1. Edena dalai Iesu ese ena gorere e hanamoa Samaria tauna na tenkiu karana e hahedinaraia?

TATAU 10 na e ura dikadikava ta ese bema durudia. Idia na lepra taudia, bona e laloava edia gorere amo na basie namomu. To dina ta, idia ese Iesu, Hahediba Tauna Badana, na dauha amo e itaia. Idia na e kamonai Iesu ese gorere idauidau e hanamodiava, bona e diba momokani ia ese baine hanamodia diba. Una dainai e boi henia, eto: “Iesu, biagumai e, ame bogamai hisi.” Iesu ese unu tatau 10 edia gorere na e hanamo. Bona iboudiai na Iesu ena hebogahisi karana dainai e moale. To, idia ta ese ena moale na ena kara amo e hahedinaraia​—ia ese Iesu e tenkiu * henia. Ena lepra gorerena amo e namo Samaria tauna na e ura “mai moale badana ida” Dirava baine imodaia.​—Luk. 17:12-19.

2-3. (a) Dahaka dainai nega haida tenkiu karana na asita hahedinaraimu? (b) Ina atikol ai dahaka baita herevalaimu?

² Samaria tauna heḡereḡerena, ta uramu ita e kara namo henidamu taudia na baita tenkiu henidia. To nega haida, ta helaloboiomu eda kara eiava hereva amo baita tenkiu henidia.

³ Ina atikol ai, baita itaiamu dahaka dainai eda hereva bona kara amo tenkiu karana baita hahedinaraia na ḡau badana. Baibul ese e herevalaidia taudia haida edia sivarai amo diba baita abimu, idia haida be tenkiu karana e hahedinaraia bona haida be lasi. Bona tenkiu karana baita hahedinaraia totona baita kara ḡaudia haida baita herevalaimu.

4-5. Dahaka dainai tenkiu karana baita hahedinaraia na namo?

⁴ Iehova ese tenkiu karana ai haheitalai namona e hahedinaraia ita edai. Una kara e hahedinaraiamu dalana ta na, ia e hamoaleamu taudia na e hanamodiamu. (2 Sa. 22:21; Sal. 13:6; Mat. 10:40, 41) Bona Baibul ese e hagoadadamu, etomu: “Dirava natuna, ena lalokau, Dirava ba haḡoia.” (Efe. 5:1) Una dainai tenkiu karana baita hahedinaraia badina badana na ta uramu Iehova baita tohotohoa.

⁵ Haida baita tenkiu henidia badina ma ta aita laloa. Tenkiu karana na aniani namona ta na heto​—haida ida ta ania heboumu neganai ta moalelaiamu. Ta karamu ḡaudia na haida ese e moalelaimu neganai, ita danu ta moalemu. Haida ta tenkiu henidiamu neganai, idia danu e moalemu. Ta tenkiu heniamu tauna na e dibamu ita iduruda totona e kara ḡaudia eiava e heni ḡaudia na mai anidia bada. Una ese eda hetura karana ia ida na e hagoadaiamu.

6. Tenkiu herevadia bona gold apolodia be ede e heḡereḡere toma?

⁶ Tenkiu herevana igwauraina na mai anina bada. Baibul na e gwaumu: “Hereva maorona igwauraina na gold apolodia silver boseadia lalodiai na heheto.” (Her. 25:11) Mani gold amo e karaia apolona silver boseana lalonai ena hairai a laloa! Una na dava bada ḡauna. Bema ta ese una harihari ḡauna bema henimu emu hemami be ede bamona? Haida ediai o gwauraimu tenkiu herevadia na dava bada ḡaudia. Mani ina a laloa: Gold amo e karaia apolona na e mia daudaumu. Una heḡereḡerena, haida ediai o gwauraimu tenkiu herevadia na idia ese basie lalodia boiomu.

