1. KaSamariya wokiliwu kudi Yesu wamwekesheli ñahi kusakilila?

KWADIÑA amayala 10 adiña akata kalepa nawa amweneña nawu akakola wanyi. Ilaña ifuku dimu amweni Yesu, Ntañishi Muneni, hahalehi. Atiyili nawu Yesu nakuuka nyisoñu yejima nawa niwena akuhweleleli chikupu nawu akuyuuka. Dichi abileleli nawu: “Yesu, Ntañishi, tutiyili luwi!” Awa amayala ejima 10 ayuukili. Chakadi nikujina, wejima wawu atiyili kuwaha haluwi lwayimwekesheleliwu kudi Yesu. Hela chochu, wumu hakachi kawu hatiyili kuwaha hohuku, ilaña wayili nakumusakilila * Yesu. Iwu iyala kaSamariya okiliwu watachikili kumulemesha Nzambi “nezu datiyakana.”—Luka 17:12-19.

2-3. (a) Chumanyi chinateli kutukañesha kusakilila? (b) Tukuhanjekadi muchinu chibaaba?

² Kufwana kaSamariya, twatela kuyisakilila antu atumwekeshelaña luwi. Ilaña mpinji yikwawu twayisakililaña wanyi akwetu hayuma yatwililañawu.

³ Muchinu chibaaba, tukuhanjeka chichalemena kudisakilila wumu namukwawu mumazu nimuyuma yitwelaña. Tukudiza hadi antu ashimunawu muBayibolu adiña nakusakilila niabulileña kusakilila. Kuhiñahu tukuhanjeka njila mutunateli kumwekeshela kusakilila.

4-5. Muloñadi chitwatela kusakililaña?

⁴ Yehova wasakililaña. Welaña mwenimu kuhitila mukukiswila antu amutiyishaña kuwaha. (2 Sam. 22:21; Mas. 13:6; Mat. 10:40, 41) Nawa Nsona jatukoleshaña kwikala “akwakwimbujola Nzambi neyi anyana akeñayi.” (Efwes. 5:1) Dichi twasakililaña muloña twakeñaña kumwimbujola Yehova.

⁵ Shinshikenu cheñi chuma chikwawu chinateli kutuleñela tusakilileña akwetu. Kusakilila kudi neyi yakuda yayiwahi, yinateli kuwaha neyi muyidiila hamu nawakwenu. Twatiyaña kuwaha neyi akwetu atusakilila. Neyi tuyisakililaña akwetu, niwena atiyaña kuwaha. Neyi tumusakilila muntu, wukwiluka nindi ñovu yindi yazatishayi hakutukwasha hela kutwinka chuma yaya mumenji wanyi. Chikufumamu, wubwambu wetu nayena wukukola.

6. Mazu akusakilila anadifwani ñahi namabula akutuña nawulu?

⁶ Kusakilila kwalema nankashi. Bayibolu yashimuna nawu: “Izu dakuhoshela hidinateleli didi neyi mabula awuru analoñejuwu mumabañu asiliva.” (Yish. 25:11) Mabula akutuña nawulu anashiwu mwibañu dasiliva amwekanaña lubanji. Toñojokenu chalemawu wuseya! Mukutiya ñahi neyi ayinka chawaana chamuchidiwu? Munjila yoyimu, mazu akuhameka imukuyihameka nachu akwenu anateli kwikala neyi chuma chalema wuseya. Chakutalilahu: Mabula akutuña nawuru anateli kushakama yaaka yayivulu. Munjila yoyimu, neyi mumusakilila muntu, mazu enu nateli kuyilemesha nawa wukuyanukaña mpinji yejima.

