1. ¿Ndáaña ke̱ʼé iin ta̱ samaritano tá sa̱ndáʼa ta̱ Jesús miíra?

NI̱NDI̱ʼI̱NÍ-INI u̱xu̱ na̱ ta̱a na̱ xi̱kuumií lepra. Xi̱niso̱ʼona xa̱ʼa̱ ta̱ Jesús, ña̱ va̱ʼa sándaʼara na̱ kúúmií kue̱ʼe̱ ta ka̱ndíxana ña̱ kivi sandáʼarana. Ña̱kán tá xi̱nina ña̱ va̱xira, ni̱ka̱ʼa̱nna xíʼinra: “Jesús, Maestro chindeé ndi̱ʼi̱”. Ta̱ Jesús xi̱niso̱ʼora ña̱ ni̱ka̱ʼa̱nna tasaá sa̱ndáʼara ndiʼina. Sana ndiʼina ta̱xina tíxa̱ʼvi * xa̱ʼa̱ ña̱ ke̱ʼé ta̱ Jesús xíʼinna. Soo iinlá kúú ta̱ ni̱na̱ʼa̱ña xíʼin tu̱ʼun ña̱ ni̱ka̱ʼa̱nra xíʼin ta̱ Jesús. Ta̱yóʼo xi̱kuura ta̱ ñuu Samaria, ta nda̱a̱ ta̱xira tíxa̱ʼvi ndaʼa̱ Ndióxi̱ nu̱ú chútú ku̱a̱ʼání na̱ yiví (Luc. 17:12-19).

2, 3. a) ¿Nda̱chun sava yichi̱ kǒo táxiyó tíxa̱ʼvi? b) ¿Ndáaña sakuaʼayó nu̱ú artículo yóʼo?

² Táki̱ʼva ke̱ʼé ta̱ ta̱a kán, miíyó kúni̱yó taxiyó tíxa̱ʼvi ndaʼa̱ na̱ chíndeétáʼan xíʼinyó. Soo sava yichi̱ nándósóyó taxiyó tíxa̱ʼvi ndaʼa̱ inkana.

³ Nu̱ú artículo yóʼo, kotoyó nda̱chun ndáyáʼviní ña̱ taxiyó tíxa̱ʼvi. Saátu ka̱ʼa̱nyó xa̱ʼa̱ sava na̱ xi̱ndasakáʼnu Ndióxi̱ tiempo xi̱naʼá na̱ ta̱xi tíxa̱ʼvi ta saátu xa̱ʼa̱ inka na̱ va̱ása níkeʼé ña̱yóʼo. So̱ndíʼi ka̱ʼa̱nyó xa̱ʼa̱ ña̱ kivi keʼéyó ña̱ va̱ʼa na̱ʼa̱yó ña̱ táxiyó tíxa̱ʼvi.

4, 5. ¿Nda̱chun xíniñúʼu na̱ʼa̱yó ña̱ táxiyó tíxa̱ʼvi?

⁴ Jehová chínúura yichi̱ nu̱úyó ña̱ taxiyó tíxa̱ʼvi. Kéʼéra ña̱yóʼo tá táxira ña̱ va̱ʼa ndaʼa̱ na̱ kéʼé ña̱ kúni̱ra (2 Sam. 22:21;  Sal. 13:6; Mat. 10:40, 41). Biblia káʼa̱nña ña̱yóʼo xíʼinyó: “Kundiku̱nndó yichi̱ Ndióxi̱, chi se̱ʼera kúúndó ta kúʼvi̱ní-inira xínira ndóʼó” (Efes. 5:1). Ña̱kán táxiyó tíxa̱ʼvi chi saá náʼa̱yó ña̱ ndíku̱nyó yichi̱ mií Jehová.

⁵ Inka xa̱ʼa̱ ña̱ táxiyó tíxa̱ʼvi kúú ña̱yóʼo. Tá táxina tíxa̱ʼvi ndaʼa̱yó, kúsi̱í-iniyó. Soo tá táxitu miíyó tíxa̱ʼvi ndaʼa̱ inkana kúsi̱í-inina. ¿Nda̱chun kúsi̱í-inina? Saáchi tá chindeétáʼan inkana xíʼinyó á táxina ña̱ xíniñúʼuyó, kúnda̱a̱-inina ña̱ va̱ʼaní ke̱ʼéna. Saá va̱ʼaníka xáa̱yó kítáʼanyó xíʼinna.