7. Salamo 26:6-8 ai, David bona salamo itorena taudia haida ese edia tenkiu karana be ede e hahedinaraia toma?

⁷ Idaunegai Dirava ena hesiai taudia momo ese tenkiu karana e hahedinaraia. Idia ta na David. (Salamo 26:6-8 ba duahi.) Ia ese tomadiho ḡoevana na e laloa bada bona ena kara amo tenkiu karana e hahedinaraia. Ena dava bada kohudia momo e heni dubu helaḡa ihaginina ḡaukarana iduruna totona. Asaf garana na e tore salamo, eiava Dirava ihanamona anedia amo edia tenkiu karana e hahedinaraia. Ane ta lalonai, idia ese Iehova e tenkiu henia bona iena “hoa karadia” dainai e imodaia. (Sal. 75:1) E hahedinaraia ḡoevaḡoevamu, David bona Asaf garadia na e urava Iehova enai bae hahedinaraia e henidia hahenamodia na e lalodia bada. Unu salamo e torea taudia ba tohotohodia daladia haida o lalomu, a?

8-9. Aposetolo Paulo ese tadikakana be ede e hanamodia toma, bona dahaka e vara?

⁸ Aposetolo Paulo ese tadikakana e hanamodia dalana na edia kara e herevalai. Dirava e ḡuriḡuri heniava neganai idia daidiai e tenkiuva. Danu e tore henidia neganai ena hahenamo herevadia e gwaurai. Roma 16:1-15 ai Paulo ese Kristen tadikakadia 27 ladadia e gwaurai. Paulo ese Priskila bona Akula e herevalaidia neganai e gwa idia na ia dainai “mokona e mase.” Bona Foibe e herevalaia eto ia ese “hutuma vada e durudia,” Paulo danu. Ia ese e ḡaukara goadagoadava tadikakadia bona taihudia na e hanamodia.

⁹ Paulo na mai dibana tadikakana bona taihuna na dia ḡoḡoevadae, to Roma taudia e tore henida revarevana dokonai, ia ese edia kara namodia e herevalai. Mani a laloa, Paulo ena revareva na kongrigeisin ai e duahia neganai, unu tadikaka bona taihu na e hagoadadia. Una dainai, ta dibamu edia hetura karana Paulo ida na e goada. Emu kongrigeisin taudia edia hereva eiava kara namodia dainai hanaihanai o hanamodiamu, a?

10. Iesu ese tadikakana e hanamodia dalana amo dahaka ta dibamu?

¹⁰ Iesu ese Asia Minor ai kongrigeisin haida e hereva henidia neganai, edia ḡaukara namodia dainai e hanamodia. Heḡereḡere, ia ese Tuatira kongrigeisin e hamaoroa, eto: “Emu kara, emu lalokau, emu abidadama, emu heduru bona emu haheauka na dibagu. Emu kara gabedia ese danu emu kara gunadia e hereamu.” (Apok. 2:19) Iesu ese edia ḡaukara e bada karana mo se herevalaia to danu e hanamodia badina kara namodia e goadalaiva. Ena be Iesu ese Tuatira taudia haida e sisiba henidia, to ena hereva matamana bona dokona ai e hagoadadia. (Apok. 2:25-28) Mani a laloa, Iesu na kongrigeisin iboudiai kwaradia. Eda ḡaukara daidiai baine tenkiu henida na asi anina. Ena be mai ena dagi, to ia ese haida e hanamodia eiava e tenkiu henidia. Elda taudia ediai una na haheitalai namona!

11. Heberu 12:16 ai, Esau be edena dala ai Iehova se lalokau henia bona se matauraia?

¹¹ Baibul ese e herevalaidia taudia haida na tenkiu karana asie hahedinaraia. Heḡereḡere, ena be Esau tamana sinana na Iehova e lalokau heniava bona e matauraiava, to ia ese Iehova na se lalokau henia bona se matauraia. (Heberu 12:16 ba duahia.) Ia be edena dala ai Iehova se matauraia? Ia na maoromaoro ena roboa ahuna na tadina Iakob e henia, aniani davana. (Gen. 25:30-34) Gabeai, Esau na  e lalohisihisi e karaia ḡauna dainai. To ia ese Iehova na se lalokau henia bona se matauraia, una dainai roboa ahuna se abia lou neganai e maumau na asi anina.

