MWAHA WOOSOMIYA 8
Nlattuni ninlamuliyeehu woonihera wiira ninaasukhuru?
“Moonihere wiira nnaasukhuru.”—AKOL. 3:15.
NCIPO 46 Obrigado, Jeová!
NINHALA WIITTHUCANI? *
1. Nlopwana ooSamariya aavonihiye ni Yesu oonihenre cani usukhuru?
ALOPWANA khuumi yaari oovelavela. Ayo yaari ni makuttula ni khayaaweherera wiira yaanaahala uvona. Masi nihuku nimoca, ayo alopwanaayo yahomoona Yesu, Mwiitthucihi Muulupale nari uttayi. Ayo yaheewa yeeriyaka wiira Yesu anaavoniha khula iretta ni yaanaakupali wiira uyo aanaahala waavoniha. Phimaana, ayo yahokhuwela yeeraka: “Yesu, Mwiitthucihi, unoonele uthunku!” Vano otheene caya yahovonihiya. Unawoonannya wiira otheene caya yahonsukhuru Yesu wanrimani waya. Masi namakuttula mmoca paasi phaapankale-tho itthu, uhiya usukhuru wanrimani wawe paasi—uyo ahokumihera vate usukhuru wawe, awula ahoonihera wiira aanansukhuru * Yesu. Nlopwana ooSamariya aavonihiyoole, ahoona wiira aalamuliya unttottopela Nluku “akumiheraka ncuu nawe vate”—Luka 17:12-19.
2-3. a) Kontha isiyani ninaaliyalaka usukhuru? b) Ninhala wiitthucani nhina ula mwahoola?
2 Toko nlopwana ooSamariya, hiiva nimpheela woonihera wiira ninawaasukhuru ale annipankela citthu comaana. Masi ukati nkina, hiiva pooti uliyala wuuluma awula upanka citthu cinoonihera wiira ninaasukhuru.
3 Nhina ula mwahoola, ninaahala usoma nlattuni unreeraaya wuuluma awula upanka citthu cinoonihera wiira ninaasukhuru. Ninaahala usoma matakihero aatthu anoolumiya mbiiblyani yoonihenre usukhuru ni ale yahoonihenre usukhuru. Ninaahala wiitthuca ciicammo mananna owoonihera wiira ninaasukhuru.
NLATTUNI NINLAMULIYEEHU WOONIHERA WIIRA NINAASUKHURU?
4-5. Nlattuni ninlamuliyeehu woonihera wiira ninaasukhuru?
4 Yehova naavaha nthoonyero nooreera utakihiya ninoonihera mananna oosukhuru. Inanna imoca uyo cinooniheraawe usukhuru, ukhanle waatthuvela ale anonciveliha. (2 Sam. 22:21; Isaa. 13:6; Mat. 10:40, 41) Ni Ibiiblya inaanisovenriha ukhala “ontakiha Nluku, khampa asaana oofentiya.” (Efesu 5:1) Phimaana, itthu imoca uniiriha upheela woonihera wiira ninaasukhuru ukhalaka wiira nimpheela untakiha Yehova.
5 Ihaavo itthu ikina inthoonyera kontha isiyani nihaana woonihera usukhuru. Usukhuru unkhala khampa iyoolya—inciva nalyaaka naakhwiihu. Nacuwelaka wiira akhwiihu anaasukhuru itthu yaapankenleehu, hiiva ninkhalaka ootteeliya venci. Phimaana, nooniheraka wiira ninaasukhuru, ninawaatteeliha nrima akhwiihu. Ntthu nonsukhurwiihu naakhala oocuwela wiira phataari wiikurumicalyaawe unikavihera awula univaha itthu yaapheeleehu. Vano, upatthaniihu ni uyo unaakhala woolipa.
