ບົດຄວາມສຶກສາທີ 8
ເປັນຫຍັງຈຶ່ງຄວນສະແດງຄວາມຂອບໃຈ?
“ໃຫ້ສະແດງຄວາມຂອບໃຈ.”—ໂກໂລ. 3:15, ລ.ມ.
ເພງ 46 ຂອບໃຈພະເຢໂຫວາ
ໃຈຄວາມສຳຄັນ *
1. ຊາຍສະມາລີຄົນໜຶ່ງທີ່ພະເຍຊູປິ່ນປົວໄດ້ເຮັດຫຍັງທີ່ສະແດງວ່າລາວເຫັນຄຸນຄ່າ?
ຊາຍ 10 ຄົນທີ່ເປັນຂີ້ທູດຮູ້ສຶກໝົດຫວັງ ແລະເຂົາເຈົ້າກໍບໍ່ມີຄວາມຫວັງເລີຍວ່າຈະເຊົາພະຍາດນີ້. ແຕ່ມື້ໜຶ່ງ ເຂົາເຈົ້າໄດ້ເຫັນພະເຍຊູຄູຜູ້ຍິ່ງໃຫຍ່ຕັ້ງແຕ່ໄກໆ ເຂົາເຈົ້າເຄີຍໄດ້ຍິນວ່າພະເຍຊູປິ່ນປົວຄົນເຈັບປ່ວຍທຸກຊະນິດ ແລະກໍໝັ້ນໃຈວ່າເພິ່ນຈະປິ່ນປົວເຂົາເຈົ້າໄດ້ຄືກັນ. ດັ່ງນັ້ນ ເຂົາເຈົ້າຈຶ່ງຮ້ອງອອກມາວ່າ: “ພະເຍຊູພະຜູ້ເປັນນາຍເຈົ້າຂ້າ ຂໍເຊີນອີ່ດູໝູ່ຂ້າພະເຈົ້າເຖີ້ນ.” ແລ້ວຊາຍ 10 ຄົນກໍເຊົາພະຍາດແທ້ໆ. ແນ່ນອນ ເຂົາເຈົ້າທຸກຄົນເຫັນຄຸນຄ່າຄວາມກະລຸນາຂອງພະເຍຊູ. ແຕ່ມີຊາຍຄົນໜຶ່ງທີ່ບໍ່ພຽງແຕ່ຮູ້ສຶກ ລາວໄດ້ສະແດງອອກທາງການກະທຳວ່າເຫັນຄຸນຄ່າ. * ຊາຍຊາວສະມາລີຄົນນີ້ຮູ້ສຶກຂອບໃຈຫຼາຍຈົນ “ສັນລະເສີນພະເຈົ້າດ້ວຍສຽງດັງ.”—ລືກາ 17:12-19
2-3. (ກ) ເປັນຫຍັງເຮົາອາດບໍ່ໄດ້ສະແດງຄວາມຂອບໃຈ? (ຂ) ເຮົາຈະພິຈາລະນາຫຍັງໃນບົດຄວາມນີ້?
2 ຄືກັບຊາວສະມາລີ ເຮົາຢາກສະແດງຄວາມຂອບໃຈຕໍ່ຄົນທີ່ເຮັດດີກັບເຮົາ. ແຕ່ບາງເທື່ອ ເຮົາກໍອາດລືມສະແດງຄວາມຂອບໃຈທັງທາງຄຳເວົ້າແລະການກະທຳ.
3 ໃນບົດຄວາມນີ້ ເຮົາຈະພິຈາລະນາວ່າເປັນຫຍັງຈຶ່ງສຳຄັນທີ່ເຮົາຈະເຫັນຄຸນຄ່າແລະຂອບໃຈທັງທາງຄຳເວົ້າແລະການກະທຳ. ເຮົາຈະຮຽນຮູ້ຈາກຕົວຢ່າງໃນຄຳພີໄບເບິນທັງຄົນທີ່ເຫັນຄຸນຄ່າແລະຄົນທີ່ບໍ່ເຫັນຄຸນຄ່າ. ຈາກນັ້ນ ເຮົາຈະໄດ້ຮູ້ວິທີທີ່ເຮົາຈະສະແດງຄວາມຮູ້ຄຸນຄ່າແລະຂອບໃຈ.
ເປັນຫຍັງເຮົາຄວນສະແດງຄວາມຂອບໃຈ?
4-5. ເປັນຫຍັງເຮົາຄວນສະແດງຄວາມຂອບໃຈ?