12-13. Israel taudia be edena dala ai tenkiu karana asie hahedinaraia, bona dahaka e vara?

¹² Israel taudia na badi momo daidiai tenkiu karana bae hahedinaraia. Iehova ese Hisihisi 10 amo Aigupto e hahisia murinai, idia na e ruhadia. Bena Dirava ese Aigupto ena tuari oreana na Davara Kakakakana ai e hamasedia, unu amo idia e hamauridia. Israel taudia na e moale dainai kwalimu anena ta amo Iehova e hanamoa. To idia ese unu kara namodia be e lalotao eiava?

¹³ Israel taudia na hekwakwanai matamatadia e davari neganai, Iehova ese idia daidiai e kara kara namodia na idia ese e laloboio. Idia ese tenkiu karana na asie hahedinaraia. (Sal. 106:7) Edena dala ai? “Israel hegogona idoinai ese Mose bona Aaron e maumauraidia”​—idia na Iehova e maumauraia. (Eso. 16:2, 8) Edia kara dainai Iehova na e lalohisihisi. Gabeai e peroveta, Israel besena na tano ḡaḡaena ai do baine ore vaitani, a Iosua bona Kaleb be baine hamauridia. (Num. 14:22-24; 26:65) Mani aita itaia edena dala ai haheitalai dikadia basita tohotohodia to haheitalai namodia e hahedinarai taudia baita tohotohodia.

14-15. (a) Edena dala ai headava taudia na bae hahenamo heheni? (b) Tama sina ese natudia be ede bae hadibadia toma tenkiu karana bae hahedinaraia?

¹⁴ Ruma bese lalonai. Ruma bese taudia ta ta ese tenkiu karana bae hahedinaraia neganai iboudiai na be moalemu. Headava taudia bae hahenamo heheni neganai, edia hetura karana na be goadamu. Bona ta ta edia kerere be gwautaomu na dia auka. Adavana e lalokau heniamu tauna na adavana ena hereva bona kara namodia mo se lalomu, to “e imodaiamu” danu. (Her. 31:10, 28) Bona hahine namona na adavana e hadibaiamu ienai e itamu kara namodia na e moalelaimu.

¹⁵ Tama sina, natumui be ede ba hadibadia toma tenkiu karana bae hahedinaraia? Ba helalotao, natumui na emui hereva bona kara be tohotohomu. Una dainai haheitalai namona ba hahedinaraia totona, natumui ese idurumui ḡaudia haida e karamu neganai ba tenkiu henidia. Danu, natumui ba hadibadia haida  ese idia daidiai ḡau haida e karamu neganai bae tenkiu henidia. Natumui ba durudia bena bae laloparara tenkiu herevana na mai kudoudia ibounai ida bae gwauraia bona edia hereva amo haida bae hagoadadia. Heḡereḡere, eregabe hahinena ta ladana Clary na eto: “Sinagu na laḡanina 32 ai, sibona ese natuna tatoiosi e naridia. Laḡanigu e 32 neganai, sinagu laḡanina unuhetomana ai e hekwarahiva negana na laloa. Una dainai na hamaoroa lau na na moalemu badina lau bona taihugu memerodia raruosi e narimai namo herea. Vanegai, sinagu ese e hamaorogu egu hereva na kudouna ai doini e lalotaomu, e lalometaumu neganai egu hereva e lalomu bona una ese e hagoadaiamu.”

16. Tenkiu karana ese haida baine hagoadadia diba dalana ta mani a herevalaia.

¹⁶ Kongrigeisin lalonai. Tadikaka bona taihu ediai tenkiu karana ta hahedinaraiamu neganai, ta hagoadadiamu. Heḡereḡere, Jorge, elda ta laḡanina na 28, na e gorerea. Hua ta lalonai hebou na sela. Danu ena be gabeai hebou ma e laova, to hebou ai kaha haida na se karava. Jorge na eto: “Egu gorere dainai kongrigeisin madunadia asina hua namonamova neganai, na hemamiva egu mauri na asi anina. To hebou ta murinai, tadikaka ta na lau e hamaorogu: ‘Na uramu baina tenkiu henimu badina egu ruma bese ediai oi na haheitalai namona. Laḡani haida gunadiai emu tok na a moalelaiva. Unu tok ese emai abidadama na e hagoadaia.’ Una hereva ese kudougu e hamarerea dainai, na tai. Iena hereva ese lau na e durugu.”