6. ¿Nda̱saa kítáʼan ña̱ táxiyó tíxa̱ʼvi xíʼin iin manzana tí oro?

⁶ Iin ña̱ va̱ʼaní kúúña tá táxiyó tíxa̱ʼvi. Biblia káchiña: “Táki̱ʼva íyo manzana tí oro tí liviní náʼa̱, ki̱ʼva saá íyo tu̱ʼun ña̱ káʼa̱nyó míí tiempo ña̱ xíniñúʼuyó ña̱yóʼo” (Prov. 25:11). ¿Á su̱ví liviní iin manzana tí oro? Ndixava, ta saátu ndáyáʼviní tíyóʼo. ¿Nda̱saa kuniyó tá ná taxina iin regalo táʼan ña̱yóʼo ndaʼa̱yó? Va̱ʼaníva kuniyó, ña̱kán tá ná taxiyó tíxa̱ʼvi ndaʼa̱ inkana kusi̱íní-inina. Tá ná taxina iin manzana tí oro ndaʼa̱yó, kundaayó tíyóʼo ku̱a̱ʼání tiempo, saátu tá ná taxiyó tíxa̱ʼvi ndaʼa̱ inkana kundayáʼviní ña̱yóʼo nu̱úna ta va̱ása nandósó kamana xa̱ʼa̱ña.

7. a) Táki̱ʼva káʼa̱n Salmo 27:4, ¿nda̱saa ni̱na̱ʼa̱ ta̱ David ña̱ ta̱xira tíxa̱ʼvi? b) ¿Nda̱saa ta̱xi na̱ veʼe ta̱ Asaf tíxa̱ʼvi?

⁷ Ta̱ David xi̱kuu iin ta̱ va̱ʼaní nda̱sakáʼnu Ndióxi̱ tiempo xi̱naʼá, ta va̱ʼaní ni̱na̱ʼa̱ra ña̱ ta̱xira tíxa̱ʼvi (kaʼvi Salmo 27:4). * Xíʼin ña̱ ke̱ʼéra ni̱na̱ʼa̱ra ña̱ xi̱ndayáʼviní nu̱úra ña̱ ke̱ʼé Ndióxi̱ xa̱ʼa̱ra. Xa̱ʼa̱  ña̱yóʼo ta̱xira ku̱a̱ʼání xu̱ʼún ña̱ va̱ʼa kuva̱ʼa templo. Inka na̱ va̱ʼaní ta̱xi tíxa̱ʼvi xi̱kuu na̱ veʼe ta̱ Asaf. Ni̱na̱ʼa̱na ña̱ táxina tíxa̱ʼvi tá ka̱ʼyína ña̱ salmo á yaa ña̱ xi̱tana nu̱ú Ndióxi̱. Xíʼin iin yaa yóʼo ta̱xina tíxa̱ʼvi ndaʼa̱ Jehová xa̱ʼa̱ ndiʼi ña̱ i̱xava̱ʼara (Sal. 75:1). Ta̱ David xíʼin na̱ veʼe ta̱ Asaf xi̱kuni̱na na̱ʼa̱na nu̱ú Jehová nda̱saa xi̱ndayáʼvi nu̱úna ndiʼi bendición ña̱ ta̱xira ndaʼa̱na. Ta miíyó, ¿nda̱saa kivi kundiku̱nyó yichi̱na?

8, 9. ¿Nda̱saa ni̱na̱ʼa̱ ta̱ apóstol Pablo ña̱ xi̱ndayáʼviní na̱ hermano nu̱úra, ta nda̱saa ndo̱ʼona xíʼin ña̱yóʼo?

