1. Aw wan Samɛritan man we Jizɔs bin mɛn sho se i rili gladi fɔ wetin Jizɔs du?

DI TƐN man dɛn bin gɛt bad bad sik. Dɛn bin gɛt lɛprɔsi, ɛn dɛn nɔ bin gɛt ɛni op fɔ se dɛn go wɛl. Bɔt wande, dɛn si Jizɔs, we na di Gret Ticha fa say. Dɛn bin dɔn yɛri se Jizɔs de mɛn ɔlkayn sik, ɛn dɛn biliv tranga wan se i go ebul mɛn dɛnsɛf. So dɛn kray to Jizɔs se: “Masta! Jizɔs! duya, sɔri fɔ wi!” Di tɛn man dɛn bin wɛl. Wi nɔ gɛt wan dawt fɔ se dɛn ɔl bin gladi fɔ di gud tin we Jizɔs bin du fɔ dɛn. Bɔt wan pan dɛn nɔ bin jɔs fil gud fɔ wetin Jizɔs du, i bin sho di we aw i gladi * bay wetin i bin du. Da Samɛritan man we Jizɔs bin mɛn bin “de ala big wan” de prez Gɔd ɛn tɛl am tɛnki.—Lyuk 17:​12-19.

2-3. (a) Wetin mek wi nɔ kin tɛl ɔda pipul dɛn tɛnki? (b) Wetin wi go tɔk bɔt insay dis atikul?

² Jɔs lɛk da Samɛritan, wi want fɔ tɛl tɛnki to di wan dɛn we de du gud to wi. Bɔt sɔntɛnde, wi kin fɔgɛt fɔ se tɛnki ɔ fɔ sho ɔda pipul dɛn aw wi fil bɔt di gud tin we dɛn du fɔ wi.

³ Insay dis atikul, wi go tɔk bɔt wetin mek i impɔtant fɔ lɛ wi prez ɔ tɛl ɔda pipul dɛn tɛnki bay wetin wi de tɔk ɛn wetin wi de du. Wi go lan frɔm sɔm pipul dɛn ɛgzampul we di Baybul tɔk bɔt we bin tɛl tɛnki, ɛn di wan dɛn we nɔ bin tɛl tɛnki. Dɔn wi go tɔk bɔt sɔm patikyula we dɛn we wi go prez ɛn tɛl ɔda pipul dɛn tɛnki.

4-5. Wetin mek wi fɔ tɛl ɔda pipul dɛn tɛnki?

⁴ Jiova sɛt di ɛgzampul fɔ wi fɔ de tɛl ɔda pipul dɛn tɛnki. Wan we we i kin du dat na bay we i de blɛs di wan dɛn we de du wetin i want. (2 Sam. 22:​21; Sam 13:​6; Mat. 10:​40, 41) Ɛn di Baybul ɛnkɔrej wi fɔ “tan lɛk” Gɔd bikɔs wi na in pikin dɛn we i lɛk. (Ɛfi. 5:​1) So wan men rizin we mek wi fɔ tɛl ɔda pipul dɛn tɛnki na bikɔs wi want fɔ falamakata Jiova in ɛgzampul.

⁵ Tink bɔt wan ɔda rizin we mek wi want fɔ tɛl ɔda pipul dɛn tɛnki. Fɔ tɛl ɔda pipul dɛn tɛnki tan lɛk gud it. Wi kin ɛnjɔy gud it mɔ we wi de it am wit ɔda pipul dɛn. We wi no se ɔda pipul dɛn gladi fɔ wetin wi de du, dat de mek wi gladi. We wi tɛl ɔda pipul dɛn tɛnki, wi de mek dɛn gladi. Di pɔsin we wi de tɛl tɛnki go no se wetin i du fɔ ɛp wi ɔ di tin we wi nid we i gi wi rili ɛp wi. Ɛn dat de mek wi padi biznɛs wit da pɔsin de tayt mɔ ɛn mɔ.

