1. Kunnasi nipasingan na Samaritano i pangappresiana turi ta inuru yayya ni Jesus?

DESPERADU i mafulu nga lallaki. Egga i leprosoda, anna awan tu iddanamada nga moruan. Ngem tadday aggaw, nasingadda ta arayyu si Jesus, i Malalaki nga Mestru. Nadumugda nga inuru ni Jesus i ngamin nga klase na taki, anna kumbinsidu ira nga moruna gapa ira. Yari tu nikulleda: “Jesus! Afu! Ikallo nakami!” Nammapia danatun nga mafulu nga lallaki. Siguradu nga mappabalo ira ta kinasippo ni Jesus. Ngem egga i tadday nira nga ari laman nga nakatageno tu appabalo​—nipasinganna paga i appresasion * kani Jesus. Yatun nga lalaki, nga Samaritano, ay napaguyu nga dayawan i Dios gukaban na ‘pakkukkulle.’​—Luc. 17:12-19.

2-3. (a) Ngatta makattamattam nu mittan i mangappresia? (b) Anni i ikonsidera tam taw nga artikulo?

² Gitta na Samaritano, kayà tam ipasingan i appabalo tam turi ira ta masippo nittam. Ngem mittan, baka makattamattam ngana i mappabalo onu ikagi i mataga-tageno tam ta kinasippoda.

³ Taw nga artikulo, ikonsidera tam nu ngatta importante nga ipasingan i appabalo tam gukaban na kakkagian anna kukukuattam. Makagigiammu ittam ta karuan nga ehemplo ta karakter ta Biblia nga nappabalo anna ari nappabalo. Gigiammuattam paga i espesipiko ira nga makua tam tapenu mepasingan i appresasion.

4-5. Ngatta ipasingattam nakuan i appresasiottam?

⁴ Nangipasingan tu ehemplo si Jehova nittam ta pangipasingan tu appresasion. Makuana yatun gukaban na pamendisionna turi ira ta mamagayayya sa. (2 Sam. 22:21; Sal. 13:6; Mat. 10:40, 41) Pagaramman ittam gapa na Katurakan nga bilang ‘meddu nga ána na Dios, parigattam gafu yayya.’ (Efe. 5:1) Yari tu i pinakarason nu ngatta mangappresia ittam ay gafu ta kayà tam parigan si Jehova.

⁵ Ikonsidera paga i tadday nga rason nu ngatta appresiattam i tanakuan. Negitta ta masingngo nga makan i appresasion​—mas maappresiam i singngo natun nu egga kavulu mu kuman. Nu matageno tam nga appresian na tanakuan i kingngua tam, magayayya ittam. Nu ipasingattam i appresasiottam, mapagayayya tam gapa i tanakuan. Nu mappabalo ittam ta tadday nga tolay, mammuanna nga appresiattam i uffunna onu nakoffun i niyawana nittam. Megafu tatun, mas maddukko i pakikkofuttam tatun nga tolay.

6. Anni i napparefuan na pangikagi tu appresasion anna na mansanas nga vulawan?

⁶ Nabala-balor i pangipasingattam tu appabalo tam. Kagian na Biblia: “Kagitta na mansanas nga vulawan ta na-ukit nga pira i uvovug nga nakagi ta mepangngo nga tiempo.” (Prov. 25:11) Nonopan ngana laman i kasta na vulawan nga mansanas nga egga ta aggipayyan nga pira! Daddamman gapa nu kunnasi kangina yatun! Anni i matageno mu nu makalawa ka tu kunnatun nga regalu? Bueno, kunnatun gapa kabalor i uvovug na appabalo nga kagiammu ta tanakuan. Ikonsidera yaw nga kinakurug: I mansanas nga napadday ta vulawan ay mabbayag ta apapaddu nga tiempo. Kunnuri gapa, i nipasingammu ira nga pangappresia ay meraddamman anna tagibaloran na nakalawa tatun ta interu nga pattolena.

