1. Modi ki kel ómi samaritanu ki Jizus kura mostra gratidon?

TINHA 10 ómi ki staba na un situason konplikadu. Es tinha un duénsa ki txoma lépra i ses situason staba ta fika kada bês más piór. Má un dia, es odja Jizus, kel Grandi Instrutor, di lonji. Es obi ta fladu ma Jizus staba ta kura tudu tipu di duénsas i es tinha sertéza ma Jizus ta kuraba es tanbê. Nton, es grita altu: ‘Jizus, Instrutor, ten mizerikórdia di nos!’ Kes 10 ómi fika tudu kuradu. Di sertéza es da txeu valor pa bondadi ki Jizus faze pa es. Má un di es, ki éra samaritanu, ka xinti sô gratidon, el mostra Jizus ma el staba gratu. * Kel ómi xinti motivadu pa el ‘da glória pa Deus ku vós altu.’ — Luc. 17:12-19.

2-3. (a) Pamodi ki alvês nu pode ka mostra gratidon? (b) Kuzê ki nu sta ben odja na kel studu li?

² Sima kel samaritanu, nos tanbê nu krê mostra ma nu ta da valor pa bondadi ki otus ta faze pa nos. Má alvês, nu pode skese di fla obrigadu ô mostra otus algen modi ki nu sta xinti pa kel bondadi ki es faze-nu.

³ Na kel studu li, nu sta ben odja pamodi ki é inportanti nu mostra nos gratidon pa kuzas ki nu ta fla i pa kuzas ki nu ta faze. Nu ta ben odja izénplus na Bíblia di pesoas ki éra gratu i otus ki éra ingratu. Dipôs, nu ta ben odja di ki manera nu pode mostra gratidon.

4-5. Pamodi ki nu debe mostra gratidon?

⁴ Jeová dexa un bon izénplu pa nos na mostra gratidon. Un manera ki el ta faze kel-li é óras ki el rekonpensa kes algen ki ta faze kel ki é dretu. (2 Sam. 22:21; Sal. 13:6; Mat. 10:40, 41) Bíblia ta insentiva-nu pa nu ‘bira ta imita Deus, sima fidjus ki el ta ama.’ (Efé. 5:1) Pur isu, nu debe mostra gratidon prinsipalmenti pamodi nu krê imita Jeová.

⁵ Ten un otu motivu ki nu debe mostra gratidon pa otus algen. Mostra gratidon é sima kume un kumida sábi djuntu ku amigus. Nos tudu nu ta xinti filís i nos amizadi ta fika más fórti. Óras ki nu xinti ma otus algen ta da valor pa kuzas ki nu faze, nu ta xinti kontenti. Óras ki nu mostra nos gratidon, otus algen tanbê ta xinti kontenti. Kel algen ki faze algun kuza pa nos ô ki da-nu algun kuza ki nu sta ta meste, ta odja ma se sforsu bale péna i nos amizadi ku el ta fika más fórti.

6. Pamodi ki óras ki nu ta agradise otus, nos palavra pode ser sima masan di oru?

⁶ Gratidon ki nu ta mostra ten txeu valor. Bíblia ta fla: ‘Un palavra ki fladu na ténpu sértu é sima masan di oru na bandeja di prata.’ (Pro. 25:11) Imajina modi ki é bunitu un masan di oru na un bandeja di prata! I pensa na présu ki el debe ten! Modi ki bu ta xintiba si bu resebeba un prezenti di kel-la? Óras ki bu ta agradise un algen, bus palavra pode ten txeu valor sima kel masan di oru. Tanbê, un masan ki fazedu di oru pode dura pa tudu ténpu. Di mésmu manera, óras ki bu ta agradise un algen, el pode lenbra di kel palavra i da-l valor pa tudu ténpu di se vida.

7. (a) Di akordu ku Salmo 27:4, modi ki Davidi mostra gratidon? (b) Modi ki famílias di Azafi mostra ses gratidon?