⁸ Xi̱ndayáʼviní na̱ hermano nu̱ú ta̱ apóstol Pablo ta ni̱na̱ʼa̱ra ña̱yóʼo nu̱úna xíʼin tu̱ʼun ña̱ xi̱ka̱ʼa̱nra xíʼinna. Xa̱ʼa̱ ña̱yóʼo ndiʼi tiempo xi̱taxira tíxa̱ʼvi ndaʼa̱ Ndióxi̱ xa̱ʼa̱na tá xi̱keʼéra oración. Saátu xíʼin carta ña̱ ka̱ʼyíra ku̱a̱ʼa̱n ndaʼa̱na, ni̱ka̱ʼa̱nra nda̱saa ndáyáʼvina nu̱úra. Ná kotoyó iin ña̱ ka̱ʼyíra. Nu̱ú Romanos 16:1-15, ni̱ka̱ʼa̱nra xa̱ʼa̱ 27 na̱ hermano ta nda̱a̱ ka̱ʼyíra ki̱vi̱na. Ni̱ka̱ʼa̱nra xa̱ʼa̱ ñá Prisca xíʼin ta̱ Áquila ña̱ va̱ʼaní chi̱ndeétáʼanna xíʼinra, ta ni̱ka̱ʼa̱nra xa̱ʼa̱ ñá Febe ña̱ va̱ʼanítu chi̱ndeéñá miíra xíʼin inkaka na̱ hermano. Xa̱ʼa̱ ña̱yóʼo ni̱ka̱ʼa̱n ta̱ Pablo tu̱ʼun va̱ʼa xa̱ʼa̱ ndiʼi na̱ hermano na̱ va̱ʼaní xi̱chika̱a̱ ndee̱ ña̱ keʼéna ña̱ va̱ʼa xíʼin inkana.

⁹ Xi̱kunda̱a̱va-inira ña̱ na̱ yiví ku̱a̱chiva xi̱kuu na̱ hermano. Soo ni saá tándi̱ʼi ka̱ʼyíra carta ña̱ chi̱ndaʼára ndaʼa̱ na̱ cristiano ñuu Roma, ni̱ka̱ʼa̱nra xa̱ʼa̱ ña̱ va̱ʼa ña̱ xi̱kuumiína. Ña̱kán tá ka̱ʼvi na̱ hermano ña̱ carta yóʼo nu̱ú na̱ congregación, ku̱si̱íní-inina ña̱ xi̱niso̱ʼona ña̱ ka̱ʼyí ta̱ Pablo xa̱ʼa̱na. Ta nda̱a̱ va̱ʼaníka ni̱xa̱a̱na ki̱táʼanna xíʼinra. ¿Á íyoyó nda̱a̱ táki̱ʼva íyo ta̱ Pablo ta táxiyó tíxa̱ʼvi ndaʼa̱ na̱ hermano xa̱ʼa̱ ña̱ kéʼéna á xa̱ʼa̱ ña̱ káʼa̱nna?

10. ¿Ndáaña sákuaʼayó xa̱ʼa̱ ña̱ xi̱taxi ta̱ Jesús tíxa̱ʼvi ndaʼa̱ na̱ xi̱ndiku̱nñaʼá?

¹⁰ Ta̱ Jesús ni̱ka̱ʼa̱nra xíʼin na̱ congregación ña̱ Asia Menor, xa̱ʼa̱ ña̱ va̱ʼaní ke̱ʼé na̱ xi̱ndiku̱nñaʼá. Xa̱ʼa̱ na̱ congregación ña̱ Tiatira ni̱ka̱ʼa̱nra: “Xíni̱ ña̱ kéʼún, ña̱ kúʼvi̱-iniún xíniún inkana, ña̱ ndinuʼu-iniún kándíxaún Ndióxi̱, ña̱ va̱ʼa kéʼún chiñu nu̱úra, ña̱ ndakúní íyo iniún, ta ku̱a̱ʼáka kúú ña̱ kéʼún vitin nu̱ú ña̱ xi̱keʼún tá ya̱chi̱” (Rev. 2:19). Su̱ví kuití ni̱ka̱ʼa̱nra xa̱ʼa̱ ña̱ ke̱ʼéna, chi ni̱ka̱ʼa̱nra tu̱ʼun va̱ʼa xíʼinna xa̱ʼa̱ ña̱ va̱ʼaní káchíñuna xíʼin ndiʼi níma̱na. Saátu ta̱xira consejo ndaʼa̱ na̱ xi̱keʼé ña̱ va̱ása va̱ʼa, soo ni saá tá ki̱xáʼara ta saátu tá sa̱ndíʼira, va̱ʼaní tu̱ʼun xi̱niñúʼura ña̱ ni̱ka̱ʼa̱nra xíʼinna (Rev. 2:25-28). Ta̱ Jesús kúú ta̱ níʼi yichi̱ xíʼin ndiʼi congregación ta miíra kúú ta̱ xáʼndachíñu nu̱ú ndiʼiña. Xa̱ʼa̱ ña̱yóʼo va̱ása xíniñúʼu taxira tíxa̱ʼvi ndaʼa̱yó xa̱ʼa̱ ña̱ kéʼéyó, soo ni saá kéʼévaraña. Va̱ʼaníva yichi̱ sa̱ndákoora nu̱ú na̱ anciano.