6. Moolumo owoonihera wiira ninaasukhuru anlikanaca cani ni masaa oopankiya niiwooru?
6 Nooniheraka wiira ninaasukhuru, nimpanka itthu yofayita. Ibiiblya ineera: “Khampa masaa owooru ari mmirittani coparata, phinkhalaaya nuulumo nowuulumiya ukati womaana.” (Miru. 25:11) Muupuwele inanna caahalaaya ureera masaa oopankiya niiwooru ni yeesiye mmirittani coparata! Ni muupuwele iperesu yaahalaaya ukhalana waari wiira yaanaatumihiya! Mwaahala ukhala cani unari wiira nhovahiya ayo masaayo? Moolumweenyu owoonihera wiira nnaasukhuru anaakhalana ifayita imocaaru. Ni muupuwele co: masaa owooru yaanaahala ukhala ukati mwinci. Inanna imoca, yotheene inoolumeenyu wiira moonihere usukhuru, khinhala uliyaliya ni inaahala ulemelihiya naale munwuulumeleenyu muukumini waya motheene.
AYO YAHOONIHERA WIIRA YAANAASUKHURU
7. Toko cinthoonyeraaya Isaalimu 27:4, Davidi ni anamantikha isaalimu akina yoonihenre cani wiira yaanaasukhuru?
7 Atthu enci yanswalela Yehova khalayi yaanaasukhuru. Ntthu mmoca ari Davidi. (Nsome Isaalimu 27:4.) Uyo aanaavaha ifayita cinene uswali weekhweeli ni iyo yaanawoonannya ni citthu caapankaawe. Uyo ahocanka maalyaawe wiira akavihere utekiya inupa ya Nluku. Asiculawe Asafi yahoonihera usukhuru ukati wantikhalyaaya isaalimu awula icipo coottottopela. Munciponi nimoca, ayo yahonsukhuru Nluku ni yahoonihera wiira yaanaasukhuru ‘miteko cootikhiniha’ ca Yehova. (Isaa. 75:1) Unawoonannya wiira Davidi ni asiculawe Asafi yaanaapheela umoonihera Yehova wiira yaanansukhurweela iparakha cotheene caavahaawe. Nnaakhitiri wuupuwela mananna cinlamuliyeenyu waatakiha ayo anamantikha isaalimwaayo?
Iwarakha Paulu yaawantikhenlyaawe arooma inniitthuciha isiyani nhina woonihera wiira ninaasukhuru? (Nwehe iparaagarafu 8-9) *
8-9. Paulu oonihenre cani wiira anawaattottopela asirokorawe ni asuulupalyaawe, ni isiyani inoonannya?
8 Apostolu Paulu aanawaalemeliha asuulupalyaawe ni asirokorawe ni ahoonihera iyo ni mananna aawuulumilyaawe. Ukati waalompakaawe veekha, Paulu khaahiya unsukhuru Nluku nlattu wo ayo. Ukati wantikhenlyaawe iwarakha, Paulu ciicammo ahaahimerya wiira ayo yahaana ifayita. Nhina ittima 15 cimpaceriha iwarakha ya Arooma 16, Paulu haaromola ni macinaaya makristau 27. Paulu ahoopuwela wiira Priska ni Akila ‘yaaholeva isiko caya’ nlattu wa Paulu ni ahonromola Febe wiira ‘ahaakiha atthu enci’ mpaka ciicammo ahomwaakiha Paulu. Paulu ahaattottopela asuulupalyaawe ni asirokorawe oofentiya ni owiikurumica.—Aroo. 16:1-15.
9 Paulu aanaacuwela wiira asuulupalyaawe ni asirokorawe yaanaavonyaka, masi wiimaleloni iwarakha yaawantikhenlyaawe arooma, uyo ahottonka meettelwaaya omaana. Muupuwele inanna caakhanlyaaya ayo mayamunnaayo ukati weewaaya moolumo a Paulu yasomiyaka wanlokoni! Unawoonannya wiira upatthani wa Paulu ni ayo wahokhala woolipa cinene. Niireke nyuuva munnaattottopelaka asuulupaleenyu ni asirokorinyu owanlokoni nlattu wo citthu comaana cinoolumaaya ni cimpankaaya?
