1. Jiisusimit ajorun­naarsin­neqarami Samariamiup qujamasun­nini qanoq ersersip­paa?

ANGUTIT qulit ilungersunar­torsior­put – pupis­suup­put aaq­qin­nis­samul­lu neriuuteqaratik. Ilaan­nili Ajoqersuisorsuaq, Jiisusi, ungasianit takuler­paat. Tusarsimavaat Jiisusip inup­pas­suit nap­parsimasut ajorun­naarsis­simagai. Up­peril­luin­naramik­ku ajorun­naarsin­neqarsin­naal­lutik ima nil­ler­put: “Jiisusi ajoqersuisoq, naak­kigitigut!” Jiisusip ajun­ngisaarfigalutik ajorun­naarsim­matik angutit qular­nan­ngitsumik qujamasungaalersimas­sap­put. Ataaserli qujamasut­tutut misigiin­nar­nani Jiisusimut qujamasun­nini er­ser­sip­paa. Angutip taas­suma Samariamiup “nipituumik Guuti un­nersiutigaa.” – Luk 17:12-19.

2-3. (a) Sooq qujamasun­nermik ersersitsin­ngitsoorsin­naavugut? (b) Al­laaserisami matumani suut sam­mis­savavut?

² Samariamiu ilaarlugu uagut­taaq ajun­ngitsulior­tunut qujamasun­ner­put ersersik­kusup­par­put. Ilaan­nik­kul­li qujamasun­ner­put oqaatsitsigut iliuutsitsigul­lu ersersin­ngitsoorsin­naavar­put.

³ Al­laaserisami matumani oqaatsitsigut iliuutsitsigul­lu qujamasun­nermik ersersitsinis­saq sooq pingaaruteqar­toq sam­mis­savar­put. Aam­ma Biibilimi eq­qaaneqar­tut inuit qujamasun­nermik ersersitsisut al­lal­lu ersersitsin­ngitsut sam­mis­savavut. Taava qanor­piaq qujamasun­nermik ersersitsisin­naanersugut eq­qar­tus­savar­put.

4-5. Sooq qujamasun­nermik ersersitsisariaqar­pugut?

⁴ Jehova, ilaatigut iluarisaminik akis­sarsisitsisar­nermigut,  qujamasun­nermik ersersitsinis­samut tun­ngatil­lugu uagutsin­nut maligas­siuivoq. (2 Sam 22:21; Tuss 13:6; Matt 10:40, 41) Biibilimi ima kajumis­saar­neqar­pugut: “Guuti maligas­sarisiuk taas­sumun­nga qitor­naasutut asasaasutut.” (Ef 5:1) Tas­sa Jehovamik ilaarserusun­ner­put qujamasun­nermik ersersitserusun­nitsin­nut pingaar­ner­tut pis­sutaavoq.

⁵ Pis­sutaasoq al­la eq­qarsaatigiuk. Misigigaangatta qujamasuf­figineqarluta nuan­naar­tar­pugut. Qujamasun­nermik er­ser­sit­sigaangat­ta al­lat nuan­naar­tit­tar­pavut. Inuup qujamasun­nermik ersersitsivigisat­ta paasis­savaa ikior­niarluta iliuuserisimasaa tun­nius­simasaaluun­niit pingaar­tik­kip­put. Tamatumalu kingunerisaanik ikin­ngutigiil­luar­nerulis­saagut.

6. Qujamasul­luni oqaaserisat iipilil­lu kuultimit sanaat sutigut as­sigiis­suteqar­pat?

⁶ Qujamasun­nermik ersersitsiner­put naleqangaar­poq. Biibilimi al­las­simavoq: “Iipilit kuultiusut as­silis­sani sølviusuniit­tut tas­saap­put oqaatsit pis­susis­savim­mis­sut oqaatigisat.” (Uss 25:11) Takorlooruk iipili kuultimik sanaaq sølvimik tunuliaqutalik qanoq kusanar­tigisoq. Qular­nan­ngitsumik naleqangaar­poq. Taama it­tumik tunineqaraluaruit qanoq misigis­savit? Qujamasul­lutit ersersitsinitit al­lanut taama naleqar­tigisin­naap­put. Ilumoor­toq una eq­qarsaatigiuk: Iipili kuultimit sanaaq naas­saan­ngitsumik atasin­naavoq. Taamatut­taaq inuup qujamasun­nermik ersersitsivigisavit im­maqa iliuutsit pingaar­til­lugulu inuunermi sin­nerani eq­qaamas­savaa.