6. Aw di wɔd dɛn we wi de yuz fɔ tɛl ɔda pipul dɛn tɛnki tan lɛk apul we dɛn mek wit gold?

⁶ Di wɔd dɛn we wi de yuz fɔ tɛl ɔda pipul dɛn tɛnki rili impɔtant. Di Baybul tɔk se: “Ɛni wɔd we yu tɔk di rayt tɛm tan lɛk we yu tek gold mek fayn dizayn pan silva sɛtin.” (Prɔv. 25:​11) Imajin aw apul we dɛn mek wit gold kin fayn we yu put am pan silva sɛtin! Ɛn jɔs tink bɔt aw i valyu! Aw yu go fil if dɛn gi yu da kayn gift de? Na so di wɔd dɛn we yu de yuz fɔ tɛl ɔda pipul dɛn tɛnki kin valyu. Ɛn tink bɔt dis: Apul we dɛn mek wit gold kin de fɔ lɔng tɛm. Semweso, pipul dɛn go mɛmba ɔltɛm di wɔd dɛn we wi de yuz fɔ tɛl dɛn tɛnki, ɛn dɛn kin valyu am.

7. Frɔm wetin de na Sam 69:​30, aw Devid ɛn di ɔda man dɛn we rayt di Sam buk bin tɛl tɛnki?

⁷ Bɔku pan Gɔd in savant dɛn we bin de trade bin de tɛl tɛnki. Wan pan dɛn na Devid. (Rid Sam 69:​30.) I bin rili valyu tru wɔship ɛn wi si dis pan di tin dɛn we i bin de du. I bin gi bɔku bɔku valyu tin dɛn fɔ lɛ dɛn yuz am fɔ bil di tɛmpul. Esaf in granpikin dɛn bin tɛl tɛnki bay we dɛn bin rayt sam dɛn ɔ siŋ dɛn fɔ prez Jiova. Insay wan pan di siŋ dɛn, dɛn bin tɛl Gɔd tɛnki ɛn tɛl am aw dɛn de kɔle di “wɔndaful tin dɛn” we i de du. (Sam 75:​1) Fɔ tru, Devid ɛn Esaf in granpikin dɛn bin want fɔ tɛl Jiova aw dɛn rili gladi fɔ ɔl di we dɛn we i dɔn blɛs dɛn. Yu tink bɔt we dɛn we yu go falamakata dɛn man dɛn ya we rayt di Sam buk?

8-9. Aw di apɔsul Pɔl bin sho se i gladi fɔ in brɔda ɛn sista dɛn? Wetin go dɔn apin we i du dat?

⁸ Di apɔsul Pɔl bin valyu in brɔda ɛn sista dɛn, ɛn i bin sho dis bay di we aw i bin de tɔk bɔt dɛn. I bin de tɛl Gɔd tɛnki fɔ dɛn ɔltɛm we i de pre in wangren. I bin mek dɛn no bak aw dɛn impɔtant to am bay wetin i bin de rayt to dɛn. Insay di fɔs 15 vas dɛn na Lɛta fɔ Rom 16 (NW), Pɔl bin tɔk bɔt 27 pan in kɔmpin Kristian dɛn ɛn i bin kɔl dɛn ɔl bay nem. Pɔl bin mɛmba se Prisila ɛn Akwila bin “put dɛn layf pan denja” fɔ am, ɛn i bin tɔk bɔt Fibi se “insɛf dɔn ɛp bɔku pipul dɛn” ivin Pɔl insɛf. Pɔl bin tɛl di brɔda ɛn sista dɛn tɛnki fɔ di tranga wok we dɛn bin de du.—Rom 16:​1-15, NW.

⁹ Pɔl bin no se in brɔda ɛn sista dɛn nɔ pafɛkt, bɔt we i bin de dɔn di lɛta we i bin de rayt to di Roman pipul dɛn, i disayd fɔ pe atɛnshɔn pan dɛn gud kwaliti dɛn. Imajin aw dɛn brɔda ɛn sista dɛn de bin fil we dɛn yɛri dɛn de rid to di kɔngrigeshɔn di tin dɛn we Pɔl bin tɔk bɔt dɛn. Dat go mɔs dɔn ɛnkɔrej dɛn. Dis go dɔn mek dɛn padi biznɛs wit Pɔl tayt mɔ ɛn mɔ. Yu kin sho se yu gladi fɔ di gud tin dɛn we yu brɔda ɛn sista dɛn na di kɔngrigeshɔn de tɔk ɛn du?