10. Isiyani ineetthuceehu noonaka mananna Yesu caattottopenlyaawe attharyaawe?
10 Nhina moolumo yaavahilyaawe atthu omaloko o Ásia Menor, Yesu ahottottopela miteko caattharyaawe. Ukati waavahaawe moolumo atthu onloko no Tiyatira, Yesu aapacenre eeraka co: “Kinaacuwela meettelwaa, nifento naa, waamini waa, ntekwaa ni uvilela waa, ni kinaacuwela wiira meettelwaa ophiyaaru menci uvikana meettelwaa okhalayi.” (Apoka. 2:19) Yesu kheerale paasi wiira ntekwaaya waanawinciva, masi ciicammo ahaattottopela nlattu wo makhalelo yaawiiriha upanka citthu comaana. Unookhalaru wiira Yesu aapheela waalaka atthu akina onloko nooTiyatira, uyo ahopacera ni ahomalihera moolumwaawe aattottopelaka. (Apoka. 2:25-28) Muupuwele ukhulupale urinaawe Yesu khampa nhooleli o maloko otheene. Uyo khaalamuliya unisukhuru nlattu wo nteko unonvareleehu. Masi unookhalaru commo, uyo naanisukhuru. Nno ntakihero nomaana ninlamuliyaaya utakiha mahumu owanlokoni!
AYO KHAYOONIHENRE WIIRA YAANAASUKHURU
11. Toko cinttonkaaya ilivuru yo Maberewu 12:16, Isawu oonela cani citthu cittakattiifu?
11 Woocukuliha nrima, ahaavo atthu anttonkiya mbiiblyani yahaasukhunru. Wootakihera, unookhalaru wiira Isawu oonuwihiye naasipaapaawe yanfenta ni yanhisima Yehova, uyo khaalemeliha citthu cittakattiifu. (Nsome Maberewu 12:16.) Uhisukhuru wa Isawu woonannyaale cani? Isawu ahomwaakakhanihera Yakopi iyuulupalyaawe ni nkhuki mmoca woyoolya paasi. (Upha. 25:30-34) Wahoolo, Isawu ahottharuwa nlattu wo itthu yaathanlalyaawe. Ukhala wiira khaasukhunru itthu yaarinaawe, Isawu khaalamuliya uttekutta ukati waathuwiyaawe iparakha yaasunkeriyaawe mwaana oopacera uyariya.
12-13. Asarayeli yoonihenre cani uhisukhuru, ni yaamalenle cani?
12 Cahaavo citthu cinci asarayeli caalamuliyaaya usukhurweela. Ukati Yehova waawaanalyaawe Ihasara Khuumi Wiiciipitu, asarayeli yahoopoliya wiira ahiye ukhala ipottha. Ni Nluku ahowoopola ukati weevakacalyaawe anatoropa oWiiciipitu Mpahari Yooseerya. Ule ukatyuule, asarayeli yahosukhuru venci mpaka yaheepa ncipo yanttottopelaka Yehova. Masi niireke ayo yaheekurumica wiira ahihiye usukhuru?
13 Ukati asarayeli yaaphwanyalyaaya masakha makhwaawe, ayo yahaakuva uliyala citthu comaana cotheene Yehova caapankenlyaawe. Vano ayo yahohiya usukhuru. (Isaa. 106:7) Manannani? “Apoovu otheene oosarayeli yahanca unttekhutta Moses ni Arawu muuthakoni”—khweeliini, ayo yanttekutta Yehova. (Nkw. 16:2, 8) Yehova khaaciveliye kontha apoovwaawe yahoonihera uhisukhuru. Wahoolo, uyo ahohimya wiira asarayeli otheene yaakhala ule ukatyuule yaanaahala umalela ukhwa muuthakoni; Josuwe ni Kalepe phaahala uhala paasi. (Manu. 14:22-24; 26:65) Vano nttwee noone manannani ninlamuliyeehu uhiya waatakiha atthu oohisukhuru, masi waatakiha ale yoonihenre usukhuru.