11. Nda̱a̱ táki̱ʼva káchi Hebreos 12:16, ¿á xi̱ndayáʼvi ña̱ va̱ʼa nu̱ú ta̱ Esaú?

¹¹ Sava na̱ nda̱sakáʼnu Ndióxi̱ tiempo xi̱naʼá, va̱ása nítaxina tíxa̱ʼvi ndaʼa̱ra. Ná ka̱ʼa̱nyó xa̱ʼa̱ ta̱ Esaú. Ni xi̱ndasakáʼnu na̱ yivára Ndióxi̱, va̱ása níxindayáʼvi ña̱ va̱ʼa nu̱ú ta̱yóʼo (kaʼvi Hebreos 12:16). * ¿Ndáaña ke̱ʼéra? Herencia ña̱ ndakiʼinra xa̱ʼa̱ ña̱ kúúra ta̱ nu̱ú ta̱ ka̱ku, ni̱xikóraña ndaʼa̱ ñanira ta̱ loʼo ta̱ xi̱naní Jacob xa̱ʼa̱ iin ko̱ʼo̱ nduchu lenteja ña̱ xi̱xira (Gén. 25:30-34). Tándi̱ʼi, nda̱ndikó-inira xa̱ʼa̱ ña̱  ke̱ʼéra ta ni̱sa̱a̱ra xa̱ʼa̱ ña̱ va̱ása níndakiʼinra bendición xa̱ʼa̱ ña̱ kúúra ta̱ nu̱ú. Soo va̱ása níxiniñúʼu sa̱a̱ra, chi va̱ása nína̱ʼa̱ra ña̱ xi̱ndáyáʼviña nu̱úra.

12, 13. ¿Nda̱saa ni̱na̱ʼa̱ na̱ ñuu Israel ña̱ va̱ása nítaxina tíxa̱ʼvi, ta ndáaña ndo̱ʼona xa̱ʼa̱ ña̱yóʼo?

¹² Íyo ku̱a̱ʼání ña̱ʼa ña̱ ke̱ʼé Jehová xa̱ʼa̱ na̱ ñuu Israel ta xa̱ʼa̱ ña̱yóʼo xi̱niñúʼu taxina tíxa̱ʼvi ndaʼa̱ra. Chi̱ndaʼára u̱xu̱ tu̱ndóʼo nu̱ú na̱ ñuu Egipto ña̱ va̱ʼa ná taxina ku̱ʼu̱n na̱ ñuu Israel. Tándi̱ʼi sa̱kákura miína tá sa̱ndíʼi-xa̱ʼa̱ra na̱ soldado na̱ ñuu Egipto ti̱xin tá mar Rojo. Ku̱si̱íní-inina xa̱ʼa̱ ña̱yóʼo ta ña̱ va̱ʼa taxina tíxa̱ʼvi ndaʼa̱ Ndióxi̱ xi̱tana iin yaa nu̱úra. Soo, ¿nda̱saa tiempo ta̱xina tíxa̱ʼvi ndaʼa̱ra?

¹³ Tá ki̱xi inka tu̱ndóʼo nu̱úna, na̱ndósóna xa̱ʼa̱ ndiʼi ña̱ xa̱a̱ ke̱ʼé Ndióxi̱ xa̱ʼa̱na, ta va̱ása nítaxikana tíxa̱ʼvi ndaʼa̱ra (Sal. 106:7). Biblia káchiña “ndiʼi na̱ ñuu Israel ki̱xáʼana káʼa̱n kúáchina xíʼin ta̱ Moisés ta saátu xíʼin ta̱ Aarón” soo nu̱ú Jehová xa̱ʼa̱ miívara ni̱ka̱ʼa̱n kúáchina (Éx. 16:2, 8) Va̱ása níkutóo Jehová ndiʼi ña̱ ke̱ʼéna, ña̱kán ni̱ka̱ʼa̱nra ña̱ kuvi ndiʼi na̱yóʼo chí nu̱ú ñuʼú yichi̱, soo ta̱ Josué xíʼin ta̱ Caleb, ka̱kuvana (Núm. 14:22-24; 26:65). ¿Ndáaña kivi keʼéyó ña̱ va̱ása kundiku̱nyó yichi̱ na̱ va̱ása táxi tíxa̱ʼvi, tasaá kundiku̱nyó yichi̱ na̱ táxi tíxa̱ʼvi? Ná kotoyó ndáaña kivi keʼéyó.