4 ພະເຢໂຫວາເປັນຕົວຢ່າງໃຫ້ເຮົາໃນເລື່ອງການເຫັນຄຸນຄ່າ. ວິທີໜຶ່ງກໍຄືພະອົງມັກໃຫ້ລາງວັນກັບຄົນທີ່ເຮັດໃຫ້ພະອົງພໍໃຈ. (2 ຊາມ. 22:21; ເພງ. 13:6; ມັດ. 10:40, 41) ແລະຄຳພີໄບເບິນສະໜັບສະໜູນເຮົາໃຫ້ “ເປັນຜູ້ກະທຳຕາມແບບຢ່າງພະເຈົ້າເໝືອນເປັນລູກທີ່ຮັກຂອງພະເຈົ້າ.” (ເອເຟ. 5:1) ດັ່ງນັ້ນ ເຫດຜົນສຳຄັນທີ່ເຮົາຄວນສະແດງຄວາມຂອບໃຈກໍຄື ເຮົາຢາກເຮັດຕາມຕົວຢ່າງຂອງພະເຢໂຫວາ.
5 ຂໍໃຫ້ຄິດເຖິງອີກເຫດຜົນໜຶ່ງທີ່ວ່າເປັນຫຍັງເຮົາຕ້ອງສະແດງຄວາມຂອບໃຈຄົນອື່ນ. ການເຫັນຄຸນຄ່າແລະຂອບໃຈເປັນຄືກັບການກິນອາຫານດີໆ ແລະມັນຈະເຮັດໃຫ້ເຮົາມີຄວາມສຸກຫຼາຍຂຶ້ນເມື່ອກິນກັບໝູ່ຫຼາຍຄົນ. ເມື່ອເຮົາຮູ້ວ່າຄົນອື່ນເຫັນຄຸນຄ່າສິ່ງທີ່ເຮົາເຮັດ ເຮົາກໍມີຄວາມສຸກ ແລະເມື່ອເຮົາສະແດງຄວາມເຫັນຄຸນຄ່າ ເຮົາກໍເຮັດໃຫ້ຄົນອື່ນມີຄວາມສຸກຄືກັນ. ສະນັ້ນ ຄົນທີ່ເຮົາຂອບໃຈຈະຮູ້ວ່າສິ່ງທີ່ລາວເຮັດເພື່ອຊ່ວຍເຮົາຫຼືໃຫ້ສິ່ງຈຳເປັນບາງຢ່າງກັບເຮົາມີຄຸນຄ່າຫຼາຍແທ້ໆ. ແລ້ວສາຍສຳພັນຂອງເຮົາກັບຄົນນັ້ນກໍຈະແໜ້ນແຟ້ນຫຼາຍຂຶ້ນ.
6. ຄຳເວົ້າທີ່ສະແດງວ່າເຮົາຂອບໃຈເປັນຄືກັບໝາກແອັບເປິ້ນທີ່ເຮັດດ້ວຍຄຳແນວໃດ?
6 ການສະແດງຄວາມຂອບໃຈເປັນສິ່ງທີ່ມີຄ່າຫຼາຍ. ຄຳພີໄບເບິນບອກວ່າ: “ຖ້ອຍຄຳຂໍ້ໜຶ່ງທີ່ກ່າວຖືກເວລາສົມຄວນກໍເປັນຄືໝາກທະພູອາ [ແອັບເປິ້ນ] ທຳດ້ວຍຄຳຢູ່ໃນກະຕ່າທຳດ້ວຍເງິນ.” (ສຸພາ. 25:11) ລອງຄຶດພາບເບິ່ງວ່າໝາກແອັບເປິ້ນຄຳທີ່ວາງໄວ້ໃນກະຕ່າເງິນຈະສວຍງາມຫຼາຍສ່ຳໃດ! ມັນຄົງຈະມີຄ່າຫຼາຍແທ້ໆ! ເຈົ້າຈະຮູ້ສຶກແນວໃດຖ້າໄດ້ຂອງຂວັນແບບນັ້ນ? ຄຳເວົ້າທີ່ສະແດງວ່າເຮົາຂອບໃຈຄົນອື່ນເປັນສິ່ງທີ່ມີຄ່າຄືກັນ. ແລະຂໍໃຫ້ຄິດເຖິງຄວາມຈິງນີ້: ໝາກແອັບເປິ້ນທີ່ເຮັດດ້ວຍຄຳຈະຢູ່ທົນດົນນານແທ້ໆ. ຄ້າຍຄືກັນ ເມື່ອເຮົາສະແດງຄວາມຂອບໃຈຕໍ່ໃຜຄົນໜຶ່ງ ສິ່ງນັ້ນອາດຈະມີຄ່າຕໍ່ລາວແລະເຮັດໃຫ້ລາວຈື່ໄປຕະຫຼອດຊີວິດ.
ເຂົາເຈົ້າສະແດງຄວາມຂອບໃຈ
7. ທັງດາວິດທີ່ຂຽນຄຳເພງ 27:4 ແລະຜູ້ຂຽນຄຳເພງຄົນອື່ນໆສະແດງໃຫ້ເຫັນແນວໃດວ່າເຫັນຄຸນຄ່າແລະຂອບໃຈ?