7. Kwesekeja na Masamu 27:4, Davidi nianyana kaAsafwi amwekesheli ñahi kusakilila?

⁷ Ambuña aNzambi amavulu kunyima adiña nakusakilila. Wumu hakachi kawu wadiña Davidi. (Tañenu Masamu 69:30.) Walemesheli kudifukula kwalala nawa wamwekesheli kusakilila muyuma yeliliyi. Wahanini yuma yayivulu kulonda yakwashi mudimu wakutuña tembeli. Anyana kaAsafwi chasonekiliwu masamu hela tumina twakushimeka, amwekesheli kusakilila. Mukamina kamu amusakililili Nzambi nakushimuna chakomokeliwu ‘nyidimu yaYehova yakuhayamisha.’ (Mas. 75:1) Chakadi nikujina, Davidi nianyana kaAsafwi amusakililili Yehova hankisu yatambwililiwu. Kudihu njila mumunateli kumwimbujolila Davidi nianyana kaAsafwi?

8-9. Kapostolu Pawulu wayisakililili ñahi amanakwindi niahela, nawa chumanyi chafuminimu?

⁸ Kapostolu Pawulu wayisakililili amanakwindi niahela, nawa wamwekesheli chumichi mumazu ahosheliyi. Mpinji yejima wadiña nakumusakilila Nzambi hakwikala nanawa antu. Wayisakililili hampinji yayisonekeleliyi mukanda. HaAroma 16:1-15, Pawulu wateneni akwaKristu 27 hamajina-hamajina. Pawulu washimwini nindi aPrisila naAkwila ashili “wumi wawu hakatoña kukoola” yena nawa washimwini nindi Fwibi ‘wakwashili antu amavulu’ kushilahu niyena. Wayihamekeli awa amanakwetu niahela adikita.

⁹ Pawulu welukili nindi amanakwindi niahela hiyadiña awaninaku, ilaña hakukunkulula mukanda wayisonekeleliyi Aroma washimwinimu yilwilu yawu yayiwahi. Chikuhwelelu chawamanakwetu niahela chakoleli hakutiya mukanda wakuyihameka wayisonekeleliyi Pawulu anakuwutaña muchipompelu. Chakadi nikujina, wubwambu wawu naPawulu wakoleli chikupu. Komana mpinji yejima mwayihamekaña akwenu amuchipompelu hayuma yayiwahi yahoshañawu niyelañawu?

10. Yesu wayisakililili ñahi akwakumulondela, nawa chumanyi chitunateli kudizilaku?

¹⁰ Yesu watemesheli mazu akuhameka akwakumulondela adiña muyipompelu yikwawu muAsia Minor hamudimu wazatiliwu. Chakutalilahu, wasambilili kuleja chipompelu chakuTiyatira nindi: “Neluka nyidimu yeyi, kukeña kweyi, chikuhwelelu cheyi, nimudimu weyi iwakalakalaña nikuumika kweyi, nawa neluka nami nyidimu yiwunakukalakala chayinu mpinji, yinabadiki chikupu yiwadiña nakukalakala hakusambila.” (Chim. 2:19) Yesu wayihamekeli hanyidimu yazatileñawu nihayilwilu yaletesheli akoñi nyidimu yayiwahi. Hakufumba antu amakwawu muTiyatira, Yesu watachikili namazu akuyikolesha nawa wakunkulwili cheñi namazu akuyikolesha. (Chim. 2:25-28) Yesu wukweti wuswa chikupu chineli diyi mutu wayipompelu yejima. Dichi, hatela kutusakilila hanyidimu yitwamuzatilañaku. Hela chochu, watusakililaña. Akulumpi niwena atela kumwimbujola Yesu.

11. Kwesekeja na Aheberu 12:16, Esawu wamweneña ñahi yuma yajila?

¹¹ Chawushona, antu amakwawu ashimunawu muBayibolu adiña nakusakilila wanyi. Chakutalilahu, Esawu walemesheli wanyi yuma yajila hela chakwila amukulishili kudi anvwali adiña amukeña Yehova nawa amulemesha. (Tañenu Aheberu 12:16.) Wamwekesheli ñahi nindi wadiña nakusakilila  wanyi? Esawu walandishili wukulumpi windi namakundi kudi manakwindi Yakoba. (Kutach. 25:30-34) Chimwahitili mpinji, Esawu waditoñesheli nachuma cheliliyi. Halemesheli chuma chadiñayi nachuku, dichi wateleleli wanyi kutoba chabulili kutambwilayi nkisu.