⁷ Txeu sérvu di Deus na ténpu antigu mostra ses gratidon. Un di es éra Davidi. (Lé Salmo 27:4.) El ta daba txeu valor pa adorason verdaderu. Nu pode odja kel-li na kuzas ki el faze kantu el da txeu di se rikézas pa konstruson di ténplu. Kes família di Azafi mostra ses gratidon na salmus ô kántikus di lovor ki es skrebe. Na un di kes salmu, es agradise Deus i es fla modi ki es staba dimiradu ku kes ‘kuza grandi’ ki Jeová faze. (Sal. 75:1) Nu pode odja klaru ma Davidi ku kes família di Azafi kria mostraba Jeová modi ki es staba gratu pa tudu kes benson ki Jeová daba es. Bu ta konsigi pensa na alguns manera ki bu pode imita-s?

8-9. (a) Modi ki apóstlu Polu mostra se gratidon pa se irmons ku irmans? (b) Kal ki foi rezultadu di gratidon ki Polu mostra?

⁸ Apóstlu Polu ta daba txeu valor pa se irmons i irmans na fé. El mostra kel-li na manera ki el pâpia di es. Sénpri el ta agradiseba Deus pa es na se orason. Tanbê na kuzas ki el skrebe, el dexa-s sabe ma es éra txeu inportanti pa el. Na Romanos kapítlu 16 versíklus 1 ti 15, apóstlu Polu pâpia di 27 irmon, di nómi pa nómi. Polu fla ma Priska i Ákila ‘riska ses própi piskós’ pamodi el, i el fla ma Febe ‘difende monti algen’, i ku el ku tudu. Polu ilôjia kes irmon ku irmans pa ses amor i pa trabadju duru ki es ta fazeba. — Rom. 16:1-15.

⁹ Polu sabia ma se irmons ku irmans éra inperfetu, má na fin di kel karta ki el skrebe pa romanus el prifiri konsentra na kes bon kualidadis ki es tinha. Imajina modi ki kes irmon ku irmans xinti kantu ledu kel karta di Polu en vós altu na kongregason! Pode ser ki es xinti txeu nkorajadu i ses amizadi ku apóstlu Polu bira mutu más fórti. I bo? Bu ta kustuma agradise pa kes kuza dretu ki irmons i irmans na bu kongregason ta fla i ta faze?

10. Kuzê ki nu ta prende di manera ki Jizus mostra gratidon pa se sigidoris?

¹⁰ Jizus tanbê ta mostraba gratidon. Na un mensaji ki el manda se sigidoris na alguns kongregason na Ázia Menor, el ilojia-s i el agradise-s pa ses trabadju. Pur izénplu, el fla kongregason di Tiatira: ‘N konxe kuzas ki bu faze, bu amor, bu fé, bu trabadju i ma bu sta aguenta firmi, i N sabe ma kuzas ki bu sta faze gósi é más txeu di ki kes ki bu faze antis.’ (Apo. 2:19) Jizus fla ma ses trabadju omenta i tanbê el ilojia-s pa kes kualidadi ki ta motivaba es faze kes trabadju. Nbóra Jizus meste konsedjaba alguns na Tiatira, el kumesa i el finda se mensaji ta mostra se gratidon ki el ta xintiba pa es. (Apo. 2:25-28) Jizus é kabésa di tudu kongregason. Pensa na autoridadi ki el ten. El ka meste agradise-nu pa trabadju ki nu ta faze pa el. Má simé, el ta preokupa ku mostra gratidon pa nos. Kel-li é un grandi izénplu pa ansions!

11. Di akordu ku Hebreus 12:16, modi ki Izaú mostra ma el ka tinha gratidon pa kuzas sagradu?

¹¹ Infilismenti, alguns di kes algen ki Bíblia ta pâpia di es, ka mostra gratidon. Pur izénplu, nbóra pai ku mai di Izaú ta amaba i ta ruspetaba Jeová, Izaú ka mostra gratidon pa kuzas sagradu. (Lé Hebreus 12:16.) Modi ki el mostra ma el éra ingratu? Sen pensa dôs bês, el bende se benson di primeru fidju pa se irmon  más novu Jakó, sô pa un pratu di kumida. (Gén. 25:30-34) Más tardi, Izaú rapende di se disizon. Má, el ka mostra gratidon pa kuza ki el tinha, pur isu el ka podia reklamaba ma el ka resebe benson di primeru fidju.

