1. Omurumendu Omusamaria ngwa ve rukisiwa wa raisa vi ondangi?

OVARUMENDU 10 va ri mongaro ongendise. Owo va ri nomutjise wongana, nu kava ri nongamburiro kutja ongaro yawo ndjo mape ya i runduruka. Posi yokutja eyuva rimwe, va muna Jesus, Omuhonge Omunene okuza kokure. Owo va zuva kutja Jesus wa verura omitjise pekepeke, nu va ri nongamburiro kutja eye ma yenene okuveverukisa wina. Kunao owo va ravaera nave tja: “Jesus, Muhona, tu tjariparera!” Ovarumendu 10 mba va ve rukisiwa oparukaze. Ovarumendu mba tjiri va ri nondangi kotjari tja Jesus tjo. Posi yokutja umwe wawo, wa raisa ondangi * ye ku Jesus, nungwari ke ri hungirire uriri momutima we. Omurumendu Omusamaria ngwa verurwa ngwi, wa hivirika Mukuru “neraka enene.”​—Luk. 17:12-19.

2-3. (a) Ongwaye povikando tjiva tji mape ya atu zembi okuraisa ondangi? (b) Matu katara ku ye morupa ndwi?

² Tjimuna Omusamaria ngo, eṱe matu vanga okuraisa ondangi ku imba mbe tu raisira otjari. Posi yokutja povikando tjiva eṱe tu zemba okutja ndangi poo okuraisa ku varwe kutja tu noumune uṋe ohunga notjari tji ve tu raisira.

³ Morupa ndwi, matu katara kutja ongwaye tje ri ounanḓengu kweṱe okuraisa ondangi moviṋa mbi matu hungire nokutjita. Matu ke rihongera kovihorera vyovandu tjiva mOmbeibela mba raisa ondangi na imba mbe hina va raisa ondangi. Okuzambo matu katara komiano tjiva mu matu yenene okurasia ondangi.

4-5. Ongwaye tji twa sokuraisa ondangi?

⁴ Jehova wetu raisira otjihorera otjiwa tjokuraisa ondangi. Omuano umwe eye mbwe tjita nao omokusera ondaya ku imba ovaṱakame ku ye. (2 Sam. 22:21; Eps. 13:6; Mat. 10:40, 41) Omatjangwa wina ye tu tunduuza kutja tu rire ‘ovanatje ovasuverwa va Ndjambi, mokuhorera ku Ye.’ (Ef. 5:1) Kunao, epu enanḓengu ndi matu sokuraisira ondangi, omena rokutja tu vanga okuhorera ku Jehova.

⁵ Tara kepu rarwe ndi tu raisira varwe ondangi. Okuraisa ondangi ku ri tjimuna eriro ewa ndi tjata indu tji matu ri pu novandu varwe. Tji matu tjiwa kutja varwe ve nondangi koviṋa mbi twe ve tjitire, ihi tji tu pa ondjoroka. Indu tji matu raisa ondangi yetu ku varwe owo wina ve kara nondjoroka. Omundu ku twa raisa ko ondangi u tjiwa kutja ozongondjero ze zokutuvatera poo zokutupa otjiṋa tji matu hepa ka za ri omungandjo. Kunao tu kara noupanga ouwa ku nomundu ngo.

6. Omomuano uṋe omambo wondangi mu ye hitasana notjihape tji tja ungurwa pongoldo?

⁶ Okuraisa ondangi otjiṋa otjinanḓengu tjinene. Ombeibela mai tja: “Otja otjihape otjingoldo punga atji ri mokayaha okasilveri ku ka harekwa, opunga ape ri embo, ndi mari hungirwa moruveze orusemba.” (Omiano 25:11) Ripura kutja otjihape otjingoldo tji munika vi mokayaha okasilveri! Nokutja otjinanḓengu pu pe ṱa pi! Hapo ove motjaterwa pu pe ṱa pi tji wa pewa otjiyandjewa otja iho? Ouatjiri owombwi wokutja omambo wondangi ove ngu u raera varwe omananḓengu pu pe ṱa mbo. Yandja ombango ku imbi: Otjihape tjongoldo tji yenena okukara oruveze orure. Momuano otjingewo, tji mo raisa ondangi u tjita kutja omundu ngu wa raisa ko ondangi ma zemburuke otjiṋa ho oure womuinyo we.