7. Gitta na ipasingan na Salmo 26:6-8, kunnasi nipasingan ni David anna na karuan nga nattura ta salmo i appresasiodda?

⁷ Aru ta aripan na Dios gari i nangipasingan tu appabalo. Tadday nira si David. (Bibbigan i Salmo 26:6-8.) Monag i appresasionna ta marenu nga paddayaw yayya nga masingan yatun ta agguyu-guyu anna ta kingnguana ira. Daka-dakal i balor na kontribusionna ta pappataddag ta templo. Nipasingan na gaka-gaka ni Asaf i appresasiodda gukaban na pattura tu salmo ira, onu kansion ira ta paddayaw. Ta tadday nga kansion, nappabalo ira ta Dios anna nikagida i appresasion ta ‘makapabbaw ira nga kingngua’ ni Jehova. (Sal. 75:1) Manawag nga kayà na gaka-gaka da David anni Asaf nga ipasingan i appresasiodda kani Jehova ta ngamin nga bendision nga nalawada sa. Anni ira i makuam tapenu maparigan danatun nga salmista?

8-9. Kunnasi nipasingan ni apostol Pablo i appresasionna ta kapangngurugna, anna anni i resultana?

⁸ Tinagibalor ni apostol Pablo i kapangngurugna anna nipasinganna yatun ta kinakkagina nira. Ta personal ira nga pakimallo, kanayun nga mappabalo yayya ta Dios megafu ta wawwaragina. Nipasinganna paga i appresasionna gukaban na patturana nira. Ta Roma 16:1-15, kinagi ni Pablo i ngagan na 27 nga kasi-Cristianona. Espesipiko nga nipakolina da Priscila anni Akila nga “maggi natay” para nisa, anna tinukoyna si Febe nga “aru nga totolay i inuffunan na,” nelagum si Pablo. Kinomendanna danatun nga meddu anna matalikarag nga wawwaragi.

⁹ Ammu ni Pablo nga imperfekto i kapangngurugna ira, ngem ta ultimu na turana ta taga-Roma, naffokus yayya ta makasta ira nga kualidadda. Fugurammu ngana laman nu kunnasi napagaram danatun nga wawwaragi turi ta nebibbig ta kongregasion i komento ni Pablo! Megafu tatun, awan tu duda nga mas naddukko i pakikkofudda kani Pablo. Kanayummu kari appresian i makasta ira nga gannug nga kagian anna kuan na kakongregasiommu?

10. Anni i magigiammu tam ta pinangipasingan ni Jesus tu appresasion ta disipulosna?

¹⁰ Ta mensahe ni Jesus ta karuan nga kongregasion ta Asia Minor, nipasinganna i appresasionna ta kingngua na disipulosna. Angngariganna, nigafuna i turana ta kongregasion ta Tiatira ta pakkagina: “Ammù i kukukuan nu. Ammù i aya anna angngurug nu, i asserbi anna appasa-pasensia nu. Ammù tu mas matalikarag kamu ta trabahu nu sangoye anne turi ta gafu na.” (Nep. 2:19) Ari laman nga tinukoy ni Jesus i minaru nga trabahuda, nu ari, kinomendanna paga ira gafu ta kualidad ira nga namaguyu nira nga mangngua tu mapia. Maski paga mawag nga tabarangngan ni Jesus i karuan ta Tiatira, makapagaram nga mensahe lagapa i gafu anna i ultimu na turana. (Nep. 2:25-28) Nonopan i autoridad ni Jesus bilang ulu na ngamin nga kongregasion. Ari yayya obligadu nga mappabalo nittam ta kingngua tam para sa. Ngem maski kunna, siniguraduna lagapa nga appresianna ittam. Anni mabba kastana nga ehemplo nga pamarigan na elder ira!

11. Gitta na mabibbig ta Hebreo 12:16, anni i paningan ni Esau ta sagrado ira nga gannug?

¹¹ Kaddaraddam, ari nappabalo i karuan nga karakter ta Biblia. Angngariganna, maski nu pinadakal na magana ni Esau yayya tapenu iddukan anna ayatan si Jehova, kurang i appresasionna ta sagradu ira nga gannug. (Bibbigan i Hebreo 12:16.) Kunnasi nallawan i  ari minappabalo nga ugalina? Gavva-gavva nga nilaku ni Esau i katununganna nga kwenta kaka ta urianna nga si Jacob para laman ta tanga-tasa nga lentehas. (Gen. 25:30-34) Turi kua, dakal i abbabawi ni Esau ta pinilina. Ngem ari yayya nappabalo ta egga sa, yayya nga awan tu rasonna nga marreklamo turi ta arianna nalawà i bendision ta katununganna kwenta kaka.