14, 15. a) ¿Nda̱saa kivi taxi na̱ xa̱a̱ ti̱ndaʼa̱ tíxa̱ʼvi ndaʼa̱ táʼanna? b) Na̱ íyo se̱ʼe, ¿nda̱saa kivi sanáʼa̱na se̱ʼena ña̱ va̱ʼa sakuaʼana taxina tíxa̱ʼvi?

¹⁴ Xíʼin na̱ veʼeyó. Ndiʼi na̱ veʼeyó kúsi̱í-inina tá táxiyó tíxa̱ʼvi ndaʼa̱na xa̱ʼa̱ ña̱ kéʼéna. Tá viíní káʼa̱n xíʼin táʼan na̱ xa̱a̱ ti̱ndaʼa̱, va̱ʼaníka kundoona ta koona ña̱ káʼnu-ini xa̱ʼa̱ táʼanna tá ná keʼéna ña̱ va̱ása va̱ʼa. Ta̱ íyo ñá síʼí náʼa̱ra ña̱ ndáyáʼviñá nu̱úra tá su̱ví kuití xítora ña̱ va̱ʼa ña̱ kéʼéñá chi káʼa̱nra tu̱ʼun va̱ʼa xíʼinñá (Prov. 31:10, 28). Saátu ñá íyo yií, káʼa̱nñá xíʼin yiíñá xa̱ʼa̱ ña̱ ndáyáʼviní ña̱ kéʼéra.

¹⁵ Ndóʼó na̱ íyo se̱ʼe, ¿nda̱saa kivi sanáʼa̱ndó se̱ʼendó ña̱ taxina tíxa̱ʼvi? Ndakaʼánndó ña̱ xíto na̱kán ña̱ kéʼé miíndó á ña̱ káʼa̱nndó. Xa̱ʼa̱ ña̱yóʼo xíniñúʼu taxindó tíxa̱ʼvi ndaʼa̱na tá kéʼéna iin ña̱ʼa xa̱ʼa̱ndó, tasaá chinúundó iin yichi̱ va̱ʼa nu̱úna. Saátu xíniñúʼu sanáʼa̱ndóna ña̱ taxina tíxa̱ʼvi ndaʼa̱ inkana. Chindeétáʼanndó xíʼinna ña̱ va̱ʼa ná kunda̱a̱-inina ña̱ xíniñúʼu taxina tíxa̱ʼvi xíʼin ndiʼi níma̱na, ta  ña̱ káʼa̱nna kivi chindeétáʼanña xíʼin inkana. Ná kotoyó iin ejemplo, iin ñá hermana ñá naní Clary káchiñá: “Tá xi̱kuumií siʼíi̱ 32 ku̱i̱ya̱ ki̱xáʼañá sákuaʼnu miíñá u̱ni̱ se̱ʼeñá. Tá xi̱kuumií yi̱ʼi̱ táʼan ku̱i̱ya̱ ña̱ xi̱kuumiíñá tá ke̱ʼéñá ña̱yóʼo, nda̱kanixi̱níi̱ ña̱ i̱xayo̱ʼvi̱níñá xíʼinñá ña̱ sakuaʼnuñá ndi̱ʼi̱. Ña̱kán ta̱xii̱ tíxa̱ʼvi ndaʼa̱ñá xa̱ʼa̱ ndiʼi ña̱ ke̱ʼéñá xa̱ʼa̱ndi̱. Sa̱kán ni̱ka̱ʼa̱nñá xíʼi̱n ña̱ va̱ása nándósóñá xa̱ʼa̱ tu̱ʼun ña̱ ni̱ka̱ʼi̱n xíʼinñá, tá ndákaʼánñá xa̱ʼa̱ tu̱ʼun yóʼo kúsi̱íní-iniñá”.