7. Daavi Tus­siaat 30:13-imi aam­ma tus­siaasior­tut al­lat tus­siaasiamin­ni qujamasun­nermik qanoq ersersitsip­pat?

⁷ Itsaq Guutip kif­fai qujamasun­nermik ersersitsisar­put. Daavi taak­kua ilagaat. (Tussiaat 30:13 atuaruk). Iliuutsimigut ersersip­paa pal­lorfigin­nin­neq minguitsoq  pingaar­tingaarlugu. Naalaf­fiup sananeqar­nis­saanut an­ner­tuumik tunis­suteqar­poq. Asafip kinguaavi tus­siaasior­nermik­kut, imaluun­niit un­nersiutaasunik erinarsuusior­nermik­kut, qujamasun­ner­tik ersersip­paat. Erinarsuum­mi aalajangersimasumi Guuti qutsavigaat ‘tupin­nar­tuliaalu’ alutorsaatigalugit. (Tuss 75:2) Ersarip­poq Daavip Asafil­lu kinguaavisa pil­luaq­qus­sutisiar­pas­suit qujamasuutigingaarlugit Jehovamut ersersik­kusuk­kaat. Tus­siaasior­tut taak­ku qanoq ilaarsin­naavigit?

8-9. Paulusip qujamasun­nini qatan­ngutiminut qanoq ersersip­paa, taman­nalu qanoq kinguneqarsimas­sava?

⁸ Apustilip Paulusip qatan­ngutit eq­qar­toraangamigit qujamasuutigalugit ersersit­tar­paa. Kisimiil­luni qinugaangami taak­ku pil­lugit Guuti qutsavigisar­paa. Aam­ma qujamasun­nini al­lak­katigut ersersit­tar­paa. Romamiunut al­lak­kat kapitali 16-imi versini siul­ler­ni 15-ini kristumioqatini 27-t atiisigut taavai. Priska Akvilalu nam­mineq pil­luni ‘inuunermin­nik navianar­torsior­titsisutut’ Føbelu “qas­seer­pas­suar­nut”, aam­ma Paulusimut, ‘ikiuut­tarsimasutut’ im­mik­kut eq­qaavai. Qatan­ngutini asasani tamaviaarlutik kif­far­tor­tut nersualaar­pai. – Rom 16:1-15.

⁹ Paulusip qatan­ngutini naam­mal­luin­nan­ngitsuusut nalun­ngilaa, Romamiunul­lu al­lak­kani naggaseramigit pis­susii ajun­ngitsut pingaar­tin­neruai. Paulusip al­latai ilagiin­ni atuar­neqarmata qatan­ngutit qiim­maal­laatigisimas­sagaat takorloorsin­naavar­put. Qular­nan­ngitsumik Paulusi ikin­ngutigil­luar­nerulersimas­savaat. Il­lit ilagiin­niit­tut iliuusiisa oqaasiisalu qujamasuutiginerat akulikitsumik ersersit­tar­piuk?