10. Wetin wi lan frɔm di we aw Jizɔs bin prez in disaypul dɛn?

¹⁰ Insay di mɛsej we Jizɔs bin sɛn to sɔm kɔngrigeshɔn dɛn na Eshia Maynɔ, i bin sho se i rili gladi fɔ di wok we in disaypul dɛn bin de du. Fɔ ɛgzampul, we i bin de rayt to di kɔngrigeshɔn na Tayatira, i bin tɔk se: “A no di tin dɛn we una de du, a no se una lɛk pipul ɛn una nɔ lɛf fɔ biliv pan mi, una de wok wit ɔl una at ɛn una de bia insay di waala we de mit una. Ɛn a no se dɛn tin we una de du naw bɛtɛ pas di tin dɛn we una bin de du fɔstɛm.” (Rɛv. 2:​19) Jizɔs nɔ bin jɔs tɔk bɔt di bɔku wok we dɛn de du, bɔt i prez dɛn bak fɔ di kwaliti dɛn we dɛn gɛt we de ɛp dɛn fɔ du gud tin dɛn. Pan ɔl we Jizɔs bin nid fɔ advays sɔm pan dɛn na Tayatira, i bin stil stat ɛn dɔn in lɛta wit ɛnkɔrejmɛnt. (Rɛv. 2:​25-28) Mɛmba se na Jizɔs de oba ɔlman na ɔl di kɔngrigeshɔn dɛn. I nɔ nid fɔ tɛl wi tɛnki fɔ di wok we wi de du fɔ am. Bɔt pan ɔl dat, i de sho se i gladi fɔ wetin wi de du. Dis na fayn ɛgzampul i sɛt fɔ di ɛlda dɛn!

11. Frɔm wetin de na Di Ibru Pipul Dɛn 12:​16, aw Isɔ bin sho se i nɔ gɛt wan rɛspɛkt fɔ Gɔd biznɛs?

¹¹ I sɔri fɔ no se sɔm pan di pipul dɛn we di Baybul tɔk bɔt nɔ bin tɛl tɛnki. Fɔ ɛgzampul, pan ɔl we Isɔ in mama ɛn papa bin lɛk ɛn rɛspɛkt Jiova, in nɔ bin sho wan rɛspɛkt fɔ Gɔd biznɛs. (Rid Di Ibru  Pipul Dɛn 12:​16.) Aw Isɔ bin sho se i nɔ gɛt wan rɛspɛkt fɔ Gɔd biznɛs? Isɔ bin sɛl in rayt as fɔs bɔy pikin to in smɔl brɔda fɔseka wan bol sup. (Jɛn. 25:​30-34) Leta, Isɔ bin rili rigrɛt wetin i bin du. Bɔt i nɔ bin valyu wetin i bin gɛt, so i nɔ nid fɔ kɔmplen we i nɔ gɛt in rayt as fɔs bɔy pikin.

12-13. Aw di Izrɛlayt dɛn bin sho se dɛn nɔ gɛt wan tɛnki? Wetin bin apin we dɛn bin du dat?

¹² Di Izrɛlayt dɛn bin gɛt bɔku rizin fɔ tɛl tɛnki. Jiova bin fri dɛn di tɛm we dɛn na bin slev bay we i bin briŋ kam tɛn bad bad tin dɛn pan di Ijipshian dɛn. Dɔn, Gɔd bin sev dɛn frɔm prɔblɛm bay we i dɔnawe wit ɔl di Ijipshian sojaman dɛn na di Rɛd Si. Di Izrɛlayt dɛn bin rili gladi, ɛn dat bin mek dɛn bin siŋ wan siŋ fɔ prez ɛn tɛl Jiova tɛnki. Bɔt fɔ se dɛn bin kɔntinyu fɔ tɛl tɛnki?

¹³ We di Izrɛlayt dɛn bin gɛt nyu prɔblɛm dɛn, dɛn bin kwik fɔ fɔgɛt ɔl di gud tin dɛn we Jiova bin dɔn du fɔ dɛn. Dɛn bin sho se dɛn nɔ gɛt wan tɛnki. (Sam 106:​7) Aw? Na bay we “di pipul dɛn bigin grɔmbul pan Mozis ɛn Erɔn.” Bɔt rili, na pan Jiova dɛn bin de grɔmbul. (Ɛks. 16:​2, 8) Jiova bin fil bad bɔt di kayn we aw di pipul dɛn bin biev. Ɛn leta Jiova bin tɔk se da wan ol gɛnɛreshɔn de go day na di ɛmti land usay pɔsin nɔ go ebul fɔ liv, pas Jɔshwa ɛn Kelɛb nɔmɔ na dɛn go sev. (Nɔm. 14:​22-24; 26:​65) Lɛ wi si aw wi go avɔyd dɛn bad ɛgzampul dɛn ya ɛn falamakata di gud wan dɛn.