16. Ka̱ʼa̱n xa̱ʼa̱ iin ejemplo ña̱ náʼa̱ nu̱úyó nda̱chun ndáyáʼviní ña̱ taxiyó tíxa̱ʼvi ndaʼa̱ na̱ hermano.

¹⁶ Xíʼin na̱ hermano na̱ congregación. Ndásandeéyó-ini na̱ hermano tá táxiyó tíxa̱ʼvi ndaʼa̱na. Ná kotoyó ña̱ ndo̱ʼo ta̱ Jorge, iin ta̱ anciano ta̱ kúúmií 28 ku̱i̱ya̱. Xa̱ʼa̱ ña̱ ki̱ʼinra iin kue̱ʼe̱ ña̱ ndeéní, iin yo̱o̱ va̱ása níxa̱ʼa̱nra reunión. Tá tuku ki̱xáʼara xáʼa̱nra, ni va̱ása níxi̱kuchiñu taxira discurso. Ta̱yóʼo káchira: “Nda̱kavaní-inii̱ xa̱ʼa̱ ña̱ va̱ása níxi̱kuchiñu keʼíi̱ sava ña̱ʼa ti̱xin congregación. Soo iin ki̱vi̱ tá ndi̱ʼi reunión, iin ta̱ hermano ni̱ka̱ʼa̱nra xíʼi̱n: ‘Kúnii̱ taxii̱ tíxa̱ʼvi ndaʼún chi va̱ʼaní yichi̱ chínúun nu̱ú na̱ veʼi̱. Ku̱tóoníndi̱ discurso ña̱ xa̱a̱ ta̱xiún ndiʼi ku̱i̱ya̱ yóʼo. Va̱ʼaní chi̱ndeétáʼún xíʼinndi̱ ña̱ va̱ʼa kuaʼnundi̱ ti̱xin ñuu Ndióxi̱ʼ. Mií tiempo ña̱ ni̱ka̱ʼa̱nra ña̱yóʼo xíʼi̱n ku̱si̱íní-inii̱ ta ki̱xáʼi̱ xákui̱. Mií ña̱ xíniñúʼu kuniso̱ʼi̱ kúú ña̱ ni̱ka̱ʼa̱nra xíʼi̱n”.

17. ¿Nda̱saa kivi taxiyó tíxa̱ʼvi ndaʼa̱ Jehová xa̱ʼa̱ ndiʼi ña̱ táxira ndaʼa̱yó nda̱a̱ táki̱ʼva káʼa̱n Colosenses 3:15?

¹⁷ Xíʼin Ndióxi̱ ta̱ va̱ʼaní-ini. Jehová táxira ndiʼi ña̱ xíniñúʼuyó ña̱ va̱ʼa sakuaʼayó xa̱ʼa̱ra. Tá kúú ña̱ sákuaʼayó xa̱ʼa̱ra ti̱xin reunión, nu̱ú revista ta saátu nu̱ú sitio ña̱ Internet. Sana sava yichi̱ kútóoníyó iin ña̱ sa̱kuaʼayó xíʼin iin discurso, iin artículo á ña̱ xi̱niyó nu̱ú canal ña̱ JW Broadcasting ta ndákanixi̱níyó ña̱ míí ña̱ xíniñúʼuyó kúú ña̱yóʼo. Ña̱kán, ¿ndáaña kivi keʼéyó ña̱ va̱ʼa na̱ʼa̱yó nu̱ú Jehová ña̱ táxiyó tíxa̱ʼvi ndaʼa̱ra xa̱ʼa̱ ña̱yóʼo? (Kaʼvi Colosenses 3:15). * Iin ña̱ kivi keʼéyó kúú ña̱ tá kéʼéyó oración ná taxiyó tíxa̱ʼvi ndaʼa̱ra (Sant. 1:17).

18. ¿Nda̱saa náʼa̱yó ña̱ ndáyaʼviní veʼe nu̱ú ndátakayó?