10. Jiisusip ajoqersuk­kaminut qujamasun­nermik ersersitsinera qanoq ilin­niarfigisin­naavar­put?

¹⁰ Ilagiit ilaan­nut Asiaaq­qamiit­tunut tusarlius­samini Jiisusip ajoqersuk­kami suliaasa qujamasuutiginerat ersersip­paa. As­sersuutigalugu Thyatirami ilagiin­nut tusarlius­sani ima aal­lar­ner­paa: “Ilisimavak­ka suliatit asan­nis­sutsil­lu un­neq­qaris­sutsil­lu kif­far­tor­neril­lu nikal­lujuis­sutsil­lu, suliavil­lu kingul­liit siul­liit akimor­paat.” (Saqq 2:19) Jiisusip iliuuseqar­nerunerat eq­qaagin­nar­nagu ajun­ngitsulior­nis­samut kajumis­sis­sutigisamin­nik pis­suseqar­nerat pil­lugu nersualaar­pai. Jiisusip Thyatiramiit­tut ilaat oqaaq­qis­saar­tariaqaraluarlugit tusarlius­sani qiim­mas­saataasumik aal­lar­nerlugulu naggaser­paa. (Saqq 2:25-28) Jiisusi ilagiin­nut niaquusutut oqar­tus­saasuum­mat suliavut pil­lugit qujasariaqan­ngik­kaluar­poq. Taamaat­torli qujamasut­tuunis­samik ersersitsivoq. Utoq­qaaner­tanut maligas­saal­luangaarami!

11. Hebræerit 12:16-imi (NW) ersersin­neqar­tutut Esauip il­ler­nar­tut qanoq isigin­nit­taaseqarfigai?

¹¹ Ajoraluar­tumik Biibilimi eq­qaaneqar­tut ilaat qujasuitsuup­put. As­sersuutigalugu Esauip, angajoq­qaanit Jehovamik asan­nit­tunik mianerin­nit­tunil­lu perorsar­neqar­tup, il­ler­nar­tunik pingaar­titsin­ngin­nini ersersip­paa. (Hebræerit 12:16, NW, atuaruk). * Qujasuitsuunera qanoq erser­pa? Eer­taasat akigalugit angajul­lius­sutsini nuk­kaminut, Jaakumut, tunivaa. (1 Mos 25:30-34) Kingor­na Esauip aalajangik­kani taman­na peq­qis­simis­sutigingaar­paa, pigisanili qujamasuutigin­ngin­namigit angajul­liliatut pisin­naatitaaf­fimi pil­luaq­qus­sutisiarin­ngin­nera naam­magit­taal­liutigisin­naan­ngilaa.

12-13. Israelik­kut qujasuitsuuner­tik qanoq ersersip­paat, qanorlu taman­na kinguneqar­pa?

 ¹² Israelikkut qujamasun­nermik ersersitsinis­samin­nut pis­sutis­sar­pas­suaqar­put. Egyptenimiunik qulinik perlus­sior­titsereerluni Israelik­kut inus­siaataanermit Jehovap aniguisip­pai. Kingusin­nerusuk­kul­lu Egyptenimiut sak­kutuui Im­mami Aap­palaar­tumi ajugaaf­figinerisigut ajunaar­nermit aniguisip­pai. Israelik­kut ima qujamasutsigip­put al­laat ajugaanermik erinarsuum­mik Jehova un­nersiutigalugu. Qujamasut­tuar­pal­li?

¹³ Al­lanik unam­miniagas­saqaleramik Jehovap nam­min­neq pil­lutik iliuusii tamaasa puiupal­lap­paat, taamaalil­lutil­lu qujasuitsuuner­tik ersersil­lugu. (Tuss 106:7) Qanoq pisoqarami? Israelik­kut tamarmik “naam­magit­taal­liorlutik Mosesimut Aronimul­lu oqalorujuler­put”, taamaalior­neral­li Jehovamut oqalorujun­neruvoq. (2 Mos 16:2, 8) Qujamasun­nermin­nik ersersitsin­ngim­mata Jehova pakatsingaar­poq. Kingusin­nerusuk­kut siulit­tuutigaa Israelik­kut taak­ku tamarmik, Josva Kalebilu minil­lugit, inoqajuitsumi toqus­sasut. (4 Mos 14:22-24; 26:65) Maligas­siuinerlut­tut pin­nagit maligas­siuil­luar­tut qanoq ilaarsin­naanerivut sam­meriar­tigu.

14-15. (a) Aap­pariit im­min­nut qujamasun­ner­tik qanoq ersersis­sin­naavaat? (b) Angajoq­qaat meeq­qatik qujamasun­nermik ersersitsinis­samik qanoq ilin­niar­tis­sin­naavaat?