MANANNA OWOONIHERA WIIRA NINAASUKHURU
14-15. a) Anamathelana anlamuliya usukhurwana cani? b) Ayari anlamuliya weetthuciha cani asaanaaya usukhuru?
14 Watthokoni. Amuci otheene anaakaviheriya wakhalaka wiira khula ntthu owatthokoni nawoonihera usukhuru. Anamathelana yasukhurwanaka, anaatepa wiiwanana. Ni khunaarikela ulevelelana. Nlopwana owaalemeliha amwaarawe kahi wiira naaweha paasi citthu comaana cimpankaaya, masi ciicammo ‘nawunwa ni nawaattottopela.’ (Miru. 31:10, 28) Ni nthiyana oocuwelaca nawaahimerya awanuwawe citthu cinoncivela cimpankaaya.
15 Wakhala wiira nhaana asaana, nyuuva nnolamuliya weetthuciha cani asaaniinyu usukhuru? Muupuwele wiira asaaniinyu anaahala utakiha citthu cotheene cinoolumeenyu ni cimpankeenyu. Phimaana yoopankelakani itthu, mwaavahe ntakihero mwaawiirelaka “kihosukhuru”. Ciicammo, mweetthucihe asaaniinyu wiira “kihosukhuru” yaapankeliyaka itthu naatthu akina. Mwaakavihere asaaniinyu ucuwela wiira usukhuru unkhuma wanrimani ni moolumwaaya pooti utepa upanka ratta. Wootakihera, nthiyana mmoca neehaniya Clary aheera co: “Amaama ukati waarinaaya myaakha 32, yahohiyeriya asaana araru ni yahaana yawuunuwihaka veekha. Upiiha waka myaakha 32, kinawoona wiira khweeli amaama wahaarikela ule ukatyuule. Vano phaarwaaka weerela amaama wiira kinawaasukhuru venci wiikurumica waya unuunuwiha mi ni asihimaaka. Mphiyaaruni, amaama yahowa ukiirela wiira khanliyala inanna yaattottopenlyaaka, ni anaakhala otteeliya nihuku ninoopuwelaaya moolumwaaka.”
Nwiitthucihe asaaniinyu usukhuru (Nwehe iparaagarafu 15) *
16. Nttonke ntakihero nimoca ninoonihera wiira usukhuru unawaalipiha akhwiihu.
16 Wanlonkoni. Naahimeryaka asuulupaleehu ni asirokorihu wiira ninawaasukhuru, ninaahala waalipiha. Wootakihera, humu owanlokoni rina myaakha 28 neehaniya Jorge, ahowerennya cinene. Wahovira mweeri mmoca uyo woohikhitiri urwaa umikutthaanoni. Ni hataa ukati wancalyaawe urwaa, uyo khaakhitiri upanka miphantte umikutthaanoni. Jorge ahoolumaca eeraka co: “Kaayoona ukhala oomala nteko nlattu woohikhitiri upanka citthu caapankaaka ni uhikhitiri uvara miteko cowanlokoni. Masi nihuku nimoca, umala waya nkutthaano, munna mmoca ahowa ukiirela: ‘Kinaasukhuru cinene ntakihero nomaana naavahaleenyu amucyaaka. Caanaanicivela cinene myaha caataphuleleenyu myaakha civinrennya va. Nnyo myahannyo ciholipihaca waamini wihu.’ Ayo moolumwaayo yahokivara nrima ni kahokela wunla. Iyo phi itthu yaapheelaka wiiwa ule ukatyuule.”
17. Toko cinttonkaaya Akolosu 3:15, ninlamuliya uthoonyera cani wiira ninaasukhuru citthu cinnivahaawe Yehova?
17 Unsukhuru Nlukwiihu oovaha. Yehova naanivaha iyoolya yoominepani yinci. Ninawiitthucihiya citthu cofayita umikutthaanoni, mmarevistani ni nhina isayiti cihu. Niireke nhopaca wiiwa mwaha unkutthaanoni, usoma mwaha nrevistani awula woona ividiyu yo JW Broadcasting ni wiira: ‘Ila phi itthu yaapheelaka wiiwa’? Nnolamuliya uthoonyera cani wiira nnansukhuru Yehova? (Nsome Akolosu 3:15.) Inanna imoca ikhanle unlompa ninsukhuruku Yehova citthu cotheene cinnivahaawe.—Tiya. 1:17.
