1. Yisinke ga rugene Musamaliya apa ga mwene asi ana veruka?

VAGARA murongo kwa kere moukaro woudigu. Awo kwa kere noyingondwe ntani kapi va kere nehuguvaro asi ezuva limwe ngava veruka. Nye ezuva limwe awo kwa mwene Murongi gomunene koure. Awo kwa kere nehuguvaro asi Jesus nava verura morwa va zuvhire asi age nga verura mauvera nagenye. Awo tava zigire asi “Jesus, murongi, tu fira nkenda!” Vagara navenye owo murongo kwa verukire. Navenye va kere norupandu konkenda ezi ga va likidire Jesus. Nye gumwe tupu ga pandwire * Jesus. Mugara ogo goMusamaliya apa ga mwene asi ana veruka, ya mu tumangedere a fumadeke Karunga “nezwi lyenene.”—Ruk. 17:12-19.

2-3. (a) Morwasinke atu lidivarere kulikida rupandu poyiruwo yimwe? (b) Yisinke natu ka lironga mosirongwa esi?

² Ngwendi Musamaliya, nose tuna hara kupandura vantu ava ava tu ruganene uwa. Nye poyiruwo yimwe kuvhura tu divare kupandura wopeke.

³ Mosirongwa esi, tatu ka zogera eyi ya kerera nomulyo tu ‘pandure nkenye apa.’ Ta tu ka zogera yihonena yimwe yomoBibeli yovantu ava va likidire rupandu nava va dilire kulikida rupandu. Ntani natu ka lironga nonkedi dimwe omu nose natu likida rupandu.

4-5. Morwasinke natu likidira rupandu?

⁴ Jehova kwa tu tulira po sihonena sokulikida rupandu. Nkedi zimwe omu a yi rugana kuna kara pokutungika ava ava mu hafesa. (2 Sam. 22:21; Epis. 13:6; Mat. 10:40, 41) Ntani Matjangwa kutukorangeda tu “heteke nye kukara moomu ga kara” Karunga. (Efe. 5:2) Yipo nye, konda zomulyo po zeyi natu likidira rupandu morwa tuna hara kuhonena Jehova.

⁵ Tu tareni konda zimwe hena zeyi natu likidira rupandu kwava wopeke. Kulikida rupandu kwa fana ngwendi nondya edi vana kulya kumwe. Ose kuhafa apa ava tu pandura wopeke. Ntani apa atu pandura wopeke nawo kuhafa. Nsene tu pandura gumwe, age kuyadimburura asi eyi ga tu ruganena ndi eyi ga tu pa, kwa tu vatera. Ano konyima elikwatakano lyetu nomuntu ogo nga li ya nkondopara.

6. Ngapi omu nonkango detu da fana ngwendi siapera songorodo?

⁶ Mulyo kupandura wopeke. Bibeli kutanta asi: “Nonkango edi vana uyunga nawa, kwa fana ngwendi siapere songorodo esi vana tura posiyaha sokulimbagura sosisiliveli.” (Yis. 25:11) Gazara tupu omu nasi moneka siapera songorodo posiyaha sosisiliveli. Yosili aso mulyo unene. Ngapi omu no lizuvha nsene gumwe a ku pa uhwi wangoso? Mokulifana nonkango detu dorupandu kwa kara nomulyo ngwendi siapera oso. Ngwendi moomu tupu siapera songorodo asi kara siruwo sosire, nonkango detu dorupandu nado kapi nga di divara usimbu muntu ogu tuna ku di tantera.

