1. Omusamaria gumwe ngoka a li a aludhwa kuJesus, okwa li a ulike ngiini olupandu?

AALUMENTU yamwe omulongo, oya li monkugo yi na onkambe. Oya li ye na oshilundu nokaya li ye na etegameno kutya onaya ka aluke. Esiku limwe opo ye li po, oya monene Jesus kokule, ngoka e li Omulongi Omunene. Oya kala haya uvu kutya Jesus oha aludha omikithi adhihe, noya li ye shi shi kutya ota vulu oku ya aludha wo. Onkee oya igidha ya ti: “Muhongi Jesus, tu sila ohenda!” Jesus okwe ya puyo e te ya aludha. Oya li shili ye mu pandula, omolwohenda ye. Nonando ongawo, gumwe gwomuyo, ka li owala e uvite olupandu, ihe okwa li a ulukile Jesus olupandu * lwe. Omulumentu ngoka Omusamaria a aludhwa kuJesus, okwa li e uvite kutya oku na okuhambelela Kalunga “newi lyopombanda.” — Luk. 17:12-19.

2-3. (a) Omolwashike tashi vulika tu kale inaatu ulika olupandu? (b) Oshike tatu ka kundathana moshitopolwa shika?

² Ngaashi Omusamaria ngoka, natse otwa hala tu kale hatu pandula mboka ye na ohenda. Ihe omathimbo gamwe, otashi vulika tu dhimbwe oku ya pandula moohapu nenge miilonga.

³ Moshitopolwa shika, otatu ka kundathana kutya omolwashike sha simana tu kale hatu pandula yalwe moohapu nomiilonga. Otatu ki ilonga kombinga yiiholelwa yayamwe mboka ya popiwa mOmbiimbeli ya li ya ulike olupandu naamboka ya li inaaye shi  ninga. Opo nduno, otatu ka kundathana omikalo dhokondandalunde moka tatu vulu okuulika olupandu.

4-5. Omolwashike tu na okupandula yalwe?

⁴ Jehova okwe tu tulila po oshiholelwa shokupandula yalwe. Omukalo gumwe he shi ningi, omokuyambeka mboka haye mu nyanyudha. (2 Sam. 22:21; Eps. 13:6; Mat. 10:40, 41) Omanyolo otage tu ladhipike taga ti: “Kambadhaleni ano okuholela Kalunga, oshoka one oyana aaholike.” (Ef. 5:1) Onkee ano, etompelo lya simanenena kutya omolwashike tu na okuulika olupandu, olyo kutya otwa hala okuholela Jehova.

⁵ Natu taleni etompelo ekwawo kutya omolwashike tu na okupandula yalwe. Okupandula okwa fa iikulya iitoye. Ohayi ende po nawa unene, uuna to yi li pamwe nayalwe. Uuna tu uvite kutya aantu oye tu pandula, ohashi tu nyanyudha. Uuna twa pandula yalwe, ohashi ya nyanyudha wo. Omuntu ngoka twa pandula, ohe shi mono mo kutya sho e tu kwathele nenge e tu pe oshinima shontumba shoka twa pumbwa, oshe tu kwathela lela. Oshizemo? Ekwatathano lyetu nomuntu ngoka ohali kolo.

6. Efaathanitho lini li li pokati koohapu dholupandu neyapula lyoshingoli?

⁶ Okupandula yalwe, oshinima sha simana. Ombiimbeli otayi ti: “Oohapu tadhi popiwa pethimbo lyo opala, odho iiyapula yoshingoli moshiyaha shoshisiliveli.” (Omayel. 25:11) Dhiladhila owala keyapula lyoshingoli kutya otali ka monika ngiini, uuna lya tulwa moshiyaha shoshisiliveli! Dhiladhila wo kutya otashi ka kala shi na ongushu yi thike peni! Oto ka kala wu uvite ngiini, ngele owa pewa omagano ga tya ngawo? Odhoshili kutya oohapu ndhoka wa popi, sho wa pandula yalwe, otadhi vulu okuyelekwa neyapula lyoshingoli moshiyaha shoshisiliveli. Shimwe ishewe, eyapula lyoshingoli otali vulu okukala ethimbo ele. Sha faathana, oohapu dhoye dholupandu, otashi vulika dhi kale  hadhi dhimbulukiwa kuyalwe nokukala ye dhi lenga onkalamwenyo yawo ayihe.