12-13. A Isarela amwekesheli ñahi nawu adiña nakusakilila wanyi, nawa chumanyi chafuminimu?

¹² A Isarela ateleleli kusakilila muloña ayililili yuma yayivulu. Ayifumishili muwuduñu hampinji yaleteliyi Yehova Yipupu 10 muEjipitu. Kuhiñahu, Nzambi wayipulwishili kudi amashidika añovu amuEjipitu ajilumwiniyi haKaluñalwiji Kachinana. A Isarela azañaleli nawa embili kamina kakushinda kakumushimeka Yehova. Komana atwalekelihu kumusakilila?

¹³ A Isarela chamweniwu kukala, avulameneni yuma yayiwahi yejima yayilililiyi Yehova. Dichi amwekesheli nawu adiña nakusakilila wanyi. (Mas. 106:7) Munjilanyi? “Chipompelu chejima chawanyana kaIsarela chayitobeleli aMosi naAroni,” munjila yikwawu adiña nakumutobela Yehova. (Kwid. 16:2, 8) Nzambi watiyili kutama muloña antu jindi asakilili wanyi. Dichi wahosheli nindi muza waIsarela wejima wakajilumukila muchinkalampata kufumishaku hohu aYoshuwa naKalebi. (Kuch. 14:22-24; 26:65) Tutalenu chitunateli kubula kwimbujola antu akoñeli yuma yatama nichitunateli kwimbujola antu adiña nakusakilila.

14-15. (a) Adisumbula anateli kudisakilila ñahi wumu namukwawu? (b) Anvwali anateli kudizisha ñahi anyanawu kwikala namuchima wakusakilila?

¹⁴ Muchisaka. Antu ejima muchisaka ekalaña namuzañalu neyi adisakililaña. Adisumbula adikundaña chikupu neyi adisakililaña. Nawa chekalaña chaswayi kudanakena neyi wumu naluwañeshi. Iyala wakeña ñodindi wamonaña yuma yayiwahi yelañayi niyahoshaña mwinikwindi nawa “wamuhamekaña.” (Yish. 31:10, 28) Mumbanda wakeña nfumwindi niyena wamusakililaña nfumwindi hachuma chachiwahi chinamwililiwu.

¹⁵ Enu anvwali, munateli kudizisha ñahi anyanenu kwikala namuchima wakusakilila? Anukenuña nenu anyanenu akwimbujolaña yuma yimwelaña niyimwahoshaña. Dichi, yisakililenuña anyanenu neyi ela chuma chachiwahi. Kubombelahu, yidizishenu anyanenu asakilileña neyi antu anayilili yuma  yayiwahi. Yikwashenuña eluki nawu kusakilila kwatela kufuma hamuchima nawa mazu akusakilila iyakuhoshawu anateli kukwasha antu. Chakutalilahu, kansi wamumbanda Clary wahosheli nindi: “Amama chashikijiliwu yaaka 32, adiña namudimu wakukulisha ami niamanakwami ayedi chineli atata ayikasili. Chinashikijili yaaka 32, natoñojokeli nami chatela chayikalilili amama hakwila nawu atukulishi muloña achidiña akansi. Dichi nayisakililili hamudimu wazatiliwu wakutukulisha nawa anlejeli nawu achidi kwaanuka mazu inahosheli, ayitoñojokaña mpinji yejima nawa ayizañaleshaña chikupu.”

16. Shimunenu chakutalilahu chinakumwekesha kusakilila kunateli kukolesha akwetu.

¹⁶ Muchipompelu. Tukuyikoleshaña amanakwetu niahela neyi tuyisakililaña. Chakutalilahu, Jorge mukulumpi wudi nayaaka 28 wakatili nankashi chakwila kakweji kamanini wayileña nakupompa wanyi. Watachikili kuya nakupompa ilaña watwesheleña wanyi kuhana mpanji. Manakwetu Jorge wahosheli nindi: “Natiyileña kutama chinakañenyeña kuzata nyidimu yamuchipompelu. Ifuku dimu hanyima yakupompa, manakwetu wumu wanlejeli nindi: ‘Nasakilili hayuma yiwelili, yinakwashi chisaka chami chikupu. Twatiyileña kuwaha mpanji jiwahanineña yaaka yinahitihu. Mpanji jeyi jinakoleshi chikuhwelelu chetu chikupu.’ Awa mazu anshikili hamuchima nawa natachikili kudila. Mazu indi ankolesheli chikupu.”