¹⁴ Ilaqutariinni. Ilaqutariin­ni qujamasun­nermik ersersitsineq tamatigut iluaqutaasar­poq. Aap­pariit im­min­nut akulikitsumik qujamasun­nermik ersersitsigaangamik qanin­neruler­tar­put. Aam­ma isumak­keerfigeqatigiin­nis­sar­tik ajor­nan­ngin­nerutilis­savaat. Uiusup qujamasut­tup nuliani ajun­ngitsumik iliuuseqar­toq oqaaseqar­torlu maluginiaan­nar­nagu “nersualaar­tar­paa”. (Uss 31:10, 28) Nuliaasul­lu silatuup uini paasitit­tar­paa sor­piaat qujamasuutiginerlugit.

¹⁵ Angajoq­qaajususi, meeq­qasi qujamasun­nermik ersersitsinis­samik qanoq ilin­niar­tis­sin­naavisigit? Meeq­qat angajoq­qaamik iliuusiinik oqaasiinil­lu ilaarsisarmata eq­qaamasariaqar­parsi meeq­qas­si ikioraangasi qujaf­figisar­nis­saat. Aam­ma oqarfigisin­naavasi inun­nit al­lanit ikior­neqaraangamik qujasas­sasut. Paasitis­sigit qaman­nga pisumik qujamasut­tariaqar­tut oqaasiilu al­lanut iluaqutaasin­naasut. Ar­naq inuusut­toq Clarymik atilik oqar­poq: “Anaanaga 32-nik ukioqarluni ilimagin­ngisamik kisimiil­luni meeq­qanik pingasunik  perorsaasus­san­ngor­poq. Nam­mineq 32-liigama eq­qarsaatigiler­para taman­na qanoq anaanan­nut ar­tor­nar­tigisimas­sasoq. Taamaam­mat qatan­ngutin­nik uan­nil­lu perorsaaniarluni pil­liutigisimasai pil­lugit qutsavigaara. Qanit­tuk­kut oqarfigaanga oqaatsit taak­ku puiun­ngisaan­narsimal­lugit. Akulikitsumik eq­qarsaatigisar­nerar­pai nuan­naalis­sutiginerar­tarlugil­lu.”

16. Qujamasun­nermik ersersitsinerup qiim­mas­saataasar­neranik as­sersuuteqarit.

¹⁶ Ilagiinni. Qatan­ngutivut qujamasun­nermik ersersitsivigigaangatsigit qiim­mas­sar­tar­pavut. As­sersuutigalugu Jorge, utoq­qaaner­taq 28-nik ukiulik, ima nap­parsimaler­tigaaq al­laat qaam­mat ataaseq ataatsimiigiarsin­naanani. Ataatsimiigiar­talereeraluarluni pisas­saqar­nis­sani suli saper­nar­tip­paa. Jorge ima oqar­poq: “Pisin­naasak­ka kil­leqarmata ilagiin­nilu akisus­saaf­fiit naam­mas­sisin­naan­ngin­nak­kit naleqan­ngitsutut misigiler­punga. Taamaal­luni ataatsimeereerluta qatan­ngutip angutip oqarfigaanga: ‘Ilaqut­tan­nut maligas­siuigavit qujas­sutis­saqarfigaak­kit. Ukiuni kingul­ler­ni oqalugiaatigisar­tak­katit nuan­naarutigisimaqaavut anersaak­kul­lu ineriar­tuutigalugit.’ Kil­litsingaarama qul­lilivunga. Oqaatsit taak­ku tusar­nis­saat pisariaqar­tivis­simavak­ka.”

17. Kolos­semiut 3:15-imi al­laatigineqar­tutut Jehovap tuk­kor­tuuneranut qujamasun­ner­put qanoq ersersis­sin­naavar­put?