7 ຜູ້ຮັບໃຊ້ພະເຈົ້າຫຼາຍຄົນໃນອະດີດໄດ້ສະແດງຄວາມຂອບໃຈ. ຄົນໜຶ່ງຄື ດາວິດ. (ອ່ານຄຳເພງ 27:4) ລາວເຫັນຄ່າການນະມັດສະການບໍລິສຸດແລະສະແດງໃຫ້ເຫັນໂດຍທາງຄຳເວົ້າແລະການກະທຳ. ລາວໄດ້ບໍລິຈາກຊັບສົມບັດທີ່ມີຄ່າຢ່າງຫຼວງຫຼາຍເພື່ອສ້າງວິຫານ. ລູກຫຼານຂອງອາຊາບກໍເປັນຄົນໜຶ່ງທີ່ສະແດງຄວາມຂອບໃຈໂດຍແຕ່ງຄຳເພງຫຼືຮ້ອງເພງສັນລະເສີນ. ມີເພງໜຶ່ງເຂົາເຈົ້າແຕ່ງຂຶ້ນເພື່ອຂອບໃຈພະເຈົ້າແລະຍົກຍ້ອງສັນລະເສີນ “ສິ່ງມະຫັດສະຈັນ” ທີ່ພະອົງເຮັດ. (ເພງ. 75:1, ລ.ມ.) ເຫັນໄດ້ແຈ້ງ ດາວິດແລະລູກຫຼານຂອງອາຊາບຢາກເຮັດໃຫ້ພະເຢໂຫວາເຫັນວ່າເຂົາເຈົ້າເຫັນຄຸນຄ່າແລະຂອບໃຈຫຼາຍແທ້ໆທີ່ໄດ້ຮັບພອນຕ່າງໆຈາກພະອົງ. ເຈົ້າເດ ເຈົ້າຢາກຮຽນແບບຜູ້ຂຽນຄຳເພງເຫຼົ່ານີ້ບໍ?
ຈົດໝາຍຂອງໂປໂລເຖິງພີ່ນ້ອງໃນໂລມສອນເຮົາແນວໃດເລື່ອງການສະແດງຄວາມເຫັນຄຸນຄ່າແລະຂອບໃຈ? (ເບິ່ງຂໍ້ 8-9) *
8-9. ໂປໂລສະແດງໃຫ້ເຫັນວ່າລາວເຫັນຄຸນຄ່າແລະຂອບໃຈພີ່ນ້ອງໂດຍວິທີໃດ ແລະຜົນເປັນແນວໃດ?
8 ໂປໂລກໍເຫັນຄ່າພີ່ນ້ອງແລະສະແດງອອກໂດຍວິທີທີ່ລາວເວົ້າເຖິງພີ່ນ້ອງ. ລາວຂອບໃຈພະເຢໂຫວາເລື້ອຍໆທີ່ມີພີ່ນ້ອງເຫຼົ່ານີ້. ລາວຍັງເຮັດໃຫ້ຮູ້ວ່າເຂົາເຈົ້າສຳຄັນຕໍ່ລາວຫຼາຍສ່ຳໃດເມື່ອຂຽນຈົດໝາຍເຖິງເຂົາເຈົ້າ. ພະທຳໂລມບົດ 16 ຂໍ້ 1-15 ໂປໂລເວົ້າເຖິງຊື່ຂອງພີ່ນ້ອງຊາຍຍິງ 27 ຄົນ. ລາວເວົ້າເຈາະຈົງເຖິງອາກີລາແລະປຣີສີລາທີ່ “ສ່ຽງຊີວິດ” ເພື່ອລາວ ແລະບອກອີກວ່າພີ່ນ້ອງຍິງຊື່ເຟິເບ “ໄດ້ຊ່ອຍຫຼາຍຄົນ” ລວມທັງລາວນຳ. ໂປໂລຊົມເຊີຍພີ່ນ້ອງທີ່ຮັກເຫຼົ່ານັ້ນເຊິ່ງເຮັດວຽກໜັກແທ້ໆ.—ໂລມ 16:1-15, ລ.ມ.
9 ໂປໂລຮູ້ວ່າພີ່ນ້ອງກໍບໍ່ສົມບູນແບບ ແຕ່ໃນຕອນທ້າຍຂອງຈົດໝາຍທີ່ລາວຂຽນເຖິງປະຊາຄົມໂລມ ລາວເລັງໃສ່ຈຸດດີຂອງເຂົາເຈົ້າ. ລອງນຶກພາບເບິ່ງວ່າເຂົາເຈົ້າຈະໄດ້ກຳລັງໃຈຫຼາຍຂະໜາດໃດ ເມື່ອໄດ້ຍິນຄຳຊົມເຊີຍຂອງໂປໂລຕອນທີ່ອ່ານຈົດໝາຍໃນປະຊາຄົມ! ຜົນກໍຄື ທັງໂປໂລແລະພີ່ນ້ອງມີສາຍສຳພັນທີ່ແໜ້ນແຟ້ນກັນຫຼາຍຂຶ້ນ. ເຈົ້າເຫັນຄຸນຄ່າແລະຂອບໃຈສິ່ງດີໆທີ່ພີ່ນ້ອງໃນປະຊາຄົມເຮັດໂດຍທາງຄຳເວົ້າແລະການກະທຳເລື້ອຍໆບໍ?
