sang nagtambong na sia, indi niya gihapon masarangan nga maghatag sang iya bahin sa mga miting. Nagsiling sia: “Pamatyag ko daw wala na ako sing pulos bangod sang akon sitwasyon kag bangod indi ko na mahimo ang akon mga responsibilidad sa kongregasyon. Pero pagkatapos sang isa ka miting, nagsiling sa akon ang isa ka utod: ‘Salamat gid sa imo maayo nga halimbawa sa amon pamilya. Nanamian gid kami mamati sa imo mga pamulongpulong sang nagligad nga mga tinuig. Nagpalig-on gid ini sang amon pagtuo.’ Naghibi ako bangod sini. Daku gid ang nabulig sang iya ginsiling sa akon.”

17. Subong sang ginsambit sa Colosas 3:15, paano naton mapasalamatan si Jehova bangod sang iya kaalwan?

¹⁷ Sa aton maalwan nga Dios. Ginahatagan kita ni Jehova sang madamo nga espirituwal nga pagkaon. Halimbawa, ginatudluan niya kita paagi sa aton mga miting, mga magasin, kag mga website. May nabatian ka na bala nga pamulongpulong, nabasa nga artikulo, ukon nalantaw nga video nga bangod sini nakasiling ka, ‘Para gid ini sa akon’? Paano naton mapasalamatan si Jehova? (Basaha ang Colosas 3:15.) Ang isa ka paagi amo nga pirme kita mangamuyo sa iya para pasalamatan sia bangod sining maayo nga mga regalo niya sa aton.—Sant. 1:17.

18. Paano naton mapakita nga ginapabaloran naton ang aton Kingdom Hall?

¹⁸ Mapasalamatan man naton si Jehova paagi sa pagtinlo sa aton mga ginatipunan para  sa pagsimba. Pirme kita nagabulig sa pagpaninlo kag pagmentinar sa aton mga Kingdom Hall, kag nagahalong gid ang mga nagaatipan sa mga gamit sang kongregasyon para sa sound kag video para indi ini maguba. Kon ginamentinar naton sing maayo ang aton mga Kingdom Hall, magamit naton ini sa malawig nga panahon kag diutay lang ang kalay-uhon sa sini. Gani makatipon kita sang mas daku nga pondo para sa pagpatindog kag pagkay-o sang iban pa nga mga Kingdom Hall sa bilog nga kalibutan.

19. Ano ang natun-an mo sa eksperiensia sang isa ka manugtatap sang sirkito kag sang iya asawa?

¹⁹ Sa mga nagasakripisyo para sa aton. Ang aton ihambal nga komendasyon mahimo magbulig sa isa nga nakaeksperiensia sang kabudlayan. Binagbinaga ang eksperiensia sang isa ka manugtatap sang sirkito kag sang iya asawa. Pagkatapos sang bilog nga adlaw nga pagministeryo, nagpauli sila nga kapoy gid sa ila ginadayunan. Tigtulugnaw sadto amo nga nagtulog ang iya asawa nga nakadyaket. Pagkaaga, nagsiling ang iya asawa nga daw indi na sia makapadayon sa pag-alagad sa sirkito. Sang ulihi sina man nga aga, may nabaton sila nga sulat halin sa sanga talatapan, kag para ini sa iya asawa. Ginkomendahan sia sa sulat bangod sang iya pag-alagad kag pagbatas. Ginsambit sa sulat nga mabudlay gid man ang pagsaylosaylo sing dalayunan kada semana. Nagsiling ang bana: “Nalipay gid sia sa komendasyon sa iya amo nga wala na gid sia magmuno nga mag-untat kami sa pag-alagad sa sirkito. Ang matuod, pila ka beses niya ako nga ginpalig-on nga magpadayon sang daw gusto ko na mag-untat.” Nagpadayon ini nga mag-asawa sa pag-alagad sa sirkito sing halos 40 ka tuig.

20. Ano ang dapat naton panikasugan kada adlaw, kag ngaa?

²⁰ Kabay pa nga panikasugan naton nga magpasalamat kada adlaw, kag ihambal gid naton ini kag ipakita. Madamo subong ang wala nagapasalamat, gani ang aton sinsero nga pagpasalamat mahimo nga makabulig gid sa isa para mabatas niya ang iya mga problema. Kag bangod sang aton pagpasalamat, mangin suod pa gid kita sa aton mga abyan. Labaw sa tanan, mailog naton ang aton maalwan kag mainapresyahon nga Amay nga si Jehova.