7. Ngaashi sha popiwa mEpisalomi 27:4, David okwa ulike ngiini olupandu nosho wo aanyoli yalwe yomapisalomi?

⁷ Aapiya yaKalunga oyendji yopethimbo lyonale, oya li ya ulike olupandu. Gumwe gwomuyo, oDavid. (Lesha Episalomi 27:4.) Okwa li a pandula lela elongelokalunga lyashili, nolupandu ndoka okwa li e li ulike miilonga. Okwa li a gandja oshindji shomeliko lye, shi kwathele mokutunga otempeli. Oluvalo lwaAsaf olwa li lwa ulike olupandu, mokunyola omapisalomi nenge oondjimbohambelelo. Meimbilo limwe, oya pandula Kalunga noya ulike kutya oya pandula “iikumithalonga” ye. (Eps. 75:1) Osha yela kutya David noluvalo lwaAsaf oya li ya hala okuulukila Jehova kutya oye mu pandula shi thike peni, omolwomayambeko ngoka e ya pe. Mbela ito vulu okudhiladhila omikalo moka to vulu okuholela aanyoli mboka yomapisalomi?

8-9. Omuyapostoli Paulus okwa li a pandula ngiini ooitaali ooyakwawo, noshizemo osha li shini?

⁸ Omuyapostoli Paulus okwa li a lenga ooitaali ooyakwawo nokwa li e shi ulike momukalo moka a popi kombinga yawo. Okwa li aluhe ha pandula Kalunga omolwawo, moku ya kwatela momagalikano ge. Okwa li wo e ya pandula moontumwafo ndhoka e ya nyolele. Moovelise 15 dhopetameko dhontopolwa 16 yAaroma Paulus okwa tumbula mo ooitaali ooyakwawo ye li 27. Okwa popi kondandalunde kutya Priska naAkula oya li “ya hupula oomwenyo dhawo,” omolwe. Okwa popi wo kutya Foibe “okwa yakula aantu oyendji” naye a kwatela mo. Okwa li a pandula ooitaali mboka, omolwiilonga yawo yuudhiginini. — Rom. 16:1-15.

⁹ Paulus okwa li e shi kutya ooitaali ooyakwawo inaya gwanenena. Pehulilo lyontumwafo ndjoka a li a nyolele Aaroma, okwa gandja eitulomo komaukwatya gawo omawanawa. Dhiladhila owala kunkene aamwatate naamwameme ya li ya ladhipikwa, sho ontumwafo ndjoka ya leshwa megongalo! Osha yela kutya shoka osha li sha koleke ekwatathano lyawo naPaulus. Mbela oho pandula ngaa aamwatate naamwameme megongalo lyeni, omolwiinima iiwanawa mbyoka ya popya nenge ya ninga?

10. Otatu vulu okwiilonga ko shike komukalo ngoka Jesus a pandula aalanduli ye?

¹⁰ Metumwalaka ndyoka Jesus a li a gandja komagongalo gontumba gomuAsia Eshona, Jesus okwa li e ya pandula, omolwiilonga yawo. Pashiholelwa, metumwalaka lye kegongalo lyomoshilando Tiatira, okwa tameke ta ti: “Iilonga yoye ondi yi shi; ohole yoye, okwiinekelwa kwoye, eyakulo neidhidhimiko lyoye onde yi tseya. Onda tseya kutya ngashingeyi oto ningi oshindji shi vule petameko.” (Eh. 2:19) Jesus ina tumbula owala iilonga yawo yuudhiginini, ihe okwe ya pandula, omolwomaukwatya gawo ngoka ge ya inyengitha ye yi longe. Nonando Jesus okwa li a pumbwa okugandja omayele kuyamwe muTiatira, okwa tameke nokwa hulitha etumwalaka lye noohapu tadhi tsu omukumo. (Eh. 2:25-28) Dhiladhila koonkondopangelo ndhoka Jesus e na e li omutse gwegongalo. Ina pumbwa oku tu pandula, omolwiilonga mbyoka hatu mu longele. Nonando ongawo, ohe tu pandula. Ina tulila po tuu aakuluntugongalo oshiholelwa oshiwanawa!

11. Ngaashi sha popiwa mAahebeli 12:16, Esau okwa li a tala ko ngiini iinima iiyapuki?

¹¹ Shiyemateka, yamwe mboka ya popiwa mOmbiimbeli kaya li ya ulike olupandu. Pashiholelwa, nonando Esau okwa li a putudhwa kaavali ye hole noya simaneka Jehova, ka li e na olupandu lwiinima iiyapuki. (Lesha Aahebeli 12:16.) Okwaaha pandula kwe okwe ya ngiini puuyelele? Esau okwa li a landitha po nziya uuthemba we wuusheeli komumwayinamati omushona,  Jakob, opo a pewe okayaha koshigali. (Gen. 25:30-34) Lwanima, Esau okwe ki ilya ominwe, omolwetokolo ndyoka a ninga. Ihe ka li e na okugeya, oshoka ka li e na olupandu lwuusheeli we. Onkee ka li a gwana okunyenyeta, sho inaa mona omayambeko guuthemba wuusheeli.