17. Kolose 3:15 ai, edena dala ai Iehova baita tenkiu henia ena hariharibada karana dainai?

¹⁷ Eda hariharibada Diravana enai. Iehova ese ita na lauma aniani momo herea e henidamu. Heḡereḡere, eda hebou idauidau, eda magasin, bona eda websait amo heduru herevadia ta abimu. Nega ta tok ta o kamonai, atikol ta o duahia, eiava broadcasting vidiona ta o itaia bena ini o lalo toma, ‘Una na lau e herevalaigumu,’ a? Edena dala ai eda tenkiu karana baita hahedinaraia Iehova enai? (Kolose 3:15 ba duahia.) Dala ta na, ini harihari ḡaudia namodia daidiai hanaihanai eda ḡuriḡuri ai baita tenkiu henia.​—Iak. 1:17.

18. Eda Kingdom Hall dainai eda tenkiu karana baita hahedinaraia daladia haida be dahaka?

¹⁸ Iehova enai eda tenkiu karana baita hahedinaraia dalana ma ta na, eda tomadiho gabudia baita haḡoevadia namonamo. Hanaihanai eda Kingdom Hall baita  haḡoeva bona baita hanamodia, bona kongrigeisin ena saun bona vidio e ḡaukaralaimu taudia ese unu kohu na bae ḡaukaralai namonamo. Eda Kingdom Hall baita naridia namonamomu neganai, be mia daudaumu bona basie dika haraḡamu. Unu amo, moni momo baita habou dibamu tanobada heḡeḡemadai Kindom Hall ihaginidia bona ihanamodia ḡaukaradia idurudia totona.

19. Seket tauna ta bona adavana edia ekspiriens amo dahaka o dibamu?

¹⁹ Ita daidai e hekwarahimu taudia ediai. Ta enai eda tenkiu karana baita hahedinaraiamu neganai, eda hereva ese ia na be duruamu e davarimu hekwakwanaidia baine haheaukalai totona. Seket tauna ta adavana ida ediai e vara ḡauna mani a laloa. Keru negana ta ai idia na dina ibounai lalonai e haroro murinai, e lou edia ruma. Keru bada herea dainai taihu na ena sueda e karaia bona e mahuta. Dabai, adavana e hamaoroa ia na dia heḡereḡere dainai seket ḡaukarana na basine karaia dibamu. Una dina ai, brens ofes amo revareva ta e abia, bona una revareva na taihu e siai henia. Una revareva ai taihu e hanamoa ena hesiai ḡaukara bona haheauka karana dainai. E hadibaia wiki ta ta ai noho gabudia idauidau ilao henidia na vaia mai hekwarahina. Taihu adavana na eto: “Una hahenamo herevana ese ia na e hagoadaia dainai, seket ḡaukara baine rakatania herevana na ma se gwauraia lou. To, nega haida seket ḡaukara irakatanina lalohadaina na abiava neganai, ia ese lau e hagoadaguva.” Unu headava taudia na kahirakahira laḡani 40 lalodiai seket ḡaukara e karaia.

20. Dina ta ta ai dahaka baita kara na namo, bona dahaka dainai?

²⁰ Namona na dina ta ta ai eda hereva bona kara amo ma haida baita hanamodia. Eda hereva bona kara amo tenkiu karana baita hahedinaraiamu neganai, ta baine durua dina ta ta ena hekwakwanai eiava lalohekwarahi baine haheaukalai totona. Bona eda tenkiu karana baita hahedinaraiamu neganai eda hetura karana ma haida ida na be hagoadaiamu. Mai anina bada ḡauna na, ita ese Tamada Iehova, hariharibada bona haida e lalodiamu Diravana, baita tohotohoamu.