10. ເຮົາໄດ້ຮຽນຮູ້ຫຍັງຈາກວິທີທີ່ພະເຍຊູເຫັນຄຸນຄ່າພວກລູກສິດ?
10 ໃນຂ່າວສານທີ່ພະເຍຊູໃຫ້ບາງປະຊາຄົມໃນອາຊີນ້ອຍ ເພິ່ນສະແດງວ່າເຫັນຄຸນຄ່າຕໍ່ວຽກງານຂອງພວກລູກສິດ. ຕົວຢ່າງ: ເມື່ອເພິ່ນສົ່ງຂ່າວສານເຖິງປະຊາຄົມທີອາທີຣາ ເພິ່ນເລີ່ມຕົ້ນໂດຍເວົ້າວ່າ: “ເຮົາຮູ້ການກະທຳຂອງເຈົ້າ. ເຮົາຮູ້ເຖິງຄວາມຮັກ ຄວາມເຊື່ອ ການບົວລະບັດຮັບໃຊ້ ແລະຄວາມອົດທົນຂອງເຈົ້າ. ເຮົາຮູ້ວ່າກິດຈະການຂອງເຈົ້າຕອນນີ້ມີຫຼາຍກວ່າຕອນທຳອິດ.” (ຄຳປ. 2:19, ທ.ປ.) ພະເຍຊູບໍ່ພຽງແຕ່ບອກວ່າເຂົາເຈົ້າເຮັດຫຼາຍຂຶ້ນ ແຕ່ເພິ່ນຍັງຊົມເຊີຍໃນຄຸນລັກສະນະຂອງເຂົາເຈົ້ານຳເຊິ່ງເຮັດໃຫ້ເຂົາເຈົ້າຢາກເຮັດສິ່ງທີ່ດີ. ເຖິງວ່າພະເຍຊູຈຳເປັນຕ້ອງໃຫ້ຄຳແນະນຳບາງຢ່າງກັບປະຊາຄົມທີອາທີຣາ ແຕ່ພະອົງຍັງເລີ່ມຕົ້ນແລະລົງທ້າຍຂ່າວສານທີ່ໃຫ້ກຳລັງໃຈ. (ຄຳປ. 2:25-28) ລອງຄຶດເບິ່ງວ່າໃນຖານະເປັນຜູ້ປົກຄອງຂອງປະຊາຄົມຕ່າງໆທັງໝົດ. ພະເຍຊູບໍ່ຈຳເປັນຕ້ອງຂອບໃຈວຽກທີ່ເຮົາເຮັດກໍໄດ້ ແຕ່ເພິ່ນກໍຍັງສະແດງວ່າເຫັນຄຸນຄ່າເຮົາ. ເພິ່ນເປັນຕົວຢ່າງທີ່ດີແທ້ໆໃຫ້ຜູ້ເຖົ້າແກ່!
ເຂົາເຈົ້າບໍ່ເຫັນຄຸນຄ່າ
11. ໃນເຫບເລີ 12:16 ເອຊາອຶຄິດແນວໃດກັບສິ່ງສັກສິດ?
11 ບາງຄົນໃນຄຳພີໄບເບິນບໍ່ໄດ້ສະແດງຄວາມເຫັນຄຸນຄ່າ. ຕົວຢ່າງ: ເຖິງວ່າເອຊາອຶມີພໍ່ແມ່ທີ່ຮັກແລະນັບຖືພະເຢໂຫວາ ແຕ່ລາວກໍບໍ່ເຫັນຄຸນຄ່າສິ່ງສັກສິດ. (ອ່ານເຫບເລີ 12:16) ລາວສະແດງໃຫ້ເຫັນແນວໃດວ່າບໍ່ເຫັນຄຸນຄ່າ? ລາວຂາຍສິດລູກກົກໃຫ້ຢາໂຄບນ້ອງຊາຍຂອງລາວ ເພື່ອແລກກັບແກງຖົ່ວແດງຖ້ວຍດຽວ. (ຕົ້ນ. 25:30-34) ຕໍ່ມາ ເອຊາອຶໄດ້ເສຍໃຈກັບການເລືອກຂອງລາວ. ແຕ່ຍ້ອນລາວບໍ່ເຫັນຄ່າສິ່ງທີ່ລາວມີ ດັ່ງນັ້ນ ລາວກໍບໍ່ມີສິດທີ່ຈະຈົ່ມເມື່ອບໍ່ໄດ້ຮັບພອນລູກກົກ.
12-13. ຊາວອິດສະລາແອນບໍ່ເຫັນຄຸນຄ່າແນວໃດ ແລະຜົນເປັນແນວໃດ?