12-13. Modi ki israelitas mostra ma es éra ingratu i kal ki foi rezultadu?

¹² Israelitas tinha txeu motivu di mostraba gratidon. Es fika livri di skravatura dipôs ki Jeová manda kes 10 Praga na Ijitu. Dipôs, Jeová torna salva-s más un bês la na Mar Burmedju kantu el kaba ku tudu trópas di Ijitu. Israelitas fika txeu kontenti ki es kanta un kántiku di lovor pa Jeová. Má, es kontinua ta mostra gratidon?

¹³ Kantu israelitas torna pasa pa otus prubléma, es skese di tudu kes kuza ki Jeová dja fazeba pa es. Es mostra ma es éra ingratu. (Sal. 106:7) Modi? Bíblia ta fla: ‘Tudu asenbleia di Israel kumesa ta rasmunga kóntra Muizes ku Aron’. Na verdadi, es staba ta kexa kóntra Jeová. (Êxo. 16:2, 8) Jeová fika txeu maguadu pamodi se povu ka mostra gratidon. Poku ténpu dipôs, el fla-s ma nason interu di Israel ta moreba na dizértu, ménus Juzué ku Kalebi. (Núm. 14:22-24; 26:65) Gósi nu sta ben odja modi ki nu pode ivita sigi kes mau izénplu i imita kes bon izénplu.

14-15. (a) Modi ki maridu ku mudjer pode mostra gratidon pa kunpanheru? (b) Modi ki pai ku mai pode inxina ses fidju mostra gratidon?

¹⁴ Na família. Família interu ta ganha óras ki kada un di es ta mostra gratidon. Óras ki maridu ku mudjer ta da kunpanheru valor, es ta bira más amigu inda. Tanbê ta fika más faxi púrdua kunpanheru. Maridu ki ta da valor pa se mudjer, ta odja kes kuza dretu ki el ta fla i ki el ta faze, má tanbê el ‘ta labanta i el ta ilojia-l.’ (Pro. 31:10, 28) Tanbê un mudjer ki ten sabedoria, ta dexa se maridu sabe di kes kuza ki el ta gosta na el.

¹⁵ Pai ku mai, modi ki nhos pode inxina nhos fidju mostra gratidon? Nhos lenbra ma nhos fidju ta imita kes kuza ki nhos ta fla i ki nhos ta faze. Nton, nhos fla nhos fidju obrigadu óras ki es faze alguns kuza pa nhos. Asi, nhos ta da-s un bon izénplu. Tanbê nhos inxina-s fla obrigadu óras ki otus algen ta faze kuzas  pa es. Nhos djuda-s ntende ma mostra gratidon ta ben di korason i ma ses palavra pode djuda txeu. Pur izénplu, un jóven ki txoma Clary fla: “Kantu nha mai tinha 32 anu, dirapenti el tevi ki kria três fidju el sô. Kantu N faze 32 anu, N fika ta pensa modi ki foi difísil pa nha mai faze kel-la na se idadi. Nton, N fla-l ma mi é txeu gratu pa tudu sakrifisiu ki el faze pa kria-nu mi ku nhas irmon. Ka dura li, el fla-m ma el tene kes palavra guardadu na se korason i ma sénpri ki el ta pensa na es, se dia ta fika más filís.”

16. Da un izénplu ki ta prova modi ki mostra gratidon pode nkoraja otus.

¹⁶ Na kongregason. Óras ki nu ta mostra gratidon pa nos irmons i irmans, nu ta nkoraja-s. Pur izénplu, un ansion di 28 anu ki txoma Jorge, fika txeu duenti. El ka konsigi sisti runion duránti un mês. Mésmu kantu el kumesa ta sisti runion, el ka ta podia fazeba ninhun párti na runion. Jorge fla: “N ta xintiba sima un algen sen valor pamodi nha duénsa i tanbê pamodi N ka sta konsigi kuidaba di nhas responsabilidadi na kongregason. Má dipôs di un runion, un irmon fla-m: ‘N krê agradise-u pamodi bo é un bon izénplu pa nha família. Bu ka ta imajina modi ki nu gosta txeu di bus diskursu di kes últimu anu. Es djuda-nu ten un fé más fórti.’ Kes palavra li mexe txeu ku mi, i N kumesa ta txora. Éra kel-li própi ki N meste obiba.”