14-15. (a) Aw maredman ɛn mareduman dɛn go sho se dɛn gladi fɔ dɛnsɛf? (b) Aw mama ɛn papa dɛn go tich dɛn pikin dɛn fɔ tɛl tɛnki?

¹⁴ Insay di famili. Di wan ol famili kin bɛnifit if ɔlman de tɛl tɛnki. Di mɔ we maredman ɛn mareduman dɛn de tɛl dɛnsɛf tɛnki, na di mɔ dɛn de lɛk dɛnsɛf. Dɛn go si se bak i izi fɔ fɔgiv dɛnsɛf we dɛn mek mistek. Maredman we de tɛl in wɛf tɛnki nɔ de jɔs notis di gud tin dɛn we i de tɔk ɛn du, bɔt i “de prez am” bak. (Prɔv. 31:​10, 28) Ɛn mareduman we gɛt sɛns de mek in man no di patikyula tin we i de tɛl am tɛnki fɔ.

¹⁵ Mama ɛn papa dɛn, aw una go tich una pikin dɛn fɔ tɛl tɛnki? Mɛmba se yu pikin dɛn go falamakata wetin yu de tɔk ɛn du. So sɛt fayn ɛgzampul bay we yu de tɛl yu pikin dɛn tɛnki we dɛn du sɔntin fɔ yu. Dɔn bak, tich yu pikin dɛn fɔ se tɛnki  ɛnitɛm we pipul dɛn du sɔntin fɔ dɛn. Ɛp yu pikin dɛn fɔ ɔndastand se fɔ tɛl tɛnki fɔ kɔmɔt frɔm dɛn at, ɛn di wɔd dɛn we dɛn de tɔk kin du gud to ɔda pipul dɛn. Fɔ ɛgzampul, wan yɔŋ uman we nem Klari bin tɔk se: “We mi mama bin ol 32 ia, na in wangren bin de fɔ mɛn tri pikin dɛn. Wi papa nɔ bin de na os wit wi. We a ol 32 ia, a bin tink bɔt aw i nɔ bin izi fɔ mi mama we i bin de da sem ej de. So a bin tɛl am tɛnki fɔ ɔl di sakrifays dɛn we i mek fɔ mɛn mi ɛn mi brɔda dɛn. I nɔ tu te yet we i tɛl mi se di wɔd dɛn we a bin tɔk stil valyu to am, i kin tink bɔt dɛn ɔltɛm, ɛn dɛn de mek i gladi ɔltɛm.”

16. Gi wan ɛgzampul bɔt aw wi de ɛnkɔrej ɔda pipul dɛn we wi tɛl dɛn tɛnki?

¹⁶ Insay di kɔngrigeshɔn. We wi de tɛl wi brɔda ɛn sista dɛn tɛnki, dat go ɛnkɔrej dɛn. Fɔ ɛgzampul, Jɔge we na wan ɛlda we ol 28 ia bin sik siriɔs wan. Fɔ lɛk wan mɔnt so, i nɔ bin de ebul fɔ atɛnd di mitin dɛn. Pan ɔl we i bin bigin fɔ atɛnd di mitin dɛn bak, i nɔ bin stil ebul fɔ du pat dɛn na di mitin. Jɔge bin tɔk se: “A bin fil lɛk se a nɔ gɛt wan valyu bikɔs nɔto ɔltin a bin ebul fɔ du, ɛn a nɔ bin ebul fɔ du wok dɛn na di kɔngrigeshɔn. Bɔt wande afta wan mitin, wan brɔda bin tɛl mi se: ‘A want fɔ tɛl yu tɛnki fɔ di fayn ɛgzampul we yu dɔn sɛt fɔ mi famili. Wi bin de rili ɛnjɔy yu tɔk dɛn trade. Dɛn tɔk dɛn de dɔn ɛp wi fɔ gɛt fet mɔ ɛn mɔ.’ Wetin i tɔk bin rili tɔch mi at, ɛn kray wata fulɔp mi yay. Na dɛn wɔd dɛn de a bin rili nid fɔ yɛri.”