12 ຊາວອິດສະລາແອນກໍມີເຫດຜົນຫຼາຍຢ່າງທີ່ຄວນຈະສະແດງຄວາມເຫັນຄຸນຄ່າ. ເຂົາເຈົ້າໄດ້ອິດສະຫຼະຈາກການເປັນທາດໃນເອຢິບ ຫຼັງຈາກທີ່ພະເຢໂຫວາເຮັດໃຫ້ເກີດໄພພິບັດ 10 ຢ່າງ. ຈາກນັ້ນ ພະອົງປົກປ້ອງເຂົາເຈົ້າຈາກອັນຕະລາຍໂດຍທຳລາຍກອງທັບເອຢິບໃນທະເລແດງ. ຕອນນັ້ນ ຊາວອິດສະລາແອນຮູ້ສຶກເຫັນຄຸນຄ່າແລະຂອບໃຈຫຼາຍຈົນຮ້ອງເພງແຫ່ງໄຊຊະນະເພື່ອສັນລະເສີນພະເຢໂຫວາ. ແຕ່ເຂົາເຈົ້າຮູ້ສຶກເຫັນຄຸນຄ່າສະເໝີບໍ?
13 ເມື່ອຊາວອິດສະລາແອນເຈິບັນຫາໃໝ່ ບໍ່ດົນເຂົາເຈົ້າກໍລືມສິ່ງດີໆທຸກຢ່າງທີ່ພະເຢໂຫວາເຮັດແລະສະແດງໃຫ້ເຫັນວ່າບໍ່ຮູ້ຄຸນຄ່າ. (ເພງ. 106:7) ເປັນໄປໄດ້ແນວໃດ? ຄຳພີໄບເບິນບອກວ່າ: “ພວກຊຸມນຸມລູກຫຼານຍິດສະລາເອນທັງປວງໄດ້ຈົ່ມຕໍ່ສູ້ທ່ານໂມເຊກັບທ່ານອາໂລນ” ເຊິ່ງແທ້ໆແລ້ວເຂົາເຈົ້າຈົ່ມຕໍ່ສູ້ພະເຢໂຫວາ. (ອົບ. 16:2, 8) ພະອົງເສຍໃຈທີ່ເຂົາເຈົ້າບໍ່ເຫັນຄຸນຄ່າຕໍ່ສິ່ງທີ່ພະອົງເຮັດ. ຕໍ່ມາພະອົງບອກລ່ວງໜ້າວ່າຊາວອິດສະລາແອນລຸ້ນນີ້ຈະຕາຍຢູ່ໃນປ່າກັນດານ ຍົກເວັ້ນໂຢຊວຍກັບກາເລບ. (ຈົດເຊັນ. 14:22-24; 26:65) ຂໍໃຫ້ເຮົາມາເບິ່ງວ່າ ເຮົາຈະບໍ່ເຮັດຄືກັບຕົວຢ່າງທີ່ບໍ່ດີແລະຈະເຮັດຕາມຕົວຢ່າງທີ່ດີໄດ້ແນວໃດ.
ການສະແດງຄວາມຂອບໃຈໃນປັດຈຸບັນ
14-15. (ກ) ຜົວແລະເມຍຈະສະແດງວ່າເຫັນຄຸນຄ່າກັນແລະກັນໄດ້ແນວໃດ? (ຂ) ພໍ່ແມ່ຈະສອນລູກໃຫ້ສະແດງຄວາມເຫັນຄຸນຄ່າແລະຂອບໃຈໄດ້ແນວໃດ?
14 ໃນຄອບຄົວ. ເມື່ອທຸກຄົນໃນຄອບຄົວເຫັນຄຸນຄ່າແລະຂອບໃຈກັນ ຄອບຄົວກໍຈະໄດ້ຮັບປະໂຫຍດຫຼາຍ. ຖ້າຜົວເມຍເຫັນຄຸນຄ່າກັນແລະກັນກໍຈະເຮັດໃຫ້ໃກ້ຊິດກັນຫຼາຍຂຶ້ນ ແລະງ່າຍຂຶ້ນທີ່ຈະໃຫ້ອະໄພກັນເມື່ອອີກຝ່າຍເຮັດຜິດ. ຜົວທີ່ເຫັນຄຸນຄ່າເມຍຈະບໍ່ພຽງແຕ່ສັງເກດເບິ່ງສິ່ງດີໆຈາກສິ່ງທີ່ເມຍເວົ້າແລະເຮັດ ແຕ່ຍັງຈະ “ລຸກຂຶ້ນແລະຊົມເຊີຍລາວ.” (ສຸພາ. 31:10, 28, ລ.ມ.) ແລະເມຍທີ່ສະຫຼາດຈະເຮັດໃຫ້ຜົວຮູ້ວ່າລາວເຫັນຄ່າແລະຂອບໃຈຕໍ່ສິ່ງທີ່ຜົວເຮັດ.