12-13. Kunnasi nipasingan na Israelita ira i kawan tu appresasiodda, anna anni i resultana?

¹² Aru i rason na Israelita ira tapenu mangipasingan tu appresasion. Napalubbangan ira ta nike-aripadda turi ta nirattal ni Jehova i Mafulu nga Kastigo ta Ehipto. Nipaliag paga ira na Dios ta peligro gukaban na pamatay ta interu nga armada na Ehipsio ta Uzzin nga Bebay. Daka-dakal i appabalo na Israelita ira yayya nga nakkansion ira tu kansion na viktoria tapenu idayaw si Jehova. Ngem, nattalupaddian kari ira nga minappabalo?

¹³ Tagga ta neparubang i Israelita ira ta bagu ira nga problema, nakattamadda insigida i ngamin nga kinapia ni Jehova nira. Tapus nallawan ngana i kawan tu pangappresiada. (Sal. 106:7) Kunnasi? “Namegafu nga magananibig i interu nga grupo na Israelita kontra kani Moises anni Aaron”​—ta kakuruganna, magananibig ira kontra kani Jehova. (Ex. 16:2, 8) Nadismaya yayya ta kawan tu appabalo na totolena. Niprofesiyana nga yaw nga interu nga henerasion na Israelita ira ay matay ta tana-tana, fuera kada Josue anni Caleb. (Num. 14:22-24; 26:65) Innattam nu kunnasi tam malillitan nga tuttulan danaw nga marake nga ehemplo anna parigan danuri makasta.

14-15. (a) Kunnasi mepasingan na magatawa i appresasiodda ta kataggi-tadday? (b) Kunnasi tudduan na mappagana i ánada nga mangappresia?

¹⁴ Ta unag na familia. Mammakapia i interu familia nu mangipasingan tu appresasion i kada miembro. Nu kanayun nga mangipasingan tu appresasion i magatawa, mas maddukko ira. Mas mabi paga nira nga pakoman i liwa na kataggi-tadday. I atawa nga lalaki nga appresianna i atawana ay arianna laman maobserba i makasta nga kakkagian anna kukukuan na atawana, nu ari, “lukka anna idayona yayya.” (Prov. 31:10, 28) I masirib nga atawa nga babay ay kagianna ta atawana i espesipiko ira nga gannug nga appresianna nisa.

¹⁵ Mappagana, kunnasinu tudduan i ánanu nga mangappresia? Daddamman nga parigan na ánanu i kakkagian anna kukukuannu. Yayya nga mangipasingan tu makasta nga apparigan gukaban na pappabalo nu egga i kingngua  na ánanu nikamu. Kunne na paga, tudduan i ánanu nga mappabalo nu egga i makasta nga kingngua na tanakuan nira. Ipalippawa ta ánanu nga napafutuan nakuan i appabaloda anna dakal i efekto na kakkagiadda. Angngariganna, kunna kabataan nga si Clary: “Tagga ta 32 anios si yenà, yayya ngana laman i namadakal nikami tallu nga ánana. Tagga ta 32 anios ngà, nalippawa ku i ziga na situasionna tatun nga edad. Yayya nga kinagì sa i appabalo ku ta ngamin nga sakrifisiona ta pamadakalna niakan anna ta dua nga wagì. Kanni laman, kinagina niakan nga nabalor paga sa adde sangawe i kinagì, nga kanayunna nonopan danatun, anna danatun i kanayun nga mamagayayya sa.”