7. Otja tji twa munu mEpsalme 27:4, David novatjenge vomapsalme va raisa vi ondangi ya wo?

⁷ Ovakarere va Mukuru ovengi voruveze orukuru va raisa ondangi. Umwe wawo wa  ri David. (Lesa Epsalme 27:4.) Eye aa vara omerikotameneno wouatjiri otjotjiṋa otjinanḓengu, nu wa raisa momeritjindiro we. Eye wa yandja oviṋa ovingi vyonḓengu yokombanda komatungiro wondjuwo ondjapuke ya Muhona. Ozondekurona za Asaf za raisa ondangi mokutjanga omapsalme poo omaimburiro wondangero. Meimburiro rimwe owo va tja okuhepa ku Mukuru na ve hivirike Jehova ‘kovihimise mbya tjita.’ (Eps. 75:1) Oukahu kutja, ozondekurona za Asaf na David aave vanga okuraisira Jehova kutja ve nondangi kozondaya azehe Eye nḓe ve pa. Hapo omomiano viṋe ove mu mo yenene okuhorera kovatjange vomapsalme mbo?

8-9. Omuapostele Paulus wa raisa vi ondangi kovakambure ovakwao, nu ihi tja eta ye?

⁸ Omuapostele Paulus wa ri nondangi kovakambure ovakwao, nu wa raisa momuano ma hungire ohunga na wo. Mozongumbiro ze eye aruhe aa tja okuhepa ku Mukuru mena ra wo. Motutuu Paulus twa tjanga wina we ve raera kutja owo ovananḓengu ku ye. Paulus wa tamuna ovakambure ovakwao 27 komana momazeva 15 omatenga wekondwa 16 rOvaroma. Paulus wa zemburuka kutja Priskila na Akuila “va yandjera omuinyo wawo” mena re, nu wa tja Febe “wa vatera ovandu ovengi na ami wina.” Eye wa tanga ovakambure ovasuverwa mbo, koviungura vyawo oviwa mbyo.​—Rom. 16:1-15.

⁹ Paulus aa tjiwa nawa kutja ovakambure ovakwao ovahahomonena, posi yokutja komaandero worutuu rwe eye wa yandja ombango kovikaṋena vyawo oviwa. Ripura uriri kutja ovakambure mbo va yanḓiparisiwa vi tji va zuva omambo wa Paulus ngo amaye lesewa komurungu wombongo aihe! Kunao, kape nomakeyakeyero wokutja oupanga wawo kuna Paulus wa ha rera ko omasa. Hapo ove aruhe u raisa ondangi koviṋa oviwa ovakambure ovakweṋu mbi ve hungira nokutjita?

10. Matu rihongere kotjike komuano Jesus ma raisa ondangi kovakambure ovakwao?

¹⁰ Motutuu twe kozombongo za Asia Minor, Jesus wa raisa ondangi koviungura vyovakambure ovakwao. Otjotjihorera, indu tja tjanga kombongo ya Tiatira, eye wa uta nomambo nga: “Ami me tjiwa avihe mbi mu tjita. Me tjiwa orusuvero rweṋu nongamburiro yeṋu onḓikame, noukarere weṋu, nonḓaro orure yeṋu. Nu wina me tjiwa kutja eṋe nambano mu tjita ovingi komeho okukapita imbi mbiyamu tjiti okuza korutenga.” (Omavan. 2:19) Jesus kena wa tamuna oviungura vyawo ovingi mbi va tjita uriri, nungwari wina we ve tanga kovikaṋena vyawo oviwa mbye ve hinga kutja ve ungure oviungura oviwa mbyo. Nandarire kutja Jesus aa hepa okuronga tjiva mombongo ya Tiatira, eye wa uta ombuze ye nomambo omayanḓiparise, nu wina wa pata nomambo otjingewo ngo. (Omavan. 2:25-28) Ripura nouvara Jesus mbwe nawo otjotjiuru tjozombongo azehe. Eye kahepa okututanga mena roviungura mbi tu mu ungurira. Nandarire kutja u nouvara mbo, eye u kondja okuturaisira ondangi. Tjiri eye wa raisa otjihorera otjisembasemba kovanene vombongo!

11. Otja tji pa raisiwa mOvaheberi 12:16, Esau wa raisa ongaro iṋe komerikotameneno we na Jehova?

¹¹ Ouhumandu, ovandu tjiva mOmbeibela kave raisire ondangi. Otjotjihorera, nandarire kutja Esau we kurisiwa i ovanene mba suverere Jehova nu mbaave raisa ondengero ku Ye, Esau ka raisire ondangi komerikotameneno we na Jehova. (Lesa Ovaheberi 12:16.) Omomuano uṋe Esau ma raisa kutja ka ri nondangi? Eye wa randisa ousemba we wourumbi komboroto noupapitjenga, komuangu we Jakob. (Gen. 25:30-34) Kombunda, Esau wa kahihamwa omutima tjinene mena rondando ndja tjitire  ndjo. Mena rokutja eye ka raisire ondangi kousemba we otjerumbi, kunao eye ka ri nepu esemba rokunauna indu tje hina wa muna ondaya ndjo.