Ukavihera ukweca ni ureeriha Isalau Yoomwene ankhala mananna owoonihera wiira ninaasukhuru (Nwehe iparaagarafu 18)
18. Ninlamuliya upankani wiira nisukhurweele Isalau Yoomwene itekeliyeehu?
18 Hiivano ciicammo ninaathoonyera wiira ninansukhuru Yehova nawaceraka ratta nipuro ninswaliihu. Khaninhiya ukweca ni ureherera nkhayi Isalau Coomwene cihu, ni ale antafiti ikaruma cooruma ni covidiyu cowanlokoni anaavarela nteko ratta wiira ahitankule. Narehereraka Isalau Coomwene cihu, nnyo cinaahala ukhala ukati mwinci woohikwanyuwa ni khacinhala upheela urehereriya cinene. Napankaka commo, khaninhala urihakaca nsurukhu waahala uvareliya nteko wiira citekiye ni cirehereriye Isalau Coomwene cikina ntuninyani.
19. Mwiitthucale isiyani ni ile yankhumelenle mootoli o isirikwiitu ni amwaarawe?
19 Waasukhuru ale aneekurumica wiira anikavihere. Nooniheraka wiira ninaasukhuru, moolumweehu pooti urukunusa mananna ntthu cinoonelaawe marikariko arinaawe. Moone itthu yankhumelenle mootoli osirikwiitu mmoca ni amwaarawe. Nihuku nimoca nooririya, yaaturuwenle uwaani anoocaale. Waanooririya cinene mpaka amwaarawe yaarupale anawanre nikacako. Uwicisu, ayo yahowiirela awanuwaya wiira khayaahala ukhiri-tho uvara nteko wowootola maloko. Yoole uwicisuule, amwaarawe mootoli osirikwiituule yahoveleliheriya iwarakha yaakhuma uPeteli. Iwarakheeyo yanawaattottopela nlattu wonteko waavaraaya ni uvilela waya. Ayo yahokupali wiira waanawaarikela uthamela inupa cikina khula isumana. Awanuwaya yaheera: “Amwaaraka yahotteeliya cinene nlattu woottottopeliya, mpaka khayuupuwenle-tho uhiya uvara nteko wowootola maloko”. Ooyeeli yahokhala myaakha 40 yavaraka nteko wowootola maloko.
20. Isiyani inlamuliyeehu wiikurumica upanka khula nihuku, ni nlattuni?
20 Otheene cihu niikurumice khula nihuku wuuluma awula upanka citthu cinoonihera wiira ninawaasukhuru akhwiihu. Moolumweehu ni citthu cimpankeehu pooti ukhala itthu impheelaaya wiiwa akhwiihu wiira akhitiri waanana masankiho otuninyani icanre atthu oohisukhuru. Ni nooniheraka wiira ninaasukhuru, ninaahala uphwanya upatthani uhinhala umala. Itthu yuulupale cinene, ukhalaka wiira ninaahala untakiha Paapeehu oovaha ni oosukhuru, Yehova.
NCIPO 20 Jeová Deu-nos o Seu Melhor
^ par. 5 Yehova, Yesu ni namakuttula ooSamariya anniitthuciha isiyani nhina woonihera wiira ninaasukhuru? Ula mwahoola unaahala uwoopela mwaha ayo atthwaayo ni akina. Ninaahala woopela mwaha nlattuni unreeraaya woonihera wiira ninaasukhuru ni ninaahala wiitthuca mananna owoonihera wiira ninaasukhuru.
^ par. 1 MOOLUMO ANTAPHULELIYA: Unsukhuru ntthu unkhala unvaha ifayita uyo ntthuuyo. Nna nuulumonna pooti waaca usukhuru weekhweeli unkhalanaawe ntthu wanrimani.