15 ພໍ່ແມ່ ເຈົ້າຈະສອນລູກໃຫ້ສະແດງຄວາມຂອບໃຈໄດ້ແນວໃດ? ຂໍໃຫ້ຈື່ວ່າ ລູກຈະຮຽນຈາກສິ່ງທີ່ເຈົ້າເວົ້າແລະເຮັດ. ດັ່ງນັ້ນ ໃຫ້ເປັນຕົວຢ່າງທີ່ດີໂດຍເວົ້າຂອບໃຈເມື່ອລູກເຮັດບາງຢ່າງໃຫ້ເຮົາ. ນອກຈາກນັ້ນ ສອນລູກໃຫ້ຂອບໃຈເມື່ອຄົນອື່ນເອົາບາງສິ່ງໃຫ້ລາວ. ຊ່ວຍລູກໃຫ້ເຂົ້າໃຈວ່າການສະແດງຄວາມເຫັນຄຸນຄ່າແລະເວົ້າຂອບໃຈເປັນສິ່ງທີ່ດີຫຼາຍ. ຕົວຢ່າງ: ຜູ້ຍິງຄົນໜຶ່ງຊື່ ຄລາດີ້ບອກວ່າ: “ຕອນທີ່ແມ່ຂ້ອຍອາຍຸ 32 ປີ ແມ່ຜູ້ດຽວຕ້ອງລ້ຽງລູກຕັ້ງ 3 ຄົນ. ເມື່ອຂ້ອຍອາຍຸ 32 ຂ້ອຍຄິດວ່າມັນຄົງຍາກຫຼາຍແທ້ໆສຳລັບແມ່ຕອນອາຍຸສ່ຳນັ້ນ. ດັ່ງນັ້ນ ຂ້ອຍຈຶ່ງບອກແມ່ວ່າຂ້ອຍຂອບໃຈແລະເຫັນຄຸນຄ່າທຸກສິ່ງທີ່ແມ່ສະລະເພື່ອລ້ຽງຂ້ອຍກັບອ້າຍແລະນ້ອງຊາຍ. ບໍ່ດົນມານີ້ແມ່ໄດ້ບອກຂ້ອຍວ່າຄຳເວົ້າຂອງຂ້ອຍມີຄ່າຕໍ່ລາວຫຼາຍ ແມ່ຄິດເຖິງຄຳເວົ້າຂ້ອຍຕະຫຼອດແລະມັນເຮັດລາວມີຄວາມສຸກຫຼາຍ.”
ສອນລູກໃຫ້ສະແດງຄວາມຂອບໃຈ (ເບິ່ງຂໍ້ 15) *
16. ຂໍໃຫ້ຍົກຕົວຢ່າງວ່າການສະແດງຄວາມເຫັນຄຸນຄ່າແລະຂອບໃຈໃຫ້ກຳລັງໃຈຄົນອື່ນແນວໃດ?
16 ໃນປະຊາຄົມ. ເມື່ອເຮົາເຫັນຄຸນຄ່າແລະຂອບໃຈພີ່ນ້ອງ ເຮົາກໍໃຫ້ກຳລັງໃຈເຂົາເຈົ້າ. ຕົວຢ່າງ: ພີ່ນ້ອງຮໍເຮເປັນຜູ້ເຖົ້າແກ່ ລາວເຈັບປ່ວຍໜັກຕອນອາຍຸ 28 ປີ ແລະເຂົ້າຮ່ວມປະຊຸມບໍ່ໄດ້ເປັນເດືອນ. ແຕ່ເມື່ອມາປະຊຸມໄດ້ ລາວກໍຍັງບໍ່ສາມາດເຮັດສ່ວນໃນປະຊາຄົມໄດ້. ລາວຍອມຮັບວ່າ: “ຂ້ອຍຮູ້ສຶກບໍ່ມີຄ່າຍ້ອນຂ້ອຍມີຂີດຈຳກັດແລະເຮັດວຽກໃນປະຊາຄົມບໍ່ໄດ້. ແຕ່ມີເທື່ອໜຶ່ງຫຼັງຈາກເລີກການປະຊຸມ ພີ່ນ້ອງຊາຍຄົນໜຶ່ງບອກຂ້ອຍວ່າ: ‘ຂ້ອຍຢາກຂອບໃຈເຈົ້າຫຼາຍໆທີ່ເປັນຕົວຢ່າງທີ່ດີໃຫ້ຄອບຄົວຂ້ອຍ. ພວກເຮົາມັກຄຳບັນລະຍາຍຂອງເຈົ້າຫຼາຍໃນໄລຍະທີ່ຜ່ານມາ ມັນຊ່ວຍໃຫ້ຄວາມເຊື່ອຂອງພວກເຮົາເຂັ້ມແຂງຂຶ້ນ.’ ຂ້ອຍຮູ້ສຶກຕື້ນຕັນໃຈຈົນຮ້ອງໄຫ້ອອກມາ. ຄຳເວົ້າຂອງລາວເປັນສິ່ງທີ່ຂ້ອຍຢາກໄດ້ຍິນແທ້ໆໃນຕອນນັ້ນ.”