7. Kuliza nEpisarome 27:4, ngapi omu Ndafita novatjangi vamwe woMapisarome va likidire rupandu?

⁷ Sinzi sovakareli vaJehova womosiruwo sanare ngava likida rupandu. Ndafita kuna kara gumwe gwawo. (Resa Episarome 30:12.) Age nga tara ukareli wousili asi sininke somulyo, ano eyi kuyimonenena mweyi ga rugene. Age kwa geve emona lyendi lyenzi yipo va tungise ko ntembeli. Woruvharo rwaAsafa nawo kwa likidire rupandu pokutjanga mapisarome ndi nonsumo dehamberero. Morusumo rumwe awo kwa tangaukire Jehova koyirugana yendi yoyinene. (Epis. 75:1) Ndafita ntani woruvharo rwaAsafa kwa likidire rupandu kwaJehova kweyi ga va ruganena. Kuvhura nove o gazadare ko nonkedi dimwe omu no honena vagara owo pokulikida rupandu ndi?

8-9. Ngapi omu Paurusa ga likidire rupandu kovapuli vakwawo ntani yitundwamo musinke ya kere?

⁸ Mupositoli Paurusa kwa here vapuli vakwawo ntani kwa va pandwire kupitira mweyi nga uyunga. Age nkenye apa nga pandura Karunga kweyi ga kere novapuli vakwawo. Age nga va pandura hena kupitira monombilive edi ngava tjangere. MoVaroma 16:1-15, Paurusa kwa tumbura mo madina govapuli vakwawo wokusika po-27. Paurusa kwa tente asi Pilisikiraa naAkura kwa geve “nomwenyo dawo” va popere mwenyo gwendi ntani age kwa tente asi Foibe “nga kwafa” wovanzi kukwatera mo naPaurusa. Age kwa pandwire vapuli vakwawo ava ngava rugana unene.

⁹ Paurusa ga yi divire asi vapuli vakwawo kapi va sikilira mo nye age kwa hulisire mbilive zendi pokudemenena koyikara yawo yoyiwa. Gazara tupu omu va lizuvhire vapuli vakwawo apa va va reserere mbilive ezi mombungakriste. Tuna si huguvara asi eyi kwa nkondopekere ukaume wawo naPaurusa. Nove kupandura vapuli vakweni womombungakriste zeni kweyi ava ku ruganene ndi?

10. Yisinke natu lirongera ko kosihonena saJesus sokupandura varongwa vendi?

¹⁰ Jesus kwa pandwire yirugana yovarongwa vendi mombudi zendi ezi ga tjangerere nombungakriste domoAsia zonunu. Pasihonena, age kwa tjangerere mbungakriste zomoTiyatira asi: “Yirugana yoge na yi diva neharo lyoge nepuro lyoge noukereli woge nedidimiko lyoge noyirugana yoge yomoruhura asi ya pitakana yomuhowo.” (Ehor. 2:19) Jesus kapi tupu ga tumbwire yirugana yawo yoyiwa nye hena kwa va pandadekere morwa yikara yawo yoyiwa. Nampili ngomu ga pukwilire Vakriste vamwe womoTiyatira, age kwa tamekere nokuhagesa mbudi zendi nepandadeko. (Ehor. 2:25-28) Gazara kositumbukira esi ga kara naso Jesus ngomutwe gombungakriste. Kapisi hepero ngano a tu pandure kweyi atu mu ruganene, Nye age kuyirugana. Age kwa tura po sihonena sosiwa kovakuronambunga.

11. Ngomu va yi likida moVahebeli 12:16, ngapi omu Esau ga tere yininke yopampepo?

¹¹ Vantu vamwe va tumbura moBibeli kapi va likidire rupandu. Pasihonena, nampili ngomu Esau va mu rerere vakondi ava va here Jehova, age kapi ga kere norupandu koyininke yopampepo. (Resa Vahebeli 12:16.) Ngapi omu nkareso zendi za likidire asi kapi ga kere norupandu? Esau kwa randesere umbeli wendi kwa mumbyendi Jakopo norupwihira romakunde. (Gen. 25:30-34) Nye konyima Esau kwa liverere ketokoro eli ga tulire po. Esau kapi ga kere nokonda zokusivana kweyi ga dilire kugwana matungiko goumbeli  morwa kapi ga kere norupandu koyininke eyi ga kere nayo.