16. Mangistoria tu ekspiriensa nu kunnasi nga makapagaram ta tanakuan i pangipasingan tu appresasion.

¹⁶ Ta unag na kongregasion. Nu ipasingattam i appresasiottam ta wawwaragi, mapagaram tam ira. Angngariganna, nattaki tu grabe i 28-anios nga elder nga si Jorge. Arianna naka-atende tu tanga-vulan ta study. Maski paga ta naka-atende ngana, arianna paga metaddaggan i asaymentna ta study. Inamin ni Jorge: “Gittana awan tu serbì megafu ta limitasiokku anna awan tu pakawayyà nga kuan i responsibilidad ku ta kongregasion. Ngem mittan kabalin na study, kinagi na tadday nga brother niò: ‘Kayà ku mappabalo ta makasta nga ehemplo nga nipasingammu ta familià. Talaga kakayàmi i palappa mu ira ta nappasa ira nga dagun. Napasikan danatun i espiritualidadmi.’ Maggi kakku makabida, anna makatangi ngà. I kinagina i eksakto nga kawagakku nga maginna.”

17. Segun ta Colosas 3:15, kunnasi tam mepasingan i appresasiottam kani Jehova ta karu na niyawana?

¹⁷ Ta minangngiyawa nga Dios tam. Niddan ittam ni Jehova tu abundansia nga espiritual nga makan. Angngariganna, makalawa ittam tu makoffun nga instruksion ta study ira, ta magazinas tam, anna ta website tam ira. Nakaginna ka ngana kari tu palappa, nakabibbig tu artikulo, onu nakagiraw tu broadcasting tapus nakagim, ‘Yatun i talaga kawagakku’? Kunnasi tam ipasingan i appresasiottam kani Jehova? (Bibbigan i Colosas 3:15.) Tadday ay gukaban na kanayun nga pappabalo nisa ta pakimallo tam gafu taw ira nga regalu.​—Sant. 1:17.

18. Kunnasi tam mepasingan i appresasiottam ta Kingdom Hall tam?

¹⁸ Mepasingattam paga i appresasiottam kani Jehova nu kanayun nga marenu anna maayus i lugar nga paddayarayawattam. Regular ittam nga manguffun ta pappakarenu anna pammentena ta Kingdom Hall tam, anna  memmugug gapa danuri na-asayn ta sound anna video equipment tapenu kadda madaral danatun. Nu makasta i pammentena tam ta Kingdom Hall tam, mas mabbayag yatun anna baddi laman i mawag nga pakappian. Nu kunna, mas meyusa i fundu ta pappataddag anna pappakasta ta tanakuan nga Kingdom Hall ta interu mundo.

19. Anni i nagigiammum ta ekspiriensa na tadday nga manangngal ta sirkito anna ta atawana?

¹⁹ Danuri malappo nga mattrabahu para nittam. Nu ipasingattam i appresasiottam, awayyana nga manguli i pagimamma na tadday ta problema nga arubanganna megafu ta kinagi tam. Ikonsidera i ekspiriensa na tadday nga manangngal ta sirkito anna na atawana. Kabalin na tangaggaw nga pamministerio ta winter, nababbannag ira nga nanoli ta paddianadda. Sobra i lamminna yari tu nakakatrug i sister tu agga-yellungna i makannag nga sweater-na. Ta kinommananna, kinagina ta atawana nga gittana arianna ngana metuloy i traveling work. Tatun gabbalaman nga umma, nakalawa i sister tu tura na panga nga ofisina nga nengagan nisa. Napafutuan nga kinomendan yayya na tura ta ministeriona anna ta pagattattamna. Kinagi na tura nu kunnasi kariga i pagali tu paddianan ta kada ligguan. Kunna atawa nga lalaki: “Nakkasta i panagenona megafu tatun nga komendasion, yari tu arianna ngana vuluvuga ninono nga panawan i traveling work. Ta kakuruganna, namippiganà paga lagu nga pinagaram nga mattulu-tuloy kada nonopakku i magimmang.” Nattalupaddian yatun nga magatawa ta traveling work ta maggi 40 dagun.

20. Anni nakuan i kuattam kadaggaw, anna ngatta?

²⁰ Kadaggaw tam nakuan nga ipasingan ta kakkagian anna kukukuattam i appabalo tam. I napafutuan ira nga kakkagian onu kukukuattam i awayyana nga kawagan na tanakuan tapenu marubang i inaggaw ira nga problema ta mundo nga baddi laman i minappabalo. Mamakaladda ta pakkorofun i pangikagi tam tu appabalo anna mannanayun i efektona. Pinaka-importante, maparigattam i minangngiyawa anna minangngappresia nga Yama tam, si Jehova.