12-13. Ongiini Aaisraeli ya li inaaya ulika olupandu, noshizemo oshini?

¹² Aaisraeli oya li ye na omatompelo ogendji gokuulika olupandu. Oya li ya mangululwa mo muupika, konima sho Jehova a etele Aaegipiti Omageelo Omulongo. Opo ihe Kalunga okwa li e ya hupitha, sho a hanagula po etangakwiita alihe lyAaegipiti mEfuta Etiligane. Aaisraeli oya li ya pandula noonkondo, e taya imbile Jehova eimbilohambelelo lyesindano. Mbela oya tsikile ngaa okukala nolupandu?

¹³ Sho Aaisraeli ye ki iyadha momashongo galwe, oya dhimbwa nziya kombinga yiinima ayihe mbyoka Jehova e ya ningila. Kungawo, kaya li ya ulike olupandu. (Eps. 106:7) Ngiini mbela? Ombiimbeli otayi ti kutya “mombuga . . . oya ngungutulile Moses naAaron,” ihe paushili wo wene, oya li taya ngungutulile Jehova. (Eks. 16:2, 8) Iikala yawo mbyoka oya li ya uvitha nayi Jehova. Konima okwa uvaneke kutya oshigwana ashihe shaIsraeli otashi ka sila mombuga, kakele kaJosua naKaleb. (Num. 14:22-24; 26:65) Natu taleni nkene tatu vulu okuyanda iiholelwa mbyoka iiwinayi nokuholela mbyoka iiwanawa.

14-15. (a) Ongiini aaihokani taya vulu okuulukilathana olupandu? (b) Ongiini aavali taya vulu okulonga aanona yawo ya kale haya pandula?

¹⁴ Muukwanegumbo. Uukwanegumbo awuhe ohawu mono uuwanawa, uuna kehe gumwe megumbo ha pandula. Ngele aaihokani oya kala haya pandulathana, ekwatathano lyawo otali kolo. Ohashi kala wo oshipu okudhiminathana po. Omusamane ngoka ha pandula omukulukadhi gwe, iha ndhindhilike owala iinima iiwanawa mbyoka ha popi noha ningi, ihe ohe “mu tanga” wo. (Omayel. 31:10, 28) Omukulukadhi omunandunge, oha lombwele omusamane gwe kondandalunde shoka a pandula kombinga ye.

¹⁵ Aavali, ongiini tamu vulu okulonga aanona yeni ya kale haya pandula yalwe? Dhimbulukweni kutya aanona yeni otaya ka holela shoka hamu popi naashoka hamu ningi. Onkee ano, ya tulilii po oshiholelwa oshiwanawa moku ya pandula, uuna ye mu ningile sha. Shimwe ishewe, longa aanona yoye ya kale haya ti tangi, uuna aantu ye ya ningile sha. Kwathela wo aanona yoye ya mone kutya okuulika  olupandu, oshinima hashi zi komutima nonokutya oohapu dhawo ohadhi ti sha lela. Pashiholelwa, omukiintu gumwe omugundjuka gwedhina Clary, okwa ti: “Sho meme a li e na omimvo 32, tate okwe tu thigi po ombaadhilila, e ta yi. Meme okwa li e na oku tu putudha atuhe yatatu oye awike. Sho nda gwanitha omimvo 32, ondi ipula nkene sha li oshidhigu kuye pethimbo a li e na omimvo ndhoka. Onkene onde mu lombwele kutya onde mu pandula lela, sho a ningi omaiyambo, opo e tu putudhe naamwamememati. Omathimbo opo ga zi ko, okwa lombwele ndje kutya oohapu dhandje odhe mu guma komutima, ohe dhi dhiladhila nohadhi mu nyanyudha aluhe.”

16. Gandja oshiholelwa shankene okupandula yalwe taku vulu oku ya tsa omukumo.

¹⁶ Megongalo. Uuna tatu pandula aamwatate naamwameme, ohatu ya tsu omukumo. Pashiholelwa, omukuluntugongalo Jorge gwomimvo 28, okwa li a akukilwa kuuvu wa kwata miiti. Uule womwedhi ka li a vulu okuya kokugongala. Nokuli nokonima sho a tameke okuya ko, ka li ta vulu okukwatela komeho megongalo. Jorge okwa ti: “Onda li ndi uvite ndaa na oshilonga, omolwomangambeko ngoka nda li ndi na naasho nda li itaandi vulu okuungaunga niinakugwanithwa megongalo. Ihe esiku limwe konima yokugongala, omumwatate gumwe okwa lombwele ndje a ti: ‘Onda hala oku ku pandula, omolwoshiholelwa oshiwanawa shoka wa tulila po uukwanegumbo wandje. Omimvo dha zi ko, otwa kala tatu tyapula lela iipopiwa yoye. Oye tu kwathela tu kale tu na eitaalo lya kola.’ Osha gumu ndje noonkondo, e tandi tameke okuhukula ehodhi. Shoka a popi, osho lela nda li nda pumbwa okuuva.”