12-13. Ngapi omu Vaisraeli va yi likidire asi kapi va kere norupandu ntani yitundwamo musinke ya kere?

¹² Vaisraeli va kere nonokonda dononzi deyi va heperere kulikida rupandu. Jehova kwa zowere Vaisraeli moupika konyima zapa ga tuminine vaEgipite mahepeko murongo. Ntani Jehova ga va popere pokuzonagura vakwayita wovaEgipite mEfuta lyEgeha. Vaisraeli kwa pandwire Jehova, makura tava mu dimbire rusumo rwehamberero. Nye va twikilire kukara norupandu ndi?

¹³ Apa Vaisraeli va ligwanekerere nomaudigu awo kwa divarere yininke nayinye yoyiwa eyi ga va ruganenene Jehova. Awo kapi va likidire rupandu. (Epis. 106:7) Monkedi musinke? Bibeli kutanta asi: “Mbunga nazinye zoVaisraeli tazi vhungutire oMosesa naArona momburundu,” nye unene po awo kwa sivanenene Jehova. (Ex. 16:2, 8) Age kwa mu guvisire kweyi Vaisraeli va dilire kukara norupandu. Konyima age kwa tente asi, nagumwe si ogu ga pitakana ponomvhura nomurongo mbali nga ka lyata mosirongo ntudi oKarebu naJosuwa. (Num. 14:22-24; 26:65) Tu tareni omu natu nyokera po kukwama yihonena eyi yoyidona nomu natu honena yoyiwa.

14, 15. (a) Ngapi omu valikwali nava lilikida rupandu? (b) Ngapi omu vakurona nava ronga vana vawo va kare norupandu?

¹⁴ Mepata. Epata nalinye kugwanena mo uwa nsene nkenye gumwe mepata a likida rupandu. Nsene valikwali va kara norupandu, elikwatakano lyawo ngali nkondopara. Ntani ngayi va rerupira kuligusira po. Mugara ogu ga kara norupandu kwamukadendi kapi tupu a dimburura yirugana nononkango dendi donongwa, nye age “kumufumadeka” nokumutangauka. (Prov. 31:10, 28) Ntani mukadi gonondunge kupandura mugara gwendi koyininke eyi a mu ruganene.

¹⁵ Ngapi omu vakurona nava ronga vana vawo va kare norupandu? Diworokeni asi vana veni kuhonena eyi omu uyunga neyi omu rugana. Yipo nye, va tulireni po sihonena pokupandura vana veni apa ava mu ruganene yuma. Ntani va rongeni va pandure wopeke apa ava va ruganene yuma. Vatereni vana veni va dimburure asi rupandu rwa hepa kutundilira komutjima  ntani nonkango dawo dorupandu kuvhura kuvatera wopeke. Pasihonena, mukadi gedina Clary kwa tanta asi: “Apa onane va kere nonomvhura 32, awo va hepere kurera vanona vatatu pwavelike morwa otate kwa va tulire modorongo. Apa na kere nonomvhura 32, ame na dimbwilire asi ayo kapi ya kere ureru konane mokuturera apa va kere nonomvhura odo. Yipo na va pandwire kelizambero eli va tulire po yipo va tu rere. Ntaantani tupu kava tanterere nge asi awo kudiworoka nkenye apa nonkango dange, ntani ado kuvahafesa.”

16. Gava sihonena esi sina kulikida asi nonkango detu kukorangeda wopeke.

¹⁶ Mombungakriste. Ose kukorangeda vanavazinyetu apa atu va pandura. Pasihonena, mukuronambunga gedina Jorge gonomvhura 28 kwa verere unene. Age kapi nga vhuru kuza komapongo ure wokwedi kumwe. Nampili apa ga tamekere kuza komapongo, age kapi nga vhuru kugava yiuyungwa. Jorge kwa tanta asi: “Ame kwa lizuvhire ngwendi kwato mulyo morwa uvera wange ntani kapi ngani vhuru kusikisa mo yitumbukira yomombungakriste. Nye ezuva limwe konyima zepongo, munazinyetu gumwe kwa tanterere nge asi: ‘na hara kukupandura kweyi wa tulira po epata lyange sihonena sosiwa. Yiuyungwa yoge kwa tu vatera sili unene. Ayo kwa tu vatera tu nkondopeke epuro lyetu.’ Nonkango odo kwa gumine nge komutjima makura tani ganda mahodi. Yosili nonkango odo kwa wizire posiruwo sosiwa.”