¹⁸ Inka ña̱ kivi keʼéyó ña̱ va̱ʼa na̱ʼa̱yó ña̱ táxiyó tíxa̱ʼvi ndaʼa̱ Jehová kúú ña̱ kundaayó ta ndaya̱kúnyó veʼe nu̱ú ndásakáʼnuyóra.  Xa̱ʼa̱ ña̱yóʼo xíniñúʼu ndaya̱kún ni̱ʼiyó ta ndasaviíyó veʼe nu̱ú ndátakayó. Saátu na̱ kíʼin kuenta xíʼin sonido ti̱xin ña̱ congregación va̱ʼaní ndáanaña. Tá viíní ndáayó ña̱yóʼo ku̱a̱ʼáka tiempo kivi kuniñúʼuyóña ta va̱ása kuniñúʼuyó ku̱a̱ʼá xu̱ʼún ña̱ ndasaviíyóña. Saá kivi kuniñúʼuyó xu̱ʼún yóʼo ña̱ keʼéyó á ndasaviíyó inka salón ña̱ íyo iníísaá ñuyǐví.

19. ¿Ndáaña sákuaʼayó xíʼin ña̱ ndo̱ʼo iin ta̱ superintendente ña̱ circuito xíʼin ñá síʼíra?

¹⁹ Xíʼin na̱ ndeéní káchíñu xa̱ʼa̱yó. Tá táxiyó tíxa̱ʼvi ndaʼa̱ inkana ña̱yóʼo kivi chindeétáʼan xíʼinna ña̱ va̱ʼa ya̱ʼana nu̱ú tu̱ndóʼo ña̱ ndóʼona. Ná kotoyó ndáaña ndo̱ʼo iin ta̱ superintendente ña̱ circuito xíʼin ñá síʼíra. Iin ki̱vi̱ ña̱ vi̱xinní, ni̱xa̱ʼa̱nna na̱túʼunna xa̱ʼa̱ Ndióxi̱ soo ku̱naanína tá ndi̱kóna. Xa̱ʼa̱ ña̱ vi̱xinní ni̱xi̱yo, ñá síʼíra va̱ása nínasa̱makañá, saá ndíxiñá ti̱ko̱to̱ xa̱ʼa̱ ña̱ vi̱xin ta ni̱kisi̱nñá. Tá nda̱kooñá inka ki̱vi̱ ni̱ka̱ʼa̱nñá xíʼin yiíñá ña̱ sana va̱ása kivika keʼéñá chiñu kán. Soo míí ki̱vi̱ kán ki̱xaa iin carta ndaʼa̱ñá nu̱ú káʼa̱nna xíʼinñá ña̱ táxina tíxa̱ʼvi ndaʼa̱ñá xa̱ʼa̱ ndiʼi chiñu ña̱ kéʼéñá ta saátu xa̱ʼa̱ ña̱ nda̱kú íyo iniñá ni íxayo̱ʼvi̱ña xíʼinñá chi semana tá semana xa̱a̱ síín síín congregación xáʼa̱nñá. Ta̱yóʼo káchira: “Nda̱a̱ níma̱ñá ni̱xa̱a̱ tu̱ʼun yóʼo ta va̱ása níka̱ʼa̱nkañá ña̱ kúni̱ñá sandákooñá chiñu yóʼo. Nda̱a̱ sava yichi̱ tá miíi̱ xi̱ndakava-inii̱, miíñá xi̱taxi ndee̱ ndaʼíi̱”. Na̱ matrimonio yóʼo xi̱kuuna superintendente ña̱ circuito yatin 40 ku̱i̱ya̱.

20. ¿Ndáaña xíniñúʼu chika̱a̱yó ndee̱ keʼéyó ndiʼi ki̱vi̱, ta nda̱chun?

²⁰ Ndiʼi ki̱vi̱ ná chika̱a̱yó ndee̱ ña̱ va̱ʼa na̱ʼa̱yó ña̱ táxiyó tíxa̱ʼvi. Sana ña̱ káʼa̱nyó xíʼin ña̱ kéʼéyó kúú ña̱ kivi chindeétáʼan xíʼin savana ña̱ ya̱ʼana nu̱ú tu̱ndóʼo ña̱ íyo ñuyǐví yóʼo. Saátu tá táxiyó tíxa̱ʼvi va̱ʼaníka xa̱a̱yó kitáʼanyó xíʼin inkana. Soo ña̱ ndáyáʼvika kúú ña̱ kundiku̱nyó yichi̱ mií Jehová.