12-13. Omomuano uṋe Ovaisrael mu ve hina va raisa ondangi, nu kwa kongorera tjike?

¹² Ovaisrael va ri nomapu omengi wokuraisa ondangi. Owo va kuturwa koukarere Jehova tja za nokuyeta oviwonga 10 moEngipte. Okuzambo Mukuru we ve yama koumba, mokunyona otjimbumba tjovarwe wovita wOvaengipte pOmurongawotuu. Ovaisrael va ri nondangi tjinene nga tji va imbura omaimburiro wondoṋeno wokutanga Jehova. Hapo owo va kayenda komurungu okuraisa ondangi otja indjo?

¹³ Indu Ovaisrael tji va kamuna omauzeu warwe omape, owo va hakahana okuzemba oviṋa avihe Jehova mbye ve tjitira. Owo va raisa kutja kave nondangi. (Eps. 106:7) Omomuano uṋe? “Otjimbumba atjihe tjOvaisrael tja unaunina ooMoses na Aron,” mouatjiri owo aave unaunine Jehova. (Eks. 16:2, 8) Jehova wa hihamwa omutima kutja ovakarere ve kave raisire ondangi. Eye kombunda wa hunganeka kutja omuhoko auhe wOvaisrael mau ṱire mokuti onguza, pendje novarumendu mba ooJosua na Kaleb. (Num. 14:22-24; 26:65) Ngatu tare kutja matu horere vi kovihorera imbi oviwa nokupirukira imbi ovivi.

14-15. (a) Omomuano uṋe ovakupasane mu mave raisasana ondangi? (b) Omomuano uṋe ovanene mu mave hongo ovanatje vawo okuraisa ondangi?

¹⁴ Meṱunḓu. Okaṋepo akehe meṱunḓu ke muna ouwa indu auhe meṱunḓu tji ma raisa ondangi. Ovakupasane tji mave raisasana ondangi aruhe, owo ve kara noupanga wopopezu, nu wina i rira oupupu ku wo okuisirasana ozondataiziro. Omurumendu ngu nondangi nomukazendu we, eye kamunu ouwa woviṋa mbi ma hungire nokutjita uriri, nungwari “wina u mu tanga.” (Omiano 31:10, 28) Omukazendu onongo u tja ndangi komurumendu we koviṋa mbye mu tjitira.

¹⁵ Omomuano uṋe ovanene mu mave hongo ovanatje vawo okuraisa ondangi? Zemburuka kutja ovanatje ve horera koviṋa mbi mo hungire nokutjita. Kunao raisa otjihorera otjiwa mokutja ndangi kovanatje voye tji ve ku tjitire oviṋa. Wina, honga ovanatje voye okuraisa ondangi kovandu varwe tji ve ve tjitire oviṋa. Honga ovanatje voye okutjiwa kutja okuraisa ondangi otjiṋa tji tji za komutima tjiri, nokutja omambo wawo maye yenene okuṱuna ku varwe momuano omuwa. Otjotjihorera, omukazendu omutanda wena Clary wa tja: “Mama tja ri nozombura 32, wa isiwa novanatje 3 okukurisa omuini. Indu tji mba ri nozombura 32, mba  muna kutja tjiri tja ri otjiṋa otjizeu ku ye okukurisa ovanatje notjiwondo ho. Kunao ami mbe mu raera kutja mbi nondangi tjinene kozongondjero azehe nḓa tjita zokutukurisa. Katjisupi, wendji raera kutja omambo wandje ngo ye mu ṱuna tjinene, nu tji me ripurire ko eyuva arihe ye mu pa enyando momuinyo.”

16. Yandja otjihorera tjokutja omuano wokuraisa ondangi u yanḓiparisa vi varwe.

¹⁶ Mombongo. Indu tji matu raisa ondangi kovakambure ovakwetu, tu ve tunduuza. Otjotjihorera, Jorge omunene wombongo wozombura 28, wa verere tjinene. Oure womueze eye kaa yenene okuyenda kozombongarero zombongo. Nandarire kutja wa uta okukara pozombongarero zombongo, eye kaa yenene okuyandja omahungi. Jorge wa tja: “Ami ee rimunu okuhina ombatero mena rokutja mba ri noungundipare kaaṋi, nu hi mba ri nomasa wokuṱakamisa omerizirira wandje mombongo. Nungwari otjikando tjimwe kombunda yombongarero yombongo, omurumendu omukambure wa hungira omambo nga kwami, na tja: ‘Ami me tja ndangi tjinene kotjihorera otjiwa tji wa raisa keṱunḓu randje. Tjiri aa tu tjaterwa tjinene okupuratena komahungi woye ozombura ozonḓiṱi nḓa kapita, oyo ye tu vatera tjinene okukurisa oupanga wetu na Jehova.’ Omambo we ngo ye ndji ṱuna tjinene nga tji mba uta okurira. Tjiri ingo omambo ngee hepa okuzuva.”