17. Kuliza noVakorosi 3:15, ngapi omu natu pandura Jehova koyininke eyi a tu pe?

¹⁷ KwaKarunga gwetu gougavi. Jehova kutupa nondya dopampepo nkenye apa. Pasihonena, ose kugwana mapukururo komapongo nomoyimbapiratjangwa yetu ntani kointaneta zetu zopaveta. Wa purakena rumwe kosiuyungwa, ndi wa resa sirongwa moyimbapiratjangwa yetu ndi wa tarera elikwamo lyokoBroadcast nokutanta asi ‘eyi kwange yina tamba’? Ngapi omu natu pandura Jehova? (Resa Vakorosi 3:15.) Nkedi zimwe kuna kara pokumupandura kupitira mekanderero komauhwi gomawa aga a tu pe.—Jak. 1:17.

18. Ngapi omu natu yi likida asi twa kara norupandu koSinyanga setu?

¹⁸ Ose kulikida hena rupandu kwaJehova apa atu zeresa mavango getu goukareli.  Twa hepa kuzeresa Yinyanga yetu yoUhompa nkenye apa ntani nokupakera mbili yikwamambako. Nsene tu yi rugana, Yinyanga yetu ngayi kara siruwo sosire va hana kuyiwapukurura. Monkedi zangoso, ose ngatu ruganesa yimaliwa eyi atu gwana, yipo tu tungise ko nokuwapukurura Yinyanga yapeke mouzuni mudima.

19. Yisinke ono lirongere ko kosihorokwa somutareli gonombunga namukadendi?

¹⁹ Kwava ava rugana unene mokutuvatera. Apa atu pandura wopeke ayo kuvhura kuvavatera va lididimikire maudigu. Tu tareni sihonena simwe somutareli gonombunga namukadendi. Ezuva limwe apa vakatengwire mokuzuvhisa posiruwo sokufu, awo kwa rorokere sili. Ezuva olyo kwa kere ko utenda unene makura mukadendi yipo ga rere nombindja. Apa lya sire, age kwa tanterere mugara gwendi asi kapi hena ana hara kutwikira nosirugana sokudingura nombunga. Ano ngurangura ozo awo kwa gwene mbilive zokutunda komberewa zomutayi ezi za tembe kwendi. Mbilive ozo kwa mu pandadekere koupampi nelididimiko lyendi nokumutantera asi ayo kapi ya kara ureru mokugendagura nkenye sivike komavango gokulisiga-siga. Mugara gwendi kwa tanta asi: “Mbilive zina kwa mu korangedere sili unene ntani ya mu ninkisire a tokore asi kapi hena nga siga sirugana sokudingura nombungakriste. Yikando yoyinzi mukadange nga korangeda nge ni twikire apa ngani lizuvhu ngwendi ni hageke.” Valikwali owo kwa kara mosirugana sokudingura nombunga nomvhura dokusika koyiha yo-40.

20. Yisinke twa hepa kurugana nkenye ezuva ntani morwasinke?

²⁰ Tu likideni rupandu nkenye ezuva kupitira mononkango nomoyirugana yetu. Nonkango noyirugana yetu yoyiwa kuvhura kuvatera wopeke yipo va vhure kulididimikira maudigu aga vana kuligwanekera nago mouzuni ou wa zura vantu wokudira rupandu. Nkareso zetu zorupandu ngazi tu vatera tu tunge po ukaume wokukarerera. Ntani unene po ose ngatu honena Guhyetu Jehova ogu ga kara nougavi.