17. ຕາມທີ່ບອກໃນໂກໂລດ 3:15 ເຮົາຈະສະແດງໃຫ້ເຫັນແນວໃດວ່າເຮົາຂອບໃຈພະເຢໂຫວາທີ່ພະອົງໃຈກວ້າງກັບເຮົາ?
17 ຂອບໃຈພະເຈົ້າຂອງເຮົາຜູ້ມີໃຈກວ້າງ. ພະເຢໂຫວາໃຫ້ຄວາມຮູ້ທີ່ເສີມຄວາມເຊື່ອກັບເຮົາຢ່າງຫຼວງຫຼາຍ ເຊັ່ນ: ເຮົາໄດ້ຮັບຄຳແນະນຳທີ່ມີປະໂຫຍດຜ່ານທາງການປະຊຸມ ວາລະສານ ແລະເວັບໄຊ. ເມື່ອເຈົ້າຟັງຄຳບັນລະຍາຍ ອ່ານບົດຄວາມ ຫຼືເບິ່ງລາຍການໂທລະທັດ JW ເຈົ້າເຄີຍຄິດບໍວ່າ: ‘ເລື່ອງນີ້ຖືກກັບຂ້ອຍເລີຍ?’ ເຮົາຈະສະແດງໃຫ້ເຫັນແນວໃດວ່າເຮົາຂອບໃຈພະເຢໂຫວາ? (ອ່ານໂກໂລດ 3:15 *) ວິທີໜຶ່ງກໍຄື ອະທິດຖານຂອບໃຈພະອົງເລື້ອຍໆສຳລັບຂອງຂວັນທີ່ດີເລີດເຫຼົ່ານີ້.—ຢໂກ. 1:17
ການຊ່ວຍກັນອະນາໄມຫໍປະຊຸມເປັນວິທີທີ່ດີຫຼາຍໃນການສະແດງຄວາມຂອບໃຈ (ເບິ່ງຂໍ້ 18)
18. ເຮົາຈະສະແດງໃຫ້ເຫັນແນວໃດວ່າເຮົາເຫັນຄຸນຄ່າຫໍປະຊຸມຂອງເຮົາ?
18 ນອກຈາກນັ້ນ ເຮົາຍັງສະແດງວ່າຂອບໃຈພະເຢໂຫວາເມື່ອເຮົາເບິ່ງແຍງຫໍປະຊຸມໃຫ້ສະອາດຮຽບຮ້ອຍສະເໝີ. ເຮົາຈະຊ່ວຍກັນເຮັດອະນາໄມແລະບຳລຸງຮັກສາຫໍປະຊຸມເປັນປະຈຳ ແລະພີ່ນ້ອງທີ່ເບິ່ງແຍງເຄື່ອງສຽງຈະໃຊ້ເຄື່ອງສຽງແລະອຸປະກອນຕ່າງໆຢ່າງລະມັດລະວັງ. ເມື່ອພວກເຮົາເບິ່ງແຍງຮັກສາຫໍປະຊຸມຢ່າງເໝາະສົມ ຫໍປະຊຸມກໍຈະໃຊ້ໄດ້ດົນຂຶ້ນແລະບໍ່ໄດ້ສ້ອມແປງຫຼາຍ. ໂດຍວິທີນີ້ເຮົາກໍຈະປະຢັດເງິນຫຼາຍຂຶ້ນເພື່ອຈະເອົາໄປສ້າງແລະປັບປຸງຫໍປະຊຸມອື່ນໆທົ່ວໂລກ.
19. ເຈົ້າໄດ້ຮຽນຮູ້ຫຍັງຈາກປະສົບການຂອງຜູ້ດູແລໝວດແລະເມຍຂອງລາວ?