17. Otja kOvakolose 3:15, omomouano uṋe mu matu raisa ondangi yetu kouharupu wa Jehova?

¹⁷ Ku Mukuru wetu omuharupu. Jehova u tu pa ovikurya ovingi mbi kurisa oupanga wetu kuna Ye. Otjotjihorera, tu muna omirari mbi tu vatera tjinene okupitira mozombongarero zetu, momambo wetu, na morungovi rwetu. Hapo ove wa rora okuzuva ehungi, poo okulesa orupa membo, poo okutarera omapitisiro wo-broadcasting, norihungirere omuini kutja, ‘Tjiri ihi otjiṋa tji mba ri a me hepa’? Matu raisa vi ondangi yetu ku Jehova? (Lesa Ovakolose 3:15.) Okupitira mozongumbiro zetu, oomuano umwe mu matu yenene okutja okuhepa ku Ye koviyandjewa oviwa mbyo.​—Jak. 1:17.

18. Matu raisa vi ondangi kEtuwo retu rwOmerikotameneno?

¹⁸ Eṱe wina tu raisa ondangi yetu ku Jehova indu tji matu kohorora oruveze rwetu rwomerikotameneno nokuriṱiza oukohoke. Eṱe aruhe tu kara norupa momakohorero nomaṱunino wOmatuwo wetu wOmerikotameneno, nu imba mbe ungura nozombako nozokombuita ve vi ṱiza nawa kutja avi ha teka. Indu eṱe tji matu ṱakamisa Omatuwo wetu wOmerikotameneno nawa, oyo ye kara ko oruveze orure nu kaye hepa okuṱunwa pu pe ṱa pi. Mokutjita nao,  tu tjita kutja pe kare ovimariva mbya yenene okutunga nokuṱuna Omatuwo yarwe wOmerikotameneno mouye auhe.

19. Ove we rihongere kotjike kotjihorera tjomutarere worukondwa nomukazendu we?

¹⁹ Ku imba mbe ungura oukukutu mena retu. Indu tji matu raisa ondangi, omambo wetu mape ya aye rundurura oumune womundu ohunga nomauzeu nge muna. Tara kotjihorera tjomutarere worukondwa nomukazendu we. Kombunda yokuuhara eyuva arihe motjiungura tjokuzuvarisa mokupepera, owo va kotoka ava urwa tjinene konganda paave kara. Kwa ri nombepera tjinene nga omukazendu we tja rara nondjasa ye yokupepera. Omuhuka omunene, wa raera omurumendu we kutja ke nokuyenena okukayenda komurungu motjiungura hi rukwao. Omuhuka omunene mbo, owo va muna orutuu okuza korutavi rwomberoo, nu orutuu ndwi rwa hindirwe ku ye. Norusuvero orutuu ndwi rwa raisa ondangi kotjiungura tje tjokuzuvarisa nonḓaro orure ye. Orwo rwa raisa kutja tjiri otjiṋa otjizeu okurara potuveze pekepeke otjivike atjihe. Omurumendu we wa tja: “Omukazendu wandje tjiri wa ṱunwa tjinene i omambo ngo nga tje hina wa hungira rukwao ohunga nokuisa otjiungura tjokuryanga hi. Povikando ovingi eye ongwe ndji yanḓiparisa okukayenda komurungu indu tji me ripura okuisa okukarera otjomutarere worukondwa.” Ovakupasane mbo va kara motjiungura tjawo ho oure wozombura ape 40.

20. Matu sokukondja okutjita ye eyuva arihe, nu omena ratjike?

²⁰ Ngatu kondje okuraisa ondangi aruhe moviṋa mbi matu hungire nokutjita. Mouye wovandu mbe ha raisa ondangi mbwi, omambo wetu omawa poo ongaro yetu ombwa mape ya a rire otjiṋa omundu warwe tji ma hepa kutja ma yenene okutjinda omauzeu nozombameno ze zeyuva arihe. Omuano mu matu raisa ondangi mau tjiti kutja tu kare noupanga oukarerere kuna varwe. Kombanda yanao, eṱe matu horere ku Tate wetu Jehova.