17. Sima sta na Colossenses 3:15, modi ki bu ta mostra gratidon pa Jeová ki é un Deus ki gosta di da?

¹⁷ Pa nos Deus ki gosta di da. Jeová ta da-nu txeu kuza pa nu ten un amizadi fórti ku el. Pur izénplu, el ta inxina-nu através di nos runion, nos revistas i nos sites. Talvês dja bu kustuma obi un diskursu, lé un artigu, ô odja vídius di nos site TV JW i bu pensa: ‘É kel-li própi ki N sta ta mesteba!’ Modi ki bu pode mostra bu gratidon pa Jeová? (Lé Colossenses 3:15.) Un manera di faze kel-li é sénpri agradise Jeová na orason pa kuzas di valor ki el ta da-nu, sima kes-li. — Tia. 1:17.

18. Di ki maneras nu ta mostra gratidon pa nos Salon di Reinu?

¹⁸ Otu manera ki nu pode mostra gratidon pa Jeová é óras ki nu ta djuda mante nos Salon di Reinu linpu i ben rumadu. Sénpri ki nu pode nu ta partisipa na linpéza i na kuida di nos Salon di Reinu.  Kes irmon ki ta uza aparelhus di son i vídiu ta toma txeu kuidadu pa ka straga. Óras ki nu ta kuida di nos Salon di Reinu dretu, el ta dura más txeu i ta konpodu más poku. Asi, nu ta djuda popa más dinheru pa faze i konpu otus Salon di Reinu na mundu interu.

19. Kuzê ki bu prende sobri kuza ki kontise ku kel enkaregadu di grupu di kongregason i se mudjer?

¹⁹ Pa kes ki ta trabadja duru pa nos. Óras ki nu ta mostra gratidon, nos palavra pode djuda un algen muda se manera di pensa sobri alguns prubléma ki el sta pasa pa el. Odja izénplu di un enkaregadu di grupu di kongregason i se mudjer. Dipôs di trabadja un dia interu na pregason déntu friu, es txiga kaza kansadu. Staba tantu friu ki se mudjer durmi ku se kazaku bistidu. Kel otu dia di palmanhan, el fla se maridu ma el ka sabia si el ta konsigi kontinuaba na kel sirvisu. Más tardi na kel palmanhan, kel irman resebe un karta ki ben di Betel. Kel karta ta ilojiaba el txeu pamodi tudu se trabadju i se sforsu pa aguentaba firmi na se sirvisu. Tanbê kel karta ta flaba modi ki alvês pode ser difísil fika ta viaja di un kaza pa kel otu tudu simana. Se maridu fla: “Kes ilojiu mexe txeu ku nha mudjer ki nunka más el ka pâpia na dizisti di nos sirvisu. Na verdadi, el nkoraja-m txeu bês pa N kontinua óras ki N sta pensaba na dizisti.” Kel kazal kontinua na ses sirvisu kuazi 40 anu.

20. Kuzê ki nu debe sforsa pa faze tudu dia i pamodi?

²⁰ Nu meste sforsa tudu dia pa nu mostra gratidon na kel ki nu ta fla i ki nu ta faze. Kuzas ki nu ta fla di korason ô kuzas ki nu ta faze, pode ser kel ki un algen sta meste pa djuda-l aguenta firmi más un dia na es mundu, ki poku algen ta mostra gratidon. Nos palavra di gratidon ta djuda-nu ten amigus ki ta dura pa tudu ténpu. Más inportanti inda, óras ki nu ta faze si nu sta ta imita nos Pai Jeová ki é un Deus ki gosta di da i mostra gratidon.