19 ຂອບໃຈຄົນທີ່ເຮັດວຽກໜັກເພື່ອເຮົາ. ເມື່ອເຮົາສະແດງຄວາມຂອບໃຈ ຄຳເວົ້າຂອງເຮົາອາດເຮັດໃຫ້ຄົນທີ່ຟັງປ່ຽນຄວາມຮູ້ສຶກກ່ຽວກັບບັນຫາທີ່ລາວປະສົບ. ຂໍມາເບິ່ງປະສົບການຂອງຜູ້ດູແລໝວດແລະເມຍ. ຫຼັງຈາກທີ່ໄປຮັບໃຊ້ໝົດມື້ໃນສະພາບອາກາດທີ່ໜາວຫຼາຍ ເຂົາເຈົ້າກໍກັບມາຮອດບ່ອນພັກດ້ວຍຄວາມອິດເມື່ອຍ. ເມຍຜູ້ດູແລໝວດຮູ້ສຶກໜາວຫຼາຍຈົນໃສ່ເສື້ອກັນໜາວໂຕໜາໆນອນ. ເມື່ອຮອດຕອນເຊົ້າ ລາວກໍບອກຜົວວ່າລາວຮູ້ສຶກເຮັດວຽກນີ້ຕໍ່ໄປບໍ່ໄຫວແລ້ວ. ແຕ່ຕອນສວຍກໍມີຈົດໝາຍຈາກສຳນັກງານສາຂາສົ່ງຫາລາວ. ຈົດໝາຍນັ້ນຊົມເຊີຍລາວທີ່ເຮັດວຽກຮັບໃຊ້ຢ່າງອົດທົນ ແລະຍອມຮັບວ່າການຍ້າຍບ່ອນພັກທຸກອາທິດເປັນເລື່ອງທີ່ບໍ່ງ່າຍ. ຜົວຂອງລາວບອກວ່າ: “ເມຍຮູ້ສຶກປະທັບໃຈຫຼາຍໃນຈົດໝາຍທີ່ໃຫ້ກຳລັງໃຈນັ້ນຈົນລາວບໍ່ເວົ້າອີກເລີຍວ່າຈະອອກຈາກວຽກຮັບໃຊ້ນີ້. ທີ່ຈິງ ລາວໄດ້ໃຫ້ກຳລັງໃຈຂ້ອຍເລື້ອຍໆໃຫ້ເຮັດວຽກນີ້ຕໍ່ໄປ ເມື່ອຂ້ອຍຄິດຈະອອກຈາກວຽກ.” ພີ່ນ້ອງຄູ່ນີ້ເຮັດວຽກເປັນຜູ້ດູແລເດີນທາງເກືອບ 40 ປີ.
20. ໃນທຸກໆມື້ເຮົາຄວນພະຍາຍາມເຮັດຫຍັງ ແລະຍ້ອນຫຍັງ?
20 ຂໍໃຫ້ເຮົາພະຍາຍາມທຸກມື້ທີ່ຈະສະແດງຄວາມຂອບໃຈໂດຍທາງຄຳເວົ້າແລະການກະທຳ. ຄຳເວົ້າທີ່ຈິງໃຈຫຼືການກະທຳຂອງເຮົາອາດເປັນສິ່ງທີ່ໃຜຄົນໜຶ່ງກຳລັງຕ້ອງການພໍດີເພື່ອຈະຮັບມືກັບບັນຫາແລະຄວາມເຄັ່ງຕຶງໄດ້ ເຊິ່ງໃນໂລກນີ້ກໍມີໜ້ອຍຄົນທີ່ຈະສະແດງຄວາມຂອບໃຈ. ການສະແດງຄວາມຂອບໃຈຂອງເຮົາຈະສ້າງມິດຕະພາບທີ່ໝັ້ນຄົງຕະຫຼອດໄປ ແລະທີ່ສຳຄັນທີ່ສຸດຄື ຖ້າເຮົາເຮັດແບບນີ້ ເຮົາກໍກຳລັງຮຽນແບບພະເຢໂຫວາຜູ້ເປັນພໍ່ທີ່ໃຈກວ້າງແລະເຫັນຄຸນຄ່າ.
ເພງ 20 ພະອົງເສຍສະລະລູກຊາຍສຸດທີ່ຮັກ
^ ຂໍ້ 5 ເຮົາໄດ້ຮຽນຮູ້ຫຍັງຈາກພະເຢໂຫວາ ພະເຍຊູ ແລະຊາຍສະມາລີຂີ້ທູດໃນເລື່ອງການສະແດງຄວາມຂອບໃຈ? ບົດຄວາມນີ້ຈະພິຈາລະນາຕົວຢ່າງຂອງບຸກຄົນເຫຼົ່ານີ້ແລະຕົວຢ່າງອື່ນໆ. ເຮົາຈະເບິ່ງວ່າເປັນຫຍັງຈຶ່ງສຳຄັນຫຼາຍທີ່ຈະສະແດງຄວາມຂອບໃຈ ແລະບາງສິ່ງທີ່ເຮົາເຮັດໄດ້.
^ ຂໍ້ 1 ການອະທິບາຍສຳນວນ: ການເຫັນຄຸນຄ່າຕໍ່ບາງຄົນຫຼືບາງສິ່ງໝາຍເຖິງການຍອມຮັບວ່າຄົນຫຼືສິ່ງຂອງນັ້ນມີຄ່າ. ຄຳນີ້ຍັງຊີ້ເຖິງຄວາມຮູ້ສຶກເຫັນຄຸນຄ່າແລະຄວາມຂອບໃຈແທ້ໆຈາກຫົວໃຈ.
^ ຂໍ້ 17 ໂກໂລດ 3:15 (ລ.ມ.): “ຂໍໃຫ້ສັນຕິສຸກຈາກພະຄລິດເປັນພະລັງຄວບຄຸມໃຈພວກເຈົ້າ ເພາະພວກເຈົ້າຖືກເອີ້ນມາເພື່ອໃຫ້ເປັນອະໄວຍະວະໃນຮ່າງກາຍດຽວກັນທີ່ມີສັນຕິສຸກ ແລະໃຫ້ສະແດງຄວາມຂອບໃຈດ້ວຍ.”