¹⁷ Guutitsin­nut tuk­kor­tumut. Jehovap anersaak­kut inuus­sutis­satsin­nik naam­mat­tunik tunisar­paatigut. As­sersuutigalugu ataatsimiin­nitsin­ni, atuagas­siaatitsin­ni nit­tar­tak­katsin­nilu iluaqutigisatsin­nik ilin­niar­tit­tar­paatigut. Oqalugiaam­mik tusar­naareerlutit, al­laaserisamik atuareerlutit imaluun­niit filmimik isigin­naareerlutit ima eq­qarsar­nikuuit: ‘Tas­sa pisariaqar­titara’? Jehovamut qujamasun­ner­put qanoq ersersis­sin­naavar­put? (Kolossemiut 3:15 atuaruk). Taamaaliorsin­naavugut tunis­suter­pas­sui pil­lugit qutsavigisar­neratigut. – Jaak 1:17.

18. Naalagaaf­filersaarfitsin­nik pingaar­titsiner­put qanoq ersersis­sin­naavar­put?

¹⁸ Aam­ma pal­lorfigin­nit­tarfit­ta eq­qiluitsuutin­neratigut Jehovamut qujamasun­ner­put ersersis­sin­naavar­put. Naalagaaf­filersaarfim­mik aserfal­latsaaliuinermi eq­qiaanermilu akulikitsumik peqataasar­pugut. Ilagiit elektronik­kik­kut ator­toris­saarutaan­nik atuisut mianersorlutik atuisar­put. Naalagaaf­filersaarfip­put peq­qis­saar­tumik aserfal­latsaalioraangatsigu  iluarsar­tuut­tariaqar­nera akut­tuneruler­tar­poq. Taamaalil­luta aningaasat nunarsuaq tamak­kerlugu naalagaaf­filersaarfin­nik al­lanik iluarsar­tuus­sinis­samut sanaar­tor­nis­samul­lu atorsin­naalis­savavut.

19. Ilagiin­nik nak­kutil­liisup nuliatalu misigisaanit suna ilik­kar­piuk?

¹⁹ Uagut pil­luta ilunger­sor­tunut. Qujamasun­ner­put oqaatsitsigut ersersik­kaangatsigu inuup unam­miniar­nar­titani pil­lugit isigin­nit­taasia al­lan­ngorsin­naavoq. Ilagiin­nik nak­kutil­liisup nuliatalu misigisaat eq­qarsaatigiuk. Ukiuk­kut ul­loq tamaat oqaluus­sereerlutik qasul­lutik inigisamin­nut uter­put. Un­nuk taan­na is­sim­mat nulia kavaajalerluni sinit­tariaqarsimavoq. Ul­laak­kut uini oqarfigaa misigaluni angalasar­tutut kif­far­tor­nini unitsit­tariaqarlugu. Ul­laal­li ingerlanerani im­mik­koor­tor­taqarfim­min­ngaan­niit al­lagarsivoq. Kif­far­tor­nini piner­tusaar­ninilu pil­lugit al­lak­kani nersualaar­neqar­poq. Al­las­simavoq paasinar­toq sapaatip-akun­neri tamaasa nuut­tar­ner­tik ilungersunarip­pas­suk. Uia oqar­poq: “Nersualaar­neqar­nini kil­litsis­sutigingaaramiuk angalasar­tutut kif­far­torun­naar­nis­saq eq­qar­toq­qin­ngilaa. Al­laam­mi uanga unik­kusuleraangama ingerlaan­nar­nis­samut kajumis­saar­tar­paanga.” Aap­pariit taak­ku ukiut 40-ngajaat angalasar­tutut kif­far­tor­put.

20. Ul­lut tamaasa sapin­ngisatsin­nik susariaqar­pugut, aam­ma sooq?

²⁰ Qanor­toq tamat­ta qujamasun­nitsin­nik oqaatsitsigut iliuutsitsigul­lu ul­lut tamaasa ersersitsisarisa. Qaman­nga pisumik taamaaliorut­ta imaas­sin­naavoq inoqater­put silarsuarmi qujasuitsumi ul­lormi tas­saner­piaq piner­tusaarsin­naalis­sasoq. Qujamasun­nitsin­nil­lu ersersitsiner­put naas­saan­ngitsumik ikin­nguteqalis­sutigisin­naavar­put. Pingaar­ner­tul­lu, Ataatar­put tuk­kor­toq qujamasut­torlu, Jehova, ilaas­savar­put.