17. Frɔm wetin de na Lɛta fɔ Kɔlɔse 3:​15 (NW), aw wi go sho se wi gladi fɔ ɔl di gud tin dɛn we Jiova dɔn gi wi?

¹⁷ To wi Gɔd we fri-an. Jiova dɔn gi wi bɔku tin dɛn fɔ lan bɔt am. Fɔ ɛgzampul, wi kin gɛt tin dɛn we de ɛp wi fɔ no bɔt am na wi mitin dɛn, wi magazin dɛn, ɛn wi wɛbsayt dɛn. Yu dɔn ɛva lisin to wan tɔk, rid wan atikul, ɔ wach wan JW TV program ɛn tɔk se, ‘Dis na wetin a bin nid’? Aw wi go sho se wi gladi fɔ ɔl wetin Jiova de du fɔ wi? (Rid Lɛta fɔ Kɔlɔse 3:​15, NW.) Wan we na bay we wi de pre to am ɛn tɛl am tɛnki fɔ dɛn fayn gift dɛn ya.—Jems 1:​17.

18. Us we dɛn wi go sho se wi gladi fɔ wi Kiŋdɔm Ɔl dɛn?

¹⁸ Wi go sho bak se wi gladi fɔ wetin Jiova de gi wi bay we wi de klin di say we wi de wɔship ɛn mek am fayn. Wi fɔ de go  ɔltɛm fɔ klin ɛn mek di say dɛn we dɔn pwɛl na wi Kiŋdɔm Ɔl dɛn, ɛn di wan dɛn we de wok wit di ilɛktronik tin dɛn na di kɔngrigeshɔn fɔ tek tɛm mek dɛn nɔ pwɛl dɛn. We wi de kia fɔ wi Kiŋdɔm Ɔl dɛn fayn fayn wan, dɛn go de fɔ lɔng tɛm ɛn wi nɔ go nid fɔ de mek di say dɛn we dɔn pwɛl ɔltɛm. Bay da we de, wi go gɛt mɔ mɔni fɔ bil ɛn mek di say dɛn we dɔn pwɛl na ɔda Kiŋdɔm Ɔl dɛn ɔlsay na di wɔl.

19. Wetin yu lan frɔm wan sakit ovasia ɛn in wɛf dɛn ɛkspiriɛns?

¹⁹ To di wan dɛn we de wok tranga wan fɔ wi. We wi sho se wi gladi fɔ wetin ɔda pɔsin du, wetin wi de tɔk kin chenj di we aw di pɔsin de fil bɔt di prɔblɛm dɛn we i de gɛt. Tink bɔt wan sakit ovasia ɛn in wɛf dɛn ɛkspiriɛns. Afta dɛn dɔn prich fɔ lɔng tɛm ɔnda kol, dɛn kam bak na dɛn os taya taya wan. Bikɔs di ples bin rili kol, di uman go slip wit in kot we i kin wɛr fɔ kol. Na mɔnin, i tɛl in man se i nɔ fil se i go ebul fɔ kɔntinyu fɔ du di sakit wok igen. Leta da sem mɔnin de, dɛn gɛt wan lɛta frɔm di branch ɔfis, ɛn na to di uman dɛn rayt am. Insay di lɛta, dɛn tɛl am plɛnti tɛnki fɔ we i de prich ɛn di bia we i de bia. Di brɔda dɛn gri se i nɔ izi fɔ muv frɔm wan os to ɔda os ɛni wik. Dis sista in man tɔk se: “Mi wɛf rili gladi we dɛn tɛl am tɛnki, ɛn i nɔ ɛva tɔk se i want lɛ wi lɛf di sakit wok igen. Infakt bɔku tɛm, na in kin ɛnkɔrej mi fɔ kɔntinyu we a kin tink bɔt fɔ lɛf di sakit wok.” Da brɔda ɛn in wɛf bin kɔntinyu fɔ du di sakit wok fɔ lɛk 40 ia.

20. Wetin wi fɔ tray fɔ du ɛnide? Wetin mek?

²⁰ Ɛnide, lɛ wi tray fɔ de tɛl tɛnki to ɔda pipul dɛn bay wetin wi de se ɛn du. Di fayn wɔd dɛn we wi de tɔk ɔ wetin wi de du go bi wetin di ɔda pɔsin nid fɔ mek i bia wit di prɔblɛm dɛn we i de gɛt na dis wɔl usay bɔku pipul dɛn nɔ de tɛl tɛnki. Ɛn we wi de tɛl tɛnki, dat go mek wi gɛt tayt padi biznɛs we go de sote go wit ɔda pipul dɛn. Wetin impɔtant pas ɔl na dat, wi go falamakata wi Papa, Jiova we gɛt fri-an ɛn we de gladi fɔ ɛnitin we wi du.