17. Ngaashi sha popiwa mAakolossa 3:15, ongiini tatu vulu okuulika kutya otwa pandula Jehova, sho he tu pe omagano?

¹⁷ Okupandula Kalunga ketu ngoka ha gandja. Jehova okwe tu pa iikulya oyindji yopambepo. Pashiholelwa, ohatu pewa omayele okupitila mokugongala, miileshomwa nokepandja lyetu lyokointaneta. Mbela owa uva nale oshipopiwa, wa lesha oshitopolwa nenge wa tala opolohalama yontumba, e to ti: ‘Shika osho naanaa nda li nda pumbwa’? Ongiini tatu vulu okuulika kutya otwa pandula Jehova? (Lesha Aakolossa 3:15.) Omukalo gumwe, omokukala tatu mu pandula aluhe megalikano, omolwomagano ngoka omawanawa. — Jak 1:17.

18. Omomikalo dhini tatu vulu okuulika kutya otwa pandula Oshinyanga shetu shUukwaniilwa?

¹⁸ Ohatu ulike wo kutya otwa pandula Jehova, ngele tatu kaleke omahala moka hatu gongala ga yela. Ohatu opaleke aluhe nokukaleka  Iinyanga yUukwaniilwa monkalo ombwanawa. Mboka haya longitha iikwamashina yegongalo, ohaye shi ningi nuukeka. Ngele otwa kaleke Iinyanga yUukwaniilwa monkalo ombwanawa, otayi ka kala po ethimbo ele nokwoopalekululwa owala kashona. Kungawo, otatu ka kwatela po oshimaliwa, opo shi vule okulongithwa mokutunga nomokwoopalekulula Iinyanga yUukwaniilwa yilwe muuyuni awuhe.

19. Owi ilonga ko shike koshimoniwa shomutonatelishikandjo gumwe nomukulukadhi gwe?

¹⁹ Okupandula mboka haya longo nuudhiginini, omolwetu. Uuna tatu pandula yalwe, oohapu dhetu ohashi vulika dhi ya kwathele ya lundulule etaloko lyawo kombinga yomashongo moka ye li. Natu taleni koshimoniwa shomutonatelishikandjo gumwe nomukulukadhi gwe. Esiku limwe pethimbo lyuutalala sho ya zi muukalele, oya shuna kehala hoka haya zi, ya vulwa noonkondo. Omukulukadhi gwe okwa li a kotha nondjatha ye kolutu, oshoka okwa li uutalala wamemememe. Sho kwa shi, okwa lombwele omusamane gwe kutya ita vulu we okutsikila niilonga yuuyendi. Lwanima ongula ndjoka, otwa yakula ontumwafo ya za koshitayimbelewa, oye ya nuninwa. Montumwafo moka okwa li a pandulwa, omolwuukalele we neidhidhimiko lye. Montumwafo moka, aamwatate oye shi koleke kutya oshidhigu okutembuka oshiwike kehe. Omusamane gwe ota ti: “Ontumwafo ndjoka oya li ye mu guma noka li we a popi kutya ota thigi po iilonga yuuyendi. Nokuli, iikando oyindji okwa kala nokutsa ndje omukumo ndi tsikile niilonga mbyoka, uuna nda kwatiwa kedhiladhilo lyoku yi etha po.” Aaihokani mboka oya kala miilonga yuuyendi konyala uule womimvo 40.

20. Oshike tu na okukambadhala okuninga esiku kehe, nomolwashike?

²⁰ Esiku kehe, natu kambadhaleni okupandula yalwe moohapu nomiilonga. Oohapu dhetu tadhi zi komutima nenge oonkantu dhetu oombwanawa otashi vulika odho gumwe a pumbwa, opo a vule okuungaunga nomikundu esiku kehe, muuyuni mbuka mu na aantu ihaaya pandula. Okupandula yalwe ohaku koleke ekwatathano lyetu nayo, ndyoka tali vulu okukalelela. Shoka sha simanenena, otatu ka holela Tate yetu, Jehova, ngoka ha gandja noha pandula.