17. Kwesekeja na Akolosi 3:15, tunateli kumusakilila ñahi Yehova hachisambu chatumwekeshelañayi?

¹⁷ Kudi Nzambi yetu wukweti chisambu. Yehova watwinka yakuda yayivulu yakuspiritu. Chakutalilahu, twatambwilaña nshimbi hakupompa, mumagazini nihawebusayiti yetu. Komana mwatiyililahu dehi kumpanji, kutaña chibaaba, hela kutala broadcast nawa muhosha mumuchima wenu nenu: ‘Iyi nsañu yinankoleshi’? Tunateli kumusakilila ñahi Yehova? (Tañenu Akolosi 3:15.) Njila yimu, hikumusakilila mpinji yejima mukulomba hayawaana yayiwahi yatwinkayi.—Yak. 1:17.

18. Tunateli kumwekesha ñahi netu twasakililaña hakwikala naMatala aWanta?

¹⁸ Twamusakililaña cheñi Yehova neyi tuhembaña maluña etu akudifukwila nawunyonji. Twawahishaña Matala aWanta mpinji yejima nawa amanakwetu azatilaña kuyisanji ayihembaña chiwahi kulonda  yibuli kukisika. Neyi tuhembaña Matala aWanta chiwahi anateli kushakama yaaka yayivulu nawa kukukeñekaña wanyi yuma yayivulu yakuloñesha nachu. Neyi twila mwenimu, tukwikalaña namali amavulu akuzatisha kumudimu wakutuña nikuloñesha Matala aWanta mukaayi kejima.

19. Chumanyi chamukwashili nkoñi wañinza niñodindi kutwalekahu kukalakala mumudimu wakwenda, nawa chumanyi chimunadiziliku?

¹⁹ Kudi atukalakelaña chikupu. Neyi tumusakilila muntu wudi nakukala, mazu itukuhosha anateli kumukwasha kuhimpa yitoñojoka yindi. Talenu chuma chamwekeni kudi nkoñi wañinza niñodindi. Hanyima yakushimwina ifuku dimu mumpinji yachishika, afuntili kwitala dawu iku anazeyi. Kwatutili nankashi chakwila ñodindi wakaamini nekochi damashika. Chikwachili, wamulejeli nfumwindi nindi wukutwesha wanyi kutwalekahu mumudimu wakwenda. Chihahitili kampinji kantesha hadodina ifuku nantetemena, watambwilili mukanda kufuma kukasanji kamutayi. Muniwu mukanda amuhamekeli hamudimu windi wakushimwina nichomikileñayi. Ashimwini kukala kwamweneñawu kwakufuma heluña dimu nakuya heluña dikwawu mulungu himulungu. Nfumwindi wahosheli nindi: “Awa mazu amukolesheli chikupu nawa walekeli kuhosha jakuleka mudimu wakwenda. Kakavulu, neyi hinukukeña kuleka mudimu wakwenda wankolesheleña nindi tutwalekihu.” Awa adisumbula atwalekelihu kukalakala mumudimu wakwenda kwakwihi nayaaka 40.

20. Chumanyi chitwatela kwilaña mafuku ejima, nawa muloñadi?

²⁰ Dichi, tuyisakilileña akwetu mafuku ejima muyuma yitwahoshaña niyitwelaña. Mazu etu akufuma hamuchima hela yuma yitwelaña yinateli kumukwasha muntu kumanisha kukala kunakumonayi mukanu kaayi munenzali antu abulaña kusakilila. Nawa tukwikala nawubwambu wakola nawakwetu neyi tuyisakililaña. Chasweja kulema, tukumwimbujolaña Tata yetu wukweti chisambu nawa wasakililaña, Yehova.